(ត្បូងឃ្មុំ)៖ ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍គណៈកម្មាធិការកណ្តាល និងជាអគ្គលេខាធិការគណៈចលនាមហាជននៃគណៈកម្មាធិការកណ្តាលគណបក្សប្រជាជនកម្ពុជា អញ្ជើញជាអធិបតីក្នុងពិធីប្រកាសតែងតាំងប្រធានគណៈចលនាមហាជនខេត្តត្បូងឃ្មុំ និងសំណេះសំណាលជាមួយរចនាសម្ព័ន្ធគណៈចលនាមហាជនខេត្ត នៅមន្ទីគណបក្សខេត្ត។ ពិធីនេះមានការអញ្ជើញចូលរួមពីសំណាក់ ឯកឧត្តម គណៈប្រតិភូអគ្គលេខាធិការដ្ឋានគណៈចលនាមហាជន ថ្នាក់ដឹកនាំគណៈកម្មាធិការបក្ស គណៈចលនាមហាជនខេត្ត និងសមាជិក សមាជិកា គណៈចលនាមហាជនទូទាំងខេត្ត សរុបប្រមាណ ២៤០នាក់ នារសៀលថ្ងៃទី២១ ខែវិច្ឆិកា ឆ្នាំ២០២៤។បន្ទាប់ពីរបាយការណ៍ស្វាគមន៍របស់ឯកឧត្តមប្រធានគណៈប្រចាំការ និងការប្តេជ្ញាចិត្តរបស់ឯកឧត្តម ប៉ែន កុសល្យ ប្រធានគណៈចលនាមហាជនខេត្តដែលទើបតែទទួលបានការតែងតាំងថ្មី រួចមក ឯកឧត្តម ហ៊ុន ម៉ានី បានថ្លែងអំណរគុណដល់គណៈកម្មាធិការបក្ស និងគណៈចលនាមហាជនខេត្តដែលបានខិតខំប្រឹងប្រែង និងបន្តអនុវត្តកិច្ចការងារតាមទំនួលខុសត្រូវ រួមទាំងសម្រេចបាននូវសមិទ្ធផលនានានៅក្នុងខេត្តត្បូងឃ្មុំ។ ឯកឧត្តមបានគូសបញ្ជាក់ថា ភាពជោគជ័យនៃលទ្ធផលបោះឆ្នោតជ្រើសតាំងតំណាងរាស្រ្តកាលពី ២០២៣ ដែលកើតចេញពីការជឿទុកចិត្តរបស់ប្រជាជន មកលើគណបក្ស និងការខិតខំប្រឹងប្រឹងរបស់សមាជិក សមាជិកាម្នាក់ៗ ក្នុងការនាំយកជ័យជំនះជូនគណបក្ស។ឯកឧត្តមបានលើកឡើងនូវសមិទ្ធផលសំខាន់ៗដែលរាជរដ្ឋាភិបាលនីតិកាលទី៧ សម្រេចបាន ដោយឯកឧត្តមបានគូសបញ្ជាក់ថា សមិទ្ធផលនៃការដឹកនាំរាជរដ្ឋាភិបាលរយៈពេល ១ ឆ្នាំ ៣ខែកន្លងមកនេះ បានបង្ហាញពីសមត្ថភាពនៃការដឹកនាំរបស់សម្តេចមហាបវរធិបតី យ៉ាងច្បាស់ក្នុងការថែរក្សា និងបន្តបេសកកម្មដឹកនាំប្រទេសជាតិ ក្រោមម្លប់នៃសុខសន្តិភាព។ចុងបញ្ចប់នៃកម្មវិធីឯកឧត្តមបានអំពាវដល់សមាជិក សមាជិកាបក្សទាំងអស់ឱ្យបន្តរក្សានូវអំពើល្អ ភាពជិតស្និត និងផ្ដល់ភាពកក់ក្ដៅជូនប្រជាជនគ្រប់កាលៈទេសៈ ដើម្បីរក្សាបាននូវការជឿទុកចិត្តពីសំណាក់ប្រជាពលរដ្ឋ៕

(អន្តរជាតិ)៖ តុលាការថៃបានសម្រេចកាត់ទោសប្រហារជីវិតដល់ស្រ្តីម្នាក់ ដែលត្រូវបានចោទប្រកាន់ពី បទបំពុលសម្លាប់មនុស្សយ៉ាងហោចណាស់រាប់សិបនាក់ ដែលជាសាលក្រមដំបូងក្នុងសំណុំរឿង ឃាតកម្មដ៏ល្បីមួយ។អ្នកនាង Sararat Rangsiwuthaporn បានសម្លាប់មិត្តភ័ក្តិរបស់នាងកាលពីឆ្នាំមុន ដោយការដាក់អាហារ ជនរងគ្រោះជាមួយនឹងសារធាតុ cyanide បន្ទាប់មកបានលួចទ្រព្យសម្បត្តិពីនាងដែលមានតម្លៃជាង $4400 នេះបើយោងតាមសេចក្តីសង្ខេបនៃសាលក្រមរបស់តុលាការក្រុងបាងកកកាលពីថ្ងៃពុធ។ចៅក្រមបាននិយាយក្នុងអំឡុងពេលសវនាការរយៈពេលបីម៉ោងនេះ ទូរទស្សន៍ NBT Connext ដែលគ្រប់គ្រងដោយរដ្ឋាភិបាលបានរាយការណ៍ថាជនល្មើសជាអ្នកញៀនល្បែង បានប្រែទៅជាឃាតកម្ម និងប្លន់ ដើម្បីសងបំណុលរបស់នាង។ការយកចិត្តទុកដាក់របស់ជាតិលើករណីនេះ ត្រូវបានជំរុញដោយសារទំនាក់ទំនងរបស់នាងSararat ជាមួយអតីតស្វាមីរបស់នាង ដែលជាអតីតមន្ត្រីប៉ូលីសជាន់ខ្ពស់ និងការមានផ្ទៃពោះរបស់នាង នៅពេល ដែលនាងត្រូវបានចាប់ខ្លួនកាលពីខែឧសភាកន្លងទៅ ពាក់ព័ន្ធនឹងការស្លាប់គួរឱ្យសង្ស័យរបស់ Siriporn Khanwong ដែលបង្កឱ្យមានការស៊ើបអង្កេតយ៉ាងទូលំទូលាយ។ ការពុល cyanide ផ្សេងទៀតដែលមិនអាចដោះស្រាយបាន។ប៉ូលីសបានប្រាប់ CNN ថាស្ត្រីទាំងពីរនាក់នេះត្រូវបានគេឃើញជាមួយគ្នា នៅលើវីដេអូ CCTV មុនពេល Siriporn ដួលសន្លប់និងស្លាប់។ប៉ូលីសបានប្រាប់ CNN កាលពីឆ្នាំមុនថា ការធ្វើកោសល្យវិច័យរបស់ Siriporn បានរកឃើញដាន នៃសារធាតុ cyanide នៅក្នុងរាងកាយរបស់នាង ដែលការស៊ើបអង្កេតរបស់ប៉ូលីសក្រោយមក បានបង្ហាញថា ជាកត្តាទូទៅក្នុងចំណោមជនរងគ្រោះដែលបានញ៉ាំ ឬផឹកជាមួយជនសល្មើសឈ្មោះ Sararat មុនពេលពួកគេស្លាប់៕

(ភ្នំពេញ)៖ កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស (TVET 1.5M) ដែលត្រូវបានរាជរដ្ឋាភិបាលកម្ពុជាដាក់ឱ្យអនុវត្តកាលពីខែវិច្ឆិកា ឆ្នាំ២០២៣ កន្លងទៅគឺមានរយៈកាលមួយឆ្នាំហើយគិតត្រឹមខែវិច្ឆិកា ឆ្នាំ២០២៤ ក្នុងនោះអ្នកជំនាញសេដ្ឋកិច្ចនៅកម្ពុជាបានវាយតម្លៃថា កម្មវិធីបណ្តុះបណ្តាលថ្នាក់ជាតិរបស់រាជរដ្ឋាភិបាលនេះបានក្លាយទៅជាថ្នាលបណ្តុះបណ្តាលកម្លាំងជំនាញមួយយ៉ាងសំខាន់សម្រាប់កម្ពុជា ហើយតាមរយៈសន្ទុះកើនឡើងនៃកម្លាំងជំនាញនៅក្នុងស្រុកនេះគឺស្របតាមរបត់ថ្មីមួយ ក្នុងការកែប្រែទិសដៅវិនិយោគបរទេសនៅកម្ពុជា ដែលនឹងអាចប្រែក្លាយខ្លួនយ៉ាងឆាប់រហ័សក្នុងការចូលរួមប្រកួតប្រជែងលំហូរវិនិយោគនៅតំបន់អាស៊ាន និងសកលលោក។ បណ្ឌិត ឈាង វណ្ណារិទ្ធ នាយកប្រតិបត្តិវិទ្យាស្ថានចក្ខុវិស័យអាស៊ី បានគូសបញ្ជាក់ថា កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាលកម្ពុជាដែលអាចទាក់ទាញយុវជនចូលរៀនជំនាញបានជាង៧មុឺននាក់ក្នុងរយៈពេលឆ្នាំមកនេះ វា​ពិត​ជា​ដំណើរ​ការ​ដ៏​គួរ​ឱ្យ​កត់​សម្គាល់ និង​ជាសមិទ្ធផល​ដ៏ល្អប្រពៃក្នុង​លក្ខខណ្ឌ​នៃ​ការ​អភិវឌ្ឍ​ជំនាញ និង​ការ​បង្កើន​ជំនាញនៅកម្ពុជា។ នាយកប្រតិបត្តិវិទ្យាស្ថានចក្ខុវិស័យអាស៊ីរូបនេះបន្តថា ការអភិវឌ្ឃន៍កម្លាំងជំនាញគឺជារឿងចាំបាច់ណាស់នៅក្នុងយុគសម័យអភិវឌ្ឍន៍សេដ្ឋកិច្ចប្រកបដោយចីរភាពនាពេលបច្ចុប្បន្ន កម្ពុជាចាំបាច់ត្រូវ​ការ​កម្លាំង​ពលកម្ម​ជំនាញ​ដើម្បី​ទាក់ទាញការវិនិយោគបរទេសបន្ថែម​ទៀត​ក្នុង​វិស័យ​ផលិតកម្ម និង​ឧស្សាហកម្ម​បច្ចេកវិទ្យា​ខ្ពស់ ដូច្នេះកម្មវិធីបណ្តុះបណ្តាលជំនាញរបស់រាជរដ្ឋាភិបាលនៅក្នុងអាណត្តិទី៧នេះនឹងក្លាយទៅជាសូចនាករមួយដ៏មានសក្តានុពល និងចម្បងក្នុងការផ្លាស់ប្តូមុខមាត់សេដ្ឋកិច្ចកម្ពុជា។ បើទោះបីយ៉ាងណាក៏ដោយ លោកបានគូសបញ្ជាក់បន្ថែមទៀតថា នៅក្នុងយុគសម័យសេដ្ឋកិច្ចបែបថ្មីនេះ ប្រទេសកម្ពុជាត្រូវការវិនិយោគ​ធនធាន​បន្ថែម​ទៀត​ដើម្បី​បណ្តុះបណ្តាល​យុវជន​​នូវ​ជំនាញ​អនាគត​ដែល​ឆ្លើយតប​នឹង​ទីផ្សារ​ការងារ​នា​ពេល​អនាគត ដូចជាជំនាញបច្ចេកវិទ្យា និងនវានុវត្តន៍ គឺជាជំនាញផ្សេងទៀត ដែលកម្ពុជាគួរតែផ្តោតទៅលើបន្ថែមលើការអភិវឌ្ឍជំនាញមូលដ្ឋាន។  ចំណែកលោកបណ្ឌិត គី សេរីវឌ្ឍន៍ អនុប្រធានវិទ្យាស្ថានមនុស្សសាស្ត្រ និងវិទ្យាសាស្ត្រសង្គម និងជាអ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លើកឡើងថា ការបណ្តុះបណ្តាលជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាលនេះនឹងក្លាយទៅជាចលករក្នុងការអភិវឌ្ឍសេដ្ឋកិច្ចប្រកបដោយនិរន្តរភាពរបស់កម្ពុជា ពីព្រោះកម្មវិធីបណ្តុះបណ្តាលថ្នាក់ជាតិមួយនេះបានក្លាយទៅជាថ្នាលនៃការបង្កើតកម្លាំងជំនាញជាច្រើនមុឺននាក់រួចស្រាប់ទៅហើយនៅក្នុងរយៈពេលមួយឆ្នាំមកនេះចាប់តាំងពីរាជរដ្ឋាភិបាលដាក់ឱ្យអនុវត្តជាផ្លូវការ។ អ្នកជំនាញសេដ្ឋកិច្ចរូបនេះបន្ថែមថា ការបណ្តុះបណ្តាលជំនាញវិជ្ជាជីវៈ និងបច្ចេកទេសមួយនេះនឹងនាំកម្ពុជាទៅដល់ការបង្កើតកម្លាំងធនធានផលិតកម្មដ៏ខ្លាំងមួយដែលមានផលិតភាពខ្ពស់ នឹងឈានដល់អភិវឌ្ឍឧស្សាហកម្ម និងផលិតកម្មនៅកម្ពុជា ដែលជាយន្តការក្នុងការកែប្រែកម្ពុជាពីការពឹងផ្អែកលើវិស័យកសិកម្ម មកពឹងផ្អែកលើឧស្សាហកម្ម និងពីសហគ្រាសខ្នាតតូចមធ្យម មកជាឧស្សាហកម្មធន់ធ្ងន់។ លោក បណ្ឌិតបានគូសបញ្ជាក់បន្តថា ការសិក្សាឱ្យបានច្បាស់លាស់លើការបណ្តុះបណ្តាលជំនាញវិជ្ជាជីវៈ និងបច្ចេកទេសដើម្បីទទួលបានលទ្ធផលផ្លែផ្កាលើការបង្កើនកម្លាំងជំនាញនៅកម្ពុជានេះ គឺនឹងធ្វើឱ្យការឧត្តមភាពនៃការប្រកួតប្រជែងរបស់កម្ពុជាមានភាពខ្លាំង ដែលអាចឈានជើងក្នុងការប្រកួតប្រជែងមួយដ៏ធំនៅក្នុងតំបន់អាស៊ាន និងតំបន់ផ្សេងៗទៀតនៅលើពិភពលោកនាពេលអនាគតដ៏ខ្លីខាងមុខ។ បើតាមក្រសួងការងារ និងបណ្តុះបណ្តាលវិជ្ជាជីវៈ ចាប់តាំងពីរាជរដ្ឋាភិបាលកម្ពុជាបានដាក់ឱ្យអនុវត្តកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស កាលពីខែវិច្ឆិកា ឆ្នាំ២០២៣ រហូតមកដល់ដើមខែវិច្ឆិកា ឆ្នាំ២០២៤នេះ កម្មវិធីបណ្តុះបណ្តាលថ្នាក់ជាតិមួយនេះបានទទួលសិស្សចុះឈ្មោះចូលរៀនសរុបចំនួនជាង៧មុឺននាក់នៅទូទាំងប្រទេស។ យុវជនសិក្សាជំនាញរបស់រាជរដ្ឋាភិបាលទាំងនោះបានទទួលការងារធ្វើសមរម្យ, កំពុងចុះកម្មសិក្សានៅតាមក្រុមហ៊ុនឯកជននានាក្រោមកិច្ចសម្របសម្រួលរបស់ក្រសួងការងារ និងបណ្តុះបណ្តាលវិជ្ជាជីវៈ។ វិស័យអប់រំបណ្តុះបណ្តាលវិជ្ជាជីវៈ និងបច្ចេកទេស បាននិងកំពុងចូលរួមយ៉ាងសកម្មលើការផលិតមូលធនមនុស្ស និងអភិវឌ្ឍកម្លាំងពលកម្មឱ្យមានជំនាញ ចំណេះដឹង សមត្ថភាព ការប្រកួតប្រជែងខ្ពស់ មានភាពធន់ បត់បែន អាចឆ្លើយតបតាមតម្រូវការនៃការវិវត្តយ៉ាងឆាប់រហ័សនៃមូលដ្ឋានសេដ្ឋកិច្ច ឧស្សាហកម្ម និងបច្ចេកវិទ្យាឌីជីថល ស្របតាមគោលនយោបាយរបស់រាជរដ្ឋាភិបាល ដោយធានាថា «ពលរដ្ឋម្នាក់មានជំនាញមួយយ៉ាងតិចប្រចាំជីវិត» និងអនុវត្តតាមអភិក្រមរបស់ សម្ដេចធិបតី ហ៊ុន ម៉ាណែត គឺ “រៀនឱ្យចប់ រៀនឱ្យចេះ ឱ្យមានការងារធ្វើ”៕

(អន្តរជាតិ)៖ យោធាអ៊ុយក្រែនបានចោទប្រកាន់រុស្ស៊ីថាបានបាញ់មីស៊ីលអន្តរទ្វីប (ICBM) ក្នុងអំឡុងពេល ការវាយប្រហារនៅព្រឹកថ្ងៃព្រហស្បតិ៍នេះ លើទីក្រុង Dnipro ។កងទ័ពអាកាសអ៊ុយក្រែនបាននិយាយនៅក្នុងសេចក្តីថ្លែងការណ៍មួយថា "មីស៊ីលផ្លោងអន្តរទ្វីបមួយ ត្រូវបានបាញ់ចេញពីតំបន់ Astrakhan នៃសហព័ន្ធរុស្ស៊ី" ។សេចក្តីថ្លែងការណ៍មិនបាននិយាយថាប្រភេទ ICBM ដែលរុស្ស៊ីដាក់ពង្រាយទេ ហើយ CNN មិនអាចផ្ទៀងផ្ទាត់ការអះអាងនេះបានឡើយ។យោធាអ៊ុយក្រែនក៏បាននិយាយផងដែរថា មីស៊ីលផ្លោង X-47M2 Kinzhal ត្រូវបានបាញ់បង្ហោះ រួមជាមួយនឹងកាំជ្រួច Cruise 7 ដើមក្នុងការវាយប្រហារលើ Dnipro ។ វា​បាន​និយាយ​ថា មីស៊ីលទាំងអស់​ត្រូវ​បាន​បាញ់​ទម្លាក់។សេចក្តី​ថ្លែងការណ៍​បាន​និយាយ​ថា​៖​មីស៊ីល​ផ្សេង​ទៀត​មិន​បាន​បង្ក​ផល​វិបាក​ខ្លាំង​នោះ​ទេ៕

(ភ្នំពេញ)៖ នៅព្រឹកនេះ សម្តេចតេជោ ហ៊ុន សែន ប្រធានព្រឹទ្ធសភា អញ្ជើញជាព្រះរាជតំណាងដ៏ខ្ពង់ខ្ពស់ព្រះករុណា ព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងពិធីបើកអនុសំវច្ឆរមហាសន្និបាតមន្ត្រីសង្ឃ ទូទាំងប្រទេសលើកទី៣២ បានមានប្រសាសន៍ពាក់ព័ន្ធទៅនឹងបញ្ហាកោះគុតថា “តំបន់កោះគុត គឺជាតំបន់ត្រួតស៊ីគ្នារវាងកម្ពុជា និងថៃ ខណៈកោះនេះគឺរាជរដ្ឋាភិបាលកម្ពុជា និងថៃកំពុងបន្តជជែកគ្នាយ៉ាងក្តៅគគុកនៅឡើយ ប៉ុន្តែមានជនអគតិមួយក្តាប់តូច (ក្រុមក្បត់ជាតិ៣ជំនាន់) កំពុងតែធ្វើការញុះញង់អុចអាលលើបញ្ហានេះ ហើយការញុះញង់បែបនេះអាចនឹងធ្វើឲ្យកម្ពុជា និងថៃឈានដល់មានការផ្ទុះអាវុធ។ សម្តេចតេជោបានមានប្រសាសន៍បញ្ជាក់ទៀតថា ការប្តឹងផ្តល់គ្នាទៅតុលាការអន្តរជាតិលើបញ្ហាកោះគុតតាមការញុះញង់របស់ជនអគតិមួយក្តាប់តូចនៅក្រៅប្រទេសនោះមិនមែនជាការងាយស្រួលនោះទេ។”ឆ្លៀតនៅក្នុងឱកាសនេះ សម្ដេចតេជោ ហ៊ុន សែន សូមអំពាវនាវដល់ប្រជាពលរដ្ឋទុកលទ្ធភាពឲ្យរដ្ឋាភិបាលចរចាជាមួយនឹងរដ្ឋាភិបាលថៃរឿងកោះគុត ហើយសង្ឃឹមថាខាងអ្នកជ្រុលនិយមនៅក្នុងប្រទេសថៃ ក៏ត្រូវទុកលទ្ធភាពឲ្យរដ្ឋាភិបាលក្នុងប្រទេសថៃធ្វើការចរចាដែរ។ សម្ដេចតេជោបានមានប្រសាសន៍ទៀតថា រាជរដ្ឋាភិបាលបានយកចិត្តទុកដាក់ណាស់ជាមួយប្រទេសជិតខាង ជាក់ស្ដែងពេលនេះ ការបោះបង្គោលព្រំដែនជាមួយនឹងប្រទេសឡាវបានចំនួន ៨៦ភាគរយ ជាមួយវៀតណាមបានចំនួន ៨៤ ភាគរយ និងបានបោះបង្គោលព្រំដែនតូចៗបន្ថែមទៀត ដើម្បីឱ្យពលរដ្ឋដែលទៅកម្សាន្តនៅតាមព្រំដែន ងាយឃើញងាយយល់ នឹងធ្វើឲ្យការរស់នៅតាមតំបន់ព្រំដែនកាន់តែមានភាពល្អប្រសើរ។ សម្ដេចតេជោបន្ថែមទៀតថា ក្រុមជ្រុលនិយមនៅកម្ពុជាជាក្រុមជ្រុលនិយមមិនធម្មតាដែលទាមទារឲ្យធ្វើច្បាប់ ដើម្បីដាក់ទោស និងការពារសុខសន្តិភាព និងការអភិវឌ្ឍនៅកម្ពុជា។នៅក្នុងឱកាសនេះផងដែរ សម្ដេចតេជោ ហ៊ុន សែន ក៏បានអំពាវនាវដល់កងទ័ពទាំងជើងទឹក និងជើងគោកទាំងអស់ មិនត្រូវចល័តកម្លាំងទៅតំបន់កោះគុត ឬធ្វើសកម្មភាពអ្វីនោះទេ ក្រោយពីមិនទាន់ទទួលព័ត៌មានពីបញ្ហានៅកោះគុតនោះ។សម្ដេចតេជោបញ្ជាក់បន្ថែមថា កម្ពុជា និងថៃនៅតែបន្តចរចាពីបញ្ហានេះដោយសន្តិវិធីនៅឡើយ៕

ជាការជូនដំណឹងមួយដល់បងប្អូនប្រជាពលរដ្ឋដែលរស់នៅក្នុងរាជធានីភ្នំពេញ និង ស្រុកមួយចំនួន នៅក្នុងខេត្តកណ្តាល ឱ្យបានជ្រាបព័ត៌មានថា ចាប់ពីថ្ងៃទី២១ រហូតដល់ថ្ងៃទី២៤ ខែវិច្ឆិកា ឆ្នាំ២០២៤ បណ្ដាខណ្ឌមួយចំនួននៅរាជធានីភ្នំពេញ នឹងមានការរអាក់រអួលក្នុងការផ្គត់ផ្គង់អគ្គិសនី។ នេះបើយោងតាមសេចក្តីជូនដំណឹងពីសំណាក់ អគ្គិសនីកម្ពុជា ដែលចេញផ្សាយនៅ ថ្ងៃទី២០ខែ វិច្ឆិកា ឆ្នាំ២០២៤នេះ ។បើតាមការបញ្ជាក់នៅក្នុងសេចក្ដីជូនដំណឹងរបស់អគ្គិសនីកម្ពុជា បានឱ្យដឹងបន្ថែមថា ការរអាក់រអួលខាងលើនេះ គឺដោយសារការអនុវត្តការងារជួសជុល ផ្លាស់ប្តូរតម្លើងបរិក្ខារនានា និងរុះរើគន្លងខ្សែបណ្តាញអគ្គិសនីរបស់អគ្គិសនីកម្ពុជា ដើម្បីបង្កលក្ខណៈងាយស្រួលដល់ការដ្ឋានពង្រីកផ្លូវ។បើទោះជាមានការខិតខំថែរក្សាមិនឱ្យមានការប៉ះពាល់ដល់ការផ្គត់ផ្គង់អគ្គិសនីធំដុំ ប៉ុន្តែការផ្គត់ផ្គង់ចរន្តអគ្គិសនីនៅតំបន់ខាងលើអាចនឹងមានការរអាក់រអួលខ្លះៗជៀសមិនផុត។ អានសេចក្តីជូនដំនឹង ៖

(អន្តរជាតិ)៖ អាជ្ញាធរសុខាភិបាលថៃបានរាយការណ៍ករណីក្នុងស្រុកដំបូងនៃជំងឺ ដែលទាក់ទងនឹង ការជក់បារីអេឡិចត្រូនិកហើយពួកគេបារម្ភថាមានករណីជាច្រើនទៀត ដែលទាក់ទងនឹងការប្រើប្រាស់ បារីអេឡិចត្រូនិចយ៉ាងធ្ងន់ធ្ងរ។យោងតាមនាយកដ្ឋានគ្រប់គ្រងជំងឺ (DDC) នៃក្រសួងសុខាភិបាលសាធារណៈបានឱ្យដឹងថា បុរសអាយុ 32 ឆ្នាំម្នាក់ មកពីខេត្ត Buri Ram ត្រូវបានគេធ្វើរោគវិនិច្ឆ័យថា មានជម្ងឺដែលត្រូវបានគេស្គាល់ថាជា Evali ឬ E-cigarette ឬ របួសសួតដែលទាក់ទងនឹងការជក់បារីប្រភេទនេះ។វេជ្ជបណ្ឌិត Chayanan Sittibusaya នាយកផ្នែកគ្រប់គ្រងផលិតផលថ្នាំជក់របស់ក្រសួងបាននិយាយថា អ្នកជំងឺដែលត្រូវបានបញ្ជូនទៅមន្ទីរពេទ្យ Buri Ram កំពុងក្អកមានឈាម ហើយស្ថានភាពរបស់គាត់ បានវិវត្តទៅជាជំងឺរលាកសួត ស្រួចស្រាវ និងធ្ងន់ធ្ងរ។“ជាធម្មតា យើងមិនជួបប្រទះនឹងជំងឺរលាកសួតធ្ងន់ធ្ងរទេ ហើយរោគសញ្ញាកាន់តែយ៉ាប់យ៉ឺន លឿនក្នុង រយៈពេល ២៤ ទៅ ៣៦ ម៉ោង។ ក្នុង​ករណី​នេះ គាត់​ត្រូវ​ដាក់​អុកស៊ីសែន។អ្នកជំងឺ​បាន​ប្រាប់​គ្រូពេទ្យ​ថា គាត់​បាន​ជក់​បារី​អេឡិចត្រូនិក ​ជា​រៀង​រាល់​ថ្ងៃ»។លោកវេជ្ជបណ្ឌិត Chayanan បាននិយាយថា វាមិនច្បាស់ទេថា បុរសនោះបានបន្តទម្លាប់ជក់បារីយូរ ប៉ុណ្ណានោះទេ។ ទោះ​ជា​យ៉ាង​ណា លោក​ក៏​មាន​ជំងឺ​ប្រចាំ​កាយ​រួម​មាន​ជំងឺ​ទឹក​នោម​ផ្អែម និង​លើស​ឈាម​ផង​ដែរ។ ការ​ពិនិត្យ​រាងកាយ​យ៉ាង​លម្អិត​បាន​បង្ហាញ​ពី​កំណក ពណ៌​ស​នៅ​លើ​សួត​របស់​គាត់។ស្ថានភាព​អ្នក​ជំងឺ​ឥឡូវ​មាន​ភាព​ល្អ​ប្រសើរ​ជា​រួម ហើយ​មិន​មាន​ការ​ឆ្លង​មេរោគ​ណា​មួយ​ឡើយ។ មន្ទីរពេទ្យ​បាន​នាំ​យក​ករណី​នេះ​ទៅ​កាន់​ការិយាល័យ​សុខភាព​សាធារណៈ​ខេត្ត Buri Ram ដើម្បី​ស៊ើបអង្កេត ​ជំងឺ​បន្ថែម​ទៀត។បារីអេឡិកត្រូនិកត្រូវបានហាមឃាត់នៅក្នុងប្រទេស ប៉ុន្តែបារីននេះ អាចរកបានយ៉ាងងាយស្រួលទាំង តាមអ៊ីនធឺណិត និងក្រៅបណ្តាញ ទោះបីជាមានការប្តេជ្ញារបស់អាជ្ញាធរថា នឹងដោះស្រាយវាក៏ដោយ។ការសិក្សាស្រាវជ្រាវជាច្រើនបានរកឃើញថា បារីអេឡិចត្រូនិចរួមមានសារធាតុគ្រោះថ្នាក់ជាច្រើន រួមទាំងជាតិនីកូទីន និងលោហធាតុធ្ងន់។ នាយកដ្ឋានប្រយុទ្ធនឹងជំងឺ បានណែនាំដល់ប្រជាពលរដ្ឋ ជៀសវាងការប្រើប្រាស់បារីអេឡិចត្រូនិក ជាពិសេសប្រសិនបើពួកគេមានស្ថានភាពរ៉ាំរ៉ៃ ព្រោះវាអាចធ្វើ ឱ្យរលាកសួតភ្លាមៗ និងអាចស្លាប់បាន៕

(ភ្នំពេញ)៖ នៅថ្ងៃនេះ សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា  បានមានប្រសាសន៍ថា “កម្ពុជាសុខចិត្តលះបង់សេដ្ឋកិច្ចក្នុងសង្គម មិនសុខចិត្តឲ្យកម្ពុជាមានការបែកបាក់សាមគ្គី និងសង្គ្រាមដោយសារតែការញុះញង់ពីក្រុមពួកអគតិមួយក្តាប់តូចនោះឡើយ”។ ត្រង់ន័យនេះ ត្រូវបានសម្តេចបានបញ្ជាក់ថា កម្ពុជាសម្រេចដកខ្លួនចេញពីកិច្ចសហប្រតិបត្តិការ CLV គឺដើម្បីលុបបំបាត់មន្ទិលសង្ស័យពីបងប្អូនប្រជាពលរដ្ឋ។សម្ដេចតេជោ បានមានប្រសាសន៍បែបនេះនៅក្នុងឱកាសដែល សម្ដេចតេជោ អញ្ជើញជាព្រះរាជតំណាងដ៏ខ្ពង់ខ្ពស់ព្រះករុណា ព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងពិធីបើកអនុសំវច្ឆរមហាសន្និបាតមន្ត្រីសង្ឃ ទូទាំងប្រទេសលើកទី៣២ នៅព្រឹកថ្ងៃព្រហស្បតិ៍ ទី២១ ខែវិច្ឆិកា ឆ្នាំ២០២៤នេះ៕

(កម្សាន្ត)៖ កម្មវិធីប្រកួតសម្រស់ Miss Global Cambodia 2024 បានរកឃើញម្ចាស់ជ័យលាភី កាលពីយប់ ថ្ងៃទី២០ ខែវិច្ជិកា កន្លងទៅថ្មីៗនេះ ដោយអ្នកគ្រងម្គុដគឺបានទៅលើបេក្ខនារីតំណាងឱ្យខេត្តបាត់ដំបង នោះគឺកញ្ញា ខុន ស្រីខួច ខណៈជ័យលាភីមួយនេះ ឃើញថាមានទាំងការអបអរសារទរ ហើយក៏មានការមិនចិត្តខ្លះៗពីសំណាក់មហាជន។ ដោយនេះមិនចម្លែកនោះទេសម្រាប់ការប្រកួតសម្រស់នីមួយៗ ពោលគឺតែងតែមានការពេញចិត្ត និងមិនពេញចិត្ត គ្រាន់តែតិចឬច្រើន ដោយអ្នកគាំទ្រម្នាក់ៗគឺតែងតែចង់ឃើញបេក្ខនារីក្នុងដួងចិត្តរបស់ពួកគេបានគ្រងនូវម្គុដ ហើយតំណាងចូលប្រកួតលើឆាកអន្តរជាតិជានិច្ច។យ៉ាងណាមិញ អ្វីដែលគួរឱ្យភ្ញាក់ផ្អើលនិងស្មានមិនដល់នោះ ក្រោយពីការប្រកាសលទ្ធផលរំលងទៅបានប៉ុន្មានមិនទាន់ស្រួលបួលផងនោះ ស្រាប់តែលោក អ៊ិន សុភិន ដែលជានាយកប្រតិបត្ត នៃកម្មវិធីប្រកួតសម្រស់មួយនេះ បានទម្លាយថា មានដល់ទៅ ៣០០ គណនីហ្វេសប៊ុកអាខោនឯណោះ ដែលបានឆាតទៅជេរដាក់រូបលោក ដោយពួកគេមិនពេញចិត្តចំពោះផល ហើយក៏បានយល់ថាការជាប់មួយនេះ គឺពឹងតាមរយៈខ្សែរតែប៉ុណ្នោះ។ ជាក់ស្ដែង យោងតាមគណនីហ្វេសប៊ុករបស់លោកបានបង្ហោះនូវសារមួយយ៉ាងដូច្នេះថា « អត់យល់រឿងថ្មីរហូតខ្ញុំអើយ គ្រាន់តែបេក្ខនារីខេត្តបាត់ដំបង ក្លាយជាអ្នកឈ្នះមកុដ Miss Global Cambodia 2024 មានអ្នកឆាតមកជេរខ្ញុំចង់300 Facebook Account ថាយកតែខ្សែរក្មួយខ្លួនឯង»។ដោយឡែក ទោះជាមានអ្នកឆាតជេរ និងរំខាន ដូច្នេះក៏ដោយ ប៉ុន្តែលោក អ៊ិន សុភិន មិនដូចជាមិនសូវខ្វល់ខ្វាយយកចិត្តទុកដាក់ប៉ុន្មាននោះ ដោយលោក ថែមទាំងបានបន្តចែករំលែកអំពី ម្ចាស់ម្គុដ Miss Global Cambodia ហើយថែមទាំងពុំភ្លេចបញ្ចាក់យ៉ាងច្បាស់ៗបន្ថែមទៀតថា Miss Global Cambodia 2024 គឺត្រូវជាក្មួយរបស់ពូភិនបង្កើត។ ហើយមែនទែនទៅសម្រាប់អ្នកគាំទ្រមួយចំនួនក្រោយពីបានដឹងលទ្ធិផលមួយនេះរួចក៏ពុំសូវមានការភ្ញាក់ផ្អើលប៉ុន្មាននោះឡើយ ដោយពួកគេបានដឹងរួចមកហើយថាបេក្ខនារីតំណាងឱ្យខេត្តបាត់ដំបង ច្បាស់ជាអ្នកគ្រងម្គុដជាមិនខាន៕

(អន្តរជាតិ)៖ ក្រុមហ៊ុន Berjaya Food ដែលប្រតិបត្តិការ Starbucks នៅក្នុងប្រទេសម៉ាឡេស៊ី បានបិទហាងចំនួន 50 ក្នុងចំណោមហាងចំនួន 408 របស់ខ្លួននៅទូទាំងប្រទេស។ការបិទនេះត្រូវបានរាយការណ៍ថា តំណាងឱ្យ 12% នៃហាង Starbucks ទាំងអស់នៅក្នុងប្រទេស ម៉ាឡេស៊ី នេះបើយោងតាមកាសែត The Rakyat Post ។នៅដើមខែនេះ Starbucks Malaysia បានច្រានចោលការអះអាងដែលថាខ្លួនកំពុងបិទហាងជាង 100 នៅក្នុងប្រទេស។ ក្រុមហ៊ុនបាននិយាយនៅក្នុងសេចក្តីថ្លែងការណ៍មួយទៅកាន់ Business Times ថា ខ្លួនបានបញ្ឈប់តែហាងមួយចំនួនប៉ុណ្ណោះ ហើយ "ទីតាំងដែលត្រូវបានបិទភាគច្រើន ត្រូវបានបិទជា បណ្តោះអាសន្នប៉ុណ្ណោះ" ។នេះ​ជា​ផ្នែក​មួយ​នៃ​ការ​វាយ​តម្លៃ​បន្ត​របស់​ខ្លួន​ ​ខណៈ​ពេល​ដែល​ធានា​ថា ​គ្មាន​ការ​បាត់​បង់​ការងារ​ដែល​បាន​កើត​ឡើង​។ អ្នកតំណាង បាននិយាយថា "សំខាន់ គ្មាននិយោជិតណាម្នាក់ត្រូវបានប៉ះពាល់ ដោយការបិទ ជាអចិន្ត្រៃយ៍ ឬបណ្ដោះអាសន្ននោះទេ ដោយសារពួកគេត្រូវបានចាត់តាំងឱ្យទៅហាងដែលនៅជិតៗ ដើម្បីបន្តបម្រើអតិថិជនរបស់យើងយ៉ាងរលូន"។យ៉ាង​ណា​ក៏​ដោយ ក្រុមហ៊ុន​ធ្លាប់​មាន​ការលំបាក​ក្នុង​ប្រទេស​ម៉ាឡេស៊ី។ Berjaya Food ដែលប្រតិបត្តិការ ខ្សែសង្វាក់កាហ្វេក្នុងប្រទេសម៉ាឡេស៊ីបានខាតបង់ នៅក្នុងត្រីមាសទី 4 ដោយសារតែជម្លោះមជ្ឈិមបូព៌ា ដែលបានមើលឃើញការធ្វើពហិការម៉ាកយីហោអាមេរិក នៅក្នុងប្រទេសម៉ាឡេស៊ី។កាលពីខែធ្នូឆ្នាំមុន ការធ្វើពហិការជាបន្តបន្ទាប់របស់ Starbucks បានដឹកនាំ RHB Group ដែលជា ក្រុមសេវាកម្មហិរញ្ញវត្ថុរួមបញ្ចូលគ្នារបស់ប្រទេសម៉ាឡេស៊ី តាមសេចក្តីរាយការណ៍ថា បានចេញកំណត់ ចំណាំស្រាវជ្រាវមួយដែលណែនាំអ្នកវិនិយោគឱ្យលក់ភាគហ៊ុនរបស់ពួកគេនៅក្នុងម្ចាស់សិទ្ធិផ្តាច់មុខរបស់ខ្លួនគឺ Berjaya Food ។ ធនាគារនេះត្រូវបានគេរាយការណ៍ថា បានកត់សម្គាល់ពីការធ្លាក់ចុះ 24% នៅក្នុងតម្លៃភាគហ៊ុននៅពេលនោះ។​បញ្ហានៃការខាតបង់របស់ហាងនេះ ជាលទ្ធផលនៃការធ្វើពហិការបន្តនៃខ្សែសង្វាក់អាហារ និងភេសជ្ជៈ របស់អាមេរិក ដោយសារតែការចោទប្រកាន់អាមេរិក លើការគាំទ្រអ៊ីស្រាអែលនៅក្នុង សង្គ្រាម អ៊ីស្រាអែល-ហាម៉ាសដែលកំពុងបន្ត៕ 

(កម្សាន្ត)៖ ដូចដែលមហាជនមួយចំនួនបានជ្រាបរួចមកហើយថា កម្មវីធីប្រកួតប្រជែង បវរកញ្ញាភពផែនដី គឺជាស្ថាប័ន ដែលបានបង្កើតឡើងដោយកូនខ្មែរ ជាមួយនឹងក្រសួងទេសចរណ៍។ ស្របពេលកម្មវីធីមួយនេះកំពុងតែល្បីល្បាញទូទាំងប្រទេស ដោយមានការយល់ច្រលំបន្តិចបន្តួច ចំពោះអាហារដែលបេក្ខភាពបានទទួលទាន ឆ្លៀតក្នុងពេលមួយនេះ អ្នកប្រើប្រាស់បណ្ដាញសង្គមក៏ដូចជាជនជាតិថៃជាច្រើន បានចូលមករិះគន់និងប្រមាថមើលងាយ ខ្មែរជាថ្មីម្ដងទៀត ថាគ្មានវិជ្ជាជីវៈ និងសមត្តភាពក្នុងការរៀបចំកម្មវិធីលំដាប់ថ្នាក់អន្តរជាតិ ដោយយោងទៅតាមរូបភាពដែលបង្ហាញពីអារហារចំនួនពីរសន្លឹក។យ៉ាងណាមិញ នៅថ្ងៃទី ២០ ខែវិច្ឆិការ ទំព័រផេកផ្លូវការរបស់របស់ Miss planet United kingdom បានឱ្យដឹងថា បវរកញ្ញាភពផែនដីតំណាងឱ្យចក្រភពអង់គ្លេស គឺបានធ្វើការហោះហើរមកដល់ទឹកដីកម្ពុជា ហើយគេក៏បានបង្ហោះរូបថតដែលបង្ហាញពីអាហារមួយប្រអប់ និងភ្ជាប់មកជាមួយខ្លឹមសារថា «អាហារដំបូងរបស់ខ្ញុំនៅស្រុកខ្មែរពិតជាអស្ចារ្យណាស់ សូមថ្លែងអំណរគុណយ៉ាងជ្រាលជ្រៅចំពោះ Miss Planet International ដែលបានយកចិត្តទុកដាក់ដល់ពួកយើង និងក្រុមហ៊ុន ប៊ែលធី ធួរ និង ត្រាវែល ដែលបានមកទទួលយកពួកយើងទៅកាន់ព្រលានយន្តហោះ»។តាមរយៈការបង្ហោះមួយនេះផងដែរ ដោយយោងទៅតាមរូបភាពនៃអាហារមើលទៅសមញ្ញ និងធម្មតា ខ្លាំងពេក ហាក់មិនសមទំនងជាអាហារដែលសម្រាប់ទទួលបេក្ខភាពដែលមកប្រឡងនោះ ឃើញថាមានជនជាតិថៃជាច្រើនបានចូលមកវាយប្រហារមើលងាយកម្ពុជាយ៉ាងផុសផុល។ ប៉ុន្តែ ការគិតរបស់ពួកគេគឺមិនបានដូចទៅនឹងការពិតនោះឡើយ គ្រប់យ៉ាងដែលនៅពីក្រោយត្រូវបាន បវរកញ្ញាភពផែនដីរបស់ចក្រភពអង់គ្លេស លាតត្រដាងឱ្យបានដឹងថា «តាមការពិតទៅ យើងមានជម្រើសជាច្រើន ប៉ុន្តែនេះជាការជ្រើសរបស់ខ្ញុំ។ ថ្ងៃនេះខ្ញុំក៏បានទៅផ្សារទំនើប ហើយរកមើលមុខម្ហូបស្រដៀងគ្នាដូចទៅនឹងម្ហូបក្នុងផ្សារទំនើប។ ដូច្នេះសូមកុំចាប់ផ្តើមមើលងាយកម្ពុជានិងប្រជាជនកម្ពុជា ស្ថាប័នបានផ្តល់ជម្រើសជាច្រើនដល់យើង ខ្ញុំចង់សាកល្បងអាហារនេះដោយខ្លួនឯង ហើយនេះជាការជ្រើសរើសរបស់ខ្ញុំ ដូច្នេះកុំមើលងាយកម្ពុជា»។ទន្ទឹមនឹងនោះដោយហាក់មិនទាន់អស់ចិត្ត ផេករបស់ បវរកញ្ញាភពផែនដីរបស់ចក្រភពអង់គ្លេស បានធ្វើការបង្ហោះវីដេអូនៃម្ហូបអាហារ ព្រមទាំងបានរៀបរាប់បន្តដោយបញ្ជាក់យ៉ាងច្បាស់ៗថា «កាលពីមុន អ្នកណាបង្កើតរឿងដើម្បីលាបព័ណ៌ស្រុកខ្មែរ ត្រូវចាំ។ យើងទាំងអស់គ្នាត្រូវបានផ្តល់ជាច្រើនជម្រើស ហើយទាំងនេះគឺជាអាហារ។ ខ្ញុំជាអ្នកចង់ និងជ្រើសរើសខ្លួនឯង។ ដូច្នេះ កុំមកទីនេះមើលងាយកម្ពុជា ហើយធ្វើជាសមរភូមិ។ យើងមានជម្រើសច្រើន ហើយមូលហេតុខ្ញុំជ្រើសរើសត្រី ព្រោះខ្ញុំចូលចិត្តត្រី និងចង់សាកម្ហូបខ្មែរប្លែកៗ។ ដូច្នេះសូមឈប់ប្រមាថកម្ពុជា ឬកញ្ញាភពផែនដីទៀតទៅ។គួរបញ្ជាក់ជាថ្មីផងដែរថា Miss Planet International ហៅកាត់ថា MPI គឺជាកម្មវិធីប្រកួតសម្រស់អន្តរជាតិប្រចាំឆ្នាំ ដែលមានមូលដ្ឋានក្នុងប្រទេសកម្ពុជា ហើយបង្កើតឡើងដោយកូនខ្មែរ។ MPI គឺជាស្ថាប័នមួយ ដែលផ្អែកលើគោលដៅអភិវឌ្ឍប្រកបដោយចីរភាព របស់អង្គការសហប្រជាជាតិ (UN) ពោលគឺហេតុផលនេះហើយ ទើបគេបង្កើតកម្មវិធីប្រកួតប្រជែង ដើម្បីស្វែងរកឯកអគ្គរដ្ឋទូត សម្រាប់ប្រទេសនីមួយៗ។ តាំងពីបង្កើតឡើងនៅឆ្នាំ ២០១៩ MPI តែងតែត្រូវបានរៀបចំឡើងរៀងរាល់ឆ្នាំ លើកលែងតែឆ្នាំ ២០២១ និង ២០២២ ដោយសារបញ្ហាជំងឺរាតត្បាត៕

(ភ្នំពេញ)៖ សម្ដេចមហាបវរធិបតី ហ៊ុន​ ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់ចូលរួមប្រគល់សញ្ញាបត្រថ្នាក់បរិញ្ញាបត្រ និងបរិញ្ញាបត្រជាន់ខ្ពស់ ជូនដល់និស្សិតជ័យលាភីសរុបចំនួន ៨ ៣៣៩ អង្គ/នាក់ នៃសាកលវិទ្យាល័យភូមិន្ទភ្នំពេញ នាព្រឹកថ្ងៃព្រហស្បតិ៍ ទី២១ ខែវិច្ឆិកា ឆ្នាំ២០២៤។សម្ដេចធិបតី បានមានប្រសាសន៍ថា វិស័យអប់រំនៅកម្ពុជា បានឈានឡើងដល់កម្រិតមួយ ដែលអាចធានាបានទាំងបរិមាណ និងគុណភាពសម្រាប់បំពេញសេចក្តីត្រូវការនៃការអភិវឌ្ឍធនធានមនុស្សស្របតាមអាជីព និងទីផ្សារការងារ។ ជាមួយគ្នានេះ លទ្ធផលជាទីមោទនៈដែលសាកលវិទ្យាល័យភូមិន្ទភ្នំពេញ ក៏ដូចជា ក្រសួងអប់រំ យុវជន និងកីឡាសម្រេចបានកន្លងមកនេះ គឺជាការរួមចំណែកយ៉ាងសំខាន់នៅក្នុងការអនុវត្តកំណែទម្រង់ស៊ីជម្រៅនៃវិស័យអប់រំ និងជំរុញការបង្កើតមូលធនមនុស្សក្នុងគោលដៅ បង្កើតឡើងនូវសង្គមកម្ពុជាមួយ ដែលមានប្រជាជនប្រកបដោយចំណេះដឹងខ្ពស់ និងមានវប្បធម៌ ជ្រៅជ្រះ ក៏ដូចជាបង្កើតផលិតភាពឱកាសការងារ និងភាពប្រកួតប្រជែងរបស់កម្ពុជានៅក្នុងសមាហរណកម្មសេដ្ឋកិច្ចតំបន់ និងសេដ្ឋកិច្ចសកល៕

(ភ្នំពេញ)៖ ឯកឧត្ដម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី, ប្រធានក្រុមប្រឹក្សាអ្នកច្បាប់ និងជាប្រធានគណៈកម្មាធិការដឹកនាំការកែទម្រង់ច្បាប់ បានអនុញ្ញាតឱ្យឯកឧត្ដម WANG Zhenjiang អនុរដ្ឋមន្ត្រីក្រសួងយុត្តិធម៌នៃសាធារណរដ្ឋប្រជាមានិតចិន និងគណៈប្រតិភូ ចូលជួបសម្ដែងការគួរសម ​និងពិភាក្សាការងារ នៅក្នុងឱកាសដែលឯកឧត្តមដឹកនាំគណៈប្រតិភូមកបំពេញទស្សនកិច្ចនៅកម្ពុជា ដើម្បីពង្រឹងកិច្ចសហប្រតិបត្តិការឱ្យកាន់តែស៊ីជម្រៅលើវិស័យច្បាប់និងយុត្តិធម៌រវាងកម្ពុជា-ចិន នាថ្ងៃទី១៩ ខែវិច្ឆិកា ឆ្នាំ២០២៤ នៅទីស្តីការគណៈរដ្ឋមន្រ្តី។ជាកិច្ចចាប់ផ្តើម ឯកឧត្តម វង្សី វិស្សុត បានសម្ដែងនូវការស្វាគមន៍យ៉ាងកក់ក្ដៅចំពោះឯកឧត្ដម WANG Zhenjiang និងគណៈប្រតិភូ ដែលបានអញ្ជើញមកបំពេញទស្សនកិច្ចការងារនៅកម្ពុជា និងជូនពរឱ្យទទួលបានជោគជ័យ។ ពាក់ព័ន្ធនឹងទំនាក់ទំនងកម្ពុជា-ចិន, ឯកឧត្តមឧបនាយករដ្ឋមន្រ្តីប្រចាំការ មានប្រសាសន៍ថា ទំនាក់ទំនងជាមិត្តភាពរវាងកម្ពុជា-ចិន មានប្រវត្តិយូរលុងណាស់មកហើយ។ ចិនជាមិត្តល្អរបស់កម្ពុជា និងគួរប្រកាន់យក តាម រយៈព្រឹត្តិការណ៍ជាប្រវត្តិសាស្រ្តរាប់ពាន់ឆ្នាំកន្លងមក និងរីកលូតលាស់មកទល់សព្វថ្ងៃ។ ឯកឧត្តមបានបន្តថា ទំនាក់ទំនងការទូតរវាងកម្ពុជា-ចិន ត្រូវបានបង្កើតឡើងដោយ ព្រះករុណាព្រះបាទសម្តេចព្រះនរោត្តម សីហនុ ព្រះបរមរតនកោដ្ឋ និងថ្នាក់ដឹកនាំជំនាន់មុននៃប្រទេសចិន ហើយត្រូវបានពូនជ្រំ ថែបំប៉ន និងបានបន្ដរីកលូតលាស់យ៉ាងរឹងមាំ ក្រោមការដឹកនាំរបស់សមេ្តចតេជោ ហ៊ុន សែន និងឯកឧត្តមប្រធានាធិបតី Xi Jinping ដោយបានប្រែក្លាយទំនាក់ទំនងរវាងប្រទេសទាំងពីរឈានទៅជាភាពដៃគូសហប្រតិបតិ្តការយុទ្ធសាស្រ្តគ្រប់ជ្រុងជ្រោយ និងជាមិត្តដែកថែប ហើយបានបង្កើតសហគមន៍ជោគវាសនារួមកម្ពុជា-ចិន។ ទំនាក់ទំនងនេះ កាន់តែត្រូវបានពង្រឹង និងពង្រីកដល់កម្រិតខ្ពស់ថ្មីមួយទៀត គឺកិច្ចសហប្រតិបត្តិការត្បូងពេជ្រ ក្រោមការដឹកនាំដ៏ប៉ិនប្រសព្វរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបន្តវេនពី សមេ្តចតេជោ ហ៊ុន សែន។ឯកឧត្ដម WANG Zhenjiang បានសម្ដែងនូវអំណរគុណយ៉ាងជ្រាលជ្រៅជូនចំពោះឯកឧត្ដមឧបនាយករដ្ឋមន្ត្រីប្រចាំការ ដែលបានធ្វើការស្វាគមន៍យ៉ាងកក់ក្ដៅ និងអនុញ្ញាតឱ្យមានជំនួបនាពេលនេះ។ ឯកឧត្ដមអនុរដ្ឋមន្ត្រីក្រសួងយុត្តិធម៌ចិនក៏បានជម្រាបជូនផងដែរ អំពីតួនាទីភារកិច្ចសំខាន់ៗ និងរចនាសម្ព័ន្ធរបស់ក្រសួងយុត្តិធម៌ចិន ក៏ដូចជាសមិទ្ធផលដែលសម្រេចបាននាពេលកន្លងមក ពិសេសពាក់ព័ន្ធនឹងការកសាងច្បាប់។ ទន្ទឹមនេះ ឯកឧត្តមក៏បានចែករំលែកអំពីកិច្ចដំណើរការ និងបែបបទនីតិវិធី នៃការកសាងច្បាប់របស់ប្រទេសចិន​ ចាប់ពីដំណាក់កាលតាក់តែងដំបូង រហូតដល់ដំណាក់កាលនៃការតាមដានអនុវត្តច្បាប់ ក៏ដូចជាសមត្ថកិច្ចរបស់ក្រសួងស្ថាប័នពាក់ព័ន្ធនៅក្នុងដំណាក់កាលនីមួយៗ។ ជាមួយគ្នានេះ ឯកឧត្តមក៏បានជម្រាបផងដែរ អំពីបទពិសោធនៃការកែទម្រង់ច្បាប់ និងគោលការណ៍សំខាន់ៗក្នុងការកសាងប្រព័ន្ធច្បាប់របស់ប្រទេសចិន សំដៅគាំទ្រដល់ការកសាង និងការធ្វើទំនើបកម្មសង្គមតាមបែបចិន ក៏ដូចជាការបំពេញសេចក្តីត្រូវការរបស់ប្រជាជនចិន។ឯកឧត្តម វង្សី វិស្សុត បន្តមានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្ដេចមហាបវរធិបតី ហ៊ុន ម៉ាណែត ជាប្រមុខ តែងបានប្រកាន់ខ្ជាប់នូវគោលការណ៍នៃការពង្រឹងនីតិរដ្ឋនៅកម្ពុជា ដោយបាននិងកំពុងកសាងប្រព័ន្ធច្បាប់និងការកែទម្រង់ច្បាប់ ដោយឈរលើគោលការណ៍ភាពជាម្ចាស់, គុណតម្លៃនៃវប្បធម៌ និងប្រពៃណីទំនៀមទម្លាប់, យុត្តិធម៌ និងសមភាពនៅចំពោះមុខច្បាប់, ការពារសិទ្ធិនិងសេរីភាពប្រជាជន, បរិការណ៍នៃសង្គមនិងសេដ្ឋកិច្ច, ឧត្តមានុវត្តន៍ជាអន្តរជាតិ និងគោលការណ៍នៃការគាំទ្រដល់ការអភិវឌ្ឍសេដ្ឋកិច្ច និងសង្គមរបស់កម្ពុជាជាដើម។ល។ ឯកឧត្ដមឧបនាយករដ្ឋមន្ត្រីប្រចាំការ ក៏បានលើកឡើងអំពីមុខងាររបស់ទីស្តីការគណៈរដ្ឋមន្រ្តីលើការងារពាក់ព័ន្ធនឹងការកសាងច្បាប់ ដែលមានក្រុមប្រឹក្សាអ្នកច្បាប់ និងគណៈកម្មាធិការដឹកនាំការកែទម្រង់ច្បាប់ដែលជាសេនាធិការ ក៏ដូចជាតួនាទី និងភារកិច្ចរវាងក្រុមប្រឹក្សាអ្នកច្បាប់ និងគណៈកម្មាធិការដឹកនាំការកែទម្រង់ច្បាប់ផងដែរ។ឯកឧត្តម វង្សី វិស្សុត បានលើកឡើងផងដែរថា ទោះបីប្រព័ន្ធនយោបាយរវាងកម្ពុជា និងចិន មិនដូចគ្នាក៏ពិតមែន តែភាគីទាំងពីរក៏អាចធ្វើការរៀនសូត្រ និងចែករំលែកបទពិសោធល្អៗពីគ្នា ពាក់ព័ន្ធនឹងការកសាងប្រព័ន្ធច្បាប់ និងការកែទម្រង់ច្បាប់បានផងដែរ។ ម្យ៉ាងវិញទៀត ប្រព័ន្ធច្បាប់របស់ចិនក៏មានភាពជឿនលឿនផងដែរ ហើយបច្ចុប្បន្នចិន គឺជាដៃគូសេដ្ឋកិច្ច និងពាណិជ្ជកម្មធំជាងគេរបស់កម្ពុជា ហើយនៅកម្ពុជាក៏មានវត្តមាននៃវិនិយោគិនចិនកំពុងធ្វើការវិនិយោគ និងធ្វើធុរកិច្ចច្រើនផងដែរ។ក្នុងឱកាសនោះដែរ ឯកឧត្ដមឧបនាយករដ្ឋមន្ត្រីប្រចាំការ វង្សី វិស្សុត និងឯកឧត្ដម WANG Zhenjiang បានធ្វើការពិភាក្សា និងផ្លាស់ប្តូរមតិយោបល់គ្នាផងដែរ លើការពង្រឹង និងពង្រីកកិច្ចសហប្រតិបត្តិការលើវិស័យនីតិកម្មរវាងទីស្ដីការគណៈរដ្ឋមន្ត្រី និងក្រសួងយុត្តិធម៌នៃប្រទេសចិន តាមរយៈការពិនិត្យលទ្ធភាពក្នុងផ្លាស់ប្តូរដំណើរទស្សនកិច្ចការងារ, ការបណ្តុះបណ្តាល និងការកសាងសមត្ថភាពផ្នែកច្បាប់ ព្រមទាំងការផ្លាស់ប្តូរបទពិសោធល្អៗ ក្នុងការកែទម្រង់ច្បាប់។ នៅចុងបញ្ចប់ ភាគីទាំងពីរនឹងជំរុញកិច្ចសហប្រតិបត្តិការនេះឱ្យកាន់តែរឹងមាំ និងប្រកប​ដោយផ្លែផ្កា៕

(ភ្នំពេញ)៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានជួបពិភាក្សាការងារជាមួយគណៈប្រតិភូរដ្ឋសភានៃសាធារណរដ្ឋកូរ៉េ ដឹកនាំដោយឯកឧត្តម យូ សាំងបម (Yoo Sang-bum) សមាជិករដ្ឋសភា និងជាអនុប្រធានគណៈកម្មការនីតិកម្ម និងតុលាការនៃសាធារណរដ្ឋកូរ៉េ រួមនិងលោកជំទាវ ចូ បេស៊ូក (Cho Bae Sook) និងឯកឧត្តម សុង សក់ជុន (Song Seog-jun) សមាជិករដ្ឋសភា និងជាសមាជិកគណៈកម្មការនីតិកម្ម និងតុលាការនៃសាធារណរដ្ឋកូរ៉េ។ ជំនួបពិភាក្សាការងារដែលធ្វើឡើងនៅទីស្តីការក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី២០ ខែវិច្ឆិកា ឆ្នាំ២០២៤នេះ មានគោលបំណងបញ្ជាក់ពីទំនាក់ទំនងភាពជាដៃគូរវាងកម្ពុជា និងសាធារណរដ្ឋកូរ៉េ ជាពិសេសទាក់ទងនឹងកិច្ចសហប្រតិបត្តិការបញ្ជូននិងទទួលពលករកម្ពុជាទៅធ្វើការនៅសាធារណរដ្ឋកូរ៉េ។  ឯកឧត្តម ហេង សួរ បានសម្តែងការអរគុណចំពោះរដ្ឋាភិបាល ក៏ដូចជាស្ថាប័ន និងភាគីពាក់ព័ន្ធទាំងអស់នៃសាធារណរដ្ឋកូរ៉េ ដែលមានកិច្ចសហប្រតិបត្តិការយ៉ាងល្អជាមួយកម្ពុជា ក្នុងភាពជាដៃគូយូរអង្វែងក្រោមប្រព័ន្ធអនុញ្ញាតការងារ (EPS)។ ប្រព័ន្ធ EPS មិនត្រឹមតែជួយសម្រួលដល់ពលករកម្ពុជាទៅធ្វើការនៅសាធារណរដ្ឋកូរ៉េប្រកបដោយសុវត្ថិភាពប៉ុណ្ណោះទេ ប៉ុន្តែក៏បានចូលរួមចំណែកយ៉ាងសំខាន់ដល់ការអភិវឌ្ឍសង្គមសេដ្ឋកិច្ចរបស់ប្រទេសទាំងពីរផងដែរ។ ឯកឧត្តមរដ្ឋមន្ត្រី សង្ឃឹមថាសាធារណរដ្ឋកូរ៉េនឹងបង្កើនចំនួនកូតាទទួលយកពលករកម្ពុជាបន្ថែមទៀត ជាពិសសពលកជំនាញកម្ពុជាទៅធ្វើការនៅសាធារណរដ្ឋកូរ៉េ ខណៈដែលបច្ចុប្បន្នរដ្ឋាភិបាលកូរ៉េ មានគោលនយោបាយគាំពារយ៉ាងល្អសម្រាប់ពលករបរទេស ជាពិសេសតាមរយៈមជ្ឈមណ្ឌលគាំពារពលករបរទេស ដែលជួយសម្រួលដល់ពលករបរទេស និងផ្តល់ភាពកក់ក្តៅដល់ពលករបរទេស។ ក្នុងនោះ ពលករកម្ពុជាដែលធ្វើការនៅកូរ៉េ ក៏ទទួលបាននូវការយកចិត្តទុកដាក់ពីសំណាក់រដ្ឋាភិបាលកូរ៉េ និងទទួលបាននូវសិទ្ធិ និងឱកាសដូចទៅនឹងពលករកូរ៉េដែរ។ ជាការឆ្លើយតប ឯកឧត្តម យូ សាំងបម (Yoo Sang-bum) លើកឡើងថា ទំនាក់ទំនងជាដៃគូរវាងសាធារណរដ្ឋកូរ៉េ និងកម្ពុជាត្រូវបានបង្ហាញតាមរយៈប្រជាជនកម្ពុជា ពលករកម្ពុជា ដែលកំពុងស្នាក់នៅ និងធ្វើការនៅសាធារណរដ្ឋកូរ៉េ ជាពិសេសក៏មានស្រ្តីកម្ពុជាជាច្រើនបានរៀបការជាមួយបុរសកូរ៉េ ដោយកំពុងរស់នៅនិងចូលរួមក្នុងសកម្មភាពសង្គម វប្បធម៌ជាមួយប្រជាជនកូរ៉េ។ ទន្ទឹមនេះ ឯកឧត្តម យូ សាំងបម សង្ឃឹមថាកម្ពុជា និងសាធារណរដ្ឋកូរ៉េនឹងបន្តពង្រីកកិច្ចសហប្រតិបត្តិការជាមួយគ្នាដើម្បីជំរុញ និងសម្រួលដល់ដំណើរការបញ្ជូននិងទទួលពលករកម្ពុជាទៅធ្វើការនៅកូរ៉េ៕

(ភ្នំពេញ)៖ ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានលើកឡើងថា ចាប់តាំងពីរាជរដ្ឋាភិបាលកម្ពុជាបានដាក់ឱ្យអនុវត្តកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ចាប់តាំងពីថ្ងៃទី១៤ ខែវិច្ឆិកា ឆ្នាំ២០២៣ រហូតមកដល់ខែវិច្ឆិកា ឆ្នាំ២០២៤នេះ គឺមានរយៈពេល១ឆ្នាំ ដែលកម្មវិធីបណ្តុះបណ្តាលថ្នាក់ជាតិមួយនេះ ទទួលបានសិស្សចុះឈ្មោះចូលរៀនសរុបចំនួនជាង ៧៣០០០នាក់។បើតាមឯកឧត្តមរដ្ឋលេខាធិការ ក្នុងចំណោមសិស្សដែលបានចុះឈ្មោះចូលរៀនជំនាញសរុប ក្នុងនោះចំនួនសិស្សបានបញ្ចប់ការសិក្សាមានជាង ១២០០០នាក់នៅទូទាំងប្រទេស ហើយយុវជនទាំងនោះបានទទួលការងារធ្វើ និងមានចំណូលសមរម្យ។ ឯកឧត្តមរដ្ឋលេខាធិការបានគូសបញ្ជាក់ថា យោងតាមលទ្ធផលក្នុងរយៈពេលមួយឆ្នាំ កម្មវិធីបណ្តុះបណ្តាលនេះបាននិងកំពុងបន្តបេសកកម្មរបស់ខ្លួនក្នុងការបណ្តុះបណ្តាលជំនាញដល់យុវជនយ៉ាងសកម្មនៅទូទាំងប្រទេស ហើយទទួលបានលទ្ធផលប្រកបដោយផ្លែផ្កា។ ក្នុងនោះនៅតាមគ្រឹះស្ថានបណ្តុះបណ្តាលបច្ចេកទេសនៅទូទាំងប្រទេសក៏បានប្រកាសជ្រើសរើសយុវជនចូលសិក្សាជំនាញជាបន្តបន្ទាប់ផងដែរ។ ឯកឧត្តមរដ្ឋលេខាធិការបន្ថែមថា ដើម្បីកៀរគរយុវជនចុះឈ្មោះចូលរៀនជំនាញមួយនេះ ក្រសួងការងារ និងបណ្តុះបណ្តាលវិជ្ជាជីវៈ បានផ្សព្វផ្សាយព័ត៌មានតាមរយៈប្រព័ន្ធផ្សព្វផ្សាយ និងបណ្តាញសង្គម សហការជាមួយអាជ្ញាធរដែនដី ចុះផ្សព្វផ្សាយផ្ទាល់ទៅដល់មូលដ្ឋាននិងខ្នងផ្ទះរបស់ប្រជាពលរដ្ឋ និងចែកខិតប័ណ្ណតាមទីតាំងសាធារណៈយ៉ាងផុសផុល ដើម្បីកៀរគរយុវជនគោលដៅមកចុះឈ្មោះចូលរៀនជំនាញវិជ្ជាជីវៈ និងបច្ចេកទេសនេះឱ្យបានកាន់តែច្រើន។ឯកឧត្តមរដ្ឋលេខាធិការលើកឡើងថា វិស័យអប់រំបណ្តុះបណ្តាលវិជ្ជាជីវៈ និងបច្ចេកទេស បាននិងកំពុងចូលរួមយ៉ាងសកម្មលើការផលិតមូលធនមនុស្ស និងអភិវឌ្ឍកម្លាំងពលកម្មឱ្យមានជំនាញ ចំណេះដឹង សមត្ថភាព ការប្រកួតប្រជែងខ្ពស់ មានភាពធន់ បត់បែន អាចឆ្លើយតបតាមតម្រូវការនៃការវិវត្តយ៉ាងឆាប់រហ័សនៃមូលដ្ឋានសេដ្ឋកិច្ច ឧស្សាហកម្ម និងបច្ចេកវិទ្យាឌីជីថល ស្របតាមគោលនយោបាយរបស់រាជរដ្ឋាភិបាល ដោយធានាថា «ពលរដ្ឋម្នាក់មានជំនាញមួយយ៉ាងតិចប្រចាំជីវិត» និងអនុវត្តតាមអភិក្រមរបស់ សម្ដេចធិបតី ហ៊ុន ម៉ាណែត គឺ “រៀនឱ្យចប់ រៀនឱ្យចេះ ឱ្យមានការងារធ្វើ”។ឯកឧត្តមបានអំពាវនាវដល់យុវជនដែលមិនទាន់បានចុះឈ្មោះចូលរៀនជំនាញវិជ្ជាជីវៈ និងបច្ចេកទេស សូមរួសរាន់មកចុះឈ្មោះចូលរៀនជំនាញវិជ្ជាជីវៈដោយឥតបង់ថ្លៃនៅតាមគ្រឹះស្ថានបណ្តុះបណ្តាលជំនាញបច្ចេកទេស និងវិជ្ជាជីវៈនានា។ ដោយឡែក យុវជនដែលមកពីគ្រួសារក្រីក្រ និងគ្រួសារងាយរងហានិភ័យ ទទួលបានការរៀនជំនាញដោយឥតគិតថ្លៃ និងថែមទាំងទទួលបានប្រាក់ឧបត្ថម្ភប្រចាំខែ ២៨ ០០០០រៀល ផងដែរ។សម្រាប់សាកសួរព័ត៌មានលំអិត សូមទំនាក់ទំនងមកកាន់ប្រព័ន្ធទូរសព្ទ Hotline ឥតគិតថ្លៃ លេខ ១២៨៦ ឬ ១២៩៧ របស់ក្រសួងការងារ និងបណ្តុះបណ្តាលវិជ្ជាជីវៈ៕