(ភ្នំពេញ)៖ ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានទទួលជួបសម្តែងការគួរសម និងពិភាក្សាការងារជាមួយលោកស្រី ឆយ ម៉ូន ជុង (CHOI Moon Jung) នាយិកា ទីភ្នាក់ងារសហប្រតិបត្តិការអន្តរជាតិកូរ៉េ (KOICA) ប្រចាំកម្ពុជា និងគណៈប្រតិភូ លើការអនុវត្ត «គម្រោងអភិវឌ្ឍកម្លាំងពលកម្មជំនាញ ដើម្បីឆ្លើយតបតម្រូវការឧស្សាហកម្មនៅកម្ពុជា ឆ្នាំ២០២៦–២០៣០» នារសៀលថ្ងៃសុក្រ ទី៣០ ខែមករា ឆ្នាំ២០២៦ នៅទីស្តីការក្រសួង។ នាឱកាសនោះ ឯកឧត្ដមរដ្ឋមន្រ្តី បានថ្លែងអំណរគុណយ៉ាងជ្រាលជ្រៅចំពោះ KOICA ដែលបាននិងកំពុងរួមចំណែកដល់ការអភិវឌ្ឍជាច្រើននៅកម្ពុជា និងបានគូសបញ្ជាក់ពីសារៈសំខាន់នៃការពង្រីកកិច្ចសហប្រតិបត្តិការនេះ ដែលនាំមកនូវអត្ថប្រយោជន៍យ៉ាងច្រើន ជាពិសេស ការគាំទ្រដល់ការលើកកម្ពស់កម្លាំងពលកម្មកម្ពុជា ឱ្យក្លាយជាកម្លាំងពលកម្មមានជំនាញច្បាស់លាស់ ដែលជាទិសដៅអាទិភាពមួយរបស់រាជរដ្ឋាភិបាល។ឯកឧត្ដមបានបញ្ជាក់ពីការប្តេជ្ញាចិត្តខ្ពស់នៅក្នុងការអនុវត្តគម្រោងនេះ តាមរយៈអនុស្សរណៈនៃការយោគយល់គ្នាកាលពីឆ្នាំ២០២៤ ដោយមានគោលបំណងលើកកម្ពស់វិស័យអប់រំបណ្តុះបណ្តាលបច្ចេកទេសនិងវិជ្ជាជីវៈ នៅកម្ពុជា ដែលឆ្លើយតបទៅនឹងតម្រូវការទីផ្សារកម្លាំងពលកម្មទាំងនៅកម្ពុជា និងសាធារណរដ្ឋកូរ៉េ។ កិច្ចសហប្រតិបត្តិការនេះ មិនត្រឹមតែស្របតាមទិសដៅអាទិភាពជាតិប៉ុណ្ណោះទេ ប៉ុន្តែថែមទាំងមានតួនាទីសំខាន់ក្នុងការជំរុញកំណើនសេដ្ឋកិច្ច និងលើកកម្ពស់ការអភិវឌ្ឍប្រកបដោយចីរភាពនៅកម្ពុជាផងដែរ។តាមរយៈការអនុវត្តគម្រោងនេះផងដែរ កម្ពុជាសង្ឃឹមយ៉ាងមុតមាំថា នឹងអាចបង្កើតកម្លាំងពលកម្មជំនាញកាន់តែច្រើនលើជំនាញមេកានិកឧស្សាហកម្ម, ជំនាញផ្សាអគ្គិសនី និងជំនាញសំណង់ ដែលឆ្លើយតបនឹងលក្ខខណ្ឌ និងតម្រូវការទីផ្សារការងាររបស់សាធារណរដ្ឋកូរ៉េ ។លោកស្រី ឆយ ម៉ូន ជុង បានបង្ហាញនូវការពេញចិត្តចំពោះការពង្រីកកិច្ចសហប្រតិបត្តិការក្នុងការអនុវត្តគម្រោង ដែលមានគោលដៅរួម គឺធានាឱ្យសិស្ស-និស្សិតកម្ពុជាអាចបង្កើនជំនាញវិជ្ជាជីវៈបានយ៉ាងពេញលេញទាំងចំណេះដឹងផ្នែកទ្រឹស្តី និងការអនុវត្តជាក់ស្តែងនៅសាលា។ គម្រោងនេះ មិនត្រឹមតែផ្តល់ការបណ្តុះបណ្តាលសិស្ស-និស្សិតប៉ុណ្ណោះទេ ប៉ុន្តែថែមទាំងភ្ជាប់ពួកគេទៅនឹងឱកាសការងារនៅក្រៅប្រទេស ព្រោះថាគម្រោងនេះក៏នឹងផ្តល់នូវបទពិសោធកម្រិតស្តង់ដាឧស្សាហកម្មសកលទៀតផង។ជាមួយនឹងការថ្លែងអំណរគុណដល់ KOICA និងក្រុមការងារជំនាញទាំងអស់ដែលបានខិតខំបំពេញការងារយ៉ាងសកម្ម ក្នុងការបង្កើតឱ្យមានគម្រោង ដែលនឹងចាប់ផ្តើមដំណើរការនាពេលឆាប់ៗខាងមុខនេះ ឯកឧត្ដមរដ្ឋមន្រ្តីក៏បាន សំណូមពរដល់ KOICA សូមជួយបង្កើនសមត្ថភាពភាសាកូរ៉េដល់សិស្ស-និស្សិតកម្ពុជា ដើម្បីឱ្យពួកគេងាយស្រួលយល់ដឹងអំពីមេរៀន ក៏ដូចជាទទួលបានចំណេះដឹងពេញលេញពីការបណ្តុះបណ្តាលនៅសាលាផងដែរ៕ 

(កំពង់ស្ពឺ)៖ នាព្រឹកថ្ងៃទី៣០ ខែមករា ឆ្នាំ២០២៦ ឯកឧត្តម ទុយ ស៊ីផាន់ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និង ឯកឧត្តម តូច ប៉ូលីវ៉ា អភិបាលរងនៃគណៈអភិបាលខេត្តកំពង់ស្ពឺ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី បទប្បញ្ញត្តិច្បាប់ស្តីពីការងារ ជូនដល់រដ្ឋបាល សហជីព និងប្រតិភូបុគ្គលិកមកពីបណ្តាសហគ្រាស គ្រឹះស្ថាន និងរោងចក្រនានា។ វិទ្យាស្ថានជាតិការងារ នៃក្រសួងការងារ និងបណ្តុះបណ្តាលវិជ្ជាជីវៈ បានរៀបចំវគ្គបណ្តុះបណ្តាលនេះឡើង ដែលមានការចូលរួមពីសិក្ខាកាមប្រមាណ ៣០០នាក់ មកពីសហគ្រាសចំនួន ១០០ ក្នុងខេត្តកំពង់ស្ពឺ ក្នុងគោលបំណងពង្រឹងសមត្ថភាព និងចំណេះដឹងបន្ថែមដល់តួអង្គពាក់ព័ន្ធឱ្យយល់ដឹងកាន់តែច្បាស់អំពីច្បាប់ការងារ និងលិខិតបទដ្ឋានគតិយុត្តផ្សេងៗ។ ចំណេះដឹងនេះនឹងជួយឱ្យការអនុវត្តតួនាទីភារកិច្ចឱ្យកាន់តែមានប្រសិទ្ធភាព សំដៅធានាឱ្យបាននូវអនុលោមភាពតាមច្បាប់ និងលើកកម្ពស់ផលិតភាពការងារនៅក្នុងសហគ្រាសនីមួយៗ។ខ្លឹមសារសំខាន់នៃវគ្គបណ្តុះបណ្តាលនេះ បានផ្ដោតលើប្រធានបទធំៗចំនួន ៣ រួមមាន លក្ខខណ្ឌទូទៅនៃការងារ ការអនុវត្តកិច្ចសន្យាការងារ និងយន្តការដោះស្រាយវិវាទការងារ ដែលសុទ្ធសឹងតែជាចំណេះដឹងគន្លឹះសម្រាប់សម្របសម្រួលទំនាក់ទំនងរវាងកម្មករនិយោជិត និងនិយោជក ក្នុងគោលដៅបង្ការ និងកាត់បន្ថយជម្លោះការងារដែលអាចប៉ះពាល់ដល់ខ្សែច្រវាក់ផលិតកម្ម។មានប្រសាសន៍ក្នុងឱកាសនោះ ឯកឧត្តមរដ្ឋលេខាធិការ បានសង្កត់ធ្ងន់ថា ការអភិវឌ្ឍចំណេះដឹងផ្នែកច្បាប់ដល់ភាគីពាក់ព័ន្ធ គឺជាការវិនិយោគលើមូលធនមនុស្សដ៏សំខាន់ ដើម្បីទ្រទ្រង់ស្ថិរភាពសង្គម និងសេដ្ឋកិច្ចជាតិ។ ទន្ទឹមនឹងនេះ ឯកឧត្តមក៏បានផ្តល់អនុសាសន៍ជំរុញឱ្យសិក្ខាកាមទាំងអស់ ត្រូវយកចិត្តទុកដាក់ក្រេបជញ្ជក់ចំណេះដឹង និងត្រូវមានកិច្ចសហការជិតស្និទ្ធជាមួយមន្ត្រីជំនាញ ដើម្បីរួមគ្នាដោះស្រាយបញ្ហាប្រឈមនានានៅកន្លែងធ្វើការឱ្យបានទាន់ពេលវេលា ប្រកបដោយវិជ្ជាជីវៈ និងតម្លាភាព៕

(ហ្វីលីពីន)៖ នាឱកាសវេទិកាទេសចរណ៍អាស៊ានឆ្នាំ២០២៦, ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានជួបពិភាក្សាការងារជាមួយលោក Herminio Bagro III, ប្រធានតំណាងក្រុមប្រឹក្សាធុរកិច្ចអាម៉េរិក-អាស៊ាន ប្រចាំហ្វីលីពីន ព្រមទាំងសហការីដែលមកពី Expedia Group, Marriot International, Airbnb, Visa, Royal Caribbean International។ កិច្ចពិភាក្សាបានផ្តោតលើកិច្ចសហប្រតិបត្តិការរវាងកម្ពុជា និង ក្រុមប្រឹក្សាធុរកិច្ចអាម៉េរិក-អាស៊ាន លើវិស័យទេសចរណ៍ ដែលភាគីទាំងពីរនឹងសិក្សាបង្កើតក្រុមការងារដែលមានតំណាងក្រសួងទេសចរណ៍, ក្រុមប្រឹក្សាសិក្សាទីផ្សារនិងផ្សព្វផ្សាយទេសចរណ៍កម្ពុជា និងក្រុមប្រឹក្សាធុរកិច្ចអាម៉េរិក-អាស៊ាន ដើម្បីស្វែងរកសកម្មភាពសហប្រតិបត្តិការជាក់ស្តែង។ ជាមួយគ្នានេះ ឯកឧត្តមរដ្ឋមន្ត្រីក៏បានគូសបញ្ជាក់អំពីលទ្ធផលប្រកបដោយផ្លែផ្កានៃជំនួបរវាងលោក Ted Osius ប្រធានក្រុមប្រឹក្សាធុរកិច្ចអាម៉េរិក-អាស៊ាន ជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និង បន្ទាប់មកក៏មានជំនួបជាមួយឯកឧត្តមរដ្ឋមន្ត្រីផ្ទាល់ ដែលបានប្រព្រឹត្តទៅកាលពីខែធ្នូ ឆ្នាំ២០២៥ កន្លងទៅ នៅរាជធានីភ្នំពេញ៕

(ហ្វីលីពីន)៖ នាឱកាសវេទិកាទេសចរណ៍អាស៊ាន ឆ្នាំ២០២៦, ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានជួបពិភាក្សាការងារជាមួយ ឯកឧត្តម FILIPUS NINO PEREIRA រដ្ឋមន្ត្រីក្រសួងពាណិជ្ជកម្មនិងឧស្សាហកម្ម។ ជាកិច្ចចាប់ផ្តើម, ឯកឧត្តមរដ្ឋមន្ត្រីក្រសួងទេសចរណ៍ អបអរសាទរចំពោះសាធារណរដ្ឋប្រជាធិបតេយ្យទីម័រ-ឡេស្តេ ដែលបានចូលជាសមាជិកទី១១ របស់អាស៊ាន និង កោតសរសើរចំពោះកិច្ចសហប្រតិបត្តិការដ៏ល្អប្រសើរលើគ្រប់វិស័យ និងនៅគ្រប់កម្រិត ជាពិសេសនៅកម្រិតថ្នាក់ដឹកនាំកំពូលរវាងប្រទេសទាំងពីរ។ ជាការឆ្លើយតប, ឯកឧត្តមរដ្ឋមន្ត្រី FILIPUS NINO PEREIRA បានយកឱកាសនេះថ្លែងអំណរគុណយ៉ាងជ្រាលជ្រៅគោរពជូនចំពោះ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នប្រធានព្រឹទ្ធសភានៃព្រះរាជាណាចក្រកម្ពុជា និង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលជានិច្ចជាកាលតែងតែគាំទ្រសមាជិកភាពរបស់សាធារណរដ្ឋប្រជាធិបតេយ្យទីម័រ-ឡេស្តេ និងបានដើរតួនាទីយ៉ាងសំខាន់ក្នុងការជំរុញទីម័រ-ឡេស្តេ បានចូលជាសមាជិករបស់អាស៊ាន។ ជាពិសេស, បន្ទាប់ពីចូលជាសមាជិកអាស៊ានផ្លូវការ, នេះជាលើកទី១ ដែលទីម័រ-ឡេស្តេ បានចូលរួមកិច្ចប្រជុំរដ្ឋមន្ត្រីទេសចរណ៍អាស៊ានលើកទី២៩ ក្នុងឋានៈជាសមាជិកពេញសិទ្ធិ។ជាមួយគ្នានេះ, ភាគីទាំងពីរ ស្វាគមន៍ចំពោះកិច្ចសហប្រតិបត្តិការលើវិស័យទេសចរណ៍រវាងប្រទេសទាំងពីរ តាមរយៈការពន្លឿននីតិវិធីនៃការចុះអនុស្សរណៈនៃការយោគយល់គ្នានាពេលខាងមុខ បន្ទាប់ត្រូវបានលើកពេលកាលពីឆ្នាំ២០១៧ កន្លងទៅ។ ឯកឧត្តមរដ្ឋមន្ត្រី FILIPUS NINO PEREIRA នឹងជម្រាបជូន ឯកឧត្តម Francisco Kalbuadi Lay, ឧបនាយករដ្ឋមន្ត្រីនិងរដ្ឋមន្ត្រីសម្របសម្រួលកិច្ចការសេដ្ឋកិច្ចនិងជារដ្ឋមន្ត្រីក្រសួងទេសចរណ៍និងបរិស្ថានទីម័រ-ឡេស្តេ ពិនិត្យនិងជំរុញនីតិវិធីបន្តឱ្យបានឆាប់រហ័ស៕

(ភ្នំពេញ)៖ លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅរសៀលថ្ងៃទី៣០ ខែមករា ឆ្នាំ២០២៦នេះ បានអំពាវនាវដល់អតីតពលករត្រឡប់ពីប្រទេសថៃ យុវជន និងអ្នកកំពុងស្វែងរកការងារធ្វើនៅខេត្ដសៀមរាប សូមចូលរួមវេទិការងារ សន្ដិសុខសង្គម និងបណ្តុះបណ្តាលវិជ្ជាជីវៈ នាចុងសប្តាហ៍នេះដើម្បីទទួលបានការងារធ្វើភ្លាមៗ ខណៈឱកាសការងារមានជិត ៩ម៉ឺនកន្លេង។លោកថ្លែងថា «វេទិកាការងារនេះ គឺជាយន្តការសំខាន់មួយរបស់ក្រសួង ក្នុងការនាំយកឱកាសការងារពិតប្រាកដ ទៅជិតប្រជាពលរដ្ឋ ជាពិសេសអតីតពលករដែលបានវិលត្រឡប់មកពីប្រទេសថៃ និងយុវជន ដែលកំពុងស្វែងរកការងារធ្វើ ដើម្បីឱ្យពួកគាត់អាចទទួលបានការងារធ្វើភ្លាមៗ និងមានប្រាក់ចំណូលសមរម្យ»។អ្នកនាំពាក្យរូបនេះបញ្ជាក់ថា ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ នឹងរៀបចំពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ នៅខេត្តសៀមរាប ចំនួន២ទីតាំង ក្នុងនោះថ្ងៃសៅរ៍ ទី៣១ ខែមករា វេទិកានឹងរៀបចំនៅបរិវេណសាលាស្រុកស្រីស្នំ រីឯថ្ងៃអាទិត្យ ទី១ ខែកុម្ភៈ នឹងរៀបចំនៅបរិវេណសាលាបឋមសិក្សា និងអនុវិទ្យាល័យភូមិគំរូ ស្រុកក្រឡាញ់ ចាប់ពីម៉ោង ៨ព្រឹក ដល់ម៉ោង ៣រសៀល ដើម្បីផ្ដល់ឱកាសការងារជិត ៩ម៉ឺនកន្លែង។លោកបានបន្ថែមថា អ្នកចូលរួមនឹងទទួលបានការសម្ភាសការងារភ្លាមៗជាមួយក្រុមហ៊ុន មានរថយន្តដឹកជញ្ជូននិងអាហារដោយឥតគិតថ្លៃ។ មិនត្រឹមតែអាចស្វែងរកការងារប៉ុណ្ណោះ អ្នកចូលរួមក៏អាចចុះឈ្មោះចូលរៀនជំនាញវិជ្ជាជីវៈ និងបច្ចេកទេស តាមកម្មវិធី TVET 1.5M របស់រាជរដ្ឋាភិបាល និងយល់ដឹងពីអត្ថប្រយោជន៍នៃរបបសន្តិសុខសង្គមផងដែរ។ ជាមួយគ្នានេះ ប្រជាពលរដ្ឋដែលស្ថិតនៅឆ្ងាយ អាចទាក់ទងលេខទូរសព្ទ ១២៩៧ ដើម្បីទទួលបានឱកាសការងារ និងការបណ្តុះបណ្តាលជំនាញបច្ចេកទេស និងវិជ្ជាជីវៈ ដោយឥតគិតថ្លៃ ដែលមន្ត្រីក្រសួងការងារនៅរង់ចាំទទួលទូរសព្ទរបស់បងប្អូន ៧ថ្ងៃក្នុងមួយសប្តាហ៍៕

(អន្តរជាតិ)៖ វៀតណាមបានរកឃើញប្រេងដ៏មានសក្តានុពលខ្ពស់នៅឆ្នេរសមុទ្រ នៅវាលប្រេង Hai Su Vang ចម្ងាយប្រហែល 65 គីឡូម៉ែត្រពីឆ្នេរសមុទ្រភាគខាងត្បូងរបស់ខ្លួន ដែលជាចលនាមួយដែលអាចពង្រឹងការផ្គត់ផ្គង់ថាមពលក្នុងស្រុក និងកិច្ចខិតខំប្រឹងប្រែងរុករកនៅក្រៅឆ្នេរសមុទ្រ។ថ្លែងនៅក្នុងសន្និសីទសារព័ត៌មានរបស់ក្រសួងឧស្សាហកម្ម និងពាណិជ្ជកម្ម លោក Dang Hai Anh អនុប្រធាននាយកដ្ឋានប្រេង ឧស្ម័ន និងធ្យូងថ្ម បាននិយាយថា ការរកឃើញនេះមានទីតាំងនៅប្លុក 15-2/17 នៃអាង Cuu Long។ លោកបានបន្ថែមថា លទ្ធផលនៃការរុករក និងវាយតម្លៃថ្មីៗនៅវាលប្រេងកាតនេះគឺ "វិជ្ជមានខ្លាំង" ដោយទុនបម្រុងប្រេងបង្ហាញពីសក្តានុពលដ៏សំខាន់សម្រាប់ការអភិវឌ្ឍនាពេលអនាគត។យោងតាមក្រុមហ៊ុន Murphy Oil Corporation របស់សហរដ្ឋអាមេរិក ដែលជាប្រតិបត្តិករនៃគម្រោងនេះ ការរកឃើញដំបូងបានជួបប្រទះនឹងទម្រង់ប្រេងប្រហែល 370 ហ្វីត (113 ម៉ែត្រ) នៅទូទាំងអាងស្តុកទឹកពីរ ជាមួយនឹងការផលិតសាកល្បងប្រហែល 6,000 បារ៉ែលក្នុងមួយថ្ងៃ។ ការខួងវាយតម្លៃបន្តនៅអណ្តូង HSV-2X បានបញ្ជាក់ពីជួរឈរប្រេងក្រាស់ជាងមុន ដោយកត់ត្រាកម្រាស់សរុបនៃប្រេង ៤២៩ ហ្វីត (១៣១ ម៉ែត្រ) ដែលភាគច្រើនស្ថិតនៅក្នុងអាងស្តុកប្រេងសំខាន់ដែលជ្រៅជាង។ក្រុមហ៊ុន Murphy Oil បាននិយាយថា ខ្លួននឹងបន្តការងារវាយតម្លៃ និងរៀបចំរបាយការណ៍លម្អិតអំពីធនធានប្រេង និងឧស្ម័ន និងទុនបម្រុងសម្រាប់ដាក់ជូនអាជ្ញាធរវៀតណាមសម្រាប់ការពិនិត្យ និងវាយតម្លៃ។ក្រុមហ៊ុនបានចាប់ផ្តើមខួងអណ្តូងរុករកនៅវាល Hai Su Vang ក្នុងឆ្នាំ ២០២៤ ហើយបានបញ្ចប់អណ្តូងវាយតម្លៃដោយជោគជ័យនៅក្នុងខែតុលា ឆ្នាំ ២០២៥ ដើម្បីវាយតម្លៃទំហំ ទុនបម្រុង និងសក្តានុពលផលិតកម្មរបស់វាលប្រេងនេះ៕

(អន្តរជាតិ)៖ លោក Luong Cuong ប្រធានរដ្ឋ និងលោក Antonio Costa ប្រធានក្រុមប្រឹក្សាអឺរ៉ុប បានប្រកាសថា វៀតណាម និងសហភាពអឺរ៉ុប បានបង្កើនទំនាក់ទំនងរបស់ពួកគេទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ។មេដឹកនាំទាំងពីរបានរៀបចំសន្និសីទសារព័ត៌មានរួមគ្នាមួយ ដើម្បីប្រកាសពីលទ្ធផលនៃការចរចារបស់ពួកគេ ដោយប្រកាសជាផ្លូវការអំពីការលើកកម្ពស់ទំនាក់ទំនងវៀតណាម-សហភាពអឺរ៉ុប នេះបើយោងតាមទីភ្នាក់ងារសារព័ត៌មានវៀតណាម។ ថ្លែងនៅក្នុងកិច្ចប្រជុំសារព័ត៌មានមួយនៅថ្ងៃទី 26 ខែមករា ឯកអគ្គរដ្ឋទូតសហភាពអឺរ៉ុបប្រចាំប្រទេសវៀតណាម លោក Julien Guerrier បាននិយាយថា ដំណើរទស្សនកិច្ចរបស់លោក Costa គឺមានសារៈសំខាន់ខ្លាំងណាស់ ដោយផ្ញើសារច្បាស់លាស់មួយថា សហភាពអឺរ៉ុបស្វែងរកការពង្រឹងកិច្ចសហប្រតិបត្តិការជាមួយដៃគូ រួមទាំងវៀតណាម ហើយក្នុងការធ្វើដូច្នេះ រួមចំណែកដល់ការកសាងទំនាក់ទំនងពហុភាគីដែលមានមូលដ្ឋានលើច្បាប់។លោកឯកអគ្គរដ្ឋទូត Guerrier បានកត់សម្គាល់ថា ក្នុងរយៈពេល 35 ឆ្នាំកន្លងមកនេះ ទំនាក់ទំនងសហភាពអឺរ៉ុប-វៀតណាម បានអភិវឌ្ឍឥតឈប់ឈរទៅជាភាពជាដៃគូដ៏រឹងមាំ និងទូលំទូលាយបំផុតមួយ ដែលគ្របដណ្តប់លើវិស័យជាច្រើន ចាប់ពីសេដ្ឋកិច្ច ពាណិជ្ជកម្ម ការវិនិយោគ និងការអភិវឌ្ឍប្រកបដោយចីរភាព រហូតដល់សន្តិសុខ ការពារជាតិ ការទូត និងការផ្លាស់ប្តូរប្រជាជន និងប្រជាជន។លោកជឿជាក់ថា "ពេលវេលាបានមកដល់ហើយសម្រាប់សហភាពអឺរ៉ុប និងវៀតណាម ដើម្បីលើកកម្ពស់ទំនាក់ទំនងរបស់ពួកគេដល់កម្រិតថ្មីមួយ"។ ក្រុមប្រឹក្សាអឺរ៉ុបគឺជាស្ថាប័នធ្វើការសម្រេចចិត្តនយោបាយខ្ពស់បំផុតរបស់សហភាពអឺរ៉ុប។ លោក Costa អាយុ 64 ឆ្នាំ បានបម្រើការជានាយករដ្ឋមន្ត្រីព័រទុយហ្គាល់ពីឆ្នាំ 2015 ដល់ឆ្នាំ 2024 និងបានកាន់តំណែងជាប្រធានក្រុមប្រឹក្សាអឺរ៉ុបចាប់តាំងពីខែធ្នូ ឆ្នាំ 2024។វៀតណាម និងសហភាពអឺរ៉ុបបានបង្កើតទំនាក់ទំនងការទូតនៅថ្ងៃទី 28 ខែវិច្ឆិកា ឆ្នាំ 1990។ ពាណិជ្ជកម្មទ្វេភាគីក្នុងរយៈពេល 11 ខែដំបូងនៃឆ្នាំ 2025 បានឈានដល់ជាង 66.8 ពាន់លានដុល្លារអាមេរិក កើនឡើង 6.6% ពីមួយឆ្នាំទៅមួយឆ្នាំ។សហភាពអឺរ៉ុបគឺជាដៃគូពាណិជ្ជកម្មធំទីបួនរបស់វៀតណាម ទីផ្សារនាំចេញធំទីបី និងទីផ្សារនាំចូលធំទីប្រាំ។ វៀតណាមគឺជាដៃគូពាណិជ្ជកម្មធំទី 16 របស់សហភាពអឺរ៉ុបនៅទូទាំងពិភពលោក និងធំជាងគេរបស់ខ្លួននៅក្នុងអាស៊ាន៕

ឯកឧត្ដម​ ហ៊ុយ​ វ​ណ្ណៈ ប្រធាន​សហភាព​សហព័ន្ធ​អ្នក​សារព័ត៌មាន​កម្ពុជា​ (ស​.ស​.ស​.ក) ៖​ ខ្ញុំសូមអនុញ្ញាតចូលរួមយោបល់ជុំវិញរឿងរ៉ាវនៃ «ចំណងជើងនៅលើក្របសៀវភៅរបស់លោក ទូច សុខៈ»។ ខ្ញុំសង្ឃឹមទុកជាមុនថា បងប្អូននឹងមិនវាយប្រហារខ្ញុំ ដោយសារតែការចូលខ្លួនមកជួយបំភ្លឺ និងចែករំលែកអំពីសាច់រឿងខ្លះ ដែលខ្ញុំបានស្រាវជ្រាវ និងបានស្វែងយល់ ហើយយកមកចែករំលែកជាមួយបងប្អូននោះទេ។ លោក ទូច សុខៈ ក៏មិនបានទាក់ទង ឬពឹងខ្ញុំឱ្យជួយបំភ្លឺ ចំពោះរឿងរ៉ាវ ដែលកំពុងក្តៅគគុកនេះដែរ។ ប៉ុន្តែ «យើងជាខ្មែរដូចគ្នា» ហើយខ្ញុំមានជ្រុងម្ខាងទៀត ក្នុងការបើកវាំងននសាច់រឿងនេះ។ ក្នុងសំណេរវែងគួរសមនេះ មិនមែនមានន័យថា ខ្ញុំការពារលោក ទូច សុខៈ ផ្តាច់មុខទេ ប៉ុន្តែដើម្បីការពារតម្លៃប្រជាជាតិយើង រួមទាំងថ្នាក់ដឹកនាំជាតិយើង ដែលលោកមិនបានទាមទារអ្វី តាមរយៈខ្លឹមសារលើក្របសៀវភៅនេះ ហើយលោកក៏មិនគួរត្រូវរងសម្ពាធ ឬរងការដាក់បន្ទុកដោយអយុត្តិធម៌ និងដោយមិនបានដឹងនោះឡើយ។ ដូច្នេះ យើងអាចដកឃ្លាបន្តិច ដើម្បីពិនិត្យលើដំណើររឿង ដូចតទៅ៖ទី១- ខ្ញុំយល់ពីអារម្មណ៍បងប្អូនគ្រប់ទិសទី ដែលបង្ហាញការហួសចិត្តចំពោះ ចំណងជើងសៀវភៅ «កម្ពុជា ឈ្នះថៃសម័យតេជោធិបតី»។ ដោយស្មោះត្រង់ ពេលឃើញចំណងជើងនេះភ្លាម សូម្បីតែរូបខ្ញុំផ្ទាល់ក៏ឆ្ងល់ដែរ។ ប៉ុន្តែ ខ្ញុំដកឃ្លាមកពិចារណា ហើយក៏មិនទាន់ទម្លាក់កំហុសទាំងស្រុងភ្លាមចំពោះ លោក ទូច សុខៈ ទេ ដោយខ្ញុំត្រូវការពេលវេលា ដើម្បីស្រាវជ្រាវ និងស្វែងយល់បន្ថែម ពាក់ព័ន្ធកិច្ចការនេះ តាមរបៀបរបស់ខ្ញុំ។ទី២- ខ្ញុំបានរកឃើញថា ក្របសៀវភៅនេះ គឺបានរៀបចំធ្វើឡើង និងបានបញ្ចេញលើកដំបូងៗ តាំងពីថ្ងៃទី៧ ខែកក្កដា ឆ្នាំ២០២៥ មកម្ល៉េះ ពោលគឺនៅមុនការផ្ទុះសង្គ្រាមលើកទី១ (រវាងថ្ងៃទី២៤-២៨ ខែកក្កដា ឆ្នាំ២០២៥) ដែលសៀមឈ្លានពានប្រទេសយើង ៥ថ្ងៃដំបូងនោះ ទៅទៀត ហើយកាលបរិច្ឆេទដូចមាននៅលើរូបភាពស្រាប់។ នៅក្នុងដំណាក់កាលនៃការរៀបចំក្របសៀវភៅ សូម្បីរូបថតឥស្សរជន ដែលជ្រើសយកមកដាក់ និងការរចនាក្រប ក៏មានការផ្លាស់ប្តូរ ដូរចុះ ដូរឡើង តាមដំណើរនៃការព្រាងនៅឡើយ។ ជាមួយគ្នា នៅពេលដែលផុសផ្សាយក្របព្រាងដំបូងៗ ក៏មានបងប្អូនយើងមួយចំនួន បានចូលផ្តល់មតិ comment ក្នុង facebook ឈ្មោះ «ទូច សុខៈ» ដោយបង្ហាញនូវការពេញចិត្ត និងចង់អានសៀវភៅនេះ។ អ្នកខ្លះបានសួរថា តើសៀវភៅចេញផ្សាយពេលណា? ហើយអ្នកខ្លះថែមទាំងស្នើសុំសៀវភៅទៀតផង។ ដូច្នេះជារួម comment ស្ទើរជាង៩០% មានខ្លឹមសារវិជ្ជមាន ដោយសារកាលៈទេសៈនៅពេលនោះ មិនទាន់មានការផ្ទុះសង្គ្រាម។ទី៣- ផ្ទុយទៅវិញ ស្រាប់តែប៉ុន្មានថ្ងៃនេះ នៅចុងខែមករា ឆ្នាំ២០២៦ គឺជិត៧ខែក្រោយ ក៏ស្រាប់តែឃើញក្របសៀវភៅនេះផុសចេញមកវិញ ហើយបង្កឱ្យមានប្រតិកម្មពីគ្រប់ទិសទី។ ការពិត ពីមុនខ្ញុំក៏មិនដែលដឹងថា មានការរៀបចំសៀវភៅនេះទេ។ ខ្ញុំក៏ទើបតែបានដឹងថ្មីៗនេះដូចគ្នា គឺនៅពេលដែលបានឃើញប្រតិកម្មពីគ្រប់មជ្ឈដ្ឋាន។ ខ្ញុំក៏មិនដឹងថា តើនរណាជាអ្នកបញ្ចេញផ្ទាំងក្របសៀវភៅនេះមកវិញ? ហើយចេញក្នុងគោលបំណងអ្វីនោះទេ? តាមរយៈប្រតិកម្មពីមហាជន ខ្ញុំក៏បានតាមមើលឃើញថា លោក ទូច សុខៈ បានធ្វើសារឆ្លើយបំភ្លឺចំនួន២ដង បើទោះបីមិនទាន់អាចជួយឱ្យថយកម្តៅភ្លាមៗក្តី។ ជាមួយគ្នា ក្រៅពីបញ្ហាក្របសៀវភៅលោក ទូច សុខៈ លើសពីនេះ ការចំអកបានរីករាលដាលទៅសៀវភៅផ្សេងៗមួយចំនួនទៀតផងដែរ ដែលគួរឱ្យសោកស្តាយ។ទី៤- ខ្ញុំយល់ថា យើងបានរៀនសូត្រពីបញ្ហានេះគ្រប់គ្រាន់ហើយ។ យើងគួរព្រមទទួលស្គាល់ ទទួលយក ហើយយើងក៏មិនគួរបន្តហែកទ្រូងឱ្យសត្រូវឃើញ ឱ្យគេសើចចំអកចំពោះខ្មែរយើងនោះទេ។ ខ្ញុំយល់ថា កាលៈទេសៈក្នុងដើមខែកក្កដា ២០២៥ លោក ទូច សុខៈ មានការគិតគូរស្របតាមស្ថានការណ៍នោះ។ ក៏ប៉ុន្តែ មកដល់បច្ចុប្បន្ននេះ ពិតជាមានវឌ្ឍនភាពនៃសភាពការណ៍ថ្មីៗ ដែលយើងបានដឹងទាំងអស់គ្នា។ទី៥- ជាទស្សនៈផ្ទាល់ខ្លួនខ្ញុំ ឯកសារក្នុងខ្លឹមសារបែបនេះ គឺមិនគួរយកមកបញ្ចេញសារជាថ្មី នៅក្នុងកាលៈទេសៈនេះឡើយ។ ហើយខ្ញុំក៏នៅតែឆ្ងល់ថា តើការបញ្ចេញមកនេះ ក្នុងគោលបំណងអ្វី? ដូច្នេះ ក្នុងនាមខ្ញុំដែលកំពុងធ្វើការងារជាមួយសហការីក្នុងការចងក្រងកាលប្បវត្តិពិតនៃសភាពការណ៍សង្គ្រាមសៀមឈ្លានពានកម្ពុជា ហើយជាពិសេស ដោយសារការចងក្រងសៀវភៅនេះ មានពាក់ព័ន្ធតួអង្គឥស្សរជនថ្នាក់ដឹកនាំកំពូលរបស់ជាតិ ខ្ញុំស្នើលោក ទូច សុខៈ ពិនិត្យនិងកែសម្រួលឡើងវិញ៣ចំណុច៖ ទី១. ខ្លឹមសារចំណងជើង ទី២. រូបភាពនិងរូបថតនៅលើក្របសៀវភៅ និងទី៣. គួរបន្តផ្ទៀងផ្ទាត់និងពិនិត្យថ្លឹងថ្លែងលើខ្លឹមសារ ពាក្យពេចន៍ នៅខាងក្នុងសៀវភៅ ដើម្បីធានាឱ្យបាននូវសុក្រឹតភាព និងសច្ចៈធម៌ប្រវត្តិសាស្ត្រ។ ខ្ញុំយល់ឃើញថា ក៏អាចនឹងត្រូវការពិគ្រោះយោបល់បន្ថែម ជាពិសេសជាមួយអ្នកពាក់ព័ន្ធសំខាន់ៗ។ ជាមួយគ្នា ខ្ញុំក៏សូមអំពាវនាវ បងប្អូនយើង សូមមេត្តាឈប់ជាប់ជំពាក់នឹង ក្របសៀវភៅ ដែលស្ថិតក្នុងលក្ខណៈព្រាងនៅឡើយនេះ។ ខ្ញុំជឿថា លោក ទូច សុខៈ នឹងពិនិត្យកែសម្រួលក្របសៀវភៅនេះឡើងវិញ នៅពេលអនាគត។ ខ្ញុំយល់ឃើញថា ប្រធានបទដ៏សំខាន់ ហើយជាអ្វីដែលខ្មែរយើងទាំងអស់ គ្រប់រូប និងគ្រប់ទិសទី ត្រូវរួមគ្នាចងចាំគឺ “សៀមឈ្លានពានយើង”។ យើងត្រូវតែប្រែក្លាយកំហឹង និងការឈឺចាប់នេះ ឱ្យទៅជាកម្លាំងសាមគ្គីខ្មែរ ដើម្បីយើងបន្តរួមគ្នាជម្នះឧបសគ្គ និងពួតដៃគ្នា រួមជាមួយថ្នាក់ដឹកនាំ និងវីរៈកងទ័ពជួយមុខ បន្តការពារប្រទេសជាតិយើង ដើម្បីកូនចៅយើងតទៅមុខ។ សូមអរគុណ!

(សុខភាព)៖ ជំងឺមហារីកពោះវៀនធំ លែងជា "ជំងឺរបស់មនុស្សចាស់" ទៀតហើយ។ និន្នាការនៃជំងឺនេះដែលប៉ះពាល់ដល់មនុស្សវ័យក្មេងកំពុងកើនឡើងទូទាំងពិភពលោក ហើយមូលហេតុចម្បងមួយគឺកើតចេញពីទម្លាប់ប្រចាំថ្ងៃដែលយើងតែងតែមើលរំលង។ សមាគមជំងឺមហារីកអាមេរិកបញ្ជាក់ថា ករណីមហារីកដែលកើតឡើងដំបូងកំពុងកើនឡើងនៅក្នុងប្រទេស ជាងពាក់កណ្តាលនៃពិភពលោក។ ការសិក្សាបង្ហាញជាប់លាប់ថា របបអាហារ និងរបៀបរស់នៅដើរតួនាទីយ៉ាងសំខាន់។លោកវេជ្ជបណ្ឌិត Karen Zaghiyan ដែលជាគ្រូពេទ្យវះកាត់ពោះវៀនធំ និងរន្ធគូថនៅទីក្រុង Los Angeles បានចង្អុលបង្ហាញពីទម្លាក់អាក្រក់ ៥យ៉ាង ដែលជៀសវាងជាដាច់ខាតដើម្បីការពារប្រព័ន្ធរំលាយអាហាររបស់មនុស្ស។១/ សាច់កែច្នៃ៖ នៅផ្នែកខាងលើនៃ "បញ្ជីខ្មៅ" គឺសាច់ដូចជាសាច់ជ្រូកប្រៃ សាច់ក្រកប៉េប៉េរ៉ូនី និងសាច់ក្រកត្រជាក់។ ការសិក្សាជាច្រើនបានបង្ហាញពីទំនាក់ទំនងរវាងក្រុមអាហារនេះ និងហានិភ័យនៃជំងឺមហារីកពោះវៀនធំ ដោយមានការកើនឡើងប្រមាណ 13-22%។ យោងតាមវិទ្យាស្ថានស្រាវជ្រាវជំងឺមហារីកអាមេរិក ការទទួលទានសាច់កែច្នៃត្រឹមតែ ៥០ ក្រាមក្នុងមួយថ្ងៃ (ស្មើនឹងសាច់ជ្រូកប្រៃប្រហែលពីរចំណិត) បង្កើនហានិភ័យនៃជំងឺមហារីក ១៦%។២/សាច់អាំងលើអណ្តាតភ្លើង៖ ការចម្អិនសាច់ដោយផ្ទាល់លើអណ្តាតភ្លើងបើកចំហ ជាពិសេសប្រសិនបើវាឆេះ ឬខ្មៅ គឺជាគ្រោះថ្នាក់មួយទៀត។ ដំណើរការដុតនៅសីតុណ្ហភាពខ្ពស់បង្កើតសមាសធាតុគីមីដែលហៅថា HCAs និង PAHs។ការសិក្សានៅមន្ទីរពិសោធន៍បានបង្ហាញថាសារធាតុទាំងនេះមានសក្តានុពលបង្កឱ្យមានដុំសាច់ រួមទាំងនៅក្នុងពោះវៀនធំផងដែរ។ រូបរាងសាច់ដែលឆេះគឺជាសញ្ញាច្បាស់លាស់បំផុតនៃវត្តមាននៃ សមាសធាតុ បង្កមហារីក ទាំងនេះ ។៣/ ការប្រើប្រាស់ថ្នាំអង់ទីប៊ីយោទិកខុសសម្រាប់ជំងឺតូចតាច៖ លោកវេជ្ជបណ្ឌិត Zaghiyan ព្រមានកុំឱ្យប្រើថ្នាំអង់ទីប៊ីយោទិកញឹកញាប់ពេកសម្រាប់ការឆ្លងមេរោគស្រាល ឬជំងឺផ្តាសាយធម្មតា។ការស្រាវជ្រាវបានបង្ហាញថា ការប្រើប្រាស់ថ្នាំអង់ទីប៊ីយោទិកជាបន្តបន្ទាប់រយៈពេលពីរខែ ឬច្រើនជាងនេះនៅពេលពេញវ័យអាចបង្កើនលទ្ធភាពនៃការវិវត្តទៅជាដុំសាច់មុនមហារីកនៅពេលក្រោយក្នុងជីវិត។ នេះត្រូវបានគេជឿថាបណ្តាលមកពីការរំខានដល់មីក្រូជីវសាស្រ្តពោះវៀនយូរ។៤/ អាហារកែច្នៃខ្លាំងពេក៖ ក្រុមនេះរួមមានអាហារសម្រន់ដែលបានវេចខ្ចប់រួច នំដុតនំដែលផលិតដោយឧស្សាហកម្ម ភេសជ្ជៈមានជាតិស្ករ និងអាហាររហ័ស។ ពួកវាត្រូវបានកំណត់លក្ខណៈដោយវាយនភាព ដែលបានផ្លាស់ប្តូរគួរឱ្យកត់សម្គាល់ និងមាតិកាជាតិសរសៃទាបបំផុត។ការសិក្សាដ៏ធំមួយក្នុងឆ្នាំ ២០២៥ បានរកឃើញថា ស្ត្រីដែលមានអាយុក្រោម ៥០ ឆ្នាំ ដែលទទួលទានអាហារកែច្នៃខ្លាំងបំផុត មានហានិភ័យខ្ពស់រហូតដល់ ៤៥% ក្នុងការវិវត្តទៅជាដុំសាច់អាដេណូមមុនមហារីក។៥/ ទឹកខ្ពុរមាត់ដែលមានផ្ទុកជាតិអាល់កុល៖ មានមនុស្សតិចណាស់ដែលទាយថាទឹកខ្ពុរមាត់អាចមានទំនាក់ ទំនងជាមួយពោះវៀនធំ។ ទោះជាយ៉ាងណាក៏ដោយ ការសិក្សាថ្មីៗនេះបានបង្ហាញថា ការប្រើប្រាស់ទឹកខ្ពុរមាត់ដែលមានជាតិអាល់កុលជារៀងរាល់ថ្ងៃរយៈពេលបីខែបានផ្លាស់ប្តូរមីក្រូជីវសាស្រ្តក្នុងមាត់យ៉ាងខ្លាំង ដោយបង្កើនបាក់តេរីដែលទាក់ទងនឹងជំងឺអញ្ចាញធ្មេញ និងមហារីកពោះវៀនធំ។ ដោយហេតុផលនេះ លោកវេជ្ជបណ្ឌិត Zaghiyan បានដាក់បញ្ចូលទឹកខ្ពុរមាត់ដែលមានជាតិអាល់កុលទៅ ក្នុងបញ្ជីផលិតផលដែលគាត់ផ្ទាល់ជៀសវាង។

(វៀតណាម)៖ អាជ្ញាធរវៀតណាម បានរកឃើញ និងរឹបអូសកាហ្វេក្លែងក្លាយជាង ៧ តោន នៅរោងចក្រផលិត ដែលមានតម្លៃទាបមួយក្នុងខេត្តឡាំដុង ដែលកំពុងរៀបចំចែកចាយវាទៅកាន់ទីផ្សារ។ នៅថ្ងៃទី ២៩ ខែមករា ប៉ូលីសខេត្តឡាំដុងបានប្រកាសថា ក្រុមស៊ើបអង្កេតរបស់ពួកគេបានរកឃើញ និង ចាប់ខ្លួនជនសង្ស័យ ដែលពាក់ព័ន្ធនឹងការផលិតកាហ្វេក្លែងក្លាយទ្រង់ទ្រាយធំ។ នៅពេលត្រួតពិនិត្យ ពេលត្រួតពិនិត្យ អាជ្ញាធរបានរកឃើញកញ្ចប់ផលិតផលកាហ្វេសម្រេចចំនួន ១.០៥៦ កញ្ចប់ សរុបទម្ងន់ ៥២៨ គីឡូក្រាម ដោយគ្មានវិក្កយបត្រ ឬឯកសារបញ្ជាក់ពីប្រភពដើមរបស់វាឡើយ។ ការវាយតម្លៃដំបូងបង្ហាញថា កាហ្វេដែលបានលើកឡើងនេះមានគុណភាពអន់ស្តង់ដារ ហើយ សង្ស័យថា ជាកាហ្វេក្លែងក្លាយ ។ វត្ថុតាងដែលរឹបអូសបាន និងរថយន្តដឹកទំនិញធុនធំ ត្រូវបានរឹបអូសជាបណ្ដោះអាសន្ន ដោយផ្អែកលើឯកសារដែលប្រមូលបាន នាយកដ្ឋាន PC03 បានបន្តពង្រីកការស៊ើបអង្កេត ដោយសហការជាមួយនគរបាលឃុំបាវឡាំ ៣ និងនគរបាលសង្កាត់បាក យ៉ាងៀ ដើម្បីត្រួតពិនិត្យស្ថាប័នដែលតំណាងដោយលោកលឿង វៀតគៀម ជាតំណាងផ្នែកច្បាប់របស់ក្រុមហ៊ុននាំចូលកាហ្វេ ខាងលើនេះ ដោយសហការជាមួយប៉ូលីស លោក គៀម បានទទួលស្គាល់ថា កាហ្វេដែលរឹបអូសបាន ពីឡានដឹកទំនិញនោះ គឺជាផលិតផលដែលផលិតដោយក្រុមហ៊ុនរបស់លោក។ ពេលត្រួតពិនិត្យឃ្លាំងនោះ អាជ្ញាធរបានរកឃើញកញ្ចប់ផលិតផលកាហ្វេសម្រេចចំនួន ៧.៩៥៨ កញ្ចប់ដែលមានទម្ងន់សរុបជាង ៤,១ តោន រួមជាមួយវត្ថុធាតុដើមជាង ៣ តោន និងម៉ាស៊ីន និងឧបករណ៍ជាច្រើនដែលប្រើប្រាស់ក្នុងការផលិត។ តំណាងក្រុមហ៊ុនបានទទួលស្គាល់ថាបានណែនាំបុគ្គលិកឱ្យលាយសណ្តែកសៀងជាមួយគ្រាប់កាហ្វេ និងសារធាតុបន្ថែមរសជាតិ ដើម្បីផលិតផលិតផលកាហ្វេសម្រេចសម្រាប់លក់ក្នុងតម្លៃទាប នៅលើទីផ្សារ។ ប៉ូលីសបានកំណត់ថា កាហ្វេ ទាំងអស់ មិនបានបំពេញតាមស្តង់ដារគុណភាពដែលបានបោះពុម្ពផ្សាយនោះទេ ដែលរំលោភលើសិទ្ធិអ្នកប្រើប្រាស់ និងធ្វើឱ្យខូចកេរ្តិ៍ឈ្មោះរបស់ឧស្សាហកម្មកាហ្វេក្នុងស្រុក។បច្ចុប្បន្ន ម្ចាស់ក្រុមហ៊ុនកាហ្វេខាងលើនេះ ត្រូវបាននាយកដ្ឋាននគរបាលសេដ្ឋកិច្ច នៃស្នងការដ្ឋាននគរបាលខេត្តឡាំដុង រៀបចំសំណុំ ដើម្បីដោះស្រាយបញ្ហានេះបន្តតាមច្បាប់។ នគរបាលខេត្តឡាំដុង ណែនាំប្រជាជនឱ្យមានការប្រុងប្រយ័ត្ន និងជ្រើសរើសផលិតផលកាហ្វេដែលមានប្រភពដើមច្បាស់លាស់ ស្លាកសញ្ញាពេញលេញ និងវិញ្ញាបនបត្រគុណភាព ដូចដែលបានកំណត់ក្នុងបទប្បញ្ញត្តិ។ អាជីវកម្ម និងកន្លែងផលិតត្រូវតែអនុវត្តតាមច្បាប់យ៉ាងតឹងរ៉ឹង ហើយមិនត្រូវផ្តល់អាទិភាពដល់ផលប្រយោជន៍រយៈពេលខ្លីដោយប៉ះពាល់ដល់សុខភាពអ្នកប្រើប្រាស់ និងកេរ្តិ៍ឈ្មោះរបស់ឧស្សាហកម្មនោះទេ។

(វៀតណាម)៖ ក្រសួងសុខាភិបាលវៀតណាម បានស្នើសុំឱ្យភ្នាក់ងារពាក់ព័ន្ធ និងវេទិកាពាណិជ្ជកម្មអេឡិចត្រូនិក ប្រមូល និងដកចេញជាបន្ទាន់នូវព័ត៌មានស្តីពីទឹកដោះគោនាំចូលចំនួន ៥ ប្រភេទដែលសង្ស័យថាមានសារធាតុ cereulide ដែលជាជាតិពុលពីបាក់តេរី Bacillus cereus។ នាយកដ្ឋានសុវត្ថិភាពចំណីអាហារ (ក្រសួងសុខាភិបាល) ទើបតែបានបញ្ជូនឯកសារបន្ទាន់មួយទៅកាន់នាយកដ្ឋានពាណិជ្ជកម្មអេឡិចត្រូនិក និងសេដ្ឋកិច្ចឌីជីថល (ក្រសួងឧស្សាហកម្ម និងពាណិជ្ជកម្ម) បន្ទាប់ពីទទួលបានការព្រមានពីប្រភពអន្តរជាតិ កាលពីថ្ងៃទី២៧ ខែមករាកន្លងទៅ។ អាជ្ញាធរសុវត្ថិភាពចំណីអាហារហុងកុង (CFS) និងអាជ្ញាធរសុវត្ថិភាពចំណីអាហារអូស្ត្រាលី នូវែលសេឡង់ (FSANZ) បានបញ្ជាក់ថា ផលិតផលទាំងនេះមានផ្ទុកសារធាតុពុល cereulide ដែលបង្កហានិភ័យសុខភាពដោយផ្ទាល់ដល់កុមារតូចៗ។បញ្ជីនៃការប្រមូលផលិតផលមកវិញរួមមានម្សៅទឹកដោះគោទារកម៉ាក Babybio Optima 1 ពីក្រុមហ៊ុន Vitagermine និងម្សៅទឹកដោះគោ Alula Colic & Constipation ពីក្រុមហ៊ុន Sanulac Nutritionals Australia Pty Ltd។ តាមរយៈការត្រួតពិនិត្យក្រោយការត្រួតពិនិត្យ រដ្ឋបាលសុវត្ថិភាពចំណីអាហារបានរកឃើញថា ផលិតផលទាំងនេះត្រូវបានលក់យ៉ាងទូលំទូលាយនៅលើវេទិកាអនឡាញធំៗដូចជា Shopee, Lazada និង Ausmart។ ដើម្បីទប់ស្កាត់ហានិភ័យដល់អ្នកប្រើប្រាស់ ក្រសួងសុខាភិបាលស្នើសុំឱ្យវេទិកាពាណិជ្ជកម្មអេឡិចត្រូនិកសម្របសម្រួល ជាបន្ទាន់ជាមួយម្ចាស់ហាង និងអ្នកចែកចាយ ដើម្បីបញ្ឈប់ការលក់ផលិតផលពាក់ព័ន្ធទាំងអស់ជាបាច់។ អង្គភាពទាំងនេះត្រូវតែលុបចោលព័ត៌មានផ្សាយពាណិជ្ជកម្ម និងការលក់ទាំងអស់ដែលទាក់ទងនឹងទឹកដោះគោ ដែលមានគុណភាពអន់ខាងលើនេះ និងដោះស្រាយការរំលោភបំពានតាមបទប្បញ្ញត្តិ។ រដ្ឋបាលសុវត្ថិភាពចំណី អាហារក៏ណែនាំប្រជាជនឱ្យកុំប្រើប្រាស់ផលិតផលណាមួយដែលមាននៅក្នុងបញ្ជីព្រមានជាដាច់ខាត។សូមបញ្ជាក់ សារធាតុសេរេលៃដ៍ (Cereulide) គឺជាជាតិពុលដែលផលិតដោយបាក់តេរី Bacillus cereus ដែលអាចបង្កឱ្យមានការពុលអាហារជាមួយនឹងរោគសញ្ញាចង្អោរ និងក្អួតធ្ងន់ធ្ងរចំពោះទារក។ នៅថ្ងៃទី 25 ខែមករា ក្រុមហ៊ុន Vitagermine Corporation បានប្រកាសពី ការប្រមូលផលិតផលទឹកដោះគោទារក Babybio Optima 1 ចំនួនបីបាច់ជាបន្ទាន់ ដោយសារតែសង្ស័យថាមានការចម្លងមេរោគសេរេលៃដ៍។ ការសម្រេចចិត្តបង្ការហានិភ័យនេះអនុវត្តចំពោះផលិតផលទម្ងន់ 400 ក្រាម និង 800 ក្រាម ដែលមានកាលបរិច្ឆេទផុតកំណត់នៅឆ្នាំ 2027។ការផ្លាស់ប្តូររបស់ក្រុមហ៊ុននេះកើតចេញពីការព្រមានចុងក្រោយបំផុតពីរដ្ឋាភិបាលបារាំង និងលទ្ធផលនៃការស៊ើបអង្កេតផ្ទៃក្នុងលើវត្តមានដែលអាចកើតមាននៃជាតិពុលក្អួតធ្ងន់ធ្ងរនេះ។ មុនពេលមានផលិតផល Vitagermine ក្រុមហ៊ុនផលិតផលិតផលទឹកដោះគោធំៗដូចជា Lactalis, Nestlé និង Danone ក៏ត្រូវបានបង្ខំឱ្យដកផលិតផលរាប់លានចេញពីធ្នើរផ្សារទំនើបដោយសារហេតុផលស្រដៀងគ្នានេះដែរ។ រលកនៃការប្រមូលផលិតផលឡើងវិញនេះបានកើតឡើងនៅក្នុង ប្រទេសជាង 70 ក្នុងអំឡុងពេលនៃការស៊ើបអង្កេតព្រហ្មទណ្ឌដោយអាជ្ញាធរបារាំងទៅលើការស្លាប់របស់កុមារតូចៗពីរនាក់ដែលសង្ស័យថាមានទំនាក់ទំនងជាមួយនឹងការប្រើប្រាស់ទឹកដោះគោដែលមានមេរោគ។

(ភ្នំពេញ)៖ នារសៀលថ្ងៃព្រហស្បតិ៍ ទី២៩ ខែមករា ឆ្នាំ២០២៦ នេះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាភិបាលនៃបេឡាជាតិសន្តសុខសង្គម (ប.ស.ស.) បានអញ្ជើញដឹកនាំកិច្ចប្រជុំក្រុមប្រឹក្សាភិបាលនៃ ប.ស.ស. លើកទី៣ អាណត្តិទី២ នៅទីស្នាក់ការកណ្តាល ប.ស.ស.។នាឱកាសនោះ ឯកឧត្តមរដ្ឋមន្ត្រី បានមានប្រសាសន៍ថា ការពិនិត្យ និងកែសម្រួលឡើងវិញនូវផែនការយុទ្ធសាស្ត្រ និងគម្រោងថវិកា ដើម្បីតម្រង់ទិសការអនុវត្តការងារលើដំណើរការរបស់ ប.ស.ស. គឺជាវិធានការដ៏ចាំបាច់បំផុត ក្នុងគោលដៅធានាឱ្យបាននូវប្រសិទ្ធភាព និងចីរភាពនៃវិស័យសន្តិសុខសង្គម ដើម្បីការពារផលប្រយោជន៍ជូនសមាជិក ប.ស.ស. ឱ្យបានកាន់តែប្រសើរ។ទន្ទឹមនឹងនេះ ឯកឧត្តម ក៏បានវាយតម្លៃខ្ពស់ចំពោះការចូលរួមផ្តល់នូវមតិយោបល់ល្អៗ ក្នុងការកែលម្អនូវចំណុចខ្វះខាតកន្លងមក ក៏ដូចជាបានលើកជាសំណូមពរឱ្យ ប.ស.ស. ដំណើរការកាន់តែមានប្រសិទ្ធភាព តម្លាភាព និងគណនេយ្យភាព។ ជាមួយគ្នានេះ ឯកឧត្តមក៏បានកោតសរសើរចំពោះថ្នាក់ដឹកនាំ និងមន្ត្រី ប.ស.ស. ទាំងអស់ ដែលបាននិងកំពុងខិតខំផ្តល់សេវាជូនសមាជិក និងប្រជាពលរដ្ឋបានយ៉ាងល្អប្រសើរ។ក្នុងឱកាសនោះដែរ ឯកឧត្តម បានផ្តល់អនុសាសន៍ដល់សមាជិក សមាជិកាក្រុមប្រឹក្សាភិបាល នៃប.ស.ស. សូមឱ្យបន្តបេសកកម្មដ៏ចាំបាច់នេះ ដើម្បីសម្រេចគោលដៅដែលបានរំពឹងទុក។ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. និងជាសមាជិកអចិន្ត្រៃយ៍ក្រុមប្រឹក្សាភិបាល បានធ្វើបទបង្ហាញជម្រាបជូនអង្គប្រជុំពីវឌ្ឍនភាពនៃរបាយការណ៍ ផែនការយុទ្ធសាស្ត្រ និងគម្រោងថវិកាប្រចាំឆ្នាំ២០២៦ ដែលឆ្លុះបញ្ចាំងពីប្រសិទ្ធភាពនៃការអនុវត្តកន្លងមក។សូមបញ្ជាក់ថា របៀបវារៈសំខាន់ៗនៃកិច្ចប្រជុំនោះរួមមាន៖ (១) ផែនការយុទ្ធសាស្ត្រថវិកា (៣ឆ្នាំរំកិល) ឆ្នាំ២០២៦-២០២៨ (២) គម្រោងថវិកាប្រចាំឆ្នាំ២០២៦ (៣) សេចក្តីព្រាងអនុក្រឹត្យ ស្តីពីការរៀបចំ និងការប្រព្រឹត្តទៅរបស់ក្រុមប្រឹក្សាវេជ្ជសាស្ត្រនៃ ប.ស.ស. (៤) សេចក្តីព្រាងសេចក្តីសម្រេច ស្តីពីលាភការមុខងារក្រុមប្រឹក្សាធនាភិបាលសន្តិសុខសង្គមនៃ ប.ស.ស. និង (៥) បញ្ហាផ្សេងៗ៕

(ភ្នំពេញ)៖ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ នៃក្រសួងការងារ និងបណ្តុះបណ្តាលវិជ្ជាជីវៈបានដឹកនាំកិច្ចប្រជុំជាមួយក្រុមប្រឹក្សាអាជ្ញាកណ្តាល និងមូលនិធិក្រុមប្រឹក្សាអាជ្ញាកណ្តាល នាព្រឹកថ្ងៃទី២៨ ខែមករា ឆ្នាំ២០២៦ នៅទីស្តីការក្រសួង ដើម្បីពិភាក្សានិងកំណត់អំពីផែនការនិងតម្រូវការ នៃការបណ្តុះបណ្តាលនិងជ្រើសរើសសមាជិកក្រុមប្រឹក្សាអាជ្ញាកណ្តាល។ ដើម្បីធានាប្រសិទ្ធភាព នៃយន្តការដោះស្រាយវិវាទការងារដោយក្រុមប្រឹក្សាអាជ្ញាកណ្តាល ក្រសួងការងារ និងបណ្តុះបណ្តាលវិជ្ជាជីវៈ និងមូលនិធិក្រុមប្រឹក្សាអាជ្ញាកណ្តាល ឯកភាពបន្តពង្រឹងកិច្ចសហប្រតិបត្តិការ ក្នុងការកសាងសមត្ថភាពសមាជិកក្រុមប្រឹក្សាអាជ្ញាកណ្តាល បណ្តុះបណ្តាល និងជ្រើសរើសអាជ្ញាកណ្តាលការងារថ្មីបន្ថែមទៀតស្របតាមតម្រូវការនៃភាគីវិវាទការងារ៕ 

(ភ្នំពេញ)៖ ក្រសួងការងារ និងបណ្តុះបណ្តាលវិជ្ជាជីវៈ សហការជាមួយមជ្ឈមណ្ឌលអាមេរិកាំងសម្រាប់សាមគ្គីភាពការងារអន្តរជាតិ (ACILS) បានរៀបចំវគ្គបណ្តុះបណ្តាលស្តីពីការដោះស្រាយវិវាទការងារនៅកម្ពុជា និងការចែករំលែកបទពិសោធពីសហរដ្ឋអាម៉េរិក។ ពិធីនេះត្រូវបានធ្វើឡើងកាលពីពេលថ្មីៗនេះ ​ដឹកនាំសម្របសម្រួលដោយ លោកជំទាវ សួស ស៊ីនួន អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ រួមជាមួយលោក William Conklin នាយកកម្មវិធីប្រចាំប្រទេសនៃ ACILS។ក្នុងវគ្គបណ្តុះបណ្តាលនេះ អធិការការងារ និងមន្ត្រីផ្សះផ្សាវិវាទការងារចំនួន ៤៧ នាក់ បានសិក្សាឈ្វេងយល់យ៉ាងស៊ីជម្រៅអំពីបច្ចេកទេសផ្សះផ្សា និងវិធីសាស្ត្រដោះស្រាយវិវាទការងារ ក្រោមការបង្វឹកផ្ទាល់ពីលោកសាស្ត្រាចារ្យ Richard D. Fincher នៃសាកលវិទ្យាល័យ Cornell និងលោក JC Gonzalez អាជ្ញាកណ្តាលការងារមកពីសហរដ្ឋអាម៉េរិក។ ការបណ្តុះបណ្តាលនេះ គឺជាផ្នែកមួយនៃការអនុវត្តតាមអនុស្សរណៈនៃការយោគយល់គ្នារវាងក្រសួងការងារ និង ACILS ដើម្បីរួមចំណែកដល់ការអភិវឌ្ឍវិស័យការងារ និងធានាបាននូវយន្តការដោះស្រាយវិវាទប្រកបដោយប្រសិទ្ធភាព និងវិជ្ជាជីវៈខ្ពស់នៅកម្ពុជា។ លើសពីនេះ ការចែករំលែកចំណេះដឹងនេះ ធ្វើឡើងក្នុងគោលបំណងលើកកម្ពស់សមត្ថភាពមន្ត្រីជំនាញឱ្យកាន់តែប្រសើរឡើង តាមរយៈការផ្លាស់ប្តូរបទពិសោធជាក់ស្តែងរវាងប្រព័ន្ធដោះស្រាយវិវាទរបស់កម្ពុជា និងសហរដ្ឋអាម៉េរិក៕

(ភ្នំពេញ)៖ បុរី មេគង្គ លែន បានចូលរួមឧបត្ថម្ភថវិកាចំនួន ១៥,០០០ដុល្លារ សម្រាប់គាំទ្រដល់ពិធី «មហាសន្និបាតបូកសរុបលទ្ធផលការងារសភាពាណិជ្ជកម្មកម្ពុជាឆ្នាំ២០២៥ និងលើកទិសដៅការងារឆ្នាំ២០២៦»។ពិធីអបអរមហាសន្និបាតនេះ បានប្រព្រឹត្តទៅក្រោមការដឹកនាំរបស់ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានគណៈកម្មការសម្របសម្រួលក្រុមការងារផ្នែកឯកជនសម្រាប់យន្ដការវេទិការាជរដ្ឋាភិបាល-ផ្នែកឯកជននិងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា នៅថ្ងៃទី២៨ ខែមករា ឆ្នាំ២០២៦ កន្លងទៅនេះ ហើយមានការចូលរួមដ៏ខ្ពង់ខ្ពស់របស់ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម អញ្ជើញជាអធិបតី។ក្នុងឱកាសនោះ អ្នកឧកញ៉ា ជាម ឃុនណាត អគ្គនាយក​ បុរី មេគង្គ លែន បានទទួល លិខិតថ្លែងអំណរគុណ ពី អ្នកឧកញ៉ា គិត ម៉េង ជាការទទួលស្គាល់ចំពោះការចូលរួមឧបត្ថម្ភ និងការគាំទ្រយ៉ាងសកម្មចំពោះសកម្មភាព និងបេសកកម្មរបស់សភាពាណិជ្ជកម្មកម្ពុជា ក្នុងការជំរុញការអភិវឌ្ឍវិស័យឯកជន និងសេដ្ឋកិច្ចជាតិ។ការចូលរួមឧបត្ថម្ភនេះ ជាការចូលរួមចំណែកជាមួយសភាពាណិជ្ជកម្មកម្ពុជា និងជាការបង្ហាញនូវឆន្ទៈដ៏មុតមាំរបស់ បុរី មេគង្គ លែន ក្នុងការដើរតួជាដៃគូសហការជាមួយរាជរដ្ឋាភិបាល និងវិស័យឯកជន ដើម្បីជំរុញកំណើនសេដ្ឋកិច្ចជាតិ និងការអភិវឌ្ឍប្រកបដោយចីរភាព។បុរី មេគង្គ លែន បានចូលរួមអបអរសាទរចំពោះជោគជ័យដ៏ត្រចះត្រចង់នៃមហាសន្និបាតនេះ ក្រោមការដឹកនាំប្រកបដោយចក្ខុវិស័យវែងឆ្ងាយ និងភាពឈ្លាសវៃរបស់ អ្នកឧកញ៉ា គិត ម៉េង ដែលជានិច្ចកាលតែងតែជំរុញការអភិវឌ្ឍវិស័យពាណិជ្ជកម្ម និងសេដ្ឋកិច្ចជាតិឱ្យកាន់តែរីកចម្រើនរុងរឿង។អំពី បុរី មេគង្គ លែន៖ បុរី មេគង្គ លែន ជាក្រុមហ៊ុនអភិវឌ្ឍលំនៅដ្ឋានដែលពោរពេញដោយបទពិសោធន៍ និងជាក្រុមហ៊ុនដែលឈានមុខគេមួយក្នុងប្រទេសកម្ពុជាក្នុងការសាងសង់គេហដ្ឋានរចនាបថម៉ូដក្លាស៊ីកបែបអឺរ៉ុប និងគេហដ្ឋានរចនាបថម៉ូដទាន់សម័យដែលមាន ៣ គម្រោងដូចជា៖ ១. «ឌឹ មេគង្គ រ៉ូយ៉ាល់» ជាគម្រោងគេហដ្ឋានម៉ូដក្លាស៊ីកបែបអឺរ៉ុប ស្ថិតនៅបណ្តោយផ្លូវជាតិ ៦A, ២. «ហ្គោលឌិន អាវិននូ» ជាគម្រោងគេហដ្ឋានរចនាបថម៉ូតទាន់សម័យ ស្ថិតនៅផ្លូវ ២០១១ និង ៣. «មេគង្គ ស៊ីធី» ជាគម្រោងគេហដ្ឋានម៉ូដក្លាស៊ីកបែបអឺរ៉ុប ស្ថិតនៅបណ្តោយផ្លូវជាតិ ៦A។ គ្រប់គម្រោងរបស់ បុរី មេគង្គ លែន ត្រូវបានសាងសង់ដោយការយកចិត្តទុកដាក់ខ្ពស់ពីថ្នាក់ដឹកនាំ និងពីក្រុមវិស្វករជំនាញរបស់បុរីដោយផ្ដោតលើគុណភាព និងប្រណិតភាពជាចំបង។ ការផ្ចិតផ្ចង់នៃស្ថាបត្យកម្ម សំណង់ និងទឹកដៃល្អ សម្រិតសម្រាំងបាននូវគេហដ្ឋានប្រណិតទាន់សម័យ ផ្ដល់នូវផាសុកភាព សុវត្ថិភាព ភាពស៊ីវិល័យ និងការរស់នៅទាន់សម័យ ជូនដល់គ្រប់អតិថិជន។បុរី មេគង្គ លែន ផ្តើមជីវិតរីករាយ និងជោគជ័យនៅទីនេះ!