(កម្សាន្ត)៖ វីដេអូដែលបានបង្ហាញពីគ្រោះថ្នាក់ចរាចរណ៍មួយនៅ ភូមិថ្នល់ ស្រុករវៀង ខេត្ត ព្រះវិហារកំពុងសាងការចាប់អារម្មណ៍ពីមហាជនអ្នកលេងបណ្ដាញសង្គមជាខ្លាំងដោយហេតុថាបើទោះបីជាអ្នកបើកបរបានរ៉េចង្កូតទៅបុកផ្ទះអ្នកភូមិធ្វើឱ្យខ្ទេចក្ដីតែឃើញថាពលរដ្ឋនៅទីនោះនិងម្ចាស់ផ្ទះបាននៅតែយកចិត្តទុកដាក់និងបារម្ភពីសុវត្តិភាពអ្នកនៅក្នុងរថយន្តជៀសជាងបារម្ភពីទ្រព្យសម្បត្តិផ្ទាល់ខ្លួន។យ៉ាងណាមិញយោងតាមគណនីហ្វេសប៊ុកឈ្មោះRin KH បានបង្ហោះវីដេអូនូវវីដេអូមួយកាលពីថ្ងៃទី១៥ ខែមេសា ឆ្នាំ២០២៤ ដោយម្ចាស់គណនីខាងលើបានភ្ជាប់មកជាមួយខ្លឹមសារបញ្ជាក់ផងដែរថា«គ្រោះថ្នាក់នៅថ្នល់ ស្រុករវៀង ខេត្ត ព្រះវិហារ» ដោយវីដេអូដែលថតបាននិងភ្ជាប់មកជាមួយការបង្ហោះនោះទៀតសោតបានបង្ហាញឱ្យឃើញពីសកម្មភាពអ្នកភូមិនៅទីនោះបានប្រញាប់ប្រញាល់ទៅមើលនៅទីតាំងកើតហេតុ ក្រោយពីមានរថយន្តមួយគ្រឿងបានរ៉េចង្កូតចូលទៅបុកផ្ទះមួយដែលទំនងជាកន្លែងបើកលាងរថយន្តផងដែរ។ ដោយតាមរយៈសកម្មភាពភាពក្នុងវីដេអូនោះផងដែរឃើញថាពលរដ្ឋនៅទីនោះបានខ្នះខ្នែងរត់សំដៅទៅរកអ្នកនៅក្នុងរថយន្តនិងជួយគ្រាចេញមកខាងក្រៅហាក់បារម្ភពីសុវត្តិភាព។ដោយឡែកតាមរយៈសកម្មភាពទាំងនេះផងដែរត្រូវបានអ្នកប្រើប្រើប្រាស់បណ្ដាញសង្គមជាច្រើននាំគ្នាសរសើរទៅកាន់ទឹកចិត្តអ្នករស់នៅទីនោះដែលចេះយល់សុទុក្ខនិងបារម្មពីសុវត្តិភាពមនុស្សជៀសជាងទ្រព្យសម្បត្តិនិងរបស់របរផ្ទាល់ខ្លួន ដោយមិនប្រកាន់ថាអ្នកនោះជាអ្នកបង្ក។ ក្នុងនោះផងដែរក៏មានអ្នកលើកឡើងថា«ម្ចាស់កន្លែង មានសុជីវធម៌ ល្អ អត់ខ្វល់ពីការខូចខាត បារម្ភពីសុវត្ថិភាព អ្នកនៅក្នុងឡាន អរគុណទឹកចិត្តមួយនេះ ព្រោះភាគច្រើន បើជួបហេតុការណ៍បែបនេះ ម្ចាស់ផ្ទះចេញមក ស្រែកឡូឡា រករឿង ជេរប្រទេច រឺក៏អាចដល់ការវាយតប់ក៏មាន តែនេះ អត់ទេ។ ទោះជាយ៉ាងណាក្ដីទាំងនេះគឺជាការលើកសរសើរនៅពេលដែលមហាជនឃើញទង្វើដែលចេះជួយយកអាសារគ្នាក្នុងសង្គមបែបនេះ ក៏ប៉ុន្តែទន្ទឹមនឹងនោះក៏សូមសំណូមពរទៅកាន់អ្នកបើកបរគ្រប់រូបបង្កើកការប្រុងប្រយ័ត្នឱ្យបានខ្ពស់ជៀសវាងជួបហេតុការណ៍ដូចទៅនឹងករណីខាងលើ៕
(សង្គម)៖ រដូវកាលនៃផ្លែសំរងចាប់ផ្ដើមសម្បូរក៏មកដល់ មួយរយៈចុងក្រោយមកនេះសង្កេតឃើញថាមានពលរដ្ឋខ្មែរមិនតិចនោះទេដែលបានផ្អាកការងារមួយរយៈដោយប្ដូរទៅរុករកប្រមូលផលផ្លែសំរងនៅតាមព្រៃនានាដើម្បីយកមកលក់ឱ្យឈ្មួញ។ ដោយការប្រមូលផលនេះប្រាកដណាស់ពិតជាអាចជួយសម្រួលទៅកាន់ពលរដ្ឋឱ្យកាន់តែរកចំណូលបានច្រើនបន្ថែមទៀត តែទន្ទឹមនឹងនោះផលអវិជ្ជមានក៏មានផងដែរដោយហេតុថាពលរដ្ឋមួយចំនួនហេតុតែចង់បានផលច្រើនពេកក៏នាំគ្នាឈានដល់ការកាប់បំផ្លាញដើមសំរងទាំងនោះតែម្ដង។យ៉ាងណាមិញនេះបើយោងតាមទំព័រផេកហ្វេសប៊ុកឈ្មោះ A-Kean បានបង្ហោះវីដេអូមួយដោយអមមកជាមួយខ្លឹមសាររៀបរាប់ថា «ខ្ញុំជាអ្នកស្រឡាញ់ធម្មជាតិម្នាក់ នៅពេលដែលខ្ញុំឃើញបែបនេះ ខ្ញុំមានអារម្មណ៍ថាស្ដាយខ្លាំងណាស់ ខ្ញុំពិតជាមិនចង់ឲ្យមានកាប់ដើមសំរ៉ងដល់កម្រងមួយនេះ បន្តទៀតទេ អាចទេកុំបំផ្លាញអ្វីដែលជាធម្មជាតិ ធម្មជាតិជួយយើងបានច្រើនណាស់យើងគួរណាស់តែជួយធម្មជាតិវិញ កុំបំផ្លាញអី»។ ជាមួយគ្នាវីដេអូដែលបានភ្ជាប់មកជាមួយនោះផងដែរបុរសខាងលើបានបង្ហាញអារម្មណ៍សោកស្ដាយជាខ្លាំងនៅពេលដែលបានឃើញសម្បិត្តធម្មជាតិទាំងនោះត្រូវបានបំផ្លិញបំផ្លាញបែបនេះ លោកក៏បានបន្តពោលពាក្យមួយចំនួន។តាមរយៈការបង្ហោះខាងលើនេះផងដែរឃើញថាមានមហាជនជាច្រើនផងដែរបានបង្ហាញអារម្មណ៍សោកស្ដាយចំពោះការបាត់បង់ជាបន្តបែបនេះ ក្នុងនោះផងដែរក៏មានអ្នកប្រើប្រាស់បណ្ដាញសង្គមម្នាក់លើកឡើងយ៉ាងដូច្នេះថា«បងពិតស្តាយស្រណោះណាស់ ព្រោះតែមនុស្សមានភាពលោភលន់ពេក គិតតែប្រយោជន៍មួយពេល មិនគិតទៅថ្ងៃអនាគត។»។ ទោះជាយ៉ាងណាការបង្ហោះរបស់បុរសខាងលើគឺគ្រាន់តែមានបំណងចង់ឱ្យពលរដ្ឋមានការស្វែងយល់ទៅកាន់ថ្ងៃអានាគត ដោយប្តូរពីការកាប់ព្រោះតែចង់បានផលចំណេញច្រើនទៅជាវិធីសាស្រ្តប្រមូលផលបែបផ្សេងដែលពុំប៉ះពាល់និងធ្វើឱ្យបាត់បង់នូវប្រដើមដ៏កម្រមួយនេះ៕
(អន្តរជាតិ)៖ អាជ្ញាធរអ៊ីរ៉ង់បានព្រមានថា ក្រពើបានរួចចេញពីជម្រកធម្មជាតិរបស់ពួកគេ ខណៈដែលទឹក ជំនន់បានបំផ្លិចបំផ្លាញផ្នែកខ្លះនៃភាគអាគ្នេយ៍របស់ប្រទេស។ ទីភ្នាក់ងារសារព័ត៌មានរដ្ឋអ៊ីរ៉ង់ IRNA បានរាយការណ៍ថា កម្មករសំណង់ផ្លូវចំនួនបីនាក់ បានស្លាប់ បាត់បង់ជីវិតក្នុងគ្រោះទឹកជំនន់នេះ ដែលបានកើតឡើងបន្ទាប់ពីព្យុះបានវាយប្រហារតំបន់មជ្ឈិមបូព៌ា។ភ្លៀងធ្លាក់ខ្លាំង និងទឹកជំនន់ភ្លាមៗបានវាយប្រហារខេត្ត Bandar Abbas របស់អ៊ីរ៉ង់ Kerman និង Sistan និង Baluchistan នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មានពាក់កណ្តាលផ្លូវការ។ទីភ្នាក់ងារនេះបាននិយាយថា ទន្លេបានពេញហៀរ ខណៈពេលដែលទំនប់វារីអគ្គិសនីឈាន ដល់លើសពី សមត្ថភាព ដែលនាំឱ្យខូចខាតទ្រព្យសម្បត្តិយ៉ាងច្រើន។ វីដេអូដែលផ្សាយដោយប្រព័ន្ធផ្សព្វផ្សាយព័ត៌មានរដ្ឋ IRNA និង Tasnim បានបង្ហាញពីទឹកជំនន់រីករាល ដាល ខណៈប្រជាជនប្រើប្រាស់ទូកដើម្បីជួយសង្គ្រោះអ្នកដទៃ។ហើយនាយកដ្ឋានបរិស្ថាននៅ Sistan និង Baluchistan បានចេញការព្រមានពីការព្រួយបារម្ភអំពីសត្វ ក្រពើ ដែលបានរួចចេញពីជម្រកធម្មជាតិរបស់ពួកគេ។អ្នកស្រុកត្រូវបានប្រាប់ឱ្យជៀសវាងការធ្វើដំណើរដែលមិនចាំបាច់នៅជិតច្រាំងទន្លេ Bahu Kalat ដីសើម វាលភក់ និងបរិវេណនៃជម្រកសត្វព្រៃ រហូតដល់ទឹកជំនន់បានស្រកទាំងស្រុង ហើយលក្ខខណ្ឌ មានស្ថេរភាព។គួរបញ្ជាក់ថា ខ្យល់ព្យុះដែលបានវាយប្រហារប្រទេសក្នុងតំបន់ រួមទាំងអារ៉ាប់រួម និងអូម៉ង់ បានវាយ ប្រហារ អ៊ីរ៉ង់ កាលពីល្ងាចថ្ងៃអង្គារ និងដល់ថ្ងៃពុធ។ចំណែកប្រទេសអារ៉ាប់រួមបានឃើញភ្លៀងធ្លាក់ខ្លាំងបំផុតក្នុងរយៈពេល 75 ឆ្នាំក្នុងសប្តាហ៍នេះ ដោយមាន ភ្លៀងធ្លាក់មួយរយមីលីម៉ែត្រ ក្នុងរយៈពេលត្រឹមតែ 12 ម៉ោងកាលពីថ្ងៃអង្គារ៕