(កំពង់ឆ្នាំង-ស្វាយរៀង)៖ នៅរសៀលថ្ងៃទី២៣ ខែឧសភានេះ ក្រៅពីជួយសម្របសម្រួលពីកន្លែងកើតហេតុ និងនៅមន្ទីរពេទ្យ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ និងថ្នាក់ដឹកនាំក្រសួងការងារ បានអញ្ជើញគោរពវិញ្ញាណក្ខន្ធសពបងប្អូនកម្មករនិយោជិតទាំង១៤រូបដែលបានទទួលមរណភាព ក្នុងឧបទ្ទវហេតុគ្រោះថ្នាក់ចរាចរណ៍ដ៏រន្ធត់នៅស្រុកកំពង់ត្រឡាច ខេត្តកំពង់ឆ្នាំង និងក្រុងស្វាយរៀង ខេត្តស្វាយរៀង។លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា ឯកឧត្តមរដ្ឋមន្ត្រី បានអញ្ជើញគោរពវិញ្ញាណក្ខន្ធសពបងប្អូនកម្មករចំនួន៩រូបនៅស្រុកកំពង់ត្រឡាច ខេត្តកំពង់ឆ្នាំង ហើយទន្ទឹមនេះ ថ្នាក់ដឹកនាំជាន់ខ្ពស់ក្រសួងក៏បានអញ្ជើញគោរពវិញ្ញាណក្ខន្ធបងប្អូនកម្មករដែលរងគ្រោះថ្នាក់នៅខេត្តស្វាយរៀង។ លោក ស៊ុន មេសា បានបន្ថែមថា៖ “ការគោរពវិញ្ញាណក្ខន្ធផ្ទាល់នេះ គឺជាការយកចិត្តដាក់របស់រាជរដ្ឋាភិបាលដែលតែងតែនៅជិតប្រជាជន ក៏ដូចជាបងប្អូនកម្មករ ហើយនេះក៏ជាការចូលរួមក្តីសោកសង្រេងជាមួយបងប្អូនក្រុមគ្រួសារសព”។សូមបញ្ជាក់ថា គ្រោះថ្នាក់ចរាចរណ៍ ចំនួន ២ករណី ដែលបានកើតឡើងព្រមគ្នានៅព្រឹកថ្ងៃទី២៣ ខែឧសភា ឆ្នាំ២០២៦ នៅខេត្តកំពង់ឆ្នាំង និងខេត្តស្វាយរៀងនេះ បណ្តាលឱ្យបងប្អូនកម្មករនិយោជិតរងគ្រោះសរុបចំនួន ៩៣នាក់ (ស្រី ៧៤នាក់) ក្នុងនោះ ស្លាប់ចំនួន ១៤នាក់ (ស្រី ១០នាក់) របួសធ្ងន់ចំនួន ១៥នាក់ (ស្រី ១២នាក់) និងរបួសស្រាល ចំនួន ៦៤នាក់ (ស្រី ៥២នាក់)។លោកស៊ុន មេសា ក៏បានអំពាវនាវយ៉ាងទទូចឱ្យមានការគោរពច្បាប់ចរាចរណ៍ឱ្យបានហ្មត់ចត់ដើម្បីជៀសវាងគ្រោះថ្នាក់ចរាចរណ៍ដ៏អាក្រក់ដែលធ្លាក់មកលើបងប្អូនកម្មករនិយោជិតរបស់យើង។ ជាមួយគ្នានេះ ថ្នាក់ដឹកនាំក្រសួង នឹងចុះរៀបចំបុណ្យសព និងធានារាល់ការចំណាយនៃពិធីបុណ្យសពរបស់បងប្អូនកម្មករ៕

(កំពង់ស្ពឺ)៖ នាព្រឹកថ្ងៃទី២៣ ខែឧសភា ឆ្នាំ២០២៦នេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តកំពង់ស្ពឺ បានអញ្ជើញជាអធិបតីភាពក្នុងពិធីសំណេះសំណាលជាមួយលោកនាយក លោកស្រីនាយិកាវិទ្យាល័យទាំង២៧ នៃខេត្តកំពង់ស្ពឺ។ កម្មវិធីនេះ មានការអញ្ជើញចូលរួមពីសំណាក់ ឯកឧត្តម លោកជំទាវ ក្រុមការងារ លោកប្រធានមន្ទីអប់រំ យុវជន និងកីឡាខេត្ត ប្រធានការិយាល័យអប់រំក្រុង ស្រុក ទាំង៩ លោកនាយក នាយិកា វិទ្យាល័យទាំង២៧ នៃខេត្តកំពង់ស្ពឺ លោកប្រធាន ស.ស.យ.ក ខេត្ត និងប្រធាន ស.ស.យ.ក ក្រុង ស្រុក។ ជាកិច្ចចាប់ផ្តើម លោក ថន សារិន ប្រធានមន្ទីរអប់រំ យុវជន និងកីឡាខេត្ត បានធ្វើការស្វាគមន៍យ៉ាងកក់ក្តៅចំពោះវត្តមានប្រធាន និងអ្នកចូលរួមទាំងអស់។ ក្នុងនោះលោក ថន សារិន ប្រធានមន្ទីរអប់រំ យុវជន និងកីឡាខេត្ត ក៏ថ្លែងអំណរគុណបងប្រធាន ដែលតែងតែយកចិត្តទុកដាក់ជាមួយការលើកកម្ពស់វិស័យការអប់រំក្នុងខេត្ត ជាពិសេសការរៀបចំវគ្គបំប៉នសម្រាប់សិស្សថ្នាក់ទី១២ ឆ្ពោះទៅកាន់ការប្រលងសញ្ញាបត្រមធ្យមសិក្សាទុតិយភូមិ ។ជាមួយគ្នានេះ ឯកឧត្តម ហ៊ុន ម៉ានី បានសាកសួរសុខទុក្ខ និងសម្ដែងការកោតសរសើរចំពោះការខិតខំប្រឹងប្រែងរបស់លោកប្រធានមន្ទីរ លោកនាយក លោកស្រីនាយិកា និងលោកគ្រូ-អ្នកគ្រូទាំងអស់ ក្នុងការចូលរួមពង្រឹងគុណភាពអប់រំនៅក្នុងខេត្តកំពង់ស្ពឺ។ ជាលទ្ធផល គិតត្រឹមការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) កន្លងទៅនេះ ចំនួនសិស្សប្រឡងជាប់មានការកើនឡើង ជាពិសេសសិស្សដែលទទួលបាននិទ្ទេស A គឺមានកំណើនគួរឱ្យកត់សម្គាល់។ បន្ថែមពីនេះ ឯកឧត្តមប្រធាន ក៏បានដឹកនាំសមាជិក សមាជិកា អង្គប្រជុំ ពិភាក្សា និងគិតគូពីការរៀបចំគោលការណ៍ប្រលងប្រណាំងបន្ថែមសម្រាប់ជំរុញ និងលើកទឹកចិត្តសិស្សានុសិស្សឱ្យកាន់តែខិតខំបន្តទៀត ដើម្បីទទួលបានលទ្ធផលល្អប្រសើរក្នុងការប្រឡង។ទន្ទឹមនឹងការអបអរសាទរចំពោះលទ្ធផលដ៏ត្រចះត្រចង់នេះ ឯកឧត្តម ហ៊ុន ម៉ានី ក៏បានផ្ដាំផ្ញើ និងណែនាំដល់ប្រធានមន្ទីរ លោកនាយក លោកស្រីនាយិកា និងលោកគ្រូ-អ្នកគ្រូ ត្រូវបន្តយកចិត្តទុកដាក់ខ្ពស់លើការបណ្ដុះបណ្ដាល និងអភិវឌ្ឍសមត្ថភាពសិស្សានុសិស្ស ដើម្បីធានាបាននូវនិរន្តរភាពនៃជោគជ័យ និងរួមគ្នាកសាងធនធានមនុស្សដ៏មានសក្ដានុពលសម្រាប់ខេត្តកំពង់ស្ពឺ ដើម្បីឆ្លើយតបទៅនឹងតម្រូវការទីផ្សារការងារ និងការអភិវឌ្ឍសង្គម-សេដ្ឋកិច្ចនាពេលអនាគត។

(ព័ត៌មានជាតិ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានដឹកនាំគណៈប្រតិភូ និងវិស័យឯកជន ជួបពិភាក្សាការងារ និងផ្លាស់ប្តូរយោបល់កម្រិតខ្ពស់ និងស៊ីជម្រៅជាមួយឯកឧត្តម Zhang Yong អភិបាលក្រុងហៃគូ នៃខេត្តហៃណាន សាធារណរដ្ឋប្រជាមានិតចិន និងសហការី លើការអនុវត្តពង្រឹង និងពង្រីកកិច្ចសហប្រតិបត្តិការលើវិស័យទេសចរណ៍រវាងកម្ពុជា និងក្រុងហៃគូ ឱ្យកាន់តែជាក់ស្តែង និងប្រកបដោយផ្លែផ្កា នៅទីក្រុងហៃគូ ខេត្តហៃណាន។ក្នុងជំនួបពិភាក្សានេះ ឯកឧត្តម Zhang Yong អភិបាលក្រុងហៃគូ បានស្វាគមន៍យ៉ាងកក់ក្តៅចំពោះដំណើរទស្សនកិច្ចការងាររបស់ឯកឧត្តមរដ្ឋមន្ត្រី និងថ្នាក់ដឹកនាំជាន់ខ្ពស់ក្រសួងទេសចរណ៍ និងវិស័យឯកជនមកក្រុងហៃគូ ព្រមទាំងបានបង្ហាញការចាប់អារម្មណ៍យ៉ាងខ្លាំងចំពោះសុខសន្តិភាព ស្ថិរភាពនយោបាយ ការអភិវឌ្ឍលើគ្រប់វិស័យ និងសក្តានុពលវិស័យទេសចរណ៍របស់កម្ពុជា ជាពិសេសគោលដៅទេសចរណ៍វប្បធម៌ ប្រវត្តិសាស្ត្រខេត្តសៀមរាប ដែលជាគោលដៅទេសចរណ៍ដ៏ល្បីល្បាញ និងពេញនិយមដែលអាចទាក់ទាញភ្ញៀវទេសចរចិនទៅទស្សនាកម្ពុជាកាន់តែច្រើនកុះករ។ឯកឧត្តមអភិបាលក្រុង ក៏បានគូសបញ្ជាក់ពីស្ថានភាពសេដ្ឋកិច្ចរបស់ក្រុងហៃគូជាមួយនឹងសក្តានុពលទេសចរណ៍ដ៏ទាក់ទាញ និងលក្ខណៈពិសេសនៃកំពង់ផែពាណិជ្ជកម្មសេរីហៃណាន ដែលជាកំពង់ផែពាណិជ្ជកម្មសេរីដ៏សំខាន់មួយរបស់ប្រទេសចិននាពេលបច្ចុប្បន្ននេះ ព្រមទាំងគោលដៅប្រែក្លាយក្រុងហៃគូជាចំណុចកណ្តាលនៃការតភ្ជាប់រវាងខេត្តហៃណាន ជាមួយប្រទេសកម្ពុជា និងបណ្តាប្រទេសនានាក្នុងតំបន់អាស៊ានផងដែរ។តាមរយៈជំនួបប្រកបដោយផ្លែផ្កា ភាគីទាំងពីរ បានឯកភាពជំរុញ និងពង្រឹងកិច្ចសហប្រតិបត្តិការទេសចរណ៍រវាងកម្ពុជា និងក្រុងហៃគូ ឱ្យកាន់តែជាក់ស្តែង និងមានប្រសិទ្ធភាព តាមរយៈការផ្សព្វផ្សាយទេសចរណ៍រួមគ្នា ការជំរុញកំណើនភ្ញៀវទេសចរទៅវិញទៅមក និងការពង្រឹងទំនាក់ទំនងរវាងវិស័យឯកជននៃភាគីទាំងពីរ។ បន្ថែមពីលើនេះ ការជំរុញការតភ្ជាប់ជើងហោះហើរត្រង់រវាងក្រុងហៃគូ និងគោលដៅទេសចរណ៍សំខាន់ៗ របស់កម្ពុជា ជាពិសេសរាជធានីភ្នំពេញ ខេត្តសៀមរាប និងខេត្តព្រះសីហនុ ដើម្បីបង្កើនភាពងាយស្រួលក្នុងការធ្វើដំណើររបស់ភ្ញៀវទេសចរ និងពង្រឹងការផ្លាស់ប្តូរប្រជាជននិងប្រជាជន ក៏ត្រូវបានលើកឡើង និងឯកភាពផងដែរ។ក្នុងជំនួបប្រកបដោយផ្លែផ្កានេះ ឯកឧត្តមរដ្ឋមន្ត្រី ក៏បានស្នើឱ្យភាគីក្រុងហៃគូ ជួយជំរុញ និងផ្សព្វផ្សាយពីសក្តានុពលទេសចរណ៍កម្ពុជា និងគោលនយោបាយលើកលែងទិដ្ឋាការសម្រាប់ភ្ញៀវទេសចរចិន ទៅកាន់ប្រជាពលរដ្ឋចិន ជាពិសេសប្រជាពលរដ្ឋក្រុងហៃគូ តាមរយៈបណ្តាញផ្សព្វផ្សាយ វេទិកាទេសចរណ៍ និងសហគមន៍ធុរកិច្ចទេសចរណ៍នានា ដើម្បីទាក់ទាញភ្ញៀវទេសចរចិនមកទស្សនាកម្ពុជាកាន់តែច្រើន។ ទន្ទឹមនឹងនេះ ឯកឧត្តមរដ្ឋមន្ត្រី ក៏បានស្នើពិនិត្យលទ្ធភាពលើការចុះអនុស្សរណៈនៃការយោគយល់គ្នា (MoU) រវាងមន្ទីរទេសចរណ៍រាជធានីភ្នំពេញ ខេត្តសៀមរាប និងខេត្តព្រះសីហនុ និងការិយាល័យទេសចរណ៍ក្រុងហៃគូ ព្រមទាំងស្នើជំរុញការរៀបចំវេទិកាធុរកិច្ចទេសចរណ៍កម្ពុជា-ក្រុងហៃគូ ដើម្បីបង្កើតកញ្ចប់ទស្សនកិច្ចថ្មីៗ និងពង្រីកកិច្ចសហប្រតិបត្តិការរវាងក្រុមហ៊ុនទេសចរណ៍ សណ្ឋាគារ ក្រុមហ៊ុនអាកាសចរណ៍នៃភាគីទាំងពីរ និងស្នើជំរុញការរៀបចំកម្មវិធីទស្សនកិច្ចសិក្សា (FAM Trip) សម្រាប់ក្រុមហ៊ុនទេសចរណ៍ អ្នកសារព័ត៌មាន អ្នកផលិតមាតិកា និង KOLs ពីក្រុងហៃគូ មកទស្សនាកម្ពុជា ដើម្បីផ្សព្វផ្សាយសក្តានុពលទេសចរណ៍កម្ពុជាទៅកាន់ទីផ្សារចិនឱ្យកាន់តែទូលំទូលាយ។គួរបញ្ជាក់ផងដែរថា ក្រុងហៃគូ គឺជាទីក្រុងសំខាន់មួយរបស់ខេត្តហៃណាន ដែលមានសក្តានុពលខ្ពស់លើវិស័យសេដ្ឋកិច្ច ពាណិជ្ជកម្ម និងទេសចរណ៍ ហើយក៏ជាច្រកទ្វារសំខាន់សម្រាប់ការតភ្ជាប់រវាងប្រទេសចិន តំបន់ និងអន្តរជាតិ។កម្មវិធីទី៧ នៃដំណើរទស្សនកិច្ចការងារនៅទីក្រុងហៃគូ ខេត្តហៃណាន សាធារណរដ្ឋប្រជាមានិតចិន។ទីក្រុងហៃគូ ថ្ងៃទី២២ ខែឧសភា ឆ្នាំ២០២៦។

(ព័ត៌មានជាតិ)៖ តបតាមការអញ្ជើញរបស់រដ្ឋបាលក្រុងហៃគូ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញជាអធិបតី និងថ្លែងសុន្ទរកថាបើកកម្មវិធី «ផ្សព្វផ្សាយទេសចរណ៍កម្ពុជា (Cambodia Tourism Roadshow) និងការផ្សព្វផ្សាយគោលនយោបាយលើកលែងទិដ្ឋាការសម្រាប់ប្រជាជនចិន» នៅទីក្រុងហៃគូ ខេត្តហៃណាន នៃសាធារណរដ្ឋប្រជាមានិតចិន ដោយមានការអញ្ជើញចូលរួមពីលោក Liu Cheng អគ្គនាយករងមន្ទីរទេសចរណ៍ វប្បធម៌ វិទ្យុ ទូរទស្សន៍ ការបោះពុម្ពផ្សាយ និងកីឡានៃខេត្តហៃណាន, លោក អ៉ីវ សុខុម អគ្គកុងស៊ុលកម្ពុជាប្រចាំខេត្តហៃណាន, តំណាងរដ្ឋបាលក្រុងហៃគូ, ប្រធានសហគ្រាសទេសចរណ៍ចិនធំៗ និងវិនិយោគិន ចិនជាច្រើនរូប អ្នកសារព័ត៌មានប្រចាំខេត្ត សរុបប្រមាណជាង ១៥០រូប។ថ្លែងក្នុងឱកាសដ៏មានសារៈសំខាន់នេះ ឯកឧត្តមរដ្ឋមន្ត្រី បានគូសបញ្ជាក់ថា កម្ពុជា និងចិន គឺជាបងប្អូន និងជាមិត្តដែកថែបដែលមានទំនាក់ទំនងជាប្រវត្តិសាស្ត្រយូរអង្វែង ហើយវិស័យទេសចរណ៍ និងការផ្លាស់ប្តូរប្រជាជន និងប្រជាជនរវាងប្រទេសទាំងពីរនៅតែជាសសរស្តម្ភដ៏សំខាន់ក្នុងការកសាងសហគមន៍វាសនារួមកម្ពុជា-ចិនក្នុងយុគសម័យថ្មី។ បន្ថែមពីលើនេះ ឯកឧត្តមរដ្ឋមន្ត្រី បានបញ្ជាក់ថា កម្ពុជា គឺជាគោលដៅទេសចរណ៍ប្រកបដោយសុវត្ថិភាព ផ្តល់ភាពកក់ក្តៅ និងភាពងាយស្រួលដល់ភ្ញៀវទេសចរគ្រប់ជាតិសាសន៍ ជាពិសេសភ្ញៀវទេសចរចិន។ទន្ទឹមនឹងនេះ ឯកឧត្តមរដ្ឋមន្ត្រី បានគូសបញ្ជាក់បន្ថែមថា កម្ពុជានឹងបន្តពង្រឹងយន្តការសម្រួលការធ្វើដំណើរ លើកកម្ពស់គុណភាពសេវាកម្ម និងបដិសណ្ឋារកិច្ច ដើម្បីធានាថា ភ្ញៀវទេសចរទាំងអស់ទទួលបានបទពិសោធន៍ដ៏ល្អប្រសើរ និងភាពសប្បាយរីករាយក្នុងអំឡុងពេលស្នាក់នៅកម្ពុជា។ជាមួយគ្នានោះដែរ ឯកឧត្តមរដ្ឋមន្ត្រី ក៏បានឆ្លៀតឱកាសអញ្ជើញ និងស្វាគមន៍ភ្ញៀវទេសចរចិន មកទទួលយកបទពិសោធន៍ថ្មីៗ និងសម្បូរបែប តាមរយៈយុទ្ធនាការដ៏ពិសេស២ក្នុងពេលតែមួយ "ការលើកលែងទិដ្ឋាការ" និង «ទស្សនាកម្ពុជានារដូវកាលបៃតង» ដែលភ្ញៀវទេសចរបានមកសាកល្បងផ្ទាល់ពីសក្តានុពលទេសចរណ៍ ធម្មជាតិ បេតិកភណ្ឌវប្បធម៌ តំបន់ឆ្នេរសមុទ្រ ទេសចរណ៍សុខុមាលភាព និងទេសចរណ៍ម្ហូបអាហារដ៏សម្បូរបែបរបស់កម្ពុជា។សូមជម្រាបជូនថា កម្មវិធី Cambodia Tourism Roadshow នេះជាវេទិកាធុរកិច្ច (B2B) ដ៏សំខាន់សម្រាប់វិស័យឯកជនកម្ពុជា និងចិន ក្នុងការពង្រឹងកិច្ចសហប្រតិបត្តិការ ស្វែងរកដៃគូថ្មីៗ និងជំរុញការផ្លាស់ប្តូរទេសចររវាងប្រទេសទាំងពីរ។កម្មវិធីទី៥ នៃដំណើរទស្សនកិច្ចការងារនៅទីក្រុងហៃគូ ខេត្តហៃណាន សាធារណរដ្ឋប្រជាមានិតចិន។ទីក្រុងហៃគូ ថ្ងៃទី២២ ខែឧសភា ឆ្នាំ២០២៦។

(កំពង់ស្ពឺ)៖ ផ្អើលពេញក្រុងច្បារម៉ន ស្រីស្អាតម្នាក់តាមសុំស្រលាញ់សេដ្ឋីក្មេង130លានរៀល ដែលទើបតែឈ្នះពីប៊ូសស្រ្តង។ រឿងនឹកស្មានមិនដល់សេដ្ឋីក្មេងបដិសេធស្នេហ៍ខ្មាស់គេពេញភូមិ ដោយទុកលុយធ្វើផ្ទះថ្មីជូនឪពុកម្ដាយ អំឡុងពេលប៊ូសស្ត្រងប្រគល់រង្វាន់និងជួយបង់ទឹកភ្លើងជូនបងប្អូនអ្នកភូមិនៅទីនោះ។ ម្ចាស់រង្វាន់សេដ្ឋីក្មេងពីប៊ូសស្ត្រងមានឈ្មោះសៀម ម៉េងស៊ី អាយុ21ឆ្នាំ បច្ចុប្បន្នធ្វើការសំណង់ នៅក្រុងច្បារម៉ន ខេត្តកំពង់ស្ពឺ។   ប្អូនប្រុសបានប្រាប់ថា ធ្វើក្រោមកម្ដៅថ្ងៃ ក្ដៅខ្លាំងពេក ក៏ទិញប៊ូសស្ត្រងត្រជាក់ៗញាំដូចសព្វមួយដង ស្រាប់តែថ្ងៃនេះសំណាងធំ គាស់ប៊ូសស្ត្រងផាច់ ឈ្នះរង្វាន់សេដ្ឋីក្មេង130លានរៀលផ្អើលពេញការដ្ឋានសំណង់។ រំភើបផង ភ័យផង រត់មកផ្ទះវិញប្រាប់ឪពុកម្តាយមុនគេ ថាគ្រួសារយើងក្លាយជាសេដ្ឋីហើយ។ លុះពេលក្រុមហ៊ុនចុះមកប្រគល់រង្វាន់ផ្ទាល់ ក៏បាននាំសំណាងទាំងអ្នកភូមិទៀត ដោយប៊ូសស្ត្រងជួយបង់ទឹកភ្លើងឱ្យពួកគាត់នៅទីនោះគ្រប់ៗគ្នា។ កាន់តែភ្ញាក់ផ្អើល ស្រីស្អាតម្នាក់មកសុំស្នេហ៍ម្ចាស់រង្វាន់សេដ្ឋីក្មេង ប៉ុន្តែប្អូនប្រុសមិនព្រម ដោយប្រាប់ថាចង់យកលុយសង់ផ្ទះថ្មី និងជួយទំនុកបម្រុងគ្រួសារ នេះបានហៅថាកូនប្រុសកត្តញ្ញូចំពោះឪពុកម្តាយ។ គួរបញ្ជាក់ផងដែរថា ស្រីស្អាតម្នាក់ ដែលសុំស្នេហ៍ម្ចាស់រង្វាន់សេដ្ឋីក្មេងពីប៊ូសស្រ្តងនោះ គឺគ្រាន់តែសាកចិត្តប្អូនប្រុសប៉ុណ្ណោះ។ ប៊ូសស្ត្រងឆ្ងាញ់ រសជាតិដិតជ្រៅ មានរង្វាន់សេដ្ឋី130លានរៀល កែប្រែជីវិតភ្លាមៗ..!! 

(បច្ចេកវិទ្យា)៖ Apple បើកដំណើរការមុខងារ VoiceOver ថ្មីដែលប្រើ AI ដើម្បីពិពណ៌នាអំពីទេសភាពជុំវិញដូចជាទីតាំង ពណ៌សម្លៀកបំពាក់ និងទិសដៅសម្រាប់ជនពិការភ្នែកដោយប្រើ iPhone ។ Apple បានប្រកាសពីការអាប់ដេតថ្មីៗ ជាបន្តបន្ទាប់ចំពោះភាពងាយស្រួល ដោយរំលេចពីការអនុវត្ត Apple Intelligence សម្រាប់មុខងារប្រចាំថ្ងៃជា មួយជនពិការដូចជា VoiceOver, Magnifier, Voice Commands និង Accessibility Reader។ ជាពិសេស Image Explorer នៅក្នុង VoiceOver ប្រើ AI ដើម្បីពិពណ៌នារូបភាពយ៉ាងលម្អិតនៅលើមាត្រដ្ឋានប្រព័ន្ធ រួមទាំងមាតិកានៅក្នុងរូបថត វិក្កយបត្រនៅក្នុងរូបថតដែលបានស្កេន ទម្រង់ផ្ទាល់ខ្លួន និងច្រើនទៀត។ នេះបើយោងតាមកាសែត VN EXPRESS។ គួរកត់សម្គាល់ថា មុខងារគាំទ្រ Live Recognition តាមពេលវេលាជាក់ស្តែងនៅក្នុង VoiceOver អនុញ្ញាតឱ្យអ្នកប្រើប្រាស់ចុចប៊ូតុង Action នៅលើ iPhone ដើម្បីសួរសំណួរជាសំឡេងអំពីអ្វីដែលមាននៅក្នុងស៊ុមកាមេរ៉ា និងទទួលបានចម្លើយលម្អិត។ ប្រព័ន្ធអាចទទួលស្គាល់សំណួរដោយសំឡេងធម្មជាតិជំនួសឱ្យពាក្យបញ្ជា ត្រឹមត្រូវដូចមុន។ នៅក្នុងវីដេអូណែនាំ អ្នកប្រើប្រាស់ iPhone ពិការភ្នែកអាចសួរថាតើអាវនោះនៅឯណា ដោយចង្អុលទៅជណ្តើរយន្តត្រឹមត្រូវដែលដំណើរការនៅពេលដែលម្នាក់ទៀតស្ថិតក្នុងស្ថានភាពថែទាំ។ នេះត្រូវបានគេចាត់ទុកថាជារបកគំហើញក្នុងការអភិវឌ្ឍន៍ភាពងាយស្រួលសម្រាប់ជនពិការដែល Apple បានខិតខំប្រឹងប្រែងអស់រយៈពេលជាច្រើនឆ្នាំមកហើយដោយសារកម្មវិធី Apple Intelligence ។លក្ខណៈពិសេសផ្សេងទៀតដូចជា Magnifier ក៏អនុវត្ត AI ដើម្បីអនុញ្ញាតឱ្យឧបករណ៍ត្រូវបានកែតម្រូវតាមរយៈពាក្យ បញ្ជាសំឡេងជាមួយនឹងសមត្ថភាពទទួលស្គាល់កាន់តែច្រើន សួរ និងទទួលចម្លើយដូចជា ការសន្ទនាជាមួយមនុស្សពិត។ជាមួយនឹងពាក្យបញ្ជាជាសំឡេង ជនពិការអាចគ្រប់គ្រង iPhone និង iPad ដោយសំឡេងដោយមិនចាំបាច់ប៉ះអេក្រង់។ នៅក្នុងវីដេអូណែនាំ ជាមួយនឹងពាក្យបញ្ជាដូចជាការប៉ះថត ម៉ាស៊ីនដំណើរការបានត្រឹមត្រូវ និងមានក្រាហ្វិកពិពណ៌នាអំពីប្រតិបត្តិការសម្រាប់អ្នកប្រើប្រាស់ដើម្បីអនុវត្តតាម។ ការកំណត់អត្តសញ្ញាណប្រើ Apple Intelligence ដូច្នេះអ្នកប្រើប្រាស់អាចអានឈ្មោះថត និងឯកសារដែលពួកគេចង់បើកដោយមិនចាំបាច់ធ្វើតាមការកំណត់ជាមុន។

(ភ្នំពេញ)៖ នារសៀលថ្ងៃទី២២ ខែឧសភា ឆ្នាំ២០២៦ ឯកឧត្តម លឹម ស៊ុយហុង អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាអធិបតីក្នុងសិក្ខាសាលាផ្សព្វផ្សាយច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យាសម្រាប់អធិការការងារ អធិការសន្តិសុខសង្គម ដែលចូលរួមដោយផ្ទាល់នៅទីស្តីការងារក្រសួង និងតាមប្រព័ន្ធ Zoom ពីមន្ទីរការងារនិងបណ្តុះបណ្តាលវិជ្ជាជីវៈ រាជធានី-ខេត្ត សរុបចំនួនប្រមាណ ៥០០ នាក់។ សិក្ខាសាលានេះមានការអញ្ជើញចូលរួមពីលោកជំទាវ សុង ឆវ័ន្ត អនុរដ្ឋលេខាធិការ ឯកឧត្តម ណាន់ ចាន់រឿន អនុរដ្ឋលេខាធិការ និងលោកជំទាវ សុន សុខាលីដា ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានកិច្ចការអយ្យការ និងព្រហ្មទណ្ឌនៃក្រសួងយុត្តិធម៌។សូមបញ្ជាក់ថា សិក្ខាសាលានេះសហការរៀបចំដោយវិទ្យាស្ថានជាតិការងារនៃក្រសួងការងារនិងបណ្តុះបណ្តាលវិជ្ជាជីវៈ និងអគ្គនាយកដ្ឋានកិច្ចការអយ្យការ និងព្រហ្មទណ្ឌនៃក្រសួងយុត្តិធម៌ដែលមានគោលបំណងផ្សព្វផ្សាយ និងពង្រឹងការយល់ដឹងអំពីខ្លឹមសារសំខាន់ៗនៃច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ព្រមទាំងលើកកម្ពស់សមត្ថភាពអធិការការងារ ក្នុងការបង្ការ ទប់ស្កាត់ និងឆ្លើយតបចំពោះសកម្មភាពឆបោកដែលប្រើប្រាស់បច្ចេកវិទ្យា និងប្រព័ន្ធអនឡាញ ដែលអាចប៉ះពាល់ដល់វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ជាពិសេសការការពារសណ្តាប់ធ្នាប់សាធារណៈ។ថ្លែងក្នុងពិធីបើកសិក្ខាសាលា លឹម ស៊ុយហុង បានគូសបញ្ជាក់ថា ការរីកចម្រើនផ្នែកបច្ចេកវិទ្យា បានផ្តល់អត្ថប្រយោជន៍យ៉ាងច្រើនដល់សង្គម និងសេដ្ឋកិច្ច សម្រួលដល់ការបំពេញការងារ ឬការផ្តល់សេវាផ្សេងៗ ប៉ុន្តែក៏បានបង្កឱ្យមានហានិភ័យនៃការប្រើប្រាស់បច្ចេកវិទ្យាក្នុងគោលបំណងទុច្ចរិត ជាពិសេសសកម្មភាពឆបោកតាមប្រព័ន្ធបច្ចេកវិទ្យា និងបណ្តាញសង្គម ដែលតម្រូវឱ្យមន្ត្រីជំនាញពាក់ព័ន្ធមានចំណេះដឹង និងការយល់ដឹងគ្រប់គ្រាន់ក្នុងការអនុវត្តច្បាប់ឱ្យមានប្រសិទ្ធភាព។ ឯកឧត្តមរដ្ឋលេខាធិការក៏បានជំរុញឱ្យសិក្ខាកាមទាំងអស់យកចិត្តទុកដាក់ស្តាប់បទបង្ហាញ ចូលរួមពិភាក្សា និងផ្លាស់ប្តូរបទពិសោធន៍ ដើម្បីអាចយកចំណេះដឹងដែលទទួលបានទៅអនុវត្តក្នុងការងារត្រួតពិនិត្យ និងការធ្វើអធិការកិច្ចការងារប្រកបដោយប្រសិទ្ធភាព និងស្របតាមច្បាប់ជាធរមាន ក៏ដូចជាចូលរួមជាសេនាធិការរាជរដ្ឋាភិបាលក្នុងការប្រឆាំងការឆបោកតាមប្រព័ន្ធបច្ចេកវិទ្យា។ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ត្រូវបានធ្វើបទបង្ហាញដោយ ឯកឧត្តម ណាន់ ចាន់រឿន អនុរដ្ឋលេខាធិការ និងលោកជំទាវ សុង ឆវ័ន្ត អនុរដ្ឋលេខាធិការ នៃក្រសួងយុត្តិធម៌ ជូនដល់អង្គសិក្ខាសាលាទាំងអស់បានស្វែងយល់កាន់តែស៊ីជម្រៅផងដែរ៕

(ភ្នំពេញ)៖ ក្រសួងការងារ និងបណ្តុះបណ្តាលវិជ្ជាជីវៈនៅព្រឹកថ្ងៃទី២៣ ខែឧសភា ឆ្នាំ២០២៦នេះ មានក្តីរន្ធត់យ៉ាងក្រៃលែងចំពោះគ្រោះថ្នាក់ចរាចរណ៍ដ៏សែនរន្ធត់ចំនួន២ករណីដែលបានកើតឡើងព្រមគ្នា ដោយបណ្តាលឱ្យបងប្អូនកម្មករនិយោជិតចំនួន១៣នាក់បានស្លាប់ និងជាង៣០នាក់បានរងរបួសធ្ងន់ និងស្រាល។ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ស៊ុន មេសា បានឱ្យដឹងថា ករណីទី១ កើតឡើងនៅស្រុកកំពង់ត្រឡាច ខេត្តកំពង់ឆ្នាំដោយរថយន្តដឹកទំនិញធន់ធំ បានបុករថយន្តដឹកកម្មករតាមបណ្តោយផ្លូវជាតិលេខ៥ដែលបណ្តាលឱ្យបងប្អូនកម្មករ៨នាក់បានស្លាប់ និង១០នាក់រងរបួសធ្ងន់ ខណៈដែលបងប្អូនផ្សេងៗទៀតមានរបួសស្រាល។ ដោយឡែកករណីទី២ បានកើតឡើងនៅក្រុងស្វាយរៀង ខេត្តស្វាយរៀងដែលបណ្តាលឱ្យបងប្អូនកម្មករចំនួន៥រូបបានស្លាប់ របួសធ្ងន់៥រូប និងរបួសស្រាល១៦រូប។លោកស៊ុន មេសាបញ្ជាក់ថា៖ “ក្រសួង និងឯកឧត្តមរដ្ឋមន្ត្រីផ្ទាល់មានក្តីរន្ធត់និងក្រៀមក្រំបំផុតចំពោះគ្រោះថ្នាក់ចរាចរណ៍ទាំង២ករណីនេះ។ ភ្លាមៗក្រោយទទួលបានព័ត៌មាន បេឡាជាតិសន្តិសុខសង្គម មន្ទីរការងារ និងអាជ្ញាធរមានសមត្ថកិច្ច ដែលនៅកៀកកន្លែងកើតហេតុ បានខិតខំជួយសង្រ្គោះ និងចាត់ចែងបញ្ជូនអ្នករងរបួសទៅកាន់មន្ទីរពេទ្យដែលនៅក្បែរ និងកំពុងបញ្ជូនបន្តមកមន្ទីរពេទ្យខេត្ត និងមន្ទីរពេទ្យកាលើមែត្រ”។លោកស៊ុន មេសា ក៏បានអំពាវនាវយ៉ាងទទួចឱ្យមានការគោរច្បាប់ចរាចរណ៍ឱ្យបានហ្មត់ចត់ដើម្បីជៀសវាងគ្រោះថ្នាក់ចរាចរណ៍ដ៏អាក្រក់ដែលធ្លាក់មកលើបងប្អូនកម្មករនិយោជិតរបស់យើង។ ជាមួយគ្នានេះ ថ្នាក់ដឹកនាំក្រសួង នឹងចុះរៀបចំបុណ្យសព និងធានារាល់ការចំណាយនៃពិធីបុណ្យសពរបស់បងប្អូនកម្មករ។ ក្រៅពីការចូលរួមរំលែកទុក្ខដ៏សែនក្រៀមក្រំនេះ បងប្អូនដែលជួបគ្រោះថ្នាក់នឹងទទួលបានអត្ថប្រយោជន៍ស្របទៅតាមច្បាប់របស់បេឡាជាតិសន្តិសុខសង្គមដែលជាការគិតគូយ៉ាងយកចិត្តទុកដាក់។ នេះបើតាមការបញ្ជាក់របស់លោក ស៊ុន មេសាដដែល៕

(ភ្នំពេញ)៖ ឯកឧត្តម តាំង ផេងរិទ្ធី អនុរដ្ឋលេខាធិការ តំណាងដ៏ខ្ពង់ខ្ពស់របស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ រួមជាមួយ ឯកឧត្តម នង សាកល អនុរដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ អញ្ជើញជាអធិបតីក្នុងពិធីបើកសិក្ខាសាលាកសាងសមត្ថភាពលើគោលការណ៍ណែនាំ ស្តីពីការការពារជនទេសន្តរប្រវេសន៍ការងារខ្មែរនៅពេលមានអាសន្ន នៅក្រៅប្រទេស នាព្រឹកថ្ងៃទី២១ ខែឧសភា ឆ្នាំ២០២៦ នៅសណ្ឋាគារកាំបូឌីយ៉ាណា ដោយមានការចូលរួមពី លោក Koen Everaert ប្រធានស្តីទីកិច្ចសហប្រតិបត្តិការនៃប្រតិភូសហភាពអឺរ៉ុបប្រចាំកម្ពុជា, លោកស្រី Nellie Ghusayni ប្រធានបេសកកម្មអង្គការ IOM ប្រចាំកម្ពុជា ព្រមទាំងតំណាងក្រសួងស្ថាប័នពាក់ព័ន្ធ, គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស, អនុព័ន្ធការងារ, សមាគមទីភ្នាក់ងារជ្រើសរើសពលករកម្ពុជា, ទីភ្នាក់ងារជ្រើសរើសឯកជន, អង្គការជាតិ និងអន្តរជាតិ ក្នុងគោលបំណងពង្រឹងសមត្ថភាពមន្ត្រីពាក់ព័ន្ធក្នុងការបង្ការ កាត់បន្ថយហានិភ័យ និងដោះស្រាយបញ្ហាដល់ជនទេសន្តរប្រវេសន៍ការងារខ្មែរនៅពេលមានអាសន្ននៅក្រៅប្រទេស។ថ្លែងក្នុងសុន្ទរកថាបើកសិក្ខាសាលា ឯកឧត្តម តាំង ផេងរិទ្ធី បានគូសបញ្ជាក់អំពីសារៈសំខាន់នៃគោលការណ៍ណែនាំ ស្តីពីការការពារជនទេសន្តរប្រវេសន៍ការងារខ្មែរនៅពេលមានអាសន្ននៅក្រៅប្រទេស ដែលជាជំហានដ៏សំខាន់មួយសម្រាប់ពង្រឹងយន្តការ ឆ្លើយតប និងសម្របសម្រួលរវាងក្រសួង ស្ថាប័នពាក់ព័ន្ធ ស្ថានទូត អង្គការដៃគូ និងវិស័យឯកជន ដើម្បីអាចផ្តល់ការគាំទ្រ និងអន្តរាគមន៍បានទាន់ពេលវេលា។ក្នុងឱកាសនោះ ឯកឧត្តម ក៏បានគូសបញ្ជាក់ផងដែរថា ក្រសួងការងារនិងបណ្តុះបណ្តាលវិជ្ជាជីវៈ ក៏បានដាក់ចេញផែនការយុទ្ធសាស្រ្តអភិវឌ្ឍន៍វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ឆ្នាំ២០២៤-២០២៨ ដែលនៅក្នុងយុទ្ធសាស្ត្រទី៤ ស្តីពី “ការពង្រឹងការគ្រប់គ្រងទេសន្តរប្រវេសន៍ការងារប្រកបដោយសុវត្ថិភាព គុណភាព និងប្រសិទ្ធភាព” បានកំណត់ការរៀបចំយន្តការបង្ការហានិភ័យ នីតិវិធីសម្រាប់ជូនដំណឹង ឆ្លើយតបបន្ទាន់ និងគាំពារដល់ជនទេសន្តរប្រវេសន៍ការងារខ្មែរនៅពេលមានអាសន្ន ដែលស្របនឹងគោលបំណងនៃសិក្ខាសាលាកសាងសមត្ថភាពនេះ។ជាមួយគ្នានេះ ឯកឧត្តម ក៏បានផ្តល់អនុសាសន៍ណែនាំដល់សិក្ខាកាមចូលរួមសិក្ខាសាលាកសាងសមត្ថភាពឱ្យយកចិត្តទុកដាក់ ចូលរួមយ៉ាងសកម្មក្នុងពិភាក្សា និងចែករំលែកព័ត៌មានជាក់លាក់តាមប្រទេសទទួលនីមួយៗ ដើម្បីជាមូលដ្ឋានក្នុងការរៀបចំគោលការណ៍ណែនាំមួយដែលមានលក្ខណៈគ្រប់ជ្រុងជ្រោយ ជាពិសេសផ្តោតសំខាន់លើដំណាក់កាលត្រៀមសម្រាប់មុនពេលមានអាសន្ន ការឆ្លើយតបបន្ទាន់នៅពេលមានអាសន្ន និងក្រោយពេលមានអាសន្ន។ ជាចុងបញ្ចប់ ឯកឧត្តម តាំង ផេងរិទ្ធី បានវាយតម្លៃខ្ពស់ចំពោះអង្គការ IOM ដែលតែងតែផ្តល់កិច្ចសហការយ៉ាងល្អនិងផ្តល់ការគាំទ្រដល់រាជរដ្ឋាភិបាលកម្ពុជា ជាពិសេសក្រសួងការងារនិងបណ្តុះបណ្តាលវិជ្ជាជីវៈ ក្នុងការពង្រឹងអភិបាលកិច្ចទេសន្តរប្រវេសន៍ការងារនៅប្រទេសកម្ពុជា និងការការពារសិទ្ធិនិងសុខុមាលភាពរបស់ជនទេសន្តរប្រវេសន៍ការងារខ្មែរ ព្រមទាំងបានថ្លែងអំណរគុណចំពោះសហភាពអឺរ៉ុប និងរាជរដ្ឋាភិបាលស៊ុយអែត ដែលបានផ្តល់ការគាំទ្រដល់ការរៀបចំសិក្ខាសាលាដ៏មានសារៈសំខាន់នេះ៕

(អន្តរជាតិ)​​៖ លោកប្រធានាធិបតី ដូណាល់ ត្រាំ បានប្រកាសថា សហរដ្ឋអាមេរិកនឹងបញ្ជូនកងទ័ពបន្ថែម ចំនួន 5000 នាក់ទៅកាន់ប្រទេសប៉ូឡូញ ដែលជាការបញ្ច្រាស់ជាក់ស្តែង បន្ទាប់ពីការផ្លាស់ប្តូរថ្មីៗ ដោយរដ្ឋបាលរបស់លោកដើម្បីកាត់បន្ថយចំនួនកងទ័ពអាមេរិកនៅអឺរ៉ុប។ការប្រកាសនេះធ្វើឡើងមួយសប្តាហ៍ បន្ទាប់ពីរដ្ឋមន្ត្រីក្រសួងការពារជាតិ Pete Hegseth បានបញ្ឈប់ ការដាក់ពង្រាយក្រុមប្រយុទ្ធដែលរំពឹងថានឹងប្តូរវេនគ្នាឆ្លងកាត់ប្រទេសប៉ូឡូញ ដែលជាការសម្រេចចិត្ត ដែលក្រសួងរបស់លោកបាននិយាយថា គឺផ្អែកលើការខកចិត្តចំពោះប្រទេសអឺរ៉ុបដែល "មិនបានបោះ ជំហានទៅមុខនៅពេលដែលអាមេរិកត្រូវការពួកគេ"។ការដាក់ពង្រាយនេះ ក៏កើតឡើងបន្ទាប់ពីការប្រកាសរបស់លោក Trump កាលពីដើមខែនេះថា លោកកំពុង ដកកងទ័ពចំនួន 5,000 នាក់ចេញពីប្រទេសអាល្លឺម៉ង់ ដែលអធិការបតី Friedrich Merz បាននិយាយថា សហរដ្ឋអាមេរិកកំពុងត្រូវបាន "អាម៉ាស់" នៅក្នុងសង្គ្រាមរបស់ខ្លួនជាមួយអ៊ីរ៉ង់ ដែលធ្វើឱ្យលោក Trump ខឹងសម្បារ។ផ្ទុយទៅវិញ លោក Trump បាននិយាយថា ការដាក់ពង្រាយទៅកាន់ប្រទេសប៉ូឡូញ ដែលជាច្រកសំខាន់ សម្រាប់ជំនួយរបស់អឺរ៉ុបទៅកាន់ប្រទេសជិតខាងអ៊ុយក្រែន គឺផ្អែកលើទំនាក់ទំនងល្អរបស់លោកជាមួយ ប្រធានាធិបតីនិយមស្តាំនិយម Karol Nawrocki នៃទីក្រុងវ៉ាសូវី៕

(ព័ត៌មានជាតិ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានដឹកនាំគណៈប្រតិភូ និងវិស័យឯកជន ជួបពិភាក្សាការងារ និងផ្លាស់ប្តូរយោបល់កម្រិតខ្ពស់ និងស៊ីជំរៅជាមួយឯកឧត្តម Liu Xiaoming អភិបាលខេត្តហៃណាន នៃសាធារណរដ្ឋប្រជាមានិតចិន និងសហការី លើការអនុវត្តពង្រឹង និងពង្រីកកិច្ចសហប្រតិបត្តិការលើវិស័យទេសចរណ៍រវាងកម្ពុជា និងខេត្តហៃណានឱ្យកាន់តែជាក់ស្តែង និងប្រកបដោយផ្លែផ្កា នៅទីក្រុងហៃគូ ខេត្តហៃណាន។ក្នុងជំនួបពិភាក្សានេះ ឯកឧត្តម Liu Xiaoming អភិបាលខេត្តហៃណាន បានស្វាគមន៍យ៉ាងកក់ក្តៅចំពោះដំណើរទស្សនកិច្ចការងាររបស់ឯកឧត្តមរដ្ឋមន្ត្រី និងថ្នាក់ដឹកនាំជាន់ខ្ពស់ក្រសួងទេសចរណ៍ និងវិស័យឯកជនមកខេត្តហៃណាន ព្រមទាំងបានបង្ហាញការចាប់អារម្មណ៍យ៉ាងខ្លាំងចំពោះសុខសន្តិភាព ស្ថិរភាពនយោបាយ ការអភិវឌ្ឍលើគ្រប់វិស័យ និងសក្តានុពលវិស័យទេសចរណ៍របស់កម្ពុជា ជាពិសេសគោលដៅទេសចរណ៍វប្បធម៌ ប្រវត្តិសាស្ត្រ និងធម្មជាតិដ៏ល្បីល្បាញ ដូចជាប្រាសាទអង្គរវត្ត និងតំបន់ឆ្នេរសមុទ្រ ដែលអាចទាក់ទាញភ្ញៀវទេសចរចិនទៅទស្សនា កាន់តែច្រើន។ឯកឧត្តមអភិបាលខេត្ត ក៏បានគូសបញ្ជាក់ពីស្ថានភាពសេដ្ឋកិច្ចរបស់ខេត្តហៃណា ជាមួយនឹងសក្តានុពលទេសចរណ៍ដ៏ទាក់ទាញ និងលក្ខណៈពិសេសនៃកំពង់ផែពាណិជ្ជសេរីដែលមានតែមួយគត់នៅប្រទេសចិននាពេលបច្ចុប្បន្ននេះ ព្រមទាំងគោលដៅប្រែកា្លយខេត្តហៃណានជាចំណុចកណ្តាលនៃការតភ្ជាប់រវាងខេត្តនានានៃប្រទេសចិន និងកម្ពុជា រួមទាំងបណ្តាប្រទេសផ្សេងៗ ទៀតក្នុងតំបន់ផងដែរ។តាមរយៈជំនួបប្រកបដោយផ្លែផ្កា ភាគីទាំងពីរ បានឯកភាពពិនិត្យលទ្ធភាពលើការចុះអនុស្សរណៈនៃការយោគយល់គ្នា (MoU) ស្តីពីកិច្ចសហប្រតិបត្តិការទេសចរណ៍រវាងក្រសួងទេសចរណ៍កម្ពុជា និងរដ្ឋបាលប្រជាជនខេត្តហៃណាន ឱ្យជាក់ស្តែង និងស៊ីជំរៅ ដើម្បីពង្រឹង និងពង្រីកកិច្ចសហប្រតិបត្តិការទេសចរណ៍ឱ្យកាន់តែមានប្រសិទ្ធភាព និងទទួលបានផលប្រយោជន៍ទៅវិញទៅមកផងដែរ។ បន្ថែមពីនេះទៀត ការជំរុញការតភ្ជាប់ជើងហោះហើរត្រង់រវាងខេត្តហៃណាន និងគោលដៅទេសចរណ៍សំខាន់ៗ របស់កម្ពុជា ជាពិសេសរាជធានីភ្នំពេញ ខេត្តសៀមរាប និងខេត្តព្រះសីហនុ ដើម្បីបង្កើនភាពងាយស្រួលក្នុងការធ្វើដំណើររបស់ភ្ញៀវទេសចរ និងពង្រឹងការផ្លាស់ប្តូរប្រជាជននិងប្រជាជន ការលើកទឹកចិត្តឱ្យមានជំនួបរវាងវិស័យឯកជនកម្ពុជា និងខេត្តហៃណានដើម្បីរៀបចំជាកញ្ចប់ទស្សនកិច្ច ក៏ត្រូវបានលើកឡើង និងឯកភាពផងដែរ។ក្នុងជំនួបប្រកបដោយផ្លែផ្កានេះ ឯកឧត្តមរដ្ឋមន្ត្រី ក៏បានស្នើឱ្យភាគីខេត្តហៃណាន ជួយជំរុញ និងផ្សព្វផ្សាយពីសក្តានុពលទេសចរណ៍កម្ពុជា ទៅកាន់ប្រជាពលរដ្ឋចិន ជាពិសេសប្រជាពលរដ្ឋខេត្តហៃណាន តាមរយៈបណ្តាញផ្សព្វផ្សាយ វេទិកាទេសចរណ៍ និងក្រុមហ៊ុនទេសចរណ៍នានា ដើម្បីទាក់ទាញភ្ញៀវទេសចរចិនមកទស្សនាកម្ពុជាកាន់តែច្រើន ព្រមទាំងស្នើជំរុញការរៀបចំកម្មវិធីទស្សនកិច្ចសិក្សា (FAM Trip) សម្រាប់ក្រុមហ៊ុនទេសចរណ៍ អ្នកសារព័ត៌មាន អ្នកផលិតមាតិកា និង KOLs ពីខេត្តហៃណាន មកទស្សនាកម្ពុជា ដើម្បីផ្សព្វផ្សាយសក្តានុពលទេសចរណ៍កម្ពុជាទៅកាន់ទីផ្សារចិនឱ្យកាន់តែទូលំទូលាយ។គួរបញ្ជាក់ផងដែរថា ខេត្តហៃណាន គឺជាគោលដៅទេសចរណ៍អន្តរជាតិដ៏សំខាន់មួយរបស់ប្រទេសចិន ដែលមានសក្តានុពលខ្ពស់លើវិស័យទេសចរណ៍ឆ្នេរ វប្បធម៌ និងទេសចរណ៍កម្សាន្ត ហើយក្នុងរយៈពេលចុងក្រោយនេះ កម្ពុជា និងខេត្តហៃណាន បានបន្តពង្រឹងកិច្ចសហប្រតិបត្តិការលើវិស័យទេសចរណ៍ តាមរយៈការផ្សព្វផ្សាយរួម ការតភ្ជាប់ជើងហោះហើរ និងការផ្លាស់ប្តូរទស្សនកិច្ចរវាងភាគីទាំងពីរ។សូមជម្រាបផងដែរថា នាពេលកន្លងមកសហគ្រាសទេសចរណ៍នៃខេត្តហៃណាន បានសហការយ៉ាងសកម្មដោយបាននាំភ្ញៀវទេសចរចិនមកទស្សនាកម្ពុជាជាង៣០ម៉ឺននាក់។ ជាមួយយុទ្ធនាការលើកលែងទិដ្ឋាការនេះ គ្រោងនាំភ្ញៀវទេសចរមកកម្ពុជាបន្ថែមទៀតឱ្យបាន៥០មុឺននាក់។កម្មវិធីទី៣ នៃដំណើរទស្សនកិច្ចការងារនៅទីក្រុងហៃគូ ខេត្តហៃណាន សាធារណរដ្ឋប្រជាមានិតចិន។ ទីក្រុងហៃគូ ថ្ងៃទី២១ ខែឧសភា ឆ្នាំ២០២៦។

(ព័ត៌មានជាតិ)៖ ក្នុងដំណើរទស្សនកិច្ចការងារផ្សព្វផ្សាយសក្តានុពលទេសចរណ៍ និងកាលានុវត្តភាពវិនិយោគកម្ពុជានៅខេត្តហៃណាន ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានដឹកនាំគណៈប្រតិភូកម្ពុជា និងវិស័យឯកជនជាន់ខ្ពស់ចូលរួមជំនួបពិភាក្សាការងារ និងផ្សព្វផ្សាយពីយុទ្ធនាការលើកលែងទិដ្ឋាការសាកល្បងដល់ប្រជាជនចិន និងទស្សនាកម្ពុជានារដូវកាលបៃតង ជាមួយសហគ្រាសចិនធំៗ និង Influencers ល្បីៗ ប្រចាំខេត្តហៃណាន ដឹកនាំដោយលោក Sun Haigui អនុប្រធានមន្ទីរទេសចរណ៍ វប្បធម៌ វិទ្យុ ទូរទស្សន៍ ការបោះពុម្ភផ្សាយ និងកីឡានៃក្រុងហៃគូ ខេត្តហៃណាន នៅទីក្រុងហៃគូ ខេត្តហៃណាន។​ក្នុងជំនួបពិភាក្សានេះ លោក Sun Haigui បានថ្លែងអំណរគុណចំពោះការទទួលស្វាគមន៍ និងការសម្របសម្រួលយ៉ាងកក់ក្តៅពីឯកឧត្តមរដ្ឋមន្ត្រី និងគណៈប្រតិភូជាន់់ខ្ពស់ទាំងវិស័យរដ្ឋ និងឯកជនរបស់កម្ពុជា ព្រមទាំងបានបង្ហាញការចាប់អារម្មណ៍ចំពោះសក្តានុពលវិស័យទេសចរណ៍របស់កម្ពុជា ជាពិសេសទេសចរណ៍វប្បធម៌ ប្រវត្តិសាស្ត្រ ធម្មជាតិ និងបដិសណ្ឋារកិច្ច ដែលអាចទាក់ទាញភ្ញៀវទេសចរចិនបានកាន់តែច្រើន។ ជាមួយគ្នានេះ សហគ្រាសទេសចរណ៍ចម្រុះដែលគ្រប់គ្រងដោយរដ្ឋ និងសហគ្រាសទេសចរណ៍ឯកជនទាំង១៥ បានសម្តែងនូវអំណរគុណយ៉ាងជ្រាលជ្រៅ និងគាំទ្រចំពោះការសម្រេចរបស់រាជរដ្ឋាភិបាលកម្ពុជា ក្នុងការផ្តល់ការលើកលែងទិដ្ឋាការសម្រាប់ប្រជាជនចិន ចូលទស្សនា និងស្នាក់នៅកម្ពុជាបានរយៈពេល១៤ថ្ងៃ ដែលត្រូវបានរំពឹងថា នឹងជួយទាក់ទាញភ្ញៀវទេសចរចិនមកទស្សនាកម្ពុជាបានកាន់តែច្រើនក្នុងរដូវកាលបៃតងដ៏ពិសេសនេះ។ ទន្ទឹមនឹងនេះ សហគ្រាសទាំងអស់សន្យា នឹងប្រឹងប្រែងបន្ថែមក្នុងការនាំភ្ញៀវទេសចរចិនមកកម្ពុជាឱ្យបាន៥០ម៉ឺននាក់ក្នុងឆ្នាំ២០២៦ តាមរយៈកម្មវិធីលើកលែងទិដ្ឋាការ និងយុទ្ធនាការផ្សព្វផ្សាយរដូវកាលបៃតងនេះ។ គួរបញ្ជាក់ផងដែរថា សហគ្រាសទេសចរណ៍ទាំងអស់នេះ បានសហការយ៉ាងសកម្មក្នុងការនាំភ្ញៀវទេសចរចិនទៅទស្សនាកម្ពុជា បានច្រើនជាង៣០ម៉ឺននាក់ ចាប់តាំងពីឆ្នាំ២០១៦ មក។ជាកិច្ចឆ្លើយតប ឯកឧត្តមរដ្ឋមន្ត្រី បានកោតសរសើរ វាយតម្លៃខ្ពស់ និងថ្លែងអំណរគុណចំពោះកិច្ចសហប្រតិបត្តិការដ៏ល្អរវាងកម្ពុជា-ចិននិយាយជារួម និងរវាងរដ្ឋបាលខេត្តហៃណាន ក្រុងហៃគូ រួមទាំងវិស័យឯកជនទាំងអស់ដែលបានចូលរួមយ៉ាងសកម្មក្នុងការអភិវឌ្ឍវិស័យទេសចរណ៍កម្ពុជា-ចិនប្រកបដោយផ្លែផ្កាគួរជាទីមោទនៈ។ ជាមួយនឹងការដាក់ឱ្យអនុវត្តនូវការលើកលែងទិដ្ឋាការជូនប្រជាជនចិននាខែមិថុនា ខាងមុខ និងទស្សនាកម្ពុជានារដូវកាលបៃតង ការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការធានាសុវត្ថិភាព បរិយាកាសល្អសម្រាប់ភ្ញៀវទេសចរចិន និងអន្តរជាតិ វត្តមានជើងហោះហើរ Chartered Flights ២ដងក្នុងមួយសប្តាហ៍ ពិតជាអាចបង្កលក្ខណៈងាយស្រួលដល់ការធ្វើដំណើរកំសាន្តរបស់ភ្ញៀវទេសចរចិន និងកម្ពុជាទៅវិញទៅមកផងដែរ។​ទន្ទឹមនឹងនេះ ឯកឧត្តមរដ្ឋមន្ត្រី ក៏បានស្នើឱ្យភាគីចិនជួយផ្សព្វផ្សាយពីសក្តានុពលទេសចរណ៍ និងកាលានុវត្តភាពវិនិយោគកម្ពុជាដ៏ទាក់ទាញរបស់កម្ពុជា រួមជាមួយការលើកលែងទិដ្ឋាការជូនប្រជាជនចិនពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ ខាងមុខឱ្យបានទូលំទូលាយដល់ប្រជាជននៅខេត្តហៃណាន និងតំបន់ផ្សេងៗទៀតរបស់ចិនផងដែរ។ក្នុងជំនួបប្រកបដោយផ្លែផ្កានេះ ភាគីទាំងពីរ បានពិភាក្សា និងផ្លាស់ប្តូរយោបល់ស៊ីជម្រៅលើការពង្រឹង និងពង្រីកកិច្ចសហប្រតិបត្តិការទេសចរណ៍ តាមរយៈការរៀបចំកញ្ចប់ទេសចរណ៍ពិសេស ការរៀបចំដំណើរទស្សនកិច្ចសិក្សា (FAM Trip) សម្រាប់ក្រុមហ៊ុនទេសចរណ៍ សារព័ត៌មាន និងអ្នកផលិតមាតិកាទេសចរណ៍ (Travel Influencers) ការផ្សព្វផ្សាយទេសចរណ៍រួមគ្នា ការពង្រឹងកិច្ចសហការរវាងវិស័យឯកជននៃប្រទេសទាំងពីរ និងការជំរុញលំហូរទេសចរចិនមកកម្ពុជាឱ្យកាន់តែច្រើន។សូមជម្រាបផងដែរថា រាជរដ្ឋាភិបាលកម្ពុជា បានសម្រេចផ្តល់ការលើកលែងទិដ្ឋាការសម្រាប់ប្រជាជនចិន ដែលអាចស្នាក់នៅកម្ពុជាបានរយៈពេល១៤ថ្ងៃ ចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ ដើម្បីទាក់ទាញភ្ញៀវទេសចរចិនមកកម្ពុជាកាន់តែច្រើនក្នុងរដូវកាលបៃតង។កម្មវិធីទី២ នៃដំណើរទស្សនកិច្ចការងារនៅទីក្រុងហៃគូ ខេត្តហៃណាន សាធារណរដ្ឋប្រជាមានិតចិន។ ទីក្រុងហៃគូ ថ្ងៃទី២១ ខែឧសភា ឆ្នាំ២០២៦។

(វៀតណាម)៖ ដោយសារតែបច្ចេកវិទ្យា និងបណ្ដាញសង្គមនៅលើពិភពលោកបច្ចុប្បន្នកាន់តែជឿនលឿនហើយ ជះឥទ្ធិពលអវិជ្ជមានដល់សង្គម ដែលបណ្ដាលឱ្យរឿងរ៉ាវជាច្រើនពីសទៅខ្មៅ ខ្មៅទៅជាស ល្អអាក្រក់បែងចែក និងគ្រប់គ្រងលែង និងករណីឈ្លោះជេរ បញ្ចោរគ្នាយ៉ាងណាធិបតេយ្យនោះ វៀតណាមបានបង្កើតអនុម័តច្បាប់ថ្មី ដើម្បីដាក់ទោសជនណាដែលចែករំលែកព័ត៌មាន ផ្ដេសផ្ដាស ព័ត៌មានមិនពិតលើបណ្ដាញសង្គម។ យោងតាមក្រឹត្យលេខ ១៧៤ ចាប់ពីថ្ងៃទី ១ ខែកក្កដា អ្នកប្រើប្រាស់បណ្តាញសង្គមដែលបង្ហោះព័ត៌មានមិនពិត បង្កឱ្យមានការភ័យស្លន់ស្លោអាចនឹងត្រូវពិន័យជាប្រាក់រហូតដល់ ៥០ លានដុង ស្មើនឹង១៩០០ដុល្លារអាមេរិក។អនុក្រឹត្យលេខ ១៧៤ ដែលចេញដោយរដ្ឋាភិបាលនៅថ្ងៃទី ២១ ខែឧសភា បានចែងអំពីការពិន័យរដ្ឋបាល ចំពោះការរំលោភបំពានក្នុងវិស័យសេវាប្រៃសណីយ៍ ទូរគមនាគមន៍ ប្រតិបត្តិការអេឡិចត្រូនិក បច្ចេកវិទ្យាព័ត៌មាន និងសន្តិសុខតាមអ៊ីនធឺណិត។ខ្លឹមសារជាច្រើនទាក់ទងដោយផ្ទាល់ទៅនឹងអ្នកប្រើប្រាស់ប្រព័ន្ធផ្សព្វផ្សាយសង្គម។ ជាពិសេស បុគ្គល និងអង្គការដែលផ្តល់ ឬចែករំលែកព័ត៌មានមិនពិតដែលបង្កឱ្យមានការភ័យស្លន់ស្លោជាសាធារណៈ ធ្វើឱ្យខូចខាតដល់សកម្មភាពសេដ្ឋកិច្ចសង្គម ឬរារាំងដល់ប្រតិបត្តិការរបស់ភ្នាក់ងាររដ្ឋ ឬមន្ត្រីសាធារណៈ នឹងត្រូវពិន័យជាប្រាក់ពី ៣០-៥០ លានដុង ប្រសិនបើបទល្មើសមិនតម្រូវឱ្យមានការចោទប្រកាន់ព្រហ្មទណ្ឌ។ក្រោមក្របខណ្ឌនៃការផ្តន្ទាទោសដូចគ្នានេះ គឺជាទង្វើដូចជាការផ្តល់ ឬការចែករំលែកព័ត៌មានដែលបង្ខូចប្រវត្តិសាស្ត្រ បដិសេធសមិទ្ធផលបដិវត្តន៍ ធ្វើឱ្យខូចឯកភាពជាតិ ប្រមាថសាសនា រើសអើងដោយផ្អែកលើភេទ ឬពូជសាសន៍ និងការបង្ហាញអាថ៌កំបាំងរដ្ឋ ឬភាពឯកជនផ្ទាល់ខ្លួន។ បន្ថែមពីលើការពិន័យ បុគ្គល និងអង្គការនានាត្រូវតែផ្អាកគណនី ទំព័រ ក្រុមសហគមន៍ ឬឆានែលខ្លឹមសាររបស់ពួកគេ។អនុក្រឹត្យលេខ ១៧៤ ក៏បានចែងអំពីការពិន័យជាប្រាក់ចាប់ពី ២០ លានទៅ ៣០ លានដុង ចំពោះទង្វើមួយចំនួននៃការកេងប្រវ័ញ្ចបណ្តាញសង្គម ដូចជាការផ្តល់ ឬការចែករំលែកព័ត៌មាន មិនពិត បំភ្លៃ បង្កាច់បង្ខូច ឬបរិហារកេរ្តិ៍ ដែលធ្វើឲ្យខូចកេរ្តិ៍ឈ្មោះរបស់ភ្នាក់ងារ អង្គការ ឬកិត្តិយស និងសេចក្តីថ្លៃថ្នូររបស់បុគ្គល។ខ្លឹមសារដែលលើកកម្ពស់អំពើអសីលធម៌ក្នុងសង្គម ពេស្យាចារ ការជួញដូរមនុស្ស ព័ត៌មានអាសអាភាស ឬថោកទាប ឬខ្លឹមសារដែលធ្វើឱ្យប៉ះពាល់ដល់ទំនៀមទម្លាប់ និងសីលធម៌សង្គម ប៉ះពាល់ដល់ក្រមសីលធម៌សង្គម និងសុខភាពសាធារណៈ។ ការផ្តល់ ឬការចែករំលែកព័ត៌មានដែលពិពណ៌នាយ៉ាងល្អិតល្អន់អំពីអំពើឃាតកម្ម គ្រោះថ្នាក់ ឬរូបភាពដ៏គួរឱ្យរន្ធត់ និងគួរឱ្យខ្លាចក៏ត្រូវទទួលទោសផងដែរ។ក្រឹត្យនេះក៏រឹតបន្តឹងបទប្បញ្ញត្តិលើការផ្សាយពាណិជ្ជកម្ម និងការផ្សព្វផ្សាយទំនិញ និងសេវាកម្មហាមឃាត់ ការចែករំលែករូបភាពផែនទីនៃប្រទេសវៀតណាមដែលមិនបង្ហាញ ឬពណ៌នាមិនត្រឹមត្រូវអំពីអធិបតេយ្យភាពជាតិ និងការបង្ហោះតំណភ្ជាប់ទៅកាន់ខ្លឹមសារហាមឃាត់តាមអ៊ីនធឺណិត។ការផ្តល់ ឬការចែករំលែកស្នាដៃសារព័ត៌មាន អក្សរសាស្ត្រ សិល្បៈ ឬស្នាដៃដែលបានបោះពុម្ពផ្សាយ ដោយគ្មានការយល់ព្រមពីម្ចាស់កម្មសិទ្ធិបញ្ញា ឬដោយគ្មានការអនុញ្ញាតឱ្យចរាចរក៏នឹងត្រូវពិន័យជាប្រាក់ពី 20-30 លានដុងផងដែរ។ លើសពីនេះ ម្ចាស់គណនី ម្ចាស់ឆានែលខ្លឹមសារ និងអ្នកគ្រប់គ្រងក្រុមសហគមន៍អនឡាញ ក៏នឹងត្រូវពិន័យជាប្រាក់ផងដែរ ប្រសិនបើពួកគេមិនបានទប់ស្កាត់ ឬលុបព័ត៌មានរំលោភបំពាន នៅពេលដែលអាជ្ញាធរមានសមត្ថកិច្ចស្នើសុំ។

(កម្សាន្ត)៖ នៅពីក្រោយម្ហូបចិនដែលមានជាតិខ្លាញ់មិនត្រឹមតែជាទម្លាប់ប៉ុណ្ណោះទេ ប៉ុន្តែជាលទ្ធផលនៃប្រវត្តិសាស្រ្ត បច្ចេកទេសចម្អិនអាហារ និងវប្បធម៌រីករាយ។ ម៉ឺនុយនៅភោជនីយដ្ឋានចិនជាញឹកញាប់មានមុខម្ហូបដែល "លិច និងជោគជាំ" ក្នុងប្រេង។ Shui Chu Yu ដែលជាមុខម្ហូបត្រីដែលចម្អិនក្នុងប្រេងម្ទេសពិសេស Sichuan មានចំណិតត្រីស្រស់ដែលចម្អិនក្នុងទំពាំងបាយជូរដែលពោរពេញទៅដោយប្រេង កំពូលដោយម្រេច Sichuan ស្ពឹក និងម្ទេសស្ងួត។ តៅហ៊ូ Ma Ba ក៏មានទឹកជ្រលក់ប្រេងហឹរផងដែរ។ មុខម្ហូបបន្លែសាមញ្ញដូចជា sautéed bok choy ជាមួយខ្ទឹមស ឬសណ្តែកស្ងួតចៀនក៏ជាញឹកញាប់គ្របដណ្តប់ដោយប្រេងផងដែរ។នៅក្នុងសៀវភៅ A History of Chinese Food អ្នកស្រាវជ្រាវធ្វើម្ហូប Fuchsia Dunlop ពន្យល់ថាទម្លាប់ប្រើប្រាស់ ខ្លាញ់កើតចេញពីកត្តាសេដ្ឋកិច្ចសង្គម។ មុនពេលការអភិវឌ្ឍសេដ្ឋកិច្ចនៅចុងសតវត្សទី 20 ប្រជាជនភាគច្រើន ជាពិសេសនៅជនបទប្រទេសចិន ប្រឈមមុខនឹងការខ្វះខាតស្បៀងអាហារជាញឹកញាប់។ ប្រេងបន្លែគឺជាប្រភព សំខាន់នៃកាឡូរីដែលជួយកម្មកររក្សាថាមពល។ ការប្រើប្រាស់ប្រេងត្រូវបានគេចាត់ទុកថាជានិមិត្តរូបនៃភាពពេញលេញ និងបដិសណ្ឋារកិច្ច។ នៅពេលកម្សាន្តភ្ញៀវកិត្តិយស ការបន្ថែមប្រេងយ៉ាងច្រើនទៅក្នុងម្ហូបគឺជាវិធីរបស់ម្ចាស់ផ្ទះក្នុងការ បង្ហាញភាពសប្បុរស។ទម្លាប់នេះ តាមពេលវេលា បានបង្កើតរចនាសម្ព័ន្ធនៃម៉ឺនុយបែបប្រពៃណីជាច្រើន ហើយនៅតែ មានសព្វថ្ងៃនេះ។ ខ្លាញ់ក៏ដើរតួនាទីយ៉ាងសំខាន់នៅក្នុងវិធីសាស្រ្តនៃការចៀនរហ័សជាមួយនឹងខ្ទះជ្រៅ ដែលជាធម្មតានៃផ្ទះបាយចិន។ នេះបើយោងតាម CGTN។ មេចុងភៅត្រូវរក្សាកំដៅខ្ពស់ និងដំណើរការយ៉ាងឆាប់រហ័ស និងក្នុងរយៈពេលខ្លី។ប្រេងចម្អិនជួយផ្ទេរកំដៅស្មើគ្នាទៅកាន់ ផ្ទៃអាហារទាំងមូលក្នុងរយៈពេលពីរបីសិបវិនាទី។ស្រទាប់ប្រេងជួយឱ្យគ្រឿងផ្សំចម្អិនបានលឿន ប៉ុន្តែដោយមិនបាត់បង់ ទឹក សំបកក្រៀម វាយនភាពទន់ និងសំណើម ការពារអាហារមិនឱ្យជាប់នឹងខ្ទះនៅពេលចម្អិននៅសីតុណ្ហភាពខ្ពស់។មេចុងភៅក៏ប្រើបច្ចេកទេសស្រមោលចានមុនពេលបិទចង្ក្រាន រំញោចភ្នែក និងរក្សាក្លិនគ្រឿងទេស។ ប្រេងក៏ជួយរំលាយរសជាតិគ្រឿងទេសផងដែរ។ សមាសធាតុក្លិនក្រអូប និងហឹរនៅក្នុងម្ទេស ម្រេច និងម្រេចមិនរលាយក្នុងទឹកទេ ប៉ុន្តែរលាយក្នុងប្រេង។តំបន់ជាច្រើននៅក្នុងប្រទេសចិនដូចជា Sichuan ឬ Hunan មានភាពល្បីល្បាញសម្រាប់មុខម្ហូបហឹររបស់ពួកគេ។ ប្រេងជួយរក្សាប្រេងក្រអូបពីគ្រឿងទេស។ ការស្ទង់មតិដែលចេញផ្សាយនៅក្នុងបណ្ណាល័យវេជ្ជសាស្ត្រជាតិសហរដ្ឋអាមេរិក (NIH) លើបរិមាណប្រេងនៅ ក្នុងសាលាធ្វើម្ហូបចិនធំៗចំនួន 8 បានបង្ហាញថាបរិមាណប្រេងជាមធ្យមដែលប្រើគឺ 8.1g ក្នុង 100 ក្រាមនៃគ្រឿងផ្សំ។ ទោះជាយ៉ាងណាក៏ដោយ អ្នកជំនាញចង្អុលបង្ហាញថាមានភាពខុសគ្នាធំរវាងបរិមាណប្រេងដែលប្រើដោយមេចុងភៅ និងបរិមាណប្រេងដែលដាក់ចូលទៅក្នុងរាងកាយ។ អ្នកស្រាវជ្រាវធ្វើម្ហូប Fuchsia Dunlop បាននិយាយថា ប្រជាជនចិនប្រើចង្កឹះដើម្បីយកអាហារពីចានទូទៅ។ នៅពេលជ្រើសរើស ខ្លាញ់ស្អិតភាគច្រើននឹងហូរចូលទៅក្នុងចាន ឬចានវិញ។ ខណៈពេលដែលភ្ញៀវលោកខាងលិចមានទម្លាប់ប្រើស្លាបព្រាដើម្បីស្ទុះទឹកជ្រលក់ និងប្រេងដោយ ផ្ទាល់លើអង្ករ ដែលនាំឱ្យមានការប្រើប្រាស់ជាតិខ្លាញ់ទាំងអស់នេះ។ អាហារជនជាតិដើមភាគតិច ប្រពៃណីតែងតែមានតុល្យភាព។ ក្រៅពីមុខម្ហូបចៀន ឬចៀនដែលមានប្រេងច្រើន ម៉ឺនុយក៏មានមុខម្ហូបចំហុយ ស៊ុបស្រាល បន្លែឆ្អិន និងអង្ករដើម្បីបំបាត់រសជាតិ។យោងតាមទិន្នន័យពីការស្ទង់មតិសុខភាព និងអាហារូបត្ថម្ភរបស់ប្រទេសចិន (CHNS) និងរបាយការណ៍សុខភាពសាធារណៈសម្រាប់រយៈពេល 2022-2025 ការទទួលទានប្រេងចម្អិន ជាមធ្យមប្រចាំថ្ងៃដោយមនុស្សពេញវ័យនៅក្នុងប្រទេសចិនបានថយចុះពី 43.2 ក្រាម (ក្នុងឆ្នាំ 2015) មកនៅប្រហែល 41.1 ក្រាមក្នុងរយៈពេលបីឆ្នាំចុងក្រោយនេះ។ទោះជាយ៉ាងណាក៏ដោយ តួលេខនេះនៅតែខ្ពស់ជាងកម្រិត ដែលបានណែនាំពី 25-30 ក្រាមរបស់អង្គការសុខភាពពិភពលោក (WHO)។រដ្ឋាភិបាលចិនកំពុងលើកកម្ពស់យុទ្ធនាការ "ការកាត់បន្ថយបី" ទូទាំងប្រទេស (ការកាត់បន្ថយអំបិល ការកាត់បន្ថយប្រេង ការកាត់បន្ថយជាតិស្ករ)។ ភោជនីយដ្ឋានជាច្រើននៅក្នុងទីក្រុងធំៗកំពុងផ្លាស់ប្តូរវិធីសាស្រ្តចម្អិន អាហាររបស់ពួកគេជាបណ្តើរៗ ផ្សព្វផ្សាយកាឡូរីរបស់ពួកគេ និងផ្តល់អាទិភាពដល់វិធីចម្អិន អាហារសន្សំសំចៃកាន់តែច្រើន។

(ទីក្រុងឡុង)៖ នេះគឺជាករណីមួយដ៏គួរឱ្យចាប់អារម្មណ៍នៅក្នុងប្រទេសអង់គ្លេស ដែលស្ត្រីម្នាក់ត្រូវបានកាត់ដៃរបស់នាង ចេញបន្ទាប់ពីឆ្លងមេរោគដែលបណ្ដាលមកពីសត្វមូសខាំ ស្ត្រីម្នាក់ដែលមានឈ្មោះ Tatiana Timon អាយុ 35 ឆ្នាំត្រូវកាត់ដៃរបស់នាងដោយសារ តែមូសខាំដែលបណ្តាលឱ្យមាន ជំងឺគ្រុនចាញ់អំឡុងពេលធ្វើដំណើរ ទៅកាន់ទ្វីបអាហ្វ្រិក។ បន្ទាប់ពីដំណើរកម្សាន្ត រយៈពេល 10 ថ្ងៃទៅកាន់ប្រទេសអង់ហ្គោឡា ក្នុងខែឧសភា ឆ្នាំ 2022 Timon បានត្រឡប់មកផ្ទះវិញហើយមានអារម្មណ៍ថា រាងកាយរបស់គាត់ចុះខ្សោយយ៉ាងឆាប់រហ័ស។ នាងបានទៅមន្ទីរ ពេទ្យភ្លាមៗ ហើយត្រូវបានគ្រូពេទ្យធ្វើរោគវិនិច្ឆ័យថាមានជំងឺគ្រុនចាញ់ដ៏កាចសាហាវ។ ដោយសារតែ Timon មានជំងឺ sepsis រោគសញ្ញារបស់នាងធ្ងន់ធ្ងរ ហើយវេជ្ជបណ្ឌិតត្រូវបានបង្ខំឱ្យប្រើថ្នាំសន្លប់កម្រិតធ្ងន់ ដើម្បីការពារឈាមពុលពី ការរីករាលដាល ទៅកាន់សរីរាង្គសំខាន់ៗ វេជ្ជបណ្ឌិតបានសម្រេចចិត្តកាត់ដៃរបស់ Timon ។ នេះបើតាមកាសែត The Sun។ ក្រោយនាងត្រូវបានសង្គ្រោះ និងដឹងខ្លួនឡើងវិញ ដៃទាំងសងខាងរបស់នាងក៏ត្រូវបានគ្រូពេទ្យជំនាញ កាត់ចេញបាត់ទៅហើយ ដើម្បីការពារការមេរោគរាលបន្តទៅកាន់សិរីរាង្គសំខាន់ៗផ្សេងទៀត។ បច្ចុប្បន្ន Timon កំពុងប្រើជើង និងដៃសិប្បនិម្មិត ដើម្បីឱ្យស្ថានភាពសុខភាពរបស់គាត់មិនប៉ះពាល់ ដល់ជីវិតរបស់គាត់ច្រើនពេក។ នាងតែងតែធ្វើបច្ចុប្បន្នភាពស្ថានភាពនៅលើទំព័រផ្ទាល់ខ្លួនរបស់នាង និងចែករំលែកសារវិជ្ជមាន។ Timon បាននិយាយថានាងនៅតែប្តេជ្ញាចិត្តធ្វើជាមនុស្សដែលមាន សុខភាពល្អទាំងផ្លូវចិត្តនិងរាងកាយ។ យោងតាម Timon អ្វីដែលបានកើតឡើងមានផលប៉ះពាល់យ៉ាង ខ្លាំងលើគំនិតខាងក្នុងរបស់គាត់។ យោងតាមអង្គការសុខភាពពិភពលោក (WHO) ជំងឺគ្រុនចាញ់គឺជាជំងឺគំរាមកំហែងដល់អាយុជីវិតដែលបង្កឡើងដោយប៉ារ៉ាស៊ីត ដែលឆ្លងទៅមនុស្សតាមរយៈការខាំរបស់មូស Anopheles ស្រីដែលឆ្លងមេរោគ។ ក្នុងឆ្នាំ 2021 មានករណីជំងឺគ្រុនចាញ់ប្រមាណ 247 លានករណីនៅទូទាំងពិភពលោក។នៅក្នុងតំបន់អាហ្រ្វិក ចំនួនករណីជំងឺគ្រុនចាញ់ច្រើនតែខ្ពស់ជាងនៅពិភពលោក។ ក្នុងឆ្នាំ 2021 តំបន់នេះមានចំនួនច្រើនជាង 95% នៃករណីជំងឺគ្រុនចាញ់ និង 96% នៃការស្លាប់ដោយសារជំងឺនេះ។ ប្រទេសអាហ្រ្វិកចំនួនបួនមានចំនួនជាងពាក់កណ្តាលនៃការស្លាប់ដោយជំងឺគ្រុនចាញ់ទាំងអស់នៅទូទាំងពិភពលោក៖ នីហ្សេរីយ៉ា (31.3%) កុងហ្គោ (12.6%) តង់ហ្សានី (4.1%) និងនីហ្សេរីយ៉ា (3.9%) ។ កុមារអាយុក្រោម 5 ឆ្នាំមានចំនួនប្រហែល 80% នៃការស្លាប់ទាំងអស់។រោគសញ្ញាដំបូងនៃជំងឺគ្រុនចាញ់រួមមានគ្រុនក្តៅ ឈឺក្បាល និងត្រជាក់ ដែលជាធម្មតាលេចឡើង 10-15 ថ្ងៃបន្ទាប់ពីត្រូវបានមូសឆ្លងខាំ ដែលអាចស្រាល និងពិបាកទទួលស្គាល់។