(ភ្នំពេញ)៖ ក្រុមហ៊ុន ម៉ូរៀ ដែលជាក្រុមហ៊ុននាំចូលផលិតផលថែរក្សាសម្រស់ស្តង់ដារអន្តរជាតិលេខ១មកពីប្រទេសកូរ៉េ បានប្រារព្ធពីធីអបអរសាទរខួបលើកទី៨ឆ្នាំនៃការរីកចម្រើន ភាពជោគជ័យ ការអភិវឌ្ឍជាលំដាប់របស់ក្រុមហ៊ុន និងបានប្រកាសពីទូតសុឆ្ឆន្ទៈថ្មីរបស់ក្រុមហ៊ុនគឺអ្នកនាង ឱក សុគន្ធកញ្ញា ទូតសុច្ឆន្ទៈផលិតផលម៉ូរៀលព្រីស្ទីគ និងស្វាគមន៍លោក ហ្សូ ណូ វិលត្រឡប់មកវិញម្ដងទៀតជាទូតសុច្ឆន្ទៈរបស់ម៉ូរៀ ដែលពួកគាត់ទាំង២សុទ្ធតែជាកំពូលតារាចម្រៀងលំដាប់ប្រទេសកម្ពុជា។ ពិធីអបអរសាទរខួបលើកទី៨ឆ្នាំ និងបង្ហាញទូតសុច្ឆន្ទៈថ្មីនេះ បានប្រារព្ធឡើងយ៉ាងឱឡារិក កាលពីថ្ងៃទី២០ ខែមីនា ឆ្នាំ២០២៦ នៅសណ្ឋាគារ Sun & Moon Hotel Riverside ដោយមានការចូលរួមយ៉ាងច្រើនកុះករពីភ្ញៀវកិត្តិយសរួមមាន៖ លោក Rich Kh គោប្រាក់ ជាទូតសុច្ឆន្ទៈ , អ្នកនាង ហ្វីយ៉ាតា បវរកញ្ញាចក្រវាលកម្ពុជាឆ្នាំ២០២៥ ជាទូតសុច្ឆន្ទៈ, កញ្ញា Kim Reachny , លោក គ្រីស ឌីណា , លោក ខាយ និងភរិយា មុនីនាថ ក៏ដូចជាគ្រូពេទ្យឯកទេសថែរក្សាសម្ពស្ស , តារាសិល្បៈ , Influencer និង KOL ល្បីៗជាច្រើនទៀតផងដែរ។បង្កើតឡើងនៅឆ្នាំ២០១៩ មកដល់ឆ្នាំ២០២៦នេះ ក្រុមហ៊ុន ម៉ូរៀ ទទួលបានការទទួលស្គាល់ និងការគាំទ្រកើនឡើងជាលំដាប់ពីសំណាក់អតិថិជនគ្រប់ស្រទាប់វណ្ណៈលើផលិតផលដែលមានស្តង់ដារ គុណភាពខ្ពស់​​ ជាពិសេស ម៉ូរៀ គឺមានការទទួលខុសត្រូវប្លែកពីគេត្រង់មានការធានាគុណភាព សុវត្ថិភាពពីក្រុមហ៊ុនសាំសុង ដែលជាក្រុមហ៊ុនយក្សដ៏ធំរបស់កូរ៉េ។ អ្វីដែលកាន់តែភ្ងាក់ផ្អើលជាងនេះទៅទៀតនោះ ម៉ូរៀ អាចសម្រេចបាននូវសមិទ្ធផលដ៏ល្អឯកបន្ថែមទៀតគឺការបង្កើតរោងចក្រ និងមានមន្ទីរពិសោធន៍ផ្ទាល់ខ្លួន ដើម្បីផលិតនូវម៉ាសអប់មុខប្រេនកូនខ្មែរ ដែលផលិតចេញពីវត្ថុធាតុផ្សំធម្មជាតិសុទ្ធសាធដោយប្រើប្រាស់ផលិតផលក្នុងស្រុក ដែលអាចបង្កើតឱកាសការងារ និងលើកស្ទួយសេដ្ឋកិច្ចរបស់ប្រជាពលរដ្ឋខ្មែរថែមមួយកម្រិតទៀត។គិតមកដល់បច្ចុប្បន្ននេះ ក្រុមហ៊ុន ម៉ូរៀ មានផលិតផលថែរក្សាសម្រស់ជាច្រើនប្រភេទសម្រាប់ស្ត្រី បុរសសរុបចំនួនជាង១០មុខរួចទៅហើយ ផលិផលទាំងអស់របស់ ម៉ូរៀ ជាផលិតផលរបស់កូរ៉េ ផលិតវេចខ្ចប់នៅប្រទេសកូរ៉េ និងជាផលិតផលដែលគិតលើគុណភាព និងសុវត្ថិភាពអ្នកប្រើប្រាស់ជាចម្បង ដោយគ្រប់ផលិតផលរបស់ម៉ូរៀ គឺមានការធានាច្បាស់លាស់ពីក្រុមហ៊ុនសាំសុង ហើយសម្រាប់ផលិតផលម៉ូរៀមានលក់ទៅទូទាំងសកលលោកផងដែរ៕ 

(ភ្នំពេញ)៖ បងប្អូនកម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងការបូបសប្បាយចិត្ត និងអរគុណរដ្ឋាភិបាល ដែលជួយឱ្យមានការផ្តល់ប្រាក់សោហ៊ុយធ្វើដំណើរបណ្តោះអាសន្ន ២,៥០ ដុល្លារអាម៉េរិកក្នុងមួយខែបន្ថែមលើប្រាក់សោហ៊ុយធ្វើដំណើរ និងស្នាក់នៅដែលសហគ្រាស ក្រុមហ៊ុន រោងចក្រកំពុងអនុវត្ត។អ្នកស្រី មន ធីតា កម្មការិនីរោងចក្រ សេឌូណូ នៅខណ្ឌដង្កោ រាជធានីភ្នំពេញ បានឱ្យដឹងនៅថ្ងៃទី២១ ខែមីនាថា ការផ្តល់ប្រាក់ឧបត្ថម្ភនេះមានសារៈសំខាន់ណាស់សម្រាប់ជីវភាព របស់កម្មករនិយោជិតត្បិតចំនួនទឹកប្រាក់មិនច្រើន តែតួលេខនេះអាចទទួលយកបាន ហើយវានឹងក្លាយជាចំណូលប្រចាំខែថ្មីបន្ថែមទៀត សម្រាប់ផ្គត់ផ្គង់គ្រួសាររបស់ខ្លួនបន្ថែមពីលើអត្ថប្រយោជន៍ផ្សេងៗទៀតដែលកំពុងទទួលបានស្រាប់។អ្នកស្រីនិយាយថា៖«ខ្ញុំមានអារម្មណ៍ថាសប្បាយចិត្ត និយាយទៅពេលបានជួយលុយន្ថែមចឹងទៅ យើងវាបានជួយកាត់បន្ថយថ្លៃចំណាយ ព្រោះឥឡូវសាំងថ្លៃ អីៗឡើងថ្លៃ ពេលបានអាហ្នឹងមកថែមទៀតនិយាយទៅថ្លៃចំណាយរបស់យើងមិនសូវពិបាក។ ទោះមានការលំបាកប្រទេសជាតិយ៉ាងណាក៏ដោយ រដ្ឋាភិបាលគាត់អត់ដែលភ្លេចកម្មករ និងប្រជាជនទេ» ។ ស្រដៀងគ្នានេះ អ្នកស្រី ឈា ផល្លា កម្មការិនីរោងចក្រ សេឌូណូ ម្នាក់ទៀត ប្រាប់ថា៖«លឺដំណឹងថាអ៊ីចឹង គឺសប្បាយចិត្ត ហើយត្រេកអរចំពោះរាជរដ្ឋាភិបាល ក៏ដូចជាថៅកែដែលគាត់មានទឹកចិត្តជួយកម្មករកម្មការិនីទាំងអស់ ទោះបីស្ថិតក្នុងស្ថានភាពពិបាកដែលប្រេងសាំងឡើងថ្លៃក៏ដោយ»។ ចំណែកកម្មការិនីម្នាក់ទៀតគឺ អ្នកស្រី ចិត្ត លីណា មើលឃើញថា ការផ្តល់ប្រាក់សោហ៊ុយនេះ នឹងក្លាយជាបង្អែកថ្មីមួយទៀតសម្រាប់កម្មករនិយោជិត ហើយវានឹងចូលរួមចំណែកយ៉ាងសំខាន់ក្នុងជីវភាពប្រចាំថ្ងៃរបស់ បងប្អូនកម្មករនិយោជិតនៅកម្ពុជា។អ្នកស្រីលើកឡើងថា៖«មានអារម្មណ៍រំភើបសប្បាយរីករាយ ពីព្រោះការផ្តល់ប្រាក់សោហ៊ុយនេះនឹងជួយកាត់បន្ថយការចំណាយរបស់កម្មករទាំងអស់គ្នា សារៈសំខាន់សម្រាប់ខ្ញុំជួយកាត់បន្ថយចំណាយរបស់ខ្ញុំ ការធ្វើដំណើរ ថ្លៃផ្ទះជួល»។ គួរបញ្ជាក់ថា ក្រោយមានអនុសាសន៍ណែនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីថ្ងៃទី១៩ ខែមីនា ក្រុមប្រឹក្សាជាតិប្រាក់ឈ្នួលអប្បបរមាបានបើកកិច្ចប្រជុំបន្ទាន់នៅថ្ងៃទី២០ ខែមីនា ឆ្នាំ២០២៦ ដោយអង្គប្រជុំបានឯកភាពផ្តល់ប្រាក់សោហ៊ុយធ្វើដំណើរបណ្តោះអាសន្នចំនួន ២,៥០ ដុល្លារអាម៉េរិកក្នុងមួយខែ ចាប់ពីថ្ងៃទី១ ខែមេសា ឆ្នាំ២០២៦ បន្ថែមលើប្រាក់សោហ៊ុយធ្វើដំណើរនិងស្នាក់នៅ ដែលក្រុមហ៊ុន រោងចក្រ សហគ្រាសកំពុងអនុវត្ត រហូតដល់ស្ថានភាពតម្លៃប្រែងឥន្ទនៈ វិលមករកភាពប្រក្រតីវិញ៕

(ភ្នំពេញ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនឯកឧត្តម Kim Chang Yong ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋកូរ៉េប្រចាំកម្ពុជា និងសហការី ចូលជួបសម្តែងការគួរសម និងពិភាក្សាការងារលើការពង្រឹង និងពង្រីកកិច្ចសហប្រតិបត្តិការក្នុងវិស័យទេសចរណ៍នៃប្រទេសទាំងពីរឱ្យកាន់តែស៊ីជម្រៅបន្ថែមទៀត នៅទីស្តីការក្រសួងទេសចរណ៍។ក្នុងជំនួបដ៏មានសារៈសំខាន់ និងប្រកបដោយផ្លែផ្កានេះ ឯកឧត្តមរដ្ឋមន្ត្រី បានកោតសរសើរ វាយតម្លៃខ្ពស់ និងថ្លែងអំណរដល់ប្រជាជន រដ្ឋាភិបាល និងស្ថានទូតសាធារណរដ្ឋកូរ៉េដែលតែងតែជួយឧបត្តម្ភជ្រោមជ្រែង និងផ្តល់កិច្ចសហការដ៏ល្អដល់ប្រទេសកម្ពុជា និងរាជរដ្ឋាភិបាលកម្ពុជា ពិសេសលើជំនូយអភិវឌ្ឍន៍ដ៏ច្រើន និងការទទួលយកពលករខ្មែររាប់ម៉ឺននាក់ទៅធ្វើការនៅប្រទេសកូរ៉េ។ ទន្ទឹមនឹងនេះដែរ ឯកឧត្តមជម្រាបជូនឯកឧត្តមឯកអគ្គរដ្ឋទូតពីសភាពការណ៍ នយោបាយ សេដ្ឋកិច្ច សង្គម និងទេសចរណ៍របស់កម្ពុជារួមទាំងចំនួនភ្ញៀវទេសចរ និងវិនិយោគិនកូរ៉េនៅកម្ពុជា ជាពិសេសបានជម្រាបជូនពីយុទ្ធនាការដ៏ម៉ឺងម៉ាត់បង្រ្កាប និងលុបបំបាត់ឧក្រិដ្ឋកម្មឆបោកអនឡាញ ដែលបានដាក់ចេញដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ព្រមទាំងការអ​នុម័តនូវសេចក្តីព្រាងច្បាប់ប្រឆាំងនឹងឧក្រិដ្ឋកម្មអនឡាញដោយគណៈរដ្ឋមន្រ្តីរួចហើយ។ជាកិច្ចឆ្លើយតប ឯកឧត្តមឯកអគ្គរដ្ឋទូត បានកោតសរសើរ និងវាយតម្លៃខ្ពស់អំពីកិច្ចខិតខំប្រឹងប្រែង និងការបេ្តជ្ញាចិត្តរបស់កម្ពុជាដែលបានសហការជាមួយស្ថាប័នកូរ៉េធ្វើការបង្រ្កាបឧក្រិដ្ឋកម្មអនឡាញបានយ៉ាងឆាប់រហ័ស និងប្រកបដោយផ្លែផ្កាលើសពីការរំពឹងទុក។ ឯកឧត្តមឯកអគ្គរដ្ឋទូត ក៏បានជម្រាបជូនពីការកត់សំគាល់ខ្ពស់របស់ស្ថានទូតលើច្បាប់ប្រឆាំងឧក្រិដ្ឋកម្មអនឡាញដែលជាការគិតគូរដ៏ម៉ត់ចត់របស់កម្ពុជា។ បន្ថែមពីលើនេះ​ ឯកឧត្តមរដ្ឋមន្រ្តី និងឯកឧត្តមឯកអគ្គរដ្ឋទូត បានពិភាក្សាផ្លាស់ប្តូរទស្សនៈស៊ីជំរៅលើកិច្ចសហប្រតិបត្តិការផ្សព្វផ្សាយ និងជំរុញវិស័យទេសចរណ៍នៃប្រទេសទាំងពីរ ជាពិសេសផ្តោតលើការជំរុញតភា្ជប់ជើងហោះហើរត្រង់រវាងទីក្រុងធំ៍ៗ របស់កូរ៉េមកខេត្តសៀមរាបជាប្រចាំឡើងវិញ។ ឯកឧត្តមឯកអគ្គរដ្ឋទូតក៏បានផ្តល់នូវគំនិតដ៏ល្អថ្មីបន្ថែមលើការរៀបចំកញ្ចប់ទស្សនកិច្ចដែលមានការ ច្នៃប្រឌិតខ្ពស់សម្រាប់ទាក់ទាញភ្ញៀវទេសចរកូរ៉េ ព្រមទាំងកិច្ចសហប្រតិបត្តិការទេសចរណ៍ថ្មីៗ បន្ថែមទៀត ដើម្បីបង្កើនកំណើនភ្ញៀវទេសចរ និងធុរជនររវាងប្រទេសទាំងពីរ។ 

(ភ្នំពេញ)៖ ក្រោយកិច្ចប្រជុំបន្ទាន់របស់ក្រុមប្រឹក្សាជាតិប្រាក់ឈ្នួលអប្បបរមា នៅល្ងាចថ្ងៃទី២០ ខែមីនានេះ សហជីពគ្រប់និន្នាការនៅកម្ពុជាបង្ហាញការពេញចិត្តនិងគាំទ្ររាជរដ្ឋាភិបាលដែលបានយកចិត្តទុកដាក់ក្នុងការជួយដល់បងប្អូនកម្មករនិយោជិតក្នុងស្ថានភាពប្រេងឥន្ទនៈឡើងថ្លៃ ដោយបានជួយកាត់បន្ថយសម្ពាធចំណាយប្រចាំថ្ងៃបានទាន់ពេលវេលា។ លោក ស្រី យ៉ាង សោភ័ណ្ឌ ប្រធានសហព័ន្ធសហជីពកម្ពុជា សប្បាយចិត្តនៅពេលឃើញមានការយកចិត្តទុកដាក់ពីសំណាក់របស់រាជរដ្ឋាភិបាល ក្នុងការជួយសម្រាលទុក្ខលំបាកដល់កម្មករនិយោជិត តាមរយៈការចេញបទបញ្ជាឱ្យមានកិច្ចប្រជុំបន្ទាន់ជាមួយភាគីពាក់ព័ន្ធដើម្បីស្វែងរកលទ្ធភាពជួយសម្រាលបន្ទុកចំណាយថ្លៃធ្វើដំណើររបស់បងប្អូនកម្មករនិយោជិតកម្មករនិយោជិត។លោកស្រីថ្លែងថា៖«ខ្ញុំគាំទ្រចំពោះការសម្រេចឱ្យមានការដំឡើងសោហ៊ុយធ្វើដំណើរសម្រាប់ប្អូនកម្មករនិយោជិតនៅក្នុងបរិបទដែលយើងកំពុងតែប្រឈម វាជួយរួមចំណែកជួយដល់កម្មករនិយោជិតនៅពេលដែលពួកគាត់កំពុងប្រឈមបញ្ហាសេដ្ឋកិច្ចគ្រួសាររបស់ពួកគាត់»។  លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ មើលឃើញថា ខ្ញុំមើលឃើញថា ទាំងភាគីរដ្ឋាភិបាល ក្រសួងការងារ និងបណ្តុះបណ្តាលវិជ្ជាជីវៈ ក៏ដូចជាភាគីនិយោជកសុទ្ធតែបានបង្ហាញពីការយកចិត្តទុកដាក់ក្នុងការឆ្លើយតបចំពោះស្ថានការប្រេងឡើងថ្លៃនេះ ជាពិសេស ក្នុងស្ថានភាពនេះភាគីនិយោជកបានរួមចំណែកបន្ថែមការចំណាយរបស់ខ្លួនទាំងដែលខ្លួនក៏កំពុងតែរងផលប៉ះពាល់ដូចគ្នាដែរ។ លោកថា ភាគីនិយោជកពិតជាបានដើរតួនាទីសំខាន់ក្នុងការឆ្លើយតបដោយសម្រេចបន្ថែមថ្លៃធ្វើដំណើរចំនួន ២,៥០ ដុល្លារបណ្តោះអាសន្នក្នុងស្ថានភាពវិបត្តិប្រេងកំពុងឡើងថ្លៃ។ លោកថ្លែងថា៖«ក្នុងស្ថានភាពដែលគាត់កំពុងតែលំបាកហើយ គាត់បែជា ងាកមកបន្ថែមប្រាក់ឧបត្ថម្ភបណ្តោះអាសន្នបន្ថែមទៀតទៅដល់ បងប្អូនកម្មករដូចច្នេះ ចំណុចនេះដែលជារឿងមួយពិសេស ដែលខ្ញុំមើលឃើញថាជាការឆ្លើយតបមួយដ៏ល្អបំផុតសម្រាប់ខ្មែរយើង»។ គួរបញ្ជាក់ថា ក្រោយពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាថ្ងៃទី១៩ ខែមីនា ឆ្នាំ២០២៦នេះ បានណែនាំដល់ ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បើកកិច្ចប្រជុំពិភាក្សាជាបន្ទាន់ជាមួយភាគីពាក់ព័ន្ធដើម្បីស្វែងរកលទ្ធភាពជួយសម្រាលបន្ទុកចំណាយថ្លៃធ្វើដំណើររបស់បងប្អូនកម្មករនិយោជិតកម្មករនិយោជិត ជាលទ្ធផល អង្គប្រជុំបានឯកភាពផ្តល់ប្រាក់សោហ៊ុយធ្វើដំណើរបណ្តោះអាសន្នចំនួន ២,៥០ ដុល្លារសហរដ្ឋអាម៉េរិក៕

(សុខភាព)៖ ការរំលាយអាហារមិនបានល្អ ហើមពោះជាប់រហូត មានអារម្មណ៍ឆ្អែតបន្ទាប់ពីញ៉ាំអាហារស្រាលៗ និងភាពមិនស្រួលនៅផ្នែកខាងលើខាងស្តាំនៃពោះ អាចជាសញ្ញានៃជំងឺថ្លើមខ្លាញ់។ រោគសញ្ញារំលាយអាហារមួយចំនួន ច្រើនតែបណ្តាលមកពីអាហារ ភាពតានតឹង ឬអាស៊ីតក្រពះ។ ប៉ុន្តែចំពោះមនុស្សមួយចំនួន បញ្ហានេះមានប្រភពមកពីថ្លើម មិនមែនក្រពះទេ។ ជំងឺខ្លាញ់រុំថ្លើម ជាពិសេសនៅដំណាក់កាលដំបូង កម្របង្កឱ្យមានការឈឺចាប់ខ្លាំង ឬរោគសញ្ញាជាក់ស្តែងណាស់ ដែលជារឿយៗបង្ហាញរោគសញ្ញាស្រាលៗ ងាយនឹងមើលរំលង។ ខាងក្រោមនេះ គឺជារោគសញ្ញាចំនួនបួននៃជំងឺខ្លាញ់រុំថ្លើម ដែលត្រូវបានគេយល់ច្រឡំថាជាបញ្ហារំលាយអាហារទូទៅ។មានអារម្មណ៍ឆ្អែត និងហើមពោះ សូម្បីតែបន្ទាប់ពីញ៉ាំអាហារបានតិចតួចក៏ដោយ។ នេះបើតាមកាសែត Time Of India។ ១/ អ្នកដែលមាន ជំងឺខ្លាញ់រុំថ្លើម អាចមានអារម្មណ៍ឆ្អែត និងហើមពោះ សូម្បីតែបន្ទាប់ពីញ៉ាំអាហារស្រាលៗក៏ដោយ។ ថ្លើមមានទីតាំងនៅផ្នែកខាងស្តាំនៃពោះផ្នែកខាងលើ។ នៅពេលដែលថ្លើមប្រមូលផ្តុំជាតិខ្លាញ់ និងរីកធំ វានឹងបង្ហាប់សរីរាង្គជុំវិញ ដែលបណ្តាលឱ្យមានអារម្មណ៍ធ្ងន់ ឬតឹង ជាពិសេសនៅពេលល្ងាច ទោះបីជាមិនមានការហើមពោះគួរឱ្យកត់សម្គាល់ក៏ដោយ។២/ ភាពមិនស្រួលនៅក្នុងតំបន់ពោះខាងស្តាំខាងលើ៖ មិនដូចការឈឺពោះធម្មតាទេ ដែលជាធម្មតាកើតឡើងជាដំណាក់កាលៗ និងនៅចំកណ្តាលពោះ ជំងឺខ្លាញ់រុំថ្លើមបណ្តាលឱ្យមានអារម្មណ៍ស្រវាំង ឬឈឺចាប់នៅផ្នែកខាងស្តាំខាងលើ ខាងក្រោមឆ្អឹងជំនីរ។ រោគសញ្ញានេះជួនកាលស្រដៀងនឹងការហើមពោះ ឬភាពតានតឹងសាច់ដុំ។ ភាពមិនស្រួលនេះច្រើនតែកាន់តែអាក្រក់ទៅៗបន្ទាប់ពីញ៉ាំអាហារដែលមានជាតិខ្លាញ់ ឬអង្គុយយូរ។ ដោយសារតែរោគសញ្ញាមិនធ្ងន់ធ្ងរ អ្នកជំងឺអាចមើលរំលងវា ដែលនាំឱ្យមានការធ្វើរោគវិនិច្ឆ័យយឺត និងការព្យាបាលទាន់ពេលវេលា។៣/ ចង្អោរស្រាលៗ៖ ការចង្អោរស្រាលៗ ជាពិសេសនៅពេលព្រឹក ឬបន្ទាប់ពីញ៉ាំអាហារដែលមានជាតិខ្លាញ់ ជារឿយៗត្រូវបានគេយល់ច្រឡំថាជា ជំងឺច្រាលក្រពះពោះវៀន ឬការគេងមិនលក់។ ចំពោះអ្នកដែលមានជំងឺថ្លើមខ្លាញ់ រោគសញ្ញានេះជាធម្មតាមិនធ្ងន់ធ្ងរ និងជាប់លាប់ ប៉ុន្តែកម្រនាំឱ្យក្អួតណាស់ ដែលធ្វើឱ្យវាងាយស្រួលសម្រាប់ អ្នកជំងឺក្នុងការមើលរំលង។ ថ្លើមទទួលខុសត្រូវចំពោះការច្រោះជាតិពុល និងដំណើរការសារធាតុចិញ្ចឹម។ នៅពេលដែលជាតិខ្លាញ់ប្រមូលផ្តុំនៅក្នុងថ្លើម មុខងារនេះចុះខ្សោយ ហើយរាងកាយមានប្រតិកម្មជាមួយនឹងការចង្អោរស្រាល។ រោគសញ្ញាអាចកើតឡើងហើយបាត់ទៅវិញ ដែលនាំឱ្យមានការពន្យារពេលក្នុងការធ្វើរោគវិនិច្ឆ័យ និងការព្យាបាលដំបូង។៤/ ឈឺពោះធ្ងន់ធ្ងរអមដោយអស់កម្លាំង៖ ការឈឺពោះ សាមញ្ញ គឺជារឿងធម្មតា ហើយជាធម្មតាគ្មានគ្រោះថ្នាក់ទេ ប៉ុន្តែនៅពេលដែលអមដោយភាពអស់កម្លាំងជាប់លាប់ វាអាចជាសញ្ញានៃជំងឺថ្លើមខ្លាញ់។ អ្នកជំងឺច្រើនតែជួបប្រទះ នឹងភាពអស់កម្លាំងដែលមិនអាចពន្យល់បាន រួមជាមួយនឹងរោគសញ្ញារំលាយអាហារស្រាលៗដូចជាហើមពោះ មានអារម្មណ៍ឆ្អែតក្នុងក្រពះ ឬចង្អោរ ដែលធ្វើឱ្យសញ្ញាទាំងនេះងាយនឹងមើលរំលង។ ថ្លើមទទួលខុសត្រូវក្នុង ការច្រោះជាតិពុល និងដំណើរការសារធាតុចិញ្ចឹម។ នៅពេលដែលថ្លើមប្រមូលផ្តុំជាតិខ្លាញ់ ហើយស្ថិតនៅក្រោមសម្ពាធ រាងកាយនឹងចំណាយថាមពលកាន់តែច្រើនដើម្បីរក្សាមុខងារមេតាបូលីស និងបន្សាបជាតិពុល ដែលនាំឱ្យមានកា រថយចុះថាមពលសម្រាប់សកម្មភាពប្រចាំថ្ងៃ និងអស់កម្លាំងជាប់លាប់ ដែលមិនប្រសើរឡើងសូម្បីតែ ពេលសម្រាកក៏ដោយ។ រោគសញ្ញារំលាយអាហារដូចជាហើមពោះ ឬចង្អោរ គឺជាសញ្ញាដែលអ្នកជំងឺគួរតែពិនិត្យថ្លើមឱ្យបានឆាប់៕

(វ៉ាស៊ីនតោន)៖ សហរដ្ឋអាមេរិកបានចេញការព្រមានជាបន្ទាន់មួយ ដោយជំរុញឱ្យអ្នកប្រើប្រាស់ឈប់ប្រើប្រាស់ផលិត ផលអាហារបំប៉នរាប់សិបម៉ាកដែលលក់នៅលើ Amazon និង eBay ជាបន្ទាន់ ព្រោះវាមានផ្ទុកឱសថដែលអាចបង្កគ្រោះថ្នាក់ដល់ជីវិត។នៅក្នុងការធ្វើបច្ចុប្បន្នភាពចុងក្រោយរបស់ខ្លួននៅថ្ងៃទី១១ ខែមីនា ឆ្នាំ២០២៦ រដ្ឋបាលចំណីអាហារ និងឱសថសហរដ្ឋអាមេរិក (FDA) បានដាក់ឈ្មោះផលិតផលចំនួន ២៨ ថាមានជាតិពុលខ្ពស់បំផុត។ ការវិភាគបានបង្ហាញថា ក្រុមហ៊ុនផលិតបានក្លែងបន្លំគ្រឿងផ្សំដោយប្រើដើមអូលេនឌើរ (Thevetia peruviana) ជំនួសឱ្យឫស tejocote ឬគ្រាប់ប្រេស៊ីលដូចដែលបានបង្ហាញនៅលើវេចខ្ចប់។ មិនដូចឫស tejocote ឬគ្រាប់ប្រេស៊ីលដែលផ្តល់វីតាមីន C សារធាតុប្រឆាំងអុកស៊ីតកម្ម និងជួយក្នុងការសម្រកទម្ងន់ ដើមអូលេនឌើរ គឺជារុក្ខជាតិដែលមានជាតិពុលខ្ពស់ដែលមានដើមកំណើតនៅប្រទេសម៉ិកស៊ិក និងអាមេរិកកណ្តាល។ នេះបើយោងតាមការចុះផ្សាយរបស់ New York Post។ បញ្ជីអាហារបំប៉នដែលមានផ្ទុកជាតិពុលគិតត្រឹមថ្ងៃទី ១១ ខែមីនា។ អាជ្ញាធរសុខាភិបាលព្រមានថា ជាតិពុលនៃដើមអូលេនឌើរអាចបង្កគ្រោះថ្នាក់យ៉ាងធ្ងន់ធ្ងរ ដែលបណ្តាលឱ្យមានផលវិបាកធ្ងន់ធ្ងរដល់ ប្រព័ន្ធសរសៃប្រសាទ រំលាយអាហារ និងសរសៃឈាមបេះដូង។ អ្នកដែលពុលច្រើនតែបង្ហាញរោគសញ្ញាដូចជា ឈឺពោះ វង្វេងស្មារតី ក្អួត រាគ និងគ្រោះថ្នាក់បំផុតគឺគាំងបេះដូងភ្លាមៗ។បច្ចុប្បន្ននេះ អ្នកប្រើប្រាស់នៅតែអាចរកឃើញអាហារបំប៉នជាច្រើនដែលត្រូវបានដាក់ក្នុងបញ្ជីខ្មៅ នៅលើវេទិកាពាណិជ្ជកម្មអេឡិចត្រូនិកសំខាន់ៗដូចជា Amazon, eBay និង Etsy។ ក្រុមហ៊ុនមួយចំនួនបានប្រមូលទំនិញមកវិញយ៉ាងសកម្ម ប៉ុន្តែអ្នកចែកចាយជាច្រើនទៀតនៅតែបន្តមិន អើពើនឹងការព្រមាន។ អង្គការ FDA បានចាប់ផ្តើមការស៊ើបអង្កេតទ្រង់ទ្រាយធំជាផ្លូវការនៅក្នុងខែកញ្ញា ឆ្នាំ២០២៣ មិនយូរប៉ុន្មានបន្ទាប់ពីមជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក (CDC) បានលាតត្រដាងគ្រឿងផ្សំពិតនៃអាហារបំប៉នដែលមានស្លាកថាមានឬស tejocote។ អ្នកជំនាញផ្នែកវេជ្ជសាស្ត្របានជំរុញជាបន្ទាន់ដល់អ្នកដែលបានប្រើប្រាស់ផលិតផលទាំងនេះដោយអចេតនាឱ្យទាក់ទងវេជ្ជបណ្ឌិតសម្រាប់ការវាយតម្លៃសុខភាព។ ប្រសិនបើមានប្រតិកម្មមិនប្រក្រតីណាមួយកើតឡើង មនុស្សគួរតែទូរស័ព្ទទៅសេវាសង្គ្រោះបន្ទាន់ ឬទៅមជ្ឈមណ្ឌលត្រួតពិនិត្យថ្នាំពុលជាបន្ទាន់ ហើយបោះចោលផលិតផលដែលនៅសល់ដោយខ្លួនឯង៕

(ព្យុងយ៉ាង)៖ គីម ជូអេ ដែលជាកូនស្រីមេដឹកនាំកូរ៉េខាងជើងដែលបានកើតក្នុងសម័យ Gen Z ជំនាន់ចុងក្រោយ ប៉ុន្តែជីវិតរបស់នាងហាក់មិនដូចយុវជន ឬយុវនារីសម័យ Gen Z ផ្សេងៗនោះឡើយ នាងតែងតែត្រូវបានឃើញបង្ហាញខ្លួននៅក្បែរឪពុកគឺលោក គីម ជុង អ៊ុន មេដឹកនាំកូរ៉េងខាងជើងជានិច្ច នៅពេលមានជំនួបកាទូតជាមួយឥស្សរជនជាន់ខ្ពស់ និងអ្នកនយោបាយ ជាពិសេសគេតែងឃើញនាងដើរកាន់ដៃឪពុក ចុះទៅពិនិត្យរោងចក្រផលិតសព្វាវុធ និងរោងចក្រផលិតអាវុធនុយក្លេអ៊ែររបស់ប្រទេសកូរ៉េខាងជើងជាមួយគ្នាផងដែរ។ ក្នុងវ័យ១៤ឆ្នាំក្មេងៗជាច្រើនដឹងតែពីទៅសាលាខំរៀនសូត្រ មិនស្គាល់ទេអាវុធ ការងារកាទូត និងកិច្ចការនយោបាយនានាឡើយ ប៉ុន្តែកូនស្រីមេដឹកនាំកូរ៉េខាងជើងរូបនេះផ្ទុយស្រលះ ក្រៅពីការរៀនសូត្រ នាងក៏ត្រូវផ្សាំខ្លួនឯងជាមួយកិច្ចការប្រទេសជាតិ ដោយការអមដំណើរជាមួយឪពុកចូលរួមក្នុងពិធីជប់លៀងធំៗជាបន្តបន្ទាប់នាពេលថ្មីៗនេះ រួមទាំងក្បួនដង្ហែយោធាដែលជាដំណាក់កាលបិទនៃសមាជបក្សដ៏សំខាន់របស់កូរ៉េខាងជើង។ មួយរយៈចុងក្រោយនេះសាធារណៈជនជាតិ និងអន្តរជាតិ ចាប់អារម្មណ៍ពីសកម្មភាពនានារបស់ គីម ជូ អេ ជាខ្លាំងដូចជាការបាញ់សាកល្បងកាំភ្លើងដែលរោងចក្រឪពុកខ្លួនផលិតបានរួមមាន កាំភ្លើងខ្លីសេរីថ្មី និងកាំភ្លើង Snapper ជាដើម ។ នេះបើយោងតាមកាសែត KCNA។ តាមរយៈរូបជាច្រើនសន្លឹកដែលបានបង្ហាញនៅទីលានបាញ់កាំភ្លើងក្រៅផ្ទះ គីម ជូអេ មើលទៅជាក្មេងស្រីពោរពេញដោយអំណាច និងភាពក្លាហាន ស្មឹងស្មាតដៃកាន់កាំភ្លើង ភ្នែកសម្លឹងមើលយ៉ាងម៉ត់ចត់តម្រង់បាញ់ឱ្យចំគោលដៅ។ អ្វីដែលគេសង្កេតឃើញមួយទៀត គឺនាងតែងស្លៀកសម្លៀកបំពាក់ ដូចជាអាវស្បែក ដែលជាសម្លៀកបំពាក់ដែលកូនស្រី និងឪពុកទាំងពីរនាក់ តែងតែពាក់នៅក្នុងព្រឹត្តិការណ៍នយោបាយសំខាន់ៗ ដែលជានិមិត្តរូបនៃអំណាច និងភាពស្របច្បាប់នៃអំណាចខ្លួន។ នាថ្ងៃទី២០ ខែមីនានេះ ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍ថា កូរ៉េខាងជើងបានចេញផ្សាយរូបថតរបស់គីម ជូអេ កូនស្រីរបស់លោកគីម ជុងអ៊ុន កំពុងបើកបររថក្រោះចម្បាំងម៉ូដែលថ្មី ខណៈពេលកំពុងត្រួតពិនិត្យសមយុទ្ធយោធាមួយ។ សមយុទ្ធនេះត្រូវបានធ្វើឡើងនៅថ្ងៃទី១៩ ខែមីនា នៅមូលដ្ឋានហ្វឹកហ្វឺនលេខ៦០ ក្នុងទីក្រុងព្យុងយ៉ាង ដែលមានការចូលរួមពីកងវរសេនាធំថ្មើរជើងមេកានិច អង្គភាពពាសដែកសំខាន់នៃកងកម្លាំងបម្រុងនៃអគ្គសេនាធិការកងទ័ពកូរ៉េខាងជើង និងអង្គភាពកងកម្លាំងពិសេស។ រូបភាពបានបង្ហាញថា គីម ជូអេ អង្គុយនៅកៅអីអ្នកបើកបរនៃរថក្រោះចម្បាំងជំនាន់ថ្មីរបស់កូរ៉េខាងជើង ខណៈដែលលោក គីម ជុងអ៊ុន និងមេបញ្ជាការយោធាអង្គុយជុំវិញប៉ម។ទីភ្នាក់ងារចារកម្មកូរ៉េខាងត្បូងបាននិយាយ ថា ទីក្រុងព្យុងយ៉ាងហាក់ដូចជាបានចាប់ផ្តើមហ្វឹកហ្វឺន គីម ជូអេ ដែលទំនងជាអ្នកស្នងតំណែងរបស់មេដឹកនាំគីម ។ បើមើលលើសមត្ថភាពរបស់យុវតី គីម ជូអេ ក្នុងការគ្រប់គ្រង និងបាញ់អាវុធ ក្នុងរូបថតទាំងនោះបានបង្ហាញថានាងពិតជាកំពុងទទួលបានការបណ្តុះ បណ្តាលជាអ្នកស្នងតំណែងជំនួសឪពុករបស់នាងជាមេដឹកនាំរដ្ឋ។ នេះបើតាមការឱ្យដឹងរបស់ លោក Yang Moo-jin អតីតប្រធានសាកលវិទ្យាល័យសិក្សាកូរ៉េខាងជើងនៅទីក្រុងសេអ៊ូលថ្លែងប្រាប់ AFP។ ទោះជាយ៉ាងណា យុវតី គីម ជូអេ ត្រូវបានគេមើលឃើញជាយូរមកហើយថា នឹងក្លាយជាអ្នកបន្ទាប់ដើម្បីគ្រប់គ្រងរដ្ឋដ៏ឯកោ និងប្រដាប់អាវុធនុយក្លេអ៊ែរមួយនេះ៕

(ភ្នំពេញ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូន ឧកញ៉ាបណ្ឌិត ណាង សុធី ប្រធានក្រុមប្រឹក្សាក្រុមហ៊ុន THY HOLDING CO., LTD និងសហការី ចូលជួបពិភាក្សាការងារលើគម្រោងរៀបចំវត្ថុអនុស្សាវរីយ៍ប្រណិតដែលកែច្នៃឡើងពីខ្លឹមចន្ទន៍ក្រស្នា ដើម្បីធ្វើជាគ្រឿងក្រអូប គ្រឿងកែសម្រស់ សម្រាប់លក់ជូនភ្ញៀវទេសចរអារ៉ាប់។ ឧកញ៉ាបណ្ឌិត ប្រធានក្រុមប្រឹក្សាក្រុមហ៊ុន THY HOLDING CO., LTD បានជម្រាបឯកឧត្តមរដ្ឋមន្រ្តីពីផែនការរបស់ក្រុមហ៊ុនដោយក្រុមហ៊ុនគ្រោងនឹងរៀបចំកែច្នៃខ្លឹមចន្ទន៍ក្រស្នាឱ្យទៅជាវត្ថុអនុស្សាវរីយ៍ដ៏ប្រណិតសម្រាប់ភ្ញៀវទេសចរ និងគ្រោងបើកជាហាងលក់វត្ថុអនុស្សាវរីយ៍ប្រណិតដែលកែច្នៃពីខ្លឹមចន្ទន៍ក្រស្នា នៅក្នុងប្រទេសកម្ពុជា ព្រមទាំងគ្រោងរៀបចំទៅជាកសិ-ទេសចរណ៍ នាពេលខាងមុខ។ជាការឆ្លើយតប ឯកឧត្តមរដ្ឋមន្រ្តី បានលើកឡើងថា ដើម្បីទាក់ទាញនូវភ្ញៀវទេសចរអារ៉ាប់មកទស្សនាកម្ពុជាឱ្យកាន់តែច្រើន ក្រសួងទេសចរណ៍ បាននិងកំពុងអនុវត្តផែនការទេសចរណ៍មូស្លីម ២០២៣-២០២៧ ក៏ដូចជាសហការជាមួយក្រសួង ស្ថាប័នពាក់ព័ន្ធក្នុងការជំរុញម្ហូបអាហារហាលឡាល់ និងស្តង់ដា Cambodia Muslim Friendly ។ ក្នុងន័យនេះ ឯកឧត្តមរដ្ឋមន្ត្រី ថ្លែងនូវការកោតសរសើរនិងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមហ៊ុននាពេលកន្លងមក និងគម្រោងវិនិយោគរបស់ក្រុមហ៊ុន ដែលនឹងជាតម្លៃបន្ថែមខ្ពស់ក្នុងវិស័យទេសចរណ៍ ជាពិសេសនឹងចូលរួមជួយជំរុញទេសចរណ៍មូស្លីម និងទាក់ទាញភ្ញៀវទេសចរមូស្លីម។ ជាមួយគ្នានេះ ឯកឧត្តមរដ្ឋមន្ត្រី ក៏បានផ្តល់អនុសាសន៍ដល់ក្រុមហ៊ុនស្វែងរកការប្រឹក្សាផ្លូវច្បាប់ដើម្បីដំណើរការគម្រោងខាងលើស្របតាមច្បាប់និងលិខិតបទដ្ឋានគតិយុត្តជាធរមាន៕

(ភ្នំពេញ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្តរក្រសួង បានអញ្ជើញជាដឹកនាំកិច្ចប្រជុំគណៈកម្មការអន្តរក្រសួង ដើម្បីត្រួតពិនិត្យវឌ្ឍនភាពការងារត្រៀមរៀបចំព្រឹត្តិការណ៍បុណ្យទន្លេលើកទី១០ ឆ្នាំ២០២៦ ដែលសម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតជាគោលការណ៍ដ៏ខ្ពង់ខ្ពស់ឱ្យរៀបចំព្រឹត្តិការណ៍បុណ្យទន្លេលើកទី១០ នៅខេត្តក្រចេះ ចាប់ពីថ្ងៃទី២៧ ដល់ថ្ងៃទី២៩ ខែមីនា ឆ្នាំ២០២៦ ក្រោមប្រធានបទ «ទន្លេបៃតង បេតិកភណ្ឌវប្បធម៌ និងធម្មជាតិមហាសាល»។កិច្ចប្រជុំនេះមានការអញ្ជើញចូលរួមពី ឯកឧត្តម វ៉ា ថន អភិបាលនៃគណៈអភិបាលខេត្តក្រចេះ និងជាអនុប្រធានគណៈកម្មការអន្តរក្រសួង ឯកឧត្តម លោកជំទាវ ថ្នាក់ដឹកនាំក្រសួងទេសចរណ៍ និង អន្តរក្រសួង ស្ថាប័ន ជាអនុប្រធាននិងសមាជិក ព្រមទាំង លោកឧកញ៉ា ឧកញ៉ា លោក លោកស្រី តំណាងវិស័យឯកជន តាមរយៈការចូលរួមដោយផ្ទាល់ និងប្រព័ន្ធបញ្ជូនរូបភាព និងសម្លេង(Zoom Meeting) សរុបចំនួន ១៣០នាក់។ឆ្ថ្លែងក្នុងឱកាសនេះ ឯកឧត្តមរដ្ឋមន្ត្រី បានលើកឡើងពីសារៈសំខាន់នៃព្រឹត្តិការណ៍បុណ្យទន្លេ ដែលជាព្រឹត្តិការណ៍ជាតិរៀបចំឡើងក្នុងគោលបំណងលើកកម្ពស់វិស័យទេសចរណ៍ បង្ហាញសក្តានុពលធនធានធម្មជាតិ និងវប្បធម៌របស់តំបន់ជាប់ដងទន្លេ ជាពិសេសខេត្តក្រចេះ ព្រមទាំងជួយជំរុញសេដ្ឋកិច្ចរបស់ខេត្ត និងប្រជាពលរដ្ឋនៅមូលដ្ឋាន។ទន្ទឹមនឹងនោះ រដ្ឋបាលខេត្ត និងអនុគណៈកម្មការនីមួយៗ បានត្រៀមខ្លួនរួចរាល់ក្នុងការរៀបចំព្រឹត្តិការណ៍បុណ្យទន្លេលើកទី១០ ឱ្យប្រព្រឹត្តទៅដោយរលូន ទទួលការចូលរួមពីមហាជនឱ្យបានច្រើនកុះករ និងទទួលបានជោគជ័យ។សូមបញ្ជាក់ជូនថាក្នុងអំឡុងពេល៣ថ្ងៃនេះ នឹងមានព្រឹត្តិការណ៍អមជាច្រើន ដូចជា៖ ១. ពិធីរាប់បាត្រព្រះសង្ឃដើម្បីឧទ្ទិសកុសលជូនដល់វិញ្ញាណក្ខន្ធបុព្វបុរសខ្មែរ វីរៈកងទ័ព និងកងកម្លាំងប្រដាប់អាវុធគ្រប់ប្រភេទ ដែលបានពលីក្នុងបុព្វហេតុការពារជាតិ មាតុភូមិ និងប្រជាជន, ២. កម្មវិធីដុតក្រឡានក្រចេះដឹងគុណវីរៈកងទ័ព និងកងកម្លាំងប្រដាប់អាវុធគ្រប់ប្រភេទ និងផ្ញើក្ដីនឹករលឹកដល់ប្រជាជនភៀសសឹក, ៣. កម្មវិធីព្រលែងត្រីចូលក្នុងទន្លេ ដើម្បីផ្ដល់ជីវិតថ្មី និងបន្តនិរន្តរភាពជីវៈចម្រុះសម្រាប់ទន្លេ និងបួងសួងសុំសេចក្ដីសុខដល់ប្រជាជនកម្ពុជារស់នៅក្នុងសុខសន្តិភាព, ៤. ការសម្តែងទស្សនីយភាពសិល្បៈ ដែលបង្ហាញពីប្រពៃណីទំនៀមទម្លាប់ និងសក្ដានុពលទេសចរណ៍ខេត្តក្រចេះ ព្រមទាំងមានការប្រគំតន្ត្រីផងដែរ, ៥. ការតាំងពិព័រណ៍សមិទ្ធផលក្នុងវិស័យទេសចរណ៍ មហោស្រពម្ហូបអាហារនិងភេសជ្ជៈ ការតាំងពិព័រណ៍ពាណិជ្ជកម្ម ផលិតផលកសិ-ទេសចរណ៍ និងផលិតផលក្នុងស្រុក ព្រមទាំងការបង្ហាញ សមិទ្ធផលនិងគម្រោងអភិវឌ្ឍន៍នានារបស់ខេត្តក្រចេះ, ៦. សកម្មភាពកីឡាទេសចរណ៍ជាលក្ខណៈមហាជនជាច្រើនប្រភេទ និង៧. កម្មវិធីបណ្តែតប្រទីប ព្រមទាំងកម្មវិធីកម្សាន្តផ្សេងៗទៀតជាច្រើន៕

(សុខភាព)៖ យោងតាមអង្គការសុខភាពពិភពលោក មនុស្សជាងមួយពាន់លាននាក់នៅទូទាំងពិភពលោកកំពុងរស់នៅជាមួយនឹងបញ្ហាសុខភាពផ្លូវចិត្ត ដែលជាតួលេខដ៏គួរឱ្យភ្ញាក់ផ្អើលមួយដែលត្រូវបានរាយការណ៍ដោយអង្គការសុខភាពពិភពលោក។ នៅពីក្រោយចំនួននេះគឺបុគ្គលដែលមានជំងឺការថប់បារម្ភ ជំងឺធ្លាក់ទឹកចិត្ត ជំងឺបាយប៉ូឡា ជំងឺវិកលចរិក និងលក្ខខណ្ឌផ្សេងទៀតដែលកំណត់ជីវិតប្រចាំថ្ងៃរបស់ពួកគេយ៉ាងជ្រាលជ្រៅ។ បញ្ហាប្រឈមសុខភាពផ្លូវចិត្តលែងជាបញ្ហាស្ងៀមស្ងាត់ដែលប៉ះពាល់ដល់ផ្នែកតូចមួយនៃសង្គម។ ពួកគេតំណាងឱ្យកង្វល់សុខភាពសាធារណៈជាសកលដែលឆ្លងកាត់ព្រំដែន វប្បធម៌ និងប្រវត្តិសេដ្ឋកិច្ចសង្គម។ ជំងឺផ្លូវចិត្តមានឥទ្ធិពលលើរបៀបដែលមនុស្សគិត មានអារម្មណ៍ អាកប្បកិរិយា និងទំនាក់ទំនងជាមួយអ្នកដទៃ។ ពួកវាអាចប៉ះពាល់ដល់ផលិតភាព ទំនាក់ទំនង សុខភាពរាងកាយ និងគុណភាពជីវិតទាំងមូល។ ទោះបីជាមានទំហំនៃបញ្ហាក៏ដោយ សុខភាពផ្លូវចិត្តបានទទួលការយកចិត្តទុកដាក់តិច និងធនធានតិចជាងបើប្រៀបធៀបទៅនឹងសុខភាពផ្លូវកាយ។ នៅក្នុងផ្នែកជាច្រើននៃពិភពលោក ការមាក់ងាយ លទ្ធភាពទទួលបានការថែទាំមានកម្រិត និងកង្វះការយល់ដឹង បន្តរារាំងបុគ្គលពីការស្វែងរកជំនួយ។ជំងឺធ្លាក់ទឹកចិត្ត និងជំងឺថប់បារម្ភ គឺជាស្ថានភាពសុខភាពផ្លូវចិត្តទូទៅបំផុតនៅទូទាំងពិភពលោក។ មនុស្សរាប់លាននាក់ជួបប្រទះនឹងភាពសោកសៅជាប់រហូត បាត់បង់ចំណាប់អារម្មណ៍ ការព្រួយបារម្ភខ្លាំងពេក និងទុក្ខព្រួយផ្លូវចិត្តដែលរំខានដល់ដំណើរការប្រចាំថ្ងៃ។ សម្រាប់អ្នកខ្លះ រោគសញ្ញាទាំងនេះគឺជាការឆ្លើយតបបណ្តោះអាសន្នចំពោះព្រឹត្តិការណ៍ជីវិត។ សម្រាប់អ្នកផ្សេងទៀត ពួកគេក្លាយជាជំងឺរ៉ាំរ៉ៃ ដែលទាមទារការគាំទ្រ និងការព្យាបាលរយៈពេលវែង។ ជំងឺរាតត្បាត COVID-19 បានធ្វើឱ្យបញ្ហាប្រឈមទាំងនេះកាន់តែខ្លាំងឡើង ដោយរួមចំណែកដល់ការបង្កើនភាពឯកោ ភាពមិនច្បាស់លាស់ និងភាពតានតឹងផ្នែកអារម្មណ៍នៅទូទាំងប្រជាជន។មនុស្សវ័យក្មេងគឺងាយរងគ្រោះជាពិសេស។ វ័យជំទង់ និងពេលពេញវ័យដំបូង គឺជាដំណាក់កាលអភិវឌ្ឍន៍ដ៏សំខាន់ នៅពេលដែលស្ថានភាពសុខភាពផ្លូវចិត្តជាច្រើនបានលេចចេញជាដំបូង។ សម្ពាធក្នុងការសិក្សា ការប្រៀបធៀបសង្គម ការលាតត្រដាងតាមប្រព័ន្ធឌីជីថល ការរុករកអត្តសញ្ញាណ និងភាពមិនប្រាកដប្រជាផ្នែកសេដ្ឋកិច្ច សុទ្ធតែអាចរួមចំណែកដល់បញ្ហាផ្លូវចិត្ត។ ដោយគ្មានជំនួយទាន់ពេលវេលា ការតស៊ូទាំងនេះអាចបន្តរហូតដល់ពេញវ័យ ប៉ះពាល់ដល់ការទទួលបានការអប់រំ ឱកាសការងារ និងទំនាក់ទំនងសង្គម៕ 

(អន្តរជាតិ)៖ ប៉ូលិសក្រុងហាណូយបានចាប់ផ្តើមដំណើរការនីតិវិធីព្រហ្មទណ្ឌប្រឆាំងនឹងជនជាប់ចោទចំនួន 83 នាក់ដែលជាប់ពាក់ព័ន្ធនឹងការក្លែងបន្លំទ្រព្យសម្បត្តិដ៏សំខាន់ដែលដឹកនាំតារាតិកតុកឈ្មោះ Pho Duc Nam ដែលត្រូវបានគេស្គាល់ជាទូទៅថា "Mr Pips" ។ក្រុមអ្នកស៊ើបអង្កេតបានចោទប្រកាន់បុគ្គលចំនួន 74 នាក់ពីបទ ក្លែងបន្លំទ្រព្យសម្បត្តិ លាងលុយ មាន "ទ្រព្យសម្បត្តិដែលទទួលបានតាមរយៈឧក្រិដ្ឋកម្ម" ការលាងលុយកខ្វក់" និង "ការក្លែងបន្លំទ្រព្យសម្បត្តិ" និង គេចពន្ធ។ប៉ូលិសបានរឹបអូសជាបណ្តោះអាសន្ននូវសាច់ប្រាក់ចំនួន 2.3 លានដុល្លារអាមេរិក រថយន្តចំនួន 41 គ្រឿង ម៉ូតូចំនួន 7 គ្រឿង និងលោហៈមានតម្លៃមួយចំនួនធំ រួមទាំងមាសទម្ងន់ 246 គីឡូក្រាម និងខ្សែក្រវាត់មាស SJC ចំនួន 890 តម្លឹង (33.375 គីឡូក្រាម) រួមជាមួយនឹងនាឡិកាប្រណីត និងគ្រឿងអលង្ការជាច្រើនពីគម្រោងដែលត្រូវបានចាត់ទុកថាជាការដោះដូរបរទេសដ៏ធំបំផុតមិនធ្លាប់មាននៅក្នុងប្រទេសវៀតណាម។ប្រតិបត្តិការ​ដែល​ពាក់ព័ន្ធ​នឹង​អចលនទ្រព្យ​ចំនួន 130 ត្រូវ​បាន​បង្កក។យោងតាមក្រុមអ្នកស៊ើបអង្កេត លោក Nam បានស្គាល់លោក Isik Uran អាយុ 42 ឆ្នាំជាជនជាតិទួរគីក្នុងឆ្នាំ 2018 ។ អ្នកទាំងពីរបានព្រមព្រៀងគ្នាថា Uran នឹងបង្កើត គ្រប់គ្រង និងដំណើរការគេហទំព័រដែលរួមបញ្ចូលជាមួយកម្មវិធី MT4 និង MT5 ដែលជាទូទៅត្រូវបានប្រើប្រាស់សម្រាប់ការជួញដូរ Forex និងការជួញដូរភាគហ៊ុនសកល។ គេហទំព័រទាំងនេះបានប្រើឈ្មោះភាសាអង់គ្លេសដើម្បីធ្វើត្រាប់តាមឈ្មួញកណ្តាលអន្តរជាតិស្របច្បាប់។អ្នកទាំងពីរបានរាយការណ៍ថាបានបង្កើតគេហទំព័រក្លែងបន្លំចំនួន 36 ដែលដាក់ជាកន្លែងជួញដូរអន្តរជាតិ។ លោក Nam បានណែនាំដល់មន្ត្រីក្រោមឱវាទឱ្យបង្កើតក្រុមហ៊ុនចំនួន 85 រួមមាន 4 សម្រាប់គោលបំណងជ្រើសរើស ពីរសម្រាប់ចុះហត្ថលេខាលើកិច្ចសន្យាជួលម៉ាស៊ីនមេ និង 57 សម្រាប់ដាក់បុគ្គលិកផ្នែកលក់ និងជំនួយអតិថិជនសម្រាប់ប្រតិបត្តិការខុសច្បាប់៕

(អន្តរជាតិ)៖ យន្តហោះចម្បាំង F-35 របស់អាមេរិក បានចុះចតជាបន្ទាន់នៅឯមូលដ្ឋានទ័ពអាកាសអាមេរិកនៅមជ្ឈិមបូព៌ា បន្ទាប់ពីវាត្រូវបានវាយប្រហារដោយអ្វីដែលគេជឿថាជាភ្លើងរបស់អ៊ីរ៉ង់ នេះបើយោងតាមប្រភពពីរដែលដឹងពីបញ្ហានេះ។ឧត្តមនាវីឯក Tim Hawkins អ្នកនាំពាក្យរបស់ទីបញ្ជាការកណ្តាលរបស់សហរដ្ឋអាមេរិក បាននិយាយថា យន្តហោះបំបាំងកាយជំនាន់ទីប្រាំ "កំពុងហោះហើរបេសកកម្មប្រយុទ្ធលើប្រទេសអ៊ីរ៉ង់" នៅពេលដែលវាត្រូវបានបង្ខំឱ្យចុះចតជាបន្ទាន់។ លោក Hawkins បាននិយាយថា យន្តហោះបានចុះចតដោយសុវត្ថិភាព ហើយឧប្បត្តិហេតុកំពុងស្ថិតក្រោមការស៊ើបអង្កេត។"យន្តហោះបានចុះចតដោយសុវត្ថិភាព ហើយអាកាសយានិកស្ថិតនៅក្នុងស្ថានភាពស្ថិរភាព "ហេតុការណ៍នេះកំពុងស្ថិតក្រោមការស៊ើបអង្កេត"។ឧបទ្ទវហេតុនេះនឹងក្លាយជាលើកទីមួយហើយដែលអ៊ីរ៉ង់បានវាយប្រហារយន្តហោះអាមេរិកនៅក្នុងសង្គ្រាមដែលបានចាប់ផ្តើមនៅចុងខែកុម្ភៈ។ ទាំងសហរដ្ឋអាមេរិក និងអ៊ីស្រាអែលកំពុងប្រើ យន្តហោះ F-35 នៅក្នុងជម្លោះ។ យន្តហោះនេះមានតម្លៃដល់ទៅ 100 លានដុល្លារ។រហូតមកដល់ពេលនេះ សហរដ្ឋអាមេរិកបានបាត់បង់យន្តហោះផ្សេងទៀតនៅក្នុងសង្គ្រាម ទោះបីជាគ្មាននរណាម្នាក់ត្រូវបានគេដឹងថាត្រូវបានវាយប្រហារដោយការបាញ់របស់សត្រូវក៏ដោយ។ យន្តហោះចម្បាំង F-15 របស់អាមេរិកចំនួន 3 គ្រឿងត្រូវបានបាញ់ទម្លាក់ដោយប្រព័ន្ធការពារដែនអាកាសគុយវ៉ែតដោយច្រឡំ ដោយសមាជិកនាវិកទាំង 6 នាក់ត្រូវបានបណ្តេញចេញដោយសុវត្ថិភាព។ ហើយកាលពីសប្តាហ៍មុន យន្តហោះចាក់សាំង KC-135 Stratotanker បានធ្លាក់នៅភាគខាងលិចប្រទេសអ៊ីរ៉ាក់ ទោះបីជាមូលហេតុនៅមិនទាន់ច្បាស់នៅឡើយ។ នៅពេលដែលសង្រ្គាមបានខិតជិតដល់ចុងបញ្ចប់នៃសប្តាហ៍ទី 3 របស់ខ្លួន មន្ត្រីជាន់ខ្ពស់អាមេរិកនៅតែបន្តទាមទារជោគជ័យយ៉ាងទូលំទូលាយនៅក្នុងយុទ្ធនាការរបស់ខ្លួនប្រឆាំងនឹងអ៊ីរ៉ង់៕

(ភ្នំពេញ)៖ ករណីគ្រោះថ្នាក់ចរាចរណ៍ “បើបុក ងាប់សង២ម៉ឺនដុល្លា”នោះ ពេលនេះភាគីរថយន្តបង្កបានឆ្លើយចំពោះមុខសមត្ថកិច្ចថា អ្នកបើកបររថយន្តបង្កជាស្រ្តី ដោយករណីនេះសមត្ថកិច្ចកំពុងបន្តអង្កេតស្រាវជ្រាវតាមជំនាញបច្ចេកទេស ខណៈមហាជនស្នើសុំឱ្យមានការបង្ហាញកាមេរ៉ាសុវត្ថិភាពនៅកន្លែងកើតហេតុផ្ទាល់។តាមរយៈស្នងការដ្ឋាននគរបាលរាជធានីភ្នំពេញ នៅមុននេះបន្តិចបានឲ្យដឹងថា ចំពោះករណីបញ្ហាគ្រោះថ្នាក់ចរាចរណ៍នៅសង្កាត់គីឡូម៉ែត្រលេខ៦ ខណ្ឌប្ញស្សីកែវ កាលពីយប់ថ្ងៃទី១៨ ខែមីនា ឆ្នាំ២០២៦ បណ្តាលឲ្យក្មេងប្រុស០១នាក់រងរបួសធ្ងន់ អ្នកបើកបររថយន្តនិងអ្នករួមដំណើរប្រុសស្រីទាំង០២នាក់ កំពុងត្រូវបានសមត្ថកិច្ចជំនាញការិយាល័យនគរបាលចរាចរណ៍ផ្លូវគោកនាំខ្លួនយកមកសាកសួរតាមច្បាប់។ជាមួយគ្នានេះបើយោងតាមការបំភ្លឺរបស់ភាគីរថយន្តបង្កបានឆ្លើយចំពោះមុខសមត្ថកិច្ចឲ្យដឹងថាអ្នកបើកបររថយន្តបង្កជាស្រ្តី ដោយមុនពេលកើតហេតុស្រ្តីនោះបានបើករថយន្តចេញពីកន្លែងផឹកស៊ីជាមួយបុរសដែលរួមដំណើរពីហាងមួយកន្លែងក្នុងខណ្ឌសែនសុខ។ទោះបីយ៉ាងណាករណីនេះ សមត្ថកិច្ចកំពុងបន្តអង្កេតស្រាវជ្រាវតាមជំនាញ បច្ចេកទេស ក្នុងគោលដៅសុក្រឹតភាពនៃការទទួលខុសត្រូវក្នុងនាមជាអ្នកបើកបរបង្កហេតុ ដោយអនុលោមតាមនីតិវិធីកំណត់ក្នុងច្បាប់ មុននឹងបញ្ជូនសំណុំរឿងទៅតុលាការឆាប់ៗនេះ ដើម្បីពិនិត្យសម្រេចជាសមត្ថកិច្ច៕

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាថ្ងៃទី១៩ ខែមីនា ឆ្នាំ២០២៦នេះ បានណែនាំឱ្យលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បើកកិច្ចប្រជុំពិភាក្សាជាបន្ទាន់ជាមួយភាគីពាក់ព័ន្ធដើម្បីស្វែងរកលទ្ធភាពជួយសម្រាលបន្ទុកចំណាយថ្លៃធ្វើដំណើររបស់បងប្អូនកម្មករនិយោជិត។សម្តេចមហាបវរធិបតី ហ៊ុន ម៉ាណែត បានថ្លែងដូចនេះថា ៖ “ដើម្បីពិនិត្យដោះស្រាយផលវិបាកដែលកើតចេញពីការកើនឡើងតម្លៃប្រេងឥន្ធនៈជាសកលនាពេលថ្មីៗនេះ ខ្ញុំបានណែនាំឱ្យឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ រៀបចំកិច្ចប្រជុំជាមួយតំណាងភាគីនិយោជក និងភាគីសហជីព ដែលតំណាងបងប្អូនកម្មករនិយោជិត ដើម្បីពិនិត្យពិភាក្សាស្វែងរកលទ្ធភាពជួយសម្រាលបន្ទុកចំណាយថ្លៃធ្វើដំណើររបស់បងប្អូនកម្មករនិយោជិតយើង នៅក្នុងរយៈពេលអន្តរកាលនេះ ឱ្យបានឆាប់បំផុត”។ សម្តេចមហាបវរធិបតី ហ៊ុន ម៉ាណែត ក៏បានបង្ហាញក្តីសង្ឃឹមថា ភាគីនិយោជក និងភាគីសហជីព នឹងអាចរកបាននូវចំណុចប្រសព្វសមរម្យមួយ ដែលអាចជួយសម្រាលបន្ទុកថ្លៃធ្វើដំណើររបស់បងប្អូនកម្មករផង និងអាចរក្សាបាននូវភាពប្រកួតប្រជែងនៃឧស្សាហកម្មផងដែរ៕

(ភ្នំពេញ)៖ តម្លៃលក់រាយប្រេងឥន្ធនៈ ចាប់ពីថ្ងៃទី២០ ខែមីនា ឆ្នាំ២០២៦នេះ រហូតដល់ថ្ងៃជូនដំណឹងថ្មី សម្រាប់ប្រេងសាំងធម្មតា ៥ ៤០០ រៀល/លីត្រ (ចុះ ១០០រៀល/លីត្រ) និងសម្រាប់ប្រេងម៉ាស៊ូត ៦ ៧០០ រៀល/លីត្រ (ឡើង ១៥០រៀល/លីត្រ)៕