(ភ្នំពេញ)៖ កម្ពុជាមានឱកាសការងារប្រមាណជាង ៩ម៉ឺនកន្លែងនៅតាមរាជធានី-ខេត្តទូទាំងប្រទេសកំពុងរង់ចាំបងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ។ នេះបើតាមការផ្សព្វផ្សាយរបស់ក្រសួងការងារ និងបណ្ដុះបណ្ដាលវិជ្ជាជីវៈ ក្នុងពេលថ្មីៗនេះ។ តាមរយៈការផ្សព្វផ្សាយក្រសួងការងារបានឱ្យដឹងថា គិតត្រឹមថ្ងៃទី១២ ខែមិថុនា ឆ្នាំ២០២៦ មានឱកាសការងារចំនួន ៩០,៨៣៩ កន្លែងនៅតាមណ្ដារាជធានី-ខេត្តនៅទូទាំងប្រទេស កំពុងរង់ចាំបងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ។ ឱកាសការងារទាំងនោះ ស្ថិតនៅក្នុងវិស័យសំខាន់ៗ ដូចជា៖ វិស័យកសិកម្ម ឧស្សាហកម្ម និងវិស័យសេវាកម្ម។ ដើម្បីទទួលបានឱកាសការងារទាំងនោះ បងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ អាចស្វែងរកលេខទំនាក់ទំនង ឈ្មោះរោងចក្រ និងវិស័យដែលខ្លួនពេញចិត្តបានតាមរយៈខិត្តប័ណ្ណការងាររបស់ក្រសួងដែលបានផ្សព្វផ្សាយយ៉ាងលម្អិត។ ជាមួយគ្នានេះ ក្រៅពីទំនាក់ទំនងផ្ទាល់ជាមួយក្រុមហ៊ុន រោងចក្រ សហគ្រាស អ្នកស្វែងរកការងារទាំងអស់ ជាពិសេសបងប្អូនអតីតពលករ ក៏អាចទាក់ទងមកប្រព័ន្ធទំនាក់ទំនងបន្ទាន់ ១២៩៧ ដើម្បីឱ្យក្រសួងការងារជួយសម្របសម្រួលស្វែងរកការងារជូនផងដែរ។ នេះបើតាមក្រសួងការងារដដែល៕

(តាកែវ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ រួមជាមួយឯកឧត្តម គី តិច ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី១ ក្រុមការងារគណបក្សប្រជាជនកម្ពុជាចុះមូលដ្ឋានខេត្តតាកែវ និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានស្រុកបាទី និងឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ អញ្ជើញជាគណៈអធិបតីក្នុងពិធីដាំកូនឈើអមសងខាងផ្លូវ និងក្នុងបរិវេណរមណីយដ្ឋានទេសចរណ៍ទន្លេបាទី ដោយមានការចូលរួមពីព្រះ​សង្ឃ ថ្នាក់ដឹកនាំក្រសួងទេសចរណ៍ អាជ្ញាធរមូលដ្ឋាន ក្រុមមេធាវីស្ម័គ្រចិត្តសម្តេចតេជោ សែន សិស្ស-និស្សិត ស.ស.យ.ក. យុវជនកាកបាទក្រហមកម្ពុជា កាយឫទ្ធិ និងប្រជាពលរដ្ឋ សរុបប្រមាណ ៩៥០ អង្គ/នាក់។ក្នុងឱកាសនោះ ឯកឧត្តមរដ្ឋមន្ត្រី បានថ្លែងអំណរគុណចំពោះ ឯកឧត្តម គី តិច ដែលបានផ្តួចផ្តើមរៀបចំពិធីដាំកូនឈើក្រោមប្រធានបទ «រួមគ្នាដាំកូនឈើ ដើម្បីបរិស្ថាន ទេសចរណ៍ និងអភិរក្សរមណីយដ្ឋានប្រវត្តិសាស្ត្រ» ដែលជាសកម្មភាពដ៏មានអត្ថន័យក្នុងការចូលរួមថែរក្សាបរិស្ថាន បង្កើនសោភ័ណភាព និងលើកកម្ពស់ភាពទាក់ទាញរបស់រមណីយដ្ឋានទេសចរណ៍ទន្លេបាទី ឱ្យកាន់តែមានភាពបៃតង ស្រស់ស្អាត និងទាក់ទាញភ្ញៀវទេសចរបន្ថែមទៀត។ជាមួយគ្នានេះ ឯកឧត្តមរដ្ឋមន្ត្រី ក៏បានកោតសរសើរ និងវាយតម្លៃខ្ពស់ចំពោះ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ រដ្ឋបាលខេត្តតាកែវ លោក សាយ វណ្ណៈ អភិបាលស្រុកបាទី និងអាជ្ញាធរពាក់ព័ន្ធទាំងអស់ ដែលបានខិតខំប្រឹងប្រែងយ៉ាងសកម្មក្នុងការអភិវឌ្ឍ និងលើកកម្ពស់វិស័យទេសចរណ៍នៅខេត្តតាកែវ ជាពិសេសការរៀបចំ និងអភិរក្សគោលដៅទេសចរណ៍សំខាន់ៗ ដើម្បីទាក់ទាញភ្ញៀវទេសចរជាតិ និងអន្តរជាតិ។ឯកឧត្តមរដ្ឋមន្ត្រី បានលើកឡើងថា ការរៀបចំពិធីដាំកូនឈើនេះ គឺជាផ្នែកមួយនៃការជំរុញការអភិវឌ្ឍទេសចរណ៍បៃតង (Green Tourism) នៅកម្ពុជា ស្របតាមគោលនយោបាយរបស់រាជរដ្ឋាភិបាល ក្នុងការផ្សារភ្ជាប់ការអភិរក្សបរិស្ថានជាមួយការអភិវឌ្ឍទេសចរណ៍បៃ​តង​ប្រកបដោយចីរភាព។ ទន្ទឹមនឹងនេះ ក្រសួងទេសចរណ៍ក៏កំពុងជំរុញយុទ្ធនាការ «ទេសចរម្នាក់ ដើមឈើមួយដើម (One Tourist, One Tree)» ដើម្បីលើកទឹកចិត្តឱ្យភ្ញៀវទេសចរចូលរួមដាំដើមឈើ ក្នុងអំឡុងពេលធ្វើដំណើរកម្សាន្តនៅកម្ពុជា។ឯកឧត្តមរដ្ឋមន្ត្រី បានបន្ថែមថា ពិធីនេះត្រូវបានរៀបចំឡើងក្នុងអំឡុងពេលរដូវកាលបៃតង (Green Season) របស់កម្ពុជា ចាប់ពីខែឧសភា ដល់ខែតុលា ដែលជារដូវកាលពោរពេញដោយទេសភាពធម្មជាតិបៃតងស្រស់ អាកាសធាតុត្រជាក់ស្រួល និងបរិយាកាសស្រស់ស្រាយ ស័ក្តិសមសម្រាប់ការធ្វើដំណើរកម្សាន្ត។កូនឈើដែលត្រូវបានដាំក្នុងពិធីនេះ រួមមានប្រភេទផ្កាសាគូរ៉ា និងកូនឈើប្រណីតផ្សេងៗ សរុបប្រមាណ ១,០០០ ដើម ដែលនឹងរួមចំណែកបង្កើនគម្របពណ៌បៃតង លើកកម្ពស់សោភ័ណភាពបរិស្ថាន និងបន្ថែមភាពទាក់ទាញភ្ញៀវទេសចរជាតិ និងអន្តរជាតិឱ្យ​មក​កម្សាន្តនៅរមណីយដ្ឋានទេសចរណ៍ទន្លេបាទី។ទន្ទឹមនឹងនេះ ឯកឧត្តមរដ្ឋមន្ត្រី ក៏បានឧបត្ថម្ភថវិកាចំនួន ២,០០០ដុល្លារអាមេរិក សម្រាប់ការសាងសង់បង្គន់អនាម័យសាធារណៈក្នុងបរិវេណរមណីយដ្ឋានទេសចរណ៍ទន្លេបាទី ដើម្បីរួមចំណែកលើកកម្ពស់គុណភាពសេវាកម្ម បរិស្ថានអនាម័យ និងផាសុកភាពជូនភ្ញៀវទេសចរ ព្រមទាំងគាំទ្រដល់ការអភិវឌ្ឍរមណីយដ្ឋានឱ្យកាន់តែមានភាពទាក់ទាញ និងសមស្របតាមស្តង់ដាទេសចរណ៍ផងដែរ៕

(ភ្នំពេញ)៖ ទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET Day) លើកទី៩ ឆ្នាំ២០២៦ នឹងចាប់ផ្តើមនៅថ្ងៃស្អែក ទី១៥ ដល់ថ្ងៃទី១៦ ខែមិថុនា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ ចាប់ពីម៉ោង ៨ព្រឹក ដល់ម៉ោង ៨យប់ ក្រោមប្រធានបទ «TVET ផ្តល់ជំនាញ ការងារ និងប្រាក់ចំណូល»។ជាពិសេស នៅក្នុងពិធីបើកទិវាជាតិនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញជាអធិបតីដ៏ខ្ពង់ខ្ពស់ ដែលបង្ហាញពីការយកចិត្តទុកដាក់ និងការផ្តល់អាទិភាពខ្ពស់របស់រាជរដ្ឋាភិបាលចំពោះការអភិវឌ្ឍមូលធនមនុស្ស និងការលើកកម្ពស់ការអប់រំបណ្តុះបណ្តាលជំនាញវិជ្ជាជីវៈនៅកម្ពុជា។កម្មវិធីដ៏ធំនេះ គឺជាឱកាសពិសេសសម្រាប់សិស្សានុសិស្ស និស្សិត យុវជន មាតាបិតា អាណាព្យាបាល និងសាធារណជន ក្នុងការស្វែងយល់អំពីជំនាញវិជ្ជាជីវៈដែលកំពុងមានតម្រូវការខ្ពស់នៅលើទីផ្សារការងារ ព្រមទាំងឱកាសការងារ និងការអភិវឌ្ឍអាជីពនាពេលអនាគត។អ្នកចូលរួមនឹងបានទស្សនាការតាំងពិព័រណ៍ស្នាដៃ និងបច្ចេកវិទ្យាទំនើបៗពីគ្រឹះស្ថាន TVET ទូទាំងប្រទេស ស្វែងយល់ពីកម្មវិធីបណ្តុះបណ្តាលជាច្រើនជំនាញ ជួបផ្ទាល់ជាមួយគ្រូបណ្តុះបណ្តាល សិស្សជំនាញ និងតំណាងក្រុមហ៊ុនឯកជន ព្រមទាំងទទួលបានព័ត៌មានអំពីអាហារូបករណ៍ និងឱកាសការងារជាច្រើន។ក្រៅពីនេះ ក៏មានការធ្វើបទបង្ហាញ និងចែករំលែកបទពិសោធន៍ពីវាគ្មិនជោគជ័យ អ្នកជំនាញ និងតំណាងវិស័យឯកជន ដែលនឹងបង្ហាញពីសារៈសំខាន់នៃជំនាញបច្ចេកទេស និងវិជ្ជាជីវៈក្នុងការកសាងអនាគតការងារ និងបង្កើនប្រាក់ចំណូល។សម្រាប់យុវជនដែលកំពុងស្វែងរកអាជីព ឬចង់បង្កើនជំនាញដើម្បីប្រកួតប្រជែងក្នុងទីផ្សារការងារ ទិវាជាតិ TVET ២០២៦ គឺជាព្រឹត្តិការណ៍មួយដែលមិនគួររំលង ព្រោះជំនាញមួយ អាចផ្លាស់ប្តូរជីវិត និងបើកទ្វារទៅរកឱកាសការងារកាន់តែប្រសើរ៕

(សៀមរាប)៖ ឱកាសការងារចំនួន ៣ ៥៥០ កន្លែង ជាមួយនឹងអត្ថប្រយោជន៍ ប.ស.ស. និងកម្មវិធី TVET ត្រូវបាននាំយកទៅផ្សព្វផ្សាយជូនប្រជាពលរដ្ឋដល់មូលដ្ឋាន ស្ថិតនៅបរិវេណសាលាស្រុកជីក្រែង ក្នុងខេត្តសៀមរាប នាព្រឹកថ្ងៃសៅរ៍ ទី១៣ ខែមិថុនា ឆ្នាំ២០២៦ ដែលមានអ្នកចូលរួមជិត ៥០០នាក់ ជាពិសេសអតីតពលករមកពីប្រទេសថៃ និងយុវជនកំពុងរកការងារធ្វើ។ថ្លែងក្នុងវេទិកាការងារ សន្តិសុខសង្គម និងការបណ្ដុះបណ្ដាលវិជ្ជាជីវៈ ក្រោមប្រធានបទ «ខ្មែរជួយរកការងារ និងផ្ដល់ការងារឱ្យខ្មែរ» ឯកឧត្តម ប៉ុក ប៉ាន់ រដ្ឋលេខាធិការ តំណាងដ៏ខ្ពង់ខ្ពស់របស់ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានមានប្រសាសន៍ថា នាពេលបច្ចុប្បន្ននេះ មានឱកាសការងារជាង ៩ម៉ឺនកន្លែងនៅទូទាំងប្រទេស។ នាពេលនេះ ក្រសួងបាននាំយកឱកាសការងារជាង ៣ ពាន់កន្លែងពីក្រុមហ៊ុន រោងចក្រ សហគ្រាស និងតំបន់សេដ្ឋកិច្ចពិសេស មកផ្សព្វផ្សាយជូនដល់មូលដ្ឋាន ដើម្បីបងប្អូនអាចធ្វើការចុះឈ្មោះ សម្ភាស និងទទួលបានការងារភ្លាមៗ។ ក្នុងស្មារតីយកចិត្តទុកដាក់ខ្ពស់ចំពោះជីវភាពរស់នៅរបស់ប្រជាពលរដ្ឋពីសំណាក់រាជរដ្ឋាភិបាល វេទិកាដ៏សំខាន់នេះជួយសន្សំទាំងពេលវេលា និងថវិកាសម្រាប់បងប្អូន មិនឱ្យលំបាកដើររកការងារធ្វើដោយខ្លួនឯងដូចកាលពីពេលមុននោះឡើយ។ជាមួយនឹងការគូសបញ្ជាក់ពីបេសកកម្មរបស់ក្រសួងការងារនិងបណ្ដុះបណ្ដាលវិជ្ជាជីវៈ ដែលកំពុងខិតខំប្រឹងប្រែងរកការងារជូនបងប្អូន ផ្ដល់នូវការការពារសិទ្ធិ និងអត្ថប្រយោជន៍ស្របច្បាប់ផងនោះ ឯកឧត្តមរដ្ឋលេខាធិការបានជម្រាបជូនបងប្អូនថា ការងារក្នុងស្រុកគឺសម្បូរបែបណាស់ ហើយនាំយកមកជូនដល់មូលដ្ឋានទៀតនាពេលបច្ចុប្បន្ននេះ ដែលជាឱកាសដ៏មានតម្លៃសម្រាប់បងប្អូនកសាងជីវភាពនៅក្នុងស្រុកកំណើត និងរួមចំណែកដោយផ្ទាល់ដល់ការអភិវឌ្ឍសេដ្ឋកិច្ចជាតិ។នាឱកាសនោះ ឯកឧត្តមបានធ្វើការប្រៀបធៀបពីការងារក្នុងស្រុក និងការងារចំណាកស្រុកទៅប្រទេសថៃ ដោយបញ្ជាក់ថា ការងារចំណាកស្រុកប្រឈមនឹងហានិភ័យជាច្រើន ដូចជា៖ បញ្ហាសុវត្ថិភាព ការកេងប្រវ័ញ្ចកម្លាំងពលកម្ម ខ្វះការគាំពារសុខភាព ការរើសអើង និងមិនអាចរស់នៅជួបជុំក្រុមគ្រួសារ ជាពិសេសបន្ទាប់ពីមានសង្រ្គាមឈ្លានពានទឹកដី។ ចំពោះការងារក្នុងស្រុកវិញ ផ្ដល់ទាំងសុភមង្គលក្នុងគ្រួសារ និងអត្ថប្រយោជន៍ជាច្រើនដល់បងប្អូន ជាពិសេសពីបេឡាជាតិសន្តិសុខសង្គម (ប.ស.ស.) រួមមាន៖ ផ្នែកហានិភ័យការងារ ផ្នែកថែទាំសុខភាព និងផ្នែកសោធនិវត្តន៍។ ប្រសិនបើបងប្អូនមានបំណងចង់ទៅធ្វើការនៅក្រៅប្រទេស ឯកឧត្តមបានលើកទឹកចិត្តឱ្យចុះឈ្មោះជាមួយនឹងក្រុមហ៊ុនស្របច្បាប់នៅទីនេះស្រាប់ ដែលផ្ដល់ប្រាក់ខែ និងមានសុវត្ថិភាពខ្ពស់ជាងប្រទេសថៃ។ទន្ទឹមនឹងនេះ ឯកឧត្តមរដ្ឋលេខាធិការក៏បានជម្រាបជូនដែរថា ក្រសួងការងារក៏បានបង្កើតសាលារៀនបណ្ដុះបណ្ដាលជំនាញវិជ្ជាជីវៈនៅក្នុងខេត្តសៀមរាបផងដែរ ហើយតាមរយៈកម្មវិធី TVET ១,៥លាន បងប្អូនអាចចុះឈ្មោះចូលរៀនដោយឥតគិតថ្លៃជាមួយនឹងជម្រើសពេលសិក្សាជាច្រើន ដូចជា៖ ផ្នែកសំណង់ ជួសជុលគ្រឿងម៉ាស៊ីន គ្រឿងអគ្គិសនី ម៉ាស៊ីនត្រជាក់ ដុតនំ ឆុងកាហ្វេ និងផ្នែកសាឡនជាដើម។ ចំពោះព័ត៌មានបន្ថែម សូមបងប្អូនទាក់ទងលេខ Hotline ១២៩៧ សម្រាប់ព័ត៌មានពីឱកាសការងារ ឬរៀនជំនាញវិជ្ជាជីវៈ និងលេខ ១២៨៦ សម្រាប់ផ្នែក ប.ស.ស.។សូមបញ្ជាក់ថា ឱកាសការងារចំនួន ៣ ៥៥០ កន្លែង ដែលក្រសួងកំពុងផ្ដល់ជូនប្រជាពលរដ្ឋក្នុងខេត្តសៀមរាបនេះ មានការចូលរួមដោយផ្ទាល់ពីរោងចក្រ វេនធូរ៉ា លេឌើវែរ អឹមអេហ្វវ៉ាយ (ស៊ីឌី) ឯ.ក, រោងចក្រខាសវ៉ែល អឹភើរឹល, សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) និងក្រុមហ៊ុនជ្រើសរើសកម្លាំងពលកម្មក្រៅប្រទេស រួមមាន ក្រុមហ៊ុន អ៊ែកស៊ល អេស៊ា យូមេន រីសសស៍ និងក្រុមហ៊ុន វង្ស វឌ្ឍនៈ មេនផៅវ័រ ឯ.ក៕

(កណ្តាល)៖ ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍គណៈកម្មាធិការកណ្តាល និងជាអគ្គលេខាធិការគណៈចលនាមហាជន នៃគណៈកម្មាធិការកណ្តាលគណបក្សប្រជាជនកម្ពុជា ជាតំណាងដ៏ខ្ពង់ខ្ពស់សម្ដេចកិត្តិសង្គហបណ្ឌិតម៉ែន សំអន អនុប្រធានគណបក្ស និងជាប្រធានគណៈចលនាមហាជន នៃគណៈកម្មាធិការកណ្ដាលគណបក្សប្រជាជនកម្ពុជា បានអញ្ជើញជាអធិបតីក្នុងពិធីបិទ «វគ្គបណ្ដុះបណ្ដាលជនបង្គោលលើ ការងារមហាជន ក្រុង -ស្រុក និង ឃុំ-សង្កាត់ នៃគណៈកម្មាធិការគណបក្សខេត្តកណ្តាល» នារសៀលថ្ងៃទី១៣ ខែមិថុនា ឆ្នាំ២០២៦។ ពិធីនេះមានការចូលរួមពីសំណាក់ឯកឧត្តម លោកជំទាវ លោក លោកស្រី សមាជិក សមាជិកា គណៈចលនាមហាជន ប្រធានគណៈចលនាជំនាញ អគ្គលេខាធិការ អគ្គលេខាធិការរង ប្រធានគណៈចលនាមហាជនរាជធានី-ខេត្ត និង សិក្ខាកាមដែលបានទទួលវគ្គបណ្តុះបណ្តាលប្រមាណ ១.០២១ នាក់ នៅទីស្នាក់ការគណបក្សប្រជាជនកម្ពុជា ខេត្តកណ្តាល។ជាកិច្ចចាប់ផ្តើម ឯកឧត្តម គួច ចំរើន ប្រធានគណៈចលនាមហាជនខេត្តកណ្តាល បានថ្លែងសុន្ទរកថាស្វាគមន៍ និងរបាយការណ៍ជូនអង្គពិធី។ ឯកឧត្តមបានលើកឡើងថា វគ្គបណ្តុះបណ្តាលនេះទទួលបានជោគជ័យ ដោយមានការស្នើសុំបន្ថែមសមាសភាពពីរចនាសម្ព័ន្ធមូលដ្ឋាន រហូតទៅ ១៨១ រូបផងដែរ។ ជាមួយគ្នានេះឯកឧត្តម បានបន្តទៀតថា ជនបង្គោលលើការងារមហាជនទាំងអស់ ដែលបានទទួលការបណ្តុះបណ្តាលនាពេលនេះ នឹងបានយល់ដឹងច្បាស់ពីតួនាទី ភារកិច្ច និងរចនាសម្ព័ន្ធគណៈចលនាមហាជន និងក្រុមចលនាមហាជន យកទៅអនុវត្តការងារនៅតាមមូលដ្ឋាន បានកាន់តែប្រសើរឡើងថែមទៀត។សូមជម្រាបជូនថា វគ្គបណ្តុះបណ្តាលនេះ មានសិក្ខាកាមសរុបចំនួន ១.០២១ រូប ដោយបែងចែកជា ១៤វគ្គ សម្រាប់ ខេត្តកណ្តាល ។ ក្នុងនោះ វគ្គនីមួយៗ បានប្រព្រឹត្តទៅរយៈពេល មួយថ្ងៃពេញ ដោយសិក្ខាកាមនៃវគ្គនីមួយៗ បានទទួលនូវមេរៀនសំខាន់ៗពាក់ព័ន្ធនឹង ទី១. តួនាទី ភារកិច្ច និងរចនាសម្ព័ន្ធគណៈចលនាមហាជន ទី២. វិធីសាស្រ្តគោលក្នុងការប្រឈម និងគ្រប់គ្រងសមរភូមិសតិអារម្មណ៍ ទី៣. ការគ្រប់គ្រងប្រព័ន្ធផ្សព្វផ្សាយ និងវិធីសាស្ត្រផ្សព្វផ្សាយ និង ទី៤. យុទ្ធសាស្ត្របញ្ចកោណ ដំណាក់កាលទី១ និងសមិទ្ធផលសម្រេចបានរបស់ រាជរដ្ឋាភិបាល។ ជនបង្គោលដែលបានទទួលការបណ្តុះបណ្តាលនាពេលនេះ នឹងទទួលបានសម្បទាគ្រប់គ្រាន់សម្រាប់បើកវគ្គបណ្តុះបណ្តាលការងារចលនាមហាជនដល់រចនាសម្ព័ន្ធគ្រប់ជាន់ថ្នាក់នៅមូលដ្ឋានរៀងៗខ្លួន៕

(ភ្នំពេញ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញជាអធិបតី និងថ្លែងសុន្ទរកថាក្នុង «កិច្ចប្រជុំទូលាយប្រធានសមាគមនៃមហាសន្និបាតធុរជនចិនទៀជីវពិភពលោក លើកទី១១» ដោយមានការអញ្ជើញចូលរួមពីឯកឧត្តម វ៉ាង វិនពីន ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា, លោកអ្នកឧកញ៉ា ពុង ឃាវសែ ប្រធានសមាគមសម្ព័ន្ធខ្មែរ-ចិននៅកម្ពុជា និងជាប្រធានគណៈកម្មការរៀបចំមហាសន្និបាតធុរជនចិនទៀជីវពិភពលោក លើកទី១១ ព្រមទាំងថ្នាក់ដឹកនាំក្រសួង-ស្ថាប័នពាក់ព័ន្ធ គណៈប្រតិភូធុរជនចិនទៀជីវ វិនិយោគិន និងភ្ញៀវកិត្តិយសជាតិ និងអន្តរជាតិប្រមាណជាង ៤០០នាក់ មកពីបណ្តាប្រទេសនានាជុំវិញពិភពលោក។ក្នុងឱកាសនេះដែរ ឯកឧត្តមរដ្ឋមន្ត្រី បានគូសបញ្ជាក់ថា មហាសន្និបាតធុរជនចិនទៀជីវពិភពលោក លើកទី១១ ដែលគ្រោងនឹងប្រព្រឹត្តទៅនៅព្រះរាជាណាចក្រកម្ពុជា ចាប់ពីថ្ងៃទី២ ដល់ថ្ងៃទី៥ ខែធ្នូ ឆ្នាំ២០២៦ គឺជាព្រឹត្តិការណ៍អន្តរជាតិដ៏មានសារៈសំខាន់ និងជាលើកទី១ ក្នុងប្រវត្តិសាស្ត្រដែលមហាសន្និបាតនេះត្រូវបានរៀបចំឡើងនៅក្រៅប្រទេសចិន។ ព្រឹត្តិការណ៍នេះនឹងក្លាយជាឱកាសដ៏មានតម្លៃសម្រាប់កម្ពុជាក្នុងការបង្ហាញពីសក្តានុពលសេដ្ឋកិច្ច បរិយាកាសវិនិយោគ និងភាពទាក់ទាញនៃវិស័យទេសចរណ៍កម្ពុជាទៅកាន់ឆាកអន្តរជាតិ ព្រមទាំងពង្រឹងចំណងមិត្តភាព និងកិច្ចសហប្រតិបត្តិការរវាងកម្ពុជា និងចិនឱ្យកាន់តែរឹងមាំ។ទន្ទឹមនឹងនេះ ឯកឧត្តមរដ្ឋមន្ត្រី បានបញ្ជាក់ថា កម្ពុជា នៅតែរក្សាបាននូវស្ថិរភាពនយោបាយ សន្តិសុខ និងសេដ្ឋកិច្ច ដែលជាមូលដ្ឋានដ៏សំខាន់សម្រាប់ការអភិវឌ្ឍវិស័យទេសចរណ៍ និងការទាក់ទាញវិនិយោគិនបរទេស។ សរុបជារួម កម្ពុជា គឺជាគោលដៅទេសចរណ៍ប្រកបដោយសុខសុវត្ថិភាព មិត្តភាព និងបដិសណ្ឋារកិច្ចដ៏កក់ក្តៅ ដែលត្រៀមខ្លួនរួចជាស្រេចក្នុងការទទួលស្វាគមន៍ភ្ញៀវទេសចរ និងវិនិយោគិនពីជុំវិញពិភពលោក។គួរបញ្ជាក់ថា​ ប្រជាពលរដ្ឋចិនអាចចូលមកកម្ពុជាដោយមិនចាំបាច់ស្នើសុំទិដ្ឋាការ ក្នុងអំឡុងពេលសាកល្បងចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ ដោយអាចស្នាក់នៅរយៈពេល ១៤ថ្ងៃ និងអាចចូលចេញបានច្រើនដង។ សូមជម្រាបជូនថា យោងតាមស្ថិតិទេសចរណ៍ ឆ្នាំ២០២៥ កម្ពុជាបានទទួលភ្ញៀវទេសចរអន្តរជាតិប្រមាណ ៦,៧លាននាក់ ដែលក្នុងនោះមានភ្ញៀវទេសចរចិនជាង ១,២លាននាក់ កើនឡើងប្រមាណ ៤២ភាគរយ។ ដោយឡែក ក្នុងរយៈពេលប្រាំខែដំបូងនៃឆ្នាំ២០២៦ ភ្ញៀវទេសចរចិនបានឈរនៅលំដាប់ទី១ ក្នុងចំណោមភ្ញៀវទេសចរអន្តរជាតិដែលធ្វើដំណើរមកកម្ពុជា ដែលឆ្លុះបញ្ចាំងពីសក្តានុពលខ្ពស់នៃទីផ្សារទេសចរចិនសម្រាប់វិស័យទេសចរណ៍កម្ពុជា៕

(បាត់ដំបង)៖ ផ្អើលស្រុកបវេល! អ្នកបាត់ដំបង 2នាក់ ឈ្នះរង្វាន់អ្នកជិតខាងល្អពីប៊ូសស្រ្តងភ្លាម សម្រេចចិត្តចែកលុយឱ្យអ្នកជិតខាងម្នាក់ 168$ ថែមទាំងម៉ៅសៅម៉ាវញុំាជុំគ្នាសប្បាយពេញមួយចម្ការទៀត។ ម្ចាស់រង្វាន់ទាំង2នាក់ រួមមាន ហុង រ៉ាឌី ភេទស្រី អាយុ27ឆ្នាំ បច្ចុប្បន្នធ្វើការសំណង់នៅកំពង់សោម និង ធូ ថា ភេទប្រុស អាយុ24ឆ្នាំ បច្ចុប្បន្នធ្វើស្រែចម្ការនៅស្រុកបវេល ខេត្តបាត់ដំបង។ ក្រោយទទួលបានរង្វាន់ពីប៊ូសស្រ្តង ពួកគាត់ក៏បាននាំអ្នកជិតខាងល្អរបស់ខ្លួនមកទទួលលុយម្នាក់ 168$ នៅនឹងកន្លែងផងដែរ។ បរិយាកាសកាន់តែអ៊ូអរ ពួកគាត់រៀបចំជប់លៀងញុំាសៅម៉ាវពេញមួយចម្ការនៅស្រុកបវេល ខេត្តបាត់ដំបង។ គួររំលឹកផងដែរថា រង្វាន់អ្នកជិតខាងល្អ 168$ នេះ ម្ចាស់រង្វាន់អាចជ្រើសរើសចែកលុយ 168$ ឱ្យនរណាក៏បាន ដែលគាត់ចាត់ទុកថាជាអ្នកជិតខាងល្អរបស់គាត់ តាមចំនួនដែលក្រុមហ៊ុនកំណត់។ ប៊ូសស្រ្តង ឆ្ងាញ់ រសជាតិដិតជ្រៅ មានរង្វាន់ច្រើនកែប្រែជីវិតបងប្អូនភ្លាមៗ!

(ភ្នំពេញ)៖ ឱកាសល្អ មិនគួររំលងសម្រាប់ហ្វេន Messi និង Ronaldo! មកសាកសមត្ថភាពស៊ុតប៉េណាល់ទី ឈ្នះលុយពិតៗបានភ្លាមៗ ក្នុងព្រឹត្តិការណ៍ “ប៊ូសស្រ្តងប៉េណាល់ទីឈ្នះលុយ” នៅគ្រប់តារាងបាល់ទាត់រៀងរាល់ថ្ងៃសៅរ៍។សប្ដាហ៍នេះប្រកួតនៅថ្ងៃសៅរ៍ ទី13ខែមិថុនា ឆ្នាំ2026 នៅតារាងបាល់ទាត់“ផ្ការីកគ្រប់រដូវ” រាជធានីភ្នំពេញ ចាប់ពីម៉ោង 6ល្ងាចតទៅ។ កុំបង្កង់យូរ! ចំនួនមានកំណត់! បងប្អូនអាចចុះឈ្មោះបានភ្លាមៗនៅទីតាំងប្រកួតផ្ទាល់ឱ្យបានមុនគេ ឬស្កេន QR ដើម្បីចុះឈ្មោះ។ លក្ខខណ្ឌចូលរួម 1. មានសុខភាពល្អ, 2. ពាក់ឯកសណ្ឋានឈុតកីឡា, 3. អាយុចាប់ពី 16ឆ្នាំឡើងទៅ និង 4. Follow Page Boostrong។ ប៊ូសស្រ្តងលើកស្ទួយវិស័យកីឡា! ស្រលាញ់កីឡា ញុំាប៊ូសស្រ្តង!

(ភ្នំពេញ)៖ ឯកឧត្តម ហួត ស៊ីនាដ រដ្ឋលេខាធិការ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានខណ្ឌពោធិ៍សែនជ័យ តំណាងដ៏ខ្ពង់ខ្ពស់របស់ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខណ្ឌពោធិ៍សែនជ័យ នៅព្រឹកថ្ងៃសុក្រ ទី១២ ខែមិថុនា ឆ្នាំ២០២៦ បានអញ្ជើញជាអធិបតីក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខណ្ឌពោធិ៍សែនជ័យ អាណត្តិទី៤ ឆ្នាំ២០២៦ នៅបរិវេណវត្តព្រៃស្ពឺ សង្កាត់ចោមចៅទី២ ខណ្ឌពោធិ៍សែនជ័យ ដែលមានប្រជាពលរដ្ឋចូលរួមប្រមាណជាង ៦០០នាក់។វេទិកាផ្សព្វផ្សាយ និងពិគ្រោះយោបល់នេះ ត្រូវបានរៀបចំឡើងក្នុងគោលបំណងស្តាប់មតិយោបល់ សំណើ និងសំណូមពររបស់ប្រជាពលរដ្ឋ អំពីការអនុវត្តគោលនយោបាយ ការអភិវឌ្ឍមូលដ្ឋាន និងការផ្តល់សេវាសាធារណៈ ព្រមទាំងផ្តល់នូវដំណោះស្រាយលើបញ្ហាប្រឈមនានាដែលកើតមានឡើងនៅក្នុងមូលដ្ឋានសង្កាត់ទាំង ៧ នៃខណ្ឌពោធិ៍សែនជ័យ។បន្ទាប់ពីស្តាប់របាយការណ៍របស់ក្រុមប្រឹក្សាខណ្ឌ រដ្ឋបាលខណ្ឌ និងមតិយោបល់របស់លោក សក់ ច័ន្ទកញ្ញារិទ្ធ អភិបាលនៃគណៈអភិបាលខណ្ឌពោធិ៍សែនជ័យ ដែលបានឆ្លើយតបទៅនឹងសំណើ និងសំណូមពររបស់ប្រជាពលរដ្ឋរួចមក ឯកឧត្តមរដ្ឋលេខាធិការ បានស្នើឱ្យអាជ្ញាធរគ្រប់លំដាប់ថ្នាក់ បន្តយកចិត្តទុកដាក់ក្នុងការពង្រឹងសន្តិសុខ សណ្តាប់ធ្នាប់សាធារណៈ ជាអាទិ៍ ការបង្ក្រាបបទល្មើសឆបោកតាមប្រព័ន្ធអនឡាញខុសច្បាប់ បញ្ហាក្មេងទំនើង គ្រឿងញៀនខុសច្បាប់ និងល្បែងស៊ីសងជាដើម។ ការអភិវឌ្ឍមូលដ្ឋានក៏ជាកត្តាសំខាន់ដែលទាមទារឱ្យមានការចូលរួមពីគ្រប់ភាគីពាក់ព័ន្ធទាំងអស់ ជាពិសេសប្រជាពលរដ្ឋនៅមូលដ្ឋានផ្ទាល់។ឯកឧត្តមរដ្ឋលេខាធិការ បានបញ្ជាក់បន្ថែមទៀតថា បងប្អូនប្រជាពលរដ្ឋដែលជួបប្រទះបញ្ហាប្រឈមនានាក្នុងការស្នើសុំសេវាសាធារណៈ សូមទំនាក់ទំនងដោយផ្ទាល់ជាមួយអង្គភាពច្រកចេញចូលតែមួយនៃរដ្ឋបាលខណ្ឌ ដើម្បីចៀសវាងការលើកឡើងបញ្ហានៅតាមបណ្តាញសង្គមផ្សេងៗ ដែលមិនមែនជាយន្តការដោះស្រាយបញ្ហាដ៏សមស្របនោះទេ។ចុងក្រោយ ឯកឧត្តមរដ្ឋលេខាធិការ បានជម្រាបជូនអង្គវេទិកាអំពីឱកាសការងារ និងការបណ្តុះបណ្តាលបច្ចេកទេស និងវិជ្ជាជីវៈ ហើយបានអំពាវនាវដល់បងប្អូនប្រជាពលរដ្ឋដែលមិនទាន់មានការងារធ្វើ និងមានបំណងចង់បានជំនាញច្បាស់លាស់មួយប្រចាំជីវិត សូមទំនាក់ទំនងមកក្រសួងការងារ និងបណ្តុះបណ្តាលវិជ្ជាជីវៈ តាមរយៈលេខ ១២៩៧៕

(ភ្នំពេញ)៖ វិទ្យាស្ថានជាតិការងារ សហការជាមួយបេឡាជាតិសន្តិសុខសង្គម (ប.ស.ស.)នៃក្រសួងការងារនិងបណ្តុះបណ្តាលវិជ្ជាជីវៈ បានរៀបចំវគ្គបណ្តុះបណ្តាលពិសេសមួយ ជូនដល់មន្ត្រីអធិការកិច្ចសន្តិសុខសង្គមទាំងនៅថ្នាក់កណ្តាល និងសាខា ប.ស.ស. រាជធានី-ខេត្ត សរុបចំនួន ១៦៣នាក់ ចាប់ពីថ្ងៃទី១១ ដល់ថ្ងៃទី១២ ខែមិថុនា ឆ្នាំ២០២៦ ក្នុងគោលបំណងធានាឱ្យមន្ត្រីអធិការកិច្ចសន្តិសុខសង្គមអាចបំពេញតួនាទី និងភារកិច្ចរបស់ខ្លួនបានប្រកបដោយប្រសិទ្ធភាព វិជ្ជាជីវៈ និងបុរេសកម្ម។ ថ្លែងក្នុងពិធីបិទវគ្គបណ្តុះបណ្តាល ឯកឧត្តម ហួត ស៊ីនាដ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈបានគូសបញ្ជាក់ថា មន្ត្រីអធិការកិច្ចសន្តិសុខសង្គម គឺជាប្រតិបត្តិករដ៏មានសារៈសំខាន់ក្នុងការត្រួតពិនិត្យការអនុវត្តបទប្បញ្ញត្តិច្បាប់នៅតាមសហគ្រាស ក្រុមហ៊ុន និងរោងចក្រនានា។ ឯកឧត្តមបានសង្កត់ធ្ងន់ថា ការពង្រឹងសមត្ថភាពមន្ត្រីអធិការកិច្ចសន្តិសុខសង្គម និងការបង្កើនប្រសិទ្ធភាពផ្នែកអធិការកិច្ច គឺជាអាទិភាពមួយនៅក្នុងក្របខ័ណ្ឌគោលនយោបាយវិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ។ ឯកឧត្តមបានបន្ថែមថា មន្ត្រីអធិការកិច្ចសន្តិសុខសង្គមមិនត្រឹមតែផ្តោតលើការអនុវត្តរបបសន្តិសុខសង្គមប៉ុណ្ណោះទេ ប៉ុន្តែថែមទាំងត្រូវធ្វើការងារដោយប្រទាក់ក្រឡាគ្នាជាមួយអធិការការងារ និងអធិការពេទ្យការងារ ដើម្បីរួមគ្នាការពារសិទ្ធិ និងផលប្រយោជន៍របស់បងប្អូនកម្មករនិយោជិត ដែលជាសមាជិក ប.ស.ស. តាមបណ្តាសហគ្រាស ក្រុមហ៊ុន និងរោងចក្រ។សម្រាប់ខ្លឹមសារសិក្សាក្នុងវគ្គបណ្តុះបណ្តាលរយៈពេល ២ថ្ងៃនេះ បានគ្របដណ្តប់ទៅលើប្រធានបទសំខាន់ៗចំនួន ៤ រួមមាន ច្បាប់ស្តីពីការងារ កិច្ចសន្យាការងារ លក្ខខណ្ឌសុវត្ថិភាពនិងសុខភាពការងារ ព្រមទាំងគ្រោះថ្នាក់ការងារនិងជំងឺវិជ្ជាជីវៈ៕

(សៀមរាប)៖ ក្នុងយុទ្ធនាការសកម្មភាព គាំពារ និងផ្តល់ជូនឱកាសការងារ ដើម្បីលើកកម្ពស់ជីវភាពនៅតាមមូលដ្ឋានរបស់ពលរដ្ឋ នាព្រឹកថ្ងៃសុក្រ ទី១២ ខែមិថុនា ឆ្នាំ២០២៦ នេះ ក្រសួងការងារនិងបណ្ដុះបណ្ដាលវិជ្ជាជីវៈ បានបន្តរៀបចំវេទិកាការងារ សន្តិសុខសង្គម និងបណ្ដុះបណ្ដាលវិជ្ជាជីវៈ នៅសាលាបឋមសិក្សា សម្ដេច ហ៊ុនសែន រណសិរ្សត្រីភូមិ ស្រុកសូទ្រនិគម ខេត្តសៀមរាប ក្រោមប្រធានបទ «ខ្មែរជួយរកការងារ និងផ្ដល់ការងារឱ្យខ្មែរ» ដោយមានការចូលរួមពីបណ្ដារោងចក្រ សហគ្រាស សមាគម និងក្រុមហ៊ុនធំៗចំនួន ៥ ក្នុងការនាំយកឱកាសការងារសរុបចំនួន ៣ ៥៥០ កន្លែង ជូនដល់ប្រជាពលរដ្ឋ យុវជន និងអតីតពលករត្រឡប់មកពីក្រៅប្រទេស។ឯកឧត្តម ប៉ុក ប៉ាន់ រដ្ឋលេខាធិការ តំណាងដ៏ខ្ពង់ខ្ពស់របស់ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានគូសបញ្ជាក់ថា ការរកការងារនៅក្នុងស្រុក អាចតាមរយៈ ទីភ្នាក់ងារជាតិមុខរបរ និងការងារ ដែលជាសេនាធិការ របស់ក្រសួងការងារនិងបណ្តុះបណ្តាលវិជ្ជាជីវៈ នឹងផ្តល់អត្ថប្រយោជន៍ដល់បងប្អូនតាមរយៈបេឡាជាតិសន្តិសុខសង្គម (ប.ស.ស.) នូវរបបចំនួនបី រួមមានរបបហានិភ័យការងារ របបថែទាំសុខភាព និងរបបសោធននិវត្តន៍ ដែលមានកិច្ចគាំពារប្រហាក់ប្រហែលនឹងមន្ត្រីរាជការដែរ។ជាមួយគ្នានោះ ឯកឧត្តមបានក្រើនរំលឹកពីហានិភ័យនៃការធ្វើចំណាកស្រុកខុសច្បាប់ ដែលប្រឈមនឹងការកេងប្រវ័ញ្ច និងខ្វះការការពារតាមផ្លូវច្បាប់។ ការធ្វើការងារក្នុងស្រុក មិនត្រឹមតែធានាបាននូវប្រាក់ចំណូលស្ថិរភាពប៉ុណ្ណោះទេ ប៉ុន្តែថែមទាំងផ្ដល់ឱកាសឱ្យបានជួបជុំ និងថែទាំក្រុមគ្រួសារជាទីស្រឡាញ់ទៀតផង។ ក្នុងករណីមានបំណងទៅធ្វើការនៅក្រៅប្រទេសដែលមានប្រាក់ខែខ្ពស់ ពលរដ្ឋត្រូវជ្រើសរើសក្រុមហ៊ុនស្របច្បាប់ និងធ្វើការផ្ទៀងផ្ទាត់បញ្ជីឈ្មោះជាមួយអាជ្ញាធរ ឬទាក់ទងខ្សែទូរស័ព្ទជំនួយរហ័ស Hotline លេខ ១២៩៧ សម្រាប់ផ្នែកផ្គូផ្គងការងារ និងលេខ ១២៨៦ សម្រាប់ផ្នែក ប.ស.ស.។លើសពីនេះ ឯកឧត្តមរដ្ឋលេខាធិការបានលើកទឹកចិត្តដល់យុវជនឱ្យចូលរៀនជំនាញបច្ចេកទេសនៅវិទ្យាស្ថានពហុបច្ចេកទេសភូមិភាគតេជោសែនសៀមរាប និងវិទ្យាស្ថានជាតិពហុបច្ចេកទេសអង្គរ តាមរយៈកម្មវិធី «TVET ១,៥ លាន» ដែលជាកម្មវិធីជាតិឥតគិតថ្លៃ និងមានប្រាក់ឧបត្ថម្ភប្រចាំខែ រួមមានជំនាញការជួសជុលម៉ាស៊ីនត្រជាក់ អគ្គិសនី សំណង់ សេវាកម្មកាហ្វេ សម្ផស្សឬសាឡន សម្អាងការ និងជំនាញជាច្រើនទៀត រួមទាំងការធ្វើតេស្តទទួលស្គាល់ជំនាញពីមុន (RPL) ដើម្បីធានាបាននូវការងារធ្វើ និងប្រាក់ឈ្នួលសមរម្យ។សូមបញ្ជាក់ថា ឱកាសការងារចំនួន ៣ ៥៥០ កន្លែងក្នុងខេត្តសៀមរាបនេះ គឺជាផ្នែកមួយនៃឱកាសការងារសរុបជាង ៩ ម៉ឺនកន្លែង ដែលក្រសួងកំពុងផ្ដល់ជូននៅទូទាំងព្រះរាជាណាចក្រកម្ពុជា ដោយមានការចូលរួមជ្រើសរើសបុគ្គលិកដោយផ្ទាល់ពី រោងចក្រ វេនធូរ៉ា លេឌើវែរ អឹមអេហ្វវ៉ាយ (ស៊ីឌី) ឯ.ក, រោងចក្រខាសវ៉ែល អឹភើរឹល ,សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC), ក្រុមហ៊ុន អ៊ែកស៊ល អេស៊ា យូមេន រីសសស៍ និងក្រុមហ៊ុន វង្ស វឌ្ឍនៈ មេនផៅវ័រ ឯ.ក សម្រាប់ការងារនៅប្រទេសជប៉ុន៕

(ភ្នំពេញ)៖ នៅថ្ងៃទី១២ ខែមិថុនា ឆ្នាំ២០២៦ ហាងទំនិញ វីងសប និងហាងK’FAE បានបើកសម្ពោធសាខាថ្មី មេគង្គ លែន ៦A ជាផ្លូវការនៅគម្រោង មេគង្គ ស៊ីធី នៃ បុរី មេគង្គ លែន ដែលស្ថិតនៅតាមបណ្ដោយផ្លូវជាតិ ៦A នាំមកនូវបទពិសោធទិញទំនិញប្រចាំថ្ងៃកាន់តែរហ័ស រលូន និងងាយស្រួលជូនដល់ប្រជាពលរដ្ឋក្នុងសហគមន៍។ពិធីសម្ពោធជាផ្លូវការដ៏ធំនេះ មានការអញ្ជើញចូលរួមជាកិត្តិយសដ៏ខ្ពង់ខ្ពស់ពីសំណាក់ អ្នកឧកញ៉ា គិត ម៉េង ប្រធានក្រុមប្រឹក្សាភិបាល និងនាយកប្រតិបត្តិនៃក្រុមហ៊ុន រ៉ូយ៉ាល់គ្រុប, អ្នកឧកញ៉ា ជាម ឃុនណាត ស្ថាបនិក និងជាប្រធានក្រុមប្រឹក្សាភិបាល ក្រុមហ៊ុន ខេ អិន អិន គ្រុប, លោក Stephane Pariente នាយកគ្រប់គ្រងអាជីវកម្មលក់រាយរបស់ហាងទំនិញ Wingshop និងហាង K’FAE, លោកស្រី ឌឿន ច័ន្ទបុប្ផា ម្ចាស់វីងសប សាខា មេគង្គ លែន ៦A, លោក ឆេង សុច័ន្ទណាវង្ស ជំនួយការ អគ្គនាយក បុរី មេគង្គ លែន ព្រមទាំងមានការចូលរួមពី ដៃគូអាជីវកម្មអ្នកសារព័ត៌មាន និងភ្ញៀវកិត្តិយសជាច្រើនរូប។នៅក្នុងឱកាសដ៏វិសេសវិសាលនេះ ការបើកដំណើរការ ហាងទំនិញវីងសប និងហាង K’FAE សាខា មេគង្គ លែន ៦A គឺឆ្លុះបញ្ចាំងពីការប្តេជ្ញាចិត្តរបស់ក្រុមហ៊ុនដែលបង្កើតឡើងដោយសហគ្រិនខ្មែរសុទ្ធសាធ ១០០% ដែលជាមោទនភាពជាតិយើង ក្នុងការផ្គត់ផ្គង់នូវទំនិញប្រើប្រាស់ប្រចាំថ្ងៃដ៏សម្បូរបែប ដែលមានផលិតផលភាគច្រើនបំផុតជាផលិតរបស់ខ្មែរផលិតក្នុងស្រុក និងនាំចូលពីបរទេស ដែលមានគុណភាពខ្ពស់ ព្រមទាំងជាការគាំទ្រដល់សហគ្រាសធុនតូច និងមធ្យមនៅក្នុងប្រទេសកម្ពុជាក្នុងការដាក់លក់ផលិតផលរបស់ខ្លួនផងដែរ។វត្តមានរបស់ហាងទំនិញ វីងសប នៅក្នុងតំបន់លំនៅឋានដ៏មានសក្តានុពលនៃគម្រោង មេគង្គ ស៊ីធី នៃ បុរី មេគង្គ លែន មិនត្រឹមតែជួយបំពេញតម្រូវការ និងផ្តល់ភាពងាយស្រួលខ្ពស់ដល់អតិថិជន និងប្រជាពលរដ្ឋដែលរស់នៅក្នុងបុរីប៉ុណ្ណោះទេ ប៉ុន្តែថែមទាំងជួយលើកកម្ពស់តម្លៃរស់នៅ និងពង្រឹងសហគមន៍អាជីវកម្មនៅក្នុងបុរីឱ្យកាន់តែរស់រវើក។ជាមួយគ្នានោះដែរ លោកស្រី ឌឿន ច័ន្ទបុប្ផា ម្ចាស់វីងសប សាខា មេគង្គ លែន ៦A បានបង្ហាញក្តីរំភើបរីករាយ និងមានទំនុកចិត្តយ៉ាងមុតមាំលើគំរូអាជីវកម្ម របស់ហាងទំនិញ វីងសប និងហាង K’FAE ដែលមានការគាំទ្រយ៉ាងពេញទំហឹងលើប្រព័ន្ធប្រតិបត្តិការ ខ្សែសង្វាក់ផ្គត់ផ្គង់ និងការធ្វើទីផ្សារប្រកបដោយចីរភាព និងរឹងមាំ ដែលអនុញ្ញាតឱ្យម្ចាស់អាជីវកម្មក្នុងស្រុកអាចដំណើរការទៅមុខដោយជោគជ័យ។សូមជម្រាបផងដែរថា ហាងទំនិញ វីងសប និងហាង K’FAE ជាផ្នែកមួយនៃក្រុមហ៊ុន រ៉ូយ៉ាល់គ្រុប ដែលជាគំនិតថ្មីនៃផ្សារទំនើបលក់រាយនៅកម្ពុជា។ តាមរយៈការបើកសម្ពោធសាខាថ្មីនៅគម្រោង«មេគង្គ ស៊ីធី» នៃបុរី មេគង្គ លែន នាពេលនេះ វីងសប បន្តពង្រីកវិសាលភាពអាជីវកម្មរបស់ខ្លួនទូទាំងប្រទេស ដើម្បីកំណត់អនាគតនៃផ្សារទំនើបលក់រាយ និងចូលរួមចំណែកអភិវឌ្ឍប្រព័ន្ធអេកូឡូស៊ីសេដ្ឋកិច្ចឌីជីថលនៅកម្ពុជាឱ្យកាន់តែរីកចម្រើន។សូ មអញ្ជើញបងប្អូនចូលរួមគាំទ្រផលិតផលក្នុងស្រុក និងអបអរជាមួយអាជីវកម្មខ្មែរយើងទាំងអស់គ្នា៕

(ទីក្រុងហ្សឺណែវ)៖ នៅថ្ងៃទី១១ ខែមិថុនា ឆ្នាំ២០២៦ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានអញ្ជើញជួបពិភាក្សាការងារទ្វេភាគីជាមួយ ឯកឧត្តម ហ្សេរ៉ូម កូសង់ដេ (Jérôme Cosandey) អនុប្រធានរដ្ឋលេខាធិការដ្ឋានកិច្ចការសេដ្ឋកិច្ច (SECO) នៃប្រទេសស្វ៊ីស នៅក្នុងសន្និសីទអន្តរជាតិខាងការងារលើកទី១១៤ ក្នុងប្រទេសស្វ៊ីស ដើម្បីបង្ហាញពីវឌ្ឍនភាពនៃកិច្ចសហប្រតិបត្តិការ ស្វែងរកឱកាសពង្រឹងកិច្ចសហប្រតិបត្តិការទ្វេភាគីលើវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) ការអភិវឌ្ឍកម្មវិធីសិក្សាឱ្យស្របតាមតម្រូវការរបស់ឧស្សាហកម្ម ក៏ដូចជាភាពជាដៃគូប្រកបដោយសក្តានុពល ដែលផ្តល់ផលប្រយោជន៍ដល់គ្នាទៅវិញទៅមក។នាឱកាសពិភាក្សាដ៏មានសារៈសំខាន់នោះ ឯកឧត្តមរដ្ឋមន្ត្រី បានថ្លែងអំណរគុណយ៉ាងជ្រាលជ្រៅ និងវាយតម្លៃខ្ពស់ចំពោះសមិទ្ធផលនៃកិច្ចសហប្រតិបត្តិការរវាងកម្ពុជា និងប្រទេសស្វ៊ីស តាមរយៈទីភ្នាក់ងារស្វ៊ីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) ដែលជាដៃគូដ៏សំខាន់ក្នុងកិច្ចសហប្រតិបត្តិការអភិវឌ្ឍន៍ជាមួយកម្ពុជា ជាពិសេសក្នុងការអភិវឌ្ឍប្រកបដោយបរិយាបន្ន ការអភិវឌ្ឍជំនាញ និងការធ្វើសមាហរណកម្មកម្លាំងពលកម្មទៅក្នុងទីផ្សារការងារ ព្រមទាំងការគាំទ្ររយៈពេលវែងដល់ការពង្រឹងស្ថាប័ន។ទន្ទឹមនឹងនេះ ឯកឧត្តមរដ្ឋមន្ត្រី បានលើកឡើងពី “កម្មវិធីមុខរបរ និងការងារសមរម្យសម្រាប់យុវជននៅកម្ពុជា (DEY)” ដែលជាគំនិតផ្តួចផ្តើមដ៏ចាំបាច់មួយ កំពុងជួយបង្កើនលទ្ធភាពទទួលបានការងារដល់យុវជន ពង្រឹងការផ្សារភ្ជាប់រវាងការបណ្តុះបណ្តាល TVET និងវិស័យឧស្សាហកម្ម ព្រមទាំងលើកកម្ពស់ឱកាសការងារប្រកបដោយបរិយាបន្ន។ លើសពីនេះ ឯកឧត្តមក៏បានទទួលស្គាល់នូវឧត្តមានុវត្តន៍របស់ប្រទេសស្វ៊ីសលើឆាកអន្តរជាតិក្នុងវិស័យ TVET ជាពិសេសប្រព័ន្ធគំរូនៃការបណ្តុះបណ្តាលវិជ្ជាជីវៈ ដែលរួមបញ្ចូលការសិក្សាក្នុងថ្នាក់រៀនជាមួយបទពិសោធការងារជាក់ស្តែងនៅកន្លែងការងារ។ ឯកឧត្តម ហេង សួរ បានសម្តែងនូវការចាប់អារម្មណ៍យ៉ាងខ្លាំងផងដែរ ចំពោះការសិក្សារៀនសូត្រ និងបទពិសោធល្អៗរបស់ប្រទេសស្វ៊ីស លើប្រព័ន្ធកម្មសិក្សា ការចូលរួមពីវិស័យឧស្សាហកម្ម ការបញ្ជាក់វិញ្ញាបនបត្រជំនាញ និងការធានាគុណភាពជំនាញ ដែលឯកឧត្តមបានចាត់ទុកថា ពិតជាមានសារៈសំខាន់ខ្លាំងណាស់សម្រាប់របៀបវារៈកំណែទម្រង់នៅកម្ពុជា។ជាមួយគ្នានេះ ឯកឧត្តមក៏បានគូសបញ្ជាក់ពីដំណើរការកំណែទម្រង់កម្មវិធី TVET និងការផ្លាស់ប្តូរកម្លាំងពលកម្មរបស់កម្ពុជា ដែលផ្តោតលើការលើកកម្ពស់ជំនាញ ការអភិវឌ្ឍជំនាញឌីជីថល ការពង្រឹងការចូលរួមរបស់វិស័យឧស្សាហកម្ម និងការពង្រីកឱកាសទទួលបានការបណ្តុះបណ្តាលតាមរយៈកម្មវិធី TVET ១,៥ លាន សម្រាប់យុវជនមកពីគ្រួសារក្រីក្រ និងងាយរងហានិភ័យ។ កិច្ចខិតខំប្រឹងប្រែងទាំងនេះមានគោលបំណងធ្វើឱ្យការបណ្តុះបណ្តាលស្របតាមតម្រូវការទីផ្សារការងារ ពង្រឹងភាពជាដៃគូជាមួយវិស័យឧស្សាហកម្ម និងបង្កើនឱកាសការងារសម្រាប់អ្នកបញ្ចប់ការសិក្សា។ជាការឆ្លើយតប ឯកឧត្តម ហ្សេរ៉ូម កូសង់ដេ បានវាយតម្លៃខ្ពស់ចំពោះការយកចិត្តទុកដាក់របស់ឯកឧត្តមរដ្ឋមន្ត្រីលើការអភិវឌ្ឍជំនាញ និងការផ្សារភ្ជាប់ TVET ជាមួយទីផ្សារការងារ។ ភាគីស្វ៊ីសបានបង្ហាញឆន្ទៈបន្តពិភាក្សាពីកិច្ចសហប្រតិបត្តិការលើប្រព័ន្ធកម្មសិក្សា ការចូលរួមរបស់វិស័យឯកជន ការធានាគុណភាព និងការផ្លាស់ប្តូរបទពិសោធរវាងប្រទេសទាំងពីរ។ ភាគីទាំងពីរបានឯកភាពគ្នា ក្នុងការស្វែងរកកិច្ចសហប្រតិបត្តិការបន្ថែមទៀតលើការអភិវឌ្ឍកម្មវិធី TVET និងការអភិវឌ្ឍជំនាញ ព្រមទាំងការកសាងសមត្ថភាព តាមរយៈការបណ្តុះបណ្តាលគ្រូបង្គោល ការធ្វើទស្សនកិច្ចសិក្សា និងការផ្លាស់ប្តូរចំណេះដឹងផងដែរ៕

(ភ្នំពេញ)៖ នារសៀលថ្ងៃទី១១ ខែមិថុនា ឆ្នាំ២០២៦ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាអនុប្រធានគណៈកម្មការជាតិរៀបចំកិច្ចប្រជុំកំពូលហ្វ្រង់កូហ្វូនីលើកទី២០ ឆ្នាំ២០២៦ បានអញ្ជើញចូលរួមជាសហអធិបតីក្នុងកិច្ចប្រជុំស្តីពី «ការផ្តល់ព័ត៌មានទូទៅ និងសកម្មភាពត្រៀមរៀបចំព្រឹត្តការណ៍ "ភូមិហ្រ្វង់កូហ្វូន"» ក្រោមសហអធិបតីភាពលោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងជាប្រធានអនុគណៈកម្មការទី៥ ដោយមានការចូលរួមពីឯកឧត្តម លោកជំទាវថ្នាក់ដឹកនាំក្រសួង-ស្ថាប័ន ឯកឧត្តម និងលោកជំទាវឯកអគ្គរាជទូត និងតំណាងស្ថានទូតនៃបណ្តាប្រទេសនិយាយភាសាបារាំង ដៃគូអភិវឌ្ឍន៍អន្តរជាតិ សភាពាណិជ្ជកម្ម តំណាងវិស័យឯកជន និងភាគីពាក់ព័ន្ធសរុបប្រមាណជាង១០០រូប។ក្នុងឱកាសនេះដែរ ឯកឧត្តមរដ្ឋមន្ត្រី បានគូសបញ្ជាក់ថាឆ្នាំ២០២៦ គឺជាឆ្នាំប្រវត្តិសាស្ត្រសម្រាប់កម្ពុជា ដែលទទួលបានកិត្តិយសធ្វើជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនីលើកទី២០ ហើយការរៀបចំព្រឹត្តិការណ៍អម «ភូមិហ្រ្វង់កូហ្វូន» មិនត្រឹមតែជាមោទនភាពជាតិប៉ុណ្ណោះទេ ប៉ុន្តែក៏ជាឱកាសដ៏សំខាន់ក្នុងការបង្ហាញពី «ស្នាមញញឹមកម្ពុជា ជាស្នាមញញឹមហ្វ្រង់កូហ្វូនី» ទៅកាន់ពិភពលោកផងដែរ។ ឯកឧត្តមរដ្ឋមន្រ្តី ក៏បានមានប្រសាសន៍បន្ថែមថា វាក៏ជាឱកាសសម្រាប់ធ្វើការបង្ហាញនូវវប្បធម៌ និងទំនៀមទំលាប់នៃប្រទេសជាសមាជិកជាង៩០ប្រទេស ផលិតផល និងសេវាកម្មរបស់សហគ្រិនទាំងអស់ជូនដល់ថ្នាក់ដឹកនាំជុំវិញពិភពលោក គណៈប្រតិភូពីគ្រប់ទ្វីប និងសាធារណជនដែលរំពឹងថានឹងមកទស្សនាជាង១០០.០០០នាក់ក្នុងអំឡុងរៀបចំព្រឹត្តិការណ៍នេះ។កិច្ចប្រជុំកំពូលហ្វ្រង់កូហ្វូនី ជាជំនួបរវាងប្រមុខរដ្ឋ និងប្រមុខរដ្ឋាភិបាលនៃបណ្តាប្រទេសជាសមាជិកអង្គការអន្តរជាតិនៃក្រុមប្រទេសនិយាយភាសាបារាំង (OIF) ដើម្បីពិភាក្សា និងផ្លាស់ប្តូរយោបល់លើបញ្ហាសំខាន់ៗ ដូចជា នយោបាយអន្តរជាតិ សេដ្ឋកិច្ចពិភពលោក កិច្ចសហប្រតិបត្តិការហ្វ្រង់កូហ្វូនី សិទ្ធិមនុស្ស អប់រំ វប្បធម៌ និងប្រជាធិបតេយ្យ ជាដើម។ នាឱកាសនៃកិច្ចប្រជុំកំពូលនេះ ក៏មានរៀបចំព្រឹត្តិការណ៍អមសំខាន់ៗ ចំនួនពីរ គឺ៖ ភូមិហ្រ្វង់កូហ្វូន (Village Francophone) និង ភូមិហ្វ្រង់កូតិច (FrancoTech)។ព្រឹត្តិការណ៍អន្តរជាតិដ៏អស្ចារ្យ និងមានលក្ខណៈជាប្រវត្តិសាស្ត្រនេះ ត្រូវបានរំពឹងថានឹងមានការចូលរួមពីប្រទេសសមាជិកជាង ៩០ប្រទេស ព្រមទាំងអ្នកសារព័ត៌មានជាតិ និងអន្តរជាតិយ៉ាងច្រើនកុះករ ដែលនឹងរួមចំណែកជំរុញការផ្សព្វផ្សាយអំពីសក្តានុពលទេសចរណ៍ វប្បធម៌ និងបដិសណ្ឋារកិច្ចរបស់កម្ពុជាទៅកាន់ពិភពលោក និងលើកកម្ពស់កិត្តិនាមកម្ពុជានៅលើឆាកអន្តរជាតិ។សូមជម្រាបជូនថា ព្រឹត្តិការណ៍ «ភូមិហ្រ្វង់កូហ្វូន-Village Francophone» នឹងប្រព្រឹត្តទៅរយៈពេល៥ថ្ងៃ ចាប់ពីថ្ងៃទី១៣ ដល់ថ្ងៃទី១៧ ខែវិច្ឆិកា ឆ្នាំ២០២៦ នៅសួនច្បារវត្តបុទុមវត្តី រាជធានីភ្នំពេញ ដោយមានការរៀបចំទីតាំងសំខាន់ៗ ចំនួន៦ រួមមាន៖ ពន្លាជាតិ (National Pavilions) វេទិកាសិល្បៈប្រចាំថ្ងៃ កន្លែងសិក្ខាសាលា និងកិច្ចពិភាក្សា ភូមិម្ហូបអាហារ (Gastronomic Village) តំបន់ពិព័រណ៍ផលិតផលកម្ពុជា និងមជ្ឈមណ្ឌលព័ត៌មាន (Media Lounge)៕

(ភ្នំពេញ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ អញ្ជើញដឹកនាំកិច្ចប្រជុំពិនិត្យលើសេចក្តីព្រាងថវិកាឆ្នាំ២០២៧ ក្នុងគោលបំណងពិនិត្យនិងពិភាក្សាលើការរៀបចំផែនការយុទ្ធសាស្រ្តថវិកាឆ្នាំ២០២៧-២០២៩ និងផែនការថវិកាឆ្នាំ២០២៧ របស់ក្រសួងទេសចរណ៍។កិច្ចប្រជុំដ៏មានសារៈសំខាន់នេះ មានការអញ្ជើញចូលរួមពីឯកឧត្តម លោកជំទាវរដ្ឋលេខាធិការ អនុរដ្ឋលេខាធិការ លោកជំទាវនាយិកាវិទ្យាស្ថាន អគ្គនាយកនៃអគ្គនាយកដ្ឋានទាំង៣ លោក លោកស្រីប្រធាននាយកដ្ឋាន និងមន្ត្រីរាជការក្រសួងទេសចរណ៍សរុប ៥២នាក់។ថ្លែងក្នុងកិច្ចប្រជុំនេះ ឯកឧត្តមរដ្ឋមន្ត្រី មានប្រសាសន៍ថា យោងសារាចរលេខ ០៦ សរ ចុះថ្ងៃទី១៥ ខែឧសភា ឆ្នាំ២០២៦ រាជរដ្ឋាភិបាលបន្តផ្តោតជាសំខាន់លើការបន្តពង្រឹងស័ក្តិសិទ្ធភាពថវិកា, ទាំងកម្រិតវិភាជន៍ និងកម្រិតប្រតិបត្តិការ, តាមរយៈការបន្តធ្វើអាទិភាវូបនីយកម្មចំណាយ ដោយក្នុងនោះក្របខ័ណ្ឌចំណាយសាធារណៈ នឹងត្រូវបានរៀបចំឡើង ដើម្បីតម្រង់ទិសធនធានទៅកាន់មុខសញ្ញាដែលជាអាទិភាពសំខាន់ៗចំពោះមុខ។ក្នុងន័យនេះ ការតម្រង់ទិសថវិកាមានសារៈសំខាន់ ដែលត្រូវជ្រើសរើសសកម្មភាពអាទិភាព, មានសូចនាករច្បាស់លាស់ និងចំគោលដៅ ដោយបន្ស៊ីជាមួយកម្មវិធីនយោបាយ, យុទ្ធសាស្ត្របញ្ចកោណ-ដំណាក់កាលទី១, គោលនយោបាយ, យុទ្ធសាស្ត្រ និងផែនការគន្លឹះនានា ដែលពាក់ព័ន្ធនឹងវិស័យទេសចរណ៍៕