(កំពង់ស្ពឺ)៖ នាព្រឹកថ្ងៃទី៧ ខែមិថុនា ឆ្នាំ២០២៦ ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍ គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តកំពង់ស្ពឺ បានអញ្ជើញជាអធិបតីភាពក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារទីស្នាក់ការគណបក្សឃុំស្តុក និងប្រកាសបញ្ចូលសមាជិកគណបក្សថ្មីរបស់គណបក្សប្រជាជនកម្ពុជានៃឃុំស្តុក ស្រុកគងពិសី ខេត្តកំពង់ស្ពឺ។ ពិធីនេះ មានការអញ្ជើញចូលរួមពីសំណាក់ ឯកឧត្តមប្រធាន អនុប្រធាន គណៈកម្មាធិការគណបក្សខេត្ត ឯកឧត្តមប្រធានក្រុមការងារគណបក្សចុះមូលដ្ឋានស្រុកគងពិសី ឯកឧត្តម លោកជំទាវ លោក លោកស្រី ប្រធាន ក្រុមការងារគណបក្សចុះមូលដ្ឋានឃុំទាំង១២ ប្រធានក្រុមការងារគណបក្សចុះមូលដ្ឋានឃុំស្តុក និងក្រុមគ្រួសារគណបក្សប្រជាជនកម្ពុជាជាច្រើនរូប។ជាកិច្ចចាប់ផ្ដើម លោក អ៊ុ ចាំ ប្រធានគណៈកម្មាធិការគណៈបក្សឃុំស្ដុក បានធ្វើរបាយការណ៍ស្វាគមន៍យ៉ាងកក់ក្ដៅចំពោះវត្តមានដ៏ខ្ពង់ខ្ពស់ ឯកឧត្តម ហ៊ុន ម៉ានី ព្រមទាំងបានរាយការណ៍ពីលទ្ធផលការងារសម្រេចបានកន្លងមករបស់គណបក្សប្រជាជនកម្ពុជានៅក្នុងឃុំស្ដុក។បន្ទាប់ពីបានស្ដាប់របាយការណ៍រួចមក ឯកឧត្តម ហ៊ុន ម៉ានី បានកោតសរសើរ និងវាយតម្លៃខ្ពស់ ចំពោះគណៈកម្មាធិការគណបក្សគ្រប់ថ្នាក់ ដែលបានខិតខំប្រឹងប្រែងរួមកម្លាំងសាមគ្គីគ្នា លះបង់ទាំងពេលវេលា កម្លាំងកាយចិត្ត សម្ភារៈ និងថវិកាផ្ទាល់ខ្លួន ដើម្បីសាងសង់អគារស្នាក់ការគណបក្សថ្មីនេះឡើង និងជំរុញការអភិវឌ្ឍនៅក្នុងមូលដ្ឋានឃុំនេះកន្លងមក។ ជាមួយគ្នានេះ ឯកឧត្តម បានប្រសាសន៍ស្វាគមន៍យ៉ាងកក់ក្តៅចំពោះសមាជិកថ្មីចំនួន ៣៣៨នាក់ ដែលបានសម្រេចចិត្តចូលរួមជាមួយគណបក្សប្រជាជនកម្ពុជា ដែលជាការបង្ហាញពីការជឿជាក់ និងការគាំទ្រចំពោះបុព្វហេតុកសាង និងអភិវឌ្ឍន៍ប្រទេសជាតិ។ ឯកឧត្តម បានបន្ថែមថាគណបក្សប្រជាជនកម្ពុជាមិនល្អឥតខ្ចោះនោះទេ ប៉ុន្តែសូមបងប្អូនទុកចិត្តថា គ្រប់កាលៈទេសៈ គឺគណបក្សប្រជាជនកម្ពុជាមិនទៅណាចោលបងប្អូនឡើយ។ ឯកឧត្តម ក៏បានស្នើដល់សមាជិក សមាជិកាគណបក្សប្រជាជនកម្ពុជាទាំងអស់ត្រូវក្តាប់ឱ្យជាប់នូវកម្មវិធីនយោបាយរបស់គណបក្ស គោលការណ៍ដឹកនាំរបស់គណបក្ស ដើម្បីបង្កើនសមត្ថភាពចំណេះដឹង និងបង្កើតការជឿជាក់លើការដឹកនាំរបស់គណបក្សប្រជាជនកម្ពុជា និងត្រូវទៅចុះឈ្មោះបោះឆ្នោត ត្រៀមខ្លួនទៅបោះឆ្នោត និងបោះឆ្នោតជូនគណបក្សប្រជាជនកម្ពុជានៅឆ្នាំ២០២៧-២០២៨ខាងមុខនេះ៕

(អន្តរជាតិ)៖ លោកគីម ជុងអ៊ុន បានត្រួតពិនិត្យរោងចក្រថ្មីមួយដែលផលិតសម្ភារៈនុយក្លេអ៊ែរកម្រិត អាវុធ ហើយបាននិយាយថា ទីក្រុងព្យុងយ៉ាងមានគម្រោង «ពង្រឹងកម្លាំងនុយក្លេអ៊ែររបស់រដ្ឋយើង ក្នុងអត្រាអិច ស្ប៉ូណង់ស្យែល» នេះបើយោងតាមរបាយការណ៍មួយពីប្រព័ន្ធផ្សព្វផ្សាយរដ្ឋ។មេដឹកនាំកូរ៉េខាងជើងរូបនេះបាននិយាយថា ប្រទេសរបស់លោកបានបង្កើនសមត្ថភាពផលិតសម្ភារៈ នុយក្លេអ៊ែរ កម្រិតអាវុធជាងទ្វេដងក្នុងរយៈពេលប្រាំឆ្នាំកន្លងមកនេះ ហើយរោងចក្រថ្មីនេះនឹងជួយពង្រឹង ការទប់ស្កាត់សង្គ្រាមនុយក្លេអ៊ែររបស់ខ្លួន ។លោកគីម បានបង្កើតការជំរុញឱ្យមានអាវុធនុយក្លេអ៊ែរបន្ថែមទៀត ក្រោមផែនការប្រាំឆ្នាំដែលត្រូវបានអនុវត្ត បន្ទាប់ពីការចរចាលុបបំបាត់អាវុធនុយក្លេអ៊ែរជាមួយសហរដ្ឋអាមេរិក រួមទាំងកិច្ចប្រជុំចំនួនបីជាមួយ ប្រធានាធិបតីអាមេរិក ដូណាល់ ត្រាំ ក្នុងអាណត្តិដំបូងរបស់លោក បានបញ្ចប់ដោយបរាជ័យ។ព័ត៌មានអំពីរោងចក្រនុយក្លេអ៊ែរថ្មីរបស់កូរ៉េខាងជើងបានកើតឡើងនៅពេលដែលទីក្រុងវ៉ាស៊ីនតោនកំពុងព្យាយាមឈានដល់កិច្ចព្រមព្រៀងមួយដើម្បីបញ្ចប់សង្គ្រាមអាមេរិក-អ៊ីស្រាអែលរយៈពេលជា ច្រើនខែ ជាមួយអ៊ីរ៉ង់ និងធ្វើឱ្យទីក្រុងតេអេរ៉ង់បោះបង់ចោលសម្ភារៈនុយក្លេអ៊ែរដែលវា អាចអភិវឌ្ឍទៅជាអាវុធ នុយក្លេអ៊ែរ៕

(ភ្នំពេញ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញចូលរួមជាគណៈអធិបតី និងថ្លែងសុន្ទរកថាអបអរសាទរក្នុងកម្មវិធី “Green Season Networking និងសម្ពោធកម្មវិធី Tourism Augmented Reality App” ដោយមានវត្តមានចូលរួមពីឯកឧត្តម Shaharuddin Onn ឯកអគ្គរដ្ឋទូតវិសាមញ្ញ និងពេញសមត្ថភាពម៉ាឡេស៊ីប្រចាំកម្ពុជា លោក Eric Lim នាយកប្រតិបត្តិនៃក្រុមហ៊ុន Advantage by Universal Alliance Co., Ltd. ឯកឧត្តម លោកជំទាវថ្នាក់ដឹកនាំពីក្រសួង-ស្ថាប័នរដ្ឋ តំណាងស្ថានទូត សមាគមពាណិជ្ជកម្ម វិនិយោគិន និងភ្ញៀវកិត្តិយសជាតិ និងអន្តរជាតិប្រមាណ ១០០រូប នៅសណ្ឋាគារ Novotel។ក្នុងឱកាសដ៏សំខាន់នេះ ឯកឧត្តមរដ្ឋមន្ត្រី បានកោតសរសើរ វាយតម្លៃខ្ពស់ និងថ្លែងអំណរគុណដល់ស្ថានទូតម៉ាឡេស៊ីប្រចាំកម្ពុជា ក្រុមហ៊ុន Advantage by Universal Alliance Co., Ltd. ក្រសួង និងគ្រប់ភាគីពាក់ព័ន្ធទាំងអស់ ដែលបានសហការយ៉ាងសកម្មរៀបចំកម្មវិធីដ៏មានសារៈសំខាន់នេះដែលបានបង្កើតវេទិកាសំខាន់សម្រាប់ភ្ជាប់ទំនាក់ទំនង និងពង្រឹងកិច្ចសហប្រតិបត្តិការរវាងភាគីពាក់ព័ន្ធទាំងក្នុង និងក្រៅប្រទេស ព្រមទាំងសម្តែងការអបអរសាទរដល់ ចំពោះការច្នៃប្រឌិតបង្កើតកម្មវិធី Tourism Augmented Reality App ដែលជាកម្មវិធី (App) ដ៏ល្អជួយផ្សព្វផ្សាយទេសចរណ៍កម្ពុជាទៅកាន់ទីផ្សារអន្តរជាតិ ស្របតាមទិសដៅរបស់រាជរដ្ឋាភិបាលក្រោមការដឺកនាំប្រកបដោយគតិបណ្ឌិតរបស់សមេ្តចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងការជំរុញបម្លែងឌីជីថល និងកសាងវិស័យទេសចរណ៍ទំនើប មានភាពធន់ និងប្រកួតប្រជែងខ្ពស់។ឯកឧត្តមរដ្ឋមន្ត្រី ក៏បានគូសបញ្ជាក់ថា ព្រឹត្តិការណ៍នេះ ត្រូវបានរៀបចំភ្ជាប់ជាមួយកម្មវិធី Green Season Tourism & Travel Exhibition និង Family Chefs Competition និង Made in Cambodia Exhibition ដែលមានគោលបំណងបង្ហាញសក្តានុពលវិស័យទេសចរណ៍ ការធ្វើដំណើរ និងផលិតផលជាតិ ព្រមទាំងលើកស្ទួយវប្បធម៌ម្ហូបអាហារខ្មែរ និងស្នាដៃសហគ្រិនក្នុងស្រុក។ បន្ថែមពីលើនេះ ឯកឧត្តមរដ្ឋមន្ត្រី បានបង្ហាញការជឿជាក់ថា ព្រឹត្តិការណ៍នេះ នឹងជួយបង្កើតឱកាសថ្មីៗ សម្រាប់ការវិនិយោគ ការចែករំលែកបទពិសោធន៍ និងការចាប់ដៃគូរវាងអាជីវកម្មក្នុងស្រុក និងអន្តរជាតិ ដើម្បីជំរុញការអភិវឌ្ឍវិស័យទេសចរណ៍កម្ពុជា ឱ្យកាន់តែរីកចម្រើន និងមានចីរភាព ជាពិសេសគឺការជំរុញទេសចរណ៍ក្នុងស្រុកនារដូវកាលបៃតង។គួរបញ្ជាក់ផងដែរថា ក្នុងរយៈពេល៤ខែឆ្នាំ២០២៦ កម្ពុជា ទទួលបានភ្ញៀវទេសចរអន្តរជាតិច្រើនជាង១,៣ លាននាក់ ដែលបង្ហាញពីកំណើនវិជ្ជមាន និងភាពធន់នៃវិស័យទេសចរណ៍។ ភ្ញៀវទេសចរ ចង់មកទស្សនាកម្ពុជា និងស្វែងយល់ពីបទពិសោធនៃការលាយបញ្ចូលគ្នារវាងវប្បធម៌បុរាណដ៏អស្ចារ្យ និងធម្មជាតិដ៏ស្រស់ស្អាត បដិសណ្ឋារកិច្ចកក់ក្តៅដែលល្បីថា «ស្នាមញញឹមកម្ពុជា» និងម្ហូបអាហារដ៏ឈ្ងុយឆ្ងាញ់របស់កម្ពុជា ជាពិសេសការផ្តល់ជូនដ៏ពិសេសនារដូវកាលបៃតងដែលត្រូវបានគាំទ្រដោយរាជរដ្ឋាភិបាលកម្ពុជា៕

(ភ្នំពេញ)៖ នារសៀលថ្ងៃទី០៦ ខែមិថុនា ឆ្នាំ២០២៥ ឯកឧត្តម ហ៊ុន ម៉ានី ជាប្រធានសហភាពសហព័ន្ធយុវជនកម្ពុជា បានអញ្ជើញជាគណៈអធិបតីក្នុង កម្មវិធីបើកការប្រកួតកីឡាបាល់ទាត់ពានរង្វាន់ SOCCER LEAGUE លើកទី៩ ឆ្នាំ២០២៦ នៅកីឡាដ្ឋានវិសាខា។ កម្មវិធីនេះមានការអញ្ជើញចូលរួមពីសំណាក់ ឯកឧត្តមអភិសន្តិបណ្ឌិត ស សុខា អនុប្រធាន ស.ស.យ.ក. ឯកឧត្តម លោកជំទាវ លោក លោកស្រី តំណាងក្រសួង-ស្ថាប័ន ក្រុមហ៊ុនឯកជន ភ្ញៀវកិត្តិយស រួមទាំងសមាជិក សមាជិកា ស.ស.យ.ក. អាជ្ញាកណ្តាល កីឡាករ កីឡាការិនី សិល្បៈករ សិល្បៈការិនី យ៉ាងច្រើនកុះករ។ជាកិច្ចចាប់ផ្ដើម ឯកឧត្តមអភិសន្ដិបណ្ឌិត ស សុខា អនុប្រធានសហភាពសហព័ន្ធយុវជនកម្ពុជា បានឡើងធ្វើការស្វាគមន៍យ៉ាងកក់ក្ដៅចំពោះវត្ដមានថ្នាក់ដឹកនាំ សមាជិក សមាជិកា សិល្បៈករ សិល្បការនី កីឡាករ កីឡាការនី ដែលបានអញ្ជើញចូលរួម នឹងថ្លែងអំណរគុណដល់ ឯកឧត្តម ហ៊ុន ម៉ានី ដែលបានផ្តួចផ្តើមគំនិតរៀបចំការប្រកួតកីឡាបាល់ទាត់ពានរង្វាន់នេះអស់រយៈពេល ៩ឆ្នាំកន្លងមកនេះ ដើម្បីផ្តល់ឱ្យយុវជនយើងមានការជួបជុំ រឹតចំណងមិត្តភាព សាមគ្គីភាព និងបង្កើតភាពស្និតស្នាលរវាងគ្នានិងគ្នា ក៏ដូចជាលើកកម្ពស់វិស័យកីឡាបាល់ទាត់កម្ពុជាឱ្យកាន់តែរីកចម្រើន បន្ថែមទៀត។ជាកិច្ចបន្ទាប់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានសម្តែងនូវសេចក្តីសោមនស្សរីករាយ នឹងកោតសរសើរចំពោះគណៈកម្មការរៀបចំការប្រកួត បាល់ទាត់ពានរង្វាន់ SOCCER LEAGUE លើកទី៩ ឆ្នាំ២០២៦ ប្រព្រឹត្តិក្រោមប្រធានបទ “សាមគ្គីភាព ជាតិរឹងមាំ” ដែលជាការផ្សាភ្ជាប់ទៅនឹង ការកសាងស្មារតីជាតិនៃប្រជាជន តាមរយៈការរួបរួមសាមគ្គីជាធ្លុងមួយដរាបណាស្មារតីជាតិនៅតែមាន សាមគ្គីភាពជាតិ កាន់តែរឹងមាំ មិនមានសត្រូវណាអាចបំបែកបំបាក់ប្រទេសជាតិយើងបាននោះឡើយ។ ឯកឧត្តមបានបន្ថែមទៀតថា ការប្រកួតតែងតែមានចាញ់ មានឈ្នះ ក៏ប៉ុន្ដែសូមឱ្យកីឡាករ កីឡាការិនីទាំងអស់ សំលឹងមើលឱ្យលើសពីការប្រកួត ហើយសូមលើកទឹកចិត្តដល់កីឡាករ កីឡាការិនីទាំងអស់ ចូលរួមគោរពឱ្យបាន ម៉ឺងម៉ាត់នូវបទបញ្ជាផ្ទៃក្នុងនៃការប្រកួត និងគោលការណ៍ ត្រូវប្រកាន់ ខ្ជាប់នូវស្មារតីយោគយល់អធ្យាស្រ័យគ្នាទៅវិញទៅមកប្រកបដោយសុច្ចរិតភាព។ សូមបញ្ជាក់ថា ការប្រកួតកីឡាបាល់ទាត់ពានរង្វាន់SOCCER LEAGUE លើកទី៩ ឆ្នាំ២០២៦នេះ មានការចូលរួមប្រកួតចំនួន ៦៤ក្រុម ក្នុងនោះមានប្រុស ៥៦ក្រុម និងស្រី ៨ក្រុម៕

(អន្តរជាតិ)៖ ពិភពលោកកំពុងប្រឈមមុខនឹងហានិភ័យនៃបាតុភូតអែលនីណូដ៏ខ្លាំងនៅឆ្នាំនេះ ដែលធ្វើឱ្យរលកកំដៅកាន់ តែធ្ងន់ធ្ងរនៅក្នុងប្រទេសឥណ្ឌា បណ្តាលឱ្យមានភ្លៀងធ្លាក់ខ្លាំងនៅក្នុងប្រទេសចិន និងប៉ះពាល់ដល់កសិកម្មនៅអាស៊ីអាគ្នេយ៍។ អង្គការឧតុនិយមពិភពលោក (WMO) ដែលជាទីភ្នាក់ងារឯកទេសរបស់អង្គការសហប្រជាជាតិសម្រាប់អាកាសធាតុ អាកាសធាតុ និងធនធានទឹក បានព្រមានថាពិភពលោកត្រូវត្រៀមខ្លួនសម្រាប់ការវិលត្រឡប់មកវិញនៃបាតុភូតអែលនីញ៉ូ។នេះគឺជាការឡើងកំដៅមិនធម្មតានៃទឹកសមុទ្រនៅមហាសមុទ្រប៉ាស៊ីហ្វិកកណ្តាល និងខាងកើត ដែលអាចបណ្តាលឱ្យមានការប្រែប្រួលអាកាសធាតុសកលយ៉ាងសំខាន់។ នេះបើយោងតាមកាសែត AP និង The Guardian។ យោងតាមអង្គការ WMO បាតុភូតអែលនីញ៉ូឆ្នាំនេះមានឱកាស 80% នៃការកកើតឡើងមុនខែកញ្ញា និងមានឱកាស 90%នៃការលេចឡើងមុនខែវិច្ឆិកា។អាស៊ីត្រូវបានគេរំពឹងថានឹងក្លាយជាតំបន់មួយក្នុងចំណោមតំបន់ដែលរងផលប៉ះពាល់ខ្លាំងបំផុត ដោយរលកកំដៅ និងគ្រោះរាំងស្ងួតកើនឡើងដែលអាចដាក់សម្ពាធយ៉ាងខ្លាំងទៅលើវិស័យកសិកម្ម បណ្តាញអគ្គិសនី និងធនធានទឹក។ មជ្ឈមណ្ឌលអាកាសធាតុជាតិរបស់ប្រទេសចិនបាននិយាយថា ផលប៉ះពាល់នៃបាតុភូតអែលនីញ៉ូ នឹងឡើងដល់កម្រិតកំពូលនៅរដូវស្លឹកឈើជ្រុះ និងរដូវរងា ដែលអាចនាំមកនូវភ្លៀងធ្លាក់កាន់តែច្រើនដល់ភាគខាងត្បូងប្រទេសចិន ខណៈពេលដែលសីតុណ្ហភាព កើនឡើងទូទាំងប្រទេស។ ប្រទេសចិនបានចេញការព្រមានអំពីភ្លៀងធ្លាក់ខ្លាំង និងព្យុះ ខណៈដែលប្រទេសនេះចូលដល់រដូវអាកាសធាតុអាក្រក់បំផុតមុនបាតុភូតអែលនីញ៉ូ។ ក្រសួងធនធានទឹកបានវាយតម្លៃស្ថានភាពគ្រប់គ្រងទឹកជំនន់ថា «ធ្ងន់ធ្ងរ និងស្មុគស្មាញ» ដោយតំបន់មួយចំនួន នៅភាគខាងត្បូង និងខាងកើតអាចនឹងទទួលបានទឹកភ្លៀងជាង ២០០ មីលីម៉ែត្រនៅសប្តាហ៍នេះ។នៅអាស៊ីអាគ្នេយ៍ អែលនីញ៉ូអាចបង្កឱ្យមានរលកកំដៅយូរ គ្រោះរាំងស្ងួតធ្ងន់ធ្ងរ ភ្លើងឆេះព្រៃ និងការបំពុលខ្យល់ នេះបើយោងតាមលោក Justin Sentian សាស្ត្រាចារ្យផ្នែកការប្រែប្រួលអាកាសធាតុនៅសាកលវិទ្យាល័យម៉ាឡេស៊ី Sabah។ លោកសាស្ត្រាចារ្យបានពន្យល់ថា តំបន់នេះជាធម្មតាទទួលបានភ្លៀងធ្លាក់ខ្លាំងដោយសារតែខ្យល់ ដែលរុញផ្ទៃទឹកក្តៅឧណ្ហៗឆ្ពោះទៅកាន់មហាសមុទ្រប៉ាស៊ីហ្វិកខាងលិច។ នៅពេលដែលខ្យល់ទាំងនេះចុះខ្សោយ ឬបញ្ច្រាស់ ម៉ាស់ទឹកក្តៅឧណ្ហៗនឹងរំកិលទៅទិសខាងកើត ដែលបណ្តាលឱ្យប្រទេសម៉ាឡេស៊ី សិង្ហបុរី ឥណ្ឌូនេស៊ី ថៃ និងហ្វីលីពីនបាត់បង់ប្រភពសំណើមដ៏សំខាន់មួយ។ការរំខាននេះអាចនាំឱ្យមានការកើនឡើងនៃសីតុណ្ហភាពយ៉ាងខ្លាំង ដែលគំរាមកំហែងដល់សុខភាពសាធារណៈ ការប្រើប្រាស់បណ្តាញអគ្គិសនីលើសទម្ងន់ និងការថយចុះយ៉ាង ឆាប់រហ័សនៃធនធានទឹកសំខាន់ៗ។ វិស័យកសិកម្ម និងវារីអគ្គិសនីត្រូវបានគេរំពឹងថា នឹងរងផលប៉ះពាល់យ៉ាងធ្ងន់ធ្ងរបំផុត។ ប្រទេសដែលពឹងផ្អែកយ៉ាងខ្លាំងលើវិស័យកសិកម្ម ដូចជាប្រទេសឥណ្ឌូនេស៊ី ម៉ាឡេស៊ី ថៃ និងហ្វីលីពីន ងាយរងគ្រោះជាពិសេស។ ការផ្ទុះឡើងនៃបាតុភូតអែលនីញ៉ូខ្លាំង ក៏អាចបង្កឱ្យមានជំងឺត្រូពិចដូចជាជំងឺគ្រុនឈាម និងជំងឺគ្រុនចាញ់ផងដែរ។

(កូរ៉េខាងត្បូង)៖ លោក Roh Tae-ak ប្រធានគណៈកម្មការរៀបចំការបោះឆ្នោតជាតិកូរ៉េខាងត្បូង បានប្រកាសលាលែងពីតំណែង ដោយទទួលខុសត្រូវចំពោះកង្វះខាតសំឡេងឆ្នោតនៅក្នុងការបោះឆ្នោតមូលដ្ឋាន។ការសម្រេចចិត្តនេះត្រូវបានប្រកាសនៅថ្ងៃនេះដោយលោក Roh Tae-ak ពីរថ្ងៃបន្ទាប់ពីមានកង្វះខាតសន្លឹកឆ្នោតកើតឡើងនៅការិយាល័យបោះឆ្នោតចំនួន ១៤ ក្នុងទីក្រុងសេអ៊ូល ក្នុងការបោះឆ្នោតមូលដ្ឋានលើកដំបូងចាប់តាំងពីប្រធានាធិបតី Lee Jae Myung ត្រូវបានជាប់ឆ្នោត។នេះបើយោងតាមកាសែត Korea Time។ អ្នកបោះឆ្នោតរាប់រយនាក់ត្រូវរង់ចាំអស់ជាច្រើនម៉ោង បន្ទាប់ពីការិយាល័យបោះឆ្នោតបានបិទនៅម៉ោង ៦ ល្ងាច។ ការិយាល័យបោះឆ្នោតដែលជួបប្រទះនឹងការខ្វះខាតក្រដាស ជាទូទៅត្រូវបានគេចាត់ទុកថាមានអ្នកគាំទ្រមួយចំនួនធំរបស់គណបក្សអំណាចប្រជាជន (PPP) ដែលជាគណបក្សប្រឆាំង។ស្ថិតិផ្ទាល់ខ្លួនរបស់ PPP បង្ហាញថា មានទីតាំងចំនួន ១៧ ដែលជួបប្រទះនឹងកង្វះខាតសន្លឹកឆ្នោត ដែលមានទីតាំងនៅក្នុងស្រុក Songpa, Gangnam, Seocho, Gwangjin និង Dongjak នៃទីក្រុងសេអ៊ូល ក៏ដូចជាស្រុក Yeonsu ក្នុងទីក្រុង Incheon និង Dongtan ក្នុងខេត្ត Gyeonggi។ ហេតុការណ៍នេះបានបង្កឱ្យ មានការខឹងសម្បារនៅក្នុងប្រទេសកូរ៉េខាងត្បូង។ អង្គការសង្គមស៊ីវិលមួយ បានដាក់ពាក្យបណ្តឹងទៅប៉ូលីស ដោយស្នើសុំឱ្យមានការស៊ើបអង្កេតលើលោក Roh ពីបទធ្វេសប្រហែសក្នុងកាតព្វកិច្ចរបស់គាត់។ បញ្ហានេះត្រូវបានប្រគល់ឱ្យទៅទីភ្នាក់ងារប៉ូលីសទីក្រុងសេអ៊ូលដើម្បីដោះស្រាយ។គណៈកម្មការជាតិរៀបចំការបោះឆ្នោត (NEC) នៃប្រទេសកូរ៉េខាងត្បូង បានបញ្ជាក់ថា ស្រុកសុងប៉ា បានបោះពុម្ពសន្លឹកឆ្នោតត្រឹមតែ 50% នៃចំនួនអ្នកបោះឆ្នោតសរុបដែលបានរាប់ ប៉ុន្តែមិនបានចេញផ្សាយអត្រា រៀបចំសន្លឹកឆ្នោតសម្រាប់ស្រុកផ្សេងទៀតទេ។ មន្ត្រីកូរ៉េខាងត្បូងមិនបានពន្យល់ពីមូលហេតុដែលបញ្ហានេះ ត្រូវបានប្រមូលផ្តុំនៅក្នុងតំបន់ទាំងនេះទេ។នៅថ្ងៃទី៤ ខែមិថុនា ឆ្នាំ២០២៦ លោក Kim Beom-jin អគ្គលេខាធិការនៃគណៈកម្មការរៀបចំការបោះឆ្នោតទីក្រុងសេអ៊ូល បានសុំទោសចំពោះ "ចំណុចខ្វះខាតមួយចំនួននៅក្នុងដំណើរការនេះ" ប៉ុន្តែបានសង្កត់ធ្ងន់ថា អាទិភាពបន្ទាន់គឺការរាប់សន្លឹកឆ្នោត។ «ខ្ញុំបានបោះឆ្នោតអស់រយៈពេលជាង ៥០ ឆ្នាំមកហើយ ហើយមិនដែលឃើញស្ថានភាពបែបនេះទេ។ គ.ជ.ប បានអះអាងថា ពួកគេអាចដោះស្រាយបញ្ហាខ្វះខាតសន្លឹកឆ្នោតបានយ៉ាងឆាប់រហ័ស ប៉ុន្តែពួកគេបានបរាជ័យ ហើយត្រូវពន្យារពេលបោះឆ្នោតរហូតដល់ម៉ោង ១០ យប់។ នេះមិនអាចទទួលយកបានទេ» នេះបើតាមសម្ដីរបស់អ្នកបោះឆ្នោតវ័យ៧២ ឆ្នាំ ជាអ្នកស្រុកសុងប៉ា។ ទិន្នន័យពីគណៈកម្មការជាតិរៀបចំការបោះឆ្នោត (NEC) បង្ហាញថា គិតត្រឹមថ្ងៃទី 1 ខែមេសា បុគ្គលិកចំនួន 176 នាក់របស់ខ្លួនបានឈប់សម្រាក ដែលជាចំនួនខ្ពស់បំផុតទីពីរក្នុងរយៈពេល 10 ឆ្នាំកន្លងមក។ បាតុភូតនៃបុគ្គលិកជាច្រើនបានឈប់សម្រាកមុនការបោះឆ្នោតសំខាន់ៗនៅក្នុងប្រទេសកូរ៉េខាងត្បូង ត្រូវបានគេជឿថាជាបញ្ហាដដែលៗអស់រយៈពេលជាច្រើនឆ្នាំ ដែលបង្កើនការសង្ស័យអំពីសមត្ថភាពរបស់ទីភ្នាក់ងារ ក្នុងការធានាគុណភាពនៃថ្ងៃបោះឆ្នោត។

(ព្រុយណេ)៖ ព្រះអង្គម្ចាស់ Abdul Mateen ដែលត្រូវបានគេស្គាល់នៅក្នុងប្រទេសព្រុយណេដោយសារមុខដ៏សង្ហារបស់ទ្រង់ ត្រូវបានតែងតាំងជារដ្ឋមន្ត្រីការបរទេសដោយស៊ុលតង់នៅក្នុងការរុះរើគណៈរដ្ឋមន្ត្រី។ ស៊ុលតង់ ហាសាណាល់ បូលគីយ៉ាហ៍ របស់ប្រទេសប្រ៊ុយណេ បានប្រកាសពីការរុះរើគណៈរដ្ឋមន្ត្រីនៅថ្ងៃទី ៤ ខែមិថុនា ដោយតែងតាំងកូនប្រុសពីរនាក់របស់ព្រះអង្គឱ្យកាន់តំណែងសំខាន់ៗនៅក្នុងរដ្ឋាភិបាល ដែលហាក់ដូចជា ការរៀបចំសម្រាប់មេដឹកនាំជំនាន់ក្រោយ។ ព្រះអង្គម្ចាស់ Abdul Mateen ព្រះជន្ម ៣៥ ព្រះវស្សា ដែលជាបុត្រាទីបួនរបស់ព្រះមហាក្សត្រ ត្រូវបានតែងតាំងជារដ្ឋមន្ត្រីការបរទេស។ព្រះអង្គម្ចាស់ Abdul Mateen គឺជាមន្ត្រីយោធាដែលបានទទួលការបណ្តុះបណ្តាលពីអង់គ្លេស ដែលចូលចិត្តលេងប៉ូឡូ និងជាអ្នកបើកឧទ្ធម្ភាគចក្រ។ ព្រះអង្គតែងតែអមដំណើរព្រះបិតារបស់ព្រះអង្គក្នុងដំណើរកម្សាន្តក្រៅប្រទេស។ ព្រះអង្គម្ចាស់បានរៀបការនៅឆ្នាំ ២០២៤ និងមានកូនស្រីអាយុបីខែម្នាក់។ ដោយជាប់ចំណាត់ថ្នាក់ទីប្រាំ នៅក្នុងលំដាប់នៃការស្នងរាជ្យ រូបរាងដូចតារាភាពយន្តរបស់គាត់បានទាក់ទាញអ្នកតាមដានជាងបីលាននាក់នៅលើ Instagram ដែលធ្វើឱ្យទទួលបានរហស្សនាមថា "ព្រះអង្គម្ចាស់សង្ហាបំផុតរបស់ប្រទេសប្រ៊ុយណេ"។បុត្របន្ទាប់គឺព្រះអង្គម្ចាស់ Abdul Malik ព្រះជន្ម ៤២ ព្រះវស្សា ត្រូវបានតែងតាំងជារដ្ឋមន្ត្រីនៅក្នុង ការិយាល័យនាយករដ្ឋមន្ត្រី។ បុត្រច្បងរបស់ព្រះមហាក្សត្រ គឺព្រះអង្គម្ចាស់ Al-Muhtadee Billah ព្រះជន្ម ៥២ ព្រះវស្សា ដែលជាអ្នកស្នងតំណែងដំបូងគេនៅតែរក្សាតំណែងជារដ្ឋមន្ត្រីជាន់ខ្ពស់ នៅក្នុងការិយាល័យនាយករដ្ឋមន្ត្រី។ ព្រះអង្គមានបុត្រាពីរអង្គដែលកំពុងស្នងតំណែង។ស្តេចស៊ុលតង់នៃប្រទេសប្រ៊ុយណេមានបុត្រ ១២អង្គ និងមានភរិយាបីអង្គ រួមទាំងបុត្រាប្រាំអង្គ។ បុត្រាទីបីរបស់ព្រះអង្គ គឺព្រះអង្គម្ចាស់ Abdul Azim (១៩៨២-២០២០) ដែលជាអ្នកផលិតខ្សែភាពយន្ត និងជាសប្បុរសជនដ៏ល្បីល្បាញ បានសោយទិវង្គតនៅឆ្នាំ ២០២០។ បុត្រាពៅរបស់ព្រះអង្គគឺព្រះអង្គម្ចាស់ Abdul Wakeel ប្រសូតនៅឆ្នាំ ២០០៦។

(ស្វាយរៀង)៖ នៅថ្ងៃទី៥ ខែមិថុនា ឆ្នាំ២០២៦ ឯកឧត្តម ម៉ម វណ្ណៈ រដ្ឋលេខាធិការ តំណាងដ៏ខ្ពង់ខ្ពស់របស់ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ រួមជាមួយមន្ត្រីជំនាញពាក់ព័ន្ធ បានអញ្ជើញចុះសួរសុខទុក្ខ និងនាំយកអំណោយទៅប្រគល់ជូនបងប្អូនកម្មករកម្មការិនីចំនួន ១៨ នាក់ ដែលក្នុងនោះមានស្ត្រីចំនួន ១១ នាក់ ដែលបានជួបគ្រោះថ្នាក់ចរាចរណ៍កាលពីព្រឹកថ្ងៃទី៤ ខែមិថុនា ស្ថិតនៅភូមិម្រាគ ឃុំស្វាយចេក ស្រុករំដួល ខេត្តស្វាយរៀង។បច្ចុប្បន្ន កម្មករកម្មការិនីទាំងអស់ កំពុងសម្រាកព្យាបាលនៅតាមមន្ទីរពេទ្យចំនួនពីរទីតាំង ដោយក្នុងនោះមានអ្នករងរបួសធ្ងន់ចំនួន ៥ នាក់ (រួមមានស្ត្រី ៣ នាក់) កំពុងសម្រាកព្យាបាលនៅមន្ទីរពេទ្យខេត្តស្វាយរៀង និងអ្នករងរបួសស្រាលចំនួន ១៣ នាក់ (ដែលមានស្ត្រី ៩ នាក់) កំពុងសម្រាកព្យាបាលនៅមន្ទីរពេទ្យបង្អែកស្រុករំដួល។ក្នុងឱកាសចុះសួរសុខទុក្ខនោះ ឯកឧត្តម ម៉ម វណ្ណៈ បានពាំនាំយកអំណោយរបស់ឯកឧត្តមរដ្ឋមន្ត្រី រួមមានផ្លែឈើ ១ កន្ត្រក និងថវិកាមួយចំនួន ផ្តល់ជូនដល់កម្មករកម្មការិនីម្នាក់ៗ ដើម្បីជួយសម្រាលការលំបាកក្នុងអំឡុងពេលសម្រាកព្យាបាល។ ជាមួយគ្នានោះ ក្រសួងការងារ និងបណ្តុះបណ្តាលវិជ្ជាជីវៈ បានសម្តែងនូវក្តីអាណិតអាសូរ និងជូនពរឱ្យបងប្អូនកម្មករនិយោជិតទាំងអស់ ឆាប់បានជាសះស្បើយពីរបួស ដើម្បីវិលត្រឡប់ទៅជួបជុំគ្រួសារ និងប្រកបការងារវិញដោយសុវត្ថិភាព។ ទន្ទឹមនឹងនេះដែរ ក្រសួងការងារ​ តាមរយៈបេឡាជាតិសន្តិសុខសង្គម (ប.ស.ស.) នឹងបន្តជួយដោះស្រាយ និងផ្តល់អត្ថប្រយោជន៍ផ្សេងៗជូនដល់ជនរងគ្រោះ ស្របតាមច្បាប់ និងរបបសន្តិសុខសង្គមជាធរមាន៕

(បាត់ដំបង)៖ នាព្រឹកថ្ងៃទី៥ ខែមិថុនា ឆ្នាំ២០២៦ ក្រសួងការងារនិងបណ្តុះបណ្តាលវិជ្ជាជីវៈ បានបន្តរៀបចំ «វេទិកាការងារ សន្តិសុខសង្គម និងការបណ្តុះបណ្តាលវិជ្ជាជីវៈ» ក្រោមប្រធានបទ «ខ្មែរជួយរកការងារ និងផ្ដល់ការងារឱ្យខ្មែរ» នៅបរិវេណវត្តឧត្តមមានជ័យសិរីមុន្នី ក្នុងស្រុករុក្ខគីរី ខេត្តបាត់ដំបង ដោយមានការចូលរួមពីប្រជាពលរដ្ឋ អតីតពលករមកពីប្រទេសថៃ និងយុវជនជិត ៧០០នាក់។ក្នុងឱកាសនេះ ឯកឧត្តម សាន គីមហុង អនុរដ្ឋលេខាធិការ តំណាងដ៏ខ្ពង់ខ្ពស់របស់ ឯកឧត្តម ហេង សួរ រដ្ឋមន្រ្តីក្រសួងការងារនិងបណ្ដុះបណ្ដាលវិជ្ជាជីវៈ ​មានប្រសាសន៍លើកទឹកចិត្តដល់បងប្អូនប្រជាពលរដ្ឋឱ្យចាប់យកឱកាសការងារក្នុងស្រុក ដែលមានចំនួន ៩ ៤៩០ កន្លែង ពីបណ្តាក្រុមហ៊ុន រោងចក្រ សហគ្រាសធំៗ និងតំបន់សេដ្ឋកិច្ចពិសេស។ ឯកឧត្តមបានបញ្ជាក់ថា ការចូលបម្រើការងារស្របច្បាប់នៅក្នុងស្រុក នឹងផ្តល់អត្ថប្រយោជន៍ដល់បងប្អូនតាមរយៈបេឡាជាតិសន្តិសុខសង្គម (ប.ស.ស.) នូវរបបចំនួនបី រួមមានរបបហានិភ័យការងារ របបថែទាំសុខភាព និងរបបសោធននិវត្តន៍ ដែលមានកិច្ចគាំពារប្រហាក់ប្រហែលនឹងមន្ត្រីរាជការដែរ។ទន្ទឹមនឹងនោះ ឯកឧត្តមបានក្រើនរំលឹកពីហានិភ័យនៃការធ្វើចំណាកស្រុកខុសច្បាប់ ដែលប្រឈមនឹងការកេងប្រវ័ញ្ច និងខ្វះការការពារតាមផ្លូវច្បាប់។ ការធ្វើការងារក្នុងស្រុក មិនត្រឹមតែធានាបាននូវប្រាក់ចំណូលស្ថិរភាពប៉ុណ្ណោះទេ ប៉ុន្តែថែមទាំងផ្ដល់ឱកាសឱ្យបានជួបជុំ និងថែទាំក្រុមគ្រួសារជាទីស្រឡាញ់ទៀតផង។ ក្នុងករណីមានបំណងទៅធ្វើការនៅក្រៅប្រទេសដែលមានប្រាក់ខែខ្ពស់ ពលរដ្ឋត្រូវជ្រើសរើសក្រុមហ៊ុនស្របច្បាប់ និងធ្វើការផ្ទៀងផ្ទាត់បញ្ជីឈ្មោះជាមួយអាជ្ញាធរ ឬទាក់ទងលេខជំនួយរហ័ស ១២៩៧ សម្រាប់ផ្នែកផ្គូផ្គងការងារ និងលេខ ១២៨៦ សម្រាប់ផ្នែក ប.ស.ស.។លើសពីនេះ ឯកឧត្តមអនុរដ្ឋលេខាធិការបានលើកទឹកចិត្តដល់យុវជនឱ្យចូលរៀនជំនាញបច្ចេកទេសនៅវិទ្យាស្ថានពហុបច្ចេកទេសខេត្តបាត់ដំបង តាមរយៈកម្មវិធី «TVET ១,៥ លាន» ដែលជាកម្មវិធីជាតិឥតគិតថ្លៃ និងមានប្រាក់ឧបត្ថម្ភប្រចាំខែ រួមមានជំនាញការជួសជុលម៉ាស៊ីនត្រជាក់ អគ្គិសនី សំណង់ សេវាកម្មកាហ្វេ សាឡន សម្អាងការ និងជំនាញជាច្រើនទៀត រួមទាំងការធ្វើតេស្តទទួលស្គាល់ជំនាញពីមុន (RPL) ដើម្បីធានាបាននូវការងារធ្វើ និងប្រាក់ឈ្នួលសមរម្យ។សូមបញ្ជាក់ថា វេទិកានេះមានការសហការចូលរួមពីក្រុមហ៊ុន និងសហគ្រាសធំៗជាច្រើន រួមមានក្រុមហ៊ុន វេនធូរ៉ា លេឌើវែរ, ថាកូ អាហ្រ្គី, សាន ហ្វេង, វ៉ាន់លី ថាយអឺរ, សមាគម TAFTAC, តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ, តំបន់សេដ្ឋកិច្ចពិសេស ចេជាង គម្រោង២ និងអង្គការការីតាសកម្ពុជា។ សម្រាប់ឱកាសការងារនៅប្រទេសជប៉ុន ក៏មានការចូលរួមពីក្រុមហ៊ុន អ៊ែកស៊ល អេស៊ា យូមេន រីសសស៍, មង្គល អេចអ និង វង្ស វឌ្ឍនៈ មេនផៅវ័រ ផងដែរ៕

(ភ្នំពេញ)៖ ឯកឧត្ដម ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានទទួលជួបសម្តែងការគួរសមនិងពិភាក្សាការងារជាមួយលោកស្រី យ៉ាស្មីន ស៊ីឌីគី (Yasmin Siddiqi) នាយិកាធនាគារអភិវឌ្ឍន៍អាស៊ីប្រចាំកម្ពុជា (ADB) និងសហការី នារសៀលថ្ងៃទី៥ ខែមិថុនា ឆ្នាំ២០២៦ នៅទីស្តីការក្រសួង ដើម្បីបង្ហាញវឌ្ឍនភាពការងារ និងផ្លាស់ប្តូរយោបល់លើសេចក្តីព្រាងគោលនយោបាយថ្នាក់ជាតិស្តីពីមុខរបរនិងការងារ ឆ្នាំ២០២៦-២០៣៥ គោលនយោបាយជាតិស្ដីពីការអប់រំបណ្ដុះបណ្ដាលបច្ចេកទេស និងវិជ្ជាជីវៈ (NTVET) ក៏ដូចជា ការងារអាទិភាពនាពេលអនាគតក្នុងការអភិវឌ្ឍធនធានមនុស្សក្នុងវិស័យការងារជាដើម។ នាឱកាសនោះ ឯកឧត្តមរដ្ឋមន្រ្តីបានថ្លែងអំណរគុណយ៉ាងជ្រាលជ្រៅ និងវាយតម្លៃខ្ពស់ចំពោះផ្លែផ្កានៃកិច្ចសហប្រតិបត្តិការដ៏យូរអង្វែងជាមួយធនាគារអភិវឌ្ឍន៍អាស៊ី ដែលសម្រេចបាននូវសមិទ្ធផលជាទីមោទនៈ ក្នុងការគាំទ្រដល់ការបណ្តុះបណ្តាល ការអភិវឌ្ឍកម្លាំងពលកម្ម និងពង្រឹងសមត្ថភាពប្រកួតប្រជែង ក៏ដូចជាផ្ដល់អនុសាសន៍គន្លឹះក្នុងដំណើរការរៀបចំគោលនយោបាយអភិវឌ្ឍន៍ជំនាញនៅកម្ពុជា ដែលជាក់ស្តែងដូចជា គោលនយោបាយជាតិស្ដីពីមុខរបរនិងការងារឆ្នាំ២០២៦-២០៣៥នេះជាដើម។ ឯកឧត្តមរដ្ឋមន្រ្តីមានប្រសាសន៍ថា ធនាគារអភិវឌ្ឍន៍អាស៊ី គឺជាដៃគូដ៏សំខាន់មួយរបស់រាជរដ្ឋាភិបាលកម្ពុជា ក៏ដូចជាក្រសួងការងារនិងបណ្តុះបណ្តាលវិជ្ជាជីវៈ ក្នុងការអភិវឌ្ឍជំនាញលើវិស័យឧស្សាហកម្ម។ ជាមួយគ្នានេះ ឯកឧត្ដមក៏បានលើកឡើងពីសារៈសំខាន់នៃវិស័យ TVET រួមទាំង កម្មវិធី TVET ១,៥លាន ដែលជាគ្រឹះសម្រាប់ការបំប្លែងកម្លាំងពលកម្មតាមរយៈការពង្រឹងជំនាញ និងការរៀនជំនាញថ្មី ដែលផ្តល់ឱកាសស្មើគ្នាដល់យុវជន ស្របតាមតម្រូវការឧស្សាហកម្មដែលកំពុងវិវត្ត។ តាមរយៈភាពជាដៃគូយុទ្ធសាស្ត្រជាមួយ ADB កម្ពុជាកំពុងជួយយុវជនឱ្យទទួលបានការអភិវឌ្ឍជំនាញ ហើយការងារនិងប្រាក់ចំណូលកាន់តែប្រសើរ ដែលធ្វើឱ្យវិស័យ TVET កាន់តែមានការចាប់អារម្មណ៍ថែមទៀត។ជាការឆ្លើយតប លោកស្រី ស៊ីឌីគី បានកោតសរសើរចំពោះសមិទ្ធផលការងារនៃកិច្ចសហការប្រតិបត្តិការជាមួយក្រសួងការងារនិងបណ្ដុះបណ្ដាលវិជ្ជាជីវៈ ក៏ដូចជាភាពជាអ្នកដឹកនាំរបស់ឯកឧត្តមរដ្ឋមន្រ្តី ក្នុងការជំរុញឱ្យមានវឌ្ឍនភាពនៃវិធានការគោលនយោបាយសំខាន់ៗនេះ។ ទន្ទឹមនឹងនេះ ក្រុមការងារក៏បានបង្ហាញការប្តេជ្ញាចិត្តយ៉ាងមុតមាំក្នុងកិច្ចពិភាក្សាយ៉ាងផុសផុលលើសេចក្តីព្រាងគោលនយោបាយទាំងនេះ។ លោកស្រីក៏បានបង្ហាញនូវការបន្តគាំទ្រទាំងផ្នែកហិរញ្ញវត្ថុ និងបច្ចេកទេសដល់ក្រសួងការងារនិងបណ្ដុះបណ្ដាលវិជ្ជាជីវៈ ក្នុងការអនុវត្តគោលនយោបាយ ក៏ដូចជាកម្មវិធីយុទ្ធសាស្ត្រសម្រាប់វិស័យការងារ បណ្ដុះបណ្ដាលវិជ្ជាជីវៈ ព្រមទាំងយុទ្ធសាស្ត្រអភិវឌ្ឍជាតិរបស់រាជរដ្ឋាភិបាលកម្ពុជាផងដែរ។ ភាគីទាំងពីរក៏បានពិភាក្សាគ្នាពីការពង្រីកកម្មវិធីបណ្តុះបណ្តាលគ្រូបង្គោល ក៏ដូចជាការពង្រីក និងការអភិវឌ្ឍសាលា TVET នៅតាមតំបន់គោលដៅសំខាន់ៗមួយចំនួនទៀត។ជាមួយនឹងកិច្ចពិភាក្សាប្រកបដោយការស្ថាបនា ឯកឧត្តម ហេង សួរ បានក៏បានគូសបញ្ជាក់ថា ក្រសួងការងារនិងបណ្ដុះបណ្ដាលវិជ្ជាជីវៈបានត្រៀមខ្លួនរួចជាស្រេចក្នុងការបន្តពង្រឹង និងពង្រីកកិច្ចសហការជាមួយ ADB ដើម្បីបន្តលើកកម្ពស់ការអភិវឌ្ឍមូលធនមនុស្សឱ្យកាន់តែប្រសើរឡើងថែមទៀតសម្រាប់ការអភិវឌ្ឍរយៈពេលវែង៕

(ភ្នំពេញ)៖ អ្នកនាំពាក្យក្រសួងការងារ និងបណ្ដុះ​បណ្ដា​ល​វិជ្ជាជីវៈ​លោក ស៊ុន មេសា​ នៅថ្ងៃទី៥ ខែមិថុនា ឆ្នាំ​២០២៦នេះ បាន​អំពាវ​នាវដល់អតីតពលករខ្មែរ ដែលត្រូវ​បា​ន​បញ្ជូនមកពីប្រ​ទេសថៃចំនួន ១១២នាក់ ទាក់ទង​មក​លេខ​​ទូរសព្ទ ១២៩៧ ដើម្បី​ស្វែងរកការ​ងារធ្វើ និង​ទទួល​​បាន​​​ផល​​​ប្រយោ​ជ​​ន៍ដ៏​ស​ម្បូ​រ​បែប។លោក ស៊ុន មេសា បាន​លើកទឹកចិត្ត​ឱ្យបងប្អូន​ប្រជាពល​រដ្ឋ​ស្វែ​​ងរកឱកាស​ការងារធ្វើនៅ​​ក្នុងស្រុកដែល​នៅក្បែរខ្លួ​នវិញ និងចៀ​ស​វាង​ធ្វើកា​រ​ចំ​ណា​ក​ស្រុ​កដោ​យ​ខុស​ច្បាប់​។ កា​រស្វែងរកកា​រងារធ្វើនៅក្នុងស្រុក​ពុំមាន​ការលំបា​ក​នោះ​ទេ ដោ​យទា​ក់ទងតាមរ​យៈ​លេខទូ​រសព្ទ ១២៩៧ ក៏ដូ​ច​ជា ទីភ្នា​ក់​​ងារ​​ជាតិ​មុខរបរ និងកា​រងា​រ(NEA) នៃ​ក្រសួង​ការ​ងារ និងបណ្តុះ​​បណ្តាលវិ​ជ្ជាជីវៈ ដើម្បីទ​ទួលបា​ន​ការងារ និង​ការប្រឹក្សាកា​រងារផងដែរ។លោកបញ្ជាក់ថា៖«ខ្ញុំសូមអំពាវនាវដល់បងប្អូនអតីតពលករខ្មែរ ដែ​លទើប​ត្រឡបមក​ពីថៃ សូមទា​ក់ទងមកលេខ​ទូរសព្ទ ១២៩៧ ដើម្បី​ស្វែករ​កកា​រ​ងារ​​ធ្វើ និងអត្ថប្រយោ​ជន៍ដ៏សម្បូរបែប ។ សូមកុំទៅធ្វើការងារដោយ​ខុសច្បាប់នៅ​ក្រៅប្រទេស ខណៈឱកាស​ការងារនៅ​ក្នុង​ស្រុ​កយើង ត្រូវបា​ន​ប្រកា​​ស​​ជា​ហូ​រហែ និង​រាប់ម៉ឺន​កន្លែ​ង​ជា​រៀង​​រាល់សប្តាហ៍​ដោយ​ក្រសួង​កា​រងារ និងប​​ណ្តុះ​បណ្តា​​ល​វិជ្ជាជីវៈ»។ការធ្វើការងារនៅក្នុងស្រុកនាពេលបច្ចុប្បន្ន គឺពួក​គាត់​នឹង​ទទួលបា​នអត្ថប្រយោ​ជន៍ច្រើន ដូចទៅ​នឹងបណ្តាប្រ​ទេស​ជិត​ខាង​ផងដែរ ដោយប្រាក់​ឈ្នួល​សមរម្យ បើធៀប​ជាមួ​យ​ប​ណ្តា​ប្រទេសនៅក្នុងតំបន់មួយចំនួន​ ហើយកន្លែង​កា​រងារនៅក្បែរផ្ទះ។ ជាពិសេស ពួកគាត់ត្រូ​វការចំណា​យ​ទា​​ប ដែល​អាច​ឱ្យបងប្អូន​ប្រជាពលរដ្ឋ​អាចសន្សំសំចៃ​ការ​ចា​យ​វា​យជាប្រចាំ​បា​នច្រើន។ នេះបើ​តាមលោក ស៊ុន មេសា។ទន្ទឹមនឹងនេះ អ្នកនាំពាក្យរូបនេះ បានស្នើ​ឱ្យបងប្អូនឈ​ប់ជាបន្ទាន់​ក្នុង​ការចា​កចេញទៅ​ធ្វើការងា​រនៅក្រៅ​ប្រទេ​សដោ​​យខុស​ច្បា​ប់។ ក្នុងករណី​មា​ន​កា​​រ​បបួល ឬលួង​លោ​ម​ពី​សំណាក់មេខ្យល់ ដើម្បីចេ​ញទៅធ្វើការដោ​យខុ​ស​ច្បាប់ សូមរាយការណ៍ជូនសមត្ថកិច្ច ឬអា​ជ្ញាធរ​មូល​ដ្ឋាន​ជា​បន្ទាន់ ដើម្បី​មាន​វិធាន​ការច្បា​ប់ចំពោះ​ជន​ល្មើ​ស​ទាំង​នោះ៕

(ប៉េកាំង)៖ ទីភ្នាក់ងារសារព័ត៌មានរដ្ឋស៊ីនហួរ បាននិយាយថា ប្រធានាធិបតីចិន លោក ស៊ី ជីនពីង នឹងទៅ បំពេញទស្សនកិច្ចនៅកូរ៉េខាងជើង ចាប់ពីថ្ងៃទី៨ ដល់ថ្ងៃទី៩ ខែមិថុនា ដែលជាដំណើរទស្សនកិច្ចលើកដំបូង របស់លោកក្នុងរយៈពេលជិតប្រាំពីរឆ្នាំ ខណៈដែលទីក្រុងប៉េកាំងកំពុងសម្លឹងមើលការពង្រឹង ទំនាក់ទំនង ជាមួយទីក្រុងព្យុងយ៉ាង។ទូរទស្សន៍រដ្ឋចិន CCTV បាននិយាយថា "តាមការអញ្ជើញរបស់លោក គីម ជុងអ៊ុន  លោក ស៊ី ជីនពីង អគ្គលេខាធិការនៃគណៈកម្មាធិការកណ្តាល CPC និងជាប្រធានាធិបតីនៃសាធារណរដ្ឋប្រជាមានិតចិន នឹងទៅបំពេញទស្សនកិច្ចផ្លូវរដ្ឋនៅសាធារណរដ្ឋប្រជាមានិតប្រជាធិបតេយ្យកូរ៉េ ចាប់ពីថ្ងៃទី៨ ដល់ថ្ងៃទី៩ ខែមិថុនា"។នេះនឹងជាដំណើរទស្សនកិច្ចក្រៅប្រទេសលើកដំបូងរបស់លោក ស៊ី ជីនពីង ក្នុងឆ្នាំនេះ ហើយបន្ទាប់ពី កិច្ចប្រជុំថ្មីៗរបស់លោកនៅទីក្រុងប៉េកាំងជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ និងប្រធានាធិបតីរុស្ស៊ី លោក វ្ល៉ាឌីមៀ ពូទីន ក្នុងខែឧសភា។ការបញ្ជាក់ពីដំណើរទស្សនកិច្ចរបស់លោក បានកើតឡើងបន្ទាប់ពីការរំពឹងទុកបានលេចចេញឡើងក្នុង រយៈពេលប៉ុន្មានសប្តាហ៍ថ្មីៗនេះ បន្ទាប់ពីរបាយការណ៍ប្រព័ន្ធផ្សព្វផ្សាយ និងការឃើញគណៈប្រតិភូ ចិននៅទីក្រុងព្យុងយ៉ាង៕

(អន្តរជាតិ)៖ កង្វល់សុខភាពសាធារណៈដែលទើបត្រូវបានកត់ត្រាថ្មីៗនេះពាក់ព័ន្ធនឹងមេរោគ nodavirus សមុទ្រមួយប្រភេទដែលគេស្គាល់ថា CMNV (មេរោគ nodavirus ស្លាប់ដោយសម្ងាត់) ដែលពីមុនឆ្លងតែបង្គា និងត្រីប៉ុណ្ណោះ ឥឡូវនេះបង្ហាញភស្តុតាងនៃការឆ្លងមកមនុស្សក្នុងករណីកម្រ។ ការឆ្លងមេរោគលើមនុស្សដែលបានរាយការណ៍ត្រូវបានផ្សារភ្ជាប់ទៅនឹងស្ថានភាពមួយដែលត្រូវបានពិពណ៌នាថាជា Persistent Ocular Hypertensive Viral Anterior Uveitis (POH-VAU) ដែលជាជំងឺរលាកភ្នែក ធ្ងន់ធ្ងរដែលបណ្តាលឱ្យរលាក uveitis កើតឡើងវិញ និងសម្ពាធភ្នែកកើនឡើងយ៉ាងគ្រោះថ្នាក់ ស្រដៀងនឹង ជំងឺដក់ទឹកក្នុងភ្នែក ដែលមានសក្តានុពលបំផ្លាញសរសៃប្រសាទភ្នែក និងនាំឱ្យបាត់បង់ការមើលឃើញជា អចិន្ត្រៃយ៍ ប្រសិនបើមិនបានព្យាបាលទាន់ពេលវេលា។នៅទូទាំងករណីដែលបានកត់ត្រា អ្នកជំងឺប្រហែល 70 នាក់ ភាគច្រើននៅក្នុងប្រទេសចិន មនុស្សជាច្រើន បានរាយការណ៍ពីការប៉ះពាល់នឹងអាហារសមុទ្រឆៅ ជាពិសេសបង្គា ទាំងតាមរយៈការប៉ះពាល់ ដោយគ្មានស្រោមដៃការពារ ឬការទទួលទានផលិតផលមិនទាន់ឆ្អិន ឬឆៅ។ ការវិភាគហ្សែនបានបង្ហាញថា មេរោគដែលទាក់ទងនឹងមនុស្សគឺស្ទើរតែដូចគ្នាទៅនឹង CMNV ដែលត្រូវបានរកឃើញនៅក្នុងសត្វសមុទ្រ ដែលបង្ហាញពីការឆ្លងពីសត្វទៅសត្វ។ ខណៈពេលដែលកម្រ គំរូនេះបង្កើនការព្រួយបារម្ភអំពីរបៀបដែល ការផ្លាស់ប្តូរបរិស្ថាន និងការប៉ះពាល់នឹងការចិញ្ចឹមត្រីអាចជះឥទ្ធិពលដល់ការសម្របខ្លួនរបស់មេរោគ៕ជៀសវាងការប៉ះពាល់ដោយផ្ទាល់ជាមួយអាហារសមុទ្រឆៅដោយមិនពាក់ស្រោមដៃ ត្រូវប្រាកដថា អាហារសមុទ្រទាំងអស់ត្រូវបានចម្អិនឱ្យឆ្អិនល្អ និងអនុវត្តអនាម័យដោយប្រុងប្រយ័ត្នបន្ទាប់ពីប៉ះពាល់ ជាមួយផលិតផលអាហារសមុទ្រ។ អ្វីដែលសំខាន់បំផុតនោះគឺ ត្រូវស្វែងរកការយកចិត្តទុកដាក់ពីគ្រូពេទ្យ ជាបន្ទាន់ ប្រសិនបើរោគសញ្ញាដូចជាឈឺភ្នែក សម្ពាធភ្នែក ឡើងក្រហម ឬការផ្លាស់ប្តូរការមើលឃើញ កើតឡើងបន្ទាប់ពីការប៉ះពាល់អាហារសមុទ្រ។ ការធ្វើអន្តរាគមន៍ដំបូងគឺមានសារៈសំខាន់ណាស់ ក្នុងការការពារការខូចខាតរយៈពេលវែងដល់ការមើលឃើញ៕

(អន្តរជាតិ)៖ លោក Zhang Yiming ស្ថាបនិកក្រុមហ៊ុន ByteDance ដែលជាម្ចាស់ក្រុមហ៊ុន TikTok បានក្លាយ ជាអ្នកមានលំដាប់ទី 2 របស់អាស៊ី ដែលមានទ្រព្យសម្បត្តិសុទ្ធចំនួន 92.8 ពាន់លានដុល្លារអាមេរិក។ទ្រព្យសម្បត្តិរបស់លោក Zhang បានកើនឡើងជាង 24 ពាន់លានដុល្លារ បន្ទាប់ពី Bloomberg បានវាយតម្លៃ ការវាយតម្លៃ ByteDance ពីវិនិយោគិនដូចជា BlackRock, Fidelity Investments និង T. Rowe Price Group។ការកើនឡើងនេះឆ្លុះបញ្ចាំងពីប្រជាប្រិយភាពរបស់ TikTok និង ByteDance AI chatbot Doubao ដែលបាន ទាក់ទាញអ្នកប្រើប្រាស់ប្រចាំខែជាង 300 លាននាក់ និងក្លាយជា chatbot ដ៏ពេញនិយមបំផុតរបស់ ប្រទេសចិន។​ByteDance ក៏បានផ្ទេរផ្នែកខ្លះនៃប្រតិបត្តិការរបស់ខ្លួននៅសហរដ្ឋអាមេរិក ទៅឱ្យវិនិយោគិន អាមេរិកកាលពីដើមឆ្នាំនេះ ប៉ុន្តែទម្រង់របស់វានៅតែដដែលបន្ទាប់ពីនោះ។ទន្ទឹមនឹងនេះ លោក Ambani ប្រធានក្រុមហ៊ុន Reliance Industries បានធ្លាក់ចុះមកចំណាត់ថ្នាក់ទីបីនៅក្នុង ចំណាត់ថ្នាក់ទ្រព្យសម្បត្តិរបស់អាស៊ី ជាមួយនឹងទ្រព្យសម្បត្តិសុទ្ធចំនួន 86.9 ពាន់លានដុល្លារ។ ទ្រព្យសម្បត្តិរបស់លោកបានធ្លាក់ចុះចំនួន 20.8 ពាន់លានដុល្លាររហូតមកដល់ពេលនេះនៅឆ្នាំនេះ ដោយសារតែតម្លៃប្រេងសកលមានភាពប្រែប្រួល និងភាពចលាចលខាងភូមិសាស្ត្រនយោបាយ នេះបើយោងតាម ​​Financial Express។ ក្រុមហ៊ុន​ពហុ​ក្រុមហ៊ុន​នេះ ដែល​ត្រូវ​បាន​បង្កើត​ឡើង​ដោយ​ឪពុក​របស់​លោក គឺ​លោក Dhirubhai Ambani ក្នុង​ទសវត្សរ៍​ឆ្នាំ 1950 មាន​ភាគហ៊ុន​ក្នុង​វិស័យ​ថាមពល លក់រាយ និង​កម្សាន្ត ដោយ​ឧស្សាហកម្ម​គីមី​ឥន្ធនៈ​មាន​ចំនួន​ជាង​ពាក់កណ្តាល​នៃ​អាជីវកម្ម​របស់​ខ្លួន។លោក Gautam Adani ប្រធាន​ក្រុមហ៊ុន Adani Group ដែល​ជា​ក្រុមហ៊ុន​ពហុ​ក្រុមហ៊ុន​ឥណ្ឌា​មួយ​ទៀត នៅ​តែ​ជា​អ្នក​មាន​បំផុត​នៅ​អាស៊ី ជាមួយ​នឹង​ទ្រព្យសម្បត្តិ 117.4 ពាន់​លាន​ដុល្លារ។នៅ​លំដាប់​ទី​បួន គឺ​លោក Tadashi Yanai ស្ថាបនិក​ក្រុមហ៊ុន​មេ Fast Retailing របស់ Uniqlo ដែល​មាន​ទ្រព្យ​សម្បត្តិ 72.5 ពាន់​លាន​ដុល្លារ។ លោក Masayoshi Son ស្ថាបនិក​ក្រុមហ៊ុន​វិនិយោគ​យក្ស SoftBank បាន​បញ្ចប់​ចំណាត់ថ្នាក់​កំពូល​ទាំង​ប្រាំ ជាមួយ​នឹង​ទ្រព្យ​សម្បត្តិ 72 ពាន់​លាន​ដុល្លារ៕

(ហ្សាការតា)៖ អ្នកនាំពាក្យម្នាក់បាននិយាយថា ទីភ្នាក់ងារប្រឆាំងអំពើពុករលួយរបស់ប្រទេសឥណ្ឌូនេស៊ី បានចាប់ខ្លួនអនុរដ្ឋមន្ត្រីទទួលបន្ទុកកិច្ចការអន្តោប្រវេសន៍របស់ប្រទេសនេះ ដែលធ្វើឱ្យលោកក្លាយជាមន្ត្រី រដ្ឋាភិបាលជាន់ខ្ពស់ទីពីរក្នុងរយៈពេលពីរថ្ងៃដែលប្រឈមមុខនឹងការចោទប្រកាន់ពីបទពុករលួយ។ការចាប់ខ្លួននេះបានកើតឡើងមួយថ្ងៃ បន្ទាប់ពីការិយាល័យអគ្គព្រះរាជអាជ្ញាឥណ្ឌូនេស៊ី (AGO) បានឃុំខ្លួន លោក Dadan Hindayana អតីតប្រធានទីភ្នាក់ងារមួយដែលត្រួតពិនិត្យកម្មវិធីអាហារឥតគិតថ្លៃដ៏ សំខាន់ របស់ប្រធានាធិបតី Prabowo Subianto។ លោក Dadan ត្រូវបានដាក់ឈ្មោះជាជនសង្ស័យក្នុងករណីពុក រលួយ ដែលទាក់ទងនឹងការគ្រប់គ្រង និងការផ្គត់ផ្គង់របស់កម្មវិធីនេះ។ ករណីពុករលួយទាំងពីរដែល ត្រូវបានចោទប្រកាន់មិនមានទំនាក់ទំនងគ្នាទេ។លោក Budi Prasetyo អ្នកនាំពាក្យរបស់ទីភ្នាក់ងារប្រឆាំងអំពើពុករលួយ KPK បានប្រាប់ Reuters នៅក្នុង សារជាអក្សរថា លោក Silmy Karim អនុរដ្ឋមន្ត្រីទទួលបន្ទុកកិច្ចការអន្តោប្រវេសន៍ និងកែតម្រូវ ត្រូវបាន ចាប់ខ្លួនពីបទប្រព្រឹត្តអំពើពុករលួយក្នុងការគ្រប់គ្រងឯកសារអន្តោប្រវេសន៍។អំពើពុករលួយដែលត្រូវបានចោទប្រកាន់នេះបានកើតឡើងចន្លោះឆ្នាំ ២០២៣ និង ២០២៤។ លោក Silmy បានបម្រើការជាអគ្គនាយក ទទួលបន្ទុកកិច្ចការអន្តោប្រវេសន៍ក្រោមការដឹកនាំរបស់លោក Prabowo Joko Widodo ក្នុងអំឡុង ពេលនោះ៕