(ប៉ារីស)៖ អាជ្ញាធរសុខភាពសាធារណៈបាននិយាយថា ប្រទេសបារាំងទប់ទល់នឹងការកើនឡើងជិត 30 ភាគរយនៃចំនួនអ្នកស្លាប់ដែលបានកត់ត្រាក្នុងអំឡុងសប្តាហ៍ថ្ងៃទី 22 ខែមិថុនា ដែលជាកំពូលនៃរលកកំដៅបំបែកកំណត់ត្រាដែលបានវាយប្រហារប្រទេសនេះ ។ក្រសួងសុខាភិបាលសាធារណៈបារាំងបាននិយាយនៅក្នុងរបាយការណ៍ថ្មីមួយថា មាន "ការកើនឡើង 29.1 ភាគរយ ដែលត្រូវគ្នានឹងការស្លាប់បន្ថែមចំនួន 2,025 នាក់បើប្រៀបធៀបទៅនឹងសប្តាហ៍មុន" ខណៈពេលដែលកត់សម្គាល់ថាតួលេខនេះទំនងជា "ការប៉ាន់ស្មានមិនដល់"។របាយការណ៍នេះបាននិយាយថា ចំនួនអ្នកស្លាប់បានកើនឡើង 62 ភាគរយនៅក្នុងតំបន់ប៉ារីសក្នុងអំឡុងសប្តាហ៍ដែលចាប់ផ្តើមពីថ្ងៃទី 22 ខែមិថុនា។ ការកើនឡើងស្រដៀងគ្នានេះត្រូវបានរាយការណ៍នៅក្នុងតំបន់ Pays de la Loire។អ្នកនយោបាយបារាំងមួយចំនួនបានថ្កោលទោសអ្វីដែលពួកគេហៅថាវិធានការមិនគ្រប់គ្រាន់របស់អាជ្ញាធរដើម្បីជួយប្រទេសបារាំងប្រឈមមុខនឹងសីតុណ្ហភាពកើនឡើង។ គណបក្សបៃតង បានដាក់ញត្តិមិនទុកចិត្តប្រឆាំងនឹងរដ្ឋាភិបាលរបស់លោក Sebastien Lecornu។ នៅក្នុងខែមិថុនា ប្រទេសបារាំងបានជួបប្រទះនឹងរលកកំដៅដ៏ខ្លាំងបំផុតដែលមានរយៈពេលប្រហែល ១១ ថ្ងៃ ហើយបានឃើញសីតុណ្ហភាពឡើងលើសពី ៤០ អង្សាសេនៅកន្លែងជាច្រើន។មនុស្សប្រហែល ១៥០០០ នាក់បានស្លាប់នៅក្នុងប្រទេសបារាំងក្នុងអំឡុងពេលរលកកំដៅធ្ងន់ធ្ងរក្នុងឆ្នាំ ២០០៣ ដោយមានមនុស្សចាស់ជាច្រើនបានស្លាប់នៅក្នុងមណ្ឌលថែទាំមនុស្សចាស់៕  

(កំពង់ធំ)៖ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ រួមជាមួយឯកឧត្តម នួន ផារ័ត្ន អភិបាល នៃគណៈអភិបាលខេត្តកំពង់ធំ បានអញ្ជើញជាអធិបតីក្នុងព្រឹត្តិការណ៍ជិះកង់ពីខេត្តកំពង់ធំឆ្ពោះទៅប្រាសាទសំបូរព្រៃគុក និងព្រឹត្តិការណ៍រត់ឆ្លងឧបសគ្គ ក្រោមប្រធានបទ «ផ្លូវឆ្ពោះទៅរាជធានីឦសានបុរៈចេនឡា មុនសម័យអង្គរ» ដើម្បីចូលរួមអបអរសាទរខួបលើកទី៩ នៃការដាក់បញ្ចូលតំបន់ប្រាសាទសំបូរព្រៃគុក ក្នុងបញ្ជីបេតិកភណ្ឌពិភពលោក (៨ កក្កដា ២០១៧ - ៨ កក្កដា ២០២៦) និងផ្សព្វផ្សាយតំបន់គោលដៅទេសចរណ៍វប្បធម៌ បេតិកភណ្ឌ ធម្មជាតិ និងជំរុញកំណើនភ្ញៀវទេសចរ ស្របនឹងការអនុវត្តយុទ្ធនាការទស្សនាកម្ពុជានៅរដូវកាលបៃតង។នៅក្នុងព្រឹត្តិការណ៍ដ៏អធិកអធមនេះ មានការអញ្ជើញចូលរួមពីឯកឧត្តម លោកជំទាវ ថ្នាក់ដឹកនាំក្រសួងទេសចរណ៍ និងតំណាងក្រសួង ស្ថាប័ន, សមាគមឧស្សាហកម្មទេសចរណ៍, ក្រុមហ៊ុនឧបត្ថម្ភ និងផ្នែកឯកជន, ប្អូនៗ ក្មួយៗ អ្នកផលិតមាតិកាព័ត៌មាន Influencers, KOLs ព្រមទាំងបងប្អូនកីឡាករ កីឡាការិនី ភ្ញៀវទេសចរជាតិ និងអន្តរជាតិ ដែលសរុបអ្នកចូលរួមទាំងអស់ប្រមាណ ២.០០០នាក់ ក្នុងនោះអ្នកចូលរួមព្រឹត្តិការណ៍ជិះកង់ ចម្ងាយ ៣០គីឡូម៉ែត មានអ្នកចូលរួមប្រមាណ ១.០០០នាក់ ដែលមានកីឡាករបរទេស ចំនួន ៣សញ្ជាតិ (អាល្លឺម៉ង់, ទុយណេស៊ី, និងអាលហ្សេរី) និងព្រឹត្តិការណ៍រត់ឆ្លងកាត់ឧបសគ្គ (៤២គ.ម., ២១ គ.ម., ៩ គ.ម.) អ្នកចូលរួមប្រមាណ ១.០០០នាក់ ដែលមានកីឡាករបរទេស ចំនួន ១៥ សញ្ជាតិ៖ អាម៉េរិក, ចិន, ជប៉ុន, បារាំង, កូរ៉េខាងត្បូង, រុស្សី, ញ៉ូហ្សេលែន, ហូឡង់, ឈីលី, ឥណ្ឌូនេស៊ី, វៀតណាម, ហ្វីលីពីន, ស្រីលង្កា, ម៉ីយ៉ាន់ម៉ា, អ៊ុយក្រែន។ដោយមានអ្នកចូលរួមព្រឹត្តិការណ៍នាព្រឹកនេះ មានចំនួនច្រើនលើសការរំពឹងទុក ឯកឧត្តមរដ្ឋមន្រ្តី បាន​បញ្ជាក់​ថា នេះគឺជាកម្លាំង​រួបរួម និងការគាំទ្រចេញពីទឹកចិត្តក្នុងការស្រឡាញ់សម្បតិ្តបេតិកភណ្ឌវប្បធម៌ ដែលជាសម្បត្តិបេតិកភណ្ឌពិភពលោកដ៏អស្ចារ្យ ជាពិសេស ការចូលរួមលើកកម្ពស់ វិស័យទេសចរណ៍ ស្របតាមទស្សទាន “ទេសចរណ៍ ផ្សារភ្ជាប់នឹងទឹកដី” “ស្រឡាញ់ជាតិ ត្រូវស្គាល់ទឹកដី” ជាពិសេស លើកកម្ពស់កិត្តិនាមកម្ពុជា និងចូលរួមបង្ហាញទៅកាន់ពិភពលោកថា “កម្ពុជាជាគោលដៅទេសចរណ៍សុវត្ថិភាព ផ្ដល់នូវភាពកក់ក្ដៅ និង បដិសណ្ឋារកិច្ចល្អ” ដែលស្វាគមន៍ការមកកម្សាន្តរបស់ភ្ញៀវ​ទេសចរជាតិ និង ទេសចរអន្តរជាតិមកពីទូទាំងសកលលោក។ជាមួយគ្នានេះដើម្បីជំរុញចលនាទេសចរណ៍ក្នុងស្រុក និងជួយដល់សេដ្ឋកិច្ចមូលដ្ឋាន ឯកឧត្តមរដ្ឋមន្រ្តី ក៏បានលើកទឹកចិត្ត បងប្អូនទាំងអស់ ព្រមទាំងក្រុមគ្រួសារធ្វើដំណើរកម្សាន្តទៅកាន់គោលដៅទេសចរណ៍ដ៏សម្បូរបែបនៅកម្ពុជា ជា​ពិសេសនៅរដូវកាលបៃតង (Green Season)​ ពីខែឧសភារហូតដល់ខែតុលា ដែលកម្ពុជាមានទេសភាពដ៏ស្រស់បំព្រងនៅរដូវកាលនេះ៕

(ភ្នំពេញ)៖ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ និងលោក Christof Weigelmeier អនុប្រធានបេសកកម្ម និងជាប្រធានផ្នែកកិច្ចសហប្រតិបត្តិការអភិវឌ្ឍន៍នៃស្ថានទូតអាល្លឺម៉ង់ប្រចាំកម្ពុជាបានអញ្ជើញជាសក្ខីភាពក្នុងពិធីចុះកិច្ចព្រមព្រៀងសម្រាប់អនុវត្តគម្រោងកិច្ចសហប្រតិបត្តិការបច្ចេកទេស «ឧស្សាហកម្មវាយនភណ្ឌប្រកបដោយចីរភាពនៅកម្ពុជា ជំហានទីពីរ (FABRIC Cambodia II)» រវាងក្រសួងការងារនិងបណ្តុះបណ្តាលវិជ្ជាជីវៈ ក្រសួងសេដ្ឋកិច្ច និងហិរញ្ញវត្ថុ និងទីភ្នាក់ងារសហប្រតិបត្តិការអាល្លីម៉ង់ (GIZ) នាព្រឹកថ្ងៃទី៦ ខែកក្កដា ឆ្នាំ២០២៦ នាទីស្តីការក្រសួង ក្នុងទិសដៅបន្តលើកកម្ពស់ខ្សែច្រវាក់ផ្គត់ផ្គង់ប្រកបដោយនិរន្តរភាព និងពង្រឹងការអនុលោមតាមស្តង់ដាសង្គម និងបរិស្ថានដោយសហការជាមួយវិស័យសាធារណៈនិងឯកជន។ នាឱកាសនោះ ឯកឧត្តមរដ្ឋមន្ត្រីបានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលអាល្លឺម៉ង់ដែលបន្តគាំទ្រ និងពង្រឹងកិច្ចសហប្រតិបត្តិការកាន់តែជិតស្និទ្ធក្នុងវិស័យកាត់ដេរ ផលិតស្បែកជើង និងកាបូប (GFT)។ ការចុះកិច្ចព្រមព្រៀងនាពេលនេះ បង្ហាញពីការប្តេជ្ញាចិត្តយ៉ាងមុតមាំរបស់ប្រជាជន និងរដ្ឋាភិបាលអាល្លឺម៉ង់ក្នុងការគាំទ្រ និងចែករំលែកសាមគ្គីភាពជាមួយប្រជាជនកម្ពុជា ជាពិសេសបងប្អូនកម្មករនិយោជិត។ ពិធីនេះមានអត្ថន័យលើសពីកិច្ចព្រមព្រៀងក្នុងការពង្រឹងភាពជាដៃគូអន្តរជាតិឱ្យកាន់តែរឹងមាំ និងជាសក្ខីភាពបញ្ជាក់ពីការប្តេជ្ញាចិត្តក្នុងការប្រែក្លាយគោលបំណងរួមដ៏ឧត្តុង្គឧត្តមទៅជាសកម្មភាពជាក់ស្តែងប្រកបដោយប្រសិទ្ធភាព ដើម្បីផលប្រយោជន៍ជាក់ស្តែងដល់បងប្អូនកម្មករនិយោជិត សហគ្រាស និងជួយពង្រឹងមូលដ្ឋានគ្រឹះនៃសេដ្ឋកិច្ចកម្ពុជាឱ្យកាន់តែរឹងមាំ។ជាមួយនឹងការលើកឡើងពីជោគជ័យនៃគម្រោងក្នុងជំហានទីមួយ ឯកឧត្តមមានប្រសាសន៍ថា វិស័យកាត់ដេរ ផលិតស្បែកជើង និងកាបូប ដែលនៅតែបន្តដើរតួនាទីជាកម្លាំងស្នូលដ៏សំខាន់ក្នុងការជំរុញកំណើនសេដ្ឋកិច្ច ការនាំចេញ មុខរបរនិងការងារ និងការអភិវឌ្ឍសង្គមកម្ពុជា កំពុងស្ថិតក្នុងដំណាក់កាលផ្លាស់ប្តូរយ៉ាងសំខាន់ ស្របពេលដែលទីផ្សារសកលកាន់តែផ្តោតលើនិរន្តរភាពបរិស្ថាន ស្តង់ដាការងារខ្ពស់ និងការធ្វើអាជីវកម្មប្រកបដោយការទទួលខុសត្រូវ។ រាជរដ្ឋាភិបាលកម្ពុជាចាត់ទុកការលើកកម្ពស់ការងារសមរម្យ ផលិតភាព និរន្តរភាពបរិស្ថាន និងការអនុវត្តច្បាប់ ជាអាទិភាពស្នូលក្នុងយុទ្ធសាស្ត្របញ្ចកោណ ដំណាក់កាលទី១ និងយុទ្ធសាស្ត្រអភិវឌ្ឍន៍វិស័យកាត់ដេរ ផលិតស្បែកជើង និងកាបូបកម្ពុជា ២០២២-២០២៧។ ឯកឧត្តម ហេង សួរ បានវាយតម្លៃខ្ពស់ចំពោះភាពជាដៃគូដ៏យូរអង្វែងជាមួយ GIZ ដែលលើសពីការគាំទ្រផ្នែកហិរញ្ញវត្ថុ ដោយផ្តោតលើការផ្លាស់ប្តូរចំណេះដឹង ការពង្រឹងស្ថាប័ន កិច្ចសន្ទនាគោលនយោបាយ និងការអភិវឌ្ឍសមត្ថភាព ដែលរួមចំណែកយ៉ាងសំខាន់ក្នុងការពង្រឹងប្រព័ន្ធអធិការកិច្ចការងារ សុវត្ថិភាពនិងសុខភាពការងារ ការលើកកម្ពស់ការធ្វើអាជីវកម្មប្រកបដោយការទទួលខុសត្រូវ និងការអភិវឌ្ឍកម្លាំងពលកម្ម ព្រមទាំងជួយកម្ពុជាត្រៀមខ្លួនឆ្លើយតបនឹងស្តង់ដាអន្តរជាតិថ្មីៗ។ ក្រសួងក៏បន្តពង្រឹងការអនុវត្តផ្នែកសុវត្ថិភាព និងសុខភាពការងារ ជំរុញការធ្វើបរិវត្តកម្មឌីជីថល និងពង្រឹងការត្រៀមខ្លួនក្នុងការឆ្លើយតបនឹងគោលការណ៍​អន្តរជាតិ ដូចជា បរិស្ថាន សង្គមនិងអភិបាលកិច្ច (ESG) និងការត្រួតពិនិត្យភាពត្រឹមត្រូវផ្នែកសិទ្ធិមនុស្ស និងបរិស្ថាន (HREDD)។ដើម្បីភាពជោគជ័យនៃគម្រោងនេះ គឺទាមទារឱ្យមានកិច្ចសហការយ៉ាងជិតស្និទ្ធរវាងស្ថាប័នរាជរដ្ឋាភិបាល និយោជក អង្គការតំណាងកម្មករនិយោជិត ដៃគូអភិវឌ្ឍន៍ អង្គការសង្គមស៊ីវិល និងក្រុមហ៊ុនម៉ាកល្បីៗអន្តរជាតិ។ តាមរយៈការប្តេជ្ញាចិត្ត និងភាពជាដៃគូរួម ឯកឧត្តមរដ្ឋមន្រ្តីជឿជាក់យ៉ាងមុតមាំថា គម្រោងនេះនឹងរួមចំណែកយ៉ាងសំខាន់ក្នុងការលើកកម្ពស់លក្ខខណ្ឌការងារ ពង្រឹងនិរន្តរភាពបរិស្ថាន ជំរុញការអនុវត្តអាជីវកម្មប្រកបដោយការទទួលខុសត្រូវ និងធានាឱ្យវិស័យនេះបន្តរក្សាបាននូវភាពប្រកួតប្រជែង និងភាពធន់នៅក្នុងទីផ្សារពិភពលោកសម្រាប់ផលប្រយោជន៍រួម។ទន្ទឹមនេះ លោក Christof Weigelmeier មានប្រសាសន៍ថា អាល្លឺម៉ង់មានមោទនភាពក្នុងការបន្តកិច្ចសហប្រតិបត្តិការជាមួយកម្ពុជាតាមរយៈគម្រោងដ៏សំខាន់នេះ ដើម្បីបន្តលើកកម្ពស់សិទ្ធិការងារ ស្តង់ដាបរិស្ថាន និងសង្គម ព្រមទាំងគាំទ្រការអភិវឌ្ឍវិស័យ GFT ដោយលោកគូសបញ្ជាក់ថា ការពង្រឹងស្តង់ដាបរិស្ថាន សង្គម សិទ្ធិមនុស្ស និងការត្រួតពិនិត្យអនុលោមភាពនឹងជួយបង្កើនភាពប្រកួតប្រជែងកម្ពុជាក្នុងខ្សែច្រវាក់ផ្គត់ផ្គង់សកល។ លោកថ្លែងថា អាល្លឺម៉ង់ត្រៀមខ្លួនបន្តគាំទ្រគម្រោងនេះបន្ថែមទៀត និងប្តេជ្ញាបន្តធ្វើជាដៃគូដ៏រឹងមាំរបស់កម្ពុជាទាំងក្នុងដំណើរឆ្ពោះទៅការចាកចេញពីក្រុមប្រទេសអភិវឌ្ឍន៍តិចតួច៕

(ស្ទឹងត្រែង)៖ បន្ទាប់ពីទទួលបទបញ្ជាពី ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស និង ឯកឧត្តម សរ សុពុត្រា អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តស្ទឹងត្រែង ឱ្យស្រាវជ្រាវបន្ថែមទៀតដើម្បីវែករកមុខសញ្ញាជនល្មើសឱ្យខានតែបាន ហើយបានបញ្ជូនកម្លាំងជំនាញការិយាល័យប្រឆាំងគ្រឿងញៀន កងរាជអាវុធហត្ថលើផ្ទៃប្រទេស សហការជាមួយកម្លាំងកងរាជអាវុធហត្ថខេត្តស្ទឹងត្រែង ដោយមានការសម្របសម្រួលនីតិវិធីពីព្រះរាជអាជ្ញារងអមសាលាដំបូងខេត្តស្ទឹងត្រែង ធ្វើការស្រាវជ្រាវរហូតដល់ឃាត់ខ្លួនបានជនសង្ស័យម្នាក់ និងចាប់យកវត្ថុ​តាងថ្នាំញៀនចំនួន ០៣កញ្ចប់​ធំបន្ថែមទៀត ។ បច្ចុប្បន្នកម្លាំងជំនាញការិយាល័យប្រឆាំងគ្រឿងញៀនបានកសាងសំណុំរឿងបញ្ជូនជនសង្ស័យ ព្រមទាំងវត្ថុតាងទៅអយ្យការអមសាលាដំបូងខេត្តស្ទឹងត្រែង ដើម្បីចាត់ការតាមនីតិវិធី និងកំពុងបន្តស្រាវជ្រាវកំណត់មុខសញ្ញាតាមចាប់ជនសង្ស័យបន្តបន្ទាប់ទៀត។សូមបញ្ជាក់ផងដែរ កាលពីវេលាម៉ោង ២១:២០នាទី ថ្ងៃទី៣០ ខែមិថុនា ឆ្នាំ២០២៦ កម្លាំងស្នាក់ការសន្តិសុខលេខ៧៤៧ ដឹកនាំបញ្ជាផ្ទាល់ដោយ លោក ឧត្តមសេនីយ៍ត្រី សេង សុភាព មេបញ្ជាការកងរាជអាវុធហត្ថខេត្តស្ទឹងត្រែង សហការជាមួយកម្លាំងមន្ទីរបរិស្ថានខេត្តស្ទឹងត្រែង បានបង្ក្រាបករណីថ្នាំញៀនប្រភេទមេតំហ្វេតាមីន ice (ទឹកកក) ចំនួន ៣៧កញ្ចប់ស្មើនឹងជាង ៣៧ គីឡូក្រាម (ថ្លឹងទាំងសម្បកថង់) ជនសង្ស័យបានរត់គេចខ្លួនបាត់ ស្ថិតនៅទន្លេមេគង្គ ចំណុចកន្ទុយកោះហឹប ភូមិកោះហឹប ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង។

(បច្ចេកវិទ្យា)៖ ក្រុមហ៊ុន Apple ត្រូវបានគេរាយការណ៍ថា បានស្នើសុំឱ្យដៃគូរបស់ខ្លួនកែសម្រួលការបញ្ជាទិញរបស់ពួកគេសម្រាប់ iPhone ដែលអាចបត់បាន ឬ iPhone Ultra ដល់ 10 លានគ្រឿង ដោយរំពឹងថានឹងមានការលក់នៅចុងឆ្នាំនេះ។តួលេខនេះ ដែលត្រូវបានដកស្រង់ដោយ Nikkei Asia ពីខ្សែសង្វាក់ផ្គត់ផ្គង់ គឺជាការកើនឡើងពីការព្យាករណ៍ចំនួន 7-8 លានគ្រឿងកាលពីប៉ុន្មានខែមុន។ យោងតាមប្រភពដដែលនេះ ក្រុមហ៊ុន Apple បានបញ្ជាទិញគ្រឿងបន្លាស់ និងគ្រឿងបន្ថែមពាក់ព័ន្ធជាមុនសម្រាប់ iPhone សរុបចំនួន 80 លានគ្រឿង ដែលនឹងត្រូវដឹកជញ្ជូននៅក្នុងឆមាសទីពីរ នៃឆ្នាំនេះ រួមទាំងម៉ូដែល iPhone 17 Pro និង 17 Pro Max ដែលមានស្រាប់ និង iPhone 18 Pro, 18 Pro Max និង iPhone Ultra ដែលនឹងចេញលក់នាពេលខាងមុខ។ បន្ថែមពីលើបរិមាណបញ្ជាទិញជាមុន ក្រុមហ៊ុន Apple អាចដឹកជញ្ជូន iPhone ជិត 240 លានគ្រឿងនៅក្នុងឆ្នាំ 2026 តែមួយមុខ។យោងតាមប្រភពមួយផ្សេងទៀត ចំនួននៃការបញ្ជាទិញបានកើនឡើងដល់ 85 លានសម្រាប់ឆមាសទីពីរនៃឆ្នាំនេះ។ ដើម្បីត្រៀមខ្លួន Apple ត្រូវបានគេនិយាយថាបានស្នើសុំឱ្យអ្នកផ្គត់ផ្គង់ស្តុកទុកគ្រឿងបន្លាស់ដែលប្រើក្នុងស៊េរី iPhone 17 សម្រាប់ស៊េរី iPhone 18។ អ្នកផ្គត់ផ្គង់ម្នាក់បាននិយាយថា "តម្រូវការសម្រាប់ iPhone 17 នៅតែល្អ ប៉ុន្តែយើងត្រូវបានស្នើសុំឱ្យបម្រុងទុកបន្ទះឈីប និងគ្រឿងបន្លាស់ទូទៅសម្រាប់ស៊េរី iPhone 18 "។ ក្រុមហ៊ុន Apple មិនទាន់បានធ្វើអត្ថាធិប្បាយនៅឡើយទេ។ យោងតាម ​​9to5mac ប្រសិនបើព័ត៌មាននេះត្រឹមត្រូវ ចលនាថ្មីនេះបង្ហាញថា ក្រុមហ៊ុនបច្ចេកវិទ្យាយក្សអាមេរិកកំពុងស្វែងរកយ៉ាងសកម្មដើម្បីធានាការផ្គត់ផ្គង់ គ្រឿងបន្លាស់របស់ខ្លួន។ ពីមុន កង្វះខាតបន្ទះឈីបអង្គចងចាំបានបង្ខំឱ្យក្រុមហ៊ុន ដំឡើងថ្លៃ លើផលិតផលជាច្រើន។ ខណៈពេលដែលភាពពេញនិយមនៃបច្ចេកវិទ្យា AI ជំរុញឱ្យតម្លៃបន្ទះឈីបអង្គចងចាំកើនឡើង អ្នកវិភាគព្យាករណ៍ថា Apple នឹងកែសម្រួលតម្លៃ iPhone ក្នុងពេលឆាប់ៗនេះ។ លោកស្រី Nabila Popal នាយកស្រាវជ្រាវនៅក្រុមហ៊ុន ទិន្នន័យ IDC បានប្រាប់ Reuters ថា "iPhone ក៏មិនមានករណីលើកលែងដែរ។ តម្លៃរបស់វាហៀប នឹងត្រូវបានជំរុញឱ្យកើនឡើង "។ "ការដំឡើងតម្លៃមុនពេលចេញលក់ iPhone ជំនាន់ក្រោយនៅរដូវស្លឹកឈើជ្រុះ គឺជាយុទ្ធសាស្ត្រឆ្លាតវៃបំផុត។ នៅចំណុចនេះ ការផ្តោតអារម្មណ៍មិនមែនលើតម្លៃទេ ប៉ុន្តែលើតម្លៃដែលស្មាតហ្វូនថ្មី ផ្តល់ជូន"។ យោងតាមពាក្យចចាមអារ៉ាមមួយចំនួន iPhone Ultra នឹងមានអេក្រង់បត់បានបែបកុំព្យូទ័រយួរដៃដែលមានសមាមាត្រ 4:3 មានន័យថានៅពេលដែលលាតចេញ ទទឹងនឹងធំជាងកម្ពស់ ដែលជាវិធីសាស្រ្តខុសគ្នាបើប្រៀបធៀបទៅ នឹងស្មាតហ្វូនបត់បានដែលមានស្រាប់នៅលើទីផ្សារ។ លក្ខណៈបច្ចេកទេសដែលលេចធ្លាយបង្ហាញថាឧបករណ៍នេះ នឹងមានអេក្រង់បន្ទាប់បន្សំខាងក្រៅទំហំ 5.5 អ៊ីញ និងអេក្រង់មេខាងក្នុងទំហំ 7.8 អ៊ីញ ដែលតូចជាង iPad mini បន្តិច។ឧបករណ៍នេះអាចមានស៊ុមទីតានីញ៉ូមដែលមានកម្រាស់ស្តើងបំផុតប្រហែល 4.5 មីលីម៉ែត្រ។ ក្រុមហ៊ុន Apple នឹងដកប៊ូតុង Action ចេញ ហើយជំនួស Face ID ដោយឧបករណ៍ចាប់សញ្ញាស្នាមម្រាមដៃ Touch ID ដែលរួមបញ្ចូលនៅក្នុងប៊ូតុងថាមពល។ ផ្នែកខាងក្រោយនឹងមានកាមេរ៉ាភ្លោះដែលរៀបចំផ្ដេកស្រដៀងនឹង iPhone Air។ អ្នកជំនាញបច្ចេកវិទ្យា Sonny Dickson បាននិយាយថា ពណ៌សនឹងក្លាយជាជម្រើសពណ៌តែមួយគត់ សម្រាប់ផលិតផលនេះ។ IDC ព្យាករណ៍ថា iPhone Ultra នឹងត្រូវបានដាក់ក្នុងផ្នែកលំដាប់ខ្ពស់ជាមួយនឹងតម្លៃចាប់ផ្តើម 2,500 ដុល្លារ និងតម្លៃអតិបរមា 3,000 ដុល្លារអាស្រ័យលើការកំណត់រចនាសម្ព័ន្ធខ្ពស់ជាងស្មាតហ្វូនបត់បានភាគច្រើន នៅលើទីផ្សារនាពេលបច្ចុប្បន្ន។ គេហទំព័របច្ចេកវិទ្យាមួយចំនួនរាយការណ៍ថា Apple អាចនឹងកែសម្រួលកាលបរិច្ឆេទ ចេញលក់ iPhone Ultra ទៅឆ្នាំ 2027 ប៉ុន្តែ អ្នកវិភាគ Bloomberg លោក Mark Gurman ជឿជាក់ថា iPhone 18 Pro និង iPhone បត់បាននឹងនៅតែ ចេញលក់ នៅឆ្នាំនេះ ប្រហែលជានៅថ្ងៃទី 8-9 ខែកញ្ញា។

(ភ្នំពេញ)៖ បើតាមសេចក្តីជូនដំណឹង របស់រដ្ឋាករទឹកស្វយ័តក្រុងភ្នំពេញ ស្តីពីការចុះស្រាវជ្រាវ និងជួសជុលទឹកធ្លាយពេលយប់ ក្នុងភូមិសាស្ត្រសង្កាត់ទាំង៦ ចាប់ពីថ្ងៃទី០១ ដល់ថ្ងៃទី៣១ ខែកក្កដា ឆ្នាំ២០២៦ ដែលកម្មវិធីការងារនេះគ្រោងអនុវត្តចាប់ពីម៉ោង២២:០០ នាទីយប់ ដល់ម៉ោង០៥:០០នាទី ទាបភ្លឺ សកម្មភាពការងារខាងលើនេះ នឹងអាចធ្វើឱ្យគុណភាពទឹកមានភាពល្អក់កករក្នុងរយៈពេលខ្លីផងដែរ។ 

(អន្តរជាតិ)៖ ភ្លើងឆេះព្រៃកំពុងឆាបឆេះពាសពេញប្រទេសជាច្រើននៅអឺរ៉ុប ដែលបង្ខំឱ្យមនុស្សរាប់ពាន់នាក់ជម្លៀសចេញ ខណៈដែលសីតុណ្ហភាពត្រូវបានគេរំពឹងថានឹងកើនឡើងម្តងទៀតនៅក្នុងរយៈពេលប៉ុន្មានថ្ងៃខាងមុខ។អ្នកពន្លត់អគ្គីភ័យរាប់រយនាក់កំពុងប្រយុទ្ធប្រឆាំងនឹងភ្លើងឆេះព្រៃដែលបានបំផ្លិចបំផ្លាញផ្ទៃដីជាង ១៩,០០០ ហិកតានៅទូទាំងប្រទេសព័រទុយហ្គាល់ អេស្ប៉ាញ បារាំង និងក្រិក។ សីតុណ្ហភាពនៅទូទាំងទ្វីបអឺរ៉ុបកំពុងកើនឡើង ដែលត្រូវបានគេព្យាករណ៍ថានឹងឡើងដល់ ៤០អង្សាសេ នៅក្នុងតំបន់មួយចំនួនដែលនៅតែរងផលប៉ះពាល់យ៉ាងខ្លាំង ដោយរលកកំដៅដែលបំបែកកំណត់ត្រាថ្មីៗនេះ។នេះបើយោងតាម ​​AFP និងREUTER។ មនុស្សជាង ១០.០០០ នាក់ត្រូវបានជម្លៀសចេញពីផ្ទះរបស់ពួកគេនៅជិតទីក្រុង Perpignan ភាគខាងត្បូងប្រទេសបារាំង ខណៈដែលក្រុមអ្នកពន្លត់អគ្គីភ័យបានតស៊ូដើម្បីគ្រប់គ្រងភ្លើងឆេះព្រៃដែល បានបំផ្លិចបំផ្លាញព្រៃឈើចំនួន ១.៦៥០ ហិកតា។ «អគ្គីភ័យ​បាន​ឆាបឆេះ​ក្នុង​ចម្ងាយ​ប្រហែល 300 ម៉ែត្រ​ពី​ផ្ទះ​របស់​យើង។ មនុស្ស​គ្រប់​គ្នា​មាន​ការ​ភ្ញាក់ផ្អើល និង​ស្ទើរតែ​ភ័យ​ស្លន់ស្លោ​ដោយសារ​វា​រាលដាល​យ៉ាង​ឆាប់រហ័ស​មិន​គួរ​ឲ្យ​ជឿ» នេះ​បើ​តាម​ការ​លើកឡើង​របស់​លោក Patrice អាយុ 53 ឆ្នាំ ដែល​រស់នៅ​ក្នុង​ភូមិ Trevillach។ «យើងបានឃើញផ្សែងនៅម៉ោងប្រហែល ១០:៣០ យប់ បន្ទាប់មកភ្លើងកាន់តែខិតជិតមកដល់។ បុគ្គលិកសាលាក្រុងម្នាក់បានគោះទ្វារនៅម៉ោង ១ ព្រឹក ដើម្បីធានាថាយើងទាំងអស់គ្នាត្រូវបានជម្លៀសចេញ។ រថយន្តពន្លត់អគ្គីភ័យមានគ្រប់ទីកន្លែង ហើយផ្សែងក៏ក្រាស់» Charlotte Pignol អាយុ ៣០ ឆ្នាំ បានរៀបរាប់។ អ្នកពន្លត់អគ្គីភ័យបារាំងប្រមាណ ៣០០នាក់កំពុងប្រយុទ្ធប្រឆាំងនឹងភ្លើងឆេះព្រៃមួយផ្សេងទៀតនៅក្នុង តំបន់ភ្នំមួយនៃខេត្ត Drome នៅភាគអាគ្នេយ៍នៃប្រទេស។ នៅប្រទេសក្រិក ភ្លើងឆេះព្រៃបានបំផ្លាញរោងចក្រ ចំនួនពីរនៅភាគខាងជើងទីក្រុង Thessaloniki ដែលបង្ខំឱ្យអាជ្ញាធរជម្លៀសចេញពីតំបន់ជុំវិញ និងណែនាំគ្រួសារ ឱ្យបិទបង្អួចរបស់ពួកគេ។ ភ្លើងឆេះព្រៃនៅជិតឆ្នេរសមុទ្រ Costa Brava ភាគឦសានប្រទេសអេស្ប៉ាញ បានបំផ្លាញផ្ទៃដីជាង 2,200 ហិកតាក្នុងរយៈពេលពីរថ្ងៃ។ ក្រុមអ្នកពន្លត់អគ្គីភ័យអេស្ប៉ាញបាននិយាយថា កិច្ចខិតខំប្រឹងប្រែងឆ្លើយតបត្រូវបានរារាំងដោយការកើន ឡើងនៃ សីតុណ្ហភាព និងភ្លើងឆេះព្រៃក្រោមដីជាច្រើនដែលមិនទាន់បានពន្លត់។ ទីភ្នាក់ងារឆ្លើយតបបន្ទាន់ព័រទុយហ្គាល់បានប្រកាសថា ពួកគេបានគ្រប់គ្រងភ្លើងឆេះព្រៃចំនួន ៨០% ដែលបានបំផ្លាញព្រៃឈើ និងគុម្ពឈើប្រមាណ ១៣.០០០ ហិកតានៅភាគខាងជើងនៃប្រទេស។ ភ្លើងឆេះព្រៃធំៗបានបំផ្លាញព្រៃឈើ គុម្ពឈើ និងចម្ការទំពាំងបាយជូររាប់រយហិកតា នៅលើកោះ Hvar របស់ប្រទេសក្រូអាត និងនៅ Tale ប្រទេសអាល់បានី។ អគ្គីភ័យជាបន្តបន្ទាប់ដែល បានកើតឡើងបន្ទាប់ពីរលកកំដៅត្រូវបាន ចាត់ទុកថាជាគ្រោះមហន្តរាយមួយក្នុងចំណោម គ្រោះមហន្តរាយអាក្រក់បំផុតនៅអឺរ៉ុប ដោយសារសីតុណ្ហភាពត្រូវបានគេរំពឹងថានឹងកើនឡើងម្តងទៀត នៅក្នុងរយៈពេលប៉ុន្មានថ្ងៃខាងមុខ មន្ត្រីនៅក្នុងប្រទេសជាច្រើនមានការភ័យខ្លាចថារដូវភ្លើងឆេះព្រៃរដូវក្តៅ នឹងចាប់ផ្តើមមុនមួយខែជាងធម្មតា។ «ការប្រែប្រួលអាកាសធាតុកំពុងកើតឡើង យើងកំពុងរងទុក្ខវេទនា ហើយវាទើបតែចាប់ផ្តើមខែកក្កដាប៉ុណ្ណោះ។ ប្រជាជននៅក្នុងតំបន់ដែលកំពុងឆេះនៃជួរភ្នំ Pyrenees ត្រូវចាត់វិធានការប្រុងប្រយ័ត្ន និងជៀសវាងការបង្កភ្លើងឆេះ។ រដូវក្តៅនេះនឹងវែងឆ្ងាយណាស់សម្រាប់អ្នកពន្លត់អគ្គីភ័យ អ្នកត្រូវតែជួយយើង» លោក Eric Belgioino មន្ត្រីពន្លត់អគ្គីភ័យបារាំងបាននិយាយ។ 

(អន្តរជាតិ)៖ មន្ត្រីវេណេស៊ុយអេឡានិយាយថា យ៉ាងហោចណាស់មនុស្ស ៣.៣៤២នាក់បានស្លាប់ និងប្រហែល ១៦.៧០០នាក់បានរងរបួស ដោយសារតែគ្រោះរញ្ជួយដីពីរលើកដែលបានវាយប្រហារនៅចុងខែមុន។តួលេខអ្នកស្លាប់ និងរបួសត្រូវបានចេញផ្សាយដោយអាជ្ញាធរវេណេស៊ុយអេឡានៅថ្ងៃទី 5 ខែកក្កដា។ អគារជិត 200 បានដួលរលំទាំងស្រុង ភាគច្រើននៅក្នុងរដ្ឋ La Guaira ដែលជាតំបន់ដែលរងគ្រោះខ្លាំងបំផុតដោយសារការរញ្ជួយដី។ មនុស្សជាង 17,000 នាក់ក៏បានបាត់បង់ផ្ទះសម្បែងរបស់ពួកគេ ហើយកំពុងដេកនៅក្នុងជម្រក និងជំរំបណ្ដោះអាសន្ន។ទីក្រុងការ៉ាកាសមិនទាន់បានចេញផ្សាយចំនួនមនុស្សបាត់ខ្លួននៅឡើយទេ ប៉ុន្តែអង្គការសហប្រជាជាតិប៉ាន់ប្រមាណថា តួលេខនេះអាចខ្ពស់ដល់៥០.០០០ នាក់ ខណៈគ្រួសារជាច្រើននៅតែកំពុងស្វែងរកមនុស្សជាទី ស្រលាញ់នៅក្នុងគំនរបាក់បែក។ នេះបើយោងតាមកាសែត AFP។ ទោះជាយ៉ាងណាក៏ដោយ ការយកចិត្តទុកដាក់ឥឡូវនេះបានផ្លាស់ប្តូរទៅការបញ្ចុះសពជនរងគ្រោះដែល ត្រូវបានទាញចេញពីគំនរបាក់បែក និងរំលឹកដល់អ្នកដែលបានស្លាប់។ ក្រុមជួយសង្គ្រោះអន្តរជាតិជាច្រើន បានបញ្ចប់កិច្ចខិតខំប្រឹងប្រែងរបស់ពួកគេដើម្បីស្វែងរកអ្នកនៅរស់រានមានជីវិត និងប្រមូលឧបករណ៍របស់ពួកគេ។នៅឯទីបញ្ចុះសព La Esperanza ក្នុងទីក្រុង La Guaira សាកសពជាង ១៥០ កន្លែងដែលមិនស្គាល់អត្តសញ្ញាណ ត្រូវបានបញ្ចុះ ហើយគ្រឿងចក្រជីករណ្តៅពីរគ្រឿងកំពុងជីកផ្នូរបន្ថែមទៀត។អង្គការសហប្រជាជាតិប៉ាន់ប្រមាណថា ការរញ្ជួយដីពីរដងនេះបានបង្កការខូចខាតចំនួន 6,7 ពាន់លានដុល្លារ ដែលស្មើនឹង 6% នៃផលិតផលក្នុងស្រុកសរុបរបស់ប្រទេសវេណេស៊ុយអេឡា។ អាកាសយានដ្ឋានអន្តរជាតិដែលបម្រើការ នៅរដ្ឋធានីការ៉ាកាស ត្រូវបានខូចខាតបន្ទាប់ពីគ្រោះមហន្តរាយ ហើយមិនទាន់បានបើកឡើងវិញសម្រាប់ ជើងហោះហើរពាណិជ្ជកម្មនៅឡើយទេ។ប្រជាជនវេណេស៊ុយអេឡាជាច្រើនបានរិះគន់ការឆ្លើយតបរបស់រដ្ឋាភិបាលមុនពេលក្រុមស្វែងរក និងជួយសង្គ្រោះអន្តរជាតិមកដល់។ប្រធានាធិបតីបណ្ដោះអាសន្នរបស់ប្រទេសវេណេស៊ុយអេឡា លោកស្រី Delcy Rodriguez បានការពារការឆ្លើយតបរបស់រដ្ឋាភិបាល ដោយនិយាយថា មន្ត្រី និងក្រុមជួយសង្គ្រោះរាប់ពាន់ នាក់ត្រូវបានដាក់ពង្រាយ។ លោកស្រីបានច្រានចោលការភ័យខ្លាចថា ការរញ្ជួយដីពីរដងនឹងបង្កឱ្យមានអស្ថិរភាព ដោយសង្កត់ធ្ងន់ថា ព្រឹត្តិការណ៍នេះបានពង្រឹងបន្ថែមទៀតនូវ «សាមគ្គីភាពសង្គមយ៉ាងជ្រាលជ្រៅ»។ គ្រោះរញ្ជួយដីដ៏ខ្លាំងក្លាមួយកម្រិត ៧.២ រ៉ិចទ័របានវាយប្រហារចម្ងាយប្រហែល ១៦០ គីឡូម៉ែត្រភាគខាងលិចនៃ រដ្ឋធានីការ៉ាកាសរបស់ប្រទេសវេណេស៊ុយអេឡា នៅល្ងាចថ្ងៃទី ២៤ ខែមិថុនា ដែលមានចំណុចកណ្តាលនៅជម្រៅ ២២ គីឡូម៉ែត្រ។ មិនដល់មួយនាទីក្រោយមក គ្រោះរញ្ជួយដីលើកទីពីរកម្រិត ៧.៥ រ៉ិចទ័របានកើតឡើងនៅចម្ងាយពីរបីគីឡូម៉ែត្រ ដោយមានចំណុចកណ្តាលនៅជម្រៅ ១០ គីឡូម៉ែត្រ។ នេះគឺជាគ្រោះរញ្ជួយដីដ៏ខ្លាំងបំផុតនៅក្នុងប្រទេសវេណេស៊ុយអេឡាចាប់តាំងពីឆ្នាំ ១៩០០។  

(ប៉េកាំង)៖ ឧត្តមសេនីយ៍ Zhang Shuguang ត្រូវបានតែងតាំងជាប្រធានគណៈកម្មការត្រួតពិនិត្យវិន័យ នៃគណៈកម្មការយោធាកណ្តាល ដែលជាស្ថាប័នប្រឆាំងអំពើពុករលួយដ៏មានឥទ្ធិពល បំផុតនៅក្នុងយោធាចិន។ ទូរទស្សន៍​មជ្ឈិមចិន (CCTV) បានប្រកាសកាលពីចុងសប្តាហ៍មុនថា ប្រធានាធិបតី ស៊ី ជីនពីង បានតម្លើងឋានៈលោក Zhang Shuguang ដែលបានធ្វើការអស់រយៈពេលជាច្រើនឆ្នាំក្នុងវិស័យត្រួតពិនិត្យវិន័យនៃកងទ័ពរំដោះប្រជាជន (PLA) ទៅជាឧត្តមសេនីយ៍។ ឧត្តមសេនីយ៍ Zhang ក៏ត្រូវបានតែងតាំងជាលេខាធិការនៃគណៈកម្មការត្រួតពិនិត្យវិន័យ (CMC) នៃគណៈកម្មការយោធាកណ្តាល និងជាប្រធានគណៈកម្មការត្រួតពិនិត្យរបស់ CMC ជំនួសលោក Zhang Shengmin ដែលបានកាន់តំណែងនេះតាំងពីឆ្នាំ ២០១៧។លោក ស៊ី ជីនពីង ក៏បានតម្លើងឋានៈលោក វ៉ាង កាង ទៅជាឧត្តមសេនីយ៍ និងតែងតាំងលោកជាមេបញ្ជាការកងទ័ព អាកាស PLA។ ពីមុន លោក វ៉ាង កាង បានកាន់តំណែងដូចជា នាយកបណ្តុះបណ្តាលកងទ័ពអាកាស ជំនួយការប្រធានបុគ្គលិក ប្រធានបុគ្គលិក និងថ្មីៗនេះ គឺជាអនុប្រធានមេបញ្ជាការកងទ័ពអាកាស។ ឧត្តមសេនីយ៍ គឺជាឋានៈខ្ពស់បំផុតសម្រាប់ទាហានអាជីពដែលកំពុងបំពេញកាតព្វកិច្ចនៅក្នុង PLA។ នេះជាលើកដំបូងហើយដែលលោក ស៊ី ជីនពីង បានចេញការតម្លើងឋានៈជាឧត្តមសេនីយ៍ចាប់តាំងពីខែធ្នូ ឆ្នាំ២០២៥ នៅពេលដែលមេបញ្ជាការនៃតំបន់យោធាភាគខាងកើត និងកណ្តាលត្រូវបានតម្លើងឋានៈ។ការតែងតាំង​នេះ​ធ្វើឡើង​ខណៈ​យុទ្ធនាការ​ប្រឆាំង​អំពើពុករលួយ​ក្នុង​ជួរ​កងទ័ព ដែល​បាន​ចាប់ផ្តើម​ដោយ​ប្រធានាធិបតី ស៊ី ជីនពីង កាលពី​ប៉ុន្មាន​ឆ្នាំមុន បន្ត​កាន់តែខ្លាំងឡើង។ ចាប់តាំងពី​ឆ្នាំ ២០២៣ មក យ៉ាងហោចណាស់​មាន​ឧត្តមសេនីយ៍​ចិន​ចំនួន ២៦ នាក់​ត្រូវបាន​ស៊ើបអង្កេត។ អតីត​រដ្ឋមន្ត្រី​ការពារជាតិ​ពីររូប​ត្រូវបាន​កាត់ទោស​ប្រហារជីវិត​ដោយ​ព្យួរ​ទោស​ប្រហារជីវិត​កាលពី​ខែឧសភា។ចំនួនសមាជិកដែលកំពុងកាន់តំណែងរបស់ CMC សម្រាប់អាណត្តិឆ្នាំ ២០២២-២០២៧ ត្រូវបានកាត់បន្ថយគួរឱ្យកត់សម្គាល់។ អតីតសមាជិកជាច្រើនកំពុងស្ថិតក្រោមការស៊ើបអង្កេត រួមទាំងអតីតអនុប្រធានគណៈកម្មការយោធាកណ្តាល អតីតរដ្ឋមន្ត្រីការពារជាតិពីររូប និងឧត្តមសេនីយ៍ជាន់ខ្ពស់មួយចំនួន។ បច្ចុប្បន្ននេះ មានតែលោក ស៊ី ជីនពីង ក្នុងនាមជាប្រធាន CMC និងលោក ចាង សេងមីន អនុប្រធានប៉ុណ្ណោះ ដែលនៅតែជាសមាជិកបច្ចុប្បន្ននៃស្ថាប័នថ្នាក់ដឹកនាំយោធាកំពូល របស់បក្សកុម្មុយនិស្តចិន។ CMC ត្រួតពិនិត្យ និងដឹកនាំសកម្មភាពទាំងអស់របស់យោធា និងប៉ូលីសប្រដាប់អាវុធចិន។

(ភ្នំពេញ)៖ វិទ្យាស្ថានជាតិពហុបច្ចេកទេសកម្ពុជា (NPIC) នៃក្រសួងការងារ និងបណ្ដុះបណ្ដាលវិជ្ជាជីវៈ ទទួលបានពានរង្វាន់ក្នុងជ័យលាភីលេខ១ និងលេខ២ នៅក្នុងកម្មវិធីប្រកួតរ៉ូបូតថ្នាក់ជាតិ លើកទី១៣ ឆ្នាំ២០២៦ ក្លាយជាក្រុមតំណាងឱ្យព្រះរាជាណាចក្រកម្ពុជាទៅចូលរួមប្រកួតរ៉ូបូត កម្រិតអាស៊ីបាស៊ីហ្វិក នាពេលខាងមុខ។កម្មវិធីប្រកួតរ៉ូបូតថ្នាក់ជាតិលើកទី១៣ នាថ្ងៃទី៥ ខែកក្កដា ឆ្នាំ២០២៦នេះ ធ្វើឡើងក្នុងគោលបំណងផ្តល់ជាវេទិកាសម្រាប់ជំរុញការសិក្សា ស្រាវជ្រាវ និងការច្នៃប្រឌិតរបស់សិស្ស និស្សិត និងយុវជនកម្ពុជាក្នុងវិស័យរ៉ូបូត ព្រមទាំងលើកទឹកចិត្តឱ្យមានការបង្កើតនវានុវត្ត៍ថ្មីក្នុងវិស័យនេះដូចគ្នា ដើម្បីរួមចំណែកកសាងធនធានមនុស្សដែលមានសមត្ថភាព លើកស្ទួយវិស័យបច្ចេកវិទ្យានៅកម្ពុជា។ ។លើសពីនេះកម្មវិធីក៏ត្រូវបានធ្វើឡើង ដើម្បីស្វែងរកក្រុមជើងឯកតំណាងកម្ពុជាទៅចូលរួមប្រកួតក្នុងព្រឹត្តិការណ៍អន្តរជាតិ ABU Robocon 2026 ដែលនឹងប្រព្រឹត្តទៅនៅទីក្រុងហុងកុង ប្រទេសចិន នៅថ្ងៃទី២៣ ខែសីហា ខាងមុខ។ ជាលទ្ធផលនៃការប្រកួតវគ្គផ្ដាច់ព្រ័ត្រថ្នាក់ជាតិ ជ័យលាភីលេខ១ និងលេខ២ បានទៅលើក្រុមដែលមកពី វិទ្យាស្ថានជាតិពហុបច្ចេកទេសកម្ពុជា NPIC  ខណៈជ័យលាភីលេខ៣ បានទៅលើក្រុមកពី វិទ្យាស្ថានបច្ចេកវិទ្យាកម្ពុជា (ITC)។សូមបញ្ជាក់ផងដែរថា កម្មវិធីប្រកួតរ៉ូបូតថ្នាក់ជាតិ លើកទី១៣នេះមានការចូលរួមពីនិស្សិតចំនួន៨ក្រុម មកពីគ្រឹះស្ថានឧត្តមសិក្សា និងបណ្ដុះបណ្ដាលបច្ចេកទេសចំនួន៥ ផ្សេងគ្នារួមមាន វិទ្យាស្ថានជាតិពហុបច្ចេកទេសកម្ពុជា (NPIC) វិទ្យាស្ថានជាតិបណ្តុះបណ្តាលបច្ចេកទេស (NTTI) វិទ្យាស្ថានពហុបច្ចេកទេសព្រះកុសុមៈ (PPI) វិទ្យាស្ថានបច្ចេកវិទ្យាកម្ពុជា (ITC) និងសាកលវិទ្យាល័យជាតិគ្រប់គ្រង (NUM)៕

(សៀមរាប)៖ បន្ទាប់ពីបានដឹកនាំក្រុមការងារ ចុះពិនិត្យស្ថានភាពជាក់ស្តែងនៅតាមទីតាំងសំខាន់ៗក្នុងឧទ្យានជាតិព្រះជ័យវរ្ម័ននរោត្តម «ភ្នំគូលែន» ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ អញ្ជើញដឹកនាំកិច្ចប្រជុំពិគ្រោះយោបល់លើសេចក្ដីព្រាងវិធានការគន្លឹះ សម្រាប់ជំរុញការអភិវឌ្ឍទេសចរណ៍ឧទ្យានជាតិព្រះជ័យវរ័្មននរោត្តម «ភ្នំគូលែន» ឆ្នាំ២០២៦-២០២៨ ក្នុងគោលបំណងពិនិត្យលើវឌ្ឍនភាពការងារក្នុងការអភិវឌ្ឍភ្នំគូលែន និងពិភាក្សា ព្រមទាំងពិគ្រោះយោបល់លើសេចក្ដីព្រាងវិធានការគន្លឹះសម្រាប់ជំរុញការអភិវឌ្ឍទេសចរណ៍ឧទ្យានជាតិព្រះជ័យវរ្ម័ននរោត្តម «ភ្នំគូលែន» ឆ្នាំ២០២៦-២០២៨។កិច្ចប្រជុំដ៏មានសារៈសំខាន់នេះ មានការអញ្ជើញចូលរួមពីឯកឧត្ដម លោកជំទាវ ថ្នាក់ដឹកនាំតំណាងក្រសួង ស្ថាប័នពាក់ព័ន្ធ, ឯកឧត្ដម លោកជំទាវ ថ្នាក់ដឹកនាំក្រសួងទេសចរណ៍, ឯកឧត្ដម ង៉ូវ សេងកាក់ អភិបាលរង នៃគណៈអភិបាលខេត្តសៀមរាប ព្រមទាំងលោក លោកស្រីក្នុងវិស័យឯកជន ដៃគូអភិវឌ្ឍ និងសង្គមស៊ីវិល សរុបប្រមាណ ១៣០នាក់។ថ្លែងក្នុងកិច្ចប្រជុំ ឯកឧត្តមរដ្ឋមន្ត្រី បានគូសរំលេចថា រាជរដ្ឋាភិបាលតែងតែយកចិត្តទុកដាក់ខ្ពស់លើវិស័យទេសចរណ៍ និយាយជារួម និង ដោយឡែក ការស្ដារ និងជំរុញកំណើនទេសចរណ៍ នៅខេត្តសៀមរាប ដោយបានដាក់ចេញនូវគោលនយោបាយ, ផែនការយុទ្ធសាស្ត្រ យុទ្ធនាការទស្សនាសៀមរាប, ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ ២០២១-២០៣៥, និងវិធានការអន្តរាគមន៍ជាច្រើន ដើម្បីគាំទ្រដល់ការអភិវឌ្ឍវិស័យទេសចរណ៍នៅខេត្តសៀមរាប ដែលក្នុងនោះរាជរដ្ឋាភិបាល បានផ្តោតការយកចិត្តទុកដាក់លើការធ្វើពិពិធកម្មគោលដៅទេសចរណ៍ ឱ្យសម្បូរបែប និងមានភាពទាក់ទាញ ដើម្បីពន្យារពេលស្នាក់នៅរបស់ភ្ញៀវទេសចរជាតិ និង អន្តរជាតិ សំដៅបង្កើនចំណូលដល់ប្រជាសហគមន៍ដោយផ្ទាល់។ឯកឧត្តមរដ្ឋមន្ត្រី បានបញ្ជាក់បន្ថែមថា ការរៀបចំសេចក្ដីព្រាងវិធានការគន្លឹះ សម្រាប់ជំរុញការអភិវឌ្ឍទេសចរណ៍ឧទ្យានជាតិព្រះជ័យវរ្ម័ននរោត្តម «ភ្នំគូលែន» ឆ្នាំ២០២៦-២០២៨ នឹងក្លាយជាឧបករណ៍យុទ្ធសាស្ត្រដ៏សំខាន់ សម្រាប់ពង្រឹងភាពទាក់ទាញនៃគោលដៅទេសចរណ៍ ព្រមទាំងជំរុញកំណើនភ្ញៀវទេសចរជាតិ និងអន្តរជាតិ ឱ្យធ្វើដំណើរទៅទស្សនាតំបន់ទេសចរណ៍ក្រៅពីរមណីយដ្ឋានអង្គរ (Beyond Angkor) ឱ្យកាន់តែច្រើន។ជាការរំលឹកឡើងវិញ ឯកឧត្តមរដ្ឋមន្ត្រី បានមានប្រសាសន៍ថា យោងអនុសាសន៍ដឹកនាំដ៏ខ្ពង់ខ្ពស់បំផុតរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅក្នុងវេទិកា «រាជរដ្ឋាភិបាល-ផ្នែកឯកជន» លើកទី១៩ បានណែនាំដល់ក្រសួងទេសចរណ៍ ធ្វើការអភិវឌ្ឍភ្នំគូលែនជាគោលដៅទេសចរណ៍ធម្មជាតិ។ជាមួយគ្នានេះ ឯកឧត្តមរដ្ឋមន្ត្រី ក៏បានសង្កត់ធ្ងន់អំពីចក្ខុវិស័យឱ្យប្រែក្លាយតំបន់ឧទ្យានជាតិភ្នំគូលែន ជាគោលដៅទេសចរណ៍វប្បធម៌ ជំនឿ និង ធម្មជាតិឈានមុខគេនៅអាស៊ីអាគ្នេយ៍ ប្រកបដោយគុណភាព ចីរភាព និងបរិយាបន្ន និងប្រកួតប្រជែងនៅក្នុងតំបន់ បន្ទាប់ពីប្រាសាទអង្គរវត្ត ទាំងរដូវកាលបៃតង និងរដូវកាលក្តៅផងដែរ។សេចក្ដីព្រាងវិធានការគន្លឹះនេះ រៀបចំឡើង ក្នុងគោលបំណងសំខាន់ៗ ដូចជា ១). បង្កើនភាពទាក់ទាញនិងការប្រកួតប្រជែងរបស់គោលដៅភ្នំគូលែន, ២). ពង្រឹងសន្ដិសុខ សណ្ដាប់ធ្នាប់ និងសុវត្ថិភាពទេសចរណ៍, ៣). អភិវឌ្ឍហេដ្ឋារចនាសម្ព័ន្ធ និងសេវាគាំទ្រប្រកបដោយគុណភាព, ៤). ធ្វើពិពិធកម្មផលិតផលនិងបទពិសោធទេសចរណ៍, ៥). អភិរក្ស និងលើកតម្លៃបេតិកភណ្ឌវប្បធម៌និងទេសចរណ៍ធម្មជាតិ, ៦). បង្កើនការចូលរួមនិងអត្ថប្រយោជន៍របស់សហគមន៍មូលដ្ឋាន, ៧). ជំរុញការអភិវឌ្ឍគោលដៅទេសចរណ៍បៃតង ឆ្លាតវៃ និងមានភាពធន់ , ៨).ពង្រឹងអភិបាលកិច្ច ភាពជាដៃគូ និងវិនិយោគក្នុងវិស័យទេសចរណ៍៕

(សៀមរាប)៖ បន្ទាប់ពីដឹកនាំកិច្ចប្រជុំពិគ្រោះយោបល់លើសេចក្ដីព្រាងវិធានការគន្លឹះ សម្រាប់ជំរុញការអភិវឌ្ឍទេសចរណ៍ឧទ្យានជាតិព្រះជ័យវរ្ម័ននរោត្តម «ភ្នំគូលែន» ឆ្នាំ២០២៦–២០២៨ រួចមក ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានឆ្លៀតជួបសំណេះសំណាល និងទទួលបដិសណ្ឋារកិច្ចយ៉ាងកក់ក្តៅដល់ក្រុមបវរកញ្ញាអន្តរជាតិ World Universal Pageants 2026 ដែលកម្ពុជាត្រូវបានជ្រើសរើសជាប្រទេសម្ចាស់ផ្ទះសម្រាប់ព្រឹត្តិការណ៍អន្តរជាតិនេះ ដែលជាឱកាសដ៏មានសារៈសំខាន់ក្នុងការលើកកម្ពស់កិត្យានុភាពជាតិ ផ្សព្វផ្សាយសក្តានុពលទេសចរណ៍ វប្បធម៌ ប្រវត្តិសាស្ត្រ និងបដិសណ្ឋារកិច្ចរបស់កម្ពុជា ទៅកាន់ពិភពលោក។ការរៀបចំព្រឹត្តិការណ៍អន្តរជាតិនេះ បានឆ្លុះបញ្ចាំងពីការរួមចំណែកទាក់ទាញភ្ញៀវទេសចរ ជំរុញការផ្លាស់ប្តូរវប្បធម៌រវាងប្រជាជាតិ និងពង្រឹងការផ្សព្វផ្សាយរូបភាពវិជ្ជមានរបស់កម្ពុជា ជាគោលដៅទេសចរណ៍ប្រកបដោយសុវត្ថិភាព ភាពកក់ក្តៅ និងបដិសណ្ឋារកិច្ចល្អ៕

(សៀមរាប)៖ បន្ទាប់ពីបានអញ្ជើញជាអធិបតីក្នុងពិធីសំណេះសំណាលជាមួយប្រជាសហគមន៍ និងប្រតិបត្តិករទេសចរណ៍នៅឧទ្យានជាតិព្រះជ័យវរ្ម័ននរោត្តម «ភ្នំគូលែន» រួចមក ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានដឹកនាំក្រុមការងារ អញ្ជើញចុះពិនិត្យស្ថានភាពជាក់ស្តែងនៅតាមទីតាំងសំខាន់ៗក្នុងឧទ្យានជាតិព្រះជ័យវរ្ម័ននរោត្តម «ភ្នំគូលែន» ដើម្បីវាយតម្លៃសក្តានុពល ស្ថានភាពហេដ្ឋារចនាសម្ព័ន្ធ បរិស្ថាន និងសេវាកម្មទេសចរណ៍ សំដៅរៀបចំទិសដៅអភិវឌ្ឍប្រកបដោយប្រសិទ្ធភាព និងចីរភាព។ការចុះពិនិត្យនេះ បានផ្តោតលើការកំណត់វិធានការគន្លឹះ ដើម្បីលើកកម្ពស់គុណភាពគោលដៅទេសចរណ៍ ពង្រឹងការអភិរក្សធនធានធម្មជាតិ បេតិកភណ្ឌវប្បធម៌ និងប្រវត្តិសាស្ត្រ ព្រមទាំងជំរុញការចូលរួមរបស់ប្រជាសហគមន៍ក្នុងការគ្រប់គ្រង និងអភិវឌ្ឍទេសចរណ៍។ក្នុងឱកាសនោះ ឯកឧត្តមរដ្ឋមន្ត្រី បានណែនាំឱ្យគ្រប់ភាគីពាក់ព័ន្ធ បន្តសហការយ៉ាងជិតស្និទ្ធ ដើម្បីរៀបចំ និងអភិវឌ្ឍតំបន់ភ្នំគូលែនឱ្យក្លាយជាគោលដៅទេសចរណ៍ធម្មជាតិ វប្បធម៌ និងជំនឿដ៏ទាក់ទាញ ដែលមានគុណភាព សុវត្ថិភាព អនាម័យ និងបរិយាបន្ន ស្របតាមចក្ខុវិស័យអភិវឌ្ឍទេសចរណ៍របស់រាជរដ្ឋាភិបាល៕

(បន្ទាយមានជ័យ)៖ ក្នុងស្មារតីយកចិត្តទុកដាក់ខ្ពស់ចំពោះជីវភាពរស់នៅរបស់ប្រជាពលរដ្ឋ ក្រសួងការងារនិងបណ្ដុះបណ្ដាលវិជ្ជាជីវៈ តាមរយៈវេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ បានបន្តនាំយកឱកាសការងារចំនួន ៣ ៥០០ កន្លែង អត្ថប្រយោជន៍ ប.ស.ស. និងកម្មវិធី TVET ផ្តល់ជូនប្រជាពលរដ្ឋដល់មូលដ្ឋាន ជាពិសេសសម្រាប់អតីតពលករពីប្រទេសថៃ និងយុវជនរកការងារធ្វើ នៅបរិវេណសាលាស្រុកភ្នំស្រុក ខេត្តបន្ទាយមានជ័យ នាព្រឹកថ្ងៃសៅរ៍ ទី៤ ខែកក្កដា ឆ្នាំ២០២៦។ថ្លែងក្នុងវេទិកាក្រោមប្រធានបទ«ខ្មែរជួយរកការងារ និងផ្ដល់ការងារឱ្យខ្មែរ» ដែលមានប្រជាពលរដ្ឋជាង ៦០០នាក់ចូលរួម ឯកឧត្តម សាន គីមហុង អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្រ្តីក្រសួងការងារនិងបណ្ដុះបណ្ដាលវិជ្ជាជីវៈ មានប្រសាសន៍ថា ឱកាសការងារទាំងជាង ៣ពាន់កន្លែងនេះ គឺស្ថិតក្នុងចំណោមឱកាសការងារជាង ៩ម៉ឺនកន្លែងនៅទូទាំងប្រទេស ដែលក្រសួងការងារក្រោមការយកចិត្តទុកដាក់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានប្រមូលពីក្រុមហ៊ុន រោងចក្រ សហគ្រាសធំៗ ហើយនាំយកមកផ្សព្វផ្សាយដល់មូលដ្ឋាន ដើម្បីបងប្អូនអាចចុះឈ្មោះ សម្ភាស និងទទួលបានការងារភ្លាមៗ។ ឯកឧត្តមបន្តថា ការនាំយកការងារក្នុងស្រុកដ៏សម្បូរបែបមកជូនដល់មូលដ្ឋាននេះ គឺជួយសន្សំទាំងថវិកា និងពេលវេលា ដែលបងប្អូនមិនលំបាកដើររកការងារដោយខ្លួនឯង ដូចកាលពីមុននោះឡើយ។ នៅពេលបងប្អូនមានការងារធ្វើ គឺទទួលបានចំណូល ដែលមិនក្លាយជាបន្ទុកគ្រួសារ និងសង្គមនោះទេ ហើយក៏នាំឱ្យមានការរីកចម្រើនដោយផ្ទាល់ក្នុងសហគមន៍ផងដែរ។ ការងារក្នុងស្រុកនៅតាមរោងចក្រ សហគ្រាស គឺជាជម្រើសដ៏ប្រសើរ សម្រាប់កសាងសេដ្ឋកិច្ច និងផ្តល់សុភមង្គលក្នុងគ្រួសារ។ ក្រៅពីប្រាក់ឈ្នួលសមរម្យ និងអត្ថប្រយោជន៍ផ្សេងៗ បងប្អូនក៏ទទួលបានអត្ថប្រយោជន៍ពីបេឡាជាតិសន្តិសុខសង្គម (ប.ស.ស.)ផងដែរ ដូចជា៖ ផ្នែកហានិភ័យការងារ ផ្នែកថែទាំសុខភាព និងផ្នែកសោធន។ ផ្ទុយទៅវិញ ការងារចំណាកស្រុកនៅប្រទេសថៃ គឺប្រឈមនឹងហានិភ័យសុវត្ថិភាព ការកេងប្រវ័ញ្ចកម្លាំងពលកម្ម ខ្វះការគាំពារសុខភាព អំពើហិង្សា ការរើសអើង និងមិនអាចរស់នៅជួបជុំក្រុមគ្រួសារ។ម្យ៉ាងវិញទៀត ក្នុងករណីដែលចង់ទៅធ្វើការនៅក្រៅប្រទេស ឯកឧត្តមអនុរដ្ឋលេខាធិការបានលើកទឹកចិត្តឱ្យអតីតពលករចុះឈ្មោះទៅធ្វើការនៅប្រទេសផ្សេងៗ ដែលផ្តល់ប្រាក់ខែ និងមានសុវត្ថិភាពខ្ពស់ជាងប្រទេសថៃ ដូចជានៅប្រទេសជប៉ុន កូរ៉េ និងសិង្ហបុរីជាដើម។ ទន្ទឹមនឹងនេះ បងប្អូនដែលមានជំនាញស្រាប់ផ្នែកសំណង់ ប៉ុន្តែមិនទាន់មានវិញ្ញាបនបត្របញ្ជាក់ ក្រសួងក៏បានដាក់ឱ្យអនុវត្តការធ្វើតេស្តទទួលស្គាល់ជំនាញពីមុន (RPL) ដើម្បីឱ្យបងប្អូនទទួលបានវិញ្ញាបនបត្របញ្ជាក់ជំនាញជាផ្លូវការផងដែរ។ លើសពីនេះ ទាំងអតីតពលករ និងយុវជន ដែលរួមទាំងអ្នកមិនចេះអក្សរ ក៏អាចចុះឈ្មោះចូលរៀនដោយឥតគិតថ្លៃនូវវគ្គបណ្ដុះបណ្ដាលជំនាញបច្ចេកទេស តាមរយៈកម្មវិធី TVET ១,៥លានជាមួយនឹងជម្រើសពេលសិក្សាជាច្រើន ដូចជា៖ ផ្នែកសំណង់ ជួសជុលគ្រឿងម៉ាស៊ីន គ្រឿងអគ្គិសនី ម៉ាស៊ីនត្រជាក់ ដុតនំ ឆុងកាហ្វេ និងផ្នែកសាឡនជាដើម។ ក្រោយបញ្ចប់ការសិក្សា បងប្អូនអាចយកជំនាញទាំងនេះបង្កើតមុខរបរដោយខ្លួនឯងបានថែមទៀតផងដែរ។ ឯកឧត្តមក៏បានលើកទឹកចិត្តឱ្យបងប្អូនជួយផ្សព្វផ្សាយពីឱកាសការងារ អត្ថប្រយោជន៍ ប.ស.ស. និងកម្មវិធី TVET ដ៏មានសារៈសំខាន់នេះជូនដល់សមាជិកគ្រួសារ សាច់ញាតិ និងមិត្តភក្តិបន្តទៀត ហើយបើចង់សាកសួរព័ត៌មានបន្ថែម សូមទាក់ទងលេខទូរស័ព្ទ Hotline ១២៩៧ សម្រាប់ព័ត៌មានពីឱកាសការងារ ឬរៀនជំនាញវិជ្ជាជីវៈ និងលេខ ១២៨៦ សម្រាប់ផ្នែក ប.ស.ស.៕

(ភ្នំពេញ)៖ ឯកឧត្តម ហេង សួរ សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខណ្ឌចំការមន បានអញ្ជើញជាអធិបតីដ៏ខ្ពង់ខ្ពស់ក្នុងពិធី “ប្រកាសបញ្ចូលសមាជិកគណបក្សថ្មីរបស់គណៈកម្មាធិការគណបក្សប្រជាជនកម្ពុជាខណ្ឌចំការមន” សរុបចំនួន ៣ ០៨៧នាក់ មកពីសង្កាត់ទាំង ៥ នៃខណ្ឌចំការមន រួមមានសង្កាត់ ទន្លេបាសាក់ ទួលទំពូងទី១ ទួលទំពូងទី២ បឹងត្របែក និងផ្សារដើមថ្កូវ នាព្រឹកថ្ងៃទី៤ ខែកក្កដា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍កោះពេជ្រ។ នាឱកាសនោះ ឯកឧត្តមបានអបអរសាទរ និងស្វាគមន៍យ៉ាងកក់ក្តៅបំផុតចំពោះបងប្អូន កូនក្មួយ ពូមីងដែលបានសម្រេចចិត្តប្រកបដោយសុភនិច្ឆ័យចូលរួមកសាងជីវភាពជាមួយនឹងមហាគ្រួសារគណបក្សប្រជាជនកម្ពុជានាពេលនេះ ដោយផ្អែកតាមសច្ចធម៌ជាប្រវត្តិសាស្ត្ររបស់គណបក្សប្រជាជនកម្ពុជាដែលជាគណបក្សមានវ័យចំណាស់ និងភាពចាស់ទុំជាងគេខាងនយោបាយ ហើយបានឆ្លងកាត់ដំណាក់កាលប្រវត្តិសាស្ត្រដ៏យូរលង់ដោយសម្រេចបានជ័យជម្នះធំធេងក្នុងការតស៊ូដើម្បីផលប្រយោជន៍ជាតិមាតុភូមិ។ ការសម្រេចចិត្តនេះធ្វើឱ្យចំនួនសមាជិក និងមហាគ្រួសារគណបក្សកាន់តែធំដែលមាន ៥ជំនាន់ចម្រុះគ្នា ហើយកម្មវិធីនេះក៏បង្ហាញពីសមិទ្ធផលថ្មីមួយទៀតរបស់គណបក្ស។ទន្ទឹមនេះ ឯកឧត្តមបានពាំនាំនូវការផ្តាំផ្ញើសួរសុខទុក្ខ និងក្ដីនឹករឭកពីសំណាក់ សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា សម្តេចអគ្គមហាពញាចក្រី ហេង សំរិន ប្រធានកិត្តិយស និង សម្តេចអនុប្រធានទាំង ៥ រូបជូនចំពោះគណៈកម្មាធិការគណបក្សខណ្ឌចំការមន និងសមាជិកគណបក្សទាំងអស់ ក្នុងមនោសញ្ចេតនាស្រលាញ់រាប់អានដ៏ស្មោះស្ម័គ្រនិងជ្រាលជ្រៅជាទីបំផុត។ ថ្នាក់ដឹកនាំកំពូលៗសុទ្ធតែមានអត្តចរិតគំរូគួរឱ្យគោរពស្រលាញ់ ខណៈដែលសមាជិកគ្រប់លំដាប់ថ្នាក់ប្រកាន់ខ្ជាប់តួនាទី គោលការណ៍ និងលក្ខនិ្តកៈបក្សប្រកបដោយស្មារតីបុរេសកម្ម ជាពិសេសចេះរួមសុខរួមទុក្ខ ពង្រឹងការងារមូលដ្ឋាន និងផ្សព្វផ្សាយពីសច្ចភាព ប្រវត្តិស្នាដៃ និងកម្មវិធីគោលនយោបាយបក្សជាប្រចាំ។ ជាមួយនឹងការកោតសរសើរនិងវាយតម្លៃខ្ពស់ចំពោះគណៈកម្មាធិការគណបក្សខណ្ឌចំការមន ដែលបានខិតខំបំពេញតួនាទី ពង្រឹងស្មារតីសមាជិកតាមរយៈអភិក្រម “រក្សាចាស់ បង្កើនថ្មី” ដែលសម្តេចតេជោ និង សម្តេចធិបតី តែងតែរំឭក, ឯកឧត្តម ហេង សួរ បានរំឭកពីប្រវត្តិគណបក្ស និងជំរុញឱ្យសមាជិកថ្មីចងចាំពីប្រវត្តិប្រកបដោយអត្ថន័យ បុព្វហេតុនៃការបង្កើតសម្រាប់ជាតិមាតុភូមិ រូបសញ្ញា បាវចនា និងគណបក្សប្រជាជនកម្ពុជាមាន សម្តេចតេជោ ហ៊ុន សែន ជាប្រធាន និងមានអនុប្រធាន ៥ រូប។ ទន្ទឹមនេះ ឯកឧត្តមក៏បានរំលេចពីលក្ខន្តិកៈ និងបទបញ្ជាផ្ទៃក្នុងបក្សដែលមានគោលបំណងប្រមូលកម្លាំងនៃជនជាតិខ្មែរ ដែលមានឧត្តមគតិស្នេហាជាតិ ស្រលាញ់លទ្ធិប្រជាធិបតេយ្យនិងសន្តិភាព មិនប្រកាន់ឋានៈ ជនជាតិ ជំនឿសាសនា អតីតកាលដើម្បីរួមគ្នាការពារសមិទ្ធផលជាតិ និងកសាងកម្ពុជាមួយ​ ឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត និងវឌ្ឍនភាពសង្គម។ ឯកឧត្តមបានជម្រាបជូនអង្គពិធីពីជោគជ័យគណបក្ស ដែលកើតចេញពីភាពត្រឹមត្រូវនយោបាយគ្រប់កាលៈទេសៈ ការផ្សារភ្ជាប់នឹងប្រជាជន អនុវត្តគោលការណ៍ សមូហភាពដឹកនាំ បុគ្គលទទួលខុសត្រូវ រចនាសម្ព័ន្ធចាត់តាំងរឹងមាំគ្រប់ជាន់ថ្នាក់តាមសមត្ថភាព ជំហរស្មោះត្រង់ មានគុណធម៌និងសីលធម៌ ការគិតគូរយ៉ាងល្អិតល្អន់ក្នុងការកសាងជំនាន់បន្តវេន និងសាមគ្គីភាព ឯកភាពផ្ទៃក្នុងរឹងមាំ។ គណបក្សប្រជាជនកម្ពុជា ជាគណបក្សតែមួយគត់ដែលបានតស៊ូផ្ដួលរំលំរបបប្រល័យពូជសាសន៍ សង្គ្រោះជាតិឱ្យរស់ឡើងវិញ ស្តារ កសាងជាតិ ការពារឯករាជ្យអធិបតេយ្យនិងបូរណភាពទឹកដី កសាងនិងថែរក្សាសន្តិភាព និងអភិវឌ្ឍសេដ្ឋកិច្ច-សង្គមនិងជួយឱ្យកម្ពុជារុងរឿង។ ដើម្បីឱ្យជោគជ័យនេះស្ថិតស្ថេរ គឺចាំបាច់ត្រូវការបន្តរក្សាសន្តិភាពដែលថ្នាក់ដឹកនាំគណបក្សជាពិសេស សម្តេចតេជោបានយកជីវិតទៅប្តូរ។ លើសពីនេះ បងប្អូនជាសមាជិកថ្មីត្រូវខិតខំអនុវត្តឱ្យបានពេញលេញនូវការប្តេជ្ញាចិត្ត មានសីលធម៌ល្អ បង្ហាញគំរូល្អក្នុងការអនុវត្តកម្មវិធីនយោបាយ លក្ខន្តិកៈគណបក្ស និងច្បាប់រដ្ឋ ដើម្បីបង្កើនជំនឿនិងការគាំទ្រពីប្រជាពលរដ្ឋបន្ថែមទៀត ហើយត្រូវគោរពឱ្យតម្លៃស្នាដៃរាមច្បងជំនាន់មុន និងបន្តពង្រឹងសមត្ថភាពផងដែរ។ ក្នុងឱកាសនោះ តំណាងសមាជិកថ្មីនៃគណបក្សប្រជាជនកម្ពុជាបានលើកឡើងថា មានតែគណបក្សប្រជាជនកម្ពុជាតែមួយគត់ ដែលមានកម្មវិធីនយោបាយ ដឹកនាំត្រឹមត្រូវមានឧត្តមគតិសេ្នហាជាតិខ្ពស់ និងមានគុណបំណាច់ដ៏ធំធេងចំពោះជាតិមាតុភូមិក៏ដូចជាប្រជាជន។ ហេតុនេះ ទើបសម្រេចចិត្តចូលរួមជាសមាជិកបក្ស និងប្តេជ្ញាចិត្តអនុវត្តតាមកម្មវិធីនយោបាយ និងលក្ខន្តិកៈគណបក្ស បោះឆ្នោតជូនគណបក្សប្រជាជនកម្ពុជាឱ្យបាន ១០០% ថែរក្សាសាមគ្គីឯកភាពផ្ទៃក្នុងជាធ្លុងមួយ ខិតខំឃោសនាផ្សព្វផ្សាយកម្មវិធីនយោបាយគណបក្ស និងច្បាប់រដ្ឋដល់ប្រជាជន និងបំផុសចលនាសមាជិកឱ្យចូលរួមបោះឆ្នោតជូនគណបក្សឱ្យទទួលបានជ័យជម្នះជារៀងរហូត៕