(សុខភាព)៖ គ្រូពេទ្យព្រមានអំពីហានិភ័យនៃការខ្សោយតម្រងនោមពីការញ៉ាំអាហារសមុទ្រនៅរដូវក្តៅ រួមទាំងការឆ្លងមេរោគ ដែលបណ្តាលឱ្យខ្សោះជាតិទឹក ជំងឺរលាកសន្លាក់ហ្គោដស្រួចស្រាវ និងការប្រមូលផ្តុំ លោហធាតុធ្ងន់។អាហារសមុទ្រ គឺជាជម្រើសដ៏ពេញនិយមសម្រាប់ការជួបជុំ។ ទោះជាយ៉ាងណាក៏ដោយ អ្នកជំនាញខាងតម្រងនោម Hong Yong-xiang ពន្យល់ថាការញ៉ាំអាហារសមុទ្រនៅរដូវក្តៅ អាចនាំឱ្យមានការខូចខាតតម្រងនោមធ្ងន់ធ្ងរ៖បាក់តេរី​ដ៏​សាហាវ៖ ប្រសិនបើអាហារសមុទ្រត្រូវបានយកចេញពីបរិស្ថានដែលមានសីតុណ្ហភាពទាប សូម្បីតែក្នុងរយៈពេលខ្លីក្នុងអំឡុងពេលផ្ទុក ឬដឹកជញ្ជូនក៏ដោយ អាកាសធាតុក្តៅនៅរដូវក្តៅអាចបណ្តាល ឱ្យបាក់តេរីដូចជា Vibrio parahaemolyticus (បាក់តេរីអាសន្នរោគសមុទ្រ) ឬ Vibrio vulnificus (បាក់តេរីស៊ីសាច់) ដ៏គ្រោះថ្នាក់ កើនឡើងឥតឈប់ឈរ។ ប្រសិនបើអ្នកញ៉ាំអាហារសមុទ្រដែលមិនទាន់ឆ្អិនល្អ ការពុលអាហារអាចបណ្តាលឱ្យក្អួត និងរាគធ្ងន់ធ្ងរ។ នេះនាំឱ្យមានការខ្សោះជាតិទឹកធ្ងន់ធ្ងរ ការថយចុះភ្លាមៗនៃលំហូរឈាមទៅកាន់តម្រងនោម បណ្តាលឱ្យស្លាប់កោសិកាបំពង់ស្រួចស្រាវដោយសារតែកង្វះឈាម និងវិវត្តទៅជា ខ្សោយតម្រងនោមស្រួចស្រាវ ។ នេះបើយោងតាមកាសែត VN Express។ ជំងឺរលាកសន្លាក់ហ្គោដស្រួចស្រាវ៖ បង្គា ក្តាម និង​សត្វ​ខ្យង​ជាច្រើន​ប្រភេទ (ខ្យង លៀស ខ្យង។ល។) សុទ្ធតែជាអាហារដែលសម្បូរទៅដោយសារធាតុ purines។ ការទទួលទានអាហារសមុទ្រច្រើនក្នុងអាហា រមួយពេលនឹងបណ្តាលឱ្យ កម្រិត អាស៊ីតអ៊ុយរិក ក្នុងរាងកាយកើនឡើងភ្លាមៗ។ ប្រសិនបើមិនត្រូវបានបញ្ចេញ ចេញទាន់ពេលវេលាទេ អាស៊ីតអ៊ុយរិកនឹងកកកុញនៅក្នុងសន្លាក់ និងស្រទាប់តម្រងនោម ដែលបណ្តាលឱ្យមានការវាយប្រហារស្រួចស្រាវនៃជំងឺរលាកសន្លាក់ហ្គោដ និងស្ទះបំពង់តម្រងនោម។អ្វីដែលគួរឲ្យព្រួយបារម្ភជាងនេះទៅទៀត ប្រសិនបើ ការវាយប្រហារដោយជំងឺ រលាកសន្លាក់ហ្គោដ កើតឡើងវិញ ហើយអ្នកជំងឺប្រើថ្នាំដោយខ្លួនឯងជាមួយនឹងថ្នាំប្រឆាំងនឹងការរលាកដែលមិនមែនជាស្តេរ៉ូអ៊ីត (NSAIDs) ថ្នាំទាំងនេះអាចធ្វើឲ្យសរសៃឈាមតម្រងនោមរួមតូចយ៉ាងធ្ងន់ធ្ងរ។ ការស្ទះអាស៊ីតអ៊ុយរិករួមផ្សំជាមួយ នឹងថ្នាំបំបាត់ការឈឺចាប់ដែលកាត់ផ្តាច់ការផ្គត់ផ្គង់ឈាមបង្កើតជា "ការវាយប្រហារទ្វេដង" ដែលបណ្តាលឱ្យខ្សោយតម្រងនោមទាំងស្រុងក្នុងមួយប៉ប្រិចភ្នែក។ពុលមើលមិនឃើញ៖ លោកវេជ្ជបណ្ឌិត ហុង យ៉ុងសៀង បានពន្យល់បន្ថែមទៀតថា ត្រីធំៗនៅផ្នែកខាងលើនៃខ្សែសង្វាក់អាហារ ដូចជាត្រីឆ្លាម ត្រីម៉ាលីន និងត្រីធូណា ជារឿយៗប្រមូលផ្តុំលោហធាតុធ្ងន់ក្នុងបរិមាណច្រើននៅក្នុងខ្លួនរបស់វា ជាធម្មតាគឺមេទីលបារត និងកាដមីញ៉ូម។ ប្រសិនបើត្រីទាំងនេះត្រូវបានបរិភោគក្នុងរយៈពេលយូរ លោហធាតុធ្ងន់ដែលប្រមូលផ្តុំអាចបណ្តាល ឱ្យមានជំងឺតម្រងនោមរ៉ាំរ៉ៃ ដែលនាំឱ្យមានការចុះខ្សោយបន្តិចម្តងៗ និងស្ងាត់ស្ងៀមនៃមុខងារ តម្រងនោមដោយអ្នកជំងឺមិនដឹងខ្លួន ហើយនៅទីបំផុតវិវត្តទៅជាខ្សោយតម្រងនោមរ៉ាំរ៉ៃដែលមិនអាចត្រឡប់វិញបាន។

(អន្តរជាតិ)៖ យោធាកាណាដាកំពុងរៀបចំដាក់ពង្រាយយន្តហោះដើម្បីជម្លៀសមនុស្សប្រហែល ៦០០ នាក់នៅតំបន់ដាច់ស្រយាលដែលរងការគំរាមកំហែងពីភ្លើងឆេះព្រៃ។រដ្ឋមន្ត្រីក្រសួងឆ្លើយតបបន្ទាន់ និងការស្តារសហគមន៍កាណាដា លោកស្រី Eleanor Olszewski បានប្រកាសនៅថ្ងៃទី១៧ ខែកក្កដា អំពីការសម្រេចចិត្តជម្លៀសប្រជាជននៅក្នុងតំបន់ Fort Hope ភាគខាងត្បូងនៃរដ្ឋ Ontario។តំបន់ដែលមានប្រជាជនរស់នៅតិចតួចនេះ ដែលមានផ្លូវចូលផ្លូវថ្នល់តិចតួច និងការពឹងផ្អែកយ៉ាងខ្លាំងលើការដឹកជញ្ជូនតាមផ្លូវអាកាស ក៏ជាកន្លែងដែលភ្លើងឆេះព្រៃដ៏ខ្លាំងក្លាបំផុតមួយចំនួនកំពុងកើតឡើងផងដែរ។ នេះបើយោងតាម Reuters។ អាជ្ញាធរកាណាដាពីមុនបានជម្លៀសមនុស្សរាប់ពាន់នាក់ចេញពីតំបន់ដែលរងផលប៉ះពាល់ទៅកាន់ទីក្រុងនានានៅភាគខាងត្បូងនៃរដ្ឋ Ontario ។ភ្លើងឆេះព្រៃទ្រង់ទ្រាយធំកើតឡើងជារៀងរាល់ឆ្នាំនៅក្នុងប្រទេសកាណាដា ដែលជាប្រទេសមួយក្នុងចំណោមប្រទេសដែលមានតំបន់ព្រៃឈើច្រើនជាងគេបំផុតនៅលើពិភពលោក។ អ្នកជំនាញអាកាសធាតុជឿថា សីតុណ្ហភាពកើនឡើងកំពុងធ្វើឱ្យឈើស្ងួត ដែលបង្កើនហានិភ័យនៃភ្លើងឆេះព្រៃ។ក្រសួងថាមពល និងធនធានធម្មជាតិរបស់ប្រទេសកាណាដា បានរាយការណ៍ពីភ្លើងឆេះព្រៃថ្មីចំនួន 69 ករណី នៅថ្ងៃទី 18 ខែកក្កដា ដែលធ្វើឱ្យចំនួនសរុបកើនឡើងដល់ 955 ករណី។ ផ្ទៃដីសរុបដែលត្រូវបានដុតបំផ្លាញរហូតមកដល់ពេលនេះ គឺប្រហែល 28,500 គីឡូម៉ែត្រការ៉េ ដែលទាបជាងមធ្យមភាគប្រាំឆ្នាំយ៉ាងខ្លាំង។ទោះជាយ៉ាងណាក៏ដោយ ខ្យល់បានបក់ផ្សែងឆ្លងកាត់ព្រំដែនចូលទៅក្នុងទឹកដីសហរដ្ឋអាមេរិក ដែលជំរុញឱ្យមានការព្រមានអំពីសុខភាព និងគុណភាពខ្យល់នៅក្នុងតំបន់ជាច្រើន។ ប្រធានាធិបតី ដូណាល់ ត្រាំ បានអះអាងថា ភ្លើងឆេះព្រៃនៅប្រទេសកាណាដាបានធ្វើឱ្យសហរដ្ឋអាមេរិកខាតបង់រាប់ពាន់លានដុល្លារ និងគំរាមកំហែងបង្កើនពន្ធលើប្រទេសជិតខាង។បន្ទាប់ពីការអត្ថាធិប្បាយរបស់លោក Trump រដ្ឋមន្ត្រី Olszewski បាននិយាយថា ប្រទេសកាណាដាបានវិនិយោគជិត ៨,៦ ពាន់លានដុល្លារក្នុងការអភិរក្សព្រៃឈើ និងការបង្ការភ្លើងឆេះព្រៃចាប់តាំងពីឆ្នាំ ២០២០ ខណៈដែលប្រទេសនេះកំពុងប្រឈមមុខនឹងអាកាសធាតុស្ងួត និងក្តៅជាងមុន។ នាយករដ្ឋមន្ត្រីកាណាដា លោក Mark Carney កាលពីថ្ងៃទី១៦ ខែកក្កដា បានឆ្លើយតបដោយប្រយោលចំពោះការរិះគន់ចំពោះការឆ្លើយតបរបស់ប្រទេសលោកចំពោះគ្រោះមហន្តរាយធម្មជាតិ ហើយក៏បានលើកឡើងពីជំហររបស់សហរដ្ឋអាមេរិកលើគោលនយោបាយអាកាសធាតុ ដោយកត់សម្គាល់ថាខ្លួន «បន្តរក្សាវិធីសាស្ត្រផលិតដែលផ្ទុយនឹងគោលដៅថាមពលស្អាត» និងកំពុងបង្រួមតួនាទីរបស់ខ្លួននៅលើឆាកអន្តរជាតិ។ 

(ភ្នំពេញ)៖ កម្ពុជាមានឱកាសការងារប្រមាណជាង ៩ម៉ឺនកន្លែងនៅតាមរាជធានី-ខេត្តទូទាំងប្រទេសកំពុងរង់ចាំបងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ។ នេះបើតាមការផ្សព្វផ្សាយរបស់ក្រសួងការងារ និងបណ្ដុះបណ្ដាលវិជ្ជាជីវៈ ក្នុងពេលថ្មីៗនេះ។ តាមរយៈការផ្សព្វផ្សាយក្រសួងការងារបានឱ្យដឹងថា គិតត្រឹមថ្ងៃទី១៧ ខែកក្កដា ឆ្នាំ២០២៦ មានឱកាសការងារចំនួន ៩២,៨២៣ កន្លែងនៅតាមណ្ដារាជធានី-ខេត្តនៅទូទាំងប្រទេស កំពុងរង់ចាំបងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ។ ឱកាសការងារទាំងនោះ ស្ថិតនៅក្នុងវិស័យសំខាន់ៗ ដូចជា៖ វិស័យកសិកម្ម ឧស្សាហកម្ម និងវិស័យសេវាកម្ម។ ដើម្បីទទួលបានឱកាសការងារទាំងនោះ បងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ អាចស្វែងរកលេខទំនាក់ទំនង ឈ្មោះរោងចក្រ និងវិស័យដែលខ្លួនពេញចិត្តបានតាមរយៈខិត្តប័ណ្ណការងាររបស់ក្រសួងដែលបានផ្សព្វផ្សាយយ៉ាងលម្អិត។ ជាមួយគ្នានេះ ក្រៅពីទំនាក់ទំនងផ្ទាល់ជាមួយក្រុមហ៊ុន រោងចក្រ សហគ្រាស អ្នកស្វែងរកការងារទាំងអស់ ជាពិសេសបងប្អូនអតីតពលករ ក៏អាចទាក់ទងមកប្រព័ន្ធទំនាក់ទំនងបន្ទាន់ ១២៩៧ ដើម្បីឱ្យក្រសួងការងារជួយសម្របសម្រួលស្វែងរកការងារជូនផងដែរ។ នេះបើតាមក្រសួងការងារដដែល៕

(បាត់ដំបង)៖ ក្នុងស្មារតីយកចិត្តទុកដាក់ខ្ពស់ចំពោះជីវភាពរស់នៅរបស់ប្រជាពលរដ្ឋ ក៏ដូចជាសេដ្ឋកិច្ច-សង្គម ក្រសួងការងារនិងបណ្ដុះបណ្ដាលវិជ្ជាជីវៈ តាមរយៈវេទិកាការងារ សន្តិសុខសង្គម និងការបណ្តុះបណ្តាលវិជ្ជាជីវៈ បានបន្តនាំយកឱកាសការងារចំនួន ៤ ៧០០ កន្លែង អត្ថប្រយោជន៍ ប.ស.ស. និងកម្មវិធី TVET ផ្សព្វផ្សាយជូនប្រជាពលរដ្ឋដល់មូលដ្ឋានជាង ៤០០នាក់ ជាពិសេសសម្រាប់អតីតពលករពីប្រទេសថៃ និងយុវជនរកការងារធ្វើ នៅបរិវេណសាលាស្រុកឯកភ្នំ ខេត្តបាត់ដំបង នាព្រឹកថ្ងៃទី១៨ ខែកក្កដា ឆ្នាំ២០២៦ នេះ។ថ្លែងក្នុងវេទិកាក្រោមប្រធានបទ «ខ្មែរជួយរកការងារ និងផ្ដល់ការងារឱ្យខ្មែរ» ឯកឧត្តម សាន គីមហុង អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្រ្តីក្រសួងការងារនិងបណ្ដុះបណ្ដាលវិជ្ជាជីវៈ មានប្រសាសន៍ថា ឱកាសការងារទាំងជាង ៤ពាន់កន្លែងនេះ គឺស្ថិតក្នុងចំណោមឱកាសការងារជាង ៩២ ០០០កន្លែងនៅទូទាំងប្រទេស ដែលក្រសួងការងារបានប្រមូលពីសហគ្រាស ក្រុមហ៊ុន និងរោងចក្រ​ ហើយនាំយកមកផ្សព្វផ្សាយដល់មូលដ្ឋានសម្រាប់បងប្អូនអាចចុះឈ្មោះ សម្ភាស និងទទួលបានការងារភ្លាមៗ។ រាជរដ្ឋាភិបាល ក្រសួងការងារ និងអាជ្ញាធរគ្រប់ជាន់ថ្នាក់ពិតជាសប្បាយរីករាយនៅពេលបងប្អូនមានការងារធ្វើ ដែលជួយសម្រាលបន្ទុកគ្រួសារ និងលើកកម្ពស់សេដ្ឋកិច្ច-សង្គមផងដែរ។ឯកឧត្តមបានគូសបញ្ជាក់ថា ការងារគ្រប់ប្រភេទសុទ្ធតែមានតម្លៃដូចគ្នាៗ ហើយការងារក្នុងស្រុកនៅតាមសហគ្រាស ក្រុមហ៊ុននិងរោងចក្រ​ គឺពិតជាមានសារៈសំខាន់ខ្លាំងណាស់សម្រាប់ជួយកសាងសេដ្ឋកិច្ចជាតិដោយផ្ទាល់ និងផ្តល់សុភមង្គលក្នុងគ្រួសារ។ ក្រៅពីប្រាក់ឈ្នួល និងអត្ថប្រយោជន៍ផ្សេងៗជាច្រើន បងប្អូនក៏ទទួលបានអត្ថប្រយោជន៍ពីបេឡាជាតិសន្តិសុខសង្គម (ប.ស.ស.)ផងដែរ ដូចជា៖ ផ្នែកហានិភ័យការងារ ផ្នែកថែទាំសុខភាព និងផ្នែកសោធន ដូចមន្រ្តីរាជការដែរ ចាប់ពីអាយុ ៦០ឆ្នាំឡើង។ ផ្ទុយទៅវិញ ការងារចំណាកស្រុកនៅប្រទេសថៃ គឺប្រឈមនឹងហានិភ័យសុវត្ថិភាព ការកេងប្រវ័ញ្ចកម្លាំងពលកម្ម ខ្វះការគាំពារសុខភាព អំពើហិង្សា ការរើសអើង និងមិនអាចរស់នៅជួបជុំក្រុមគ្រួសារ។ក្នុងករណីដែលចង់ទៅធ្វើការនៅក្រៅប្រទេស ឯកឧត្តមបានលើកទឹកចិត្តឱ្យអតីតពលករចុះឈ្មោះទៅធ្វើការនៅប្រទេសផ្សេងៗ ដែលផ្តល់ប្រាក់ខែ និងមានសុវត្ថិភាពខ្ពស់ជាងប្រទេសថៃ។ ទន្ទឹមនឹងនេះ បងប្អូនដែលមានជំនាញស្រាប់ផ្នែកសំណង់ ប៉ុន្តែមិនទាន់មានវិញ្ញាបនបត្របញ្ជាក់ ក្រសួងក៏បានដាក់ឱ្យអនុវត្តការធ្វើតេស្តទទួលស្គាល់ជំនាញពីមុន ដើម្បីឱ្យបងប្អូនទទួលបានវិញ្ញាបនបត្របញ្ជាក់ជំនាញជាផ្លូវការផងដែរ។ លើសពីនេះ ទាំងអតីតពលករ និងយុវជនក៏អាចចុះឈ្មោះចូលរៀនដោយឥតគិតថ្លៃនូវវគ្គបណ្ដុះបណ្ដាលជំនាញបច្ចេកទេស តាមរយៈកម្មវិធី TVET ១,៥លានជាមួយនឹងជម្រើសពេលសិក្សាជាច្រើន ដូចជា៖ ផ្នែកសំណង់ ជួសជុលគ្រឿងម៉ាស៊ីន គ្រឿងអគ្គិសនី ម៉ាស៊ីនត្រជាក់ ដុតនំ ឆុងកាហ្វេ និងផ្នែកសាឡនជាដើម។ ក្រោយបញ្ចប់ការសិក្សា បងប្អូនអាចយកជំនាញទាំងនេះបង្កើតមុខរបរដោយខ្លួនឯងបានថែមទៀតផងដែរ។ ទន្ទឹមនេះ ឯកឧត្តមក៏បានលើកទឹកចិត្តឱ្យបងប្អូនជួយបន្តផ្សព្វផ្សាយពីឱកាសការងារ អត្ថប្រយោជន៍ ប.ស.ស. និងកម្មវិធី TVET ជូនដល់សមាជិកគ្រួសារ សាច់ញាតិ និងមិត្តភក្តិបន្តទៀត ជាពិសេសតាមរយៈបណ្តាញសង្គម ហើយបើចង់សាកសួរព័ត៌មានបន្ថែម សូមទាក់ទងទូរស័ព្ទលេខ Hotline ១២៩៧ សម្រាប់ព័ត៌មានពីឱកាសការងារ ឬរៀនជំនាញវិជ្ជាជីវៈ និងលេខ ១២៨៦ សម្រាប់ផ្នែក ប.ស.ស.។សូមបញ្ជាក់ថា វេទិកាការងារនេះ មានការចូលរួមដោយផ្ទាល់ពីសហគ្រាស ក្រុមហ៊ុននិងរោងចក្រ​ ដូចជា រោងចក្រ វេនធូរ៉ា លេឌើវែរ, រោងចក្រ សាន ហ្វេង (ខេមបូឌា) ខមភេនី, ក្រុមហ៊ុន ថាកូ អាហ្រ្គី, វិទ្យាស្ថានបណ្តុះបណ្តាលកាត់ដេរកម្ពុជា(CGTI) ព្រមទាំងក្រុមហ៊ុនជ្រើសរើសកម្លាំងពលកម្មទៅបម្រើការងារនៅក្រៅប្រទេស រួមមាន ក្រុមហ៊ុន មង្គល អេចអ និង អ៊ែកស៊ល អេស៊ា យូមេន រីសសស៍ ដែលបានផ្តល់ព័ត៌មាន សេវាផ្គូផ្គងការងារ និងការប្រឹក្សាយោបល់ដោយផ្ទាល់ ដើម្បីបំពេញតម្រូវទីផ្សារការងារនាពេលពេលបច្ចុប្បន្ន៕

(កំពត)៖ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានអញ្ជើញជាអធិបតីដ៏ខ្ពង់ខ្ពស់ក្នុងពិធីប្រគល់សញ្ញាបត្រជូនសិស្ស-និស្សិតជ័យលាភីវិទ្យាស្ថានពហុបច្ចេកទេសភូមិភាគតេជោសែនកំពត ចំនួន ៥១៤អង្គ/នាក់ (ស្រី ៣០០នាក់) ក្នុងចំណោមសិស្ស-និស្សិតដែលបានបញ្ចប់ការសិក្សាដោយជោគជ័យសរុប ២ ២០៨នាក់ នៅព្រឹកថ្ងៃទី១៨ ខែកក្កដា ឆ្នាំ២០២៦ ដែលក្នុងនោះរួមមានសញ្ញាបត្របច្ចេកទេសនិងវិជ្ជាជីវៈកម្រិត ១, ២, ៣, សញ្ញាបត្រជាន់ខ្ពស់បច្ចេកទេស និងបរិញ្ញាបត្របច្ចេកទេស។ថ្លែងក្នុងពិធីដែលមានអ្នកចូលរួមជាង ១ ៨០០នាក់ ឯកឧត្តមរដ្ឋមន្ត្រី ហេង សួរ បានអបអរសាទរចំពោះសិស្ស-និស្សិតដែលទទួលជ័យលាភី ដែលជោគជ័យនេះកើតចេញពីការសម្រេចចិត្តដ៏ត្រឹមត្រូវក្នុងការចាប់យកការអប់រំបណ្តុះបណ្តាលបច្ចេកទេសនិងវិជ្ជាជីវៈ (ធីវេត “TVET”) ធ្វើជា ស្ពានចម្លង សម្រាប់កសាងអនាគតដ៏ត្រឹមត្រូវ។ ឯកឧត្តមបានលើកយកប្រសាសន៍សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីមកបញ្ជាក់ថា TVET មិនមែនជាការសិក្សាកម្រិតទី២ ឬមានតម្លៃទាបជាងការអប់រំទូទៅនោះទេ។ ជំនាញ TVET មានគុណតម្លៃស្មើនឹងជំនាញផ្សេងៗ និងឆ្លើយតបតម្រូវការទីផ្សារការងារព្រមទាំងជួយកសាងអនាគតរបស់បុគ្គល គ្រួសារ និងសង្គមជាតិ។ ឯកឧត្តមមានប្រសាសន៍ថា ការចាប់យកការសិក្សាជំនាញ TVET ជាការវិនិយោគលើមូលធនមនុស្សដ៏មានតម្លៃ និងជាកម្លាំងស្នូលសម្រាប់ការអភិវឌ្ឍសេដ្ឋកិច្ចជាតិ។ ជាក់ស្តែង សិស្ស-និស្សិតដែលបញ្ចប់ការសិក្សាពីវិទ្យាស្ថានមានអត្រាទទួលបានការងារធ្វើប្រមាណ ៩០% ដែលបង្ហាញពីគុណភាពនៃការបណ្តុះបណ្តាល និងការឆ្លើយតបនឹងតម្រូវការទីផ្សារការងារ។ ឯកឧត្តមរដ្ឋមន្រ្តីបានជំរុញឱ្យសិស្ស-និស្សិតបន្តរៀនសូត្រពេញមួយជីវិត ជាពិសេសពង្រឹងជំនាញទន់ បង្កើនជំនាញនិងផ្លាស់ប្តូរជំនាញ ព្រមទាំងប្រើប្រាស់បច្ចេកវិទ្យាទំនើប និងបញ្ញាសិប្បនិម្មិត ដើម្បីបង្កើនសមត្ថភាពប្រកួតប្រជែង និងឱកាសរីកចម្រើនក្នុងអាជីពការងារ។ ទន្ទឹមនេះ ឯកឧត្តមក៏បានលើកទឹកចិត្តឱ្យអាណាព្យាបាលបន្តគាំទ្រកូនចៅឱ្យជ្រើសរើសការសិក្សាជំនាញ TVET សម្រាប់កសាងអនាគត និងលើកកម្ពស់ជីវភាពគ្រួសារ។ឯកឧត្តមរដ្ឋមន្ត្រីបានណែនាំដល់ថ្នាក់ដឹកនាំវិទ្យាស្ថាន និងលោកគ្រូ អ្នកគ្រូ បន្តពង្រឹងគុណភាពបណ្តុះបណ្តាល ពង្រីកកិច្ចសហប្រតិបត្តិការជាមួយវិស័យឯកជន និងធ្វើបច្ចុប្បន្នភាពកម្មវិធីសិក្សាឱ្យស្របតាមតម្រូវការទីផ្សារការងារ ដើម្បីសម្រេចគោលដៅ «ពលរដ្ឋម្នាក់មានជំនាញមួយយ៉ាងតិចប្រចាំជីវិត» និង «រៀនឱ្យចប់ ឱ្យចេះ ឱ្យមានការងារ» ខណៈខេត្តកំពតកំពុងមានសក្តានុពលទាក់ទាញការវិនិយោគ និងត្រូវការកម្លាំងពលកម្មជំនាញកាន់តែច្រើន។ជាមួយគ្នានេះ ឯកឧត្តមបានថ្លែងអំណរគុណចំពោះរដ្ឋបាលខេត្តកំពត អាជ្ញាធរមូលដ្ឋាន និងដៃគូពាក់ព័ន្ធ ដែលបានសហការយ៉ាងជិតស្និទ្ធក្នុងការផ្សព្វផ្សាយ និងអនុវត្តកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកវិទ្យាដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥លាននាក់ ព្រមទាំងការតភ្ជាប់អ្នកសិក្សាទៅកាន់ឱកាសការងារជាក់ស្តែង ស្របតាមទិសដៅអភិវឌ្ឍធនធានមនុស្សរបស់រាជរដ្ឋាភិបាល។ ទន្ទឹមនេះ ឯកឧត្តម ហេង សួរ បានអំពាវនាវឱ្យគ្រប់ភាគីពាក់ព័ន្ធបន្តពង្រឹងកិច្ចសហការ លើកកម្ពស់ការយល់ដឹងអំពីសារៈសំខាន់នៃ TVET និងជំរុញការអនុវត្តកម្មវិធី TVET ១,៥លានឱ្យកាន់តែទូលំទូលាយ និងប្រសិទ្ធភាព ដើម្បីកសាងមូលធនមនុស្សប្រកបដោយគុណភាព គាំទ្រការវិនិយោគ និងការអភិវឌ្ឍសេដ្ឋកិច្ច-សង្គមកម្ពុជា។ក្នុងឱកាសនេះដែរ ឯកឧត្តម តាក ហាប់ ប្រធានក្រុមប្រឹក្សាខេត្តកំពត បានផ្ដាំផ្ញើដល់សិស្ស-និស្សិតជ័យលាភីទាំងអស់ ឱ្យយកចំណេះដឹង ជំនាញ និងសញ្ញាបត្រដែលទទួលបាន ទៅប្រើប្រាស់ឱ្យមានប្រសិទ្ធភាពក្នុងការប្រកបការងារ ដោយបំពេញតួនាទី និងភារកិច្ចប្រកបដោយការទទួលខុសត្រូវខ្ពស់ ព្រមទាំងបន្តអភិវឌ្ឍសមត្ថភាពរបស់ខ្លួន ដើម្បីរួមចំណែកអភិវឌ្ឍខ្លួនឯង គ្រួសារ អង្គភាព និងសង្គមជាតិ។លោក ជ្រុន គឹមឡេង នាយកវិទ្យាស្ថានពហុបច្ចេកទេសភូមិភាគតេជោសែនកំពតបានបង្ហាញពីរបាយការណ៍វឌ្ឍនភាពនៃវិទ្យាស្ថាន ដែលកំពុងដើរតួនាទីយ៉ាងសំខាន់ក្នុងការសម្របសម្រួល គ្រប់គ្រង និងផ្តល់សេវា TVET ទៅតាមតម្រូវការទីផ្សារការងារ។ វិទ្យាស្ថានបានប្តេជ្ញាខិតខំបង្កើនការចុះឈ្មោះចូលរៀនរបស់សិស្សនិស្សិតឱ្យបានគ្រប់កម្រិតសិក្សា ពង្រឹងគុណភាព និងប្រសិទ្ធភាព នៃការបណ្តុះបណ្តាលឱ្យស្របនឹងតម្រូវការទីផ្សារការងារ និងការរីកចម្រើននៃបច្ចេកវិទ្យា៕

(ភ្នំពេញ)៖ ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីជូនដំណឹង អំពាវនាវដល់បងប្អូនអតីតពលករខ្មែរដែលបានវិលត្រឡប់ពីក្រៅប្រទេស ឱ្យមកចុះឈ្មោះចូលរៀនកម្មវិធីបណ្តុះបណ្តាលជំនាញវិជ្ជាជីវៈ និងសហគ្រិនភាពដោយឥតគិតថ្លៃ ព្រមទាំងទទួលបានសេវាផ្គូផ្គងការងារ ដើម្បីបង្កើនឱកាសការងារ និងការប្រកបអាជីវកម្មនៅក្នុងប្រទេស។តាមសេចក្តីជូនដំណឹង ក្រសួងការងារ និងបណ្តុះបណ្តាលវិជ្ជាជីវៈ សហការជាមួយមជ្ឈមណ្ឌលពលករទេសន្តរប្រវេសន៍មាតុភូមិនិវត្តន៍កម្ពុជា (HRCC) រៀបចំកម្មវិធីបណ្តុះបណ្តាលជំនាញវិជ្ជាជីវៈ និងសហគ្រិនភាព ព្រមទាំងសេវាផ្គូផ្គងការងារដោយឥតគិតថ្លៃ សម្រាប់អតីតពលករខ្មែរ ដើម្បីជួយឱ្យពួកគេអភិវឌ្ឍជំនាញបន្ថែម ប្រើប្រាស់បទពិសោធន៍ការងារដែលទទួលបានពីក្រៅប្រទេសឱ្យស្របតាមតម្រូវការទីផ្សារការងារក្នុងស្រុក និងអាចចាប់ផ្តើមអាជីវកម្មផ្ទាល់ខ្លួនប្រកបដោយជោគជ័យ។ក្រសួងបានអំពាវនាវដល់អតីតពលករខ្មែរដែលបានវិលត្រឡប់ពីក្រៅប្រទេស ឱ្យមកចុះឈ្មោះចូលរៀនដោយឥតគិតថ្លៃ នៅមជ្ឈមណ្ឌលពលករទេសន្តរប្រវេសន៍មាតុភូមិនិវត្តន៍កម្ពុជា (HRCC) ដែលមានទីតាំងនៅក្រសួងការងារ និងបណ្តុះបណ្តាលវិជ្ជាជីវៈ ឬទំនាក់ទំនងតាមរយៈលេខទូរសព្ទ ឬតាមរយៈទូរសព្ទលេខ +៨៥៥ ១២ ៦៤៦ ៥០០/+៨៥៥ ១០ ៦៤៦ ៥០០ នៅរៀងរាល់ម៉ោងធ្វើការ។ ដោយឡែក សម្រាប់អតីតពលករខ្មែរដែលមានបំណងស្វែងរកការងារធ្វើ ក្រសួងបានណែនាំឱ្យទាក់ទងទៅទីភ្នាក់ងារជាតិមុខរបរ និងការងារ (NEA) តាមរយៈប្រព័ន្ធ Hotline លេខ ១២៩៧ ដើម្បីទទួលបានព័ត៌មានអំពីឱកាសការងារ និងសេវាផ្គូផ្គងការងារដោយឥតគិតថ្លៃ។បើតាមក្រសួងការងារ និងបណ្តុះបណ្តាលវិជ្ជាជីវៈ កម្មវិធីនេះមានគោលបំណងគាំទ្រដល់អតីតពលករខ្មែរឱ្យអាចបន្តអភិវឌ្ឍសមត្ថភាព បង្កើនឱកាសទទួលបានការងារសមរម្យ និងលើកកម្ពស់ជីវភាពរស់នៅតាមរយៈការងារ ឬការបង្កើតមុខរបរដោយខ្លួនឯង៕

(ភ្នំពេញ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញជាអធិបតីក្នុងព្រឹត្តិការណ៍ «ពិព័រណ៍ពាណិជ្ជកម្មអាហារកម្ពុជា ឆ្នាំ២០២៦» (Cambodia Food Expo 2026) ក្រោមយុទ្ធនាការ «អាហារខ្មែរត្រូវតែខ្លាំង» ក្រោមការដឹកនាំរបស់ឯកឧត្តមបណ្ឌិត អោម សេងបូរ៉ា ប្រធានក្រុមប្រឹក្សាភិបាល នៃវិទ្យាស្ថានស៊ីអ៊ីអូ ដែលព្រឹត្តិការណ៍នេះរៀបចំឡើងក្នុងគោលបំណងលើកកម្ពស់កិត្យានុភាពម្ហូបអាហារខ្មែរ ពង្រឹងគុណភាព និងស្តង់ដារផលិតផល ព្រមទាំងលើកស្ទួយសមត្ថភាព និងភាពប្រកួតប្រជែងរបស់សហគ្រិនខ្មែរនៅលើទីផ្សារជាតិ និងអន្តរជាតិ។ព្រឹត្តិការណ៍នេះជាវេទិកាដ៏មានសារៈសំខាន់សម្រាប់ការតាំងបង្ហាញផលិតផលម្ហូបអាហារ ភេសជ្ជៈ កសិផលកែច្នៃ និងស្នាដៃច្នៃប្រឌិតរបស់សហគ្រិនខ្មែរ ព្រមទាំងផ្តល់ឱកាសដល់អ្នកផលិត អ្នកផ្គត់ផ្គង់ អ្នកវិនិយោគ និងដៃគូអាជីវកម្ម អាចជួបពិភាក្សា ផ្លាស់ប្តូរបទពិសោធន៍ និងបង្កើតបណ្តាញកិច្ចសហប្រតិបត្តិការថ្មីៗ។ពិព័រណ៍នេះក៏ចូលរួមចំណែកយ៉ាងសំខាន់ក្នុងការផ្សព្វផ្សាយកេរដំណែលម្ហូបអាហារខ្មែរ និងជំរុញទេសចរណ៍ម្ហូបអាហារ ដោយភ្ជាប់រសជាតិខ្មែរជាមួយវប្បធម៌ ប្រពៃណី អត្តសញ្ញាណមូលដ្ឋាន និងគោលដៅទេសចរណ៍នានានៅទូទាំងប្រទេស។សូមគោរពអញ្ជើញបងប្អូនជនរួមជាតិ ភ្ញៀវទេសចរជាតិ និងអន្តរជាតិ ចូលរួមទស្សនា គាំទ្រផលិតផលខ្មែរ និងរួមគ្នាលើកស្ទួយកិត្តិយសជាតិ ក្រោមស្មារតី៖ «រួបរួមគ្នាដើម្បីភាពរឹងមាំ និងភាពជោគជ័យនៃសេដ្ឋកិច្ចជាតិយើង! អាហារខ្មែរត្រូវតែខ្លាំង!»។សូមជម្រាបជូនថា ព្រឹត្តិការណ៍នេះប្រព្រឹត្តទៅចាប់ពីថ្ងៃទី១៧ ដល់ថ្ងៃទី១៩ ខែកក្កដា ឆ្នាំ២០២៦ នៅមជ្ឈមណ្ឌលពិព័រណ៍ និងសន្និបាតកោះពេជ្រ រាជធានីភ្នំពេញ។រាជធានីភ្នំពេញ ថ្ងៃទី១៨ ខែកក្កដា ឆ្នាំ២០២៦

(ភ្នំពេញ)៖ រួបរួមជាកម្លាំងមួយដ៏រឹងមាំ ជាខែលការពារជាតិ ផ្ដល់នូវការគាំទ្រទាំងកម្លាំងកាយ ចិត្ត និងសម្ភារៈ តាមលទ្ធភាពដែលយើងអាចធ្វើទៅបាន ជូនទៅដល់កងកម្លាំងប្រដាប់អាវុធ វីរកងកម្លាំងប្រដាប់អាវុធរបស់យើង ទាំងកងយោធពលខេមរភូមិន្ទ ទាំងនគរបាល និងទាំងកងរាជអាវុធហត្ថ។ ដែលស្មារតីរបស់យើង គឺពិតជាផ្ដល់នូវភាពកក់ក្ដៅ ភាពជឿជាក់ និងភាពអង់អាចក្លាហានជូនទៅដល់ពួកគាត់។ក្រៅពីនេះទៀតសោត សំឡេងរួមរបស់យើងទាំងអស់គ្នា ក៏ជាការផ្ដល់កម្លាំងចិត្ត និងការគាំទ្រទៅដល់សម្ដេចមហាបវរធិបតី ដែលដឹកនាំការងារទាំងអស់ក្នុងការដោះស្រាយបញ្ហា។ ហើយសំឡេងរួមរបស់ប្រជាជាតិខ្មែរទាំងមូល ក៏ជាការបង្ហាញទៅលើឆាកអន្តរជាតិថា កម្ពុជាមិនទន់ជ្រាយនោះឡើយ។ គឺពេលណាដែលយើងជួបប្រទះនឹងហានិភ័យ យើងអាចរួបរួមគ្នាជាកម្លាំងដ៏ខ្លាំងក្លា ដែលមិនអាចបំបែកបំបាក់បាន និងមិនអាចផុយស្រួយបាន ចំពោះរាល់ហានិភ័យទាំងឡាយណា ដែលអាចកើតឡើងមកលើប្រជាជាតិរបស់យើងនោះទេ។ឯកឧត្តម ហ៊ុន ម៉ានី ថ្លែងក្នុងពិធីបិទការប្រកួតកីឡាបាល់ទាត់ពានរង្វាន់ SOCCER LEAGUE លើកទី៩ ឆ្នាំ២០២៦ នៅកីឡាដ្ឋានពហុកីឡាដ្ឋានជាតិអូឡាំពិក។

(ភ្នំពេញ)៖ នារសៀល ថ្ងៃទី១៨ ខែកក្កដា ឆ្នាំ២០២៦ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានអញ្ជើញជាគណៈអធិបតីក្នុង កម្មវិធីបិទការប្រកួតកីឡាបាល់ទាត់ពានរង្វាន់ SOCCER LEAGUE លើកទី៩ ឆ្នាំ២០២៦ នៅកីឡាដ្ឋានពហុកីឡាដ្ឋានជាតិអូឡាំពិក។ កម្មវិធីនេះមានការអញ្ជើញចូលរួមពីសំណាក់ ឯកឧត្តមអភិសន្តិបណ្ឌិត ស សុខា អនុប្រធាន ស.ស.យ.ក. ឯកឧត្តម លោកជំទាវ លោក លោកស្រី តំណាងក្រសួង-ស្ថាប័ន ក្រុមហ៊ុនឯកជន ភ្ញៀវកិត្តិយស រួមទាំងសមាជិក សមាជិកា ស.ស.យ.ក. អាជ្ញាកណ្តាល កីឡាករ កីឡាការិនី សិល្បៈករ សិល្បៈការិនី យ៉ាងច្រើនកុះករ។ជាកិច្ចចាប់ផ្ដើម ឯកឧត្តមអភិសន្ដិបណ្ឌិត ស សុខា អនុប្រធានសហភាពសហព័ន្ធយុវជនកម្ពុជា ទទួលបន្ទុករៀបចំការប្រកួតកីឡាបាល់ទាត់ពានរង្វាន់ SOCCER LEAGUE លើកទី៩ ឆ្នាំ២០២៦ បានឡើងធ្វើការរបាយការណ៍សង្ខេបស្ដីពីការប្រកួតពានរង្វាន់ SOCCER LEAGUE លើកទី៩ ឆ្នាំ២០២៦ ដោយទទួលបានការដាក់ពាក្យចូលរួមប្រកួត មានចំនួន ៦៤ក្រុម ដែលក្នុងនោះមានក្រុមបាល់ទាំត់បុរសចំនួន ៥៦ក្រុម និងក្រុមបាត់ទាត់នារីចំនួន ៨ក្រុម។ ឯកឧត្តមបានបញ្ជាក់ផងដែរថា ក្នុងរយៈពេលជាងមួយខែកន្លងមក ក្រុមកីឡាករនីមួយៗបានបង្ហាញពីការអភិវឌ្ឍសមត្ថភាពកាន់តែប្រសើរឡើងគួរឱ្យកត់សម្គាល់ ព្រមទាំងបានគោរពតាមគោលការណ៍ បទបញ្ជា និងលក្ខន្តិកៈនៃការប្រកួត ព្រមទាំងមានការយោគយល់ និងអធ្យាស្រ័យគ្នា ប្រកបដោយការទទួលខុសត្រូវខ្ពស់។ជាកិច្ចបន្ទាប់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានសម្តែងនូវសេចក្តីសោមនស្សរីករាយ នឹងកោតសរសើរចំពោះគណៈកម្មការរៀបចំការប្រកួត បាល់ទាត់ពានរង្វាន់ SOCCER LEAGUE លើកទី៩ ឆ្នាំ២០២៦នេះ អាចបញ្ជាប់ទៅដោយរលូន និងមានភាពជោគជ័យខ្ពស់បាន គឺកើតចេញពីបទពិសោធ កិច្ចខិតខំប្រឹងប្រែង និងស្មារតីទទួលខុសត្រូវខ្ពស់។ ឯកឧត្តមបានរំលេចផងដែរថា ការរៀបចំការប្រកួតពានរង្វាន់ SOCCER LEAGUE ក្រោមប្រធានបទ «សាមគ្គីភាព ជាតិរឹងមាំ» មិនមែនត្រឹមតែជាព្រឹត្តិការណ៍កីឡាប៉ុណ្ណោះទេ ប៉ុន្តែជាវេទិកាដ៏សំខាន់មួយ ដែលបង្កើតឱ្យមានការជួបជុំ និងការប្រាស្រ័យទាក់ទងគ្នារវាងយុវជន ព្រមទាំងរួមចំណែកពង្រឹងស្មារតីរួបរួមជាតិ និងប្រមូលផ្តុំយុវជនពីគ្រប់ទិសទី ដើម្បីកសាងកម្លាំងមហាសាមគ្គីខ្មែរដ៏រឹងមាំ ព្រោះថាមិត្តភាព សាមគ្គីភាព ការឯកភាព សុខដុមនីយ៍កម្ម ភាពរឹងមាំនៃសង្គមកម្ពុជារបស់យើង ត្រូវតែវិនិយោគ ហ៊ាន លះបង់ចូលរួមចំណែក ហើយកសាងបន្តិចម្ដងៗ ហើយជាប្រចាំ ដើម្បីធានាថាជាតិយើងមានភាពរឹងមាំក្នុងគ្រប់ការលៈទេសៈទាំងអស់។

(ខេត្តកំពង់ស្ពឺ)៖ នាព្រឹកថ្ងៃសៅរ៍ ទី១៨ ខែកក្កដា ឆ្នាំ២០២៦ នេះ គណបក្សប្រជាជនកម្ពុជាស្រុកសាមគ្គីមុនីជ័យ បានរៀបចំពិធីសម្ពោធដាក់ឱ្យប្រើប្រាស់ជាផ្លូវការនូវហេដ្ឋារចនាសម្ព័ន្ធ និងអគារទីស្នាក់ការគណបក្សថ្មីស្រឡាង ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ហ៊ុន ម៉ានី សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកំពង់ស្ពឺ។កម្មវិធីនេះមានការអញ្ជើញចូលរួមពីសំណាក់ ឯកឧត្តម លោកជំទាវ អនុប្រធានក្រុមការងារចុះមូលដ្ឋានខេត្ត ក្រុមការងារ និងគណៈកម្មាធិការគណបក្សគ្រប់ថ្នាក់ រួមទាំងគណៈកម្មាធិការបក្សស្រុក, គណៈកម្មាធិការបក្សឃុំទាំង១០, គណៈកម្មាធិការសាខាបក្សភូមិទាំង១៦០ និងក្រុមការងារសរុបប្រមាណ ៩១៤អង្គ/នាក់។ជាកិច្ចចាប់ផ្តើម លោក មួង ធី ប្រធានគណៈកម្មាធិការគណបក្សស្រុកសាមគ្គីមុនីជ័យ បានទទួលស្វាគមន៍យ៉ាងកក់ក្ដៅចំពោះវត្តមានរបស់ឯកឧត្តម ហ៊ុន ម៉ានី និងបានអានរបាយការណ៍ស្តីពីវឌ្ឍនភាពនៃការសាងសង់ សំណង់ដ៏ថ្មីស្រឡាង ដែលសមិទ្ធផលទីស្នាក់ការថ្មីនេះ នឹងរួមចំណែកសម្រួលដល់ការបំពេញការងាររបស់សមាជិក សមាជិកានៃគណបក្សប្រជាជនស្រុកសាមគ្គីមុន្នីជ័យ។ថ្លែងទៅកាន់អង្គពិធី ឯកឧត្តម ហ៊ុន ម៉ានី បានសម្តែងនូវការកោតសរសើរយ៉ាងជ្រាលជ្រៅ និងវាយតម្លៃខ្ពស់ចំពោះ ប្រធានគណៈកម្មាធិការគណបក្សស្រុកសាមគ្គីមុនីជ័យ ព្រមទាំងថ្នាក់ដឹកនាំក្រុមការងារ និងសប្បុរសជនទាំងអស់ ដែលបានលះបង់ពេលវេលា កម្លាំងកាយចិត្ត និងថវិកាផ្ទាល់ខ្លួន ក្នុងការជ្រោមជ្រែងកសាងហេដ្ឋារចនាសម្ព័ន្ធ និងអគារទីស្នាក់ការគណបក្សដ៏រឹងមាំ និងថ្មីស្រឡាងនេះឡើង ដើម្បីបម្រើឱ្យបុព្វហេតុគណបក្ស និងប្រជាពលរដ្ឋក្នុងមូលដ្ឋាន។

(ប៉េងកាំង)៖ នាឱកាសអមសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បំពេញទស្សនកិច្ចការងារនៅរដ្ឋធានីប៉េកាំង និងចូលរួមកម្មវិធី 2026 World AI Conference and High-Level Meeting on Global AI Governance ចាប់ពីថ្ងៃទី១៥-១៧ ខែកក្កដា ឆ្នាំ២០២៦ នៅទីក្រុងសៀងហៃ សាធារណរដ្ឋប្រជាមានិតចិន និងដោយទទួលបានការអនុញ្ញាតដ៏ខ្ពង់ខ្ពស់ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានឆ្លៀតឱកាសជួបពិភាក្សាការងារអាហារពេលល្ងាច (Working Dinner) ជាមួយលោកស្រី Xu Xiaoxia (លោកស្រី អារុណ) ប្រធានផ្នែកភាសាខ្មែរ នៃមជ្ឈមណ្ឌលអាស៊ី-អាហ្វ្រិកនៃអគ្គស្ថានីយវិទ្យុ និងទូរទស្សន៍មជ្ឈិមចិន (China Media Group - CMG) និងជានាយិកាវិទ្យុមិត្តភាពកម្ពុជា-ចិន និងសហការីជាន់ខ្ពស់លោកស្រី Kong Siqi អ្នកយកព័ត៌មានភាសាខ្មែរនៃមជ្ឈមណ្ឌលអាស៊ី-អាហ្វ្រិកនៃអគ្គស្ថានីយវិទ្យុនិងទូរទស្សន៍មជ្ឈិមចិន (CMG) នៅល្ងាចថ្ងៃទី១៦ ខែកក្កដា ឆ្នាំ២០២៦ នៅរដ្ឋធានីប៉េកាំង។ នាឱកាសជំនួបនេះ ឯកឧត្តមរដ្ឋមន្រ្តី បានកោតសរសើរ និងថ្លែងអំណរគុណយ៉ាងជ្រាលជ្រៅដល់អគ្គស្ថានីយវិទ្យុនិងទូរទស្សន៍មជ្ឈិមចិន (CMG) និងវិទ្យុមិត្តភាពកម្ពុជា-ចិន ក្រោមការដឹកនាំរបស់លោកស្រីប្រធានផ្ទាល់ ដែលតែងតែផ្តល់កិច្ចសហការដ៏ល្អ និងជិតស្និទ្ធជាមួយក្រសួងទេសចរណ៍ ក្នុងការផ្តល់ពត៌មាន និងផ្សព្វផ្សាយពីវិស័យទេសចរណ៍កម្ពុជាទៅកាន់ប្រជាជនចិន និងពិភពលោក។ជាការឆ្លើយតប លោកស្រីប្រធាន និងក្នុងនាមតំណាងថ្នាក់ដឹកនាំ CMG បានថ្លែងអំណរគុណជូនចំពោះ​ឯកឧត្តមរដ្ឋមន្រ្តី និងសំដែងការពេញចិត្តចំពោះកិច្ចសហការដ៏ជិតស្និទ្ធ និងប្រកបដោយផ្លែផ្កាជាមួយក្រសួងទេសចរណ៍ ព្រមទាំងបានបង្ហាញការប្តេជ្ញាចិត្តដ៏មុតមាំបន្តចូលរួមផ្សព្វផ្សាយពីសក្តានុពល និងតំបន់ទេសចរណ៍ទេសចរណ៍កម្ពុជា រួមជាមួយគោលនយោបាយនានារបស់រាជរដ្ឋាភិបាលកម្ពុជា ជាពិសេសគោលនយោបាយលើកលែងទិដ្ឋាការជូនប្រជាជនចិន ឱ្យកាន់តែទូលំទូលាយទៅដល់ប្រជាជនចិន៕រដ្ឋធានីប៉េកាំង សាធារណរដ្ឋប្រជាមានិតចិន ថ្ងៃទី១៦ ខែកក្កដា ឆ្នាំ២០២៦កម្មវិធីជំនួបទី៥ ក្នុងនាឱកាសអមសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បំពេញទស្សនកិច្ចការងារនៅសាធារណរដ្ឋប្រជាមានិតចិន។

(សុខភាព)៖ គ្រូពេទ្យឯកទេសបេះដូងព្រមានថា ទម្លាប់មើលទូរទស្សន៍ពេលកំពុងគេង អាចកាត់បន្ថយគុណភាពនៃការគេង ហើយនៅទីបំផុតថែមទាំងបង្កើនបន្ទុកលើប្រព័ន្ធសរសៃឈាមបេះដូងទៀតផង។ យោងតាមរបាយការណ៍មួយពី Parade អ្នកជំនាញខាងបេះដូងបានចង្អុលបង្ហាញថា ការគេងគឺជាពេលវេលាដ៏សំខាន់សម្រាប់រាងកាយក្នុងការជួសជុលប្រព័ន្ធ សរសៃឈាមបេះដូង រួមទាំងការបន្ថយ សម្ពាធឈាម ការកាត់បន្ថយអរម៉ូ ន ស្ត្រេស និងការជួសជុលសរសៃឈាម។ ប្រសិនបើការគេងមិនគ្រប់គ្រាន់ ឬគុណភាពនៃការគេងមិនល្អនៅតែបន្ត ហានិភ័យនៃជំងឺសរសៃឈាមបេះដូងដូចជា ជំងឺលើសឈាម ធាត់ និង ជំងឺទឹកនោមផ្អែម អាចកើនឡើង។គ្រូពេទ្យ​បាន​សង្កត់ធ្ងន់​ជាពិសេស​ថា «ការគេង​ដោយ​បើក​ទូរទស្សន៍» គឺជា​ទម្លាប់​អាក្រក់​ដែល​មនុស្ស​ជាច្រើន​តែងតែ​មើលរំលង។ ទោះបីជា​មនុស្ស​ជាច្រើន​ពឹងផ្អែក​លើ​សំឡេង​ពី​ទូរទស្សន៍​ដើម្បី​សម្រាក និង​ងងុយគេង​ក៏ដោយ តាមពិតទៅ វា​អាច​រារាំង​រាងកាយ​មិន​ឲ្យ​ចូល​ដល់​ដំណាក់កាល​គេង​លក់​ស្កប់ស្កល់ កាត់បន្ថយ​ប្រសិទ្ធភាព​ស្តារឡើងវិញ​នៃ​ការគេង ហើយ​ដូច្នេះ​បង្ក​ផលប៉ះពាល់​អវិជ្ជមាន​ដល់​សុខភាព​សរសៃឈាម​បេះដូង​ក្នុង​រយៈពេល​វែង។ មនុស្សជាច្រើនដឹងហើយថា ពន្លឺពណ៌ខៀវពីទូរស័ព្ទដៃ និងថេប្លេតប៉ះពាល់ដល់ការគេង ប៉ុន្តែអ្នកជំនាញនិយាយថា ទូរទស្សន៍ក៏បញ្ចេញពន្លឺពណ៌ខៀវ ស្រដៀងគ្នាដែរ ជាពិសេសទូរទស្សន៍ LCD និង LED។ ពន្លឺពណ៌ខៀវរំខានដល់ចង្វាក់ circadian របស់រាងកាយ រារាំងការបញ្ចេញមេឡាតូនីន (អរម៉ូនគេង) បញ្ឆោតខួរក្បាលឱ្យគិតថាវានៅតែជាពេលថ្ងៃ និងនាំឱ្យពិបាកដេកលក់។លើសពីនេះ ការមើលភាពយន្តភ័យរន្ធត់ កម្មវិធីរំភើប ឬព័ត៌មានគួរឱ្យចាប់អារម្មណ៍មុនពេលចូលគេងអាចបណ្តាល ឱ្យកម្រិតអាដ្រេណាលីនកើនឡើង បង្កើនអត្រាចង្វាក់បេះដូង និងសម្ពាធឈាម ធ្វើឱ្យវាពិបាកដេកលក់។ ទោះបីជាអ្នកងងុយគេងក៏ដោយ ការផ្លាស់ប្តូរឥតឈប់ឈរនៃសំឡេង និងរូបភាពពីទូរទស្សន៍អាចធ្វើឱ្យខួរក្បាល របស់អ្នកភ្ញាក់ដឹងខ្លួនមួយផ្នែក។ នេះរំខានដល់ការគេង បំបែកវា និងធ្វើឱ្យវាពិបាកក្នុងការចូលទៅក្នុងដំណេកជ្រៅ - ដំណាក់កាលដែលស្តាររាងកាយឡើងវិញយ៉ាងពិតប្រាកដ។ដើម្បីកែលម្អស្ថានភាពនេះ គ្រូពេទ្យផ្តល់ដំបូន្មានដើម្បីជួយអ្នកឱ្យទទួលបានចង្វាក់ នៃការគេងដែលមានសុខភាពល្អឡើងវិញ៖-បិទអេក្រង់ទាំងអស់មុនពេលចូលគេង ៖ វាជាការល្អបំផុតក្នុងការបិទទូរទស្សន៍ និងអេក្រង់អេឡិចត្រូនិចផ្សេងទៀតមួយម៉ោងមុនពេលចូលគេង ដើម្បីឱ្យរាងកាយរបស់អ្នកអាចផ្លាស់ប្តូរទៅជាស្ថានភាពសម្រាកដោយធម្មជាតិ។-ជំនួសវាដោយសកម្មភាពសម្រាកកាយ ៖ ជំនួសឱ្យការមើលទូរទស្សន៍ អ្នកអាចប្តូរទៅអានសៀវភៅ ដកដង្ហើមវែងៗ ឬធ្វើសមាធិ ដើម្បីសម្រាកចិត្តរបស់អ្នក។-រក្សាកាលវិភាគគេងឱ្យស៊ីសង្វាក់គ្នា៖ ការចូលគេង និងការភ្ញាក់ពីដំណេកនៅពេលវេលាកំណត់នឹងជួយធ្វើឱ្យចង្វាក់ circadian របស់អ្នកមានស្ថេរភាព និងការពារសុខភាពសរសៃឈាមបេះដូងរបស់អ្នក។ លើសពីនេះ គ្រូពេទ្យក៏បានចេញការព្រមានអំពីទម្លាប់របស់មនុស្សជាច្រើនដែលផឹកស្រាមុនពេលចូលគេង។ ទោះបីជាគ្រឿងស្រវឹងមានឥទ្ធិពលងងុយគេងរយៈពេលខ្លីដែលធ្វើឱ្យអ្នកមានអារម្មណ៍ងងុយគេងនៅពេលដំបូងក៏ដោយ តាមពិតវាបំផ្លាញគុណភាពនៃការគេង និងបង្កគ្រោះថ្នាក់ទាំងស្រុងដល់សុខភាពបេះដូង។

(អន្តរជាតិ)៖ សហរដ្ឋអាមេរិកបន្តការវាយប្រហារតាមអាកាសរបស់ខ្លួន ដោយលើកឡើងពីតម្រូវការក្នុងការ «ធ្វើឱ្យខូចសមត្ថភាពយោធារបស់អ៊ីរ៉ង់» ខណៈដែលទីក្រុងតេអេរ៉ង់ព្រមានថា ខ្លួននឹងពង្រីកទំហំនៃការវាយប្រហាររបស់ ខ្លួនប្រឆាំងនឹងសត្រូវ។ «យើងបានបើកការវាយប្រហារតាមអាកាសប្រឆាំងនឹងអ៊ីរ៉ង់នៅម៉ោង ៣ រសៀល ម៉ោងស្តង់ដារភាគខាងកើត (ម៉ោង ២ ព្រឹក ម៉ោងនៅទីក្រុងភ្នំពេញនៅថ្ងៃនេះ) ដែលជាយប់ទីប្រាំពីរជាប់ៗគ្នា នៃការវាយប្រហារ។ប្រតិបត្តិការនេះមានគោលបំណងបន្តធ្វើឱ្យខូចសមត្ថភាពយោធារបស់អ៊ីរ៉ង់ ដូចដែលបានណែនាំដោយប្រធានាធិបតី» បានប្រកាសដោយបញ្ជាការកណ្តាល (CENTCOM) ដែលជាទីភ្នាក់ងារទទួលខុសត្រូវចំពោះប្រតិបត្តិការយោធារបស់សហរដ្ឋអាមេរិកនៅមជ្ឈិមបូព៌ា។ប្រព័ន្ធផ្សព្វផ្សាយអ៊ីរ៉ង់បានរាយការណ៍ថា ការផ្ទុះជាច្រើនបានកើតឡើងនៅតំបន់ជិតទីក្រុងស៊ីរីកភាគខាងត្បូង ទីក្រុងយ៉ាហ្ស៊ីដកណ្តាល និងទីក្រុងឡាស និងអាវ៉ាសនៅភាគនិរតីនៃប្រទេស។​លោក Mohsen Rezaei ទីប្រឹក្សារបស់មេដឹកនាំកំពូលអ៊ីរ៉ង់ បានព្រមាននៅថ្ងៃដដែលនោះអំពីផលវិបាក ប្រសិនបើសហរដ្ឋអាមេរិកបន្តបង្កើន ភាពតានតឹង ឬការប៉ុនប៉ងដណ្តើមយកទឹកដីអ៊ីរ៉ង់។ នេះបើយោងតាមការចុះផ្សាយដោយកាសែត AFP។ លោក​បាន​មានប្រសាសន៍​តាម​កញ្ចក់​ទូរទស្សន៍​ថា «ប្រសិនបើ​ការវាយប្រហារ​តាម​អាកាស​បន្ត​រយៈពេល​ពីរបីថ្ងៃ​ទៀត អ៊ីរ៉ង់​នឹង​ចាប់ផ្តើម​វាយលុក​ទ្រង់ទ្រាយ​ធំ។ យើង​នឹង​មិន​គ្រាន់តែ​ឆ្លើយតប​វិញ​ទេ​។ នឹង​លែង​មាន​ព្រំដែន​នយោបាយ​ដែលមាន​សុវត្ថិភាព​ទៀត​ហើយ»។ ការវិវឌ្ឍទាំងនេះ បង្ហាញពីការកើនឡើងនៃជម្លោះដ៏ធ្ងន់ធ្ងរបំផុត ចាប់តាំងពីការដួលរលំនៃ អនុស្សរណៈរួមរវាងសហរដ្ឋអាមេរិក និងអ៊ីរ៉ង់។ អ៊ីរ៉ង់បានចោទប្រកាន់យោធាអាមេរិកថា បានវាយប្រហារ អាកាសយានដ្ឋាន ស្ថានីយ៍រថភ្លើង និងស្ពាននៅភាគខាងត្បូងនៃប្រទេសនៅយប់ថ្ងៃទី ១៦ ខែកក្កដា ខណៈដែលទីក្រុងវ៉ាស៊ីនតោនមិនបានបញ្ជាក់ ឬបដិសេធព័ត៌មាននេះទេ។ រដ្ឋមន្ត្រីការបរទេសលោក Abbas Araghchi បាននិយាយថា យ៉ាងហោចណាស់មនុស្សបីនាក់ត្រូវបានសម្លាប់នៅក្នុងការវាយប្រហារនេះ ខណៈពេលកំពុងឆ្លងកាត់ ស្ពាន Bandar Khamir។ លោកបានប្រកាសថា ពួកគេនឹងមិនអនុញ្ញាតឱ្យឈាមរបស់ពួកគេត្រូវបានបង្ហូរ "ដោយឥតប្រយោជន៍" ឡើយ។អ៊ីរ៉ង់បានប្រកាសថា ខ្លួនបានបើកការវាយប្រហារទៅលើប្រទេសឈូងសមុទ្រដែលមានមូលដ្ឋានទ័ពអាកាសអាមេរិក រួមមានបារ៉ែន កាតា និងគុយវ៉ែត ហើយក៏បានកំណត់គោលដៅនាវាចម្បាំងមួយគ្រឿងរបស់ទីក្រុងវ៉ាស៊ីនតោន នៅភាគខាងជើងនៃមហាសមុទ្រឥណ្ឌាផងដែរ។ អគ្គលេខាធិការអង្គការសហប្រជាជាតិ លោក Antonio Guterres បានសម្តែងការព្រួយបារម្ភយ៉ាងខ្លាំង ដោយពណ៌នាអំពីការវាយប្រហារលើហេដ្ឋារចនាសម្ព័ន្ធស៊ីវិលថាជា «ទង្វើដែលមិនអាចទទួលយកបាន»។

(ភ្នំពេញ)៖ ឯកឧត្ដម ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានទទួលជួបសម្តែងការគួរសម និងពិភាក្សាការងារជាមួយលោក គ្រីស្ទាន ឌីស្លឺ (Christian Disler) អនុប្រធានផ្នែកកិច្ចសហប្រតិបត្តិការនៃទីភ្នាក់ងារស្វ៊ីសសម្រាប់ការអភិវឌ្ឍ និងសហប្រតិបត្តិការ (SDC) ប្រចាំកម្ពុជា នារសៀលថ្ងៃទី១៧ ខែកក្កដា ឆ្នាំ២០២៦ នៅទីស្តីការក្រសួង ដើម្បីបង្ហាញពីសមិទ្ធផលសំខាន់ៗនៃគម្រោងគំនិតផ្ដួចផ្ដើម TVET អាស៊ាន-ស្វ៊ីស (ASTI) ដំណាក់កាលទី១ និងពិភាក្សាបន្តអនុស្សរណៈនៃការយោគយល់គ្នា (MoU) ក្នុងដំណាក់កាលទី ២ ខណៈដំណាក់កាលទី ១ នឹងបញ្ចប់នៅចុងឆ្នាំនេះ។នាឱកាសនោះ ឯកឧត្ដមរដ្ឋមន្ត្រីបានស្វាគមន៍យ៉ាងកក់ក្តៅចំពោះលោក គ្រីស្ទាន ឌីស្លឺ តំណាងអង្គការ GIZ និងសហការី ព្រមទាំងបានវាយតម្លៃខ្ពស់ចំពោះសមិទ្ធផលគួរជាទីមោទនៈនៃគម្រោង ASTI ដំណាក់កាលទី១។ ក្នុងនាមរាជរដ្ឋាភិបាលកម្ពុជា ឯកឧត្តមបានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលស្វ៊ីស ទីភ្នាក់ងារ SDC អង្គការ GIZ និងដៃគូទាំងអស់ ដែលបានគាំទ្រដល់ការអភិវឌ្ឍវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) នៅកម្ពុជា។ ឯកឧត្តមមានប្រសាសន៍ថា ស្វ៊ីសជាដៃគូអភិវឌ្ឍន៍ដ៏គួរឱ្យទុកចិត្ត ហើយជំនាញបច្ចេកទេស និងការប្តេជ្ញាចិត្តរបស់ស្វ៊ីសបានរួមចំណែកយ៉ាងសំខាន់ក្នុងការពង្រឹងការអភិវឌ្ឍធនធានមនុស្សនៅកម្ពុជាសម្រាប់បំពេញតម្រូវការទីផ្សារដែលកំពុងវិវត្ត។ឯកឧត្ដមបានសរសើរចំពោះជោគជ័យនៃគម្រោង ASTI ដំណាក់កាលទី១ ដែលបានចូលរួមចំណែកយ៉ាងសំខាន់ក្នុងការកែទម្រង់ប្រព័ន្ធ TVET នៅកម្ពុជា តាមរយៈការរៀបចំគោលការណ៍ណែនាំថ្នាក់ជាតិ ស្តីពីការសិក្សាផ្អែកលើការងារ ការរៀបចំកញ្ចប់កម្មវិធីបណ្តុះបណ្តាលស្តង់ដា ការពង្រឹងការបណ្តុះបណ្តាល និងការវាយតម្លៃផ្អែកលើសមត្ថភាព ព្រមទាំង ការកសាងភាពជាដៃគូដ៏រឹងមាំរវាងរាជរដ្ឋាភិបាល វិស័យឧស្សាហកម្ម និងគ្រឹះស្ថាន TVET។ ជាលទ្ធផល សិក្ខាកាមចំនួន ៤២៧នាក់បានបញ្ចប់កម្មវិធី ការសិក្សាផ្អែកលើការងារ (WBL) ហើយពួកគាត់ទទួលបានការងារធ្វើ ១០០% ក្រោយបញ្ចប់ការសិក្សា ដែលក្នុងនោះ៨០% ជាស្ត្រី ដែលបង្ហាញពីការអភិវឌ្ឍជំនាញប្រកបដោយបរិយាបន្ន និងសមធម៌។ សមិទ្ធផលនេះបង្ហាញយ៉ាងច្បាស់ថា WBL នៅតែជាយុទ្ធសាស្ត្រអាទិភាព ដើម្បីជួយពង្រឹងកិច្ចសហការរវាងគ្រឹះស្ថាន TVET និងសហគ្រាស ព្រមទាំងបង្កើនលទ្ធភាពការងាររបស់យុវជន និងផលិតភាពសហគ្រាស។ឯកឧត្តម ហេង សួរ បានលើកឡើងថា រាជរដ្ឋាភិបាលកម្ពុជាបានចាត់ទុកការអភិវឌ្ឍធនធានមនុស្សជាស្នូលនៅក្នុងយុទ្ធសាស្ត្របញ្ចកោណ ដំណាក់កាលទី១ ហើយក្រសួងកំពុងធ្វើទំនើបកម្មប្រព័ន្ធ TVET ដើម្បីបណ្តុះបណ្តាលធនធានមនុស្សទៅតាមតម្រូវការទីផ្សារការងារ។ ក្រសួងបន្តប្តេជ្ញាចិត្តក្នុងការអនុវត្តការដាក់បញ្ចូល WBL ជាផ្នែកសំខាន់នៃប្រព័ន្ធ TVET ជាតិ ពង្រីកភាពជាដៃគូរវាងរដ្ឋ និងឯកជនក្នុងការអភិវឌ្ឍជំនាញ និងពង្រឹងស្តង់ដាសមត្ថភាព កម្មវិធីសិក្សា និងការធានាគុណភាព។ ទន្ទឹមនេះ ឯកឧត្តមក៏បានស្វាគមន៍និងគាំទ្រយ៉ាងពេញទំហឹងចំពោះការបន្ត MoU ក្នុងការអនុវត្តគម្រោង ASTI ផងដែរ។ដើម្បីធានាចីរភាពរយៈពេលវែងនៃគម្រោង ក្រសួងគាំទ្រការបង្កើតយន្តការហិរញ្ញប្បទានប្រកបដោយចីរភាពសម្រាប់ WBL ពង្រឹងកិច្ចសហការជាមួយមូលនិធិអភិវឌ្ឍជំនាញ និងស្វែងរកយន្តការរួមហិរញ្ញប្បទានរវាងរាជរដ្ឋាភិបាល សហគ្រាស និងដៃគូអភិវឌ្ឍន៍ជាដើម។ ឯកឧត្តមបានលើកទឹកចិត្តឱ្យក្រុមការងារបច្ចេកទេសទាំងពីរបញ្ចប់កិច្ចពិភាក្សាឱ្យបានទាន់ពេលវេលា ដើម្បីធានាការផ្លាស់ប្តូរពីដំណាក់កាលទី១ ទៅដំណាក់កាលទី ២ដោយរលូន។ ឯកឧត្តមសង្ឃឹមយ៉ាងមុតមាំថា គម្រោងដំណាក់ទី ២នឹងទទួលបានជោគជ័យដូចដំណាក់កាលទី ១ផងដែរ ដើម្បីធានាថា កិច្ចសហប្រតិបត្តិការនេះនឹងបន្តផ្តល់អត្ថប្រយោជន៍ដល់យុវជន កម្មករនិយោជិត និងសហគ្រាសក្នុងការបង្កើនផលិតភាពបន្ថែមទៀត។ជាការឆ្លើយតបលោក គ្រីស្ទាន ឌីស្លឺ បានថ្លែងអំណរគុណចំពោះឯកឧត្តមរដ្ឋមន្រ្តីក្នុងកិច្ចពិភាក្សាប្រកបដោយផ្លែផ្កាក៏ដូចជាបានបង្ហាញការប្តេជ្ញាចិត្ត និងចក្ខុវិស័យដ៏វែងឆ្ងាយរបស់ក្រសួងក្នុងការបន្ត MoU។ លោកបានលើកឡើងថា លទ្ធផលដំណាក់កាលទី ១ ទទួលបានវឌ្ឍនភាពគួរឱ្យកត់សម្គាល់។ ជាក់ស្តែង សិក្ខាកាមចំនួន ៤២៧ នាក់ បានបញ្ចប់ការបណ្តុះបណ្តាលនៅកន្លែងការងារ និងទទួលបានវិញ្ញាបនបត្រ ដែលជាមូលដ្ឋានដ៏សំខាន់ និងជាចំណុចចាប់ផ្តើមដ៏ល្អសម្រាប់ការពង្រីកគម្រោងបន្តទៀត។ សម្រាប់ដំណាក់កាលបន្ទាប់ លោកសង្កត់ធ្ងន់លើសារៈសំខាន់នៃកិច្ចសហការ ដើម្បីដោះស្រាយបញ្ហាប្រឈមសំខាន់ៗ ជាពិសេសការស្វែងរកយន្តការហិរញ្ញប្បទានប្រកបដោយចីរភាពសម្រាប់ការបណ្តុះបណ្តាលក្រៅកន្លែងការងារ។ លោកបានថ្លែងអំណរគុណយ៉ាងជ្រាលជ្រៅចំពោះឯកឧត្តមរដ្ឋមន្រ្តី និងក្រុមការងារទាំងអស់ដែលបានគាំទ្រ និងសហការយ៉ាងល្អនាពេលកន្លងមក ហើយលោកពិតជារីករាយដែលបានឃើញលទ្ធផល និងការអភិវឌ្ឍសម្រាប់ជាប្រយោជន៍ដល់ប្រជាជនកម្ពុជា៕

​(បាត់ដំបង)៖​ ក្រសួងការងារនិងបណ្តុះបណ្តាលវិជ្ជាជីវៈ បានបន្តរៀបចំ «វេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ» នៅបរិវេណសាលាស្រុកគាស់ក្រឡ ខេត្តបាត់ដំបង នាព្រឹកថ្ងៃទី១៧ ខែកក្កដា ឆ្នាំ២០២៦ ដោយនាំយកឱកាសការងារចំនួន ​៤ ៧០០កន្លែង​ ពីសហគ្រាស ក្រុមហ៊ុន និងរោងចក្រធំៗ ដល់ប្រជាពលរដ្ឋ អតីតពលករមកពីប្រទេសថៃ និងយុវជនជិត ៦០០នាក់ ដើម្បីលើកកម្ពស់ឱកាសការងារក្នុងស្រុក ពង្រឹងការយល់ដឹងអំពីសន្តិសុខសង្គម និងផ្សព្វផ្សាយឱកាសបណ្តុះបណ្តាលជំនាញវិជ្ជាជីវៈ។ដូចរៀងរាល់សប្តាហ៍ដែរ ការខិតខំផ្សព្វផ្សាយ និងការជួបសម្ភាសដោយផ្ទាល់រវាងបណ្តាក្រុមហ៊ុនដែលត្រូវការកម្លាំងពលកម្ម និងប្រជាពលរដ្ឋនៅតាមមូលដ្ឋានដែលកំពុងស្វែងរកការងារធ្វើ ក្រោមប្រធានបទ «ខ្មែរជួយរកការងារ និងផ្ដល់ការងារឱ្យខ្មែរ» ឯកឧត្តម ​សាន គីមហុង​ អនុរដ្ឋលេខាធិការ តំណាងដ៏ខ្ពង់ខ្ពស់របស់ ឯកឧត្តម ​ហេង សួរ​ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ ក្នុងពេលជួបសំណេះសំណាលជាមួយអ្នកចូលរួមទាំងអស់ បានជំរុញឱ្យប្រជាពលរដ្ឋចាប់យកឱកាសការងារក្នុងស្រុក ខណៈបច្ចុប្បន្នមានតម្រូវការកម្លាំងពលកម្មជាង ៩ម៉ឺនកន្លែង ពីបណ្តាសហគ្រាស ក្រុមហ៊ុន រោងចក្រ និងតំបន់សេដ្ឋកិច្ចពិសេសនៅទូទាំងប្រទេស។ ឯកឧត្តមបញ្ជាក់អំពីការងារក្នុងស្រុកដោយស្របច្បាប់ គឺមិនត្រឹមតែធានាបាននូវប្រាក់ចំណូលមានស្ថិរភាពប៉ុណ្ណោះទេ ប៉ុន្តែថែមទាំងទទួលបានអត្ថប្រយោជន៍ពីបេឡាជាតិសន្តិសុខសង្គម (ប.ស.ស.) រួមមាន របបហានិភ័យការងារ របបថែទាំសុខភាព និងរបបសោធននិវត្តន៍ ដែលផ្តល់ការគាំពារប្រហាក់ប្រហែលនឹងមន្ត្រីរាជការផងដែរ។ជាមួយគ្នានេះ ឯកឧត្តមអនុរដ្ឋលេខាធិការ ​បានអំពាវនាវដល់ប្រជាពលរដ្ឋឱ្យចៀសវាងការធ្វើចំណាកស្រុកដោយខុសច្បាប់ ដែលអាចប្រឈមនឹងការកេងប្រវ័ញ្ច និងខ្វះការការពារតាមផ្លូវច្បាប់។ ឯកឧត្តមបានណែនាំថា ប្រសិនបើមានបំណងទៅបម្រើការងារនៅក្រៅប្រទេស ត្រូវជ្រើសរើសក្រុមហ៊ុនដែលទទួលបានអាជ្ញាបណ្ណស្របច្បាប់ និងផ្ទៀងផ្ទាត់ព័ត៌មានជាមួយអាជ្ញាធរមានសមត្ថកិច្ច។ សម្រាប់ព័ត៌មានបន្ថែម ប្រជាពលរដ្ឋអាចទាក់ទងលេខទូរស័ព្ទជំនួយរហ័ស Hotline ​១២៩៧​ សម្រាប់សេវាផ្គូផ្គងការងារ និងលេខ ​១២៨៦​ សម្រាប់សេវាបេឡាជាតិសន្តិសុខសង្គម (ប.ស.ស.)។ឯកឧត្តមក៏បានលើកទឹកចិត្តដល់យុវជន និងប្រជាពលរដ្ឋឱ្យចូលរួមសិក្សាជំនាញបច្ចេកទេស និងវិជ្ជាជីវៈ តាមរយៈកម្មវិធី ​«TVET ១,៥ លាន»​ នៅវិទ្យាស្ថានពហុបច្ចេកទេសភូមិភាគតេជោសែនបាត់ដំបង, វិទ្យាស្ថានជាតិវិជ្ជាជីវៈបាត់ដំបង, វិទ្យាស្ថានបច្ចេកវិទ្យាបាត់ដំបង ដែលផ្តល់ការបណ្តុះបណ្តាលដោយឥតគិតថ្លៃ ព្រមទាំងប្រាក់ឧបត្ថម្ភប្រចាំខែ ហើយដែលកម្មវិធីនេះមានជំនាញជាច្រើន ស្របតាមតម្រូវការទីផ្សារការងារ ព្រមទាំងការបណ្តុះបណ្តាលជំនាញរយៈពេលខ្លី។សូមជម្រាបថា វេទិកាការងារនេះ មានការចូលរួមពីសហគ្រាស ក្រុមហ៊ុន និងរោងចក្រធំៗ ដែលបាននាំយកឱកាសការងារចំនួន ​៤ ៧០០កន្លែង​ មកផ្តល់ជូនប្រជាពលរដ្ឋ រួមមាន រោងចក្រ វេនធូរ៉ា លេឌើវែរ, រោងចក្រ សាន ហ្វេង (ខេមបូឌា) ខមភេនី, ក្រុមហ៊ុន ថាកូ អាហ្រ្គីព្រមទាំងក្រុមហ៊ុនជ្រើសរើសកម្លាំងពលកម្មទៅបម្រើការងារនៅក្រៅប្រទេស ដែលបានផ្តល់ព័ត៌មាន សេវាផ្គូផ្គងការងារ និងការប្រឹក្សាយោបល់ដោយផ្ទាល់ ដើម្បីឆ្លើយតបទៅនឹងតម្រូវការរបស់អ្នកស្វែងរកការងារ និងទីផ្សារការងារក្នុងពេលបច្ចុប្បន្ន៕