(ភ្នំពេញ)៖ នាព្រឹកថ្ងៃទី២៦ ខែមេសា ឆ្នាំ២០២៦ នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានអញ្ជើញជាអធិបតីដ៏ខ្ពង់ខ្ពស់ក្នុងពិធីសំណេះសំណាលជាមួយថ្នាក់ដឹកនាំអង្គការវិជ្ជាជីវៈ និងសមាគមសេដ្ឋកិច្ចក្រៅប្រព័ន្ធ ក្នុងឱកាសប្រារព្ឋខួបអនុស្សាវរីយ៍លើកទី១៤០ នៃទិវាពលកម្មអន្តរជាតិ ១ ឧសភា ឆ្នាំ២០២៦ ក្រោមប្រធានបទ «រួមគ្នាកសាងភាពធន់ដើម្បីការងារសមរម្យ» នៅមជ្ឈមណ្ឌលសន្និបាត និងពិព័រណ៍កោះពេជ្រ ដែលមានអ្នកចូលរួមជាង ៥ពាន់នាក់ មកពីសហជីពមូលដ្ឋានដ៏ច្រើនជាងគេរហូតដល់ជាង ១ ៣០០សហជីព, ថ្នាក់ដឹកនាំសហព័ន្ធសហជីពចំនួន ១៨៦សហព័ន្ធ ព្រមទាំងសមាគមនិយោជក សមាគមសេដ្ឋកិច្ចក្រៅប្រព័ន្ធ និងសមាគមផ្សេងៗទៀត រួមទាំងសមាគមបុគ្គលិកសិក្សា។ថ្លែងក្នុងពិធី សម្តេចធិបតី បានលើកឡើងថា ការប្រារព្ធទិវាពលកម្មអន្តរជាតិ ១ ឧសភា នាឆ្នាំនេះ គឺជាការបន្តនូវប្រពៃណីដ៏ថ្លៃថ្លានៃ "បុណ្យការងាររបស់ជាតិ" ដើម្បីរំឭកដល់ការតស៊ូក្នុងបុព្វហេតុលើកកម្ពស់សិទ្ធិ សេរីភាព និងសេចក្តីថ្លៃថ្នូររបស់បងប្អូនកម្មករនិយោជិត។ ក្នុងស្មារតីនេះ ប្រធានបទ “រួមគ្នាកសាងភាពធន់ដើម្បីការងារសមរម្យ” សម្រាប់ឆ្នាំ ២០២៦ ពិតជាបានឆ្លុះបញ្ចាំងពីតថភាពជាក់ស្តែង និងការប្តេជ្ញាចិត្តរបស់រាជរដ្ឋាភិបាល ក្នុងការអភិវឌ្ឍវិស័យការងារ សន្តិសុខសង្គម និងការបណ្តុះបណ្តាលវិជ្ជាជីវៈឱ្យកាន់តែរីកចម្រើន។ ទោះបីជាត្រូវប្រឈមនឹងវិបត្តិសកល ដែលបង្កឡើងដោយជម្លោះភូមិសាស្ត្រនយោបាយ វិបត្តិថាមពល និងការបែកខ្ញែកនៃសេដ្ឋកិច្ចសកលដែលរំខានដល់ពាណិជ្ជកម្មអន្តរជាតិក្តី, ជាពិសេស ទោះបីជាមានការរំលោភលើអធិបតេយ្យភាពជាតិ ដែលបង្ខំឱ្យអតីតពលករខ្មែរដែលរស់នៅ និងធ្វើការក្នុងប្រទេសថៃ ត្រូវវិលត្រឡប់មកវិញយ៉ាងគំហុក ព្រមទាំងបានបន្សល់នូវសោកនាដកម្មដល់ជីវិតវីរកងទ័ព ប្រជាពលរដ្ឋស្លូតត្រង់ និងបង្កឱ្យមានជនភៀសសឹកជាង ៦សែននាក់ យ៉ាងណាក៏ដោយ ក៏រាជរដ្ឋាភិបាលនៅតែរក្សាជំហររឹងមាំជានិច្ច ក្នុងការការពារសន្តិភាព ស្ថិរភាព និងឧត្តមប្រយោជន៍ជាតិជាធំ។ ជាមួយការសម្រួលដល់ឱកាសវិនិយោគ ការបង្កើតការងារ រាជរដ្ឋាភិបាលបានបន្តខិតខំលើកកម្ពស់សុខដុមនីយកម្ម និងសិទ្ធិសេរីភាពអង្គការវិជ្ជាជីវៈ ស្របច្បាប់ជាតិ និងបទដ្ឋានការងារអន្តរជាតិ ដែលកម្ពុជាបានផ្តល់សច្ចាប័ន។ ជាក់ស្តែង គិតត្រឹមត្រីមាសទី១ ឆ្នាំ២០២៦ នេះ អង្គការវិជ្ជាជីវៈចំនួន ៦ ៩២០ បានចុះបញ្ជិកា ក្នុងនោះរួមមាន សហភាពសហជីពចំនួន ៤៣, សហព័ន្ធសហជីពចំនួន ២៨៥, សហជីពមូលដ្ឋានចំនួន ៦ ៥៧៩ និងសមាគមនិយោជកចំនួន ១៣។ ដោយឡែក យន្តការដោះស្រាយវិវាទការងារ ត្រូវបានអនុវត្តកាន់តែមានប្រសិទ្ធភាព និងល្អប្រសើរជាងមុនទាំងនៅកម្រិតក្រសួង និងក្រុមប្រឹក្សាអាជ្ញាកណ្តាល ក្នុងត្រីមាសទី១ ឆ្នាំ២០២៦ នេះ ដោយសម្រេចបានអត្រាសះជាខ្ពស់រហូតដល់ ៩៧,៩២% ដែលតួលេខនេះឆ្លុះបញ្ចាំងពីភាពចាស់ទុំនៃទំនាក់ទំនងវិជ្ជាជីវៈ និងស្ថិរភាពក្នុងចង្វាក់ ផលិតកម្ម។ឆ្លៀតក្នុងឱកាសនោះ សម្តេចធិបតីមានប្រសាសន៍សង្កត់ធ្ងន់បន្ថែមថា ការបង្កើតការងារនៅកម្ពុជាត្រូវឈរលើអភិក្រមជាមូលដ្ឋានទាំងគុណភាព និងបរិមាណ។ ក្នុងស្មារតីនេះ ដើម្បីតម្រង់ទិសការងារបន្តឱ្យកាន់តែមានប្រសិទ្ធភាព សម្តេចបានដាក់ចេញនូវអនុសាសន៍គន្លឹះចំនួន ៥ ចំណុច ជូនដល់ក្រសួងការងារ និងបណ្តុះបណ្តាលវិជ្ជាជីវៈ សំដៅធានាលើកកម្ពស់សិទ្ធិ ផលប្រយោជន៍ និងសេចក្តីថ្លៃថ្នូររបស់បងប្អូនកម្មករនិយោជិត។ ទន្ទឹមនេះ សម្តេចបានអំពាវនាវដល់បងប្អូនកម្មករនិយោជិត ក៏ដូចជាគ្រប់ភាគីពាក់ព័ន្ធទាំងអស់ ឱ្យបន្តកិច្ចខិតខំប្រឹងប្រែងយ៉ាងអស់ពីបេះដូង និងកម្លាំងកាយចិត្ត ដោយក្តីប្តេជ្ញាចិត្ត និងក្តីរំភើបចំពោះការងាររបស់ខ្លួន ព្រមទាំងត្រូវចាត់ទុកសហគ្រាស គ្រឹះស្ថាន ឱ្យដូចជា "ផ្ទះរបស់ខ្លួន" ស្របតាមប្រសាសន៍ដ៏មានអត្ថន័យដែលសម្តេចតេជោ ធ្លាប់មានប្រសាសន៍កន្លងមក។ឯកឧត្តមរដ្ឋមន្រ្តីបានជម្រាបជូនសម្តេចធិបតី និងអង្គពិធីពីវឌ្ឍនភាពការងារសំខាន់ៗរបស់ក្រសួង ជាពិសេសការអនុវត្តអនុសាសន៍១០ចំណុចរបស់សម្តេចធិបតី និងកិច្ចសហប្រតិបត្តិការជាមួយអង្គការអន្តរជាតិខាងការងារ (ILO) ដែលដៃគូដ៏សំខាន់មួយក្នុងការរួមគ្នាជំរុញការអនុវត្ត “កម្មវិធីការងារសមរម្យសម្រាប់ប្រទេសកម្ពុជា” ជាងពីរទសវត្សរ៍ចាប់តាំងពីឆ្នាំ២០០៥ ដែលគិតមកដល់ពេលនេះមានចំនួន ៦ដំណាក់កាលរួចមកហើយ និងបានបង្កើននូវភាពធន់ និងផលិតភាពនៃកម្លាំងពលកម្មនៅកម្ពុជា។ ក្នុងបរិយាកាសដ៏រីករាយនេះ សម្តេចធិបតីក៏បានអញ្ជើញជាកិត្តិយសដ៏ខ្ពង់ខ្ពស់ ប្រគល់ពានរង្វាន់ “សហគ្រាសមួយជាសហគមន៍សុខសាន្តមួយ” លើកទី ២ ជូនដល់សហគ្រាសចំនួន ៥៥ ដែលបានបំពេញយ៉ាងត្រឹមត្រូវតាមលក្ខណៈវិនិច្ឆ័យអនុលោមភាពទាំង ៨ ចំណុចនៃចលនាប្រឡងប្រណាំង។ ក្នុងនោះ រួមមានជ័យលាភីពានមាសចំនួន ២៧, ពានប្រាក់ចំនួន ១៨ និងពានសំរិទ្ធចំនួន ១០ សហគ្រាស។ គួរជម្រាបផងដែរថា សម្រាប់ឆ្នាំទី ២ នៃចលនាប្រឡងប្រណាំងនេះ មានរោងចក្រ សហគ្រាស និងក្រុមហ៊ុនចូលរួមសរុបចំនួន ១៨២៕ 

(ខេត្តត្បូងឃ្មុំ)៖ នៅរសៀលថ្ងៃទី២៦ ខែមេសា ឆ្នាំ២០២៦ ឯកឧត្តម ចាយ បូរិន ​ប្រធានផ្នែកឃោសនាអប់រំ​នៃយុវជន​គណបក្សថ្នាក់កណ្តាល បានដឹកនាំគណៈប្រតិភូយុវជនគណបក្សប្រជាជនកម្ពុជាថ្នាក់កណ្ដាល ចុះសួរ​សុខ​ទុក្ខ និងនាំយកអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត អនុប្រធាន​គណបក្ស​ប្រជាជនកម្ពុជា ជាប្រធានយុវជនគណបក្សប្រជាជនកម្ពុជាថ្នាក់កណ្ដាល​ និងលោកជំទាវបណ្ឌិត ពេជ ចន្ទមុន្នី ហ៊ុន​ម៉ា​ណែត អគ្គស្នងការកាយឫទ្ធិនារីកម្ពុជា ជូនដល់ ឯកឧត្តម​ កង ណែម សមាជិកគណៈកម្មាធិការកណ្ដាលគណបក្សប្រជាជនកម្ពុជា អតីតរដ្ឋលេខាធិការក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បច្ចុប្បន្នជាទីប្រឹក្សារាជរដ្ឋាភិបាល នៅគេហដ្ឋាន ស្ថិតនៅភូមិពោធិ៍ស្រុក ឃុំកោងកាង ស្រុកពញាក្រែក ខេត្តត្បូងឃ្មុំ។ក្នុងឱកាសនោះ​ ឯកឧត្តមប្រធានគណៈប្រតិភូ បានពាំនាំការផ្តាំផ្ញើសាកសួរសុខទុក្ខ ពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្តេចមហាបវរធិបតី ហ៊ុន ម៉ាណែត អនុប្រធាន​គណបក្ស​ប្រជាជនកម្ពុជា ជាប្រធានយុវជនគណបក្សប្រជាជនកម្ពុជាថ្នាក់កណ្ដាល និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការកាយឫទ្ធិនារីកម្ពុជា ព្រមទាំងថ្នាក់ដឹកនាំគណបក្សគ្រប់លំដាប់ថ្នាក់ ជូនដល់​ឯកឧត្តម កង ណែម ព្រមទាំងក្រុមគ្រួសារ ដែល​ជានិច្ចកាលសម្ដេចតេជោ សម្ដេចកិត្តព្រឹទ្ធបណ្ឌិត សម្ដេចមហាបវរធិបតី និងលោកជំទាវបណ្ឌិត តែងតែគិតគូរយកចិត្តទុកដាក់អំពីសុខទុក្ខប្រជាជន និងថ្នាក់​ដឹកនាំ​គ្រប់លំដាប់ថ្នាក់ ដែលធ្លាប់មានស្នាដៃ និងគុណបំណាច់ចំពោះប្រទេសជាតិមាតុភូមិ។ ​ឯកឧត្តម កង ណែម​ បានមានប្រសាសន៍ថា៖ «ខ្ញុំបាទព្រមទាំងក្រុមគ្រួសារ ​សូមសម្ដែងកតញ្ញុតាធម៌ និងសេចក្ដីសោមនស្សចិត្តយ៉ាងក្រៃលែង គោរពជូនចំពោះ សម្តេចតេជោ ​ សម្តេចកិត្តិព្រឹទ្ធបណ្ឌិត ​ សម្តេចមហាបវរធិបតី ​និងលោកជំទាវបណ្ឌិត ​ ដែលបានចាត់ឯកឧត្តម ចាយ បូរិន ជាតំណាងដ៏ខ្ពង់ខ្ពស់ ចុះមកសួរសុខទុក្ខ និងនាំយកអំណោយដ៏ថ្លៃថ្លា មកផ្ដល់ឱ្យខ្ញុំបាទ និងក្រុមគ្រួសារដល់គេហដ្ឋានផ្ទាល់។ ខ្ញុំបាទនិងក្រុមគ្រួសារ ពិតជាមានកិត្តិយសនិងក្ដីរំភើបរីករាយឥតឧបមា ចំពោះសកម្មភាពចុះសួរសុខទុក្ខរបស់ក្រុមការងារយុវជនគណបក្សថ្នាក់កណ្ដាល ក្រោមការដឹកនាំប្រកបដោយភាពប្រាកដនិយមរបស់សម្តេចមហាបវរធិបតី ហ៊ុន ម៉ាណែត ដែលបន្ត​ប្រតិបត្តិតាមប្រពៃណីដ៏ល្អផូរផង់​ ពីសម្តេចតេជោ ហ៊ុន សែន ដែលតែងតែយកចិត្តទុកដាក់ពីសុខទុក្ខ ជីវភាព ផ្តល់ភាពកក់ក្តៅ និងក្តីសង្ឃឹមដល់ព្រឹទ្ធាចារ្យ ដែលមានគុណបំណាច់ចំពោះគណបក្ស និងប្រទេសជាតិ ស្របតាមគោលការណ៍របស់គណបក្សប្រជាជនកម្ពុជា»។​ឯកឧត្តមក៏បានបញ្ជាក់ពីការគាំទ្រ និងមានជំនឿជឿជាក់យ៉ាងមុតមាំចំពោះរាជរដ្ឋាភិបាល អាណត្តិទី៧ នៃរដ្ឋសភា ក្រោមការដឹកនាំប្រកបដោយភាព​ប្រាកដនិយម និងការប្តេជ្ញាចិត្តយ៉ាងមោះមុតរបស់ សម្តេចមហាបវរធិបតី ហ៊ុន ម៉ាណែត ក្នុងការបន្តការពារ និងថែរក្សានូវសុខសន្តិភាព ស្ថិរភាពសង្គម អធិបតេយ្យជាតិ បូរណភាពទឹកដី តាមរយៈការចរចារដោយសន្តិវិធី និងការអភិវឌ្ឍសមិទ្ធផលថ្មីៗជូនជាតិមាតុភូមិ ព្រមទាំងបានគោរពជូនពរ សម្តេចតេជោ សម្តេចកិត្តិព្រឹទ្ធបណ្ឌិត ​ សម្តេចមហាបវរធិបតី ​និងលោកជំទាវបណ្ឌិត និងសម្ដេច ថ្នាក់ដឹកនាំគណបក្សគ្រប់លំដាប់ថ្នាក់ ក្នុងឱកាសឆ្នាំថ្មីប្រពៃណីជាតិខ្មែរ​ សូមទទួលបាននូវឧត្តមពរជ័យ សិរីមង្គល វិបុលសុខ បវរមហាប្រសើរ និងសូមមានសុខភាពល្អបរិបូរណ៍ ជន្មាយុយឺនយូរ ដើម្បី​ដឹកនាំនាវាកម្ពុជា ឈានឆ្ពោះទៅរកត្រើយវឌ្ឍនភាពជានិរន្តរ៍។ ទន្ទឹមនេះ ឯកឧត្តម​ បានរម្លឹកអំពីប្រវត្តិការសិក្សា ការងារ និងអនុស្សាវរីយ៍ជាច្រើន ដែលឯកឧត្តមធ្លាប់បានឆ្លងកាត់ បម្រើគណបក្សប្រជាជនកម្ពុជា ក៏ដូចជាការស្តារ ការកសាង និងការអភិវឌ្ឍប្រទេសជាតិ ដើម្បីជាបទពិសោធចែកជូនដល់យុវជន មានដូចជា៖ក.ការងារគណបក្ស ឯកឧត្តម បានក្លាយជាសមាជិកគណៈកម្មាធិការកណ្ដាល គណបក្សប្រជាជនកម្ពុជា ក្នុងមហាន្និបាតលើកទី២ នាថ្ងៃទី១១ ខែមេសា ឆ្នាំ១៩៨៩។ ខ.សិក្សាវគ្គអប់រំនយោបាយ រួមមាន៖ ១)ឆ្នាំ១៩៧៨ វគ្គអប់រំទ្រឹស្ដីគ្រប់គ្រង ចាត់តាំង និងសេដ្ឋកិច្ច ចំនួន៤វគ្គ រយៈពេល២ខែ នៅទីក្រុងហូជីមិញ ២)ឆ្នាំ១៩៨០រៀនវគ្គអប់រំទ្រឹស្ដី ទស្សនវិជ្ជា គ្រប់គ្រង ចាត់តាំង យុវជន កុមារ និងសេដ្ឋកិច្ច រយៈពេល៦ខែ នៅសាលាយុវជនជាន់ខ្ពស់ វីលហែមពិច ប្រទេសអាល្លឺម៉ង់  ៣)ឆ្នាំ១៩៨២ វគ្គអប់រំទ្រឹស្ដី ទស្សនៈវិជ្ជា គ្រប់គ្រង ចាត់តាំង ដឹកនាំ និងសេដ្ឋកិច្ច រយៈពេល៦ខែ នៅទីក្រុងហាណូយ សាធារណៈរដ្ឋសង្គមនិយមវៀតណាម។ គ.ប្រវត្តិការងារ រួមមាន៖ ១)ឆ្នាំ១៩៧៩ ចូលរួមរណសិរ្យរួបរួមជាតិកម្ពុជា ២)ថ្ងៃទី១៩ ខែមិថុនា ឆ្នាំ១៩៨៥ ជាអនុប្រធានយុវជនសង្គ្រោះជាតិកម្ពុជា ៣)ថ្ងៃទី១៨ ខែមីនា ឆ្នាំ១៩៨៩ អនុរដ្ឋមន្រ្តីក្រសួងកសិកម្ម ៤)ថ្ងៃទី១៦ ខែកញ្ញា ឆ្នាំ១៩៩០ អនុប្រធានគណៈចាត់តាំងថ្នាក់កណ្ដាល ៥)ថ្ងៃទី១៣ ខែមីនា ឆ្នាំ១៩៩២ អនុប្រធានទូរលេខសម្ងាត់ក្រសួងមហាផ្ទៃ ៦)ថ្ងៃទី១២ ខែកក្កដា ឆ្នាំ១៩៩៣ អនុរដ្ឋមន្រ្តីក្រសួងមហាផ្ទៃ ៧)ថ្ងៃទី២ ខែធ្នូ ឆ្នាំ១៩៩៤ ទីប្រឹក្សាក្រសួងមហាផ្ទៃ ៨)ថ្ងៃទី១៧ ខែវិច្ឆិកា ឆ្នាំ១៩៩៥ ទីប្រឹក្សាក្រសួងមហាផ្ទៃ ៩)ថ្ងៃទី៥ ខែធ្នូ ឆ្នាំ១៩៩៨ ទីប្រឹក្សាសម្ដេច ហ៊ុន សែន  ១០)ថ្ងៃទី១៧ ខែតុលា ឆ្នាំ២០០៤ អនុរដ្ឋលេខាធិការក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ១១)ថ្ងៃទី១ ខែធ្នូ ឆ្នាំ២០០៩ រដ្ឋលេខាធិការក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ១២)ថ្ងៃទី២ ខែកញ្ញា ឆ្នាំ២០២៣ ជាទីប្រឹក្សារាជរដ្ឋាភិបាល។ជាងនេះទៅទៀត ឯកឧត្តម​​ បានចែករំលែកបទពិសោធ និងផ្ដល់អនុសាសន៍មួយចំនួន ដល់យុវជនគណបក្ស ដូចខាងក្រោម៖1.    ​​​យុវជនត្រូវរួមសាមគ្គីគ្នាជាធ្លុងតែមួយ គ្រប់កាលៈទេសៈក្រោមការដឹកនាំរបស់គណបក្ស។2.     យុវជនត្រូវចេះស្រលាញ់ រាប់អានគ្នា ជួយគ្នាទៅវិញទៅមក ដើម្បីជាកម្លាំងរឹងមាំការពារប្រទេសជាតិ។ 3.   យុវជនត្រូវរួមចំណែកកាតព្វកិច្ចការពារជាតិ ការពារសន្តិភាព សន្តិសុខសង្គម។4.   យុវជនត្រូវចូលរួមជាមួយរាជរដ្ឋាភិបាល ទប់ស្កាត់បទល្មើសគ្រប់ប្រភេទ និងប្រយុទ្ធប្រឆាំងគ្រឿងញៀន (ដើម្បីអភិវឌ្ឍន៍ប្រទេសជាតិ​)។5.   វប្បធម៌នៃការសួរសុខទុក្ខ ជាប្រពៃណីដ៏ល្អផូរផង់របស់ដូនតាខ្មែរយើង សំណូមពរឱ្យបន្តបំផុសសកម្មភាពនេះ បានទូលំទូលាយដល់ភូមិ ឃុំ/សង្កាត់ ស្រុក/ខណ្ឌ និងរាជធានីខេត្ត។ឯកឧត្តមប្រធានប្រតិភូ បាន​កោតសរសើរ និងវាយតម្លៃខ្ពស់ចំពោះស្នាដៃ​ ការខិតខំប្រឹងប្រែង របស់ឯកឧត្តម ​ដែលបានចូលរួមចំណែកបម្រើគណបក្សនិងប្រជាជននាពេលកន្លងមក ព្រមទាំងបានប្រគល់នូវអំណោយដ៏ថ្លៃថ្លា របស់សម្តេចមហាបវរធិបតី និងលោកជំទាវបណ្ឌិត ​ជូនចំពោះឯកឧត្តម​ កង ណែម និងសូមបួងសួងដល់វត្ថុស័ក្ដិសិទ្ធិក្នុងលោក ទេវតាឆ្នាំថ្មីព្រះនាម រា​ក្យ​សា​ទេវី តាមជួយបីបាច់ថែរក្សា ឯកឧត្តម ព្រមទាំងក្រុមគ្រួសារ មានសុខភាពល្អ កម្លាំងមាំមួន និងមានជន្មាយុយឺនយូរ ទទួលបាននូវពុទ្ធពរ៤ប្រការ គឺអាយុ វណ្ណៈ សុខៈ ពលៈ កុំបីប្រែក្លាយជាបការៈដទៃឡើយ៕

(ភ្នំពេញ)៖ សម្ដេច ហ៊ុន ម៉ាណែត មានប្រសាសន៍ក្នុងពិធី​សំណេះ​ណាលជាមួយថ្នាក់ដឹកនាំសហជីព សមាគម​សេដ្ឋកិច្ចក្រៅប្រព័ន្ធនៅកោះពេជ្រ ថ្ងៃអាទិត្យ ទី២៦ ខែមេសា ឆ្នាំ២០២៦ថា ខ្ញុំបានណែនាំដល់ឯកឧត្តមឧបនាយករដ្ឋមន្ត្រី កើត រិទ្ធ រដ្ឋមន្រ្ដីក្រសួងយុត្តិធម៌ និងផ្នែកពាក់ព័ន្ធសិក្សាអំពីផ្នែកច្បាប់ ដើម្បីយកក្រុមក្មេងទំនើងដែលបំពុល និងបង្កភាពអសន្តិសុខសង្គម ហើយដែលដែលឃាត់ខ្លួនបាន ដើម្បីយកទៅដាក់ឱ្យបម្រើការងារនៅសមរភូមិមុខ"៕

(អន្តរជាតិ)៖ ប្រធានាធិបតី ដូណាល់ ត្រាំ ត្រូវបានអមដំណើរចេញពីឆាកយ៉ាងលឿនដោយសេវាសម្ងាត់ បន្ទាប់ពីការបាញ់ប្រហារនៅក្នុងពិធីជប់លៀងអ្នកយកព័ត៌មានសេតវិមាននៅទីក្រុងវ៉ាស៊ីនតោនឌីស៊ី។ ប្រភពព័ត៌មានបាននិយាយថា លោក ត្រាំ អនុប្រធានាធិបតី JD Vance និងសមាជិកគណៈរដ្ឋមន្ត្រីរបស់លោកទាំងអស់មានសុវត្ថិភាព។ លោក ត្រាំ បាននិយាយនៅលើបណ្តាញសង្គមថា “ជនបាញ់ប្រហារត្រូវបានចាប់ខ្លួន”។ អាជ្ញាធរបានកំណត់អត្តសញ្ញាណជនសង្ស័យថាជាបុរសអាយុ 30 ឆ្នាំមកពីរដ្ឋកាលីហ្វ័រញ៉ា ។ប្រធានាធិបតីបាននិយាយថា លោកកំពុងធ្វើដំណើរត្រឡប់ទៅសេតវិមានវិញ ហើយនឹងធ្វើសន្និសីទសារព័ត៌មានក្នុងពេលឆាប់ៗនេះ។ លោកក៏បាននិយាយផងដែរថា ពិធីជប់លៀងនេះនឹងត្រូវបានកំណត់ពេលឡើងវិញក្នុងរយៈពេល 30 ថ្ងៃ។លោក Wolf Blitzer អ្នកយកព័ត៌មាន CNN កបានឃើញក្មាន់កាំភ្លើង នៅលើដីដែលមានចម្ងាយត្រឹមតែប៉ុន្មានហ្វីតប៉ុណ្ណោះ។ លោកគឺជាម្នាក់ក្នុងចំណោមអ្នកចូលរួមរាប់សិបនាក់ដែលបានលាក់ខ្លួននៅពេលដែលសមត្ថកិច្ចអនុវត្តច្បាប់បានប្រមូលផ្តុំគ្នា។ ប្រភពព័ត៌មានបាននិយាយថា ភ្នាក់ងារសេវាសម្ងាត់សហរដ្ឋអាមេរិកម្នាក់ត្រូវបានបាញ់ប្រហារតែរួចជីវិតព្រោះពាក់អាវការពារ ហើយត្រូវបានបញ្ជូនទៅមន្ទីរពេទ្យ៕

(ហ្សាការតា)៖ រុស្ស៊ីបានយល់ព្រមផ្គត់ផ្គង់ប្រេងរហូតដល់ ១៥០ លានបារ៉ែលដល់ឥណ្ឌូនេស៊ី បន្ទាប់ពីដំណើរទស្សនកិច្ចថ្មីៗនេះរបស់ប្រធានាធិបតីឥណ្ឌូនេស៊ី លោក Prabowo Subianto ទៅកាន់ទីក្រុងមូស្គូ។លោក Prabowo បានជួបជាមួយប្រធានាធិបតីរុស្ស៊ី លោក Vladimir Putin នៅឯវិមានក្រឹមឡាំងកាលពីសប្តាហ៍មុន ដោយបានពិភាក្សាអំពីការពង្រឹងភាពជាដៃគូយុទ្ធសាស្ត្រ រួមទាំងវិស័យថាមពលផងដែរ នេះបើតាមលោក Teddy Indra Wijaya លេខាធិការគណៈរដ្ឋមន្ត្រី។ដូចប្រទេសជាច្រើនដែរ ឥណ្ឌូនេស៊ីបានស្ថិតនៅក្រោមសម្ពាធពីការកើនឡើងនៃតម្លៃប្រេងសកលដោយសារតែសង្គ្រាមនៅមជ្ឈិមបូព៌ា ហើយបានខិតខំប្រឹងប្រែងដើម្បីធានាបាននូវអ្នកផ្គត់ផ្គង់ជំនួស។ប្រហែល ២០ ទៅ ២៥ ភាគរយនៃការនាំចូលប្រេងឆៅរបស់ឥណ្ឌូនេស៊ីបានមកពីមជ្ឈិមបូព៌ា ហើយឆ្លងកាត់ច្រកសមុទ្រ Hormuz ដ៏សំខាន់។រុស្ស៊ីបានយល់ព្រមផ្គត់ផ្គង់ប្រេងចំនួន ១០០ លានបារ៉ែលដល់ប្រទេសឥណ្ឌូណេស៊ីក្នុងតម្លៃពិសេស និង ៥០ លានបារ៉ែលទៀតប្រសិនបើត្រូវការនៅពេលក្រោយ។ឥណ្ឌូណេស៊ី ដែលជាប្រទេសមានសេដ្ឋកិច្ចធំជាងគេនៅអាស៊ីអាគ្នេយ៍ ដែលប្រេងឥន្ធនៈត្រូវបានឧបត្ថម្ភធនយ៉ាងច្រើន គឺជាប្រទេសផលិតប្រេង ប៉ុន្តែទោះជាយ៉ាងណាក៏ដោយ ជាអ្នកនាំចូលសុទ្ធ៕

(កំពង់ស្ពឺ)៖ នាព្រឹកថ្ងៃទី២៥ ខែមេសា ឆ្នាំ២០២៦ ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍ គណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកំពង់ស្ពឺ បានអញ្ជើញដឹកនាំកិច្ចប្រជុំបូកសរុបលទ្ធផលការងារខែមេសា និងលើកទិសដៅភារកិច្ចបន្ដសម្រាប់ខែឧសភា របស់គណបក្សខេត្តកំពង់ស្ពឺ នៅមន្ទីរគណបក្សខេត្តកំពង់ស្ពឺ។ កិច្ចប្រជុំនេះ មានការចូលរួមពីឯកឧត្តមអនុប្រធានទី១ ឯកឧត្តម លោកជំទាវ អនុប្រធាន សមាជិក សមាជិកា ក្រុមការងាចុះជួយខេត្ត ក្រុង ស្រុក ឃុំ សង្កាត់ និងថ្នាក់ដឹកនាំគណបក្សចុះមូលដ្ឋានគ្រប់ជាន់ថ្នាក់ សរុបប្រមាណ ៤៥០នាក់។ជាកិច្ចចាប់ផ្ដើម ឯកឧត្តម អុិន ឃុន អនុប្រធានគណៈកម្មាធិការគណបក្សខេត្តកំពង់ស្ពឺ បានឡើងថ្លែងរបាយការណ៍សង្ខេប ស្ដីពីលទ្ធផលការងារសម្រេចបាន និងសភាពការណ៍ទូទៅរបស់ខេត្ត ព្រមទាំងបានពិនិត្យ និងវាយតម្លៃលើវឌ្ឍនភាពនៃការអនុវត្តកម្មវិធីនយោបាយ លិខិតបទដ្ឋាន និងសេចក្តីណែនាំនានារបស់ថ្នាក់កណ្តាលក្នុងខែមេសាកន្លងទៅ។បន្ទាប់ពីបានស្ដាប់របាយការណ៍ ឯកឧត្តម ហ៊ុន ម៉ានី បានផ្តល់អនុសាសន៍ណែនាំជូនដល់ក្រុមការងារគណបក្ស និងគណៈកម្មាធិការបក្សមូលដ្ឋានគ្រប់ជាន់ថ្នាក់ ត្រូវបន្តថែរក្សា នូវសាមគ្គី ឯកភាពផ្ទៃក្នុងរបស់គណបក្ស និងលើកទឹកចិត្តឱ្យមានការរាយការណ៍ជាប្រចាំ។ ឯកឧត្តមក៏បានណែនាំឱ្យក្រុមការងារទាំងអស់បន្តយកចិត្តទុកដាក់ និងដោះស្រាយជូនបងប្អូនប្រជាពលរដ្ឋក្នុងខេត្តតាមដែលអាចធ្វើទៅបាន និងបន្តពង្រឹងការអនុវត្តនយោបាយ ភូមិ-ឃុំមានសុវត្ថិភាព ដែលសុខទុក្ខរបស់ពួកគាត់គឺជាស្នូលនៃបេសកកម្មរបស់គណបក្សយើង។

(អន្តរជាតិ)៖ ក្រុមហ៊ុន Meta មានគម្រោងកាត់បន្ថយកម្លាំងពលកម្មរបស់ខ្លួនចំនួន 10% ដែលស្មើនឹងបុគ្គលិកជិត 8,000 នាក់ ខណៈដែលក្រុមហ៊ុនបន្តពន្លឿនការវិនិយោគរបស់ខ្លួនលើ AI។នៅក្នុងអ៊ីមែលមួយដែលបានផ្ញើទៅកាន់បុគ្គលិកនៅថ្ងៃទី 23 ខែមេសា ដែលទទួលបានដោយ Bloomberg និង Business Insider លោកស្រី Janella Gale ប្រធានផ្នែកធនធានមនុស្សរបស់ Meta បាននិយាយថា ការកាត់បន្ថយនឹងចាប់ផ្តើមនៅថ្ងៃទី 20 ខែឧសភា ឆ្នាំ២០២៦ ហើយផែនការជ្រើសរើសបុគ្គលិកសម្រាប់មុខតំណែងប្រហែល 6,000 ដែលកំពុងដំណើរការនឹងត្រូវបានលុបចោល។ អ្នកដែលរងផលប៉ះពាល់នឹងទទួលបានកញ្ចប់ប្រាក់បំណាច់ដែលមានប្រាក់ខែគោលចំនួន 16 សប្តាហ៍បូករួមទាំងពីរសប្តាហ៍សម្រាប់ឆ្នាំនៃការបម្រើការងារនីមួយៗ។លោក Gale បានសរសេរនៅក្នុងអ៊ីមែលថា "ខ្ញុំយល់ថានេះជាដំណឹងដែលមិនគួរឱ្យចង់បាន ហើយការបញ្ជាក់នេះបានបង្កឱ្យមានភាពមិនស្រួលខ្លះ ប៉ុន្តែយើងជឿជាក់ថានេះគឺជាវិធានការសមស្របបំផុតដោយផ្អែកលើកាលៈទេសៈបច្ចុប្បន្ន"។ ក្រុមហ៊ុន Meta កំពុងចំណាយប្រាក់រាប់រយពាន់លានដុល្លារលើ AI ដូចជាការវិនិយោគយ៉ាងច្រើន លើមជ្ឈមណ្ឌលទិន្នន័យទ្រង់ទ្រាយធំ និងការផ្តល់ជូនកញ្ចប់សំណងដ៏ទាក់ទាញសម្រាប់អ្នកស្រាវជ្រាវ AI កំពូលៗ។ ការបញ្ឈប់បុគ្គលិកទ្រង់ទ្រាយធំនេះ ធ្វើឡើងបន្ទាប់ពីកិច្ចខិតខំប្រឹងប្រែងកាត់បន្ថយបុគ្គលិកតូចៗជាច្រើន។ ការកាត់បន្ថយបុគ្គលិកកំពុងកើនឡើងនៅទូទាំងឧស្សាហកម្មបច្ចេកវិទ្យា ខណៈដែលក្រុមហ៊ុននានាកំពុង សម្របខ្លួនទៅនឹងរលកនៃបញ្ញាសិប្បនិម្មិត (AI)។ នៅក្នុងរបាយការណ៍ប្រចាំឆ្នាំរបស់ខ្លួនដែលចេញផ្សាយក្នុងខែមករា Meta បានបញ្ជាក់ថា ខ្លួនមានបុគ្គលិកចំនួន 78,865 នាក់នៅទូទាំងពិភពលោកគិតត្រឹមថ្ងៃទី 31 ខែធ្នូ ឆ្នាំ 2025 ដែលធ្លាក់ចុះពី 86,482 នាក់នៅចុងឆ្នាំ 2022 ដែលជារយៈពេលនៃការជួលបុគ្គលិកយ៉ាងច្រើននៅ ក្នុងឧស្សាហកម្មបច្ចេកវិទ្យា។ នៅចុងឆ្នាំ 2020 កម្លាំងពលកម្មសកលរបស់ក្រុមហ៊ុនមានចំនួន 58,604 នាក់។ 

(អន្តរជាតិ)៖ បន្ទាប់ពីការប្រកាសពីការដំឡើងថ្លៃស្រោមអនាម័យ ៣០% ដោយក្រុមហ៊ុនផលិតឈានមុខគេរបស់ពិភពលោក អ្នកប្រើប្រាស់ប្រព័ន្ធផ្សព្វផ្សាយសង្គមចិនកំពុងជំរុញគ្នាទៅវិញទៅមកឱ្យស្តុកទុកដើម្បីសន្សំប្រាក់។យោងតាមទីភ្នាក់ងារសារព័ត៌មាន Reuters បានឲ្យដឹងថា ភាពចលាចលនេះបានចាប់ផ្តើមនៅពេលដែលលោក Goh Miah Kiat ប្រធានក្រុមហ៊ុនផលិតស្រោមអនាម័យម៉ាឡេស៊ី Karex Bhd ដែលជាអ្នកផ្គត់ផ្គង់ដល់ម៉ាកល្បីៗដូចជា Durex និង Trojan បានប្រកាសពីផែនការ ដំឡើងថ្លៃផលិតផលពី 20% ទៅ 30% ។ ការកើនឡើងនេះអាចខ្ពស់ជាងនេះទៅទៀត ប្រសិនបើការរំខានដល់ខ្សែសង្វាក់ផ្គត់ផ្គង់ដោយសារតែ ជម្លោះនៅអ៊ីរ៉ង់នៅតែបន្ត។នៅក្នុងប្រទេសចិន ព័ត៌មានអំពី "តម្លៃស្រោមអនាម័យកំពុងកើនឡើង" ទទួលបានការចូលមើលជាង 60 លានដងនៅលើវេទិកា Weibo គិតត្រឹមថ្ងៃទី២៤ ខែមេសា។ អ្នកប្រើប្រាស់ជាច្រើនបានសម្តែងការព្រួយបារម្ភថា ជម្លោះនៅមជ្ឈិមបូព៌ាមិនត្រឹមតែប៉ះពាល់ដល់សេដ្ឋកិច្ចម៉ាក្រូសេដ្ឋកិច្ចប៉ុណ្ណោះទេ ប៉ុន្តែវាក៏ចាប់ផ្តើម "ជ្រៀតចូល" បន្ទប់គេងផងដែរ។បើទោះបីជាមានការរំពឹងទុកអំពីការកើនឡើងនៃតម្លៃក៏ដោយ ក៏មនុស្សភាគច្រើនជឿថា រឿងនេះនឹងមិនរារាំងពួកគេពីការប្រើប្រាស់វិធីពន្យារកំណើត និងការអនុវត្តការរួមភេទដោយសុវត្ថិភាពនោះទេ។ អ្នកប្រើប្រាស់បណ្តាញសង្គមជាច្រើនកំពុងជំរុញគ្នាទៅវិញទៅមកឱ្យស្តុកទុកក្នុងបរិមាណច្រើន។រលកនៃការពិភាក្សានេះកំពុងកើតឡើងនៅក្នុងបរិបទដែលរដ្ឋាភិបាលចិនកំពុងអនុវត្តគោលនយោបាយផ្សេងៗដែលមានគោលបំណង ធ្វើឱ្យប្រសើរឡើងនូវអត្រាកំណើតដែលធ្លាក់ចុះយ៉ាងខ្លាំងរបស់ខ្លួន ។ កាលពីឆ្នាំមុន ចំនួនកុមារដែលកើតនៅទីនោះបានធ្លាក់ចុះដល់កម្រិតទាបបំផុត។ តម្លៃស្រោមអនាម័យដែលកើនឡើងខ្ពស់ ត្រូវបានគេរំពឹងថានឹងធ្វើឱ្យថ្លៃដើមនៃផែនការគ្រួសារនៅក្នុងប្រទេសកាន់តែធ្ងន់ធ្ងរឡើង។ បន្ទុកនេះកាន់តែធ្ងន់ទៅៗ នៅពេលដែលនៅដើមឆ្នាំនេះ ប្រទេសចិន បានលុបចោលគោលនយោបាយលើកលែងពន្ធរយៈពេលបីទសវត្សរ៍ សម្រាប់ផលិតផលពន្យារកំណើត។ ស្រោមអនាម័យ និងថ្នាំគ្រាប់ពន្យារកំណើតឥឡូវនេះត្រូវជាប់ពន្ធ លើតម្លៃបន្ថែម 13% ដូចគ្នានឹងទំនិញប្រើប្រាស់ផ្សេងទៀតដែរ។បច្ចុប្បន្ននេះ ក្រុមហ៊ុន Karex ដែលជាក្រុមហ៊ុនផលិតស្រោមអនាម័យជាង ៥ ពាន់លានស្រោមជារៀងរាល់ឆ្នាំ កំពុងតាមដានស្ថានការណ៍យ៉ាងដិតដល់។ ទន្ទឹមនឹងនេះ ក្រុមហ៊ុន Reckitt (ម្ចាស់ម៉ាក Durex) មិនទាន់បានចេញការឆ្លើយតបជាផ្លូវការទាក់ទងនឹងផលប៉ះពាល់តម្លៃនៅក្នុងទីផ្សារចិននៅឡើយទេ។

(ភូមិភាគឦសាន្ត)៖ បណ្ដាខេត្តចំនួន ៤ ដែលស្ថិតនៅភូមិភាគឦសាន្ត នៃប្រទេសកម្ពុជា មានឱកាសការងារជាង ៤ពាន់កន្លែង សម្រាប់ផ្ដល់ជូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ។ នេះបើតាមក្រសួងការងារ និងបណ្ដុះបណ្ដាលវិជ្ជាជីវៈដែលបានផ្សព្វផ្សាយកាលពីពេលថ្មីៗនេះ។សេចក្ដីជូនដំណឹងរបស់ក្រសួងការងារ បានឱ្យដឹងថា គិតត្រឹមថ្ងៃទី២៤ ខែមេសា ឆ្នាំ២០២៦នេះ ខេត្តដែលស្ថិតនៅភូមិភាគឦសាន្ត រួមមាន ខេត្តក្រចេះ ស្ទឹងត្រែង រតនគិរី និងខេត្តមណ្ឌលគិរី មានឱកាសការងារសរុបចំនួន ៤,២១៨កន្លែង កំពុងរង់ចាំបងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើក្នុងវិស័យកសិកម្ម ឧស្សាហកម្ម និងវិស័យសេវាកម្ម។បើតាមក្រសួងការងារ ដើម្បីទទួលបានឱកាសការងារទាំងនោះ បងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ អាចស្វែងរកលេខទំនាក់ទំនង ឈ្មោះរោងចក្រ និងវិស័យដែលខ្លួនពេញចិត្តបានតាមរយៈខិត្តប័ណ្ណការងាររបស់ក្រសួងដែលបានផ្សព្វផ្សាយយ៉ាងលម្អិត។ជាមួយគ្នានេះ ក្រៅពីទំនាក់ទំនងផ្ទាល់ជាមួយក្រុមហ៊ុន សហគ្រាស និងរោងចក្រផ្ទាល់ អ្នកស្វែងរកការងារទាំងអស់ ជាពិសេសបងប្អូនអតីតពលករ ក៏អាចទាក់ទងមកប្រព័ន្ធទំនាក់ទំនងបន្ទាន់ ១២៩៧ ដើម្បីឱ្យក្រសួងការងារ និងបណ្ដុះបណ្ដាលវិជ្ជាជីវៈ ជួយសម្របសម្រួលស្វែងរកការងារជូនផងដែរ៕

(ភ្នំពេញ)៖ នៅបណ្ដាខេត្តដែលមានសក្ដានុពលចំនួន៣ រួមមាន ខេត្តតាកែវ កំពង់ស្ពឺ និងខេត្តកណ្ដាល មានឱកាសការងារជាង ៤ម៉ឺនកន្លែង សម្រាប់ផ្ដល់ជូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ។ នេះបើតាមឱ្យដឹងពីក្រសួងការងារ និងបណ្ដុះបណ្ដាលវិជ្ជាជីវៈដែលបានផ្សព្វផ្សាយកាលពីពេលថ្មីៗនេះ។ តាមរយៈការផ្សព្វផ្សាយ ក្រសួងការងារ បានឱ្យដឹងថា គិតត្រឹមថ្ងៃទី២៤ ខែមេសា ឆ្នាំ២០២៦នេះ ខេត្តតាកែវ កំពង់ស្ពឺ និងខេត្តកណ្ដាលមានឱកាសការងារសរុបចំនួន ៤១,៦៤៨កន្លែង កំពុងរង់ចាំបងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើនៅក្នុងវិស័យឧស្សាហកម្ម និងវិស័យសេវាកម្ម។ ដើម្បីទទួលបានឱកាសការងារទាំងនោះ បងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ អាចស្វែងរកលេខទំនាក់ទំនង ឈ្មោះរោងចក្រ និងវិស័យដែលខ្លួនពេញចិត្តបានតាមរយៈខិត្តប័ណ្ណការងាររបស់ក្រសួងដែលបានផ្សព្វផ្សាយយ៉ាងលម្អិត។ ជាមួយគ្នានេះ ក្រៅពីទំនាក់ទំនងផ្ទាល់ជាមួយរោងចក្រ សហគ្រាស និងរោងចក្រផ្ទាល់ អ្នកស្វែងរកការងារទាំងអស់ ជាពិសេសបងប្អូនអតីតពលករ ក៏អាចទាក់ទងមកប្រព័ន្ធទំនាក់ទំនងបន្ទាន់ ១២៩៧ ដើម្បីឱ្យក្រសួងការងារជួយសម្របសម្រួលស្វែងរកការងារជូនផងដែរ។ នេះបើតាមក្រសួងការងារដដែល៕

(ភ្នំពេញ)៖ បណ្ដាខេត្តដែលមានសក្ដានុពលនៅតំបន់សមុទ្រចំនួន៤ រួមមាន ខេត្តព្រះសីហនុ កំពត កោះកុង និងខេត្តកែប មានឱកាសការងារជាង ៥ពាន់កន្លែង សម្រាប់ផ្ដល់ជូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ។ នេះបើតាមឱ្យដឹងពីក្រសួងការងារ និងបណ្ដុះបណ្ដាលវិជ្ជាជីវៈដែលបានផ្សព្វផ្សាយកាលពីពេលថ្មីៗនេះ។ តាមរយៈការផ្សព្វផ្សាយ ក្រសួងការងារ បានឱ្យដឹងថា គិតត្រឹមថ្ងៃទី២៤ ខែមេសា ឆ្នាំ២០២៦នេះ ខេត្តព្រះសីហនុ កំពត កោះកុង និងខេត្តកែប មានឱកាសការងារសរុបចំនួន ៥,៤៨៦កន្លែង កំពុងរង់ចាំបងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើនៅក្នុងវិស័យឧស្សាហកម្ម និងវិស័យសេវាកម្ម។ ដើម្បីទទួលបានឱកាសការងារទាំងនោះ បងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ អាចស្វែងរកលេខទំនាក់ទំនង ឈ្មោះរោងចក្រ និងវិស័យដែលខ្លួនពេញចិត្តបានតាមរយៈខិត្តប័ណ្ណការងាររបស់ក្រសួងដែលបានផ្សព្វផ្សាយយ៉ាងលម្អិត។ ជាមួយគ្នានេះ ក្រៅពីទំនាក់ទំនងផ្ទាល់ជាមួយរោងចក្រ សហគ្រាស និងរោងចក្រផ្ទាល់ អ្នកស្វែងរកការងារទាំងអស់ ជាពិសេសបងប្អូនអតីតពលករ ក៏អាចទាក់ទងមកប្រព័ន្ធទំនាក់ទំនងបន្ទាន់ ១២៩៧ ដើម្បីឱ្យក្រសួងការងារជួយសម្របសម្រួលស្វែងរកការងារជូនផងដែរ។ នេះបើតាមក្រសួងការងារដដែល៕

(ភ្នំពេញ)៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានទទួលជួបសម្ដែងការគួរសម និងពិភាក្សាការងារជាមួយលោក ចាង តាន់យ៉ាង (Zhang Danyang) សាកលវិទ្យាធិការ និងគណៈប្រតិភូនៃសាកលវិទ្យាល័យវិទ្យាសាស្រ្តចិន-អាល្លឺម៉ង់ ទីក្រុងធានជីង (Tianjin Sino-German University of Applied Sciences-TSGUAS) នារសៀលថ្ងៃទី២៤ ខែមេសា ឆ្នាំ២០២៦ នៅទីស្តីការក្រសួង ដើម្បីធ្វើបច្ចុប្បន្នភាពពីវឌ្ឍនភាពនៃកិច្ចសហប្រតិបត្តិការកន្លងមក ក៏ដូចជា ផ្លាស់ប្តូរយោបល់ក្នុងការពង្រីកកិច្ចសហប្រតិបត្តិការថ្មីៗបន្ថែមទៀត ជាពិសេសលើការអភិវឌ្ឍជំនាញបច្ចេកវិទ្យាលើផ្នែកបញ្ញាសិប្បនិមិ្មត (AI)។ក្នុងឱកាសនោះ ឯកឧត្តមរដ្ឋមន្ត្រីបានស្វាគមន៍យ៉ាងកក់ក្តៅចំពោះលោក ចាង តាន់យ៉ាង និងគណៈប្រតិភូ ដែលបានមកបំពេញទស្សនកិច្ច ក៏ដូចជាថ្លែងអំណរគុណ និងវាយតម្លៃខ្ពស់ចំពោះសមិទ្ធផលនៃកិច្ចសហប្រតិបត្តិការរវាងសាកលវិទ្យាល័យ TSGUAS និងវិទ្យាស្ថានជាតិពហុបច្ចេកទេសកម្ពុជា (NPIC) នៃក្រសួងការងារនិងបណ្តុះបណ្តាលវិជ្ជាជីវៈ តាមរយៈការចុះ MoU កាលពីឆ្នាំ២០១៦ កន្លងមក ដែលបាននាំមកនូវឧបករណ៍បច្ចេកទេសទំនើបៗ, ការដាក់ឱ្យដំណើរការមជ្ឈមណ្ឌលអប់រំបណ្តុះបណ្តាលមេគង្គ-ឡាងឆាង និងការនាំយកជំនាញបច្ចេកវិទ្យាមេកានិក, បច្ចេកវិទ្យាអគ្គិសនី, បច្ចេកវិទ្យាទូរគមនាគមន៍ ព្រមទាំងការអភិវឌ្ឍសមត្ថភាពគ្រូបណ្តុះបណ្តាល និងមេរៀនជាច្រើន។ទន្ទឹមនឹងនេះ ឯកឧត្តមរដ្ឋមន្ត្រីបានសង្កត់ធ្ងន់ថា កិច្ចសហប្រតិបត្តិការនេះគឺជាសក្ខីភាពនៃចំណងមិត្តភាពដ៏រឹងមាំរវាងកម្ពុជា និងចិន ក្នុងក្របខណ្ឌនៃគំនិតផ្តួចផ្តើម "ខ្សែក្រវាត់ និងផ្លូវ" ដែលបង្ហាញពីការប្តេជ្ញាចិត្តរួមគ្នាក្នុងការលើកកម្ពស់ការអភិវឌ្ឍធនធានមនុស្ស ហេដ្ឋារចនាសម្ព័ន្ធ និងសេដ្ឋកិច្ចកម្ពុជាប្រកបដោយចីរភាព។ ជាមួយគ្នានេះ ឯកឧត្តមក៏បានចាត់ទុកជំនួបពិភាក្សានាពេលនេះថា ជាកាលានុវត្តភាពដ៏សំខាន់ក្នុងការបន្តពង្រឹង និងពង្រីកវិសាលភាពនៃកិច្ចសហប្រតិបត្តិការរវាងភាគីទាំងពីរ ឱ្យកាន់តែស៊ីជម្រៅ និងគ្រប់ជ្រុងជ្រោយបន្ថែមទៀត។ជាការឆ្លើយតប លោក ចាង តាន់យ៉ាង បានថ្លែងអំណរគុណយ៉ាងជ្រាលជ្រៅចំពោះឯកឧត្តមរដ្ឋមន្រ្តី ដែលបានចំណាយពេលវេលាដ៏មានតម្លៃក្នុងការពិភាក្សាផ្លាស់ប្តូរយោបល់ប្រកបដោយផ្លែផ្កា ព្រមទាំងបានបង្ហាញពីយុទ្ធសាស្រ្តការងារប្រកបដោយចក្ខុវិស័យវែងឆ្ងាយក្នុងការអភិវឌ្ឍធនធានមនុស្សនៅកម្ពុជា។ លោកបានរំលឹកពីប្រវត្តិនៃការបង្កើតសាកលវិទ្យាល័យ TSGUAS ដែលបានសហប្រតិបត្តិការជាមួយប្រទេសជឿនលឿនដូចជាអាល្លឺម៉ង់ រហូតបានក្លាយទៅសាកលវិទ្យាល័យដ៏សំខាន់ឈានមុខគេក្នុងការបណ្តុះបណ្តាលដល់ប្រទេសផ្សេងៗ ព្រមទាំងបានកោតសរសើរពីកិច្ចសហប្រតិបត្តិការក្នុងរយៈពេល១០ឆ្នាំមកនេះជាមួយនឹងNPIC ផងដែរ។ចំពោះកិច្ចសហការជំហានបន្ទាប់ សាកលវិទ្យាល័យ TSGUAS មានគម្រោងផ្តល់ការបណ្តុះបណ្តាល និងចែករំលែកបទពិសោធលើផ្នែក AI និងបច្ចេកវិទ្យាថ្មីៗផ្សេងទៀតជាមួយនឹង NPIC ដោយមិនគិតថ្លៃ និងបង្កើតមេរៀនរួមគ្នាលើផ្នៃក AI ឱ្យមានស្តង់ដាខ្ពស់ស្របតាមគោលការណ៍ក្រសួងការងារ និង NPIC ប្រកបដោយភាពជោគជ័យ ដើម្បីក្លាយជា «គំរូ» ដល់សាកលវិទ្យាល័យផ្សេងៗទៀតនៅកម្ពុជា។ ម្យ៉ាងវិញទៀត លោក ចាង តាន់យ៉ាង ក៏បានផ្តួចផ្តើម «បង្កើតសម្ព័ន្ធភាព»មួយលើការអភិវឌ្ឍមេរៀនផ្នែក AI កម្រិតថ្នាក់ជាតិផងដែរ ដើម្បីទាក់ទាញបណ្តាសាកលវិទ្យាល័យនានាឱ្យចូលរួមសហការ សំដៅជំរុញ និងពង្រីកគំរូនៃកិច្ចសហប្រតិបត្តិការនេះ ទៅកាន់បណ្តាប្រទេសផ្សេងៗនៅក្នុងតំបន់ទន្លេមេគង្គបន្ថែមទៀតផងដែរ។ឯកឧត្តម ហេង សួរ បានគាំទ្រយ៉ាងពេញទំហឹងចំពោះគំនិតផ្តួចផ្តើមទាំងនេះ ដោយសង្ឃឹមថា សាកលវិទ្យាល័យ TSGUAS នឹងសម្រាំងយកនូវរាល់ចំណុចសំខាន់ៗនៃមេរៀន ដើម្បីយកមកបង្រៀនសិស្សកម្ពុជាឱ្យចេះក្នុងរយៈពេលខ្លី លើផ្នែកវិទ្យាសាស្រ្ត និងច្ចេកទេសថ្មីៗ។ ឯកឧត្តមមានប្រសាសន៍ថា កម្ពុជាចង់ក្លាយទៅជាប្រទេសឈានមុខ ឬជាមជ្ឈមណ្ឌលមួយដែលអាចចែករំលែកបទពិសោធ និងចំណេះដឹងទៅបណ្តាប្រទេសក្នុងតំបន់ផងដែរ ស្របពេលច្ចុប្បននេះ AI បានក្លាយជាឧបករណ៍ដ៏ចាំបាច់បំផុត ដែលដើរតួនាទីយ៉ាងសំខាន់លើគ្រប់មុខជំនាញ និងវិជ្ជាជីវៈ ចាប់តាំងពីខ្សែច្រវាក់ផលិតកម្ម រហូតដល់វិស័យកសិកម្ម។  ឯកឧត្តម ហេង សួរ ក៏បានអរគុណចំពោះសាកលវិទ្យាល័យ TSGUAS សម្រាប់កិច្ចខិតខំប្រឹងប្រែង និងស្មារតីសហការយ៉ាងសកម្មក្នុងកិច្ចសហប្រតិបត្តិការបណ្តុះបណ្តាលជំនាញបច្ចេកទេសកន្លងមក ប្រកបដោយផ្លែផ្កាគួរជាទីមោទនៈ។ តាមរយៈជំនួបដ៏មានសារៈសំខាន់ និងមានចក្ខុវិស័យដ៏វែងឆ្ងាយនេះ ភាគីទាំងពីរមានការជឿជាក់យ៉ាងមុតមាំថា សាកលវិទ្យាល័យ TSGUAS និង NPIC នឹងបន្តពង្រឹងនិងពង្រីកកិច្ចសហប្រតិបត្តិការឱ្យកាន់តែស្អិតរមួតបន្ថែមទៀត ដើម្បីជំរុញសន្ទុះនៃការបណ្តុះបណ្តាលសិស្សឱ្យកាន់តែច្រើនសម្រាប់បំពេញតម្រូវការទីផ្សារ៕

(ភ្នំពេញ)៖ ដោយអនុវត្តតាមអនុសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជា និងដើម្បីចូលរួមអភិវឌ្ឍជំនាញ ក៏ដូចជាលើកទឹកចិត្តដល់អតីតពលករមកពីប្រទេសថៃ ឱ្យទទួលបានការទទួលស្គាល់ជំនាញជាផ្លូវការ ក្រសួងការងារនិងបណ្តុះបណ្តាលវិជ្ជាជីវៈ នាព្រឹកថ្ងៃទី២៤ ខែមេសា ឆ្នាំ២០២៦នេះ បានប្រកាសដាក់ឱ្យអនុវត្ត”ការទទួលស្គាល់ជំនាញពីមុន (RPL) របស់បងប្អូនអតីតពលករខ្មែរមកពីប្រទេសថៃ” ដោយរាជរដ្ឋាភិបាលជាអ្នកបង់ថ្លៃធ្វើតេស្ដជំនួសបងប្អូន ដើម្បីទទួលបានវិញ្ញាបនបត្រជំនាញផ្លូវការ។ ការធ្វើតេស្តជំហានទី១នេះ ត្រូវបានធ្វើឡើងនៅតាមរាជធានី ខេត្ត នៃគោលដៅចំនួនទាំង៦ (រាជធានីភ្នំពេញ, បាត់ដំបង, បន្ទាយមានជ័យ, សៀមរាប, តាកែវ និងស្វាយរៀង) ហើយកម្មវិធីនេះត្រូវបានប្រកាសដាក់ឱ្យអនុវត្តចាប់ពីថ្ងៃទី២៤ ខែមេសា ឆ្នាំ២០២៦ នេះតទៅ នៅសួនអប់រំបណ្ដុះបណ្ដាលបច្ចេកទេស និងវិជ្ជាជីវៈរាជធានីភ្នំពេញ(ទឹកថ្លា) ដោយមានការចូលរួមពីសំណាក់ថ្នាក់ដឹកនាំក្រសួង តំណាងក្រុមហ៊ុនសហគ្រាសក្នុងវិស័យសំណង់ អង្គការ និងដៃគូអភិវឌ្ឍន៍ រួមទាំងអ្នកពាក់ព័ន្ធជាច្រើនរូបទៀត។ឯកឧត្តម ប៉ុក ប៉ាន់ រដ្ឋលេខាធិការ និងជាតំណាងដ៏ខ្ពង់ខ្ពស់របស់ឯកឧត្តម ហេង សួរ រដ្ឋមន្ដ្រីក្រសួងការងារនិងបណ្ដុះបណ្ដាលវិជ្ជាជីវៈ បានពិនិត្យដោយផ្ទាល់នូវការធ្វើតេស្តទទួលស្គាល់ជំនាញពីមុន (RPL) និងបានណែនាំដល់បេក្ខជនទាំងអស់ឱ្យខិតខំប្រឹងប្រែងឱ្យអស់ពីសមត្ថភាព និងគោរពតាមលក្ខខណ្ឌនៃការធ្វើតេស្ត ដើម្បីទទួលបានជ័យលាភី។ ការធ្វើតេស្តនេះមានគោលបំណងសំខាន់ក្នុងការប្រែក្លាយបទពិសោធការងារ និងចំណេះជំនាញដែលបងប្អូនទទួលបានពីការអនុវត្តជាក់ស្តែងនៅក្រៅប្រទេស ឱ្យក្លាយទៅជាលិខិតទទួលស្គាល់ជំនាញផ្លូវការ ដែលអាចយកទៅប្រើប្រាស់ក្នុងការស្វែងរកឱកាសការងារល្អៗ និងទទួលបានប្រាក់ចំណូលខ្ពស់ជាងមុន។ ចាប់ពីថ្ងៃទី២៤ ខែមេសា ឆ្នាំ២០២៦ តទៅ រាជរដ្ឋាភិបាលនឹងបង់ថ្លៃសេវាធ្វើតេស្ត RPL ជំនួសបងប្អូនលើមុខជំនាញចំនួន ៨ ក្នុងវិស័យសំណង់ រួមមាន ការងារកំបោរ (រៀបឥដ្ឋ និងបូក) ការងារការ៉ូ ការដំឡើងពុម្ព ការដំឡើងបណ្តាញបំពង់ទឹក ការដំឡើងបណ្តាញអគ្គិសនីក្នុងអគារ ការងាររន្ទា ការដំឡើងសរសៃដែក និងការផ្សារអគ្គិសនី។ចំពោះដំណើរការធ្វើតេស្ត RPL ជាក់ស្តែង នាថ្ងៃទី២៤នេះ មានបេក្ខជនចូលរួមធ្វើតេស្តសរុបចំនួន ១៤៩រូប ហើយការធ្វើតេស្តនេះ មានការចូលរួមពីអ្នកវាយតម្លៃសមត្ថភាពសរុបចំនួន ៧៥ រូប មកពីវិស័យឯកជន និងប្រព្រឹត្តទៅប្រកបដោយភាពរលូន តាមស្តង់ដាបច្ចេកទេសដែលបានកំណត់ ដើម្បីធានាបាននូវតម្លាភាព ប្រសិទ្ធភាព និងភាពជឿជាក់ពីគ្រប់ភាគីពាក់ព័ន្ធ។ជាលទ្ធផល បេក្ខជនធ្វើតេស្តសរុបចំនួន១៤៩រូប ក្នុងនោះបេក្ខជនចំនួន ១៣៦ រូប ទទួលបានវិញ្ញាបនបត្រគុណវុឌ្ឍិជំនាញ និងបេក្ខជនចំនួន ១៣ រូប ទទួលបានលិខិតបញ្ជាក់ក្រេឌីត។

(ភ្នំពេញ)៖ សូមស៊ែបន្ត ដើម្បីបង្ហាញថា ប្រជាជនខ្មែរ មិនភ្លេចវីរៈកងទ័ពយើងឡើយ! លើកនេះមេឃក្ដៅកាន់តែខ្លាំង ប៊ូសស្រ្តងកាន់តែជួយខ្លាំង ដោយផ្ដល់ស៊ីទែនទឹកស្អាត សរុបដល់ទៅ 50ម៉ឺនលីត្រជូនវីរៈកងទ័ពជួរមុខ។ ប៊ូសស្រ្តងជួយមិនឈប់ទេ តែងតែនៅក្បែរវីរៈកងទ័ពគ្រប់កាលៈទេសៈជានិច្ច។ ជាក់ស្ដែង បន្ទាប់ពីចប់ចូលឆ្នាំខ្មែរ អាកាសធាតុក្ដៅខ្លាំងពេក ស្របពេលដែលលោកគ្រីស តំណាងក្រុមហ៊ុនប៊ូសស្រ្តង បានឃើញការបង្ហោះមួយ អំពីសកម្មភាពវីរៈកងទ័ពមានតម្រូវការទឹកប្រើប្រាស់បន្ថែម ក៏សម្រេចចិត្តប្រកាសឧបត្ថម្ភទឹកស្អាត 50ម៉ឺនលីត្រ ដោយត្រៀមដឹកជញ្ជូនស៉ីទែនទឹកស្អាតជូនដល់វីរៈកងទ័ពផ្ទាល់ដៃ។ នេះមិនមែនគ្រាន់តែជាការផ្ដល់ទឹកពិសារប៉ុណ្ណោះទេ តែជាការផ្ដល់កម្លាំងចិត្ត ក្ដីគោរព និងការដឹងគុណ ជំនួសមុខឱ្យប្រជាជនខ្មែរទាំងអស់ ទៅកាន់វីរៈកងទ័ព ដែលបានឈរជើងការពារជាតិមាតុភូមិឱ្យមានសុខសន្តិភាព។ បន្ថែមពីនេះ! ប៊ូសស្រ្តងក៏ភ្ជាប់ជាមួយនឹងភេសជ្ជៈប៉ូវកម្លាំងកំប៉ុងថ្មី Super Boostrong, Super ជាតិ ផងដែរ ដើម្បីជួយបន្ថែមកម្លាំងថាមពល និងជំរុញទឹកចិត្តវីរៈកងទ័ពរបស់យើង មិនឱ្យមានអារម្មណ៍ឯកោឡើយ។ញុំា Super ប៊ូសស្រ្តងមួយកំប៉ុង ដូចបានជួយវីរៈកងទ័ពមួយចំណែក!  

(ភ្នំពេញ)៖ ឯកឧត្តម ហ៊ុន​​ ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ក្នុងពិធីជួបសំណេះសំណាលជាមួយថ្នាក់ដឹកនាំ សមាជិក សមាជិកា ក្រុមការងារសហភាពសហព័ន្ធយុវជនកម្ពុជា គ៧៨ កាលពីទី២៤ ខែមេសា ឆ្នាំ២០២៦ បានមានប្រសាសន៍ថា ​នាប៉ុន្មានឆ្នាំមកនេះ កម្ពុជាជាទីស្រឡាញ់របស់យើង បានឆ្លងកាត់រឿងរ៉ាវច្រើនជាបន្តបន្ទាប់ និងកត្តាជះពីខាងក្រៅក្នុងបរិការណ៍សកល និងសណ្តាប់ធ្នាប់អន្តរជាតិ ដែលប្រែប្រួលមិនប្រាកប្រជា។ អ្វីដែលកើតឡើងកន្លងមក គឺជាអ្វីដែលយើងត្រូវសញ្ជឹងឆ្លុះបញ្ចាំងទាំងអស់គ្នាថា តើយើងនៅចង់គិតជាលក្ខណៈបុគ្គលម្នាក់ៗដាច់ដោយឡែក ឬយើងចង់ស្វែងរកចំណុចរួម ដើម្បីដើររួមគ្នាជាឆ្លុងមួយដ៏រឹងមាំសម្រាប់មាតុភូមិកម្ពុជា?សម្រាប់ខ្ញុំ ចេញពីអ្វីដែលកើតឡើងផ្ទួនៗ រាប់ទាំងជំងឺរាតត្បាតកូវីដ១៩ ហើយចុងក្រោយការឈ្លានពាន និងភាពអយុត្តិធម៌ ដែលកម្ពុជាក្នុងនាមជាប្រទេសអធិបតេយ្យ បានទទួលរងនៅក្នុងឆ្នាំ២០២៥ បង្ហាញឱ្យឃើញយ៉ាងច្បាស់ថា ហានិភ័យដែលអាចឈានទៅរកការបាត់បង់សុខសន្តិភាព ស្ថិរភាពនយោបាយ និងប៉ះពាល់ផ្ទាល់ដល់ជីវភាពរស់នៅអាចកើតឡើងគ្រប់ពេលវេលាទាំងអស់។ ខ្ញុំចងចាំជានិច្ចនូវព្រះរាជបណ្តាំ សម្តេចតា ព្រះបរមរតនកោដ្ឋ “ខ្មែររួបរួម ខ្មែរខ្លាំង”។ មេរៀនប្រវត្តិសាស្ត្រក៏បានរំឭកយើងថា ប្រសិនបើខ្មែរខ្វះសាមគ្គីភាព នោះជាការបើកឱកាសឱ្យមានជ្រៀតជ្រែកពីខាងក្រៅ។ ផ្ទុយទៅវិញ បើយើងរួមគ្នាកសាងសាមគ្គីភាពផ្ទៃក្នុង ស្មារតីឯកភាពជាតិ អត្តសញ្ញាណជាតិឱ្យបានរឹងមាំ និងហ៊ានលះបង់តស៊ូ ដើម្បីជាតិ យើងនឹងអាចបិទច្រកមិនឱ្យមានការលូកដៃពីខាងក្រៅបាន ហើយនេះគឺជាកាតព្វកិច្ចរបស់កូនខ្មែរគ្រប់រូប ដាច់ខាតមិនត្រូវបណ្តោយឱ្យមានការបែកបាក់ឡើយ។មេរៀនទាំងអស់នេះ បានដាស់តឿនយ៉ាងច្បាស់ថា យើងត្រូវគិតលើសពីបុគ្គលម្នាក់ៗ ស្វែងរកចំណុចរួមឱ្យច្រើន ហើយត្រូវខិតខំប្រឹងប្រែងរឹងមាំដោយខ្លួនឯង។ ទោះកាលៈទេសៈណាក៏ដោយ ដំណើរការនៃសង្គមជាតិរបស់យើងត្រូវតែទៅមុខ ហើយយើងម្នាក់ៗគឺជាចំណែកមួយក្នុងការរុញច្រាននាវាកម្ពុជាទៅមុខយ៉ាងស្វាហាប់។ ពេលវេលាកាន់តែលំបាក យើងកាន់តែត្រូវរួមគ្នា ដើរទៅមុខដោយភាពមោះមុត និងគិតគូរគ្រប់ជ្រុងជ្រោយ។ ក្នុងស្មារតីនេះ យើងត្រូវតែប្រកាន់ខ្ជាប់នូវស្មារតីម្ចាស់ការលើខ្លួនឯង ពង្រឹងសាមគ្គីភាព ឯកភាពជាតិ សមត្ថភាព និងភាពធន់របស់ជាតិ។គ្រប់ពេលវេលា ស្មារតីរបស់យើង នៅជាមួយជាតិ វីរកងកម្លាំងជួរមុខ និងបងប្អូនជនភៀសសឹកជានិច្ច។