អាជ្ញាធរខេត្តកំពតសន្យាដាក់លូបង្ហូរទឹកសងខាងផ្លូវប្រវែង ៥០០ម៉ែត្រជូនអ្នកភូមិត្រពាំងធំ ឃុំត្រពាំងធំ ស្រុកទឹកឈូ

(កំពត)៖ ដើម្បីឆ្លើយតបតាមការសំណូមពររបស់បងប្អូនប្រជាពលរដ្ឋ អាជ្ញាធរខេត្តកំពតសន្យាដាក់លូបង្ហូរទឹកមុខកាត់ ០,៦០ម៉ែត្រនៅសងខាងផ្លូវប្រវែង ៥០០ម៉ែត្រជូនអ្នកភូមិត្រពាំងធំ ឃុំត្រពាំងធំ ស្រុកទឹកឈូ នៅអំឡុងខែមករា ឆ្នាំ២០២០ខាងមុខ។

ការបន្យាដោះស្រាយបញ្ហាលូបង្ហូរទឹកនៅសងខាងផ្លូវជូនបងប្អូនប្រជាពលរដ្ឋខាងលើ បានធ្វើឡើងនៅក្នុង វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកំពត ដែលបានរៀបចំកាលពីថ្ងៃទី១៨ ខែវិច្ឆិកា ឆ្នាំ២០១៩នេះ នៅសាលប្រជុំសាលាស្រុកទឹកឈូ ក្រោម​អធិបតី​ភាពឯកឧត្ដម ជឹង ផល្លា ប្រធានក្រុមប្រឹក្សាខេត្តកំពត និងឯកឧត្តម ជាវ តាយ អភិបាលខេត្តកំពត។

ក្រៅពីបញ្ហាខាងលើនេះ បងប្អូនប្រជាពលរដ្ឋក៏បានលើកឡើងនូវបញ្ហាជាច្រើន ដើម្បីជូនអាជ្ញាធរខេត្តដោះស្រាយផងដែរ រួមមាន បញ្ហាកង្វះខាតអគ្គិសនីប្រើប្រាស់ និងបញ្ហា​ហេដ្ឋារចនាសម្ព័ន្ធជាដើម។

ជាការឆ្លើយតប ឯកឧត្ដម ជាវ តាយ អភិបាលខេត្តកំពត​ បានណែនាំឲ្យរដ្ឋបាលស្រុកទឹកឈូ សហការជាមួយមន្ត្រីជំនាញ​ចុះពិនិត្យស្ថានភាពជាក់ស្តែង ដើម្បីរកដំណោះស្រាយជូនបងប្អូនប្រជាពលរដ្ឋ និងរាយការណ៍ជូនក្រុមប្រឹក្សាខេត្ត និងគណៈអភិបាលខេត្ត រយៈ​ពេលយ៉ាងយូរ ១៥ថ្ងៃ៕
(SWIFT NEWS ឡុក សំរិត)
ប្រភព៖ រដ្ឋបាលខេត្តកំពត

appstore-300x83  googleplay-300x83

អត្ថបទដែលជាប់ទាក់ទង