តុលាការពន្យាពេលប្រកាសសាលក្រមសំណុំរឿង អតីតបុគ្គលិក វិទ្យុអាស៊ីសេរី ទៅថ្ងៃក្រោយដោយសារចៅក្រមរវល់ប្រជុំនៅក្រសួងយុត្តិធម៌

(ភ្នំពេញ)៖ មិនដូចជាការគ្រោងទុក នៅព្រឹកថ្ងៃទី៣០ ខែសីហា ឆ្នាំ២០១៩នេះ អ៊ឹម វណ្ណៈ ជាប្រធានក្រុមប្រឹក្សាចៅក្រមជំនុំជម្រះ នៃសាលាដំបូងរាជធានីភ្នំពេញ នៅពុំទាន់អាចបើកសវនាការប្រកាសសាលក្រមសំណុំរឿង របស់អតីតបុគ្គលិកវិទ្យុអាស៊ីសេរី ២នាក់ ពាក់ព័ន្ធរឿង លួចផ្តល់ព័ត៌មានឲ្យបរទេស និងផលិតវីដេអូអាសអាភាស នៅឡើយទេ ដោយសម្រេចលើកពេលទីថ្ងៃក្រោយ។

មូលហេតុដែល តុលាការសម្រេចលើកពេលនេះ ព្រោះតែចៅក្រមជំនុំជម្រះ រវល់ចូលរួមប្រជុំនៅក្រសួងយុត្តិធម៌។

ចំពោះវេលាជាក់លាក់ នៃការប្រកាសសាលក្រមសំណុំរឿងនេះ នៅថ្ងៃខាងមុខ តុលាការនឹងជម្រាបជូនដំណឹងដល់ជនជាប់ចោទនាពេលក្រោយ។

សូមជម្រាបជូនថា លោក អួន ឈិន និងលោក យាង សុធារិន ហៅ យាង សុជាមេត្តា អតីតបុគ្គលិក របស់វិទ្យុអាស៊ីសេរី (RFA) ត្រូវបាន តុលាការចោទប្រកាន់ពីបទ ប្រគល់ឲ្យរដ្ឋបរទេស នូវព័ត៌មានជាអាទិ៍ដែលអាចធ្វើឲ្យអន្តរាយការ ការពារជាតិ យោងតាមមាត្រា ៤៤៥ នៃក្រមព្រហ្មទណ្ឌ និងបទ ផលិតវីដេអូអាសអាភាសច្បាប់ យោងតាមមាត្រា ៣៩ នៃច្បាប់ស្តីពី ការ បង្រ្កាប អំពើជួញដូរមនុស្ស និងអំពើធ្វើអាជីវកម្មផ្លូវភេទ។

នៅក្នុងសវនាការ ចំនួន ២លើកកាលពីពេលកន្លងទៅ ជនជាប់ចោទ ទាំង ២នាក់ បដិសេធថា ពួកគេមិនបានប្រព្រឹត្តដូចការចោទប្រកាន់របស់តុលាការនោះទេ និងបានស្នើសុំឲ្យតុលាការទម្លាក់ការចោទប្រកាន់ចោល ដើម្បីឲ្យពួកគេមានសេរីភាពដូចកាលគ្រាមុន។

គួររំលឹកថា លោក អួន ឈិន និងលោក យាង សុធារិន ហៅ យាង សុជាមេត្តា អតីតបុគ្គលិក របស់វិទ្យុអាស៊ីសេរី (RFA) ត្រូវបាន សមត្ថកិច្ចឃាត់ខ្លួន កាលពីយប់ថ្ងៃទី១៤ ខែវិច្ឆិកា ឆ្នាំ២០១៧កន្លងទៅ នៅក្នុងបន្ទប់សណ្ឋាគារ ម៉ារឌី ស្ថិត នៅក្បែរស្ពានអាកាសស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

បន្ទាប់ពីចាប់ខ្លួន និងកសាងសំណុំរឿងបញ្ជូនទៅតុលាការ ជនជាប់ចោទទាំង ២នាក់ខាងលើ ត្រូវតុលាការចេញដីកាឃុំខ្លួនជាបណ្តោះអាសន្ននៅពន្ធនាគារព្រៃ សម១ កាលពីរសៀលថ្ងៃទី១៨ ខែកុម្ភៈ ឆ្នាំ២០១៨។

ក្រោយមកនៅថ្ងៃទី២១ ខែសីហា ឆ្នាំ២០១៨ ជនជាប់ចោទទាំង ២នាក់ត្រូវបានតុលាការដោះលែងឲ្យមានសេរីភាពជាបណ្តោះអាសន្នវិញ៕(ឡុក សំរិត)

អត្ថបទដែលជាប់ទាក់ទង
WP2Social Auto Publish Powered By : XYZScripts.com