កូនសិស្ស​សាលា ២​នាក់ ស្លាប់នៅកន្លែងកើតហេតុ និងក្មេងប្រុស-ស្រី ៣នាក់ទៀត រងរបួសធ្ងន់

(​ព្រះ​សីហ​នុ)​៖​ ក្មេង​ប្រុស​២​នាក់​ បាន​ស្លាប់​នៅ​កន្លែង​កើតហេតុ​ និង​ក្មេង​ប្រុស​-​ស្រី​៣​នាក់​ទៀត​រង​របួសធ្ងន់​ ក្នុង​ហេតុការណ៍​គ្រោះថ្នាក់​ចរាចរណ៍​បង្ក​ឡើង​ដោយ​រថយន្ត​ធុន​ធំ​របស់​ក្រុមហ៊ុន​ រាជសីហ៍​ ឡូ​ជី​ស្ទីក​។​ ឧបទ្ទវហេតុ​ដ៏​រន្ធត់​នេះ​បាន​កើតឡើង​ នៅ​ថ្ងៃ​សុក្រ​ ៨​រោច​ ខែ​ស្រាពណ៍​ ឆ្នាំកុរ​ ឯកស័ក​ ព​.​ស​២៥៦៣​ ត្រូវ​នឹង​ថ្ងៃ​ទី​២៣​ ខែសីហា​ ឆ្នាំ​២០១៩​ វេលា​ម៉ោង​១១​នឹង​១០​នាទី​ លើ​ផ្លូវ​ឯករាជ្យ​ ចំណុច​ផ្កាឈូក​វិមាន​ឯករាជ្យ​ ស្ថិត​ក្នុងភូមិ​២​ សង្កាត់​លេខ​៣​ ក្រុង​/​ខេត្ត​ព្រះ​សីហ​នុ​។​

​មន្ត្រី​នគរបាល​ខេត្ត​ព្រះ​សីហ​នុ​ បានឱ្យ​ដឹង​ថា​មុន​ពេល​កើតហេតុ​មាន​រថយន្ត​មួយ​គ្រឿង​ម៉ាក​ HYUNDAI​ ពណ៌​ស​ ពាក់​ស្លាក​លេខ​ ព្រះ​សីហ​នុ​ 3A-2331​ អ្នកបើកបរ​មិន​ស្គាល់​អត្តសញ្ញាណ​ (​រត់គេច​បាត់​ពី​កន្លែង​កើតហេតុ​)​ ចំណែក​រថយន្ត​ជា​កម្ម​សិទ្ធ​របស់​ក្រុមហ៊ុន​ រាជសីហ៍​ ឡូ​ជី​ស្ទីក​ មាន​ទិស​ដៅ​ពី​កើត​ឆ្ពោះទៅ​លិច​លុះ​មក​ដល់​ចំណុច​ខាងលើ​ ផ្លាស់​ប្ដូរ​ទិស​បត់​ឆ្វេង​បុក​នឹង​ម៉ូតូ​ ១​គ្រឿង​ម៉ាក​ HONDA​ WAVE​ ពណ៌​ស្លែ​ គ្មាន​ស្លាក​លេខ​ ជិះ​គ្នា​ចំនួន​០៥​នាក់​ (​ស្រី​១​នាក់​)​ (​កូន​ក្មេង​ទាំងអស់​)​។​
​មន្ត្រី​នគរបាល​ដដែល​បន្ត​ថា​ គ្រោះថ្នាក់​នេះ​បណ្ដាល​ឲ្យ​ស្លាប់​ក្មេង​ប្រុស​០២​នាក់​ នៅ​នឹង​កន្លែង​កើតហេតុ​ និង​រង​របួសធ្ងន់​ក្មេង​០៣​នាក់​ (​ស្រី​១​នាក់​)​ បាន​ដឹក​យក​ទៅ​សង្គ្រោះ​នៅ​មន្ទីរពេទ្យ​បង្អែក​ខេត្ត​ព្រះ​សីហ​នុ​។​

​រីឯ​វត្ថុ​តាង​រថយន្ត​១​គ្រឿង​ និង​ម៉ូតូ​១​គ្រឿង​ សមត្ថកិច្ច​ជំនាញ​យក​មក​រក្សារ​ទុក​នៅ​ការិយាល័យ​នគរបាល​ចរាចរណ៍​ផ្លូវគោក​ នៃ​ស្នងការដ្ឋាន​នគរបាល​ខេត្ត​ព្រះ​សីហ​នុ​ ៕

អត្ថបទដែលជាប់ទាក់ទង
WP2Social Auto Publish Powered By : XYZScripts.com