ថ្ងៃ១៨មិថុនា ឆ្នាំ២០១៩ ព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រី ព្រះវររាជមាតាជាតិខ្មែរ គម្រប់ព្រះជន្ម ៨៣ យាងចូល ៨៤ ព្រះវស្សា
(ភ្នំពេញ)៖ ថ្ងៃទី១៨ ខែមិថុនា ឆ្នាំ១៩៣៦-ថ្ងៃ១៨ ខែមិថុនា ឆ្នាំ២០១៩ នៅថ្ងៃទី១៨ ខែមិថុនានេះ ជាព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ គម្រប់ព្រះជន្ម ៨៣ យាងចូល ៨៤ ព្រះវស្សា។ ជារៀងរាល់ឆ្នាំ នៅថ្ងៃទី១៨ ខែមិថុនា ត្រូវបានរាជរដ្ឋាភិបាល កំណត់ជាបុណ្យជាតិ ដែលជាថ្ងៃឈប់សម្រាក។ ដើម្បីចូលរួមថ្វាយព្រះពរ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ Swift News សូមផ្សាយនូវព្រះរាជជីវប្រវត្តិសង្ខេបរបស់សម្តេចព្រះមហាក្សត្រី នរោត្តម មុនិនាថ សីហនុ ដូចតទៅ៖
សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ទ្រង់ព្រះប្រសូត នៅថ្ងៃទី១៨ ខែមិថុនា ឆ្នាំ១៩៣៦។ ក្រោយពេលព្រះប្រសូត្រ ព្រះអង្គទ្រង់មានព្រះនាមដើមថា «ប៉ូមូនិច អ៊ីស៊ី» ជាបុត្រីរបស់លោក ហ្សង់ហ្វ្រង់ ស្វ័រអ៊ីស៊ី ជនជាតិបារាំង មានដើមកំណើត នៅប្រទេសអ៊ីតាលី និងព្រះមាតា មានព្រះនាម ប៉ុមពាង ជាជនជាតិខ្មែរ និងមានព្រះអនុជមួយព្រះអង្គ មានព្រះនាម អានម៉ារីស អ៊ីស៊ី។ ចំណែកព្រះបិតា បានទទួលមរណភាព ក្នុងកំឡុងសង្គ្រាមលោក លើកទី២។
ក្នុងខែមេសា ឆ្នាំ១៩៥២ សម្តេចព្រះមហាក្សត្រី នរោត្តម មុនិនាថ សីហនុ ព្រះអង្គបានរៀបអភិសេកជាមួយព្រះបាទសម្ដេចព្រះ នរោត្តម សីហនុ ព្រះអតីតព្រះមហាវីរក្សត្រ នៃព្រះរាជាណាចក្រកម្ពុជា (ព្រះបរមរតនកោដ្ឋ)។
ក្រោយអភិសេក ព្រះអង្គទ្រង់ មានព្រះរាជបុត្រា ២ព្រះអង្គ គឺព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាព្រះរាជបុត្រច្បង និងព្រះអង្គម្ចាស់ នរោត្តម នរិន្ទ្រពង្ស ជាព្រះរាជបុត្រពៅ។ ប៉ុន្តែព្រះអនុជ នរោត្តម នរិន្ទ្រពង្ស ទ្រង់បានសោយទិវង្គត កាលពីឆ្នាំ២០០៣ ដោយជំងឺបេះដូង។
ឯកសារបង្ហាញថា កាលពីវ័យកុមារ សម្តេចព្រះមហាក្សត្រី ទ្រង់បានចូលសិក្សានៅសាលាបឋមសិក្សាព្រះនរោត្តម ហើយទ្រង់ បានបន្តការសិក្សា នៅវិទ្យាល័យព្រះស៊ីសុវត្ថិ តែក្រោយមក ព្រះអង្គទ្រង់ ត្រូវបានផ្ទេរទៅសិក្សា នៅវិទ្យាល័យ រ៉ូណេឌីកាត វិញម្ដង ដែលស្ថិតនៅជិតវត្តភ្នំ។
ចំពោះព្រះរាជកិច្ចក្នុងសង្គមវិញនោះ សម្តេចព្រះមហាក្សត្រី ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គលព្រះអង្គធ្លាប់ មានព្រះរាជតួនាទី ជាព្រះប្រធានកាកបាទក្រហមកម្ពុជា ចាប់ទសវត្សឆ្នាំ១៩៦០ ដល់ឆ្នាំ១៩៧០។
សម្តេចព្រះមហាក្សត្រី ព្រះវររាជមាតាជាតិខ្មែរ នាពេលបច្ចុប្បន្ន មានព្រះរាជតួនាទី ជាព្រះប្រធានកិត្តិយស នៃកាកបាទក្រហមកម្ពុជា។ ជាមួយគ្នានេះ សម្តេចព្រះមហាក្សត្រី ទ្រង់តែងតែយាងព្រះរាជទានព្រះរាជទ្រព្យផ្ទាល់របស់ព្រះអង្គ និងអំណោយកាកបាទក្រហម របស់សប្បុរសជន ចែកជូនដល់ប្រជានុរាស្ត្រដែលមកពីតាម បណ្តាខេត្តនានា ដែលបានជួបជុំទទួល នៅក្នុងព្រះបរមរាជវាំង និងកន្លែងផ្សេងៗជាច្រើនទៀត និងមានការអមព្រះរាជកិច្ច ដោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជានិច្ច៕
