ជនសង្ស័យ​ សុំ​រួម​ភេទ​មិន​បាន​ ខឹង​ក៏​ស្ទុះ​ទៅ​យក​ឈើ​ចង្កូតទូក​ វាយ​នារី​រង​គ្រោះ​ដល់​ស្លាប់​

(​កណ្ដាល​)៖​ កម្លាំង​នគរបាល​ការិយាល័យ​ព្រហ្មទណ្ឌ​ នៃ​ស្នងការដ្ឋាន​នគរបាល​ខេត្ដកណ្ដាល​ សហការ​ជាមួយ​កម្លាំង​នគរបាល​ស្រុក​មុខកំពូល​ មុខកំពូល​ ក្រោម​ការ​ចង្អុលបង្ហាញ​របស់​លោក​ឧត្ដមសេនីយ៍ទោ​ អ៊ា​វ​ ចំរើន​ ស្នងការ​នគរបាល​ខេត្ដកណ្ដាល​ស្រាវជ្រាវ​ ស៊ើបអង្កេត​ ករណី​ឃាតកម្ម​ សម្លាប់​នារី​ម្នាក់​នៅ​ស្រុក​មុខកំពូល​ កាលពី​១៣​ថ្ងៃមុន​ រហូត​កំណត់​មុខសញ្ញា​បំបែកសំណុំរឿង​ចាប់ខ្លួន​ជន​ដៃដល់​ជា​ឃាតករ​បាន​ នៅ​ថ្ងៃ​ទី​២១​ ខែមីនា​ ឆ្នាំ​២០១៩​ វេលា​ម៉ោង​១០​និង​០៨​នាទី​ ។​

​ក​ណ្ត​លា​៖​ ជនសង្ស័យ​ម្នាក់​ត្រូវ​បាន​កម្លាំង​នគរបាល​ការិយាល័យ​ព្រហ្មទណ្ឌ​ នៃ​ស្នងការដ្ឋាន​នគរបាល​ខេត្ដកណ្ដាល​ សហការ​ជាមួយ​កម្លាំង​នគរបាល​ស្រុក​មុខកំពូល​ មុខកំពូល​ស្រាវជ្រាវ​ឃាត់ខ្លួន​ ពាក់ព័ន្ធ​ករណី​ឃាតកម្ម​ សម្លាប់​នារី​ម្នាក់​នៅ​ស្រុក​មុខកំពូល​ កាលពី​១៣​ថ្ងៃ​កន្លង​ទៅ​។​

​មន្ត្រី​នគរបាល​ខេត្តកណ្តាល​ បានឱ្យ​ដឹង​ថា​ជនសង្ស័យ​ត្រូវ​បាន​កម្លាំង​ជំនាញ​ចាប់ខ្លួន​កាលពី​ថ្ងៃ​ទី​២១​ ខែមីនា​ ឆ្នាំ​២០១៩​ វេលា​ម៉ោង​១០​និង​០៨​នាទី​។​

​ជនសង្ស័យ​ឈ្មោះ​ អន​ អឿ​ន​ អាយុ​១៨​ឆ្នាំ​ នៅ​ភូមិ​ក្រោលគោ​ ឃុំ​សំបួរមាស​ ស្រុក​មុខកំពូល​ ខេត្តកណ្តាល​ មុខរបរ​ កសិករ​ និង​ រាវ​លាស​។​ ចំណែក​នារី​រង​គ្រោះ​ដែល​ត្រូវ​ជន​ដៃដល់​សម្លាប់​ឈ្មោះ​ នូវ​ ស្រី​លាភ​ អាយុ​១៩​ឆ្នាំ​ ជនជាតិ​ខ្មែរ​ រស់នៅ​ ភូមិ​ព្រែក​ឫស្ស​ ឃុំ​សំបួរមាស​ ស្រុក​មុខកំពូល​។​

​ប្រភព​ដដែល​បន្ដ​ថា​ ក្រោយ​ពី​កម្លាំង​នគរបាល​ទទួល​បាន​ព័ត៌មាន​ករណី​ឃាតកម្ម​សម្លាប់​នារី​រង​គ្រោះ​ខាងលើ​ កាលពី​ថ្ងៃ​ទី​៨​ ខែមីនា​ ឆ្នាំ​២០១៩​ នៅ​វេលា​ម៉ោង​១៣​និង​៤៧​នាទី​ ភ្លាម​នោះ​កម្លាំង​នគរបាល​ជំនាញ​ខេត្ដ​ បាន​សហការ​ជាមួយ​កម្លាំង​នគរបាល​ស្រុក​មុខកំពូល​ ពិនិត្យ​ និង​កោសល្យ​វិ​ច្ច័​យ​សាកសព​នារី​រង​គ្រោះ​ រួច​បញ្ជាក់​ថា​ ការ​ស្លាប់​របស់​នារី​រង​គ្រោះ​គឺជា​អំពើរ​ឃាតកម្ម​។​ បន្ទាប់​ពី​ពិនិត្យ​ចប់​ កម្លាំង​នគរបាល​ជំនាញ​ខេត្ដ​សហការ​ជាមួយ​កម្លាំង​ជំនាញ​ស្រុក​ ដោយ​មានការ​ចង្អុលបង្ហាញ​ពី​លោក​ឧត្ដមសេនីយ៍ទោ​ អ៊ា​វ​ ចំរើន​ ស្នងការ​នគរបាល​ខេត្ដកណ្ដាល​ កម្លាំង​ជំនាញ​បាន​ ស្រាវជ្រាវ​ ស៊ើបអង្កេត​ ត្រឹម​រយៈពេល​១៣​ថ្ងៃ​ បាន​កំណត់​មុខសញ្ញា​ច្បាស់​ ឈាន​ដល់​ឃាត់ខ្លួន​ជន​ដៃដល់​ជា​ឃាតករ​បាន​នៅ​ថ្ងៃ​ទី​២១​ ខែមីនា​ ឆ្នាំ​២០១៩​ យក​មក​អធិការដ្ឋាន​នគរបាល​ស្រុក​ ដើម្បី​សាកសួរ​។​

​នៅ​ចំពោះ​មុខ​សមត្ថកិច្ច​ជំនាញ​ ជនសង្ស័យ​ជា​ឃាតករ​បាន​សារភាព​ថា​ ខ្លួន​និង​នារី​រង​គ្រោះ​កាលពី​ជាង​មួយ​ឆ្នាំ​មុន​ គឺជា​សង្សារ​នឹង​គ្នា​ តែ​ដោយ​ខ្លួន​(​ជនសង្ស័យ​)​គ្មាន​ទូរស័ព្ទ​ប្រើប្រាស់​ ក៏​ដាច់​ទំនាក់ទំនង​គ្នា​តែ​ម្ដង​ទៅ​។​ លុះ​មក​ដល់​ថ្ងៃ​ទី​៧​ ខែមីនា​ ឆ្នាំ​២០១៩​ នៅ​វ​លា​ម៉ោង​១៨​ខ្លួន​(​ជនសង្ស័យ​)​ បាន​ជិះ​កង់​ចេញពីផ្ទះ​ ទៅ​សង្កាត់​ព្រែក​ព្នៅ​ រាជធានី​ភ្នំពេញ​ ក្នុង​គោលបំណង​ទៅ​រក​ទិញ​ថ្នាំ​ញៀន​ ខណៈ​ជិះ​កង់​មក​ដល់​ចំណុច​គល់​ស្ពាន​លី​យ៉ុ​ង​ ផាត់​ ព្រែក​ព្នៅ​ ក៏​បាន​ជួប​នារី​រង​គ្រោះ​កំពុង​ដើរ​ឆ្លងកាត់​ស្ពាន​ មក​ត្រើយ​ខាងកើត​ ដោយ​ធ្លាប់​មានការ​ទំនាក់ទំនង​គ្នា​កាលពីមុន​ ភ្លាម​នោះ​ជនសង្ស័យ​ បាន​សួរ​នារី​រង​គ្រោះ​ថា​ ទៅ​ណា​?​ ភ្លាម​នោះ​នារី​រង​គ្រោះ​ឆ្លើយ​ថា​ ទៅ​ផ្ទះ​នៅ​ភូមិ​ព្រែក​ឬ​ស្សី​ ជួយ​ជូន​ខ្ញុំ​ ឌុ​ប​ទៅ​ផ្ទះ​បាន​ដែរ​ឬ​អត់​?​ ភ្លាម​នោះ​ជនសង្ស័យ​ក៏​យល់ព្រម​ឌុ​ប​ នារី​រង​គ្រោះ​ទៅ​ផ្ទះ​វិញ​ លុះ​មក​ដល់​ចំណុច​កើតហេតុ​ ជនសង្ស័យ​និង​នារី​រង​គ្រោះ​បាន​អង្គុយ​សារ​សង​គ្នា​មួយសន្ទុះ​ធំ​ ក្រោយមក​ ជនសង្ស័យ​ បាន​និយាយ​លួងលោម​សុំ​រួម​ភេទ​ ប៉ុន្តែ​នារី​រង​គ្រោះ​មិន​យល់ព្រម​នោះ​ទេ​ ដែល​ជា​ហេតុ​ធ្វើ​ឲ្យ​ជនសង្ស័យ​ខឹង​ ក៏​ស្ទុះ​ទៅ​យក​ឈើ​ចង្កូតទូក​ ដែល​នៅ​លើ​វាលស្មៅ​ក្បែរ​នោះ​ មក​វាយ​នារី​រង​គ្រោះ​ពីក្រោយ​ ចំនួន​២​ដង​ បណ្ដាល​ឲ្យ​នារី​រង​គ្រោះ​ដួល​ផ្កាប់មុខ​ បែក​ឈាម​ បន្ទាប់​មក​ ជនសង្ស័យ​ បាន​ទាញ​ផ្ងារ​នារី​រង​គ្រោះ​ ហើយ​វាយ​ថែម​ជា​ច្រើន​ដង​ទៀត​ លើ​ផ្នែក​មុខ​ និង​ក្បាល​ បន្ទាប់​មក​ ជនសង្ស័យ​បាន​ស្រាត​ខោខ្លី​ចេញពី​ខ្លួន​ ក្នុង​បំណង​រំលោភ​ ដោយ​ឃើញ​មាន​ចេញ​ឈាម​ច្រើន​ពេក​ ជនសង្ស័យ​មានការ​ភ័យ​ខ្លាច​ ក៏​ជិះ​កង់​ត្រឡប់​មក​ផ្ទះ​វិញ​ ដោយ​បន្សល់​ទុក​ខោខ្លី​នៅ​កន្លែង​កើតហេតុ​ ។​

​ប្រភព​ដដែល​បន្ដ​ទៀត​ថា​ លុះ​ព្រឹក​ឡើង​ ថ្ងៃ​ទី​៨​ ខែ​ឆ្នាំ​ដដែល​ វេលា​ម៉ោង​១៣​និង​៤៧​នាទី​ មាន​ប្រជាពលរដ្ឋ​បាន​ប្រទះ​ឃើញ​សាកសព​នារី​រង​គ្រោះ​ ដេក​ស្លាប់​ក្នុង​ប្រឡាយ​ ទើប​បានជា​ភ្ញាក់ផ្អើល​ ប្រជាពលរដ្ឋ​ជិតខាង​ និង​រាយការណ៍​ជូន​សមត្ថកិច្ច​ប៉ុស្ដិ៍​សំបួរមាស​ ដើម្បី​ពិនិត្យ​។​

​ក្រោយ​ពី​កម្លាំង​នគរបាល​ប៉ុស្ដិ៍​ទទួល​បាន​ព័ត៌មាន​ខាងលើ​ ភ្លាម​នោះ​ក៏​បន្ដ​រាយការណ៍​ទៅ​កម្លាំង​ជំនាញ​ជំនាញ​ស្រុក​ និង​កម្លាំង​ជំនាញ​ខេត្ដ​ រួច​ពិនិត្យ​ និង​កោសល្យ​វិ​ច្ច័​យ​ ហើយ​បញ្ជាក់​ថា​ ការ​ស្លាប់​របស់​នារី​រង​គ្រោះ​គឺ​ស្លាប់​ដោយ​អំពើរ​ឃាតកម្ម​។​ បន្ទាប់​ពី​ពិនិត្យ​រួច​ កម្លាំង​ជំនាញ​បាន​សហការ​គ្នា​ ស្រាវជ្រាវ​ស៊ើបអង្កេត​ រហូត​កំណត់​មុខសញ្ញា​ច្បាស់​ ចាប់ខ្លួន​ជន​ដៃដល់​ជា​ឃាតករ​ នៅ​ថ្ងៃ​ទី​២១​ ខែមីនា​ ឆ្នាំ​២០១៩​ វេលា​ម៉ោង​១០​និង​០៨​នាទី​ ដោយ​ត្រឹម​រយៈពេល​១៣​ថ្ងៃ​។​

​បច្ចុប្បន្ន​ ជនសង្ស័យ​ខាងលើ​ ត្រូវ​បាន​នគរបាល​ជំនាញ​កសាង​សំណុំរឿង​ បញ្ជូន​មក​កាន់​ស្នងការដ្ឋាន​នគរបាល​ខេត្ដកណ្ដាល​ ដើម្បី​ចាត់ការ​បន្ដ​តាម​នីតិវិធី​ច្បាប់​ ៕


អត្ថបទដែលជាប់ទាក់ទង
WP2Social Auto Publish Powered By : XYZScripts.com