ឆាប់ៗនេះ ​ប្រជាពលរដ្ឋនឹងលែងស្មុគស្មាញ ​លើការផ្ទេរកម្មសិទ្ធិយានយន្ត

(ភ្នំពេញ)៖ ក្នុងពេលឆាប់ៗខាងមុខនេះ ប្រជាពលរដ្ឋនឹងអស់ភាពស្មុគ្រស្មាញលើការផ្ទេរកម្មសិទ្ធិយានយន្ត ខណៈដែលក្រសួងសាធារណការ និងដឹកជញ្ជូន បាននិងកំពុងរៀបចំនីតិវិធីថ្មីតាមបច្ចេកវិទ្យាទំនើប។ នីតិវិធីផ្ទេរកម្មសិទ្ធិយានយន្តថ្មីតាមបច្ចេកវិទ្យាទំនើប​ ក្រោមគំនិតផ្តួចផ្តើម​របស់​ឯកឧត្ដម​ ស៊ុន​ ចាន់ថុល​ រដ្ឋមន្ត្រី​ក្រសួង​សាធារណការ​ និងដឹកជញ្ជូន​ ដើម្បី​សម្រួលធ្វើយ៉ាងណាឲ្យប្រជាពលរដ្ឋអស់ភាពស្មុគ្រស្មាញ និងកាន់តែងាយស្រួលជាមុន។

បើតាមក្រសួងសាធារណការ ប្រជាពលរដ្ឋគ្រាន់តែទៅកន្លែងផ្តល់សេវាតែមួយ (ឬចូលទៅកាន់ប្រព័ន្ធស្វ័យប្រវត្តិកម្ម ONLINE) របស់ក្រសួងសាធារណការ និងដឹកជញ្ជូន រួចបំពេញទម្រង់បែបបទពាក្យស្នើសុំតែមួយ បង់សេវាផ្ទេរកម្មសិទ្ធិ និងពន្ធប្រថាប់ត្រា ក្នុងវិក្កយបត្រតែមួយ នឹងទទួលបាននូវប័ណ្ណសម្គាល់យានយន្ត ជាមួយនឹងព័ត៌មានកម្មសិទ្ធិករថ្មី ដោយស្របច្បាប់យ៉ាងងាយស្រួល និងរហ័សទាន់ចិត្ត។

គួរជម្រាបថា នៅក្នុងកិច្ចប្រជុំពិភាក្សាទៅលើខ្លឹមសារនៃសេចក្តីព្រាង “ប្រកាសអន្តរក្រសួង ស្តីពីបែបបទ និងនីតិវិធីនៃការផ្ទេរកម្មសិទ្ធិយានយន្ត” កាលពីពេលថ្មីៗនេះ មានការចូលរួមពិភាក្សារវាងថ្នាក់ដឹកនាំក្រសួងសាធារណការ និងមន្ត្រីពាក់ព័ន្ធ ជាមួយអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ។ អង្គប្រជុំនេះ បានសម្រេច ឯកភាពលើសេចក្តីព្រាង និងបានជំរុញឲ្យជំនាញនៃក្រសួងទាំងពីរ បញ្ចប់ការងារបច្ចេកទេសដែលនៅសេសសល់ ដើម្បីអាចឈានទៅរកការដាក់ស្នើទៅរដ្ឋមន្ត្រីនៃក្រសួងទាំងពីផ្តល់សុពលភាព និង ​ដាក់ដំណើរការប្រព័ន្ធបច្ចេកវិទ្យា ជាមួយនីតិវិធីថ្មីនាពេលឆាប់ៗខាងមុខនេះ៕