(ភ្នំពេញ)៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានទទួលជួបសម្តែងការគួរសម និងពិភាក្សាការងារជាមួយឯកឧត្តមបណ្ឌិត សាត់តូ ដាម៉ូស៊ូម៉ាតូ (Santo Darmosumarto) ឯកអគ្គរដ្ឋទូតឥណ្ឌូណេស៊ី ប្រចាំព្រះរាជាណាចក្រកម្ពុជា និងសហការី នៅទីស្តីការក្រសួងមហាផ្ទៃ។ជាលទ្ធផលប្រកបដោយវិជ្ជមាននៃទំនាក់ទំនងការទូតរវាង ព្រះរាជាណាចក្រកម្ពុជា និងសាធារណរដ្ឋឥណ្ឌូណេស៊ី ត្រូវបានកត់សម្គាល់ដោយ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ ក្នុងជំនួបជាមួយឯកឧត្ដមបណ្ឌិត សាន់តូ ដាម៉ូស៊ូម៉ាតូ ឯកអគ្គរដ្ឋទូតថ្មី នៃប្រទេសឥណ្ឌូណេស៊ី ប្រចាំព្រះរាជាណាចក្រកម្ពុជា នារសៀលថ្ងៃទី១៣ ខែឧសភា ឆ្នាំ២០២៤។ក្នុងជំនួបនោះឯកឧត្ដមអភិសន្តិបណ្ឌិត ស សុខា បានអបអរសាទរចំពោះឯកឧត្ដមបណ្ឌិត ដែលត្រូវបានតែងតាំងជាឯកអគ្គរដ្ឋទូតនៅកម្ពុជា និងអបអរសាទរចំពោះលទ្ធផលជាច្រើន ដែលឯកអគ្គរដ្ឋទូត អាណត្តិមុនៗសម្រេចបាន ក្នុងការពង្រឹង និងលើកកម្ពស់ទំនាក់ទំនង និងកិច្ចសហប្រតិបត្តិការរវាងកម្ពុជា-ឥណ្ឌូណេស៊ី អស់រយៈពេលជាច្រើនឆ្នាំកន្លងមក។ប្រមុខក្រសួងមហាផ្ទៃកម្ពុជា ក៏បានបង្ហាញការជឿជាក់ថា ក្នុងអាណត្តិបេសកកម្មការទូតនៅកម្ពុជា ឯកឧត្ដមបណ្ឌិត សាន់តូ ដាម៉ូស៊ូម៉ាតូ នឹងបន្តគាំទ្រ និងរួមចំណែកដល់ការលើកកម្ពស់ទំនាក់ទំនង និងកិច្ចសហប្រតិបត្តិការរវាងកម្ពុជា-ឥណ្ឌូណេស៊ី និងឥណ្ឌូណេស៊ី-អាស៊ាន ឱ្យកាន់តែប្រសើរឡើងថែមទៀតលើគ្រប់វិស័យ។ឯកឧត្ដមបណ្ឌិត សាន់តូ ដាម៉ូស៊ូម៉ាតូ បានអបអរសាទរឯកឧត្ដមអភិសន្តិបណ្ឌិត ស សុខា ដែលត្រូវបានតែងតាំងជាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជឿជាក់ថា ក្រោមការដឹកនាំរបស់ឯកឧត្ដមអភិសន្តិបណ្ឌិត ស សុខា ក្រសួងមហាផ្ទៃកម្ពុជា នឹងបន្តរក្សាបាននូវសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម ជូនប្រជាជននៃប្រទេសកម្ពុជា។ឯកឧត្ដមបណ្ឌិតអគ្គរដ្ឋទូតឥណ្ឌូណេស៊ី ក៏បានថ្លែងអំណរគុណចំពោះសមត្ថកិច្ចកម្ពុជា និងស្ថាប័នពាក់ព័ន្ធ ដែលតែងតែផ្ដល់កិច្ចសហការ និងយកចិត្តទុកដាក់សម្របសម្រួលដល់ការគាំពារពលរដ្ឋឥណ្ឌូណេស៊ី កំពុងរស់នៅកម្ពុជា។ ឯកឧត្ដមអភិសន្តិបណ្ឌិត ស សុខា ជាថ្មីម្ដងទៀត បានជូនពរឯកឧត្ដមបណ្ឌិតឯកអគ្គរដ្ឋទូត និងសហការី មានសុខភាពល្អ សុភមង្គល និងទទួលបានជោគជ័យគ្រប់ភារកិច្ច៕

(ភ្នំពេញ)៖ នៅព្រឹកថ្ងៃអង្គារ ទី១៤ ខែឧសភា ឆ្នាំ២០២៤នេះ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានអនុញ្ញាតឱ្យ លោកជំទាវ ភីង អ៊ែម កីតនីកូន (Ping M. Kitnikone) ឯកអគ្គរដ្ឋទូតប្រទេសកាណាដាប្រចាំព្រះរាជាណាចក្រកម្ពុជា ចូលជួបសម្ដែងការគួរសម និងពិភាក្សាការងារ នៅវិមានព្រឹទ្ធសភា រាជធានីភ្នំពេញ៕

(ភ្នំពេញ)៖ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមប្រឹក្សាអ្នកច្បាប់ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី “គោលការណ៍គ្រឹះនៃនីតិរដ្ឋធម្មនុញ្ញនិងនីតិរដ្ឋបាលខ្មែរ” កាលពីរសៀលថ្ងៃចន្ទ ៦កើត ខែពិសាខ ឆ្នាំរោង ឆស័ក ព.ស. ២៥៦៧ ត្រូវនឹងថ្ងៃទី១៣ ខែឧសភា ឆ្នាំ២០២៤ នៅទីស្តីការគណៈរដ្ឋមន្រ្តី។ វគ្គបណ្តុះបណ្តាលនេះ ត្រូវបានរៀបចំឡើងដោយក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី ជូនដល់តំណាងក្រសួង ស្ថាប័ន ថ្នាក់ដឹកនាំជារដ្ឋលេខាធិការ អនុរដ្ឋលេខាធិការ និងមន្ត្រីរាជការនៃអង្គភាពចំណុះទីស្តីការគណៈរដ្ឋមន្ត្រីទាំងអស់ ថ្នាក់ដឹកនាំ ទីប្រឹក្សា សមាជិក សមាជិកបម្រុង ជំនួយការ និងមន្ត្រីរាជការនៃក្រុមប្រឹក្សាអ្នកច្បាប់ និងក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ ព្រមទាំងសមាជិក សមាជិកា សហភាពសហព័ន្ធយុវជនកម្ពុជាវិស័យទីស្តីការគណៈរដ្ឋមន្រ្តី និស្សិតសាកលវិទ្យាល័យភូមិន្ទនីតិសាស្រ្តនិងវិទ្យាសាស្រ្តសេដ្ឋកិច្ច និស្សិតសាកលវិទ្យាល័យជាតិគ្រប់គ្រង និងនិស្សិតសាកលវិទ្យាល័យ ន័រតុន មានចំនួនសរុបប្រមាណជាង ៤៦០នាក់។វគ្គបណ្តុះបណ្តាលស្តីពី “គោលការណ៍គ្រឹះនៃនីតិរដ្ឋធម្មនុញ្ញនិងនីតិរដ្ឋបាលខ្មែរ” ពិតជាមានសារៈសំខាន់ណាស់សម្រាប់អ្នកច្បាប់ អ្នកសិក្សាច្បាប់ និងអ្នករៀបចំគោលនយោបាយ ហើយក៏បានឆ្លើយតបទៅនឹងតួនាទីនិងភារកិច្ចរបស់ទីស្តីការគណៈរដ្ឋមន្ត្រី ដែលជាសេនាធិការជូនរាជរដ្ឋាភិបាលសម្រាប់សម្របសម្រួលការងារប្រចាំថ្ងៃរបស់គណៈរដ្ឋមន្ត្រីទាំងមូល ជាពិសេសលើការងារពិនិត្យនិងកែសម្រួលគោលនយោបាយ ច្បាប់ និងផែនការយុទ្ធសាស្ត្រជាតិ និងកំណែទម្រង់ច្បាប់។ ឯកឧត្តម លី ច័ន្ទតុលា អនុប្រធានក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី និងជាអ្នកសម្របសម្រួលវគ្គបណ្តុះបណ្តាលនេះ បានថ្លែងអំណរគុណដ៏ជ្រាលជ្រៅជូនចំពោះឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត ដែលបានផ្តួចផ្តើម ផ្តល់ការតម្រង់ទិស និងចូលរួមជាអធិបតីក្នុងវគ្គបណ្តុះបណ្តាលនេះដោយផ្ទាល់ និងថ្លែងអំណរគុណចំពោះឯកឧត្តមបណ្ឌិត សាយ បូរី ដែលជាវាគ្មិនកិត្តិយសពោរពេញដោយសមត្ថភាពនិងបទពិសោធន៍ ដែលបានស្ម័គ្រចិត្តចែករំលែកចំណេះដឹងនិងបទពិសោធន៍ដល់វគ្គបណ្តុះបណ្តាលនេះផងដែរ។ក្រោមគំនិតផ្តួចផ្តើមដ៏ខ្ពង់ខ្ពស់របស់ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមប្រឹក្សាអ្នកច្បាប់ វគ្គបណ្តុះបណ្តាលនេះ គឺជាលើកទី៥ ហើយដែលក្រុមប្រឹក្សាអ្នកច្បាប់ នៃទីស្តីការគណៈរដ្ឋមន្ត្រីបានរៀបចំវគ្គបណ្តុះបណ្តាលបែបនេះបន្ទាប់ពីការបង្កើតរាជរដ្ឋាភិបាលអាណត្តិទី៧ ដើម្បីកសាងនិងពង្រឹងសមត្ថភាពធនធានមនុស្សក្នុងក្របខ័ណ្ឌទីស្តីការគណៈរដ្ឋមន្ត្រីទាំងមូល ក៏ដូចនៅតាមបណ្តាក្រសួង ស្ថាប័នផ្សេងៗ និងតាមសាកលវិទ្យាល័យនានាផងដែរ។ វគ្គបណ្តុះបណ្តល ៣ លើកដំបូងឧទ្ទេសនាមដោយឯកឧត្តមបណ្ឌិតសភាចារ្យ សុក ស៊ីផាន់ណា ទេសរដ្ឋមន្ត្រីទទួលបន្ទុកបេសកកម្មពិសេស ហើយលើកទី៤ និងលើកទី៥ នេះ ឧទ្ទេសនាមដោយឯកឧត្តមបណ្ឌិត សាយ បូរី ទីប្រឹក្សារាជរដ្ឋាភិបាល និងទីប្រឹក្សាក្រុមប្រឹក្សាអ្នកច្បាប់។ ទីស្តីការគណៈរដ្ឋមន្រ្តីនឹងរៀបចំវគ្គបណ្តុះបណ្តាលលើប្រធានបទសំខាន់ៗបន្ថែមទៀត ធ្វើយ៉ាងណាឱ្យការបំពេញការងាររបស់ថ្នាក់ដឹកនាំនិងមន្ត្រីទាំងអស់ ប្រកបដោយប្រសិទ្ធភាព ស័ក្តិសិទ្ធភាព និងមានផលិតភាពការងារខ្ពស់ ដើម្បីឆ្លើយតបនឹងសំណូមពរនិងតម្រូវការចាំបាច់របស់អង្គភាពរៀងៗខ្លួន។

(ភ្នំពេញ)៖ លោកអ្នកឧកញ៉ា លី ហួរ ផ្ញើសារលិខិតថ្វាយព្រះពរព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ក្នុងឱកាសព្រះរាជពិធីបុណ្យចម្រើនព្រះជន្ម គម្រប់ខួប ៧១ ព្រះវស្សាយាងចូល ៧២ ព្រះវស្សា ថ្ងៃទី១៤ ខែឧសភា ឆ្នាំ២០២៤។នៅក្នុងឱកាសដ៏មហាមង្គលាភិរម្យថ្លៃថ្លា ប្រកបដោយក្តីសោមនស្សរីករាយបំផុត នៃព្រះរាជពិធីបុណ្យចម្រើនព្រះជន្មវស្សារបស់ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា គម្រប់ ៧១ព្រះវស្សា យាងចូល៧២ព្រះវស្សា ដែលប្រព្រឹត្តទៅនៅថ្ងៃអង្គារ ៧កើត ខែពិសាខ ឆ្នាំរោង ឆស័ក ព.ស. ២៥៦៧ ត្រូវនឹងថ្ងៃទី១៤ ខែឧសភា ឆ្នាំ២០២៤ ទូលព្រះបង្គំយើងខ្ញុំ សូមលំឱនកាយវាចាចិត្តក្រាបបង្គំទូលថ្វាយ នូវព្រះសព្ទសាធុការពរជ័យ បវរសួស្តី សិរីមង្គល វិបុលសុខ មហាប្រសើរគ្រប់ប្រការ ថ្វាយព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពស់ខ្ពស់បំផុត សូមព្រះអង្គ ទ្រង់ប្រកបដោយព្រះរាជសុខភាពល្អបរិបូរណ៍ ព្រះកាយពលរឹងមាំខ្លាំងក្លា ព្រះបញ្ញាញាណ ភ្លឺថ្លាត្រចះត្រចង់ព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ត្រជុំ ដល់ប្រជារាស្ត្រខ្មែរទូទាំងព្រះរាជាណាចក្រកម្ពុជា។នាឱកាសប្រកបដោយសិរីមង្គលដ៏ឧត្តុង្គឧត្តមនេះ ទូលព្រះបង្គំយើងខ្ញុំទាំងអស់គ្នា សូមសម្តែងនូវកតញ្ញូតាធម៌ដ៏ជ្រាលជ្រៅបំផុត ថ្វាយ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ដែលជានិច្ចព្រះអង្គតែងយកព្រះទ័យទុកដាក់អស់ពីព្រះកម្លាំង ព្រះកាយពល និងព្រះបញ្ញាណ បំពេញព្រះរាជសកម្មភាពដ៏ឧត្តុង្គឧត្តម បម្រើជាតិមាតុភូមិ និងប្រជារាស្ត្រជាទីស្រលាញ់ដ៏ជ្រាលជ្រៅរបស់ព្រះអង្គ៕

(ភ្នំពេញ)៖ អគ្គនាយកដ្ឋានអប់រំបណ្ដុះបណ្ដាលបច្ចេកទេសវិជ្ជាជីវៈ នៃក្រសួងការងារ និងបណ្ដុះបណ្ដាល និងវិជ្ជាជីវៈ បានបង្ហាញពីឱកាសសិក្សាជំនាញបច្ចេកទេសដល់ពលការិនីចំនួន ២៤នាក់ ដែលទើបត្រឡប់មកពីប្រទេសអារ៉ាប៊ីសាអូឌីត។ ការផ្សព្វផ្សាយឱកាសសិក្សាជំនាញបច្ចេកទេសដល់ពលការិនីនេះ ក្នុងគោលបំណងឲ្យពលការិនីមានជំនាញមួយពិតប្រាដក មានការងារធ្វើ មានចំណូលសមរម្យ សម្រាប់ទ្រទ្រង់ជីវភាពគ្រួសារ។ នៅថ្ងៃទី១២ ខែឧសភា ឆ្នាំ២០២៤ អគ្គនាយកដ្ឋានអប់រំបណ្ដុះបណ្ដាលបច្ចេកទេស និងវិជ្ជាជីវៈ នៃក្រសួងការងារ និងបណ្ដុះបណ្ដាលវិជ្ជាជីវៈ បានបង្ហាញពីឱកាសសិក្សាជំនាញបច្ចេកទេសដោយឥតគិតថ្លៃ រៀនរយៈពេល ៤ខែចប់ និងទទួលបានប្រាក់ឧត្ថម្ភ ២៨ ម៉ឺនរៀលសម្រាប់យុវជនដែលមកពីគ្រួសារក្រីក្រ និងងាយរងហានិភ័យដល់ពលការិនីចំនួន ២៤នាក់ ដែលទើបត្រឡប់មកពីប្រទេសអារ៉ាប៊ីសាអូឌីត នៅទីស្ដីការក្រសួងការងារ និងបណ្ដុះបណ្ដាលវិជ្ជាជីវៈ។ ខណៈក្រុមពលការិនី និងក្រុមគ្រួសារ សាច់ញ្ញាត្តិ ពលការិនី សុទ្ធតែបានបង្ហាញនូវការចាប់អារម្មណ៍ ក្នុងការសិក្សាជំនាញបច្ចេកទេសដែលមន្រ្តីក្រសួងបានណែនាំ។ «វាល្អ...ខ្ញុំអរ រំភើបប្រៀបមិនបានទេ»។ នេះជាការលើកឡើងរបស់ក្រុមគ្រួសារ សាច់ញាត្តិរបស់ពលការិនី។សូមបញ្ជាក់ថា នៅចុងឆ្នាំ២០២៣ អគ្គនាយកដ្ឋានអប់រំបណ្ដុះបណ្ដាលបច្ចេកទេស និងវិជ្ជាជីវៈ នៃក្រសួងការងារ និងបណ្ដុះបណ្ដាលវិជ្ជាជីវៈ សម្រេចបានសមិទ្ធផលគួរឱ្យកត់សម្គាល់លើការបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ផ្ដល់ឱកាសឲ្យគ្រួសារក្រីក្រ និងងាយរងហានិភ័យបានទទួលការបណ្ដុះបណ្ដាលជំនាញបច្ចេកទេស និងវិជ្ជាជីវៈលើជំនាញទាំង៣៨ នៅទូទាំងប្រទេស ដោយឥតគិតថ្លៃ៕

(អន្តរជាតិ)៖ មន្ទីរពេទ្យ Massachusetts General Hospital នៅទីក្រុង Boston បាននិយាយថា បុរសម្នាក់ដែលមានជំងឺតំរងនោមដំណាក់កាលចុងក្រោយ ដែលកាលពីដើមឆ្នាំនេះបានក្លាយជាមនុស្ស ដំបូងគេដែលបានទទួលក្រលៀនថ្មីពីជ្រូកដែលបានកែប្រែហ្សែននោះបានស្លាប់ហើយ។មន្ទីរពេទ្យបាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍ថា "ក្រុមវះកាត់ទូទៅ មានការសោកស្ដាយយ៉ាងខ្លាំងចំពោះមរណភាពភ្លាមៗរបស់លោក Rick Slayman" ។ យើងមិនមានការបញ្ជាក់ថាវាជាលទ្ធផលនៃការប្តូរសរីរាង្គថ្មីរបស់គាត់នោះទេ។ Slayman អាយុ 62 ឆ្នាំមកពី Weymouth រដ្ឋ Massachusetts បានទទួលការប្តូរសរីរាង្គនៅក្នុងខែមីនាក្នុងការវះកាត់រយៈពេល 4 ម៉ោង ដែលមន្ទីរពេទ្យនៅពេលនោះហៅថា "ព្រឹត្តិការណ៍ដ៏សំខាន់មួយនៅក្នុងដំណើរស្វែងរកដើម្បីផ្តល់ សរីរាង្គដែលអាចរកបានបន្ថែមទៀតដល់អ្នកជំងឺ" ។គ្រួសាររបស់ Slayman បាននិយាយនៅក្នុងសេចក្តីថ្លែងការណ៍មួយថា "គ្រួសាររបស់យើ ងមានការសោកស្ដាយយ៉ាងខ្លាំងចំពោះការស្លាប់ភ្លាមៗរបស់ Rick ជាទីស្រឡាញ់របស់យើង " ។ Slayman បានទទួលការប្តូរក្រលៀនមនុស្សនៅមន្ទីរពេទ្យដូចគ្នាកាលពីឆ្នាំ 2018 បន្ទាប់ពីធ្វើការលាង ឈាមអស់រយៈពេល 7 ឆ្នាំ ប៉ុន្តែសរីរាង្គនោះបានបរាជ័យបន្ទាប់ពីរយៈពេល 5 ឆ្នាំ ហើយគាត់បានបន្តការលាងឈាមឡើងវិញ។តម្រងនោមពីជ្រូកដែលបានកែសម្រួលស្រដៀងគ្នាដែលចិញ្ចឹមដោយ eGenesis ត្រូវបានចម្លងដោយ ជោគជ័យទៅក្នុងសត្វស្វាដែលត្រូវបានរក្សាទុកជាមធ្យម 176 ថ្ងៃ ហើយក្នុងករណីមួយអស់រយៈពេលជាង 2 ឆ្នាំ អ្នកស្រាវជ្រាវបានរាយការណ៍នៅក្នុងខែតុលានៅក្នុងទស្សនាវដ្តី Nature ។ ឱសថដែលប្រើដើម្បីជួយ ការពារការបដិសេធនៃសរីរាង្គជ្រូកដោយប្រព័ន្ធភាពស៊ាំរបស់អ្នកជំងឺរួមមានអង្គបដិប្រាណពិសោធន៍មួយហៅថា tegoprubart ដែលបង្កើតឡើងដោយ Eledon Pharmaceuticals នេះបើយោងតាមមន្ទីរពេទ្យ។យោងតាមកម្មវិធីតាមដានទិន្នន័យដែលរក្សាដោយ United Network for Organ Sharing មនុស្សជាង 100,000 នាក់នៅសហរដ្ឋអាមេរិកកំពុងរង់ចាំសរីរាង្គសម្រាប់ការប្តូរសរីរាង្គ ដោយមានតម្រងនោមនៅក្នុងតម្រូវការដ៏ធំបំផុត។ គ្រូពេទ្យវះកាត់នៅ NYU ធ្លាប់បានប្តូរក្រលៀនជ្រូកទៅជាមនុស្សដែលស្លាប់ខួរក្បាល។ ក្រុមនៃសាកលវិទ្យាល័យ Maryland ក្នុងខែមករាឆ្នាំ 2022 បានប្តូរបេះដូងជ្រូកដែលបានកែប្រែហ្សែនទៅបុរសអាយុ 57 ឆ្នាំដែលមានជំងឺបេះដូងចុងក្រោយ ប៉ុន្តែគាត់បានស្លាប់ពីរខែក្រោយមក៕

(ជាតិ)៖ បុរសម្នាក់ ចែករំលែកនូវបទពិសោធន៍មួយដល់បងប្អូនគ្រប់រូប ឱ្យមានការប្រុងប្រយ័ត្ន ជៀសវាងការខាតបង់លុយកាក់ ពោលគឺសម្រាប់អ្នក ដែលតែងតែងនិយមចូលចិត្តដើរផ្សារទិញទំនិញ នៅតាមផ្សារទំនើបនានា ជាពិសេសផ្សារម៉ាក្រូតែម្តង ដែលជាផ្សារដ៏ធំមានចម្រុះមុខទំនិញគ្រប់មុខ ដែលពលរដ្ឋភាគច្រើន តែងតែ ចូលទៅទិញ ម្ហូប ត្រី សាច់ បន្លែ ផ្លែ ឈើ នំ ចំនី ឬ ទំនិញប្រើប្រាស់ជាច្រើនមុខ សូមកុំភ្លេច ត្រួតពិនិត្យ និងផ្ទៀងផ្ទាត់ បុងជាមួយ នឹង QR Code លើមុខទំនិញមួយៗផង ព្រោះ ពេលគិតលុយ បុគ្គលិកមួយចំនួន ពួកគាត់អាចមានការភ័ន្តច្រឡំ ដោយអចេតនា មិនបានផ្ទៀងផ្ទាត់ មុខទំនិញ បានត្រឹមត្រូវនោះទេ។ជាក់ស្តែងថ្មីៗនេះ យោងតាមគណនីហ្វេសប៊ុកដែលមានឈ្មោះថា Lee To បានបង្ហោះនូវរូបភាព វិក័យប័ត្រ មួយសន្លឹក ដែលបង្ហាញពីឈ្មោះទំនិញដែលខ្លួនបានទិញនៅផ្សារម៉ាក្រូសែនសុខ រួមទាំងបានភ្ជាប់នូវខ្លឹមសារទាំងស្រុងថា៖ « សូមជំរាបបងប្អូនទុកជាសារចែករំលែក អ្នកដែលនិយមមកទិញអ៊ីវ៉ាន់នៅម៉ាក្រូ Makro សូមត្រួតពិនិត្យបុងនឹងQR នៅលើអីវ៉ាន់ផង គឺមានការខុស ជាពិសេសខាងបន្លែ ផ្លែឈើត្រីសាច់ ដែលបុគ្គលិកថ្លឹងនឹងបិទកូដខុស ពេលស្កែនទៅ តម្លៃលើសទាល់តែពិនិត្យមើលទើបដឹង ជាក់ស្តែង អីវ៉ាន់ខ្ញុំខុសរហូតដល់150$ ទាល់តែខ្ញុំអោយរើស្កែន ពិនិត្យម្តងទៀត ទើបដឹងថាមានអីវ៉ាន់ខ្លះថ្លឹងរួចបិទកូដច្រឡំ ជាកំហុសអចេតនារបស់បុគ្គលិកទេ តែយើងត្រូវប្រយត្ន័ ដូច្នេះពេលគិតលុយកុំភ្លេចពិនិត្យនឹងផ្ទៀងតម្លៃ អីវ៉ាន់យើងផង គេចំណេញលើមុខទំនិញហើយ គិតលុយខុសទៀតយើងរឹតតែខាត អរគុណ!»។ដូចដែរម្ចាស់គណនីហ្វេសប៊ុកខាងលើ បានបញ្ជាក់ជូនអីចឹង វាជាកំហុសអចេតនារបស់បុគ្គលិក ក៏ប៉ុន្តែអ្វីដែលសំខាន់ក្នុងនាមយើងជាអតិថិជនដែលទៅចំណាយលុយក្នុងការទិញទំនិញ មុននឹងចាកចេញ សុំកុំភ្លេច ផ្ទៀងផ្ទាត់ទំនិញជាមួយនឹងវិក័យប័ត្រដែលបានគិត ជៀសវាងការខាតបង់ថ្វេរដង។ ទោះជាយ៉ាងណាក៏ដោយ នេះមិនសំដៅតែលើផ្សារម៉ាក្រូមួយទេ ពោលគ្រប់ពេលដែលលោកអ្នកទៅទិញទំនិញ តិច ឬ ច្រើន មិនថាផ្សារណានោះទេ គឺដាចខាត ពេលទិញទំនិញហើយ ត្រូវ ត្រួតពិនិត្យ និង ផ្ទៀងផ្ទាត់ឱ្យបានច្បាស់ជាមុនសិន ជៀងវាងការខាតបង់ប្រាក់កាក់ផងដែរ៕

(ជាតិ)៖ កុំអូសរំលងអីបងប្អូនជាពិសេសសម្រាប់អ្នកដែលមានបំណងចង់ទៅលេងខេត្ត សៀមរាប និង ចង់ធ្វើដំណើរកំសាន្តនៅតាមតំបន់ប្រវត្តិសាស្ត្រ ទស្សនាប្រាង្គប្រាសាទបុរាណខ្មែរនៅលើទឹកដីអង្គរ កុំភ្លេច ជួល ឬ ជួយជិះ កង់បី របស់លោកអ៊ុ មា្នក់នេះផង ព្រោះថាគាត់ពុំសូវមានភ្ញៀវហៅគាត់ដឹកនោះទេ ដែលជាហេតុធ្វើឱ្យគាត់ចំណូលផ្គត់ផ្គង់ជីវភាពមិនបាន ខណៈថ្ងៃខ្លះ គាត់ហូបនំបុ័ងមួយពីព្រឹកដល់ថ្ងៃល្ងាច ក៏មានដែរ ដោយសារតែអត់លុយទិញ បាយ និង ម្ហូបអាហារ បរិភោគ។ជាក់ស្តែងថ្មីៗមានការចែកចាយព្រោងព្រាតតៗគ្នាពេញបណ្តាញសង្គមតែម្តង ក្រោយពីមានគណនីហ្វេសប៊ុកមួយ បានបង្ហោះអំពាវនាវ ឱ្យអ្នកដែលទៅលេងខេត្តសៀមរាប កុំភ្លេច ហៅកង់បី លោកអ៊ុជិះផង ព្រោះ គាត់ពុំសូវមានភ្ញៀវជិះទេ។ ក្នុងនោះដែរ យោងតាមគណនីហ្វេសប៊ុកដែលមានឈ្មោះថា Meyly Lay បានបង្ហោះនូវរូបភារបស់លោកអ៊ុម្នាក់ដែលកំពុងតែសម្រាកនៅលើកង់បី រួមទាំងបានភ្ជាប់នូវខ្លឹមសារថា៖ «សួស្ដីបងៗ បើសិនបងៗរឺក៏អូនៗបានទៅលេងខេត្តសៀមរាប សូមបងៗនិងអូនជួយជិះគាត់ផង (ខ្វះខាត)គាត់ពុំសូវមានភ្ញៀវជិះទេ……ពេលខ្លះគាត់ហូបនំបុ័ងមួយពីព្រឹកដល់ថ្ងៃល្ងាច គាត់ស្គាល់កន្លែងដើរលេងនិងប្រាសាទច្រើន គាត់បើកយឺតមែនតែគាត់គិតគូរពីសុវត្ថិភាពភ្ញៀវ ថ្ងៃនេះកុំតែបានគាត់ប្រាប់កន្លែងជិះឡានក្រុងពីសៀមរាបទៅដល់ព្រលានទេកុំអីត្រូវអស់លុយថ្លៃតាក់ស៊ីទៀតហើយ (គាត់ថាយប់ជិះឡានក្រុមហ៊ុនទៅសុវត្ថិភាព) បងៗទៅសៀមរាបកុំភ្លេចជួយជិះគាត់ផង 0966660962 !»យ៉ាងណាមិញ ក្រោយពីមានការបង្ហោះពីសំណាក់ម្ចាស់គណនីហ្វេសប៊ុកខាងលើហើយនោះ ឃើញថាមានមហាជនបាននាំគ្នាស៊ែរតៗគ្នាយ៉ាងច្រើន ក្នុងន័យបង្ហាញពីក្តីអាណិតអាសូរចំពោះលោកអ៊ុ ដែលមានវ័យរាងចំណាស់ បែរជានៅបន្តរត់កង់បីដើម្បីរកប្រាក់ចំណូល មិនត្រឹមតែប៉ុណ្ណោះថែមទាំងអត់មានភ្ញៀវជិះទៀត។ ទោះជាយ៉ាងណាក៏ដោយ ស្របពេលជាមួយគ្នានោះ ក៏មានមហាជនខ្លះដែលគាត់រស់នៅក្នុងខេត្តសៀមរាបផ្ទាល់ និង ជាពិសេស អ្នករកស៊ីនៅខាងវិស័យទេសចរណ៍ផ្ទាល់ ក៏បានចូលទៅខំមិនបញ្ចេញមតិយោបល់ផ្សេងៗគ្នាដែរថា៖ -សៀមរាបឥឡូវស្ងាត់ជាងមុន មិនសូវមានភ្ញៀវទេសចរណ៍ទេ អ្នករកស៊ីដឹកភ្ញៀវក៏គាត់ពិបាកដែរ ស្ងាត់ខ្លាំងពេក រកចំណូលមិនសូវបានដូចមុនទេ។ -ចាប់ពីខែនេះទៅគេហៅខែ Low Season មិនសូវមានភ្ញៀវទេស្ងាត់ទាំងអស់គ្នានឹង ខណៈ អ្នករកស៊ី មួយចំនួន ជាពិសេសគឺអ្នកពឹងលើវិស័យទេសចរណ៍តែម្តង គឺពិបាកណាស់ មិនថា តែលោកអ៊ុដែលជាអ្នកររត់កង់បីនេះម្នាក់ទេ៕

(អន្តរជាតិ)៖ មន្ត្រីភ្នាក់ងារគ្រោះមហន្តរាយក្នុងតំបន់បានប្រាប់ AFP កាលពីថ្ងៃចន្ទថា ចំនួនមនុស្សស្លាប់ដោយសារទឹកជំនន់ភ្លាមៗ និងលំហូរកម្អែភ្នំភ្លើងនៅភាគខាងលិចប្រទេសឥណ្ឌូនេស៊ី កាលពីចុងសប្តាហ៍កន្លងទៅនេះ បានកើនឡើងដល់ 41 នាក់ហើយ និង 17 នាក់ទៀតកំពុងបាត់ខ្លួន។ភ្លៀងធ្លាក់ខ្លាំងជាច្រើនម៉ោងបានបណ្តាលឱ្យផ្ទាំងថ្មភ្នំភ្លើងដ៏ធំបានរំកិលចុះក្រោម ភ្នំភ្លើងសកម្មបំផុតមួយ របស់ប្រទេសឥណ្ឌូនេស៊ីចូលទៅក្នុងស្រុកចំនួនពីរនៅលើកោះស៊ូម៉ាត្រាកាលពីល្ងាចថ្ងៃសៅរ៍ ខណៈដែលទឹកជំនន់ជន់លិចផ្លូវថ្នល់ ផ្ទះសម្បែង និងវិហារអ៊ីស្លាម។ លោក Ilham Wahab មន្ត្រីទីភ្នាក់ងារកាត់បន្ថយគ្រោះមហន្តរាយកោះស៊ូម៉ាត្រាខាងលិចបានប្រាប់ AFP ថា "ទិន្នន័យគិតត្រឹមយប់មិញ យើងបានកត់ត្រាជនរងគ្រោះចំនួន 37 នាក់... ប៉ុន្តែចាប់ពីព្រឹកថ្ងៃចន្ទនេះ វាមានការកើនឡើងម្តងទៀត តួលេខនេះបានឈានដល់ 41 នាក់ (ស្លាប់)" ។លោកបាននិយាយថា ក្រុមអ្នកជួយសង្គ្រោះកំពុងស្វែងរកមនុស្ស 17 នាក់ដែលកំពុងបាត់ខ្លួន បីនាក់នៅក្នុងស្រុក Agam និង 14 នាក់នៅ Tanah Datar ទាំងតំបន់ដែលរងគ្រោះខ្លាំងបំផុត ដោយទឹកជំនន់ និងផ្ទះសម្រាប់មនុស្សរាប់សែននាក់។ Ilham មិនអាចបញ្ជាក់ពីចំនួនអ្នកស្រុក ដែលត្រូវបានជម្លៀសចេញនោះទេ ដោយសារតែមន្ត្រីបានលើកទឹកចិត្ត "ប្រជាជនឱ្យជម្លៀសទៅកាន់ កន្លែង ដែលមានសុវត្ថិភាពជាង" ជាងជំរកតង់នៅពេលមានភ្លៀងធ្លាក់ខ្លាំង។ លោកបានបន្តថា៖ «យើងផ្តោតលើទី១ ការស្វែងរកនិងសង្គ្រោះជនរងគ្រោះ ទី២ ការពារអ្នកជម្លៀសការពារជនងាយរងគ្រោះ»។ភ្លៀងធ្លាក់ខ្លាំងបានជន់លិចសង្កាត់ដោយទឹកជន់លិចភក់ និងបានបោកបក់រថយន្តចូលទៅក្នុងទន្លេក្បែរនោះ ខណៈដែលផេះភ្នំភ្លើង និងថ្មធំៗបានបក់ចុះពីលើភ្នំម៉ារ៉ាពី។ កម្អែលភ្នំភ្លើង ដែលត្រូវបានគេស្គាល់ផងដែរថាជា ឡាហារ គឺជាវត្ថុធាតុភ្នំភ្លើងដូចជាផេះ ខ្សាច់ និងគ្រួសដែលធ្លាក់ពីលើជម្រាលភ្នំភ្លើងដោយទឹកភ្លៀង។ទីភ្នាក់ងារកាត់បន្ថយគ្រោះមហន្តរាយជាតិ ឬ BNPB បាននិយាយថា ផ្ទះចំនួន 84 ខ្នង ស្ពាន 16 កន្លែង និងវិហារឥស្លាមចំនួន 2 ត្រូវបានខូចខាតនៅក្នុងទីក្រុង Tanah Datar ដូចជាផ្ទៃដីស្រែចំនួន 20 ហិកតា (50 ហិចតា) ។សូមរំលឹកផងដែរថា ក្នុងឆ្នាំ 2022 មនុស្សប្រហែល 24,000 នាក់ត្រូវបានជម្លៀសចេញ ហើយកុមារ 2 នាក់ត្រូវបានសម្លាប់នៅក្នុងទឹកជំនន់នៅលើកោះស៊ូម៉ាត្រា ដោយអ្នកធ្វើយុទ្ធនាការបរិស្ថាន បានបន្ទោស ការកាប់បំផ្លាញព្រៃឈើដែលបណ្តាលមកពីការកាប់ឈើធ្វើឱ្យគ្រោះមហន្តរាយកាន់តែអាក្រក់ទៅៗ៕

(វៀតណាម)៖ កុមារបីនាក់ដែលមានអាយុពី 3 ទៅ 5 ឆ្នាំត្រូវបានបាត់បង់ជីវិត នៅពេលដែលដី និងថ្ម បានបាក់ធ្លាក់ពីលើភ្នំនៅផ្ទះមួយក្នុងសង្កាត់ Ba Vi ទីក្រុងហាណូយកាលពីយប់ថ្ងៃអាទិត្យម្សិលមិញ។នៅវេលាម៉ោង១០និង២០នាទីយប់ បន្ទាប់ពីមានភ្លៀងធ្លាក់ខ្លាំងជាង១ម៉ោង មានការបាក់ដីដែល មិននឹកស្មានដល់មួយបានកើតឡើង ដោយកំទេចកំទីថ្ម និងដីបានធ្លាក់មកលើកន្លែងលេងរបស់កុមារ ដែលស្ថិត ក្នុងឃុំ Ba Trai បណ្តាលឲ្យជញ្ជាំងប្រវែង១០ម៉ែត្រដួលរលំសង្កត់លើកុមារទាំងបីនាក់។ ក្រុមអ្នកជួយសង្គ្រោះបានយកសាកសពចេញនៅម៉ោង ១១ និង ៣០ នាទីយប់។ដោយសារភ្លៀងធ្លាក់ខ្លាំង កូនអ្នកជិតខាងទាំងពីរមិនអាចទៅផ្ទះបាន ហើយស្នាក់នៅវៀត ដើម្បីលេងជាមួយកូន។ ឥទ្ធិពលខ្យល់ ត្រជាក់មួយរំកិលចុះពីប្រទេសចិន ដែលខ្យល់កន្ត្រាក់ខ្លាំង មានរយៈកម្ពស់ពី 1,500 ទៅ 3,000 ម៉ែត្រ បានបណ្តាលឱ្យមានភ្លៀងធ្លាក់យ៉ាងខ្លាំង នៅកន្លែងជាច្រើនក្នុងទីក្រុងហាណូយកាលពីថ្ងៃអាទិត្យ។

(អន្តរជាតិ)៖ ការនាំចេញទុរេនរបស់វៀតណាម ទៅកាន់ប្រទេសចិនមានការកើនឡើងគួរឱ្យ កត់សម្គាល់ នៅក្នុងត្រីមាសទីមួយនៃឆ្នាំ 2024 នេះបើយោងតាមស្ថិតិនៃពាណិជ្ជកម្មតាមច្រកព្រំដែន Youyi Guan ដែលដកស្រង់ដោយទីភ្នាក់ងារសារព័ត៌មានស៊ីនហួរបស់ប្រទេសចិន។ជាក់ស្តែង វៀតណាមបាននាំចេញទុរេនចំនួន ៣៥០០០ តោនទៅកាន់ប្រទេសចិន ក្នុងអំឡុងពេលនេះ ដែលមានតម្លៃជិត ១.៧៧ លានដុល្លារ។ ប្រទេស​ចិន​បាន​នាំ​ចូល​ទុរេន​សរុប​ចំនួន ៤៨០០០ តោន ដែល​មាន​តម្លៃ​ប្រមាណ ២.៥៦ លាន​ដុល្លារ​តាម​ច្រក​ព្រំដែន Youyi Guan។លោក Li Youyang នាយកផ្នែកពាណិជ្ជកម្មនៃក្រុមហ៊ុន Guangxi Baiguoyuan Technology Co.Ltd បានចាត់ទុកការកើនឡើងនៃការលក់ទុរេន ជាកត្តាសំខាន់ៗជាច្រើន ដោយនិយាយថា ជាមួយនឹង ភាពប្រសើរឡើងជាបន្តបន្ទាប់នៃនីតិវិធីនាំចូល និងការទទួលយកនូវបច្ចេកវិទ្យាស្តុក ទុកត្រជាក់កម្រិតខ្ពស់ ការលក់ទុរេនរបស់ក្រុមហ៊ុនត្រីមាសនៅត្រីមាសដំបូង បានកើនឡើង 20% ជារៀង រាល់ឆ្នាំ ហើយតម្លៃគឺទាបជាង 30% ទៅ 40% ធៀបនឹងឆ្នាំមុន។ ជា​លទ្ធផល​ហាង​ទុរេន​ជា​ច្រើន​របស់​ខ្លួន​អស់​ស្តុក។លោក Liu Minkun មកពីសាកលវិទ្យាល័យ Guangxi បានចង្អុលបង្ហាញពីចំណុចប្រសព្វ នៃកត្តាជំរុញ ប្រជាប្រិយភាពនៃផ្លែទុរេនពីបណ្តាប្រទេសសមាជិកអាស៊ាន ក្នុងចំណោមអ្នកប្រើប្រាស់ចិន រួមទាំង គុណភាពផលិតផលខ្ពស់ គុណសម្បត្តិខ្សែសង្វាក់ផ្គត់ផ្គង់ដ៏រឹងមាំ ទំនាក់ទំនងទ្វេភាគីជាវិជ្ជមាន ការរីក ដុះដាលនៃពាណិជ្ជកម្មអេឡិចត្រូនិក និងប្រព័ន្ធដឹកជញ្ជូន៕

(អន្តរជាតិ)៖ យោងតាមអ្នកគាំទ្រ និងសាលក្រមរបស់តុលាការ បានឱ្យដឹងថា អ្នកកាសែតសញ្ជាតិចិន ម្នាក់ ដែលបានជាប់ពន្ធនាគាររយៈពេល4 ឆ្នាំជុំវិញការរាយការណ៍របស់លោកស្រី អំពីការផ្ទុះឡើងនៃ Covid-19 ដំបូងនៅទីក្រុង Wuhan នឹងត្រូវដោះលែងនៅថ្ងៃចន្ទនេះ បន្ទាប់ពីការកាត់ទោសរបស់នាង។លោកស្រី Zhang Zhan  គឺជាអ្នកសារព័ត៌មានឯករាជ្យមួយរូបក្នុងចំណោមអ្នកកាសែត ចិនឯករាជ្យមួយ ចំនួដែលរាយការណ៍នៅទីក្រុង Wuhan បន្ទាប់ពីទីក្រុងដែលមានប្រជាជនចំនួន 11 លាននាក់ បានបិទទ្វារទាំងស្រុង ខណៈដែលអាជ្ញាធរចិនបានដាក់ការត្រួតពិនិត្យយ៉ាងតឹងរ៉ឹង លើការចុះរាយការណ៍ ពីប្រព័ន្ធផ្សព្វផ្សាយ។លោកស្រីត្រូវបានឃុំខ្លួនក្នុងខែឧសភា ឆ្នាំ 2020 ហើយត្រូវបានកាត់ទោសឱ្យជាប់ពន្ធនាគារ 4 ឆ្នាំជាច្រើន ខែពីបទ "រើសអើង និងបង្កបញ្ហា" ដែលជាការចោទប្រកាន់ដែលប្រើជាទូទៅដោយរដ្ឋាភិបាលចិន ដើម្បីកំណត់គោលដៅអ្នកប្រឆាំង និងសកម្មជនសិទ្ធិមនុស្ស។លោកស្រី Zhang នឹងត្រូវបញ្ចប់ការកាត់ទោសរបស់នាងនៅថ្ងៃចន្ទនេះ បើយោងតាមសាលក្រមរបស់ តុលាការ លើ សំណុំរឿងរបស់នាងដែលទទួលបាន និងបោះពុម្ពដោយក្រុមសិទ្ធិមនុស្ស។នៅក្នុងការនាំមុខចំពោះការដោះលែងដែលរំពឹងទុករបស់លោកស្រីនៅថ្ងៃចន្ទនេះ អ្នកគាំទ្រ និងក្រុមសិទ្ធិ មនុស្សបានអំពាវនាវឱ្យរដ្ឋាភិបាលចិនដោះលែង Zhang តាមកាលវិភាគ។នៅដើមខែកុម្ភៈឆ្នាំ 2020 ប៉ុន្មានថ្ងៃបន្ទាប់ពីទីក្រុង Wuhan បានបិទខ្ទប់ លោកស្រី Zhang បានធ្វើដំណើរប្រហែល 400 ម៉ាយពីទីក្រុងស៊ាងហៃ ទៅកាន់ទីក្រុងកណ្តាលប្រទេសចិន ដើម្បីរាយ ការណ៍អំពីការរីករាលដាលនៃមេរោគ និងការព្យាយាមជាបន្តបន្ទាប់ដើម្បីទប់ស្កាត់វា ខណៈដែល អាជ្ញាធរបានរឹតបន្តឹងលើប្រព័ន្ធផ្សព្វផ្សាយឯកជនរបស់ចិន។អស់រយៈពេលជាង 3 ខែ លោកស្រី​បានចងក្រងឯកសារខ្លីៗនៃជីវិតក្រោមការបិទខ្ទប់ ក្នុងទីក្រុង Wuhan និងការពិតដ៏អាក្រក់ដែលប្រជាជនរបស់ខ្លួនប្រឈមមុខ ចាប់ពីមន្ទីរពេទ្យដែលហៀរទៅដោយអ្នកជំងឺ និងហាងទំនិញទទេស្អាត ខណៈដែលពិភពលោកបានទប់ស្កាត់ការរីករាលដាលនៃមេរោគ។ លោកស្រីបានបង្ហោះការសង្កេត រូបថត និងវីដេអូរបស់លោកនៅលើ Wechat, Twitter និង YouTube ហើយវីដេអូទាំងនោះត្រូវបានរារាំង នៅក្នុងប្រទេសចិន៕

(សាធារណរដ្ឋកូរ៉េ)៖ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងឯកឧត្តម CHEONG Inkyo រដ្ឋមន្ត្រីក្រសួងពាណិជ្ជកម្មនៃសាធារណរដ្ឋកូរ៉េ នៅព្រឹកថ្ងៃចន្ទ ទី១៣ ខែឧសភា ឆ្នាំ២០២៤ បានចូលរួមជាសហប្រធានដឹកនាំកិច្ចប្រជុំលើកទី១ របស់គណៈកម្មាធិការចម្រុះនៃកិច្ចព្រមព្រៀងពាណិជ្ជកម្មសេរីកម្ពុជា-សាធារណរដ្ឋកូរ៉េ (CKFTA) ​នៅសណ្ឋាគារ Lotte Hotel World។ គណៈប្រតិភូកម្ពុជាត្រូវបានចូលរួម ដោយក្រសួងស្ថាប័នពាក់ព័ន្ធរួមមាន ក្រសួងសេដ្ឋកិច្ចនិងហិរញ្ញវត្ថុ និងអគ្គនាយកដ្ឋានគយនិងរដ្ឋាករកម្ពុជា។ជាកិច្ចចាប់ផ្ដើម ឯកឧត្តម CHEONG Inkyo រដ្ឋមន្ត្រីក្រសួងពាណិជ្ជកម្មនៃសាធារណរដ្ឋកូរ៉េ បានសម្តែងការស្វាគមន៍យ៉ាងកក់ក្ដៅចំពោះវត្តមានលោកជំទាវរដ្ឋមន្រ្តី និងគណៈប្រតិភូកម្ពុជា ព្រមទាំងកត់សម្គាល់លទ្ធផលវិជ្ជមាននៃកិច្ចសហប្រតិបត្តិការពាណិជ្ជកម្មជារួមរវាងប្រទេសទាំងពីរ ក៏ដូចជាលទ្ធផលដ៏គួកត់សម្គាល់ពីការអនុវត្តកិច្ចព្រមព្រៀង CKFTA។ ជាមួយគ្នានេះដែរ លោកជំទាវរដ្ឋមន្រ្តី បានឯកភាពជាមួយការកត់សម្គាល់របស់ភាគីកូរ៉េ ព្រមទាំងបង្ហាញសុទិដ្ឋិនិយមថា កិច្ចព្រមព្រៀង CKFTA នឹងក្លាយជាយន្តការមួយដ៏មានសារៈសំខាន់ដើម្បីបន្តលើកកម្ពស់កិច្ចសហប្រតិបត្តិការពាណិជ្ជកម្ម និងវិនិយោគបន្ថែមទៀត។កិច្ចប្រជុំលើកទី១ នេះ រៀបចំឡើងក្នុងគោលបំណង ដើម្បីពិភាក្សាតាមដានវឌ្ឍនភាពនៃទំនាក់ទំនងពាណិជ្ជកម្ម រវាងកម្ពុជានិងសាធារណរដ្ឋកូរ៉េ បន្ទាប់ពីការចូលជាធរមាននៃកិច្ចព្រមព្រៀងពាណិជ្ជកម្មសេរីរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋកូរ៉េ ចាប់តាំងពីថ្ងៃទី១ ខែធ្នូ ឆ្នាំ២០២២ មក៕

(មូស្គូ)៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានដកតំណែងរដ្ឋមន្ត្រីការពារជាតិ លោក Sergei Shoigu នៅក្នុងការរង្គោះរង្គើដ៏ធំមួយចំពោះថ្នាក់ដឹកនាំយោធារបស់រុស្ស៊ី អស់រយៈពេលជាងពីរឆ្នាំ ក្នុងការវាយលុកអ៊ុយក្រែនរបស់ខ្លួន។លោកពូទីន បានស្នើសេដ្ឋវិទូលោក Andrey Belousov ជាអ្នកជំនួសលោក Shoigu នេះបើយោងតាមបញ្ជី នៃការតែងតាំងថ្នាក់រដ្ឋមន្ត្រីដែលចេញផ្សាយដោយក្រុមប្រឹក្សាសហព័ន្ធដែលជាសភាជាន់ខ្ពស់របស់ រុស្ស៊ី។ការផ្លាស់ប្តូរនេះកើតឡើងក្នុងពេលដ៏សំខាន់មួយ នៅក្នុងជម្លោះជាមួយកងទ័ពរុស្ស៊ីដែលកំពុងរុលទៅមុខ នៅភាគខាងកើតអ៊ុយក្រែន ហើយទើបតែចាប់ផ្តើមប្រតិបត្តិការជើងគោកថ្មីដ៏សំខាន់មួយប្រឆាំងនឹងតំបន់ Kharkiv ភាគឦសាន។ទោះបីជាមានការបរាជ័យផ្នែកយោធាជាច្រើននៅក្នុងឆ្នាំដំបូងនៃយុទ្ធនាការ  រួមទាំងការបរាជ័យ ក្នុងការដណ្តើមយករដ្ឋធានី Kyiv របស់អ៊ុយក្រែន និងការដកថយពីតំបន់ Kharkiv និង Kherson ភាគខាងត្បូងក៏ដោយ ក៏លោក Shoigu  បានឈរក្បែរលោក Putin រហូតមកដល់បច្ចុប្បន្ន។ដោយពន្យល់ពីពេលវេលានៃការសម្រេចចិត្តនេះ វិមានក្រឹមឡាំងបាននិយាយថា វាត្រូវការឱ្យក្រសួងការ ពារជាតិរក្សា "ភាពច្នៃប្រឌិត"។ប្រព័ន្ធផ្សព្វផ្សាយរដ្ឋបានដកស្រង់សម្តីអ្នកនាំពាក្យវិមានក្រឹមឡាំង លោក Dmitry Peskov បាននិយាយ នៅក្នុងសន្និសីទសង្ខេបស្តីពីការតែងតាំងនេះថា "ក្រសួងការពារជាតិត្រូវតែបើកចំហយ៉ាង ពិតប្រាកដ ចំពោះការបង្កើតថ្មី ដល់ការដាក់បញ្ចូលនូវគំនិតជឿនលឿនទាំងអស់ ដល់ការបង្កើតលក្ខខណ្ឌ សម្រាប់ការប្រកួតប្រជែងផ្នែកសេដ្ឋកិច្ច" ។ លោក Peskov បាននិយាយថា "សមរភូមិត្រូវបានឈ្នះដោយ អ្នកណាដែលបើកទូលាយជាង ចំពោះការច្នៃប្រឌិត។រដ្ឋមន្ត្រីការពារជាតិថ្មី លោកBelousov គ្មាន​ប្រវត្តិ​ខាង​យោធាទេ តែគឺជា​ទីប្រឹក្សា​សេដ្ឋកិច្ច​ដ៏​មាន​ឥទ្ធិពល​បំផុត​របស់​លោក Putin ក្នុង​មួយ​ទសវត្សរ៍​ចុងក្រោយ​នេះ។លោក Shoigu ដែលមានអាយុ 68 ឆ្នាំត្រូវបានតែងតាំងជារដ្ឋមន្ត្រីការពារជាតិរុស្ស៊ីក្នុងឆ្នាំ 2012 ហើយមានអាជីពនយោបាយអស់រយៈពេលជាច្រើនទសវត្សរ៍នៃភាពជាប់បានយូរដែលមិនអាចប្រៀបផ្ទឹមបាននៅក្នុងប្រទេសរុស្ស៊ីក្រោយសូវៀត។មុនពេលដែលរុស្ស៊ីចាប់ផ្តើមយុទ្ធនាការយោធាទ្រង់ទ្រាយធំរបស់ខ្លួនលើអ៊ុយក្រែនក្នុងខែកុម្ភៈឆ្នាំ 2022 លោកត្រូវបានគេមើលឃើញថាជាអនុសេនីយម្នាក់ដែលគួរឱ្យទុកចិត្តបំផុតរបស់លោកពូទីន៕

(ភ្នំពេញ)៖ ឯកឧត្តម កត្តា អ៊ន រដ្ឋលេខាធិការ និងជាអ្នកនាំក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា ករណីបងប្អូនអតីតបុគ្គលិក ណាហ្កាវើល (Naga World) ក្រសួងការងារ និងបណ្តុះបណ្តាលវិជ្ជាជីវៈ បានប្រឹងប្រែងសម្របសម្រួលដោះស្រាយករណីកូដករណាហ្កាវើលនេះតាមសមត្ថកិច្ច និងតួរនាទី ដូចមានចែងក្នុងច្បាប់ការងារ ដោយប្រើប្រាស់យន្តការដោះស្រាយវិវាទការងារតាមការសម្របសម្រួលផ្សះផ្សាចំនួន២លើក ប៉ុន្តែភាគីវិវាទមិនសះជា។ ក្រសួងបានបញ្ជូនករណីនេះទៅដោះស្រាយតាមយន្តការក្រុមប្រឹក្សាអាជ្ញាកណ្តាល។ ក្រុមប្រឹក្សាអាជ្ញាកណ្តាលបានចេញសេចក្តីសម្រេចរួចហើយផងដែរ។ ក្រុមហ៊ុនណាហ្កាវើលក៏បានផ្ទេរប្រាក់បំណាច់ និងសំណងបញ្ចប់កិច្ចសន្យាការងារចូលគណនីធនាគាររបស់អតីតបុគ្គលិកទាំង នោះរួចរាល់ជាយូរមកហើយ។ គណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅក្រុមមុខសញ្ញា (គ.ក.ប.) បានសម្របសម្រួលដោះស្រាយករណីនេះចំនួន ២៧លើក តែភាគីទាំងពីរមិនមានដំណោះស្រាយបញ្ចប់វិវាទនោះទេ។ គិតត្រឹមថ្ងៃទី១៣ ខែឧសភា ឆ្នាំ២០២៤ នេះ ក្នុងចំណោមអតីតបុគ្គលិកទាំង ៣៧៣ នាក់នោះ មានអតីតបុគ្គលិកចំនួន ២៩៣នាក់ បានយល់ព្រមទទួលយកការទូទាត់នូវប្រាក់បំណាច់ និងសំណងបញ្ចប់កិច្ចសន្យាការងារជាមួយក្រុមហ៊ុន ដែលធ្វើឱ្យអតីតបុគ្គលិកដែលមិនព្រមទទួលយកសំណងនៅសល់ត្រឹម ៨០នាក់ប៉ុណ្ណោះ ហើយក្នុងចំណោមបុគ្គលិក ៨០នាក់នេះ សព្វថ្ងៃមួយចំនួនបានមានការងារថ្មីធ្វើ ឯអ្នកដែលជាកូដករកំពុងបន្តការតវ៉ាសព្វថ្ងៃមានប្រហែលជាង២០នាក់ប៉ុណ្ណោះ ។ជាដំណោះស្រាយ ខ្ញុំយល់ឃើញថា៖១.បងប្អូនអតីតបុគ្គលិកណាហ្កាវើសគួរមានជម្រើសធ្វើការងារដើម្បីមានប្រាក់ចំណូលឬប្រាក់ខែសម្រាប់ទ្រទ្រង់ជីវភាពគ្រួសារ។ ទីភ្នាក់ងារជាតិមុខរបរ និងការងារនៃក្រសួងការងារ (NEA) ជួយសម្របសម្រួលស្វែងរកការងារថ្មីជូនបងប្អូន។ សព្វថ្ងៃនេះមានការងាររាប់ម៉ឺនកន្លែងកំពុងត្រូវការបុគ្គលិកធ្វើការដូចជា ធនាគារ ក្រុមហ៊ុន រោងចក្រ សហគ្រាស ។ល។ ២.បងប្អូនកូដករណាហ្កាវើល ត្រូវបង្ហាញនូវឆន្ទះរបស់ខ្លួនក្នុងការដោះស្រាយបញ្ចប់វិវាទការងារនេះ ដើម្បីផលប្រយោជន៍ពិតប្រាកដរបស់កូដករ ជៀសជាងការធ្វើកូដកម្មក្នុងរបៀបវារៈផ្សេង និងតាមការរៀបចំដោយក្រុមណាមួយ ដែលយកកូដករជាឧបករណ៍របស់គេ។ ៣. ក្រសួងការងារ, ក្រុមប្រឹក្សាអាជ្ញាកណ្តាល, និងគណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅក្រុមមុខសញ្ញា (គ.ក.ប.) បានបំពេញតួនាទីតាមសមត្ថកិច្ចរបស់ខ្លួនត្រឹមត្រូវតាមច្បាប់។ យោងតាមនីតិវិធីច្បាប់ ប្រសិនបើវិវាទការងារនេះមិនអាចស្វែងរកដំណោះស្រាយបានដោយការផ្សះផ្សា នីតិវិធីបន្ទាប់គឺ ភាគីណាមួយអាចប្តឹងទៅតុលាការដើម្បីរកដំណោះស្រាយចុងក្រោយ៕