ភ្នំពេញ ៖ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានថ្លែងក្នុងពិធីបើកសន្និបាតបូកសរុបលទ្ធផលការងារពាណិជ្ជកម្ម ឆ្នាំ២០២៥ និងទិសដៅការងារពាណិជ្ជកម្ម ឆ្នាំ២០២៦ របស់ក្រសួងពាណិជ្ជកម្ម កាលពីថ្ងៃទី៨ ខែមករា ថា ៖ កម្ពុជាធ្វើពិពិធកម្មទៅកាន់ពិភពលោកកាន់តែធំ ដោយបើកទីផ្សារថ្មីៗនាំចេញផលិតផលកើនដល់១៦៩ប្រទេស ក្នុងឆ្នាំ២០២៥។លោកជំទាវរដ្ឋមន្រ្តីក្រសួងពាណិជ្ជកម្ម ថ្លែងបន្តថា ៖ ការកើនឡើងទីផ្សារថ្មីសម្រាប់នាំចេញផលិតផល នឹងជួយចូលរួមលើកកម្ពស់កិត្តិនាម និងឧត្តមភាពប្រកួតប្រជែងរបស់កម្ពុជា នៅក្នុងខ្សែចង្វាក់ផ្គត់ផ្គង់នៃតំបន់ នៃទីផ្សារតំបន់និងសកល ព្រមទាំងបង្កើតតម្លៃបន្ថែមឱ្យកាន់តែខ្ពស់ នៅក្នុងខ្សែច្រវាក់តម្លៃសម្រាប់ផលិតកម្មនិងវិនិយោគិន។ បើតាម លោកជំទាវ ចម និម្មល ក្នុងឆ្នាំ២០២៥ ដៃគូពាណិជ្ជកម្មសំខាន់ៗរបស់កម្ពុជា រួមមាន៖ ប្រទេសចិន, អាស៊ាន, សហរដ្ឋអាម៉េរិក, សហភាពអឺរ៉ុប, ជប៉ុន, កាណាដា, ចក្រភពអង់គ្លេស, សាធារណរដ្ឋកូរ៉េ, អូស្ត្រាលី, ឥណ្ឌា, អេមីរ៉ាត់អារ៉ាប់រួម ជាដើម សម្រេចបានទំហំពាណិជ្ជកម្ម ក្នុងទឹកប្រាក់ប្រមាណជិត៦៦ពាន់លានដុល្លារសហរដ្ឋអាម៉េរិក។ទំនិញនាំចេញសំខាន់ៗរបស់កម្ពុជាទៅកាន់ទីផ្សារអន្តរជាតិ រួមមាន៖ សម្លៀកបំពាក់, ស្បែកជើង, សម្ភារធ្វើដំណើរនិងកាបូប, អង្ករ, គ្រាប់ស្វាយចន្ទី, ស្ករត្នោត, ដំឡូងមី, សំបកកង់ឡាន, ជ័រកៅស៊ូ, គ្រឿងអេឡិចត្រូនិក, កង់, ខ្សែភ្លើងនិងបង្គុំខ្សែភ្លើង, គ្រឿងសង្ហារិម ចំណីសត្វជាដើម។ល។ លោកជំទាវ ចម និម្មល បានអះអាងថា ក្រសួងពាណិជ្ជកម្ម នឹងបន្តជំរុញការអភិវឌ្ឍសេដ្ឋកិច្ច និងពាណិជ្ជកម្មដោយពង្រឹងទីផ្សារដែលមានស្រាប់ ពង្រីកទីផ្សារថ្មីៗ ព្រមទាំងធ្វើសមាហរណកម្មទៅក្នុងសេដ្ឋកិច្ចតំបន់ និងពិភពលោក និងរក្សាស្ថិរភាពទីផ្សារក្នុងស្រុក៕

(ដាកា)៖ ក្រុមហ៊ុនអាកាសចរណ៍ជាតិដាកាបាននិយាយថា ប្រទេសបង់ក្លាដែស និងប៉ាគីស្ថាននឹងចាប់ផ្តើមជើងហោះហើរត្រង់ឡើងវិញបន្ទាប់ពីជាងមួយទសវត្សរ៍ ខណៈដែលទំនាក់ទំនងកាន់តែក្តៅគគុក និងតុល្យភាពអំណាចក្នុងតំបន់ផ្លាស់ប្តូរ។ក្រុមហ៊ុនអាកាសចរណ៍ Biman Bangladesh Airlines គ្រោងនឹងហោះហើរជើងហោះហើរដំបូងរបស់ខ្លួនពីដាកាទៅការ៉ាជីនៅថ្ងៃទី 29 ខែមករា ហើយនឹងត្រូវដំណើរការពីរដងក្នុងមួយសប្តាហ៍ ដែលជាជើងហោះហើរធម្មតាលើកដំបូងចាប់តាំងពីឆ្នាំ 2012។លោក Bosra Islam អ្នកគ្រប់គ្រងក្រុមហ៊ុនអាកាសចរណ៍បានប្រាប់ AFP ថា យើងកំពុងចាប់ផ្តើមឡើងវិញនូវផ្លូវដាកា-ការ៉ាជីជាមួយនឹងជើងហោះហើរពីរក្នុងមួយសប្តាហ៍។ប្រទេសបង់ក្លាដែស និងប៉ាគីស្ថាន ដែលបែងចែកតាមភូមិសាស្ត្រដោយប្រទេសឥណ្ឌាជាង 1500 គីឡូម៉ែត្រ ធ្លាប់ជាប្រទេសតែមួយ។ ពួកគេបានបែកបាក់គ្នាបន្ទាប់ពីសង្គ្រាមដ៏ជូរចត់ក្នុងឆ្នាំ 1971។អ្នកធ្វើដំណើររវាងបង់ក្លាដែស និងប៉ាគីស្ថានបច្ចុប្បន្នត្រូវតែប្រើប្រាស់ជើងហោះហើរតភ្ជាប់តាមរយៈមជ្ឈមណ្ឌលឈូងសមុទ្រដូចជាឌូបៃ និងដូហា៕

(ភ្នំពេញ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា បានដឹកនាំកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ របស់ក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា (ក.ផ.ផ.) និងលើកទិសដៅការងារបន្តឆ្នាំ២០២៦។ កិច្ចប្រជុំនេះ មានការអញ្ជើញចូលរួមពី សមាជិក ក.ផ.ផ. ដែលមាន ឯកឧត្តម លោកជំទាវ មកពីក្រសួង ស្ថាប័នរដ្ឋ និង លោកឧកញ៉ា ឧកញ៉ា លោក លោកស្រី ដែលមកពីផ្នែកឯកជន ព្រមទាំងអង្គភាពប្រតិបត្តិរបស់ ក.ផ.ផ. សរុបប្រមាណ ៣០រូប។ សូមបញ្ជាក់ជូនថានេះក៏ជាកិច្ចប្រជុំលើកទី៨ របស់ក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា ដែលរៀបចំឡើងក្នុងគោលបំណង ៖ (១) ពិនិត្យលើវឌ្ឍនភាពការងារសម្រេចបានក្នុងឆ្នាំ២០២៥, (២) ការវាយតម្លៃអំពី ចំណុចខ្លាំង, ចំណុចខ្វះខាត, បញ្ហាប្រឈម និងសំណូមពរ, និង (៣) កំណត់ទិសដៅការងារបន្តសម្រាប់ឆ្នាំ២០២៦។អង្គប្រជុំបានកត់សម្គាល់ និងវាយតម្លៃខ្ពស់ចំពោះលទ្ធផលការងារដែលសម្រេចបាននាពេលកន្លង គឺពិតណាស់កើតចេញពីការតម្រង់ទិសជាប់ជាប្រចាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងស្របតាមអភិក្រមជវភាពនៃប្រព័ន្ធតួអង្គតែមួយ, សសរស្តម្ភយុទ្ធសាស្ត្រទាំង៦របស់វិស័យទេសចរណ៍ បានខិតខំប្រឹងប្រែងបំពេញការងារទៅតាមជំនាញសមត្ថកិច្ចរៀងៗខ្លួន ក្នុងស្មារតីបុរេសកម្ម, សកម្ម និងអន្តរសកម្ម ដើម្បីរក្សាភាពធន់នៃវិស័យទេសចរណ៍កម្ពុជាទប់ទល់នឹងវិបត្តិដែលបាននិងកំពុងប្រឈម។ឯកឧត្តមប្រធានក្រុមប្រឹក្សាភិបាល ក៏បានគូសបញ្ជាក់បន្ថែមថា នៅក្នុងបរិការណ៍និងអរិភាពដែលកើតមានឡើងនាពេលបច្ចុប្បន្ន ជាមួយនឹងស្ថានភាពកាន់តែប្រែប្រួលរហ័សជាងការរំពឹងទុក មានដូចជា ទស្សនវិស័យសេដ្ឋកិច្ចសកលនៅតែបន្តត្រូវបានហ៊ុមព័ទ្ធដោយហានិភ័យ, ភូមិសាស្ត្រនយោបាយនៅបន្តស្ថានភាពតាងតឹង, ការឈ្លានពានពីសំណាក់យោធាថៃមកលើដែនអធិបតេយ្យភាពកម្ពុជា គឺជាកាលៈទេសៈដ៏លំបាកដែលទាមទារឱ្យមានការចូលរួមពីគ្រប់ផ្នែក គ្រប់ថ្នាក់ ក្នុងស្មារតីសាមគ្គីភាពរួបរួមឯកភាពជាធ្លុងមួយក្រោមដំបូលរបស់រាជរដ្ឋាភិបាល ដើម្បីពង្រឹងសមត្ថភាពបន្ថែមទៀត, ពង្រឹងភាពធន់បន្ថែមទៀត និង ពង្រឹងភាពម្ចាស់ការបន្ថែមទៀត។ក្នុងន័យនេះ, ក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា បានដាក់ចេញនូវផែនការយុទ្ធសាស្ត្រ វិធានការគន្លឹះ ទិសដៅការងារបន្ត និងសកម្មភាពអនុវត្តជាក់ស្តែងសម្រាប់ឆ្នាំ២០២៦ សំដៅម៉្យាង បន្តរក្សាឱ្យបាននូវភាពធន់នៃវិស័យទេសចរណ៍កម្ពុជា, និង ម៉្យាងទៀតបន្តជំរុញសន្ទុះវិស័យទេសចរណ៍ ដើម្បីរក្សានូវភាពប្រកួតប្រជែងខ្ពស់ក្នុងតំបន់ ប្រកបដោយភាពជឿជាក់ ច្នៃប្រឌិត បត់បែនឱ្យទាន់សភាពការណ៍ និង មានភាពប្រយ័ត្នប្រយែងខ្ពស់។ 

(ភ្នំពេញ)៖ នៅព្រឹកថ្ងៃទី៩ ខែមករា ឆ្នាំ២០២៦នេះ បងប្អូនកម្មករនិយោជិតនៃរោងចក្រ ញូថាហ្គេត ហ្វ៊ូតវែរ (ខេមបូឌា) ឯ.ក ដែលមានអាសយដ្ឋានស្ថិតនៅ ភូមិទីប៉ាត់ ឃុំជាងទង ស្រុកត្រាំកក់ ខេត្តតាកែវ បានចូលធ្វើការងារតាមធម្មតាវិញហើយ បន្ទាប់ពីក្រសួងការងារ និងបណ្ដុះបណ្ដាលវិជ្ជាជីវៈ បានចុះសម្រួលដោះស្រាយករណីតវ៉ាដោយផ្ទាល់និងបានបញ្ចប់បញ្ហាសព្វគ្រប់នៅព្រឹកនេះ។ នេះបើតាមលោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ។លោកថ្លែងថា៖«ក្រោមការសម្របសម្រួលបន្ថែមទៀតពីសំណាក់មន្ត្រីជំនាញនៃក្រសួងការងារ និងបណ្តុះបណ្តាលវិជ្ជាជីវៈយ៉ាងលឿនរហ័ស ក្រោមការយកចិត្តទុកដាក់ខ្ពស់ នៅព្រឹកថ្ងៃទី៩ ខែមករា ឆ្នាំ២០២៦នេះការទាមទាររបស់បងប្អូនកម្មករ-កម្មការិនី នៃរោងចក្រ ញូថាហ្គេត ហ្វ៊ូតវែរ ត្រូវបានដោះស្រាយបញ្ចប់ ហើយពួកគាត់បានចូលបម្រើការងារជាធម្មតាវិញហើយ»។ សូមជម្រាបថា កាលពីរសៀលថ្ងៃទី៨ និងព្រឹកថ្ងៃទី៩ ខែមករា ឆ្នាំ២០២៦នេះ មានករណីបងប្អូនកម្មករនិយោជិតនៅរោងចក្រខាងលើបានធ្វើកូដកម្មទាមទារឱ្យរោងចក្រអនុវត្តនូវលក្ខខណ្ឌការងារចំនួន១២ចំណុច។អ្នកនាំពាក្យដដែលរូបនេះ បានអះអាងថា រាល់បញ្ហានានារបស់បងប្អូនកម្មករ-និយោជិត មិនថាតែក្នុងវិស័យកាត់ដេរ ឬវិស័យផ្សេងទៀតនោះទេ គឺក្រសួងការងារ តែងតែយកចិត្តទុកដាក់ដោះស្រាយដោយលឿនរហ័ស និងប្រកបដោយប្រសិទ្ធភាពដោយមិនព្រងើយកន្តើយនោះឡើយ។ បន្ថែមពីនេះ កម្មករនិយោជិតទាំងអស់អាចប្តឹង ឬផ្តល់ដំណឹងមកលេខHotline “១២៨៦” ដើម្បីឱ្យមន្ត្រីជំនាញរបស់ក្រសួង ដោះស្រាយបញ្ហាជូន៕

(ភ្នំពេញ)៖ លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី ៩ ខែមករា ឆ្នាំ២០២៦ បានឱ្យដឹងថាការទាមទារប្តូរការឈប់សម្រាកប្រចាំឆ្នាំជាថវិកា មិនមានចែងក្នុងច្បាប់នោះឡើយ។លោកស៊ុន មេសា៖ “យោងតាមកថាខណ្ឌទី៣ មាត្រា១៦៧ នៃច្បាប់ស្តីពីការងារ «អនុសញ្ញារួមណាដែលមានគ្រោងឱ្យប្រាក់បំណាច់ដើម្បីទូទាត់សម្រាប់ជួសការឈប់សម្រាកព្រមទាំងការព្រមព្រៀងស្តីពីការបោះបង់ ឬមិនព្រមប្រើសិទ្ធិឈប់សម្រាកប្រចាំឆ្នាំត្រូវទុកជាមោឃហើយគ្មានហេតុផលអ្វីទាំងអស់» មានន័យថា ការឈប់សម្រាកប្រចាំឆ្នាំដែលមានប្រាក់ឈ្នួលមិនអាចទូទាត់ជាប្រាក់បានទេ”។លោកបន្ថែមថា ការឈប់សម្រាកប្រចាំឆ្នាំចំនួន១៨ថ្ងៃក្នុងមួយឆ្នាំគឺជាពេលវេលាមួយដែលតម្រូវឱ្យកម្មករនិយោជិតធ្វើការឈប់សម្រាកដើម្បីថែទាំសុខភាពទាំងផ្លូវកាយនិងផ្លូវចិត្ត គឺមិនអាចទាមទារឱ្យមានការទូទាត់ជាប្រាក់នៅពេលដែលកម្មករនិយោជិតកំពុងធ្វើការនៅក្នុងសហគ្រាស ក្រុមហ៊ុន រោងចក្រ បានទេ តែអាចទូទាត់ជាប្រាក់បាននៅពេលរំលាយកិច្ចសន្យាការងារ (បញ្ឈប់ពីការងារ)។ការបញ្ជាក់នេះ គឺធ្វើឡើងក្រោយពេលដែលបងប្អូនកម្មករនិយោជិតនៃរោងចក្រញូ ថាហ្គេតដែលមានទីតាំងក្នុងស្រុកត្រាំកក់ ខេត្តតាកែវ ដែលចង់ប្តូរថ្ងៃឈប់សម្រាកប្រចាំឆ្នាំជាថវិកា៕

(កំពង់ធំ)៖ រដ្ឋបាលខេត្តកំពង់ធំ និងក្រុមហ៊ុនរ៉ូយ៉ាល់គ្រុបភ្នំពេញ អេសអ៊ីហ្សិត ម.ក. (Royal Group Phnom Penh SEZ Plc.) របស់អ្នកឧកញ៉ា គិត ម៉េង នាថ្ងៃទី០៧ ខែមករា ឆ្នាំ២០២៦ បានចុះអនុស្សរណៈនៃការយោគយល់ ស្តីពីការសិក្សាសមិទ្ធិលទ្ធភាព ក្នុងការបង្កើតសួនកសិ-ឧស្សាហកម្ម ក្នុងខេត្តកំពង់ធំ សម្រាប់ការកែច្នៃកសិផលនានា នៅលើផ្ទៃដីប្រមាណ ៣០០ហិកតា ដែលស្ថិតនៅក្នុងខេត្តកំពង់ធំ។នាឱកាសនោះ លោក នួន ផារ័ត្ន អភិបាលខេត្តកំពង់ធំ បានថ្លែងថា ចុះអនុស្សរណៈនេះ គឺសម្រាប់ការកែច្នៃកសិផលនានា ដែលមិនផ្តោតលើការកែច្នៃគ្រាប់ស្វាយចន្ទីនោះទេ។ គម្រោងសួនកសិ-ឧស្សាហកម្មខេត្តកំពង់ធំ ដែលបានចាប់ផ្តើមសិក្សានាពេលនេះ ជាគម្រោងអមនឹងគម្រោងធំសួនឧស្សាហកម្មកែឆ្នៃគ្រាប់ស្វាយចន្ទី ដែលគម្រោងទាំងពីរនេះ កំពុងត្រូវបានផ្តួចផ្តើម ជំរុញ និងគាំទ្រ ប្រកបដោយការយកចិត្តខ្ពស់ ពីសំណាក់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។លោក នួន ផារ័ត្ន បានបន្ថែមទៀតថា ក្រោមការដឹកនាំប្រកបដោយចក្ខុវិស័យវែងឆ្ងាយ និងស្វាហាប់របស់ប្រមុខរាជរដ្ឋាភិបាលកម្ពុជា រដ្ឋបាលខេត្តកំពង់ធំ បាននិងកំពុងខិតខំធ្វើយ៉ាងណា អភិវឌ្ឍសេដ្ឋកិច្ចខេត្ត សំដៅលើកកម្ពស់ជីវភាពរបស់បងប្អូនប្រជាពលរដ្ឋ ឱ្យកាន់តែប្រសើរឡើងពីមួយថ្ងៃទៅមួយថ្ងៃ។លោក UEMATSU Hiroshi នាយកប្រតិបត្តិក្រុមហ៊ុនរ៉ូយ៉ាល់គ្រុបភ្នំពេញ អេសអ៊ីហ្សិត ម.ក. (Royal Group Phnom Penh SEZ Plc.) បានថ្លែងកោតសរសើរ ដល់ការអភិវឌ្ឍរបស់ខេត្តកំពង់ធំ និងបានថ្លែងពីបំណងរបស់ក្រុមហ៊ុន ក្នុងការចូលរួមជាមួយរដ្ឋបាលខេត្ត ក៏ដូចជារាជរដ្ឋាភិបាលកម្ពុជា ដើម្បីធ្វើពិពិធកម្មសេដ្ឋកិច្ចខេត្ត លើកកម្ពស់សេដ្ឋកិច្ចខេត្ត និងជីវភាពរបស់បងប្អូនប្រជាពលរដ្ឋ។លោកនាយកប្រតិបត្តិក្រុមហ៊ុន បានបន្ថែមថា ដោយសង្កេតឃើញពីសក្តានុពលរបស់ខេត្តកំពង់ធំ លោកមានសុទិដ្ឋិនិយមខ្ពស់លើភាពជោគជ័យនៃគម្រោងនេះ។ជាមួយគ្នានោះដែរ លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ នៃឧត្តមក្រុមប្រឹក្សាសេដ្ឋកិច្ចជាតិ បានថ្លែងថា ការបង្កើតជាសួនកសិឧស្សាហកម្ម គឺជាការបង្កើតជម្រើសមួយ ក្នុងការកសាងសេដ្ឋកិច្ចខេត្តកំពង់ធំ មានសេដ្ឋកិច្ចរឹងមាំ យូរអង្វែង។ លើសពីនេះទៀត ការបង្កើតសួនកសិ-ឧស្សាហកម្ម សម្រាប់កែច្នៃកសិផលនានា នៅក្នុងខេត្តកំពង់ធំ មុននឹងនាំចេញផលិតផលទាំងនោះ ទៅកាន់ទីផ្សារ នឹងជួយបង្កើនតម្លៃកសិផល ហើយផលិតផលទាំងនោះ នឹងទទួលបានការចាប់អារម្មណ៍កាន់តែខ្លាំងពីទីផ្សារ ថែមទាំងបង្កើតឱកាសការងារ ជូនប្រជាពលរដ្ឋក្នុងខេត្តផងដែរ។លោកបណ្ឌិតបន្ថែមទៀតថា កសិផលកម្ពុជា មិនទាន់កែច្នៃជាច្រើន ត្រូវបានលក់ទៅតាមបណ្តាប្រទេសជិតខាង ហើយប្រទេសទាំងនោះ យកទៅកែច្នៃជាផលិតផល មានតម្លៃជាងកសិផលដើម៕

(ពោធិ៍សាត់-ព្រះវិហារ)៖ ថៃបានបន្តបង្ហោះដ្រូន២៧គ្រឿង រំលោភចូលដែនអធិបតេយ្យកម្ពុជា នៅខេត្តពោធិ៍សាត់ និងខេត្តព្រះវិហារ កាលពីយប់ថ្ងៃទី៧ ខែមករា ឆ្នាំ២០២៦។នេះបើយោងតាមសេចក្ដីប្រកាសរបស់ ក្រសួងមហាផ្ទៃ ដែលមានខ្លឹមសារថា​៖ កាលពីយប់ថ្ងៃទី៧ ខែមករា ឆ្នាំ២០២៦ ភាគីថៃបានបន្តបង្ហោះដ្រូនរំលោភចូលដែនអធិបតេយ្យរបស់កម្ពុជា ក្នុងនោះនៅខេត្តពោធិ៍សាត់ មាន២គ្រឿង និងខេត្តព្រះវិហារ មាន២៥គ្រឿង។គួររំលឹកថា បន្ទាប់ពីមានកិច្ចប្រជុំពិសេសលើកទី៣នៃគណៈកម្មាធិការព្រំដែនទូទៅ(GBC) រវាងកម្ពុជា-ថៃ នាថ្ងៃទី២៧ ខែធ្នូ និងកិច្ចប្រជុំត្រីភាគីរវាងកម្ពុជា ថៃ និងចិន នៅខេត្តយូណាន ប្រទេសចិន នាថ្ងៃទី២៩ ខែធ្នូ ឆ្នាំ២០២៥ ស្ថានការណ៍តាមបណ្តោយព្រំដែនកម្ពុជា-ថៃ បានវិលទៅរកភាពស្ងប់ស្ងាត់និងបានប្រសើរឡើងវិញហើយ។ កម្ពុជាក៏បានប្តេជ្ញាចិត្តយ៉ាងម៉ឺងម៉ាត់ក្នុងការ ធានាការរក្សាបទឈប់បាញ់បច្ចុប្បន្នឱ្យនៅខ្ជាប់ខ្ជួន និងកិច្ចព្រមព្រៀងពាក់ព័ន្ធឱ្យបានពេញលេញ ដោយស្មោះត្រង់ និងប្រកបដោយសុច្ឆន្ទៈ រួមទាំងការអនុញ្ញាតឱ្យប្រជាជនស៊ីវិលភៀសសឹកបានវិលត្រឡប់ទៅទីលំនៅវិញប្រកបដោយសុវត្ថិភាព។តើហេតុអ្វីបានជាភាគីថៃបង្ហោះដ្រូនរំលោភចូលដែនអធិបតេយ្យរបស់កម្ពុជាបែបនេះ?

(ព្រះវិហារ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ រួមជាមួយឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ និងក្រុមការងារ អញ្ជើញចុះពិនិត្យស្ថានភាពជាក់ស្តែងនូវទីតាំង «សួនតេជោសន្តិភាព» ស្ថិតនៅតំបន់ទេសចរណ៍ ទំបន់៩៥ ជើងភ្នំត្បែង ក្នុងភូមិទំនប់ សង្កាត់ប៉ាលហាល ក្រុងព្រះវិហារ ក្នុងគោលបំណងត្រួតពិនិត្យ និងតាមដានវឌ្ឍនភាពការងារដែលកំពុងអនុវត្ត ដើម្បីធានាឱ្យបាននូវសុវត្ថិភាព សោភ័ណភាព ភាពច្នៃប្រឌិត គុណភាព ស្តង់ដា និងឆ្លុះបញ្ចាំងពីគោលនយោបាយរបស់រាជរដ្ឋាភិបាល ពោលគឺដើម្បីទាក់ទាញភ្ញៀវទេសចរ ជាតិ អន្តរជាតិ ជាពិសេសប្រជាពលរដ្ឋក្នុងតំបន់អញ្ជើញមកទស្សនាកម្សាន្ត៕

(ព្រះវិហារ)៖ ឯកឧត្តម ហួត ហាក់ សមាជិកគណៈកម្មាធិការកណ្តាល និងជាប្រធានលេខាធិការដ្ឋាននៃយុវជនគណបក្សថ្នាក់កណ្តាល បាននាំយកអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល និងលោកជំទាវបណ្ឌិត ជាសម្ភារគ្រឿងឧបភោគបរិភោគ ផ្តល់ជូនគ្រួសារវីរកងទ័ពដ៏អង់អាចក្លាហាន និងបងប្អូនប្រជាពលរដ្ឋភៀសសឹក ចំនួន ៤០០គ្រួសារ នៅទីទួលសុវត្ថិភាពវត្តពើងអង្កាម ខេត្តព្រះវិហារក្នុងពិធីប្រគល់-ទទួលអំណោយដ៏ថ្លៃថ្លានេះ មានការអញ្ជើញចូលរួមពីឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ, ឯកឧត្តម លោក លោកស្រីជាថ្នាក់ដឹកនាំលេខាធិការដ្ឋាននៃយុវជនគណបក្សថ្នាក់កណ្តាល, ឯកឧត្តម លោក លោកស្រីជាថ្នាក់ដឹកនាំខេត្តព្រះវិហារ រួមជាមួយលោកតា លោកយាយ អ៊ំពូមីង បងប្អូន និងក្មួយៗយ៉ាងច្រើនកុះករ។ថ្លែងក្នុងឱកាសនាពេលនេះ ឯកឧត្តម ហួត ហាក់ បានគោរពថ្លែងអំណរគុណ និងដឹងគុណដល់វីរកងទ័ពជួរមុខកម្ពុជាក្នុងការការពារបូរណភាពទឹកដីតាមខ្សែរបន្ទាត់ព្រំដែន ប្រកបដោយភាពអង់អាចក្លាហាន និងឈរជើងយ៉ាងរឹងមាំប្រឆាំងនឹងសត្រូវឈ្លានពាន។ ជាមួយគ្នានេះឯកឧត្តមប្រធាន ក៏បានជម្រាបជូនបងប្អូនប្រជាពលរដ្ឋ សូមឱ្យមានជំនឿចិត្តលើចំណាត់ការបស់រាជរដ្ឋាភិបាលកម្ពុជា ដែលតែងតែនៅជាមួយបងប្អូន គ្រប់កាលៈទេសៈនិងគ្រប់ដំណាក់កាល។ស្ថិតក្នុងគ្រាដ៏លំបាកនេះ ឯកឧត្តម ហួត ហាក់ ក៏សូមគោរពសម្ដែងនូវគុណូបការៈគុណដ៏ខ្ពង់ខ្ពស់គោរពជូន សម្តេចតេជោប្រធានគណបក្ស, រួមជាមួយសម្តេចធិបតីអនុប្រធានគណបក្ស និងឥស្សរជនកំពូលរបស់ជាតិ ដែលតែងតែរួមសុខ រួមទុក្ខ ជាមួយប្រជាពលរដ្ឋនៅគ្រប់កាលៈទេសៈ និងគ្រប់ពេលវេលា ដោយមិនទុកពលរដ្ឋណា, គ្រួសារណា ឬ យោធិនណាឱ្យនៅឯកោ នោះឡើយ, ព្រមទាំងប្តេជ្ញាការពារអធិបតេយ្យជាតិ, បូរណភាពទឹកដី ដើម្បីបុព្វហេតុជាតិ, មាតុភូមិ និងប្រជាជនកម្ពុជា ទោះក្នុងតម្លៃណាក៏ដោយ។ជាមួយគ្នានេះ ឯកឧត្តម ហួត ហាក់ បានគូសបញ្ជាក់ថា ៧ មករា ឆ្នាំ ១៩៧៩ គឺជាសច្ចធម៌ប្រវត្តិសាស្រ្ត ដែលមិនអាចមានអ្នកណាមកបំភ្លៃ បំផ្លើស បំភ្លេច ឬបំផ្លាញបានឡើយ។ បច្ចុប្បន្ននេះ ប្រជាពលរដ្ឋខ្មែរគ្រប់រូប ជាពិសេសយុវជនកម្ពុជា បានចងចាំសច្ចធម៌ប្រវត្តិសាស្រ្ត យល់ច្បាស់ពីពលិកម្មមិនអាចកាត់ថ្លៃបាន របស់យុវជនជំនាន់មុនក្នុងបុព្វហេតុស្វែងរកសុខសន្តិភាពជូនជាតិ និងមាតុភូមិ។សូមជម្រាបជូនថា អំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវជនគណបក្សប្រជាជនកម្ពុជា និងលោកជំទាវបណ្ឌិត ផ្តល់ជូនគ្រួសារវីរកងទ័ព និងបងប្អូនប្រជាពលរដ្ឋភៀសសឹកចំនួន ៤០០គ្រួសារ នៅវត្តពើងអង្កាម ខេត្តព្រះវិហារ ក្នុងនោះ ១គ្រួសារ ទទួលបាន៖ អង្ករចំនួន ១០គីឡូក្រាម, ទឹកសុទ្ធចំនួន ១កេស, ឃីតចំនួន ១ រួមមាន៖ សាច់ក្រក, សាច់មាន់ផាត់, ត្រីងៀត, ឆៃប៉ូវ, មីកញ្ចប់, សៀង និងទឹកត្រី, ត្រីខកំប៉ុង, សាប៊ូកក់សក់ សាប៊ូដុសខ្លួន ថ្នាំដុសធ្មេញ និងច្រាសដុសធ្មេញ រួមទាំងសម្ភារៈផ្សេងៗដូចជានំ, ភួយ, ខោអាវ, ទឹកដោះគោកូនក្មេង និងខោទឹកនោម៕

(អន្តរជាតិ)៖ សណ្តាប់ធ្នាប់អន្តរជាតិដែលមានជាយូរមកហើយកំពុងប្រឈមមុខនឹងសម្ពាធកាន់តែខ្លាំងឡើង ដោយសារអ្នកវិភាគសង្កេតឃើញថា ឥទ្ធិពល និងកម្លាំង កំពុងដើរតួនាទីយ៉ាងសំខាន់ក្នុងការធ្វើការសម្រេចចិត្តសកលលោកជាងច្បាប់ និងស្ថាប័នរួមគ្នា។ នៅពេលដែលត្រូវបានដឹកនាំដោយកិច្ចព្រមព្រៀង ការទូត និងកិច្ចសហប្រតិបត្តិការពហុភាគី ពិភពលោកសព្វថ្ងៃនេះហាក់ដូចជាត្រូវបានបង្កើតឡើងកាន់តែខ្លាំងឡើងដោយទំហំ អំណាច និងឥទ្ធិពលរបស់ប្រទេសនីមួយៗ។ក្នុងរយៈពេលប៉ុន្មានឆ្នាំចុងក្រោយនេះ ជម្លោះអន្តរជាតិត្រូវបានដោះស្រាយជាញឹកញាប់តាមរយៈការបង្ហាញពីកម្លាំងសេដ្ឋកិច្ច នយោបាយ ឬយោធា ជាជាងការចរចា។ រដ្ឋតូចៗបានសម្តែងការព្រួយបារម្ភថា បទដ្ឋានដែលបានបង្កើតឡើងកំពុងត្រូវបានដកចេញ ដែលធ្វើឱ្យពួកគេមានការការពារតិចជាងមុននៅក្នុងប្រព័ន្ធមួយដែលឥទ្ធិពលលើសពីការឯកភាពគ្នា។អ្នកជំនាញកិច្ចការសកលម្នាក់បាននិយាយថា "ច្បាប់នៅតែមាន ប៉ុន្តែការអនុវត្តរបស់ពួកគេបានក្លាយជាមិនស្មើគ្នា"។ "មហាអំណាចធំៗមានសមត្ថភាពច្រើនជាងក្នុងការបង្កើតលទ្ធផល ដើម្បីផលប្រយោជន៍របស់ពួកគេ ខណៈពេលដែលតួអង្គខ្សោយជាងកំពុងតស៊ូដើម្បីឱ្យសំឡេងរបស់ពួកគេត្រូវបានឮ"ជា ឧទាហរណ៍ដូចជាបច្ចុប្បន្ននេះ ប្រទេសតូចៗដូចជាតៃវ៉ាន់កំពុងភ័យខ្លាចការឈ្លានពានពីចិន អ៊ុយក្រែន ស្ថិតក្រោមការវាយលុកពីរុស្សី វេណេស៊ុយអេឡា និង កូឡុំប៊ីកំពុងភ័យខ្លាចអាមេរិក ហើយអាមេរិក ក៏កំពុងគំរាមវៃយកតំបន់គ្រីនឡែនទៀត។ អង្គការអន្តរជាតិ ដូចជា UN ជាដើម ដែលត្រូវបានរចនាឡើងដើម្បីរក្សាតុល្យភាព និងស្ថិរភាពក៏កំពុងប្រឈមមុខនឹងបញ្ហាប្រឈមផងដែរ។ ការមិនចុះសម្រុងគ្នាក្នុងចំណោមមហាអំណាចធំៗបានធ្វើឱ្យសកម្មភាពរួមថយចុះ ដែលបង្កើនសំណួរអំពីប្រសិទ្ធភាពនៃស្ថាប័នសកលក្នុងការដោះស្រាយវិបត្តិ ការអនុវត្តច្បាប់អន្តរជាតិ និងការទប់ស្កាត់ជម្លោះ។ក្នុងពេលជាមួយគ្នានេះ អំណាចសេដ្ឋកិច្ចបានលេចចេញជាឧបករណ៍សំខាន់មួយក្នុងការប្រកួតប្រជែងជាសកល។ គោលនយោបាយពាណិជ្ជកម្ម ទណ្ឌកម្ម និងការគ្រប់គ្រងលើធនធានកំពុង កំណត់សម្ព័ន្ធភាព និងលទ្ធផលកាន់តែខ្លាំងឡើង ដែលពង្រឹងបន្ថែមទៀតនូវភាពខុសគ្នារវាងប្រទេសដែលមានអំណាច និងប្រទេសដែលមានឥទ្ធិពលតិចជាង។ទោះបីជាមានបញ្ហាប្រឈមទាំងនេះក៏ដោយ អ្នកការទូត និងអ្នកធ្វើគោលនយោបាយនៅតែបន្តអំពាវនាវឱ្យមានកិច្ចសហប្រតិបត្តិការឡើងវិញ និងការគោរពចំពោះបទដ្ឋានអន្តរជាតិ។ មនុស្សជាច្រើនព្រមានថា ពិភពលោក ដែលគ្រប់គ្រងជាចម្បងដោយកម្លាំងជាជាងច្បាប់រួមប្រឈមនឹងអស្ថិរភាពរយៈពេលវែង។អ្នកវិភាគកត់សម្គាល់ថា “ការរិចរិលនៃសណ្តាប់ធ្នាប់ប៉ះពាល់ដល់មនុស្សគ្រប់គ្នា”។ “បើគ្មានកិច្ចសហប្រតិបត្តិការ និងការទទួលខុសត្រូវទេ សូម្បីតែប្រទេសមានអំណាចខ្លាំងបំផុតក៏ប្រឈមមុខនឹងភាពមិនប្រាកដប្រជាកាន់តែខ្លាំងនាពេលអនាគតដែរ”៕

(អន្តរជាតិ)៖ យោងតាមទិន្នន័យដែលបានបង្ហាញ សហរដ្ឋអាមេរិកបានចាប់ខ្លួនប្រធានាធិបតី ឬប្រមុខរដ្ឋជាច្រើនរូបក្នុងអំឡុងពេលអន្តរាគមន៍យោធា ឬនយោបាយធំៗនៅពេលវេលាផ្សេងៗគ្នាក្នុងប្រវត្តិសាស្ត្រ។ ករណីទាំងនេះមានរយៈពេលជាងមួយសតវត្សមកហើយ ហើយឆ្លុះបញ្ចាំងពីការផ្លាស់ប្តូរនៅក្នុងគោលនយោបាយការបរទេសរបស់សហរដ្ឋអាមេរិក ពីជម្លោះសម័យអាណានិគម រហូតដល់ការប្រឈមមុខដាក់គ្នាខាងភូមិសាស្ត្រនយោបាយសម័យទំនើប។ករណីកំពូលទាំងបីដែលបានគូសបញ្ជាក់គឺដឹកនាំដោយលោក Nicolás Maduro នៃប្រទេសវេណេស៊ុយអេឡា (ឆ្នាំ 2026) ដែលត្រូវបានចុះបញ្ជីជាប្រមុខរដ្ឋថ្មីបំផុតដែលត្រូវបានចាប់ខ្លួនដោយសហរដ្ឋអាមេរិក ដែលជាព្រឹត្តិការណ៍ដ៏សំខាន់មួយនៅក្នុងភូមិសាស្ត្រនយោបាយអាមេរិកឡាទីនសម័យទំនើប។ ចំណាត់ថ្នាក់ទីពីរគឺលោក Saddam Hussein នៃប្រទេសអ៊ីរ៉ាក់ (ឆ្នាំ 2003) ដែលការចាប់ខ្លួនរបស់លោកបានកើតឡើង បន្ទាប់ពីការឈ្លានពានដឹកនាំដោយសហរដ្ឋអាមេរិកលើប្រទេសអ៊ីរ៉ាក់ ហើយបានក្លាយជាពេលវេលាដ៏សំខាន់បំផុតមួយនៃសម័យក្រោយថ្ងៃទី 9/11។ ចំណាត់ថ្នាក់ទីបីគឺលោក Manuel Noriega នៃប្រទេសប៉ាណាម៉ា (ឆ្នាំ 1990) ដែលត្រូវបានចាប់ខ្លួនក្នុងអំឡុងពេលប្រតិបត្តិការ Just Cause ដែលបានគូសបញ្ជាក់ពីឥទ្ធិពលរបស់សហរដ្ឋអាមេរិកនៅអាមេរិកកណ្តាល នៅចុងបញ្ចប់នៃសង្គ្រាមត្រជាក់។ ឧទាហរណ៍ប្រវត្តិសាស្ត្រនេះដែលបានបង្ហាញគឺលោក Emilio Aguinaldo នៃប្រទេសហ្វីលីពីន (ឆ្នាំ១៩០១) ដែលត្រូវបានចាប់ខ្លួនក្នុងអំឡុងសង្គ្រាមហ្វីលីពីន-អាមេរិក ដោយបង្ហាញថា អន្តរាគមន៍បែបនេះមានតាំងពីការពង្រីកអំណាចដំបូងរបស់សហរដ្ឋអាមេរិកនៅក្រៅប្រទេស។ ករណីទាំងនេះរួមគ្នាបង្ហាញពីរបៀបដែលការចាប់ខ្លួនមេដឹកនាំបរទេសបានកើតឡើងនៅទូទាំងយុគសម័យផ្សេងៗគ្នាយ៉ាងខ្លាំង ដែលនីមួយៗត្រូវបានកំណត់ដោយអាទិភាពនយោបាយ យោធា និងយុទ្ធសាស្ត្រនៃសម័យកាលរបស់វា៕

(អ​ន្តរជាតិ)៖ បន្ទាប់ពីការស៊ើបអង្កេតខ្លីមួយរបស់សភាដែលបានធ្វើឡើងនៅក្នុងសភាជាន់ខ្ពស់ ក្រសួងការពារជាតិចក្រភពអង់គ្លេសបានបញ្ជាក់ថា សហរដ្ឋអាមេរិកនឹងដឹកជញ្ជូនយន្តហោះចម្បាំង F-35 ចុងក្រោយក្នុងចំណោម 75 គ្រឿង ដែលកងកម្លាំងប្រដាប់អាវុធអង់គ្លេសទទួលបាននៅចុងឆ្នាំ 2033។យន្តហោះទាំងនេះគឺជាគន្លឹះក្នុងការពង្រឹងសមត្ថភាពវាយប្រហាររបស់ក្រុមវាយប្រហារនាវាផ្ទុកយន្តហោះរបស់កងទ័ពជើងទឹកអង់គ្លេស និងដើម្បីជំរុញផែនការរបស់កងទ័ពអាកាសអង់គ្លេសក្នុងការស្តារសមាសធាតុផ្លូវអាកាសនៃប្រព័ន្ធទប់ស្កាត់នុយក្លេអ៊ែរឡើងវិញ។ ការប្រកាសនេះឆ្លុះបញ្ចាំងពីការផ្លាស់ប្តូរពេលវេលាបើប្រៀបធៀបទៅនឹងកាលវិភាគដើម ដែលពន្យារពេលកាលបរិច្ឆេទដែលកងទ័ពទាំងពីរនឹងអាចដំណើរការយន្តហោះពេញលេញរបស់ពួកគេ។លោក Baron Coaker និងជាមន្ត្រីជាន់ខ្ពស់ម្នាក់នៅក្នុងការិយាល័យការពារជាតិចក្រភពអង់គ្លេស ដែលបាននិយាយថា “ក្រសួងរំពឹងថានឹងទទួលបានយន្តហោះ F-35 ទី 75 របស់ខ្លួននៅចុងឆ្នាំ 2033”។ សេចក្តីថ្លែងការណ៍ទាំងនេះត្រូវបានធ្វើឡើងដោយលោកស្រី Louise Sandher-Jones ដែលបម្រើការជារដ្ឋមន្ត្រីក្រសួងអតីតយុទ្ធជន និងប្រជាជននៅក្នុងរដ្ឋាភិបាលអង់គ្លេស ដោយបង្ហាញថា យន្តហោះ F-35 មួយចំនួនធំនៅតែត្រូវដឹកជញ្ជូន ដើម្បីបំពេញកាលវិភាគដែលបានព្រមព្រៀងគ្នា។ គួររំលឹកថា ការបញ្ជាក់ពីការទិញយន្តហោះចម្បាំង F-35A ថ្មីចំនួន 12 គ្រឿង ត្រូវបានប្រកាសដោយទីក្រុងឡុងដ៍កាលពីខែមិថុនា ឆ្នាំ 2025 នៅមុនថ្ងៃចេញផ្សាយ Strategic Defence Review ដែលចេញដោយរដ្ឋបាលពលករថ្មី។ ដូចដែលបានរាយការណ៍ពីមុន ការទិញយកនេះមានបំណងបង្កើតកងអនុសេនាធំយន្តហោះដែលមានសមត្ថភាពផ្ទុកគ្រាប់បែកនុយក្លេអ៊ែរ B61-12 ដែលផលិតនៅសហរដ្ឋអាមេរិក ដោយប្រភេទនេះគឺជាយន្តហោះតែមួយគត់ដែលត្រូវបានបញ្ជាក់សម្រាប់តួនាទីនោះ៕

(អន្តរជាតិ)៖ សហរដ្ឋអាមេរិកនិយាយថា ខ្លួននឹងគ្រប់គ្រងការលក់ប្រេងរបស់វេណេស៊ុយអេឡា «ដោយគ្មានកំណត់» ហើយជាអ្នកសម្រេចថាតើប្រាក់ចំណូលពីការលក់ទាំងនោះត្រូវបានប្រើប្រាស់យ៉ាងដូចម្តេច ខណៈដែលរដ្ឋបាល របស់ប្រធានាធិបតី ដូណាល់ ត្រាំ បានពង្រឹងការគ្រប់គ្រងលើប្រទេសអាមេរិកខាងត្បូងនេះ បន្ទាប់ពីបានចាប់ខ្លួនប្រធានាធិបតីលោក នីកូឡាស ម៉ាដូរ៉ូបាន។ នេះបើតាមការចុះផ្សាយរបស់សារព័ត៌មាន Al Jazeera។ ក្រសួងថាមពលសហរដ្ឋអាមេរិកបាននិយាយកាលពីថ្ងៃពុធថា ខ្លួនបាន «ចាប់ផ្តើមធ្វើទីផ្សារ» ប្រេងរបស់វេណេស៊ុយអេឡានៅលើទីផ្សារពិភពលោក ហើយប្រាក់ចំណូលទាំងអស់ពីការលក់ «នឹងត្រូវទូទាត់ជាមុនសិននៅក្នុងគណនីដែលគ្រប់គ្រងដោយសហរដ្ឋអាមេរិកនៅធនាគារដែលទទួលស្គាល់ទូទាំងពិភពលោក»។របាយការណ៍នោះបាននិយាយថា «ថវិកាទាំងនេះនឹងត្រូវបានចែកចាយដើម្បីផលប្រយោជន៍របស់ប្រជាជនអាមេរិក និងប្រជាជនវេណេស៊ុយអេឡា តាមការសម្រេចចិត្តរបស់រដ្ឋាភិបាលអាមេរិក»។ «ការលក់ប្រេងទាំងនេះចាប់ផ្តើមភ្លាមៗជាមួយនឹងការលក់ដែលរំពឹងទុកប្រហែល 30-50 លានបារ៉ែល ហើយនឹងបន្តគ្មានកំណត់»។ ក្នុងរយៈពេលប៉ុន្មានម៉ោងក្រោយមក លោក Trump ផ្ទាល់បានថ្លឹងថ្លែងអំពីរបៀបដែលប្រាក់ចំណូល អាចត្រូវបានចំណាយ ដោយបានបង្ហាញថា ប្រទេសវេណេស៊ុយអេឡាបានយល់ព្រម ប្រើប្រាស់មូលនិធិរបស់ខ្លួនដើម្បីទិញផលិតផលពីសហរដ្ឋអាមេរិកតែប៉ុណ្ណោះ។លោក Trump បានសរសេរនៅលើវេទិការបស់គាត់គឺ Truth Social ថា «ខ្ញុំទើបតែត្រូវបានជូនដំណឹងថា ប្រទេសវេណេស៊ុយអេឡានឹងទិញតែផលិតផលដែលផលិតដោយអាមេរិកប៉ុណ្ណោះ ជាមួយនឹងប្រាក់ដែលពួកគេទទួលបានពីកិច្ចព្រមព្រៀងប្រេងថ្មីរបស់យើង»។ «ការទិញទាំងនេះនឹងរួមបញ្ចូល ក្នុងចំណោមរបស់ផ្សេងទៀត ផលិតផលកសិកម្មអាមេរិក និងថ្នាំពេទ្យ ឧបករណ៍វេជ្ជសាស្ត្រ និងឧបករណ៍ផលិតដោយអាមេរិក ដើម្បីកែលម្អបណ្តាញអគ្គិសនី និងកន្លែងផលិតថាមពលរបស់ប្រទេសវេណេស៊ុយអេឡា»។ការប្រកាសនេះធ្វើឡើងត្រឹមតែប៉ុន្មានថ្ងៃបន្ទាប់ពីរដ្ឋបាល Trump បានចាប់ខ្លួនប្រធានាធិបតីវេណេស៊ុយអេឡា លោក Nicolas Maduro កាលពីថ្ងៃសៅរ៍ ក្នុងអ្វីដែលអ្នកជំនាញផ្នែកច្បាប់និយាយថា ជាការរំលោភច្បាប់អន្តរជាតិយ៉ាងច្បាស់លាស់។ សហរដ្ឋអាមេរិកបាននិយាយថា ខ្លួនមានគម្រោង «គ្រប់គ្រង» ប្រទេសនេះ និងគ្រប់គ្រងទុនបម្រុងប្រេងដ៏ច្រើនសន្ធឹកសន្ធាប់របស់ខ្លួន ដោយលោក Trump បាននិយាយនៅលើប្រព័ន្ធផ្សព្វផ្សាយសង្គមកាលពីថ្ងៃអង្គារថា ទីក្រុង Caracas នឹងប្រគល់ប្រេងចន្លោះពី 30 ទៅ 50 លានបារ៉ែលទៅឲ្យទីក្រុងវ៉ាស៊ីនតោន។សកម្មភាពរបស់សហរដ្ឋអាមេរិកប្រឆាំងនឹងប្រទេសវេណេស៊ុយអេឡាបានកើតឡើងចំពេលមានយុទ្ធនាការដាក់សម្ពាធរយៈពេលជាច្រើនខែដោយរដ្ឋបាលលោក Trump ប្រឆាំងនឹងលោក Maduro ដែលត្រូវបានចោទប្រកាន់នៅទីក្រុងញូវយ៉កពីបទជួញដូរគ្រឿងញៀនដែលលោកបដិសេធ។នោះរួមមានការបិទផ្លូវកងទ័ពជើងទឹករបស់សហរដ្ឋអាមេរិកមួយផ្នែកប្រឆាំងនឹងប្រទេសវេណេស៊ុយអេឡា និងការរឹបអូសនាវាជាច្រើនគ្រឿងដែលរដ្ឋបាលលោក Trump និយាយថាកំពុងដឹកជញ្ជូនប្រេងទៅ និងមកពីប្រទេសនេះដោយរំលោភលើទណ្ឌកម្មរបស់សហរដ្ឋអាមេរិក។

(អន្តរជាតិ)៖ សេតវិមាននិយាយថា សហរដ្ឋអាមេរិកកំពុងពិភាក្សាអំពីជម្រើសនានា ដើម្បីទទួលបានការគ្រប់គ្រង កោះហ្គ្រីនឡែន រួមទាំងការប្រើប្រាស់កម្លាំងយោធាផងដែរ។ BBC NEWS បានរាយការណ៍នៅថ្ងៃទី៨ ខែមករាថា ប្រធានាធិបតីអាមេរិក លោក ដូណាល់ ត្រាំ បានពិភាក្សាអំពី «ជម្រើសជាច្រើន» ដើម្បីទិញយកកោះហ្គ្រីនឡែន រួមទាំងការប្រើប្រាស់យោធាផងដែរ។ សេតវិមានបានប្រាប់ BBC ថា ការទិញយកកោះហ្គ្រីនឡែន ដែលជាតំបន់ពាក់កណ្តាលស្វយ័តរបស់ប្រទេសដាណឺម៉ាក ដែលជាសមាជិកណាតូដូចគ្នា គឺជា «អាទិភាពសន្តិសុខជាតិ»។ សេចក្តីថ្លែងការណ៍នេះបានកើតឡើងប៉ុន្មានម៉ោងបន្ទាប់ពីមេដឹកនាំអឺរ៉ុប បានចេញសេចក្តីថ្លែងការណ៍រួមមួយដោយគាំទ្រប្រទេសដាណឺម៉ាក ដែលបាននិងកំពុងប្រឆាំងនឹងមហិច្ឆតារបស់លោក ត្រាំ ចំពោះកោះអាកទិក។លោក ត្រាំ បាននិយាយម្តងទៀតថា សហរដ្ឋអាមេរិក «ត្រូវការ» កោះហ្គ្រីនឡែន ដោយសារហេតុផលសន្តិសុ ខកាលពីចុងសប្តាហ៍ ដែលជំរុញឱ្យនាយករដ្ឋមន្ត្រីដាណឺម៉ាក លោកស្រី Mette Frederiksen ព្រមានថា ការវាយប្រហារណាមួយដោយសហរដ្ឋអាមេរិក នឹងបញ្ចប់អង្គការណាតូ។ សេតវិមានបាននិយាយកាលពីថ្ងៃអង្គារថា “ប្រធានាធិបតី និងក្រុមរបស់លោកកំពុងពិភាក្សាអំពីជម្រើសជាច្រើនដើម្បីបន្តគោលដៅ គោលនយោបាយការបរទេសដ៏សំខាន់នេះ ហើយជាការពិតណាស់ ការប្រើប្រាស់យោធាអាមេរិកតែងតែ ជាជម្រើសមួយដែលអាចប្រើប្រាស់បានដោយអគ្គមេបញ្ជាការ”។អង្គការណាតូគឺជាក្រុមយោធាឆ្លងអាត្លង់ទិក ដែលសម្ព័ន្ធមិត្តត្រូវបានគេរំពឹងថានឹងជួយគ្នាទៅវិញទៅមកក្នុង ករណីមានការវាយប្រហារពីខាងក្រៅ។រដ្ឋមន្ត្រីការបរទេសអាមេរិក លោក Marco Rubio ក៏បានប្រាប់សមាជិកសភានៅក្នុងសន្និសីទសារព័ត៌មានសម្ងាត់មួយនៅលើ Capitol Hill កាលពីថ្ងៃចន្ទថា រដ្ឋបាលលោក Trump មិនមានគម្រោងឈ្លានពាន Greenland ទេ ប៉ុន្តែលោកបានលើកឡើងថា ជំនួសមកវិញគឺការទិញកោះនេះ ពីប្រទេសដាណឺម៉ាក នេះបើយោងតាមការចុះផ្សាយរបស់ Wall Street Journal និងប្រព័ន្ធផ្សព្វផ្សាយអាមេរិកផ្សេងទៀត។បន្ទាប់មក នៅថ្ងៃអង្គារ អ្នកនាំពាក្យក្រសួងការបរទេសបានប្រាប់ BBC ថា សហរដ្ឋអាមេរិក «ចង់កសាងទំនាក់ទំនងពាណិជ្ជកម្មយូរអង្វែង ដែលផ្តល់ផលប្រយោជន៍ដល់ជនជាតិអាមេរិក និងប្រជាជន Greenland»។ អ្នកនាំពាក្យរូបនេះបានបន្ថែមថា «សត្រូវរួមរបស់យើងកាន់តែសកម្មនៅក្នុងតំបន់អាកទិក។ នោះគឺជាក្តីបារម្ភដែលសហរដ្ឋអាមេរិក ព្រះរាជាណាចក្រដាណឺម៉ាក និងសម្ព័ន្ធមិត្តណាតូមានដូចគ្នា»។រដ្ឋមន្ត្រីការបរទេសដាណឺម៉ាក លោក Lars Lokke Rasmussen បាននិយាយថា «កោះហ្គ្រីនឡែនជាកម្មសិទ្ធិរបស់ប្រជាជនរបស់ខ្លួន ហើយមានតែប្រទេសដាណឺម៉ាក និងហ្គ្រីនឡែនប៉ុណ្ណោះដែលអាចសម្រេចចិត្តលើបញ្ហាទាក់ទងនឹងទំនាក់ទំនងរបស់ពួកគេ» មេដឹកនាំនៃចក្រភពអង់គ្លេស បារាំង អាល្លឺម៉ង់ អ៊ីតាលី ប៉ូឡូញ អេស្ប៉ាញ និងដាណឺម៉ាកបាននិយាយនៅក្នុងសេចក្តីថ្លែងការណ៍រួមមួយ។ដោយសង្កត់ធ្ងន់ថាពួកគេមានចំណាប់អារម្មណ៍ដូចសហរដ្ឋអាមេរិកក្នុងសន្តិសុខអាកទិក ប្រទេសហត្ថលេខីអឺរ៉ុបបាននិយាយថា រឿងនេះត្រូវតែសម្រេចបានដោយសម្ព័ន្ធមិត្តណាតូ រួមទាំងសហរដ្ឋអាមេរិក «រួមគ្នា»។ពួកគេក៏បានអំពាវនាវឱ្យ «រក្សាគោលការណ៍នៃធម្មនុញ្ញអង្គការសហប្រជាជាតិ រួមទាំងអធិបតេយ្យភាព បូរណភាពទឹកដី និងភាពមិនអាចរំលោភបំពានបាននៃព្រំដែន»។ ហ្គ្រីនឡែន ដែលមានប្រជាជនចំនួន ៥៧.០០០ នាក់ មានការគ្រប់គ្រងដោយខ្លួនឯងយ៉ាងទូលំទូលាយចាប់តាំងពីឆ្នាំ ១៩៧៩ - ទោះបីជាគោលនយោបាយការពារជាតិ និងការបរទេសនៅតែស្ថិតក្នុងដៃរបស់ដាណឺម៉ាកក៏ដោយ។ ខណៈពេលដែលជនជាតិហ្គ្រីនឡែនភាគច្រើនពេញចិត្ត នឹងឯករាជ្យភាពនៅទីបំផុតពីប្រទេសដាណឺម៉ាក ការស្ទង់មតិបានបង្ហាញថាមានការប្រឆាំងយ៉ាងខ្លាំង ចំពោះការក្លាយជាផ្នែកមួយនៃសហរដ្ឋអាមេរិក ដែលមានមូលដ្ឋានយោធារួចហើយនៅលើកោះនេះ។

(អន្តរជាតិ)៖ បន្ទាប់ពីការចាប់ខ្លួនប្រធានាធិបតីវេណេស៊ុយអេឡាលោក Nicolas Maduro និងភរិយា រួចបញ្ជូនអ្នកទាំង២ទៅកាត់ក្ដៅនៅតុលាការទីក្រុងញ៉ូយករួចមក ពេលនេះប្រធានាធិបតីអាមេរិក លោក ដូណាល់ ត្រាំ កាលពីអង្គារទី៦ ខែមករាបាននិយាយថា ទីក្រុងការ៉ាកាស និងទីក្រុងវ៉ាស៊ីនតោន បានឈានដល់កិច្ចព្រមព្រៀងមួយ ដើម្បីនាំចេញប្រេងឆៅរបស់ប្រទេសវេណេស៊ុយអេឡា ដែលមានតម្លៃរហូតដល់ ២ពាន់លានដុល្លារអាមេរិក ទៅកាន់សហរដ្ឋអាមេរិក ដែលជាការចរចាដ៏សំខាន់មួយ ដែលនឹងបង្វែរការផ្គត់ផ្គង់ពីប្រទេសចិន ចូលមកឱ្យសហរដ្ឋអាមេរិកវិញ ។ កិច្ចព្រមព្រៀងនេះគឺជាសញ្ញាដ៏រឹងមាំមួយដែលបង្ហាញថា រដ្ឋាភិបាលវេណេស៊ុយអេឡា កំពុងឆ្លើយតបទៅនឹងការទាមទាររបស់លោក ត្រាំ ដែលពួកគេបើកចំហចំពោះក្រុមហ៊ុនប្រេងអាមេរិក ឬប្រថុយនឹងការអន្តរាគមន៍យោធាបន្ថែមទៀត។ មិនត្រឹមតែប៉ុណ្ណោះ លោក Trump បាននិយាយនៅក្នុងសារលើប្រព័ន្ធផ្សព្វផ្សាយសង្គមថា ប្រទេសវេណេស៊ុយអេឡានឹង «ប្រគល់» ប្រេង «ដែលត្រូវបានអនុម័ត» ចំនួនចន្លោះពី 30 ទៅ 50 លានបារ៉ែលទៅឱ្យសហរដ្ឋអាមេរិក។ លោកបានបន្ថែមថា «ប្រេងនេះនឹងត្រូវបានលក់តាមតម្លៃទីផ្សារ ហើយប្រាក់ចំណូលនោះនឹងត្រូវបានគ្រប់គ្រង ដោយខ្លួនលោកផ្ទាល់ ក្នុងនាមជាប្រធានាធិបតីនៃសហរដ្ឋអាមេរិក ដើម្បីធានាថាវាត្រូវបានប្រើប្រាស់ ដើម្បីផលប្រយោជន៍ដល់ប្រជាជន វេណេស៊ុយអេឡា និងសហរដ្ឋអាមេរិក!» ដោយ រដ្ឋមន្ត្រីក្រសួងថាមពល សហរដ្ឋអាមេរិក Chris Wright ទទួលបន្ទុកអនុវត្តកិច្ចព្រមព្រៀងនេះ ដោយបន្ថែមថា ប្រេងនឹងត្រូវយកចេញពីកប៉ាល់ ហើយបញ្ជូនដោយផ្ទាល់ទៅកាន់កំពង់ផែអាមេរិក។លោក Trump បាននិយាយថា លោកចង់ឱ្យប្រធានាធិបតីស្តីទី Delcy Rodriguez ផ្តល់សិទ្ធិចូលប្រើប្រាស់ ឧស្សាហកម្មប្រេងរបស់ប្រទេសវេណេស៊ុយអេឡាដល់សហរដ្ឋអាមេរិក និងក្រុមហ៊ុនឯកជន។ ប្រទេសវេណេស៊ុយអេឡាមានប្រេងរាប់លានបារ៉ែលផ្ទុកនៅលើនាវាដឹកប្រេង និងនៅក្នុងធុងស្តុកប្រេង ដែលខ្លួនមិនអាចដឹកជញ្ជូនបានដោយសារតែការបិទផ្លូវលើការនាំចេញដែលដាក់ដោយលោក Trump ចាប់តាំងពីពាក់កណ្តាលខែធ្នូ។ ការបិទផ្លូវនេះគឺជាផ្នែកមួយនៃសម្ពាធកើនឡើងរបស់សហរដ្ឋអាមេរិកលើ រដ្ឋាភិបាលរបស់ប្រធានាធិបតីវេណេស៊ុយអេឡា លោក Nicolas Maduro ដែលបានឈានដល់ចំណុចកំ ពូលដោយកងកម្លាំងអាមេរិកចាប់ខ្លួនគាត់ នៅចុងសប្តាហ៍មុន។ មន្ត្រីជាន់ខ្ពស់វេណេស៊ុយអេឡាបានហៅការ ចាប់ខ្លួនលោកម៉ាឌូរ៉ូថាជាការចាប់ជំរិត ហើយបានចោទប្រកាន់សហរដ្ឋអាមេរិកថាបានព្យាយាមប្លន់ យកប្រេងបម្រុងដ៏ច្រើនរបស់ប្រទេសខ្លួន។ការផ្គត់ផ្គង់ប្រេងឆៅដែលជាប់គាំងទៅសហរដ្ឋអាមេរិកដំបូងអាចតម្រូវឱ្យមានការចែកចាយទំនិញឡើងវិញដែលដើមឡើយឆ្ពោះទៅប្រទេសចិន ប្រភពពីរបានប្រាប់ Reuters កាលពីថ្ងៃអង្គារ។ ប្រទេសអាស៊ីនេះគឺជាអ្នកទិញកំពូល របស់វេណេស៊ុយអេឡាក្នុងរយៈពេលមួយទសវត្សរ៍ចុងក្រោយនេះ និងជាពិសេសចាប់តាំងពីសហរដ្ឋអាមេរិកបាន ដាក់ទណ្ឌកម្មលើក្រុមហ៊ុនដែលពាក់ព័ន្ធនឹងពាណិជ្ជកម្មប្រេងជាមួយវេណេស៊ុយអេឡាក្នុងឆ្នាំ 2020។