ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ អញ្ជើញចូលរួមក្នុងពិធីប្រគល់រង្វាន់ជ័យលាភីទិវារត់ប្រណាំងឆ្លងកាត់ឧបសគ្គចម្ងាយឆ្ងាយលើកទី៩ដល់អត្តពលិក ដែលមានវិញ្ញាសារត់ប្រណាំងចំនួន ៨ រួមមាន៖ ១០០ គីឡូម៉ែត្រ ,៦៤គីឡូម៉ែត្រ ,៤២គីឡូម៉ែត្រ ,៣២គីឡូម៉ែត្រ ,១៨គីឡូម៉ែត្រមាន ៣ ប្រភេទ និង ៨គីឡូម៉ែត្រ ក្រោមអធិបតីភាពឯកឧត្តមបណ្ឌិត ថោង ខុន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានគណៈកម្មាធិការជាតិអូឡាំពិក (NOCC)។តាមរយៈព្រឹត្តិការណ៍ដ៏មានសារៈសំខាន់នេះ បានសបញ្ជាក់ឱ្យឃើញពីកម្ពុជា គឺជាគោលដៅទេសចរណ៍សុវត្ថិភាព និងមានទាក់ទាញ សម្រាប់ទេសចរណ៍កីឡា និងវប្បធម៌ ពោលគឺការរួមបញ្ចូលរវាងកីឡា ទេសចរណ៍ និងវប្បធម៌ក្នុងព្រឹត្តិការណ៍នេះ បានធ្វើឱ្យកម្ពុជាក្លាយជាគោលដៅដ៏គួរឱ្យចាប់អារម្មណ៍ដល់ភ្ញៀវទេសចរជាតិ និងអន្តរជាតិ ដែលចង់ទទួលបទពិសោធទេសចរណ៍ថ្មី ប្លែក និងបរិយាកាសសុវត្ថិភាព ប្រកបដោយអត្ថន័យ និងភាពចម្រុះ។សូមជម្រាបជូនថា ព្រឹត្តិការណ៍រត់ប្រណាំងចម្ងាយឆ្ងាយឆ្លងកាត់ឧបសគ្គ Angkor Ultra Trail 2026 បានទាក់ទាញអ្នកចូលរួមប្រមាណ ១ ៧៤០នាក់ អញ្ជើញមកពី៥២ប្រទេសផ្សេងគ្នា និងជាព្រឹត្តិការណ៍ដ៏អស្ចារ្យដើម្បីស្វាគមន៍ភ្ញៀវទេសចរជាតិ និងអន្តរជាតិមកកាន់ព្រះរាជាណាចក្រកម្ពុជានិយាយជារួម និងមកកាន់តំបន់អង្គរដ៏បវរនៃយើងទាំងអស់គ្នា។ខេត្តសៀមរាប ថ្ងៃទី២៤ ខែមករា ឆ្នាំ២០២៦His Excellency HUOT Hak, Minister of Tourism, presided over the awards ceremony for the winners of the 9th Long-Distance Obstacle Race, presenting prizes to athletes competing in eight race categories, including 100 km, 64 km, 42 km, 32 km, 18 km (three categories), and 8 km. The event was held under the presidency of His Excellency Dr. THONG Khon, Senior Minister in charge of Special Missions and President of the National Olympic Committee of Cambodia (NOCC).Through this important event, it was reaffirmed that Cambodia is a safe and attractive destination for sports and cultural tourism. The integration of sports, tourism, and culture in this event has made Cambodia a compelling destination for both domestic and international tourists seeking new and unique travel experiences in a safe environment, rich in meaning and diversity.It is worth noting that the Angkor Ultra Trail 2026 long-distance obstacle race attracted approximately 1,740 participants from 52 different countries. The event served as a remarkable occasion to welcome both domestic and international tourists to the Kingdom of Cambodia in general, and to the magnificent Angkor region in particular.Siem Reap Province,24 January 2026

(ភ្នំពេញ)៖ នៅព្រឹកថ្ងៃចន្ទ ទី២៦ ខែមករា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអនុញ្ញាតជូននាយឧត្តមនាវី Samuel Paparo មេបញ្ជាការនៃបញ្ជាការដ្ឋានឥណ្ឌូ-ប៉ាស៊ីហ្វិក នៃកងទ័ពជើងទឹកអាមេរិក ជួបសម្តែងការគួរសម និងពិភាក្សាការងារនៅវិមានសន្តិភាព។ នៅក្នុងឱកាសដែល នាយឧត្តមនាវី Samuel Paparo មកបំពេញទស្សនកិច្ចនៅកម្ពុជា ដើម្បីលើកកម្ពស់ទំនាក់ទំនង និងកិច្ចសហប្រតិបត្តិការរវាងកងទ័ពជើងទឹកកម្ពុជា-អាមេរិក។គួរឱ្យដឹងថានៅល្ងាចនេះ នាយឧត្តមនាវី Samuel Paparo ក៏នឹងមានជំនួបសម្តែងការគួរសមជាមួយឧបនាយករដ្ឋមន្ត្រី ទៀ សីហា រដ្ឋមន្ត្រីការពារជាតិ ហើយក៏មានរៀបចំពិធីជប់លៀងលើនាវាដ៏មានអានុភាពរបស់អាមេរិក ដែលកំពុងចតនៅមូលដ្ឋានសមុទ្ររាមផងដែរ៕

(សៀមរាប)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ អញ្ជើញចូលរួមព្រឹត្តិការណ៍រត់ប្រណាំងចម្ងាយឆ្ងាយឆ្លងកាត់ឧបសគ្គ Angkor Ultra Trail 2026 ដែលប្រព្រឹត្តឡើងក្នុងគោលបំណងចូលរួមលើកកម្ពស់វិស័យទេសចរណ៍នៅខេត្តសៀមរាប ពិសេសតំបន់អង្គរនេះតែម្ដងឱ្យមានការផ្សព្វផ្សាយកាន់តែច្រើនថែមទៀត និងអាចទទួលបានភ្ញៀវទេសចរអញ្ជើញមកកម្សាន្តនៅកម្ពុជាកាន់តែច្រើន និងជួយដល់ការងារផ្នែកមនុស្សធម៌ផ្សេងៗ។ឆ្លៀតក្នុងឱកាសពោរពេញដោយក្តីសោមនស្សរីករាយនេះ ឯកឧត្តមរដ្ឋមន្ត្រី បានថ្លែងថា តាមរយៈព្រឹត្តិការណ៍ដ៏អស្ចារ្យមួយនេះ សបញ្ជាក់ឱ្យឃើញពីស្មារតីស្រលាញ់ចូលចិត្តកីឡា និងជាជាស្មារតីក្នុងការផ្តល់តម្លៃដល់វប្បធម៌ និងតម្លៃនៃសុខសន្តិភាព ពោលគឺបង្ហាញឱ្យឃើញថា ព្រះរាជាណាចក្រកម្ពុជាស្ថិតនៅក្រោមដំបូលសន្តិភាព ក្រោមការដឹកនាំរបស់ប្រមុខរាជរដ្ឋាភិបាលគឺសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កម្ពុជានៅតែបន្តរក្សាបាននូវសុខសន្តិភាព ស្ថិរភាពនយោបាយ និងការអភិវឌ្ឍលើគ្រប់វិស័យ ហើយកម្ពុជាអាចផ្តល់សុវត្ថិភាពដល់អ្នកវិនិយោគិនបរទេស និងភ្ញៀវទេសចរទាំងជាតិ និងអន្តរជាតិបានគ្រប់ពេលវេលា។ឯកឧត្តមរដ្ឋមន្ត្រី បានគូសបញ្ជាក់ថា ព្រឹត្តិការណ៍រត់ប្រណាំងចម្ងាយឆ្ងាយ Angkor Ultra-Trail លើកទី៩ ឆ្នាំ២០២៦ មានវិញ្ញាសារត់ប្រណាំងចំនួន ៨ រួមមាន៖ ១០០ គីឡូម៉ែត្រ ,៦៤គីឡូម៉ែត្រ ,៤២គីឡូម៉ែត្រ ,៣២គីឡូម៉ែត្រ ,១៨គីឡូម៉ែត្រមាន ៣ ប្រភេទ និង ៨គីឡូម៉ែត្រ ។ព្រឹត្តិការណ៍នេះរៀបចំដោយក្រុមហ៊ុនទេសចរណ៍ Phoenix Voyages ក្រោមកិច្ចសហការជាមួយក្រសួងទេសចរណ៍, គណៈកម្មាធិការជាតិអូឡាំពិកកម្ពុជា អាជ្ញាធរជាតិអប្សរា រដ្ឋបាលខេត្តសៀមរាប និងដៃគូឧបត្ថម្ភជាច្រើនទៀត៕

(អន្តរជាតិ)៖ អ្នកចរចាអ៊ុយក្រែន សហរដ្ឋអាមេរិក និងរុស្ស៊ី នឹងធ្វើកិច្ចចរចានៅអារ៉ាប់រួម ដែលជាកិច្ចប្រជុំដំបូងគេដែលគេស្គាល់ថា មានការចូលរួមពីប្រទេសទាំងបីចាប់តាំងពីការឈ្លានពានទ្រង់ទ្រាយធំរបស់ទីក្រុងមូស្គូក្នុងឆ្នាំ ២០២២។ជំនួយការវិមានក្រឹមឡាំង លោក Yury Ushakov បានបញ្ជាក់ថា រុស្ស៊ីនឹងចូលរួមជាមួយតំណាងមកពីអ៊ុយក្រែន និងសហរដ្ឋអាមេរិកសម្រាប់ កិច្ចប្រជុំលើកដំបូងនៃក្រុមការងារត្រីភាគីស្តីពីបញ្ហាសន្តិសុខ នៅទីក្រុងអាប៊ូដាប៊ី ដោយបញ្ជាក់ពីសេចក្តីថ្លែងការណ៍មុននេះពីប្រធានាធិបតីអ៊ុយក្រែន លោក Volodymyr Zelensky។ លោកមិនបាននិយាយថាពេលណាដែលកិច្ចចរចាត្រូវបានគ្រោងនឹងចាប់ផ្តើមនោះទេកិច្ចចរចានេះបានកើតឡើង បន្ទាប់ពីបេសកជនពិសេសរបស់លោក ប្រធានាធិបតី Trump គឺលោក Steve Witkoff និងកូនប្រសារប្រុស Jared Kushner បានជួបជាមួយប្រធានាធិបតីរុស្ស៊ី លោក Vladimir Putin អស់រយៈពេលជាងបីម៉ោង។ ប៉ុន្តែលោកក៏បានព្រមានផងដែរថា «បើគ្មានការដោះស្រាយបញ្ហាទឹកដីទេ គេមិនគួរពឹងផ្អែកលើការសម្រេចបាននូវដំណោះស្រាយរយៈពេលវែងនោះទេ» ហើយបានបន្ថែមថា រុស្ស៊ីនឹងបន្តសម្រេចគោលបំណងរបស់ខ្លួន «នៅលើសមរភូមិ ជាកន្លែងដែលកងកម្លាំងប្រដាប់អាវុធរុស្ស៊ីកាន់កាប់គំនិតផ្តួចផ្តើមយុទ្ធសាស្ត្រ» រហូតដល់កិច្ចព្រមព្រៀងមួយត្រូវបានសម្រេច។កិច្ចខិតខំប្រឹងប្រែងថ្មីៗដែលដឹកនាំដោយសហរដ្ឋអាមេរិក ដើម្បីសម្របសម្រួលការបញ្ចប់សង្គ្រាមរយៈពេលបួនឆ្នាំ រហូតមកដល់ពេលនេះបានបរាជ័យក្នុងការបញ្ឈប់ការប្រយុទ្ធគ្នា ដោយមានការទាមទាររបស់ទីក្រុងមូស្គូឱ្យអ៊ុយក្រែនបោះបង់ចោលទឹកដីដែលរុស្ស៊ីទាមទារជាយូរមកហើយ ដែលជាចំណុចជាប់គាំងក្នុងការចរចា។រុស្ស៊ីកំពុងកាន់កាប់ប្រហែល 20% នៃទឹកដីដែលត្រូវបានទទួលស្គាល់ក្រោមច្បាប់អន្តរជាតិថាជាផ្នែកមួយនៃអ៊ុយក្រែនអធិបតេយ្យ រួមទាំងស្ទើរតែទាំងអស់នៃតំបន់ Luhansk និងផ្នែកខ្លះនៃតំបន់ Donetsk, Kherson និង Zaporizhzhia៕

(បន្ទាយមានជ័យ)៖ សហគ្រាស ក្រុមហ៊ុន រោងចក្រធំៗចំនួន ៤ បានចូលរួមសម្ភាសជ្រើសរើសបុគ្គលិកភ្លាមៗដោយផ្ទាល់ នៅក្នុងវេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ ក្រោមប្រធានបទ «ខ្មែរជួយរកការងារ និងផ្ដល់ការងារឱ្យខ្មែរ» នៅព្រឹកថ្ងៃទី២៤ ខែមករា ឆ្នាំ២០២៦ នៅបរិវេណសួនមានជ័យ ក្នុងក្រុងសិរីសោភ័ណ ខេត្តបន្ទាយមានជ័យ ដែលមានបងប្អូនពលករ និងយុវជនចូលរួមប្រមាណ៧០០នាក់។ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈបានមានប្រសាសន៍ ក្នុងពិធីជួបសំណេះសំណាលជាមួយបងប្អូននាឱកាសនោះថា នេះជាវេទិកាជំនួបដ៏ធំមួយរវាងអ្នកស្វែងរកការងារ និងនិយោជក ដើម្បីដាក់ពាក្យស្វែងរកការងារ ជ្រើសរើសបុគ្គលិក សម្ភាស និងទទួលបានការងារភ្លាមៗនៅមូលដ្ឋានផ្ទាល់តែម្តង តាមរយៈក្រុមហ៊ុនធំៗទាំង៤ ដែលត្រូវការកម្លាំងពលកម្មបន្ថែមចំនួន ២ ៦៥០កន្លែង ដើម្បីកុំឱ្យបងប្អូនពិបាកចំណាយពេលវេលា និងថវិកាក្នុងការធ្វើដំណើរទៅឆ្ងាយ។ ទន្ទឹមនេះ ឯកឧត្តមរដ្ឋមន្រ្តីក៏បានជម្រាបជូនអំពីអត្ថប្រយោជន៍របបសន្តិសុខសង្គម (ប.ស.ស.) សម្រាប់កម្មករនិយោជិតនៅពេលចូលបម្រើការងារនៅក្នុងស្រុក ព្រមទាំងផ្សព្វផ្សាយ និងចុះឈ្មោះចូលរៀនវគ្គអប់រំបណ្តុះបណ្តាល បច្ចេកទេស និងវិជ្ជាជីវៈ នៅគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ របស់ក្រសួងការងារ និងបណ្តុះបណ្តាលវិជ្ជាជីវៈ ជាពិសេសតាមរយៈកម្មវិធីTVET ១,៥លាននាក់របស់រាជរដ្ឋាភិបាល។ ឯកឧត្តមរដ្ឋមន្រ្តីបានលើកទឹកចិត្តឱ្យបងប្អូនអតីតពលករពិចារណាក្នុងការជ្រើសរើសការងារក្នុងស្រុក ដែលបន្ថែមលើប្រាក់ឈ្នួល ក៏ទទួលបានអត្ថប្រយោជន៍ជាច្រើនទាំងពេលបច្ចុប្បន្ន និងអនាគត តាមរយៈការប្រើប្រាស់ប័ណ្ណ ប.ស.ស. ជាពិសេសជួយសម្រាលបន្ទុកគ្រួសារពេលមានជំងឺ ឬចាស់ជរា។ ប៉ុន្តែបើជ្រើសរើសការងារក្រៅប្រទេស គួរតែទៅធ្វើការនៅប្រទេសដែលមានប្រាក់ឈ្នួលខ្ពស់។ជាមួយគ្នានេះ ឯកឧត្តមមានប្រសាសន៍ថា វេទិកានេះបានបង្ហាញឱ្យឃើញយ៉ាងច្បាស់អំពីការរួមគ្នាថែរក្សាប្រពៃណីដ៏ល្អនៃស្មារតី«ខ្មែរជួយខ្មែរ ខ្មែរជួយរកការងារឱ្យខ្មែរ ខ្មែរផ្តល់ការងារឱ្យខ្មែរ» ដែលផ្តល់ភាពកក់ក្តៅ ផ្តល់ក្តីសង្ឃឹម ផ្តល់ភាពជឿជាក់ដល់បងប្អូន ក្នុងខេត្តបន្ទាយមានជ័យ ដែលកំពុងស្វែងរកការងារ ដើម្បីឱ្យមានឱកាសរួមគ្នាកសាង និងអភិវឌ្ឍជាតិបន្តទៀត។ឯកឧត្តមក៏បានគូសបញ្ជាក់ថា ទោះបីស្ថិតក្នុងកាលៈទេសៈណាក៏ដោយ ការផ្តល់ឱកាសការងារ និងការបង្កើតមុខរបរជូនប្រជាពលរដ្ឋ គឺជាការងារអាទិភាពមួយរបស់រាជរដ្ឋាភិបាល ដែលត្រូវដោះស្រាយបញ្ហាជីវភាពពលរដ្ឋផង និងការឈ្លានពានផងតាមរយៈមធ្យោបាយការទូត និងច្បាប់អន្តរជាតិជាដើម។ យើងមានការឈឺចាប់ពីការឈ្លានពាន តែមិនត្រូវបាក់ទឹកចិត្ត បណ្តោយឱ្យក្លាយជាកម្លាំងមួយដែលសង្កត់យើងនោះទេ គឺយើងត្រូវតែរឹងមាំ អត់ធ្មត់ ខិតខំតស៊ូពង្រឹងសមត្ថភាព សាមគ្គីភាព គ្រប់គ្រងឱកាស និងពង្រឹងមុខរបរ ដើម្បីបង្កើនប្រាក់ចំណូលស្វែងរកឧត្តមភាពឡើងវិញ៕

(ភ្នំពេញ)៖ នាព្រឹកថ្ងៃទី២៤ ខែមករា ឆ្នាំ២០២៦ បុរី មេគង្គ លែន (Borey Mekong Land) និង ធនាគារចិន (Bank of China) បានរៀបចំពិធីចុះហត្ថលេខាលើអនុស្សរណៈនៃការយោគយល់គ្នា (MoU) ជាផ្លូវការ នៅទីតាំងគម្រោង «មេគង្គ ស៊ីធី» ដើម្បីបង្កើតភាពជាដៃគូយុទ្ធសាស្ត្រក្នុងការផ្តល់ជូននូវសេវាកម្មឥណទានគេហដ្ឋានប្រកបដោយទំនុកចិត្ត និងអត្ថប្រយោជន៍ដ៏ពិសេសជូនដល់ប្រជាជនកម្ពុជា។ពិធីចុះហត្ថលេខានេះត្រូវបានប្រារព្ធឡើងក្រោមវត្តមានរបស់ អ្នកស្រី ស្រ៊ុន គីមណាយ នាយកផ្នែកហិរញ្ញវត្ថុ និងគណនេយ្យ នៃ បុរី មេគង្គ លែន និង លោក Yeung Kin Man អនុអគ្គនាយកប្រតិបត្តិនៃធនាគារ ចិន (Bank of China) ព្រមទាំងមានការចូលរួមពីថ្នាក់ដឹកនាំនៃស្ថាប័នទាំងពីរ ។កិច្ចសហការនេះធ្វើឡើងក្នុងគោលបំណងជួយឱ្យអតិថិជនសម្រេចក្តីស្រមៃក្នុងការធ្វើជាម្ចាស់គេហដ្ឋានផ្ទាល់ខ្លួន កាន់តែងាយស្រួល និងមានប្រសិទ្ធភាព តាមរយៈការរួមបញ្ចូលគ្នារវាងការអភិវឌ្ឍលំនៅឋានប្រកបដោយគុណភាពរបស់ បុរី មេគង្គ លែន និងសេវាកម្មហិរញ្ញវត្ថុកម្រិតអន្តរជាតិរបស់ធនាគារ ចិន ។កញ្ចប់ឥណទានពិសេសសម្រាប់អតិថិជន បុរី មេគង្គ លែន តាមរយៈកិច្ចសហការនេះ ធនាគារ ចិន នឹងផ្តល់ជូននូវលក្ខខណ្ឌឥណទានដ៏ល្អប្រសើររួមមាន៖· អត្រាការប្រាក់ទាបពិសេស ត្រឹមតែ​ ៦.២០% ក្នុងមួយឆ្នាំ· រយៈពេលឥណទានវែងរហូតដល់ ២០ឆ្នាំ · ទំហំឥណទានចាប់ពី ៣០,០០០ដុល្លារ ឡើងទៅ· កម្រៃសេវាអនុម័តកម្ចីត្រឹមតែ ០.៥%*លក្ខខណ្ឌផ្សេងៗត្រូវបានអនុវត្ដក្នុងពិធីចុះហត្ថលេខាលើអនុស្សរណៈនៃការយោគយល់គ្នានោះផងដែរ លោកស្រី ស្រ៊ុន គីមណាយ បានមានប្រសាសន៍ថា៖ «ការចុះហត្ថលេខានាថ្ងៃនេះ គឺជាសក្ខីភាពសបញ្ជាក់ពីចក្ខុវិស័យរួមដ៏ច្បាស់លាស់ ក្នុងការផ្តល់នូវដំណោះស្រាយហិរញ្ញវត្ថុដ៏ល្អបំផុតជូនដល់ប្រជាជនកម្ពុជា ។ ភាពជាដៃគូនេះនឹងត្រួសត្រាយផ្លូវឱ្យអតិថិជនរបស់យើង ទទួលបានគេហដ្ឋានក្នុងក្តីស្រមៃប្រកបដោយគុណភាព រួមជាមួយលក្ខខណ្ឌហិរញ្ញវត្ថុដ៏ប្រសើរពី ធនាគារ ចិន» ។បុរី មេគង្គ លែន ជាក្រុមហ៊ុនអភិវឌ្ឍលំនៅដ្ឋានដែលពោរពេញដោយបទពិសោធន៍ និងជាក្រុមហ៊ុនដែលឈានមុខគេមួយក្នុងប្រទេសកម្ពុជាក្នុងការសាងសង់គេហដ្ឋានរចនាបថម៉ូដក្លាសិកបែបអឺរ៉ុប និងគេហដ្ឋានរចនាបថម៉ូដទាន់សម័យដែលមាន ៣ គម្រោងដូចជា៖ ១. «ឌឹ មេគង្គ រ៉ូយ៉ាល់» ជាគម្រោងគេហដ្ឋានម៉ូដក្លាសិកបែបអឺរ៉ុប ស្ថិតនៅបណ្តោយផ្លូវជាតិ ៦A, ២. «ហ្គោលឌិន អាវិននូ» ជាគម្រោងគេហដ្ឋានរចនាបថម៉ូតទាន់សម័យ ស្ថិតនៅផ្លូវ ២០១១ និង ៣. «មេគង្គ ស៊ីធី» ជាគម្រោងគេហដ្ឋានម៉ូដក្លាសិកបែបអឺរ៉ុប ស្ថិតនៅបណ្តោយផ្លូវជាតិ ៦A។ គ្រប់គម្រោងរបស់ បុរី មេគង្គ លែន ត្រូវបានសាងសង់ដោយការយកចិត្តទុកដាក់ខ្ពស់ពីថ្នាក់ដឹកនាំ និងពីក្រុមវិស្វករជំនាញរបស់បុរីដោយធានានូវគុណភាពសំណង់ ប្រណីតភាព សោភណភាពនៃរចនាបថស្ថាបត្យកម្ម សុវត្ថិភាពក៏ដូចជាផាសុកភាពនៃការស់នៅប្រចាំថ្ងៃរបស់អតិថិជនដោយគម្រោងហ៊ុមព័ទ្ធទៅដោយធម្មជាតិបៃតងស្រស់ មានសួនច្បារពហុមុខងារធំៗ និងបរិវេណគម្រោងទាំងមូលត្រូវបានធានាសន្តិសុខ សុវត្ថិភាព ២៤ម៉ោងលើ២៤ម៉ោង។គួរបញ្ជាក់ផងដែរថា ធនាគារ ចិន (Bank of China) ត្រូវបានបង្កើតឡើងក្នុងប្រទេសកម្ពុជានៅឆ្នាំ ២០១០ ដោយសាខារាជធានីភ្នំពេញគឺជាផ្នែកដ៏សំខាន់មួយនៃ គ្រុបធនាគារ ចិន (Bank of China Group) ដែលជាគ្រឹះស្ថានហិរញ្ញវត្ថុឈានមុខគេលំដាប់សកល និងមានប្រវត្តិចូលរួមចំណែកក្នុងវិស័យនេះអស់រយៈពេលជាងមួយសតវត្សរ៍មកហើយ។ ក្នុងនាមជាធនាគារពាណិជ្ជឈានមុខគេមួយក្នុងពិភពលោក ធនាគារ ចិន ត្រូវបានទទួលស្គាល់យ៉ាងទូលំទូលាយចំពោះបណ្តាញទំនាក់ទំនងអន្តរជាតិ និងឧត្តមភាពលេចធ្លោក្នុងប្រតិបត្តិការអាជីវកម្មជារូបិយបណ្ណយ័នចិន (RMB)។នៅក្នុងប្រទេសកម្ពុជា សាខាធនាគារនេះកាន់កាប់អាជ្ញាបណ្ណធនាគារជាសកល (Universal Banking License) ហើយតែងតែជាប់ចំណាត់ថ្នាក់ក្នុងចំណោមធនាគារពាណិជ្ជកំពូលទាំង ១០ ក្នុងប្រទេស ផ្អែកលើទំហំទ្រព្យសកម្មសរុប និងប្រាក់បញ្ញើ។ ជាមួយនឹងការប្តេជ្ញាចិត្តលើការច្នៃប្រឌិត និងភាពល្អឥតខ្ចោះ ធនាគារ ចិន នៅតែបន្តផ្តល់ជូននូវដំណោះស្រាយហិរញ្ញវត្ថុប្រកបដោយគុណភាពខ្ពស់ ដើម្បីជួយដល់សហគ្រាស និងគ្រួសារកម្ពុជាឱ្យកាន់តែមានភាពរឹងមាំ និងរីកចម្រើន។        

(បាត់ដំបង)៖ នៅព្រឹកថ្ងៃទី២៤ ខែមករា ឆ្នាំ២០២៦ នេះ សម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្ត្រមណ្ឌលបាត់ដំបង បានអញ្ជើញប្រគល់គ្រឿងឧបភោគ-បរិភោគ ជូនបញ្ជាការដ្ឋានយោធភូមិភាគទី៤ និងបញ្ជាការដ្ឋានយោធភូមិភាគទី៥ នៅសាលាខេត្តបាត់ដំបង។ជាកិច្ចចាប់ផ្តើម ឯកឧត្តម សុខ លូ អភិបាលខេត្តបាត់ដំបង បានមានប្រសាសន៍រាយការណ៍អំពីស្ថានការណ៍ និងរបាយការណ៍សង្ខេបជូនសម្ដេច។ ឯកឧត្តម មានប្រសាសន៍ថ្លែងអំណរគុណសម្ដេច និងលោកជំទាវ តែងតែគិតគូរពីសុខទុក្ខរបស់វីរកងទ័ពជួរមុខប្រចាំខេត្តបាត់ដំបង និងបានដល់អំណោយជាបន្តបន្ទាប់ និងអញ្ជើញចុះសាកសួរសុខទុក្ខដល់បងប្អូនប្រជាពលរដ្ឋជនភៀសសឹក កាលពីពេលកន្លងមក។អញ្ជើញមានប្រសាសន៍នាឱកាសនោះ សម្ដេចក្រឡាហោម ស ខេង បាននាំយកនូវការផ្ដាំផ្ញើសាកសុខសួរសុខទុក្ខពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដល់វីរកងទ័ពជួរមុខ នៃភូមិភាគទី៤ និងភូមិភាគទី៥ នៃខេត្តបាត់ដំបង។ក្នុងឱកាសនោះដែរ សម្ដេចក្រឡាហោម បានកោតសរសើរចំពោះការខិតខំប្រឹងប្រែងរបស់ឯកឧត្តម សុខ លូ អភិបាលខេត្តបាត់ដំបង ឯកឧត្តម អ៊ុយ រី ប្រធានក្រុមប្រឹក្សាខេត្ត និងសហការី ដែលបានលះបង់កម្លាំងកាយចិត្តខិតខំ សហការជាមួយវីរកងទ័ពជួរមុខ ដើម្បីចូលរួមការពារបូរណភាពទឹកដី និងបានរកទីទួលមានសុវត្ថិភាពជូនបងប្អូនប្រជាពលរដ្ឋតាមបណ្ដាព្រំដែនរងគ្រោះដោយសារសង្គ្រាមឈ្លានពានពីប្រទេសថៃ និងបានផ្គត់ផ្គង់គ្រឿងឧបភោគ-បរិភោគ គ្រប់គ្រាន់ជូនប្រជាពលរដ្ឋជនភៀសសឹក។សម្ដេច ក៏បានថ្លែងនូវការដឹងគុណ និងអរគុណយ៉ាងជ្រាលជ្រៅបំផុតចំពោះវីរកងទ័ព និងមេបញ្ជាការគ្រប់ភូមិភាគ នៃខេត្តបាត់ដំបង ក៏ដូចជាគ្រប់ភូមិភាគទាំងអស់ នៃព្រះរាជាណាចក្រកម្ពុជា ដែលជាប់ព្រំដែនថៃ ដែលបានលះបង់កម្លាំងកាយចិត្ត អាយុជីវិតការពារបូរណភាពទឹកដី។ក្នុងនាមតំណាងរាស្ត្រនៃមណ្ឌលខេត្តបាត់ដំបង សម្ដេច បានថ្លែងនូវការអរគុណចំពោះសប្បុរសជននានា ដែលបានជួយជ្រោមជ្រែងដល់រដ្ឋបាលខេត្តបាត់ដំបង ផ្តល់តាមរយៈសម្ដេចផ្ទាល់ និងតាមរយៈរដ្ឋបាលខេត្ត និងសប្បុរសជនផ្សេងទៀត អញ្ជើញមកប្រគល់អំណោយជូនរដ្ឋបាលខេត្តដោយផ្ទាល់ និងបានផ្ដល់ជូនតាមបណ្ដាភូមិភាគនៅខេត្តបាត់ដំបងដោយផ្ទាល់ និងតាមក្រុមការងារក្រឡាហោមមនុស្សធម៌ផងដែរ៕

(ភ្នំពេញ)៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង បានបង្ហាញការកត់សម្គាល់ និងកោតសរសើរចំពោះរដ្ឋបាលខេត្តព្រៃវែង ដែលបានខិតខំប្រឹងប្រែងតាមផែនការការងារឆ្នាំ២០២៥ រហូតសម្រេចបានលទ្ធផលលេចធ្លោជាច្រើន ជាពិសេសការរក្សាសន្តិសុខ សណ្ដាប់ធ្នាប់សាធារណៈ និងការផ្ដល់សេវាជូនប្រជាពលរដ្ឋ បានយ៉ាងល្អប្រសើរ កិច្ចអន្តរាគមន៍ជួយប្រជាពលរដ្ឋក្នុងការបង្កបង្កើនផលស្រូវប្រាំង ការគាំទ្រពលរដ្ឋវិលពីប្រទេសថៃ និងការចូលរួមឧបត្ថម្ភគាំទ្រវីរយុទ្ធជនការពារព្រំដែន និងពលរដ្ឋភៀសសឹកដោយសារអំពើឈ្លានពានរបស់កងទ័ពថៃ។ ការថ្លែងយ៉ាងដូច្នេះពីឯកឧត្តមអភិសន្តិបណ្ឌិត បានធ្វើឡើងក្នុងឱកាសអញ្ជើញជាអធិបតីបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្តព្រៃវែង នាព្រឹកថ្ងៃទី២៣ ខែមករា ឆ្នាំ២០២៦ នៅសាលប្រជុំសាលាខេត្តព្រៃវែង។ បើតាមឯកឧត្តម សួន សុម៉ាលីន អភិបាលនៃគណៈអភិបាលខេត្តព្រៃវែង ក្នុងឆ្នាំ២០២៥ កន្លងទៅ រដ្ឋបាលខេត្ត សម្រេចបានសមិទ្ធផលលេចធ្លោជាច្រើន រួមមាន៖ ការពង្រឹងប្រសិទ្ធភាពគ្រប់គ្រងរដ្ឋបាល ការសម្របសម្រួល និងទទួលពលករវិលត្រឡប់ពីប្រទេសថៃ ការចូលរួមគាំទ្រយ៉ាងសកម្មក្នុងបុព្វហេតុការពារជាតិនៅសមរភូមិជួរមុខ ការរក្សាសន្តិសុខសណ្តាប់ធ្នាប់សាធារណៈ បានយ៉ាងល្អប្រសើរ ព្រមទាំងការជំរុញការអភិវឌ្ឍលើវិស័យនានា និងការងារសង្គមកិច្ច។ ឯកឧត្តមអភិសន្តិបណ្ឌិត ប្រមុខក្រសួងមហាផ្ទៃ បានបន្តមានប្រសាសន៍កោតសរសើរ និងលើកទឹកចិត្តរដ្ឋបាលខេត្ត ក៏ដូចជាបងប្អូនប្រជាពលរដ្ឋខេត្តព្រៃវែងទាំងមូល ដែលបានបង្ហាញស្មារតីសាមគ្គីភាពយ៉ាងសកម្ម តាមរយៈការចូលរួមបរិច្ចាគក្នុងមូលនិធិផ្សេងៗ ដើម្បីគាំទ្រដល់រាជរដ្ឋាភិបាល ក្នុងការជួយសង្គ្រោះពលរដ្ឋភៀសសឹក និងឧបត្ថម្ភដល់វីរយុទ្ធជន ដែលកំពុងឈរជើងការពារបូរណភាពទឹកដី។ ឯកឧត្តមអភិសន្តិបណ្ឌិត ក៏បានមានប្រសាសន៍ទៀតថា ទឹកចិត្ត សប្បុរសធម៌ដ៏មហាសាលនេះ ធ្វើឱ្យរដ្ឋបាលខេត្ត និងប្រជាជនខេត្តព្រៃវែង មានលទ្ធភាពចូលរួមគាំទ្រវីរយុទ្ធជននៅព្រំដែន និងពលរដ្ឋភៀសសឹក ដោយសរុបជាថវិកាមានជិត ១លានដុល្លារអាម៉េរិក។ពីវេទិកាអធិបតីនៃពិធីបិទសន្និបាតនោះដែរ ឯកឧត្តមអភិសន្តិបណ្ឌិត ស សុខា បានផ្ដល់អនុសាសន៍ណែនាំរដ្ឋបាលខេត្ត អាជ្ញាធរ និងកងកម្លាំងមានសមត្ថកិច្ចគ្រប់លំដាប់ថ្នាក់ក្នុងមូលដ្ឋានខេត្តព្រៃវែង ត្រូវបន្តពង្រឹងស្មារតីសាមគ្គីភាព និងប្តេជ្ញាចិត្តខ្ពស់ក្នុងការអនុវត្តភារកិច្ចឱ្យសម្រេចបានលទ្ធផលកាន់តែប្រសើរឡើងក្នុងឆ្នាំ២០២៦។ ក្នុងនោះ ឯកឧត្តម បានសង្កត់ធ្ងន់លើការងារអាទិភាពមួយចំនួន រួមមាន៖ ការបន្តការពារសន្តិភាព និងស្ថិរភាពនយោបាយ ការរឹតបន្តឹងសន្តិសុខសណ្តាប់ធ្នាប់សាធារណៈ និងសុវត្ថិភាពសង្គម ការគ្រប់គ្រងរដ្ឋបាលដែនដី ការលើកកម្ពស់ប្រសិទ្ធភាពនៃការផ្តល់សេវាសាធារណៈ ការអភិវឌ្ឍមូលដ្ឋាន ការគ្រប់គ្រងនិងការអភិវឌ្ឍតំបន់ព្រំដែន ព្រមទាំងការកែលម្អរបៀបរបបធ្វើការងារឱ្យកាន់តែមានប្រសិទ្ធភាព។ជាមួយគ្នានេះ ក្នុងគ្រាដែលរដ្ឋបាលខេត្តព្រៃវែង ទើបមានការផ្លាស់ប្ដូរអភិបាលក្រុង ស្រុកមួយចំនួនជាបន្តបន្ទាប់ នាឆ្នាំ២០២៦នេះ ប្រមុខក្រសួងមហាផ្ទៃ ក៏បានផ្តល់ការណែនាំយ៉ាងម៉ឺងម៉ាត់ឱ្យបន្តបំពេញតួនាទីស្របតាមច្បាប់ ក្នុងការងារបម្រើប្រជាពលរដ្ឋ ដោយត្រូវមានកិច្ចសហការជាធ្លុងមួយជាមួយមន្ត្រីពាក់ព័ន្ធក្នុងមូលដ្ឋានរៀងៗខ្លួន។ បើតាមឯកឧត្តមអភិសន្តិបណ្ឌិត រដ្ឋបាលក្រុងស្រុក សម្រេចបានជោគជ័យការងាររបស់ខ្លួន ក៏ជាការកំណត់ភាពជោគជ័យរបស់រដ្ឋបាលខេត្តដូចគ្នាដែរ។ ចំណែកជោគជ័យនៃផែនការឃុំ-សង្កាត់ ក៏រួមចំណែកសម្រេចបានជោគជ័យផែនការរដ្ឋបាលក្រុង ស្រុក និងរដ្ឋបាលខេត្តដូចគ្នាដែរ។ ឯកឧត្តម បានណែនាំជាថ្មីទៀត ឱ្យអាជ្ញាធរគ្រប់លំដាប់ថ្នាក់ រួមគ្នាពង្រឹងការងារសន្តិសុខ និងត្រូវសិក្សារិះរកយុទ្ធសាស្ត្រថ្មីៗក្នុងការផ្ដល់សេវាសាធារណៈ ឱ្យកាន់តែមានភាពសាមញ្ញ ឆាប់រហ័ស និងមានប្រសិទ្ធភាព ដើម្បីបង្កើនភាពជឿជាក់ និងទាក់ទាញការគាំទ្រពីសំណាក់ប្រជាពលរដ្ឋ។ ក្នុងឱកាសនោះដែរ ឯកឧត្តមអភិសន្តិបណ្ឌិត ឧបនាយករដ្ឋមន្ត្រី ក៏បានសម្តែងការអបអរសាទរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់រដ្ឋបាលខេត្តព្រៃវែង ក្នុងការកៀរគរ និងទាក់ទាញការវិនិយោគ។ ជាលទ្ធផលជាក់ស្តែង នាពេលថ្មីៗនេះ ខេត្ត ទទួលបានគម្រោងវិនិយោគធំៗ ចំនួន ៣ ដែលមានទំហំទុនវិនិយោគចាប់ពី ៦លានដុល្លារ ដល់ជាង ២០លានដុល្លារអាម៉េរិក ក្នុងមួយគម្រោង និងបានបង្កើតឱកាសការងារជូនប្រជាពលរដ្ឋក្នុងមូលដ្ឋានបានជិត ៤.០០០កន្លែង។ ឯកឧត្តមអភិសន្តិបណ្ឌិត មានជំនឿជឿជាក់យ៉ាងមុតមាំថា តាមរយៈលំហូរវិនិយោគទាំងនេះ នឹងក្លាយជាក្បាលម៉ាស៊ីនយ៉ាងសំខាន់ក្នុងការជំរុញកំណើនសេដ្ឋកិច្ចខេត្តព្រៃវែង ឱ្យកាន់តែរីកចម្រើនខ្លាំងក្លា និងលើកកម្ពស់កម្រិតជីវភាពរបស់ប្រជាពលរដ្ឋ ឱ្យកាន់តែប្រសើរឡើង៕

(ភ្នំពេញ)៖ ក្រសួងរ៉ែ និងថាមពល កាលពីថ្ងៃទី២៣ ខែមករា បានចេញសេចក្ដីជូនដំណឹងស្ដីពី ការផ្អាកទទួលពាក្យស្នើសុំ បង្កើតស្ថានីយប្រេង និងឧស្ម័នឥន្ធនៈថ្មីជាបណ្ដោះអាសន្ន  ចាប់ពីថ្ងៃទី១​ ខែមីនា រហូតដល់ថ្ងៃទី៣១ ខែកក្កដា ឆ្នាំ២០២៦ ដើម្បីពិនិត្យនិងកែសម្រួលបទប្បញ្ញត្តិបច្ចេកទេសសុវត្ថិភាព សម្រាប់ការរៀបចំស្ថានីយប្រេង និងឧស្ម័នឥន្ទនៈឡើងវិញ និងកំណត់គោលការណ៍ក្នុងការអនុញ្ញាតឱ្យបង្កើតស្ថានីយថ្មីផងដែរ។    

(ព័ត៌មានជាតិ)៖ និស្សិតកម្ពុជាបានប្រាប់កាសែត AFP កាលពីថ្ងៃព្រហស្បតិ៍ថា រដ្ឋាភិបាលបានសន្យាថានឹងបង់ថ្លៃសិក្សា នៅសាកលវិទ្យាល័យ របស់ពួកគេ បន្ទាប់ពីអាហារូបករណ៍ជាង ៤០០ នាក់ ដែលផ្តល់ដោយមេក្លោងឧក្រិដ្ឋឆបោក តាមអ៊ីនធឺណិតគឺលោក ចេន ហ្ស៊ី ដែលត្រូវបានលុបចោលភ្លាមៗក្រោយពីអាជ្ញាធរកម្ពុជា បានចាប់ខ្លួនគាត់ បញ្ជូនទៅប្រទេសចិនកាលពីដើមខែមករានេះ បន្ទាប់ពីមានការចោទប្រកាន់ថាគាត់បានដំណើរការប្រតិបត្តិការ ក្លែងបន្លំតាមអ៊ីនធឺណិតរាប់ពាន់លានដុល្លារពីប្រទេសកម្ពុជាដោយប្រើអ្នកបោកប្រាស់ដែលត្រូវបានជួញដូរ។​ នេះបើតាមកសារព័ត៌មាន​ THE STRAITSTIME ។ អាជ្ញាធរសហរដ្ឋអាមេរិកបានចោទប្រកាន់ Chen ដែលកើតនៅប្រទេសចិនកាលពីខែតុលា ពីបទក្លែងបន្លំ និងលាងលុយកខ្វក់ ដោយចោទប្រកាន់ថាក្រុមហ៊ុនរបស់គាត់ Prince Group គឺជារណសិរ្សសម្រាប់បណ្តាញ ឧក្រិដ្ឋកម្មតាមអ៊ីនធឺណិតឆ្លងដែន។ លោក Chen ដែលបានបង្កើត និងដឹកនាំក្រុមហ៊ុនដែលមានទណ្ឌកម្មអន្តរជាតិ ក៏បានចាប់ផ្តើមមូលនិធិមួយក្នុងឆ្នាំ ២០១៥ ផងដែរ។ អាហារូបករណ៍ ចេន ហ្សី ត្រូវបានបង្កើតឡើងក្នុងឆ្នាំ ២០២១ ដើម្បីគាំទ្រដល់និស្សិតកម្ពុជាដែលកំពុងសិក្សាថ្នាក់បរិញ្ញាបត្រ។ និស្សិតជាច្រើននាក់នៅសាកលវិទ្យាល័យសាធារណៈ Royal University of Phnom Penh (RUPP) បានប្រាប់ AFP ថាពួកគេត្រូវបានជូនដំណឹងដោយតំណាង Prince កាលពីថ្ងៃអង្គារថា អាហារូបករណ៍សិក្សាពេញលេញ និងប្រាក់ឧបត្ថម្ភសម្រាប់ការរស់នៅរបស់ពួកគេត្រូវបានលុបចោល។ លោក Narak អាយុ ២០ ឆ្នាំ ដែលសិក្សាផ្នែកវិទ្យាសាស្ត្រកុំព្យូទ័រ បាននិយាយថា "ពួកគេបាននិយាយថា អាហាររូបករណ៍របស់ពួកគេមានបញ្ហា"។ ប៉ុន្តែសាកលវិទ្យាល័យ RUPP បានប្រាប់អ្នកទទួលអាហារូបករណ៍នៅថ្ងៃព្រហស្បតិ៍ថា «ក្រសួងអប់រំនឹងរ៉ាប់រងថ្លៃសិក្សារហូតដល់យើងបញ្ចប់ការសិក្សា»។ទោះជាយ៉ាងណា លោកស្រី ឃួន វិចិត្រា អ្នកនាំពាក្យក្រសួងអប់រំបានប្រាប់កាសែត AFP ថា មន្ត្រីកំពុងធ្វើការជាមួយ សាកលវិទ្យាល័យនានា ដើម្បីធានាថានិស្សិតចំនួន ៤១៨ នាក់ ដែលទទួលបានអាហារូបករណ៍ អាចបញ្ចប់ការសិក្សាបាន។  និយ័តករអាជីវកម្មអចលនវត្ថុ និងបញ្ចាំ កាលពីថ្ងៃទី១២ ខែមករាក៏បានប្រកាសផ្អាក ប្រតិបត្តិការលក់អចលនទ្រព្យប្រណីតចំនួនប្រាំដែលគ្រប់គ្រងដោយក្រុមហ៊ុន Prince Group ផងដែរ។  

(ភ្នំពេញ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ អញ្ជើញដឹកនាំកិច្ចប្រជុំតាមដានវឌ្ឍនភាពការងាររៀបចំសន្និបាតបូកសរុបលទ្ធផលការងារវិស័យទេសចរណ៍ឆ្នាំ២០២៥ និងលើកទិសដៅការងារឆ្នាំ២០២៦ ក្នុងគោលបំណងពិនិត្យលើវឌ្ឍនភាពការងាររបស់អនុគណៈកម្មការទាំង៧ ព្រមទាំងស្តាប់នូវសេចក្តីរាយការណ៍សង្ខេបអំពីវឌ្ឍនភាពការងាររបស់អនុគណៈកម្មការនីមួយៗ ចំណុចខ្លាំង ចំណុចខ្វះខាត បញ្ហាប្រឈម និងសំណូមពររបស់អនុគណៈកម្មការទាំង៧ផងដែរ។ក្នុងកិច្ចប្រជុំនេះ មានការអញ្ជើញចូលរួមពីឯកឧត្តមរដ្ឋលេខាធិការប្រចាំការ, ឯកឧត្តម លោកជំទាវ ថ្នាក់ដឹកនាំ និងអគ្គនាយក ព្រមទាំងលោក លោកស្រីប្រធាននាយកដ្ឋាន និងសមាជិក សមាជិកាសរុបប្រមាណ ១០០នាក់។ថ្លែងក្នុងកិច្ចប្រជុំនេះ ឯកឧត្តមរដ្ឋមន្ត្រី បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងមន្ត្រីគ្រប់លំដាប់ថ្នាក់នៃគណៈកម្មការ និងអនុគណៈកម្មការទាំងអស់ ចំពោះកិច្ចខិតខំប្រឹងប្រែងរួមគ្នា និងសម្រេចបាននូវវឌ្ឍនភាពការងារគួរជាទីកត់សម្គាល់។បន្ទាប់ពីស្តាប់នូវសេចក្តីរាយការណ៍របស់អនុគណៈកម្មការទាំង៧ រួចមក ឯកឧត្តមរដ្ឋមន្ត្រី បានជំរុញឱ្យអនុគណៈកម្មការទាំងអស់ បន្តសហការយ៉ាងជិតស្និទ្ធ បំពេញភារកិច្ចឱ្យបានទាន់ពេលវេលា និងប្រកបដោយភាពទទួលខុសត្រូវខ្ពស់ ដើម្បីធានាថា សន្និបាតនឹងអាចឆ្លុះបញ្ចាំងបានយ៉ាងច្បាស់លាស់អំពីសមិទ្ធផល បញ្ហាប្រឈម និងបទពិសោធពីការអនុវត្តការងារកន្លងមក ព្រមទាំងកំណត់ទិសដៅ និងអាទិភាពការងារសម្រាប់ឆ្នាំ២០២៦ ឱ្យសមស្របនឹងបរិបទជាតិ និងតំបន់។ជាមួយគ្នានេះ ឯកឧត្តមរដ្ឋមន្ត្រី ក៏បានឯកភាពលើវិធានការសំខាន់ៗមួយចំនួន និងបានណែនាំឱ្យបន្តតាមដានវឌ្ឍនភាពការងារយ៉ាងជាប់លាប់ ដើម្បីធានាឱ្យការរៀបចំសន្និបាតបូកសរុបលទ្ធផលការងារវិស័យទេសចរណ៍ឆ្នាំ២០២៥ និងលើកទិសដៅការងារឆ្នាំ២០២៦ ប្រព្រឹត្តទៅដោយជោគជ័យ និងរួមចំណែកលើកកម្ពស់ការអភិវឌ្ឍវិស័យទេសចរណ៍កម្ពុជាឱ្យកាន់តែរឹងមាំ និងចីរភាព។

(ភ្នំពេញ)៖ ក្រសួងការងារ និងបណ្ដុះបណ្ដាលវិជ្ជាជីវៈ បានបន្តផ្សព្វផ្សាយឱកាសការងារដែលនៅសល់ជិត ៩ម៉ឺនកន្លែង សម្រាប់ផ្ដល់ជូនបងប្អូនអតីតពលករត្រឡប់មកពីប្រទេសថៃ និងអ្នកដែលកំពុងស្វែងរកការងារធ្វើ។ ក្រសួងការងារ បានឱ្យដឹងនៅយប់ថ្ងៃទី២៣ ខែមករាថា ឱកាសការងារចំនួន ៨៩ ៥៣៩កន្លែង នៅតាមរាជធានី-ខេត្ត កំពុងរង់ចាំបងប្អូនប្រជាពលរដ្ឋដែលកំពុងស្វែងរកការងារធ្វើ ជាពិសេសបងប្អូនអតីតពលករ ដែលវិលត្រឡប់មកដល់ប្រទេសកម្ពុជាវិញ។ ឱកាសការងារទាំងនោះ ស្ថិតក្នុងវិស័យកសិកម្ម, ឧស្សាហកម្ម និងវិស័យសេវាកម្ម ហើយរាជធានី-ខេត្ត ដែលមានឱកាសការងារច្រើនជាងគេរួមមាន៖ រាជធានីភ្នំពេញមានចំនួន ២៦ ៤៥៣កន្លែង, ខេត្តកំពង់ស្ពឺមានចំនួន ២៦ ០៩៥កន្លែង, ខេត្តកណ្ដាលមានចំនួន ១០ ២៦១កន្លែង, ខេត្តតាកែវមានចំនួន ៨ ៤៧០កន្លែង និងខេត្តស្វាយរៀងមានចំនួន ៥ ៤៧៤កន្លែង។ ក្រសួងការងារ ក៏បានឱ្យដឹងដែរថា គិតមកដល់ពេលនេះ មានបងប្អូនអតីតពលករត្រឡប់មកពីប្រទេសថៃជាង ៣១ម៉ឺននាក់ហើយ បានទទួលការងារធ្វើតាមរយៈយន្ដការរបស់ក្រសួង ហើយមានបងប្អូនអតីតពលកររាប់ម៉ឺននាក់ផ្សេងទៀត បានទទួលការងារធ្វើនៅតាមការដ្ឋានសំណង់ សិប្បកម្ម និងភោជនីយដ្ឋាន ជាដើម។ ជាមួយគ្នានេះ ក្រសួងការងារ និងបណ្ដុះបណ្ដាលវិជ្ជាជីវៈ បានបន្តអំពាវនាវដល់បងប្អូនអតីតពលករត្រឡប់មកពីប្រទេសថៃ ដែលមិនទាន់ទទួលបានការងារធ្វើ សូមទាក់ទងមកលេខទូរសព្ទ ១២៩៧ ដើម្បីឱ្យក្រសួងជួយសម្របសម្រួលស្វែងរកការងារជូន៕

(ភ្នំពេញ)៖ ការតវ៉ារបស់បងប្អូនកម្មករកម្មការិនីនៃរោងចក្រ ត្រូភីខល ហ៊្រ្វូត អេស៊ា (ខេមបូឌា) ឯ.ក ដែលមានទីតាំងស្ថិតនៅភូមិត្រពាំងឈើនាង ឃុំពើក ស្រុកអង្គស្នួល ខេត្តកណ្ដាល ត្រូវបានដោះស្រាយយ៉ាងលឿនរហ័សឈានដល់ការសះជាទាំងស្រុង នៅរសៀលថ្ងៃទី២៣ ខែមករា ឆ្នាំ២០២៦នេះ ក្រោមការយកចិត្តទុកដាក់ និងសម្របសម្រួលពីសំណាក់ក្រសួងការងារ និងបណ្តុះបណ្តាលវិជ្ជាជីវៈ។ នេះបើតាមការបញ្ជាក់ពី លោក ស៊ុន មេសា អ្នកនាំពាក្យនៃក្រសួងការងារ និងបណ្ដុះបណ្ដាលវិជ្ជាជីវៈ។អ្នកនាំពាក្យរូបនេះបានអះអាងថា៖ «ក្រោមការសម្របសម្រួលនិងយកចិត្តទុកដាក់ដោះស្រាយភ្លាមៗ កង្វល់របស់បងប្អូនកម្មករត្រូវបានដោះស្រាយចប់សព្វគ្រប់ទាំងស្រុង ហើយកម្មករក៏នឹងវិលចូលបម្រើការងារនៅរសៀលថ្ងៃទី២៣ ខែមករា ឆ្នាំ២០២៦ ជាធម្មតាឡើងវិញ»។ក្រោយការពិភាក្សា និងសម្របសម្រួលភាគីទាំងពីរ បានឯកភាពគ្នាស្រុះស្រួលចំនួន ៥ចំណុចដែលរួមមានការឈប់សម្រាកមួយថ្ងៃក្នុងមួយសប្តាហ៍ដោយប្តូរវេនគ្នា និងការឯកភាពលើកកម្ពស់លក្ខណ្ឌការងារកាន់តែល្អប្រសើរបន្ថែមទៀត។ការដោះស្រាយដ៏លឿនរហ័សនិងមានប្រសិទ្ធភាពរបស់ក្រសួងការងារ ចំពោះកម្មករកម្មការិនីយ៉ាងដូច្នេះ ត្រូវបានអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ អះអាងថាគឺជាកិច្ចការងារអាទិភាពរបស់ក្រសួងក្នុងការយកចិត្តទុកដាក់ចំពោះបងប្អូនកម្មករនិយោជិត៕

(អន្តរជាតិ)៖ មន្ត្រីសហព័ន្ធបាននិយាយថា សហរដ្ឋអាមេរិក បានបញ្ចប់ការដកខ្លួនចេញពីអង្គការសុខភាពពិភពលោក មួយឆ្នាំបន្ទាប់ពីប្រធានាធិបតី ដូណាល់ ត្រាំ បានប្រកាសថា សហរដ្ឋអាមេរិកកំពុងបញ្ចប់ការប្តេជ្ញាចិត្តអាយុ 78 ឆ្នាំរបស់ខ្លួន។យោងតាមអង្គការសុខភាពពិភពលោក សហរដ្ឋអាមេរិកជំពាក់ប្រាក់ជាង 130 លានដុល្លារអាមេរិកដល់ទីភ្នាក់ងារសុខភាពពិភពលោក (WHO)។ ហើយមន្ត្រីរដ្ឋបាលលោក Trump ទទួលស្គាល់ថា ពួកគេមិនទាន់បានបញ្ចប់ការដោះស្រាយបញ្ហាមួយចំនួននៅឡើយទេ ដូចជាការបាត់បង់សិទ្ធិចូលមើលទិន្នន័យពីប្រទេសដទៃទៀត ដែលអាចផ្តល់ឱ្យអាមេរិកនូវការព្រមានជាមុនអំពីជំងឺរាតត្បាតថ្មី។លោក Lawrence Gostin អ្នកជំនាញផ្នែកច្បាប់សុខភាពសាធារណៈនៅសាកលវិទ្យាល័យ Georgetown បាននិយាយថា ការដកខ្លួននេះនឹងធ្វើឱ្យប៉ះពាល់ដល់ការឆ្លើយតបជាសកលចំពោះការផ្ទុះឡើងនៃជំងឺថ្មី និងនឹងធ្វើឱ្យសមត្ថភាពរបស់អ្នកវិទ្យាសាស្ត្រ និងក្រុមហ៊ុនឱសថអាមេរិកក្នុងការអភិវឌ្ឍវ៉ាក់សាំង និងថ្នាំប្រឆាំងនឹងការគំរាមកំហែងថ្មីៗ។អង្គការសុខភាពពិភពលោកគឺជាទីភ្នាក់ងារសុខភាពឯកទេសរបស់អង្គការសហប្រជាជាតិ ហើយត្រូវបានប្រគល់ភារកិច្ចឱ្យសម្របសម្រួលការឆ្លើយតបទៅនឹងការគំរាមកំហែងសុខភាពពិភពលោក ដូចជាការផ្ទុះឡើងនៃជំងឺអុតស្វាយ អេបូឡា និងជំងឺស្វិតដៃជើង។ វាក៏ផ្តល់ជំនួយបច្ចេកទេសដល់ប្រទេសក្រីក្រផងដែរ ជួយចែកចាយវ៉ាក់សាំង សម្ភារៈ និងការព្យាបាលដែលខ្វះខាត និងកំណត់គោលការណ៍ណែនាំសម្រាប់ស្ថានភាពសុខភាពរាប់រយ រួមទាំងសុខភាពផ្លូវចិត្ត និងជំងឺមហារីក៕

(ភ្នំពេញ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ អញ្ជើញជាអធិបតីក្នុងពិធីជួបជុំសំណេះសំណាលជាមួយសមាគមសណ្ឋាគារកម្ពុជា (CHA) ក្នុងគោលបំណងពង្រឹងកិច្ចសហប្រតិបត្តិការឱ្យកាន់តែជិតស្និទ្ធរវាងក្រសួងទេសចរណ៍ជាមួយសមាគមសណ្ឋាគារកម្ពុជា ព្រមទាំងស្វែងរកវិធានការគន្លឹះរួមគ្នា ដើម្បីបន្តរក្សាភាពធន់នៃវិស័យទេសចរណ៍ និងជំរុញសន្ទុះវិស័យទេសចរណ៍រកម្ពុជា ដើម្បីអាចរក្សាបាននូវភាពប្រកួតប្រជែងក្នុងតំបន់។ក្នុងពិធីសំណេះសំណាលដ៏មានអត្ថន័យនេះ មានការអញ្ជើញចូលរួមពីឧកញ៉ា ហ៊ី សុធា ប្រធានថ្នាក់ជាតិសមាគមសណ្ឋាគារកម្ពុជា, ឯកឧត្តម លោកជំទាវ ថ្នាក់ដឹកនាំក្រសួងទេសចរណ៍, ឯកឧត្តម គឹម មិនា នាយកប្រតិបត្តិ CTB, ឯកឧត្តមអគ្គនាយកគ្រប់គ្រងឧស្សាហកម្មទេសចរណ៍ និងលោក លោកស្រី អនុប្រធាន សមាជិក សមាជិកានៃសមាគមសណ្ឋាគារកម្ពុជាទាំងអស់ ព្រមទាំងលោក លោក ស្រី អគ្គនាយករង ប្រធាននាយកដ្ឋានប្រមាណ ១០០នាក់។ថ្លែងក្នុងឱកាសនេះ ឯកឧត្តមរដ្ឋមន្ត្រី មានប្រសាសន៍ថា សមាគមសណ្ឋាគារ ជាការអង្គភាពទី២ ដែលបានជួបសំណេះសំណាល ព្រមទាំងបានថ្លែងអំណរគុណចំពោះសមាគមសណ្ឋាការកម្ពុជា ក្រោមការដឹកនាំរបស់ ឧកញ៉ា ហ៊ី សុធា និងសហការី និងការចូលរួមរបស់សមាជិកសមាគម ដែលកន្លងមក តែងតែចូលរួមជាមួយក្រសួងទេសចរណ៍គ្រប់ពេលវេលា ទាំងពេលសុខដុម និងគ្រាលំបាក ដែលយើងទាំងអស់គ្នាជាមហាគ្រួសារវិស័យ ទេសចរណ៍កម្ពុជា បានឆ្លងកាត់រយៈជាងមួយឆ្នាំជាមួយគ្នាកន្លងមក។ជាមួយគ្នានេះ ឯកឧត្តមរដ្ឋមន្រ្តី បានជម្រាបជូនដល់សមាជិក សមាជិកាសមាគមសណ្ឋាគារកម្ពុជាអំពីព្រឹត្តិការណ៍អន្តរជាតិធំៗ ដែលនឹងរៀបចំឡើងនៅប្រទេសកម្ពុជា ជាពិសេសគឺកិច្ចប្រជុំកំពូលបណ្តាប្រទេសនិយាយភាសាបារាំងលើកទី២០ នាខែវិច្ឆិកា ឆ្នាំ២០២៦ ខាងមុខ ដែលជាកិច្ចប្រជុំមានការចូលរួមពីថ្នាក់ដឹកនាំកំពូលៗ ពីបណ្តាប្រទេសជាច្រើន អ្នកសារព័ត៌មានអន្តរជាតិ និងអ្នកចូលរួមជាច្រើនពាន់នាក់ពីគ្រប់ទិសទីនៃពិភពលោក។ឯកឧត្តមរដ្ឋមន្រ្តី ក៏បានផ្តល់នូវអនុសាសន៍ណែនាំដល់សមាជិក សមាជិកាសមាគមសណ្ឋាគារកម្ពុជា ត្រៀមលក្ខណៈឱ្យបានល្អ និងគ្រប់ជ្រុងជ្រោយ ដើម្បីផ្តល់នូវបដិសណ្ឋារកិច្ចដ៏កក់ក្តៅ ជូនដល់ភ្ញៀវជាតិ និងអន្តរជាតិកំពូលៗ ដែលនឹងចូលរួមក្នុងកិច្ចប្រជុំកំពូលបណ្តាប្រទេសនិយាយភាសាបារាំង (Francophonie Summit) នៅរាជធានីភ្នំពេញនាពេលខាងមុខ ដែលជាការលើកមុខមាត់របស់ប្រទេសកម្ពុជាលើឆាកអន្តរជាតិ និយាយជារួម និងនិយាយដោយឡែកគឺសម្រាប់វិស័យទេសចរណ៍ បដិសណ្ឋារកិច្ច សេវាស្នាក់នៅ និងម្ហូបអាហាររបស់កម្ពុជាដល់ពិភពលោកទាំងមូល។ជាកិច្ចបន្ទាប់ ក្រោយពីឯកឧត្តមរដ្ឋមន្រ្តីបានស្តាប់សេចក្តីរាយការណ៍សង្ខេបស្តីពីវឌ្ឍនភាពសកម្មភាពរបស់សមាគមសណ្ឋាគារកម្ពុជា និងសំណូមពរ ព្រមទាំងបញ្ហាប្រឈមរបស់សមាជិក សមាជិកានៃសមាគមរួចមក ឯកឧត្តមរដ្ឋមន្ត្រី បានណែនាំឱ្យសមាគមត្រូវពង្រឹងរចនាសម្ព័ន្ធឱ្យបានរឹងមាំ ពង្រឹងសមត្ថភាព ធនធានមនុស្ស របៀបរបបការងារ (TOR) របបប្រជុំ របបរាយការណ៍ របបបណ្តុះបណ្តាល(Training Course) ទីតាំងសមាគម និងត្រូវមាន M&E System ការត្រួតពិនិត្យ វាយតម្លៃរបស់សមាគមរួមជាមួយធនធានថវិការបស់សមាគម ជាពិសេស ឯកឧត្តមរដ្ឋមន្រ្តី ក៏បានណែនាំឱ្យសមាគមរៀបចំជាផែនការសកម្មភាពប្រចាំឆ្នាំ២០២៦ ឱ្យបានឆាប់ ក្រោមទម្រង់ជា Practical Cooperation Action Plan ដើម្បីអនុវត្តការងារប្រកបដោយភាពទទួលខុសត្រូវ និងប្រសិទ្ធភាពខ្ពស់៕