(ភ្នំពេញ)៖ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងជាប្រធានគណៈកម្មាធិការអន្តរក្រសួង ដើម្បីសម្រួលការធ្វើដំណើរនិងដឹកជញ្ជូនភ្ញៀវទេសចរ និងអ្នកដំណើរនៅតំបន់ច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេស (គ.អ.ច.ទ) បានអញ្ជើញដឹកនាំកិច្ចប្រជុំរបស់គណៈកម្មការអន្តរក្រសួង គ.អ.ច.ទ ដើម្បីត្រួតពិនិត្យវឌ្ឍនភាពការងារជាក់ស្តែង នៃការអនុវត្តសាកល្បងការលើកលែងទិដ្ឋាការសម្រាប់ពលរដ្ឋចិន និងវាយតម្លៃអំពីចំណុចខ្លាំង ចំណុចខ្វះខាត បញ្ហាប្រឈម ក្នុងរយៈពេល ប្រមាណជិត២ខែនេះ (១៥ មិថុនា - ១៤ សីហា) ដើម្បីស្វែងរកដំណោះស្រាយសមស្របក្នុងការជំរុញការអនុវត្តឱ្យមានប្រសិទ្ធភាព និងទទួលបានប្រសិទ្ធផលខ្ពស់។ កិច្ចប្រជុំដ៏មានសារៈសំខាន់នេះ មានការអញ្ជើញចូលរួមពីឯកឧត្តម លោកជំទាវ ថ្នាក់ដឹកនាំក្រសួងទេសចរណ៍, តំណាងទីស្តីការគណៈរដ្ឋមន្ត្រី, រដ្ឋលេខាធិការដ្ឋានអាកាសចរណ៍ស៊ីវិល, អគ្គនាយកដ្ឋានអន្តោប្រវេសន៍, អគ្គស្នងការដ្ឋាននគរបាលជាតិ, ក្រសួង ស្ថាប័នពាក់ព័ន្ធ, និងវិស័យឯកជន ដែលមានសហព័ន្ធទេសចរណ៍កម្ពុជា, សមាគមទេសចរណ៍កម្ពុជា, សមាគមទេសចរណ៍អាស៊ីប៉ាស៊ីហ្វិកកម្ពុជា សរុប ៤២រូប ។ជាផ្លែផ្កានៃកិច្ចខិតខំប្រឹងប្រែង តាមរយៈកិច្ចប្រជុំកាលពីថ្ងៃទី២៥ ខែឧសភា ឆ្នាំ២០២៦, រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានផ្តល់ការអនុញ្ញាតជាគោលការណ៍ដ៏ខ្ពង់ខ្ពស់ ក្នុងការបង្កើត «បញ្ជរព័ត៌មាន» នៅតាមច្រកទ្វារអន្តរជាតិ ដើម្បីសម្របសម្រួល និងផ្តល់ព័ត៌មានជូនភ្ញៀវទេសចរនៅក្នុងអំឡុងពេលនៃការអនុវត្តគោលនយោបាយសាកល្បង និង ប្រើប្រាស់យន្តការគ.អ.ច.ទ. ដឹកនាំ និងសម្របសម្រួលការងារនេះឱ្យប្រព្រឹត្តទៅដោយរលូន និងមានប្រសិទ្ធភាព។ យោងរបាយការណ៍របស់គ្រឹះស្ថានអង្គរ ចាប់ពីថ្ងៃទី១៥ ខែមិថុនា ដល់ ថ្ងៃទី១២ ខែសីហា ទេសចរចិនដែលទិញសំបុត្រចូលទស្សនារមណីយដ្ឋានអង្គរ មានការកើនឡើងប្រមាណ ១៣,២៣% ប្រៀបធៀបនឹងរយៈពេលដូចគ្នាឆ្នាំ២០២៥។ តួលេខនេះ ពិតជាបានបង្ហាញអំពីទំនុកចិត្ត និងភាពជឿជាក់របស់ទេសចរនិងវិនិយោគិនចិន មកលើកម្ពុជាដែលជាគោលដៅទេសចរណ៍សុខសុវត្ថិភាព មានភាពទាក់ទាញ និងផ្តល់ភាពកក់ក្តៅ។សូមជម្រាបជូនថា ដំណើរការសាកល្បងនៃការលើកលែងទិដ្ឋាការជូនដល់ពលរដ្ឋចិន ចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា គឺជាជំហានយុទ្ធសាស្ត្រមួយក្នុងការទាក់ទាញលំហូរភ្ញៀវទេសចរ និងវិនិយោគិនចិនមកកាន់កម្ពុជាឱ្យបានកាន់តែច្រើន។ ទីស្តីការក្រសួងទេសចរណ៍ រសៀលថ្ងៃទី១៤ ខែសីហា ឆ្នាំ២០២៦

(ភ្នំពេញ)៖ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ នៃក្រសួងការងារនិងបណ្តុះបណ្តាលវិជ្ជាជីវៈ បានអញ្ជើញជាអធិបតីក្នុងកិច្ចប្រជុំពិនិត្យ និងពិភាក្សាលើការរៀបចំបញ្ជីឈ្មោះជំងឺវិជ្ជាជីវៈ ដោយមានការអញ្ជើញចូលរួមពីថ្នាក់ដឹកនាំនៃក្រសួងការងារនិងបណ្ដុះបណ្ដាលវិជ្ជាជីវៈ តំណាងបេឡាជាតិសន្តិសុខសង្គម តំណាងក្រសួងសុខាភិបាល អ្នកជំនាញការរបស់អង្គការអន្តរជាតិខាងការងារ(ILO) និងក្រុមការងារបច្ចេកទេស សរុបប្រមាណ ៦០រូប នៅទីស្តីការក្រសួង នារសៀលថ្ងៃទី១៣ ខែសីហា ឆ្នាំ២០២៦។កិច្ចប្រជុំពិនិត្យ និងពិភាក្សាលើការរៀបចំបញ្ជីឈ្មោះជំងឺវិជ្ជាជីវៈនេះ ត្រូវបានរៀបចំឡើងក្រោមកិច្ចសហការជាមួយអង្គការអន្តរជាតិខាងការងារ ក្នុងគោលបំណង (១) ឈ្វេងយល់ពីបទដ្ឋានស្តង់ដាបច្ចេកទេសពាក់ព័ន្ធនឹងការកំណត់បញ្ជីឈ្មោះជំងឺវិជ្ជាជីវៈរបស់អង្គការអន្តរជាតិខាងការងារ ក្របខ័ណ្ឌអាស៊ាន និងប្រទេសមួយចំនួនក្នុងតំបន់ (២) ពិភាក្សាលើបញ្ហាប្រឈមនានាក្នុងការរៀបចំចងក្រងនូវបញ្ជីឈ្មោះជំងឺវិជ្ជាជីវៈ និង (៣) រៀបចំផែនការសកម្មភាពអាទិភាពក្នុងការរៀបចំបញ្ជីឈ្មោះជំងឺវិជ្ជាជីវៈ។ក្នុងឱកាសនេះ លោកជំទាវ បានគូសបញ្ជាក់ថា បច្ចុប្បន្នកម្ពុជាមិនទាន់មានបញ្ជីឈ្មោះជំងឺវិជ្ជាជីវៈដែលត្រូវបានអនុម័តជាផ្លូវការនៅឡើយទេ ដែលទាមទារឱ្យមានការរៀបចំផែនការការងារឱ្យបានច្បាស់លាស់ស្របតាមការវិវត្តនៃប្រភេទការងារក្នុងតំបន់ និងសកលលោក ដើម្បីធានាថាការកំណត់ជំងឺវិជ្ជាជីវៈមានភាពស៊ីចង្វាក់គ្នាជាមួយការផ្តល់អត្ថប្រយោជន៍ដល់សមាជិក ប.ស.ស. ដោយផ្អែកលើមូលដ្ឋានគតិយុត្តដែលមានស្រាប់ រួមមានច្បាប់ស្ដីពីការងារ ច្បាប់ស្ដីពីប.ស.ស. និងស្ដង់ដាបច្ចេកទេសរបស់អង្គការអន្តរជាតិការងារ (ILO)។ ម្យ៉ាងវិញទៀត ការរៀបចំបញ្ជីឈ្មោះជំងឺវិជ្ជាជីវៈជាផ្លូវការនេះ ពិតជាមានសារៈសំខាន់ណាស់ ដែលជាសារវន្តក្នុងការធានាសុខុមាលភាពកម្មករនិយោជិត និងអាចបង្ការ និងទប់ស្កាត់ជំងឺពាក់ព័ន្ធនឹងការងារ។សូមបញ្ជាក់ថា តាមន័យនៃច្បាប់ស្តីពីការងារ និងច្បាប់ស្តីពីរបបសន្តិសុខសង្គម ជំងឺមួយត្រូវបានចាត់ទុកថាជា «ជំងឺវិជ្ជាជីវៈ» លុះត្រាតែជំងឺនោះបណ្តាលមកពីវិជ្ជាជីវៈ និងមានចែងនៅក្នុងច្បាប់ឬបញ្ជីជំងឺវិជ្ជាជីវៈដែលត្រូវបានកំណត់ដោយក្រសួង ឬស្ថាប័នសមត្ថកិច្ច និងមានការបញ្ជាក់ពីគ្រូពេទ្យឯកទេសផ្នែកសុខភាពការងារ៕

(ភ្នំពេញ)៖ ឯកឧត្ដម ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានទទួលជួបសម្តែងការគួរសម និងពិភាក្សាការងារជាមួយលោកស្រី សូនយ៉ា អែលម័រ ឌែតថែលបាកឃើ (Sonya Elmer DETTELBACHER) អនុប្រធានថ្មីនៃទីភ្នាក់ងារស្វ៊ីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) នៅកម្ពុជា នាព្រឹកថ្ងៃទី១៤ ខែសីហា ឆ្នាំ២០២៦ នៅទីស្តីការក្រសួង ដើម្បីឈ្វេងយល់ពីអាទិភាពការងារ និងទិសដៅយុទ្ធសាស្ត្ររបស់ក្រសួង ព្រមទាំងផ្លាស់ប្តូរយោបល់អំពីការវិវត្តថ្មីៗក្នុងវិស័យការងារ និងបណ្តុះបណ្តាលវិជ្ជាជីវៈ។ នាឱកាសនោះ ឯកឧត្តមរដ្ឋមន្រ្តីបានស្វាគមន៍ និងសម្តែងនូវការអបអរសាទរយ៉ាងកក់ក្តៅចំពោះលោកស្រី សូនយ៉ា អែលម័រ ឌែតថែលបាកឃើ ដែលទទួលបានការតែងតាំងតួនាទីថ្មី ព្រមទាំងបានកោតសរសើរចំពោះរដ្ឋាភិបាលស្វ៊ីស និង SDC សម្រាប់ភាពជាដៃគូដ៏យូរអង្វែងនិងដ៏សំខាន់ជាមួយកម្ពុជា។ ឯកឧត្តមបានវាយតម្លៃខ្ពស់ចំពោះសមិទ្ធផលនៃគម្រោងជាច្រើនជាមួយ SDC ដែលជួយធានានូវកិច្ចសហប្រតិបត្តិការអភិវឌ្ឍន៍សម្រាប់ឆ្លើយតបដ៏នឹងអាទិភាពកម្ពុជា ជាពិសេសការអភិវឌ្ឍមូលធនមនុស្ស និងសង្ឃឹមថាការដឹកនាំរបស់លោកស្រីនឹងបន្តពង្រឹងកិច្ចសហប្រតិបត្តិការឱ្យកាន់តែរឹងមាំ ដោយធានារាល់គម្រោងកំពុងអនុវត្តរួមគ្នានឹងសម្រេចបានលទ្ធផលកាន់តែមានប្រសិទ្ធភាព និងប្រសិទ្ធផល។ ជាមួយនឹងការជម្រាបជូនពីទស្សនវិស័យសំខាន់ៗរបស់កម្ពុជា ក៏ដូចជាក្រសួងការងារ ឯកឧត្តមបានគូសបញ្ជាក់ពីទំនាក់ទំនងដែលមិនអាចកាត់ផ្តាច់ពីគ្នាបានរវាងការអភិវឌ្ឍសេដ្ឋកិច្ច និងអភិវឌ្ឍធនធានមនុស្ស ព្រោះកំណើនសេដ្ឋកិច្ចប្រកបដោយចីរភាព គឺត្រូវការកម្លាំងពលកម្មដែលមានជំនាញ ផលិតភាព ភាពប្រកួតប្រជែង និងបរិយាបន្ន។ ឯកឧត្តមបានលើកឡើងពីតួនាទីដ៏សំខាន់នៃ TVET ក្នុងការឆ្លើយតបទៅនឹងតម្រូវការនេះ ជាពិសេសតាមរយៈការបណ្តុះបណ្តាលជំនាញឡើងវិញ និងការលើកកម្ពស់ជំនាញ សម្រាប់កម្លាំងពលកម្មដែលមានជំនាញកម្រិតទាប និងមធ្យម ខណៈដែលរាជរដ្ឋាភិបាលយកចិត្តទុកដាក់ខ្ពស់លើយុវជនមកពីគ្រួសារក្រីក្រ និងក្រុមងាយរងគ្រោះ សិស្សបោះបង់ការសិក្សា ឬអតីតពលករ។ កម្ពុជាក៏កំពុងលើកកម្ពស់គុណភាព TVET និងពង្រឹងភាពជាដៃគូជាមួយវិស័យឯកជនដែលមានលក្ខណៈសម្បត្តិគ្រប់គ្រាន់ ដូចជា ការសិក្សាផ្អែកលើការងារ និងការហាត់ការងារជាដើម។ កម្ពុជាប្តេជ្ញាលើកកម្ពស់ការធ្វើទេសន្តរប្រវេសន៍ដែលមានជំនាញប្រកបដោយសុវត្ថិភាព និងស្របច្បាប់ ពង្រឹងការការពារសិទ្ធិ និងផលប្រយោជន៍ពួកគាត់ ព្រមទាំងការធ្វើសមាហរណកម្មប្រកបដោយផលិតភាពសម្រាប់អតីតពលករទេសន្តរប្រវេសន៍។ ឯកឧត្តមក៏បានជម្រាបជូនពីអនុវត្ត គន្លងអប់រំថ្មី ដែលផ្តល់ឱកាសអប់រំប្រកបដោយភាពបត់បែនសមស្របតាមលទ្ធភាព តម្រូវការ និងគោលដៅអាជីពរបស់សិស្ស និងបានគូសបញ្ជាក់ថា កម្ពុជានៅតែបើកចំហចំពោះវិធីសាស្ត្រប្រកបដោយនវានុវត្តន៍ និងកិច្ចសហប្រតិបត្តិការថ្មីៗ ដើម្បីជួយឱ្យកម្លាំងពលកម្មអាចសម្របខ្លួនបានទៅនឹងកាលានុវត្តភាព និងបញ្ហាប្រឈមដែលកើតចេញពីការផ្លាស់ប្តូររចនាសម្ព័ន្ធសេដ្ឋកិច្ច។ ជាការឆ្លើយតប លោកស្រី សូនយ៉ា អែលម័រ ឌែតថែលបាកឃើ បានថ្លែងអំណរគុណយ៉ាងជ្រាលជ្រៅចំពោះឯកឧត្តមរដ្ឋមន្រ្តីក្នុងកិច្ចពិភាក្សាប្រកបផលិតភាព និងបានកោតសរសើរចំពោះកិច្ចសហប្រតិបត្តិការដ៏យូរអង្វែង និងល្អប្រសើរជាមួយក្រសួង ក៏ដូចជាចក្ខុវិស័យដ៏វែងឆ្ងាយនិងច្បាស់លាស់របស់កម្ពុជា។ លោកស្រីបានគូសបញ្ជាក់ពីសារៈសំខាន់នៃការបន្តធ្វើការរួមគ្នាយ៉ាងជិតស្និទ្ធ ដើម្បីគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការជំរុញការអភិវឌ្ឍ ជាពិសេសក្នុងវិស័យការងារ និងបណ្តុះបណ្តាលវិជ្ជាជីវៈ។ ឯកឧត្តមមានជំនឿយ៉ាងមុតមាំថា ភាពជាដៃគូកម្ពុជា-ស្វ៊ីស នឹងបន្តពង្រឹង និងពង្រីកកាន់តែស៊ីជម្រៅដោយឈរលើស្មារតីនៃការជឿទុកចិត្ត ការគោរពគ្នា និងការប្តេជ្ញាចិត្តរួមគ្នាចំពោះការអភិវឌ្ឍប្រកបដោយចីរភាព និងបរិយាបន្នដែលនឹងផ្តល់ផលប្រយោជន៍យូរអង្វែងដល់ប្រជាពលរដ្ឋ បងប្អូនកម្មករនិយោជិត និងសម្រេចបាននូវអាទិភាពអភិវឌ្ឍន៍ជាតិ៕

(សៀមរាប)៖ សិស្សានុសិស្សប្រមាណ ៣០០នាក់ មកពីវិទ្យាល័យចំនួន៣ ក្នុងខេត្តសៀមរាប បានចុះទស្សនកិច្ចសិក្សានៅវិទ្យាស្ថានជាតិពហុបច្ចេកទេសអង្គរ ដើម្បីស្វែងយល់បន្ថែមអំពីកម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈ រោងជាង ឧបករណ៍បច្ចេកទេស ព្រមទាំងឱកាសការងារដែលពាក់ព័ន្ធនឹងជំនាញនីមួយៗ។ទស្សនកិច្ចសិក្សានេះ បានរៀបចំឡើងបន្ទាប់ពីក្រុមការងារការិយាល័យទំនាក់ទំនងរបស់វិទ្យាស្ថាន បានចុះតម្រង់ទិសវិជ្ជាជីវៈ និងផ្សព្វផ្សាយអំពីការសិក្សាជំនាញបច្ចេកទេសដល់សិស្សថ្នាក់ទី១២ ដែលត្រៀមប្រឡងមធ្យមសិក្សាទុតិយភូមិ (បាក់ឌុប) កាលពីថ្ងៃទី១៧ ដល់ថ្ងៃទី២០ ខែកក្កដា ឆ្នាំ២០២៦។ក្នុងសកម្មភាពតម្រង់ទិសវិជ្ជាជីវៈនេះ ក្រុមការងារបានចុះផ្សព្វផ្សាយនៅវិទ្យាល័យចំនួន៦ រួមមាន វិទ្យាល័យអារញ្ញសាគរ ស៊ី អហ ស៊ី, វិទ្យាល័យនគរធំ, វិទ្យាល័យអង្គរជុំ, វិទ្យាល័យវ៉ារិន, វិទ្យាល័យក្រឡាញ់ និងវិទ្យាល័យកំពង់ក្ដី ដើម្បីផ្តល់ព័ត៌មានដល់សិស្សអំពីជម្រើសសិក្សាជំនាញ និងឱកាសការងារនាពេលអនាគត។តាមរយៈការតម្រង់ទិស និងប្រឹក្សាជំនាញ ក្រុមការងារបានកត់សម្គាល់ថា សិស្សប្រមាណ ៥០ភាគរយ បានបង្ហាញចំណាប់អារម្មណ៍លើការសិក្សាជំនាញបច្ចេកទេស ហើយបានស្នើឱ្យវិទ្យាស្ថានរៀបចំទស្សនកិច្ចសិក្សា ដើម្បីឱ្យពួកគេអាចស្វែងយល់ដោយផ្ទាល់ពីបរិយាកាសសិក្សា កម្មវិធីបណ្តុះបណ្តាល និងឧបករណ៍សម្រាប់ការអនុវត្តជាក់ស្តែង។ជាការឆ្លើយតប វិទ្យាស្ថានជាតិពហុបច្ចេកទេសអង្គរ បានរៀបចំមធ្យោបាយធ្វើដំណើរ និងទទួលសិស្សមកពីវិទ្យាល័យចំនួន៣ រួមមាន វិទ្យាល័យអារញ្ញសាគរ វិទ្យាល័យកំពង់ក្តី និងវិទ្យាល័យវ៉ារិន ដែលមានសិស្សចូលរួមសរុបប្រមាណ ៣០០នាក់។ក្នុងអំឡុងពេលទស្សនកិច្ច សិស្សានុសិស្សត្រូវបាននាំទស្សនារោងជាង និងកន្លែងបណ្តុះបណ្តាលដែលបំពាក់ដោយឧបករណ៍ និងបរិក្ខារបច្ចេកទេស ស្របតាមជំនាញនីមួយៗ។ គ្រូបច្ចេកទេសរបស់វិទ្យាស្ថានក៏បានធ្វើបទបង្ហាញ និងពន្យល់អំពីកម្មវិធីសិក្សា រយៈពេលបណ្តុះបណ្តាល ជំនាញដែលកំពុងមានតម្រូវការនៅក្នុងទីផ្សារការងារ និងលទ្ធភាពការងារបន្ទាប់ពីបញ្ចប់ការសិក្សា។សកម្មភាពទស្សនកិច្ចសិក្សានេះ មានគោលបំណងជួយឱ្យសិស្សថ្នាក់ទី១២ អាចស្គាល់កាន់តែច្បាស់អំពីការសិក្សាជំនាញបច្ចេកទេស និងវិជ្ជាជីវៈ ព្រមទាំងជួយឱ្យពួកគេមានមូលដ្ឋានព័ត៌មានគ្រប់គ្រាន់សម្រាប់សម្រេចចិត្តជ្រើសរើសជំនាញសិក្សាបន្ត បន្ទាប់ពីបញ្ចប់ថ្នាក់មធ្យមសិក្សាទុតិយភូមិ៕

(ភ្នំពេញ)៖ ទិញផ្ទះ​ ទទួលបានដេគ័រដោយឥតគិតថ្លៃ! ចាប់ពីការជូនដំណឹងនេះរហូតដល់បំណាច់ខែកញ្ញា ឆ្នាំ២០២៦នេះ បុរី មេគង្គ លែន កំពុងតែមានការផ្ដល់ជូនដ៏ពិសេសបំផុតសម្រាប់អតិថិជនតាមរយៈការថែមជូនកញ្ចប់ ដេគ័រ រាល់ការទិញ «វីឡាឃ្វីន B» ក្នុងគម្រោង «មេគង្គ​ ស៊ីធី» ជាមួយចំនួនមានកំណត់បំផុត។ការថែមជូនកញ្ចប់រចនាដេគ័រផ្នែកខាងក្នុង វីឡាឃ្វីន B រួមមាន៖·      ថែមជូនជាន់ផ្ទាល់ដី៖ ទូតាំងទូរទស្សន៍ + ឈុតទូចង្ក្រានលើក្រោម + ទូស្រា + តុក្រឡុកស្រា·      ថែមជូនជាន់ទី១ (បន្ទប់មេគ្រួសារ)៖ ទូសម្លៀកបំពាក់ + ទូសម្អាង + ទូតាំងទូរទស្សន៍(សូមពិនិត្យរូបភាពតំណាងនៅខាងក្រោម)*លក្ខខណ្ឌនានាត្រូវបានអនុវត្ដបន្ថែមពីលើនេះផងដែរ រាល់ការអញ្ជើញមកទស្សនាគម្រោង និងគេហដ្ឋានក្នុងគម្រោង «មេគង្គ ស៊ីធី» ផ្ទាល់ អតិថិជននឹងបានចូលរួមលេងក្នុងយុទ្ធនាការ «VISIT & WIN» ទទួលបាន Voucher របស់ WingShop-Mekong Land ៦A ដែលមានទឹកប្រាក់រហូតដល់ ១០០ដុល្លារ ភ្លាមៗ តែម្តង! សូមប្រញាប់រួសរាន់ឡើង​​ ចំនួនមានកំណត់!គួរបញ្ជាក់ផងដែរថា បុរី មេគង្គ លែន ជាក្រុមហ៊ុនអភិវឌ្ឍលំនៅឋា​នដែលពោរពេញដោយបទពិសោធ និងជាក្រុមហ៊ុនដែលឈានមុខគេមួយក្នុងប្រទេសកម្ពុជាក្នុងការសាងសង់គេហដ្ឋានរចនាបថម៉ូដក្លាស៊ីកបែបអឺរ៉ុប និងគេហដ្ឋានរចនាបថម៉ូដទាន់សម័យដែលមាន ៣ គម្រោងដូចជា៖ ១. «ឌឹ មេគង្គ រ៉ូយ៉ាល់» ជាគម្រោងគេហដ្ឋានម៉ូដក្លាស៊ីកបែបអឺរ៉ុប ស្ថិតនៅបណ្តោយផ្លូវជាតិ ៦A, ២. «ហ្គោលឌិន អាវិននូ» ជាគម្រោងគេហដ្ឋានរចនាបថម៉ូតទាន់សម័យ ស្ថិតនៅផ្លូវ ២០១១ និង ៣. «មេគង្គ ស៊ីធី» ជាគម្រោងគេហដ្ឋានម៉ូដក្លាស៊ីកបែបអឺរ៉ុប ស្ថិតនៅបណ្តោយផ្លូវជាតិ ៦A។ គ្រប់គម្រោងរបស់ បុរី មេគង្គ លែន ត្រូវបានសាងសង់ដោយការយកចិត្តទុកដាក់ខ្ពស់ពីថ្នាក់ដឹកនាំ និងពីក្រុមវិស្វករជំនាញរបស់បុរីដោយផ្ដោតលើគុណភាព និងប្រណិតភាពជាចំបង។ ការផ្ចិតផ្ចង់នៃស្ថាបត្យកម្ម សំណង់ និងទឹកដៃល្អ សម្រិតសម្រាំងបាននូវគេហដ្ឋានប្រណិតទាន់សម័យ ផ្ដល់នូវផាសុកភាព សុវត្ថិភាព ភាពស៊ីវិល័យ និងការរស់នៅទាន់សម័យ ជូនដល់គ្រប់អតិថិជន។ https://www.facebook.com/reel/1068658698963378បុរី មេគង្គ លែន ផ្តើមជីវិតរីករាយ និងជោគជ័យនៅទីនេះ!ហ្វេសប៊ុកផេកផ្លូវការ បុរី មេគង្គ លែន៖ https://www.facebook.com/MekongLandOfficialសម្រាប់ព័ត៌មានលម្អិតបន្ថែម៖ 061 955 999, Telegram: https://t.me/mekongland  ឆាតសួរព័ត៌មាន: https://t.me/MekongLand_Hotline ផែនទីការិយាល័យផ្នែកលក់កណ្តាល៖ https://maps.app.goo.gl/ce51Q5RZBjeASF4D7ផែនទីការិយាល័យផ្នែកលក់របស់គម្រោង មេគង្គ ស៊ីធី៖ https://maps.app.goo.gl/wjN9iapG6JXNtrUA7ផែនទីការិយាល័យផ្នែកលក់របស់គម្រោង ហ្គោលឌិន អាវិននូ៖ https://maps.app.goo.gl/S2LuoZmVBbMziVm29

(ភ្នំពេញ) នៅថ្ងៃទី១៥ ខែសីហា ឆ្នាំ២០២៦ ឯកឧត្តម ចាយ បូរិន សមាជិកគណៈកម្មាធិការកណ្តាលគណបក្ស ប្រជាជនកម្ពុជា និងជាសមាជិកអចិន្ត្រៃយ៍យុវជនគណបក្សថ្នាក់កណ្តាល បានដឹកនាំគណៈប្រតិភូផ្នែកឃោសនាអប់រំ នៃយុវជនគណបក្សប្រជាជនកម្ពុជាថ្នាក់កណ្តាល អញ្ជើញសួរសុខទុក្ខនិងនាំយកអំណោយដ៏ថ្លៃថ្លារបស់ សម្តេចមហា បវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវជនគណបក្សប្រជាជនកម្ពុជា ថ្នាក់កណ្តាល និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការកាយឫទ្ធិនារីកម្ពុជា ជូនឯក ឧត្តមកិត្តិបណ្ឌិត ពេជ្រ ប៊ុនធិន សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាសមាជិក រដ្ឋសភា មណ្ឌលខេត្តក្រចេះ នៅគេហដ្ឋាន ស្ថិតនៅរាជធានីភ្នំពេញ។ក្នុងឱកាសនោះ ឯកឧត្តមប្រធានគណៈប្រតិភូ បានពាំនាំការផ្តាំផ្ញើការសួរសុខទុក្ខ ពីសំណាក់សម្តេចអគ្គមហា សេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវជនគណបក្សប្រជាជនកម្ពុជាថ្នាក់កណ្តាល និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការកាយឫទ្ធិនារីកម្ពុជា ព្រមទាំងសម្តេច ឯកឧត្តម ថ្នាក់ដឹកនាំគណបក្សគ្រប់លំដាប់ថ្នាក់ ជូនឯកឧត្តម កិត្តិបណ្ឌិត ពេជ្រ ប៊ុនធិន និងលោកជំទាវ ព្រមទាំងក្រុមគ្រួសារ ដែលជានិច្ចកាល សម្តេចអគ្គមហាសេនាបតី តេជោ សម្តេចកិត្តិព្រឹទ្ធបណ្ឌិត សម្តេចមហាបវរធិបតី និងលោកជំទាវបណ្ឌិត តែងតែគិតគូរយកចិត្តទុកដាក់អំពី សុខទុក្ខប្រជាជន និងថ្នាក់ដឹកនាំគ្រប់លំដាប់ថ្នាក់ ដែលធ្លាប់មានស្នាដៃ និងគុណបំណាច់ចំពោះគណបក្ស និង ប្រទេសជាតិ។ឯកឧត្តមកិត្តិបណ្ឌិត ពេជ្រ ប៊ុនធិន បានមានប្រសាសន៍ថា៖ «ខ្ញុំបាទព្រមទាំងក្រុមគ្រួសារ ពិតជាមានបីតិ សោមនស្សយ៉ាងក្រៃលែង និងសូមសម្តែងកតញ្ញូតាធម៌គោរពជូនចំពោះ សម្តេចអគ្គមហាសេនាបតីតេជោ សម្តេច កិត្តិព្រឹទ្ធបណ្ឌិត សម្តេចមហាបវរធិបតី និងលោកជំទាវបណ្ឌិត ដែលបានចាត់ឯកឧត្តម ចាយ បូរិន ជាតំណាងដ៏ ខ្ពង់ខ្ពស់ អញ្ជើញមកសួរសុខទុក្ខ និងនាំយកអំណោយដ៏ថ្លៃថ្លា មកផ្តល់ឱ្យខ្ញុំបាទ និងក្រុមគ្រួសារដល់គេហដ្ឋានផ្ទាល់។ ខ្ញុំបាទនិងក្រុមគ្រួសារ ពិតជាមានកិត្តិយស និងក្តីរំភើបរីករាយឥតឧបមា ចំពោះសកម្មភាពចុះសួរសុខទុក្ខរបស់ ក្រុមការងារយុវជនគណបក្សថ្នាក់កណ្តាល ក្រោមការដឹកនាំប្រកបដោយភាពប្រាកដនិយមរបស់សម្តេចមហាបវរ ធិបតី ហ៊ុន ម៉ាណែត ដែលបន្តប្រតិបត្តិតាមប្រពៃណីដ៏ល្អផូរផង់ ពីសម្តេចអគ្គមហាសេនាបតីតេជោ ដែលតែងតែ យកចិត្តទុកដាក់ពីសុខទុក្ខ ជីវភាព ផ្តល់ភាពកក់ក្តៅ និងក្តីសង្ឃឹមដល់ព្រឹទ្ធាចារ្យ ដែលមានគុណបំណាច់ចំពោះ គណបក្ស និងប្រទេសជាតិ ស្របតាមគោលការណ៍និងប្រពៃណីដ៏ផូរផង់របស់គណបក្សប្រជាជនកម្ពុជា»។ឯកឧត្តមកិត្តិបណ្ឌិត បានបញ្ជាក់ពីការគាំទ្រ និងមានជំនឿចិត្តយ៉ាងមុតមាំចំពោះរាជរដ្ឋាភិបាល អាណត្តិទី៧ នៃ រដ្ឋសភា ក្រោមការដឹកនាំប្រកបដោយចក្ខុវិស័យវែងឆ្ងាយនិងការប្តេជ្ញាចិត្តយ៉ាងមោះមុតរបស់ សម្តេចមហា បវរធិបតី ក្នុងការបន្តការពារ និងថែរក្សានូវសុខសន្តិភាព ស្ថិរភាពសង្គម អធិបតេយ្យជាតិ បូរណភាពទឹកដី និងសូមគោរពជូនពរ សម្តេចអគ្គមហាសេនាបតីតេជោ សម្តេចកិត្តិព្រឹទ្ធបណ្ឌិត សម្តេចមហាបវរធិបតី និងលោក ជំទាវបណ្ឌិត ព្រមទាំងសម្តេច ឯកឧត្តម ថ្នាក់ដឹកនាំគណបក្សគ្រប់លំដាប់ថ្នាក់ សូមទទួលបាននូវឧត្តមពរជ័យ សិរីមង្គល វិបុលសុខគ្រប់ប្រការ និងសូមមានសុខភាពល្អបរិបូរណ៍ ជន្មាយុយឺនយូរ ដើម្បីដឹកនាំនាវាកម្ពុជា ឈាន ឆ្ពោះទៅរកវឌ្ឍនភាពជានិរន្តរ៍។ទន្ទឹមនេះ ឯកឧត្តមកិត្តិបណ្ឌិត បានរម្លឹកអំពីប្រវត្តិការសិក្សា ការងារ និងអនុស្សាវរីយ៍ជាច្រើន ដែលឯកឧត្តមធ្លាប់ បានចូលរួមបម្រើឱ្យផលប្រយោជន៍ជាតិនិងគណបក្សប្រជាជនកម្ពុជា ដើម្បីចែករំលែកជាបទពិសោធដល់យុវជន ដោយបានឆ្លងកាត់តួនាទីជាច្រើនក្នុងជួរគណបក្ស និងរាជរដ្ឋាភិបាល គឺ៖ក. ប្រវត្តិការសិក្សានិងកម្រិតវប្បធម៌៖ ឯកឧត្តមកិត្តិបណ្ឌិត ១) សញ្ញាបត្រមធ្យមសិក្សាទុតិយភូមិ ផ្នែកចំណេះដឹង ទូទៅ ២) ឆ្នាំ១៩៦៤ បញ្ចប់ការសិក្សានៅវិទ្យាស្ថានគរុកោសល្យ ផ្នែកបណ្តុះបណ្តាលសាស្ត្រាចារ្យ ៣) ឆ្នាំ ១៩៧៤ បរិញ្ញាបត្រផ្នែកប្រវត្តិវិជ្ជា ៤) ឆ្នាំ១៩៨៣ សញ្ញាបត្រច្បាប់ ពីសាលាកម្មាភិបាល ភ្នំពេញ ៥) ឆ្នាំ ១៩៨៦ សញ្ញាបត្រទស្សនវិជ្ជា ពីបណ្ឌិតសភាវិទ្យាសាស្ត្រសង្គម ទីក្រុងម៉ូស្គូ ៦) ឆ្នាំ១៩៩៣ សញ្ញាបត្រវិក្រឹតការ មន្ត្រីជាន់ខ្ពស់ ពីសាលាភូមិន្ទរដ្ឋបាល ៧) ឆ្នាំ១៩៩៤ សញ្ញាបត្រឯកទេសរដ្ឋបាល ពីទីក្រុងប៉ារីស ប្រទេសបារាំង។ ខ.ប្រវត្តិការងារ៖ ១) ឆ្នាំ១៩៦៤-១៩៦៨ បានចូលបម្រើការងាររដ្ឋ ជាសាស្ត្រាចារ្យ និងជានាយកអនុវិទ្យាល័ យស្ទោង ខេត្តកំពង់ធំ ២)ឆ្នាំ១៩៦៨-១៩៧៥ ជាសាស្ត្រាចារ្យបង្រៀនប្រវត្តិវិជ្ជា នៅវិទ្យាល័យតាខ្មៅ ខេត្ត កណ្តាល ៣) ឆ្នាំ១៩៧៥-១៩៧៩ ជាកសិករក្នុងរបបប្រល័យពូជសាសន៍ ប៉ុល ពត នៅឃុំឆ្លូង ស្រុកឆ្លូង ខេត្តក្រចេះ។ ៤) ឆ្នាំ១៩៧៩ ជាប្រធានភូមិជ្រោយថ្មលើ និងជាសមាជិកក្រុមការងារកសាងរដ្ឋអំណាច ៥) ឆ្នាំ១៩៨០-១៩៨៤ ជាប្រធានមន្ទីរស្រុកឆ្លូង ៦) ឆ្នាំ១៩៩៣-ឆ្នាំ១៩៩៨ ជានាយករងទី១ ក្រសួងមហាផ្ទៃ (ខុទ្ទកាល័យ) ៧) ឆ្នាំ ១៩៩៨-ឆ្នាំ២០១៣ ជារដ្ឋលេខាធិការ រដ្ឋលេខាធិការដ្ឋានមុខងារសាធារណៈ ៨) ឆ្នាំ២០១៣-២០២០ ជារដ្ឋម ន្ត្រីមុខងារសាធារណៈ ៩) ឆ្នាំ២០២០ ជាទេសរដ្ឋមន្ត្រីទទួលបន្ទុកបេសកកម្មពិសេស ១០) ឆ្នាំ២០២៣ ជា សមាជិករដ្ឋសភាមណ្ឌលខេត្តក្រចេះ អាណត្តិទី៧ នៃរដ្ឋសភា។គ.ប្រវត្តិការងារគណបក្ស៖ ១) ឆ្នាំ១៩៨១ ចូលជាសមាជិកគណបក្សប្រជាជនកម្ពុជាជាផ្លូវការ ២) ឆ្នាំ១៩៨៤ - ១៩៨៩ ជាអនុប្រធានមន្ទីរបក្សខេត្តក្រចេះ ៣) ឆ្នាំ១៩៨៩-១៩៩១ ជាអនុលេខាប្រចាំការ គណៈកម្មាធិការ គណបក្សខេត្តក្រចេះ ៤) ឆ្នាំ១៩៩១-១៩៩៣ ជាសមាជិកក្រុមការងារគណបក្សប្រជាជនកម្ពុជា ធ្វើការជាមួយ អាជ្ញាធរអន្តរកាលអង្គការសហប្រជាជាតិនៅកម្ពុជា (UNTAC)។ បច្ចុប្បន្ន មានជីវភាពគណបក្សនៅខុទ្ទកាល័យ សម្តេចអគ្គមហាសេនាបតីតេជោ ហ៊ុន សែន ក្នុងសាខាទី១៥ ចំណុះគណៈកម្មាធិការគណបក្សខុទ្ទកាល័យ សម្តេចតេជោ។ជាងនេះទៅទៀត ឯកឧត្តមកិត្តិបណ្ឌិត បានចែករំលែកបទពិសោធ ដល់យុវជនគណបក្ស ដូចខាងក្រោម៖១. យុវជនដែលជាអ្នកបន្តវេនត្រូវយកចិត្តទុកដាក់ និងចាប់អារម្មណ៍ខ្ពស់ចំពោះសមត្ថភាព កិត្តិយស និងគុណ តម្លៃរបស់ខ្លួនក្នុងការធ្វើការឃោសនាអូសទាញស្វែងរកការគាំទ្រកម្មវិធីនយោបាយរបស់គណបក្ស នៅគ្រប់ ភូមិដ្ឋានរបស់ខ្លួន។២. យុវជនត្រូវចងចាំជានិច្ចនូវគម្រូវីរៈភាពរបស់យុវជនជំនាន់មុន ដែលលោកបានតស៊ូពុះពារគ្រប់បែបយ៉ាង ក្នុងការដឹកនាំសង្គមជាតិ ឱ្យមានការអភិវឌ្ឍមកដល់បច្ចុប្បន្ន។៣. យុវជនត្រូវចេះច្នៃប្រឌិតកំណត់ទំហំការងារ និងគោរពឱ្យតម្លៃចំពោះពេលវេលាក្នុងការបំពេញភារកិច្ចរបស់ ខ្លួនឱ្យបានខ្ជាប់ខ្ជួន។៤. អង្គការចាត់តាំង ត្រូវមានតួនាទីភារកិច្ចច្បាស់លាស់ ដើម្បីឱ្យការអនុវត្តការងារទទួលបានការងារឱ្យមាន ប្រសិទ្ធភាពខ្ពស់។៥. ការប្រគល់ភារកិច្ច ត្រូវមានធនធានចំនួន៣ សម្រាប់គាំទ្រដល់ការបំពេញភារកិច្ច រួមមានធនធានមនុស្ស ធនធានហិរញ្ញវត្ថុ និងធនធានសម្ភារៈ។៦. សូមគាំទ្រលើសកម្មភាពចុះសួរសុខទុក្ខ ក្រោមគំនិតផ្តួចផ្តើមដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត ប្រធានយុវជនគណបក្សប្រជាជនកម្ពុជាថ្នាក់កណ្តាល សូមឱ្យជំរុញសកម្មភាពនេះឱ្យ បានផុលផុសដល់និវត្តជន អតីតយុទ្ធជន គ្រប់ក្រសួងស្ថាប័នទាំងថ្នាក់ជាតិនិងថ្នាក់ក្រោមជាតិ។ឯកឧត្តមប្រធានគណៈប្រតិភូ បានកោតសរសើរ និងវាយតម្លៃខ្ពស់ចំពោះស្នាដៃ និងការខិតខំប្រឹងប្រែងរបស់ ឯកឧត្តមកិត្តិបណ្ឌិត ដែលបានចូលរួមចំណែកបម្រើគណបក្សប្រជាជនកម្ពុជា និងប្រទេសជាតិកន្លងមក ជា ពិសេសក្នុងវិស័យមុខងារសាធារណៈ ព្រមទាំងបានប្រគល់នូវអំណោយដ៏ថ្លៃថ្លារបស់សម្តេចមហាបវរធិបតី និង លោកជំទាវបណ្ឌិត ជូនចំពោះឯកឧត្តមកិត្តិបណ្ឌិត ពេជ្រ ប៊ុនធិន និងសូមបួងសួងដល់គុណព្រះរតនត្រ័យ និង វត្ថុស័ក្តិសិទ្ធិក្នុងលោក តាមជួយបីបាច់ថែរក្សា ឯកឧត្តម និងលោកជំទាវ ព្រមទាំងក្រុមគ្រួសារ មានសុខភាពល្អ កម្លាំងមាំមួន និងមានជន្មាយុយឺនយូរ ទទួលបាននូវឧត្តមពរ៤ប្រការ គឺអាយុ វណ្ណៈ សុខៈ ពលៈ កុំបីប្រែក្លាយជាបការៈ ដទៃឡើយ៕

(ភ្នំពេញ)៖ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា បានដឹកនាំថ្នាក់ដឹកនាំ និងសមាជិក-សមាជិកានៃសភាពាណិជ្ជកម្មកម្ពុជា នាំយកថវិកាបរិច្ចាគសរុបចំនួន ១,០៤៤,១០០ដុល្លារអាម៉េរិក ប្រគល់ជូនកាកបាទក្រហមកម្ពុជា ដើម្បីចូលរួមគាំទ្រដល់បេសកកម្មមនុស្សធម៌ និងការជួយសង្គ្រោះប្រជាពលរដ្ឋដែលជួបការលំបាក និងងាយរងគ្រោះនៅទូទាំងប្រទេស។ពិធីប្រគល់-ទទួលថវិកាបរិច្ចាគនេះ បានធ្វើឡើងនាថ្ងៃសុក្រ ទី១៤ ខែសីហា ឆ្នាំ២០២៦ នៅទីស្នាក់ការកណ្តាលកាកបាទក្រហមកម្ពុជា ក្រោមអធិបតីភាពដ៏ខ្ពង់ខ្ពស់របស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អនុប្រធានអចិន្ត្រៃយ៍កាកបាទក្រហមកម្ពុជា និងជាតំណាងដ៏ខ្ពង់ខ្ពស់របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។ការបរិច្ចាគនេះ ធ្វើឡើងក្នុងឱកាសរំលឹកខួបលើកទី១៦៣ នៃទិវាកាកបាទក្រហម និងអឌ្ឍចន្ទក្រហមពិភពលោក ៨ ឧសភា ឆ្នាំ២០២៦ ក្រោមប្រធានបទ «បន្តរួមកម្លាំងគ្នា ដើម្បីមនុស្សធម៌» ដែលជាការអំពាវនាវឱ្យគ្រប់ភាគីក្នុងសង្គម រួមទាំងវិស័យឯកជន បន្តចូលរួមចំណែកក្នុងការងារមនុស្សធម៌ និងការជួយដល់ប្រជាពលរដ្ឋដែលត្រូវការជំនួយ។ក្នុងពិធីនេះ ក៏មានការអញ្ជើញចូលរួមពីលោកជំទាវអ្នកឧកញ៉ា ម៉ៅ ចំណាន គិតម៉េង, លោកអ្នកឧកញ៉ា លាង ឃុន, អ្នកឧកញ៉ា លាង ម៉េង ព្រមទាំងថ្នាក់ដឹកនាំជាន់ខ្ពស់អនុប្រធាន សមាជិក-សមាជិកា សភាពាណិជ្ជកម្មកម្ពុជា សប្បុរសជន និងភ្ញៀវកិត្តិយសជាច្រើនរូប។មានប្រសាសន៍ក្នុងឱកាសនោះ អ្នកឧកញ៉ា គិត ម៉េង បានថ្លែងថា អ្នកឧកញ៉ាពិតជាមានកិត្តិយស និងសេចក្តីសោមនស្សរីករាយ ដែលបានដឹកនាំគណៈប្រតិភូសភាពាណិជ្ជកម្មកម្ពុជា នាំយកថវិកាភាគទានរបស់សមាជិក និងសហគមន៍ធុរកិច្ច មកប្រគល់ជូនកាកបាទក្រហមកម្ពុជា ដើម្បីរួមចំណែកក្នុងបេសកកម្មមនុស្សធម៌របស់ស្ថាប័ននេះ។អ្នកឧកញ៉ា បានគូសបញ្ជាក់ថា ការចូលរួមបរិច្ចាគនេះ មិនត្រឹមតែជាការផ្តល់ជំនួយផ្នែកហិរញ្ញវត្ថុប៉ុណ្ណោះទេ ប៉ុន្តែថែមទាំងជាការបង្ហាញពី ស្មារតីសាមគ្គីភាព សេចក្តីអាណិតស្រឡាញ់ និងការទទួលខុសត្រូវសង្គមរបស់វិស័យឯកជន ចំពោះសហគមន៍ និងប្រជាពលរដ្ឋកម្ពុជា។អ្នកឧកញ៉ា បានបន្តថា សភាពាណិជ្ជកម្មកម្ពុជា ក្នុងនាមជាតំណាងរបស់វិស័យឯកជន នឹងបន្តលើកទឹកចិត្ត និងកៀរគរសមាជិក សហគ្រាស និងសប្បុរសជន ឱ្យចូលរួមក្នុងសកម្មភាពសង្គម និងមនុស្សធម៌នានា។ ជាក់ស្តែង សមាជិកសភាពាណិជ្ជកម្មកម្ពុជា ក៏បានចូលរួមក្នុងយុទ្ធនាការ «១ម៉ឺនរៀល ១ម៉ឺននាក់» ដើម្បីរៃអង្គាសថវិកាគាំទ្រដល់មន្ទីរពេទ្យគន្ធបុប្ផាផងដែរ។អ្នកឧកញ៉ា គិត ម៉េង ក៏បានប្តេជ្ញាថា នៅឆ្នាំបន្តបន្ទាប់ សភាពាណិជ្ជកម្មកម្ពុជា នឹងបន្តកៀរគរថវិកាពីសមាជិក និងសហគមន៍ធុរកិច្ច ដើម្បីចូលរួមគាំទ្រកាកបាទក្រហមកម្ពុជា ឱ្យបានកាន់តែច្រើនឡើង ដើម្បីពង្រឹងការចូលរួមរបស់វិស័យឯកជនក្នុងការងារមនុស្សធម៌។អ្នកឧកញ៉ា បានបន្ថែមថា កម្លាំងរបស់សភាពាណិជ្ជកម្មកម្ពុជា មិនស្ថិតត្រឹមតែការលើកកម្ពស់ពាណិជ្ជកម្ម និងការវិនិយោគប៉ុណ្ណោះទេ ប៉ុន្តែថែមទាំងអាចប្រើប្រាស់បណ្តាញទំនាក់ទំនង និងសមត្ថភាពរបស់ខ្លួន ដើម្បីកៀរគរការគាំទ្រជារួមសម្រាប់ការអភិវឌ្ឍសង្គម និងសកម្មភាពមនុស្សធម៌ផងដែរ។បច្ចុប្បន្ន សភាពាណិជ្ជកម្មកម្ពុជា បានបង្កើតសភាពាណិជ្ជកម្មរាជធានី-ខេត្តចំនួន ១៩ និងមានផែនការពង្រីកឱ្យគ្របដណ្តប់ទូទាំងប្រទេស។ ជាមួយគ្នានេះ សភាពាណិជ្ជកម្មកម្ពុជា ក៏មានការិយាល័យតំណាងនៅក្រៅប្រទេសចំនួន ៨ កន្លែង រួមមាននៅប្រទេសជប៉ុន កាណាដា សហរដ្ឋអាម៉េរិក អូស្ត្រាលី និងនូវែលសេឡង់។តាមរយៈបណ្តាញទំនាក់ទំនងទាំងក្នុងប្រទេស និងអន្តរជាតិ សភាពាណិជ្ជកម្មកម្ពុជា អាចដើរតួនាទីកាន់តែសំខាន់ក្នុងការពង្រឹងវិស័យឯកជន លើកកម្ពស់ពាណិជ្ជកម្ម និងការវិនិយោគ ព្រមទាំងកៀរគរការចូលរួមពីសហគមន៍ធុរកិច្ច សម្រាប់គម្រោងអភិវឌ្ឍជាតិ និងសកម្មភាពសង្គម-មនុស្សធម៌។ជាការឆ្លើយតប លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានថ្លែងអំណរគុណយ៉ាងជ្រាលជ្រៅចំពោះអ្នកឧកញ៉ា គិត ម៉េង ព្រមទាំងថ្នាក់ដឹកនាំ សមាជិក-សមាជិកា សភាពាណិជ្ជកម្មកម្ពុជា និងសប្បុរសជនទាំងអស់ ដែលបានចូលរួមបរិច្ចាគតាមរយៈមូលនិធិសភាពាណិជ្ជកម្មកម្ពុជា ជូនកាកបាទក្រហមកម្ពុជា។លោកជំទាវបណ្ឌិត បានលើកឡើងថា ការចូលរួមចំណែកជាបន្តបន្ទាប់របស់វិស័យឯកជន គឺជាសក្ខីភាពបង្ហាញពីការប្តេជ្ញាចិត្តយ៉ាងមុតមាំ ក្នុងការគាំទ្រដល់បេសកកម្មមនុស្សធម៌របស់កាកបាទក្រហមកម្ពុជា និងជាកម្លាំងដ៏សំខាន់ក្នុងការជួយដល់ប្រជាពលរដ្ឋដែលកំពុងជួបការលំបាក។លោកជំទាវបណ្ឌិត ក៏បានលើកទឹកចិត្តដល់សមាជិក-សមាជិកាសភាពាណិជ្ជកម្មកម្ពុជា ក្រោមការដឹកនាំរបស់អ្នកឧកញ៉ា គិត ម៉េង ឱ្យបន្តចូលរួមក្នុងគំនិតផ្តួចផ្តើមសង្គម និងមនុស្សធម៌នានា ដែលអាចរួមចំណែកលើកកម្ពស់សុខុមាលភាព និងគុណភាពជីវិតរបស់ប្រជាជនកម្ពុជា។សូមជម្រាបថា ការបរិច្ចាគថវិកាចំនួន ១,០៤៤,១០០ដុល្លារអាម៉េរិក នៅពេលនេះ ត្រូវបានមើលឃើញថា ជាការបង្ហាញជាក់ស្តែងពីការរួមចំណែករបស់សហគមន៍ធុរកិច្ចកម្ពុជា ក្នុងការចែករំលែកទំនួលខុសត្រូវជាមួយសង្គម និងការបន្តកសាងវប្បធម៌នៃការចែករំលែក និងស្មារតីមនុស្សធម៌នៅក្នុងសង្គមកម្ពុជា៕

(ភ្នំពេញ)៖ នៅព្រឹកនេះ សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជានាយករដ្ឋមន្ត្រី បានជួបពិភាក្សាការងារជាមួយលោកស្រី កឹម មនោវិទ្យា ដែលជាកូនស្រីរបស់លោក កឹម សុខា។ នេះបើយោងតាមការបង្ហោះនៅលើគេហទំព័រហ្វេសប៊ុករបស់ សម្ដេចធិបតី ហ៊ុន ម៉ាណែត។តាមរយៈសាររបស់ សម្តេចធិបតី ហ៊ុន ម៉ាណែត បានបញ្ជាក់ថា “ថ្ងៃនេះបានជួបជជែកគ្នាជាមួយប្អូនស្រី កឹម មនោវិទ្យា។ ក្នុងនាមជាអ្នកនយោបាយជំនាន់ថ្មីដូចគ្នា គឺមានកិច្ចការមួយចំនួនដែលយើងអាចរួមសហការគ្នាធ្វើ ដើម្បីឧត្តមប្រយោជន៍របស់ប្រទេសជាតិយើង ជាពិសេសនៅលើឆាកអន្តរជាតិ។”ជំនួបពិភាក្សាដ៏កម្រនេះ គឺជាសញ្ញាវិជ្ជមានដ៏ល្អមួយ សម្រាប់ការបើកទំព័រថ្មីលើកិច្ចសហប្រតិបត្តិការនយោបាយនៅកម្ពុជា ដើម្បីឧត្តមប្រយោជន៍ជាតិ៕

(អន្តរជាតិ)៖ ប្រធានាធិបតី ដូណាល់ ត្រាំ បានប្រកាសថា លេខាធិការសារព័ត៌មានសេតវិមាន លោកស្រី Karoline Leavitt នឹងចុះចេញពីតំណែងនៅចុងខែនេះ។លោក Trump បានសរសេរសម្រាប់ការបង្ហោះមួយនៅលើប្រព័ន្ធផ្សព្វផ្សាយសង្គមថា លោកស្រី Leavitt ដែលប្រធានាធិបតីហៅគាត់ថា "ជំនួយការម្នាក់ក្នុងចំណោមជំនួយការដែលលោកទុកចិត្តបំផុត" នឹងចាកចេញពីតួនាទីរបស់គាត់ដើម្បីចំណាយពេលជាមួយកូនៗ និងក្រុមគ្រួសាររបស់គាត់ - "ការសម្រេចចិត្តមួយដែលលោកយល់ព្រម និងគោរពទាំងស្រុង"។លោកបានបន្ថែមថា "ឥឡូវនេះ លោកស្រី Karoline នឹងក្លាយជាទីប្រឹក្សាខាងក្រៅកំពូលម្នាក់របស់ខ្ញុំ និងជាសំឡេងដែលមានឥទ្ធិពលនៅក្នុងគណបក្សសាធារណរដ្ឋ"។លោកស្រី Leavitt អាយុ 28 ឆ្នាំ បានចូលកាន់តំណែងជាលេខាធិការសារព័ត៌មានសេតវិមានកាលពីឆ្នាំមុន - ដែលធ្វើឲ្យគាត់ក្លាយជាមនុស្សវ័យក្មេងបំផុតដែលមិនធ្លាប់មានតួនាទីនេះ។លោកស្រី Leavitt និងស្វាមីរបស់គាត់គឺលោក Nicholas Riccio បានស្វាគមន៍កូនទីពីររបស់គាត់ ដែលជាកូនស្រី សម្រាប់ខែឧសភា។លោកស្រីបាននិយាយថា "ការធ្វើជាម្តាយ និងសម្រាលកូន ហើយនៅតែជាការងារដ៏លំបាកបំផុតមួយសម្រាប់ពិភពលោក ហើយក្នុងពេលតែមួយក៏ជាការងារដែលមានរង្វាន់ច្រើនបំផុតផងដែរ ប៉ុន្តែក្នុងពេលជាមួយគ្នានេះ វាជារដូវកាលដ៏លំបាកបំផុតនៃជីវិតរបស់ខ្ញុំ យ៉ាងហោចណាស់ក៏ដូច្នោះដែរ"។ក្នុងអំឡុងពេលកាន់តំណែងជាលេខាធិការសារព័ត៌មាននៅសេតវិមាន លោកស្រីបានធ្វើការជាមួយលោក Trump អស់រយៈពេលយូរមកហើយ ដំបូងឡើយជាជំនួយការលេខាធិការសារព័ត៌មាន និងជាអ្នកសរសេរសុន្ទរកថាក្នុងអំឡុងពេលអាណត្តិដំបូងរបស់នាង។ក្រោយមក នាងបានក្លាយជាជំនួយការកំពូលម្នាក់របស់លោកស្រី Elise Stefanik សមាជិកសភាមកពីគណបក្សសាធារណរដ្ឋមកពីទីក្រុងញូវយ៉ក ជានាយកទំនាក់ទំនង។សម្រាប់ឆ្នាំ 2022 លោកស្រី Leavitt បានឈរឈ្មោះជាបេក្ខជនសភាសម្រាប់រដ្ឋ New Hampshire ប៉ុន្តែនាងមិនឈ្នះទេ។ នាងបានឈ្នះការបោះឆ្នោតបឋមរបស់គណបក្សសាធារណរដ្ឋ ដោយចាញ់បេក្ខជនគណបក្ស ប៉ុន្តែក្រោយមកនាងចាញ់លោក Chris Pappas មកពីគណបក្សប្រជាធិបតេយ្យ។លោកស្រីគឺជាលេខាធិការសារព័ត៌មានដែលបម្រើការយូរជាងគេទីពីរសម្រាប់រដ្ឋបាល Trump បន្ទាប់ពី Sarah Huckabee Sanders ប៉ុណ្ណោះ។គេមិនទាន់ដឹងច្បាស់ថាអ្នកណានឹងជំនួសអ្នកនាំពាក្យទីប្រាំមួយរបស់ Trump នៅក្នុងរដ្ឋបាលលោកទេ៕ 

(សៀមរាប)៖ វិទ្យាស្ថានជាតិពហុបច្ចេកទេសអង្គរ បានចូលរួមអនុវត្តការអន្តរាគមន៍ពិសេសរបស់រាជរដ្ឋាភិបាល តាមរយៈការចុះបណ្តុះបណ្តាលជំនាញកសិកម្មនៅតាមសហគមន៍ ដល់គ្រួសារ និងបងប្អូនរបស់អតីតពលករដែលបានត្រឡប់មកពីប្រទេសថៃវិញ ដោយជួយប្រជាពលរដ្ឋចំនួ ៦៦០នាក់បង្កើតមុខរបរ និងបង្កើនប្រាក់ចំណូល។តាមរបាយការណ៍របស់វិទ្យាស្ថាន ការបណ្តុះបណ្តាលត្រូវបានផ្តោតលើជំនាញកសិកម្មដែលអាចអនុវត្តបាននៅតាមគ្រួសារ និងសហគមន៍ ដោយរួមមាន ការចិញ្ចឹមមាន់ ការដាំដំណាំបន្លែ និងការចិញ្ចឹមជ្រូក។ ក្នុងនោះ វគ្គបណ្តុះបណ្តាលស្តីពី ការចិញ្ចឹមមាន់ មានសិក្ខាកាមសរុប ៥០៣នាក់ ក្នុងនោះស្ត្រី ៤២៧នាក់ ខណៈវគ្គ ដំណាំបន្លែ មានសិក្ខាកាម ១០៦នាក់ ក្នុងនោះស្ត្រី ៨០នាក់។ ចំពោះវគ្គ ការចិញ្ចឹមជ្រូក របាយការណ៍បានបញ្ជាក់ថា មានសិក្ខាកាមចូលរួម ៥១នាក់ ក្នុងនោះស្ត្រី ៤៣នាក់។ការចុះបណ្តុះបណ្តាលជំនាញនៅតាមសហគមន៍នេះ មានសារៈសំខាន់ក្នុងការផ្តល់ចំណេះដឹង និងជំនាញជាក់ស្តែងដល់ប្រជាពលរដ្ឋ ជាពិសេសគ្រួសារដែលមានសមាជិកជាអតីតពលករត្រឡប់មកពីប្រទេសថៃ ដើម្បីអាចយកចំណេះដឹងទៅអនុវត្តក្នុងការផលិតកសិកម្មនៅក្នុងមូលដ្ឋាន និងបង្កើតជាមុខរបរប្រចាំគ្រួសារ។ជាមួយគ្នានេះ ការបណ្តុះបណ្តាលជំនាញកសិកម្មតាមសហគមន៍ ក៏ជាផ្នែកមួយនៃការពង្រឹងសមត្ថភាពប្រជាពលរដ្ឋឱ្យអាចប្រើប្រាស់ធនធានដែលមានស្រាប់នៅក្នុងមូលដ្ឋាន ដើម្បីបង្កើនផលិតភាព និងបង្កើតប្រភពចំណូលបន្ថែម ជំនួសឱ្យការពឹងផ្អែកតែលើការងារនៅក្រៅប្រទេស។ការចូលរួមរបស់វិទ្យាស្ថានជាតិពហុបច្ចេកទេសអង្គរ ក្នុងការនាំយកការបណ្តុះបណ្តាលទៅដល់មូលដ្ឋាន និងសហគមន៍ បានបង្ហាញពីការបត់បែននៃការអប់រំបច្ចេកទេស និងវិជ្ជាជីវៈ ដោយមិនត្រឹមតែផ្តល់ការបណ្តុះបណ្តាលនៅក្នុងទីតាំងវិទ្យាស្ថានប៉ុណ្ណោះទេ ប៉ុន្តែថែមទាំងនាំជំនាញទៅដល់ប្រជាពលរដ្ឋដែលត្រូវការជំនាញសម្រាប់ប្រកបមុខរបរនៅក្នុងមូលដ្ឋានផងដែរ៕

(សៀមរាប)៖ វិទ្យាស្ថានជាតិពហុបច្ចេកទេសអង្គរ កំពុងពង្រឹងការបណ្តុះបណ្តាលជំនាញបច្ចេកទេស និងវិជ្ជាជីវៈ ដោយផ្តោតលើការផ្សារភ្ជាប់រវាងចំណេះដឹងទ្រឹស្តី និងការអនុវត្តជាក់ស្តែង តាមរយៈការផ្តល់ឱកាសឱ្យសិស្សានុសិស្សបានស្គាល់ដោយផ្ទាល់នូវរោងជាង ឧបករណ៍ បរិក្ខារបច្ចេកទេស និងបរិយាកាសសិក្សាដែលត្រៀមខ្លួនសម្រាប់ការអភិវឌ្ឍជំនាញ។ក្នុងសកម្មភាពតម្រង់ទិសវិជ្ជាជីវៈកាលពីថ្ងៃទី១៧ ដល់ថ្ងៃទី២០ ខែកក្កដា ឆ្នាំ២០២៦ ក្រុមការងារការិយាល័យទំនាក់ទំនងរបស់វិទ្យាស្ថាន បានចុះផ្សព្វផ្សាយ និងផ្តល់ប្រឹក្សាអំពីជម្រើសសិក្សាជំនាញបច្ចេកទេសដល់សិស្សថ្នាក់ទី១២ នៅវិទ្យាល័យចំនួន៦ ក្នុងខេត្តសៀមរាប។តាមរយៈសកម្មភាពនេះ សិស្សប្រមាណ ៥០ភាគរយ បានបង្ហាញចំណាប់អារម្មណ៍លើការសិក្សាជំនាញបច្ចេកទេស និងបានស្នើឱ្យវិទ្យាស្ថានរៀបចំទស្សនកិច្ចសិក្សា ដើម្បីអាចស្វែងយល់បន្ថែមអំពីកម្មវិធីសិក្សា រោងជាង ថ្នាក់រៀន និងឧបករណ៍បច្ចេកទេសដែលប្រើប្រាស់ក្នុងការបណ្តុះបណ្តាល។ជាការឆ្លើយតប វិទ្យាស្ថានបានរៀបចំមធ្យោបាយដឹកជញ្ជូនសិស្សានុសិស្សមកពីវិទ្យាល័យចំនួន៣ រួមមាន វិទ្យាល័យអារញ្ញសាគរ វិទ្យាល័យកំពង់ក្តី និងវិទ្យាល័យវ៉ារិន ដែលមានសិស្សចូលរួមសរុបប្រមាណ ៣០០នាក់ ដើម្បីចុះទស្សនកិច្ចសិក្សាផ្ទាល់នៅវិទ្យាស្ថាន។ក្នុងអំឡុងពេលទស្សនកិច្ច សិស្សានុសិស្សបានចូលទស្សនារោងជាង និងកន្លែងបណ្តុះបណ្តាលតាមជំនាញនីមួយៗ ដែលមានបំពាក់ឧបករណ៍ និងបរិក្ខារបច្ចេកទេសសម្រាប់ការអនុវត្ត។ គ្រូបច្ចេកទេសតាមជំនាញបានធ្វើបទបង្ហាញ និងពន្យល់អំពីកម្មវិធីបណ្តុះបណ្តាល របៀបសិក្សា និងជំនាញដែលមានសារៈសំខាន់សម្រាប់ទីផ្សារការងារនាពេលបច្ចុប្បន្ន និងនាពេលអនាគត។ការរៀបចំឱ្យសិស្សបានចូលមើលរោងជាង និងឧបករណ៍បច្ចេកទេសដោយផ្ទាល់ បានផ្តល់ឱ្យពួកគេនូវឱកាសស្វែងយល់ថា ការសិក្សាជំនាញបច្ចេកទេសមិនត្រឹមតែផ្តោតលើទ្រឹស្តីនៅក្នុងថ្នាក់រៀនប៉ុណ្ណោះទេ ប៉ុន្តែថែមទាំងផ្តោតលើការអនុវត្ត និងការបង្កើនសមត្ថភាពដែលអាចយកទៅប្រើប្រាស់នៅកន្លែងការងារបាន។តាមរយៈការបណ្តុះបណ្តាលបែបអនុវត្តនេះ សិស្សមានឱកាសស្គាល់ឧបករណ៍ និងបច្ចេកទេសដែលពាក់ព័ន្ធនឹងជំនាញរបស់ខ្លួន ព្រមទាំងយល់ដឹងកាន់តែច្បាស់អំពីលក្ខណៈការងារ និងតម្រូវការរបស់ទីផ្សារការងារ។ ការសិក្សាបែបនេះអាចជួយឱ្យសិស្សរៀបចំខ្លួនបានល្អជាងមុន មុននឹងឈានចូលទៅក្នុងពិភពការងារក្រោយបញ្ចប់ការសិក្សា។ជាមួយគ្នានេះ ការតម្រង់ទិសវិជ្ជាជីវៈ និងការរៀបចំទស្សនកិច្ចសិក្សា ក៏ជាផ្នែកមួយនៃការជួយសិស្សថ្នាក់ទី១២ ឱ្យមានព័ត៌មានគ្រប់គ្រាន់សម្រាប់ជ្រើសរើសជំនាញសិក្សាបន្ត ស្របតាមចំណង់ចំណូលចិត្ត សមត្ថភាព និងឱកាសការងារនាពេលអនាគត៕

(ភ្នំពេញ)៖ ឯកឧត្ដម ហេង សួរ រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានទទួលជួបសម្តែងការគួរសម និងពិភាក្សាការងារជាមួយលោកស្រី នេលី ហ្កូសៃនី (Nellie Ghusayni) ប្រធានបេសកកម្មអង្គការអន្តរជាតិទេសន្តរប្រវេសន៍ (IOM) ប្រចាំនៅកម្ពុជា នារសៀលថ្ងៃទី១៣ ខែសីហា ឆ្នាំ២០២៦ នៅទីស្តីការក្រសួង ដើម្បីបង្ហាញវឌ្ឍនភាពការងារនៃគម្រោង ការស្តារជីវភាព និងធ្វើសមាហរណកម្មឡើងវិញរបស់អតីតជនទេសន្តរប្រវេសន៍ខ្មែរ ព្រមទាំងពិភាក្សាពីវិធានការ ក្នុងការពង្រឹងការធ្វើសមាហរណកម្មសេដ្ឋកិច្ច-សង្គមឡើងវិញ ភាពមានការងារធ្វើ ការទទួលស្គាល់ជំនាញពីមុន និងការបណ្តុះបណ្តាលជំនាញ ព្រមទាំងការគាំទ្រសហគ្រាសធុនតូច និងមធ្យម។នាឱកាសនោះ ឯកឧត្តមរដ្ឋមន្រ្តីបានស្វាគមន៍យ៉ាងកក់ក្តៅចំពោះលោកស្រី នេលី ហ្កូសៃនី ព្រមទាំងវាយតម្លៃខ្ពស់ចំពោះសមិទ្ធផលនៃកិច្ចសហប្រតិបត្តិការដ៏យូរអង្វែងរវាង IOM និងកម្ពុជា ជាពិសេសផ្នែកទេសន្តរប្រវេសន៍ការងារ ការប្រយុទ្ធប្រឆាំងការជួញដូរមនុស្ស ការអភិវឌ្ឍជំនាញ ការផ្តល់ឱកាសការងារ ការគាំទ្រការធ្វើសមាហរណកម្មឡើងវិញ និងការគាំទ្រក្នុងការបង្កើតអាជីវកម្មធុនតូចនិងមធ្យម។ ឯកឧត្តមបានលើកឡើងថា កន្លងមកទោះបីមានអតីតជនទេសន្តរប្រវេសន៍ខ្មែរ វិលត្រឡប់មកវិញ ក្នុងទ្រង់ទ្រាយធំមិនធ្លាប់មានក៏ដោយ ក៏រាជរដ្ឋាភិបាលកម្ពុជា ដែលមានក្រសួងការងារជាសេនាធិការមានវិធានការយ៉ាងឆាប់រហ័ស និងប្រសិទ្ធភាពក្នុងការទទួល ការការពារ ការធ្វើសមាហរណកម្មចូលទីផ្សារការងារ និងផ្តល់ឱកាសការងារដល់មូលដ្ឋានសម្រាប់ពួកគាត់។ ជាមួយការគាំទ្រពី IOM ក្រសួងក៏បានរៀបចំការធ្វើតេស្ដទទួលស្គាល់ជំនាញពីមុន និងផ្តល់ការបណ្តុះបណ្តាលជំនាញវគ្គខ្លីដោយឥតគិតថ្លៃ ដើម្បីឱ្យអតីតជនទេសន្តរប្រវេសន៍ខ្មែរអាចបង្កើតមុខរបរដោយខ្លួនឯង ឬធ្វើការនៅតាមសហគ្រាស ក្រុមហ៊ុន និងរោងចក្រនានាផងដែរ។ ភាគីទាំងពីរក៏បានពិភាក្សាគ្នាពីសេចក្តីព្រាងគោលនយោបាយស្តីពីទេសន្តរប្រវេសន៍ការងារ ដែល IOM នឹងផ្តល់ជំនួយបច្ចេកទេសក្នុងការរៀបចំគោលនយោបាយឱ្យកាន់តែមានភាពគ្រប់ជ្រុងជ្រោយ។ ការប្រើប្រាស់កម្លាំងពលកម្មបរទេសនៅកម្ពុជា ក៏ដូចជាយន្តការរបស់កម្ពុជាក្នុងការទប់ស្កាត់ការជួញដូរកម្លាំងពលកម្មក្នុងបទល្មើសអនឡាញ ក៏ត្រូវបានលើកយកមកជជែក និងទទួលបានការកោតសរសើរពីសំណាក់ភាគី IOM ផងដែរ។ ជាការឆ្លើយតប លោកស្រី នេលី ហ្កូសៃនី បានថ្លែងអំណរគុណចំពោះឯកឧត្តមរដ្ឋមន្រ្តីក្នុងកិច្ចពិភាក្សាប្រកបដោយផ្លែផ្កា និងគ្រប់ជ្រុងជ្រោយ ព្រមទាំងបានសម្តែងនូវក្តីរីករាយចំពោះវឌ្ឍនភាពនៃកិច្ចសហការ ដោយលោកស្រីបានគូសបញ្ជាក់ពីការប្តេជ្ញាចិត្តក្នុងការបង្កើនកិច្ចខិតខំប្រឹងប្រែងរបស់ IOM ក្នុងការបន្តកិច្ចសហការជាមួយក្រសួង ដោយនឹងជួយបន្តផ្សព្វផ្សាយអំពីឱកាសការងារទៅតាមមូលដ្ឋាននានា និងបន្តផ្ដល់ការគាំទ្រដល់អតីតជនទេសន្តរប្រវេសន៍ខ្មែរ ជាពិសេសក្នុងការផ្តល់ការបណ្តុះបណ្តាលជំនាញវគ្គខ្លី និងបង្កើតមុខរបរនៅក្នុងខេត្តគោលដៅសំខាន់ៗនៅជាប់ព្រំដែន៕

(ភ្នំពេញ)៖ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ នៃក្រសួងការងារនិងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាពិគ្រោះយោបល់ នៃគម្រោងលើកកម្ពស់សុវត្ថិភាពនិងសុខភាពការងារ បានអញ្ជើញជាអធិបតីក្នុងកិច្ចប្រជុំក្រុមប្រឹក្សាពិគ្រោះយោបល់នៃគម្រោងលើកកម្ពស់សុវត្ថិភាពនិងសុខភាពការងារ នាព្រឹកថ្ងៃទី១៣ ខែសីហា ឆ្នាំ២០២៦ នៅទីស្តីការក្រសួង ដោយមានសមាសភាពចូលរួមពី ថ្នាក់ដឹកនាំក្រសួងការងារ អ្នកជំនាញការរបស់អង្គការអន្តរជាតិខាងការងារ តំណាងអន្តរក្រសួង តំណាងសមាគមនិយោជក សហជីព និងដៃគូអភិវឌ្ឍន៍​​។លោកជំទាវបានគូសបញ្ជាក់ថា កិច្ចប្រជុំក្រុមប្រឹក្សាពិគ្រោះយោបល់នៃគម្រោងការលើកកម្ពស់សុវត្ថិភាពនិងសុខភាពការងារនាឱកាសនេះ ពិតជាមានសារៈសំខាន់ និងបានចូលរួមចំណែកបន្ថែមទៀតក្នុងការលើកកម្ពស់ការយកចិត្តទុកដាក់លើបញ្ហាសុវត្ថិភាពនិងសុខភាពការងារដែលជារបៀបវារៈមួយដ៏សំខាន់នៅក្នុងវិស័យការងារ។ តាមរយៈកិច្ចសហការជាមួយភាគីពាក់ព័ន្ធជាច្រើន រួមមាន រាជរដ្ឋាភិបាល អង្គការវិជ្ជាជីវៈរបស់និយោជក អង្គការវិជ្ជាជីវៈរបស់កម្មករនិយោជិត និងដៃគូអភិវឌ្ឍន៍ក្នុងការធានាថាសកម្មភាពរបស់គម្រោងអាចឆ្លើយតបនឹងតម្រូវការជាក់ស្តែង ប្រកបដោយប្រសិទ្ធភាព ស័ក្តិសិទ្ធិភាព ចីរភាព និងបរិយាបន្ន។លោកជំទាវ​បានមានប្រសាសន៍បន្ថែមថា ក្រុមប្រឹក្សាពិគ្រោះយោបល់នេះជាវេទិកាសម្រាប់ពិនិត្យ និងពិភាក្សាលើវឌ្ឍនភាពនៃការអនុវត្តគម្រោង ផែនការការងារ លទ្ធផលសម្រេចបាន បញ្ហាប្រឈម និងទិសដៅការងារបន្ត តាមរយៈ ភាគីពាក់ព័ន្ធអាចផ្តល់ធាតុចូល និងយោបល់ ដើម្បីឱ្យសកម្មភាពគម្រោងឆ្លើយតបកាន់តែប្រសើរទៅនឹងស្ថានភាពជាក់ស្តែង និងអាទិភាពជាតិផ្នែកសុវត្ថិភាពនិងសុខភាពការងារ។ក្នុងឱកាសនេះ លោកស្រីវេជ្ជបណ្ឌិត Yuka Ujita អ្នកជំនាញការជាន់ខ្ពស់ផ្នែកសុវត្ថិភាពនិងសុខភាពការងាររបស់អង្គការអន្តរជាតិខាងការងារ បានលើកឡើងអំពី វិសាលភាពនៃការអនុវត្តគម្រោងនេះផ្ដោតសំខាន់ទៅលើក្របខ័ណ្ឌចំនួន ៣កម្រិត រួមមាន ថ្នាក់តំបន់ ​ថ្នាក់ជាតិ ​និងថ្នាក់សហគ្រាស ក្រុមហ៊ុន និងរោងចក្រ​។ នៅកម្រិតថ្នាក់តំបន់ គម្រោងផ្តោតលើការអភិវឌ្ឍ និងចែករំលែកចំណេះដឹង បទពិសោធ និងនវានុវត្តន៍ ពាក់ព័ន្ធនឹងសុវត្ថិភាពនិងសុខភាពការងារ (OSH)។ នៅកម្រិតថ្នាក់ជាតិ គម្រោងផ្តោតលើការពង្រឹងក្របខ័ណ្ឌច្បាប់ គោលនយោបាយ យន្តការសម្របសម្រួល និងប្រព័ន្ធទិន្នន័យសុវត្ថិភាពនិងសុខភាពការងារ។ ចំណែកនៅកម្រិតកន្លែងធ្វើការ គម្រោងផ្តោតលើការបណ្ដុះបណ្ដាលពង្រឹងសមត្ថភាពដល់ និយោជក កម្មករនិយោជិត និងអ្នកអនុវត្តផ្នែកសុវត្ថិភាពនិងសុខភាពការងារ ដើម្បីអាចកំណត់ គ្រប់គ្រង និងបង្ការហានិភ័យនៅកន្លែងធ្វើការឱ្យបានកាន់តែមានប្រសិទ្ធភាព។ ​អង្គប្រជុំបានឯកភាពនិងកោតសរសើរលើវឌ្ឍនភាពការងារនៃគម្រោងដែលសម្រេចបាន និងប្តេជ្ញាបន្តគាំទ្រនិងធានានិរន្តរភាពគម្រោង ដោយពិនិត្យលទ្ធភាពអនុវត្តលើវិស័យនិងសកម្មភាពអាទិភាព ជាពិសេសការពង្រឹងសមត្ថភាពផ្នែកសុវត្ថិភាពនិងសុខភាពការងាររបស់ភាគីពាក់ព័ន្ធ តាមរយៈការបណ្តុះបណ្តាល អប់រំ និងផ្សព្វផ្សាយ៕

(ភ្នំពេញ)៖ ឯកឧត្តម ងុយ រិទ្ធ រដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈ បានអញ្ជើញជួបសំណេះសំណាលប្រចាំខែសីហា ជាមួយថ្នាក់ដឹកនាំសហព័ន្ធសហជីពជាង ១៥០រូប នៅទីស្តីការក្រសួង នាព្រឹកថ្ងៃទី១៣ ខែសីហា ឆ្នាំ២០២៦ ដើម្បីក្តាប់ស្ថានភាពការងារនៅតាមសហគ្រាស ក្រុមហ៊ុន និងរោងចក្រ និងរួមគ្នាដោះស្រាយបញ្ហាប្រឈមឱ្យបានទាន់ពេលវេលាប្រកបដោយប្រសិទ្ធភាពព្រមទាំងជំរុញការផ្សព្វផ្សាយឱកាសការងារ សេវាបេឡាជាតិសន្តិសុខសង្គម (ប.ស.ស.) និងលើកកម្ពស់សុវត្ថិភាពនិងសុខភាពការងារ (OSH) នៅកន្លែងការងារ។ ក្នុងឱកាសនេះ ឯកឧត្តមរដ្ឋលេខាធិការ បានជំរុញឱ្យថ្នាក់ដឹកនាំសហព័ន្ធសហជីព និងភាគីពាក់ព័ន្ធ ចូលរួមផ្សព្វផ្សាយអំពីការបណ្ដុះបណ្ដាលជំនាញ ទៅដល់យុវជនដែលទើបប្រឡងសញ្ញាបត្រមធ្យមសិក្សាទុតិយភូមិ ដើម្បីផ្ដល់ជាជម្រើសសម្រាប់ពួកគាត់ជ្រើសរើសរៀនជំនាញណាមួយដែលមានតម្រូវការនៅលើទីផ្សារការងារ ទទួលបានប្រាក់បៀវត្សខ្ពស់ ឬជាការប្រកបអាជីព វិជ្ជាជីវៈ ឬមុខរបរទៅថ្ងៃមុខដោយគួររៀនជំនាញណាមួយឱ្យត្រឹមត្រូវតាមរយៈការផ្សព្វផ្សាយរបស់ក្រសួងការងារពីការបណ្ដុះបណ្ដាលជំនាញ។ជាមួយគ្នានេះ ឯកឧត្តមបានសង្កត់ធ្ងន់លើការជួយជំរុញឱ្យអ្នកសេដ្ឋកិច្ចក្រៅប្រព័ន្ធចូលទៅក្នុងប្រព័ន្ធវិញ ដើម្បីទទួលបានការប្រើប្រាស់សេវា ប.ស.ស. និងជួយលើកកម្ពស់សុវត្ថិភាពនិងសុខភាពការងារ (OSH) ដើម្បីទប់ស្កាត់នូវហានិភ័យការងារ និងគ្រោះថ្នាក់ការងារ។ ក្នុងជំនួបនេះ សហជីពជាតួអង្គសំខាន់ក្នុងការជួយជំរុញ និងផ្សព្វផ្សាយអំពីសេវាសុខាភិបាល ដែលប្រើប្រាស់អត្ថប្រយោជន៍ ប.ស.ស. ឱ្យកាន់តែមានភាពងាយស្រួល ទប់ស្កាត់ការក្លែងបន្លំ ដោយការធ្វើទំនើបកម្មប្រព័ន្ធឌីជីថលរបស់ ប.ស.ស. តាមរយៈការប្រើប្រាស់ម៉ាស៊ីនបញ្ជាក់អត្តសញ្ញាណស្វ័យប្រវត្តិ ប.ស.ស. នៅមូលដ្ឋានសុខាភិបាលដៃគូ ប.ស.ស. ធ្វើឱ្យមានភាពឆាប់រហ័ស កាត់បន្ថយការរង់ចាំការកំណត់អត្តសញ្ញាណជាសមាជិក ប.ស.ស. ​និងការចូលប្រើប្រាស់សេវា។ ទន្ទឹមនេះ ឯកឧត្តមក៏បានអំពាវនាវឱ្យសហជីពបន្តសហការជាមួយម្ចាស់សហគ្រាស ក្រុមហ៊ុន និងរោងចក្រ ដោយប្រកាន់ខ្ជាប់នូវភាពជាដៃគូ ការគោរពច្បាប់ និងការទទួលខុសត្រូវរួម ជំរុញការលើកកម្ពស់លក្ខខណ្ឌសុវត្ថិភាព និងសុខភាពការងារ ធានាឱ្យកាន់តែប្រសើរឡើងនូវលក្ខខណ្ឌការងារជាចាំបាច់សម្រាប់សុខភាពអនាម័យ និងសុវត្ថិភាពចំពោះបងប្អូនកម្មករនិយោជិតដែលធ្វើការនៅក្នុងសហគ្រាស ក្រុមហ៊ុន និងរោងចក្រ បញ្ចៀសនូវហានិភ័យការងារ និងគ្រោះថ្នាក់ការងារ។ ព្រមទាំងជំរុញឱ្យសហព័ន្ធសហជីពសិក្សា និងប្រើប្រាស់បច្ចេកវិទ្យាបញ្ញាសិប្បនិម្មិត (AI) ដើម្បីបង្កើនប្រសិទ្ធភាពការងារ និងដើរឱ្យទាន់បរិវត្តកម្មឌីជីថល។ជាចុងក្រោយ ឯកឧត្តមបានផ្ដល់អនុសាសន៍ណែនាំឱ្យសហព័ន្ធសហជីពបន្តពង្រឹងកិច្ចសហការជាមួយក្រសួង និងមន្ទីរការងារនិងបណ្តុះបណ្តាលវិជ្ជាជីវៈ រាជធានី ខេត្ត ក្នុងការរាយការណ៍បញ្ហាប្រឈម និងភាពមិនប្រក្រតីនៅកន្លែងធ្វើការ និងរួមគ្នាស្វែងរកដំណោះស្រាយប្រកបដោយស្មារតីស្ថាបនា ក្នុងទិសដៅបញ្ចៀសវិវាទការងារធ្ងន់ធ្ងរ រក្សាស្ថិរភាពសង្គម និងបរិយាកាសវិនិយោគ។ ថ្នាក់ដឹកនាំសហព័ន្ធសហជីពបានប្តេជ្ញាបន្តសហការយ៉ាងជិតស្និទ្ធជាមួយក្រសួង ក្នុងការការពារសិទ្ធិ និងផលប្រយោជន៍ស្របច្បាប់របស់បងប្អូនកម្មករនិយោជិត និងនិយោជក ព្រមទាំងគាំទ្រការអភិវឌ្ឍវិស័យការងារ និងលើកកម្ពស់ជីវភាពប្រជាពលរដ្ឋ៕

(ភ្នំពេញ)៖ ក្រុមហ៊ុន Royal Group International និង ក្រុមហ៊ុន Marriott International បានចុះហត្ថលេខាជាផ្លូវការលើកិច្ចព្រមព្រៀង ដើម្បីនាំយកម៉ាកសញ្ញា The Ritz-Carlton មកកាន់ប្រទេសកម្ពុជាជាលើកដំបូង។ពិធីចុះហត្ថលេខានេះ បានប្រារព្ធឡើងនៅព្រឹកថ្ងៃទី 13 ខែ​ សីហា ឆ្នាំ 2026 នៅអគារ Royal Group Central Tower និងមានការអញ្ជើញចូលរួមពី អ្នកឧកញ៉ា គិត ម៉េង ប្រធានក្រុមប្រឹក្សាភិបាល និង នាយកប្រត្តិបត្តិនៃក្រុមហ៊ុន រ៉ូយ៉ាល់គ្រុប និង លោក Brad Edman , Market Vice President for Cambodia, Laos, Myanmar and Thailand នៃ ក្រុមហ៊ុន Marriott International និង លោក Egbert Casasas, Head of Residential Operations, APEC នៃក្រុមហ៊ុន Marriott International ព្រមទាំងថ្នាក់ដឹកនាំ និងតំណាងជាន់ខ្ពស់ពីស្ថាប័នទាំងពីរ។ពិធីចុះហត្ថលេខានេះ គឺជាព្រឹត្តិការណ៍ដ៏សំខាន់មួយសម្រាប់វិស័យបដិសណ្ឋារកិច្ចប្រណីត និងអចលនទ្រព្យនៅកម្ពុជា ដែលជាជំហានឆ្ពោះទៅរកការអភិវឌ្ឍសណ្ឋាគារ The Ritz-Carlton, Phnom Penh និង គម្រោង The Ritz-Carlton Residences, Phnom Penh ដែលគ្រោងនឹងបើកដំណើរការនៅឆ្នាំ 2032។មានទីតាំងស្ថិតនៅតាមបណ្តោយ មហាវិថីព្រះនរោត្តម គម្រោងដ៏ជានិមិត្តរូបនេះ នឹងរួមបញ្ចូលនូវសេវាកម្មបដិសណ្ឋារកិច្ចលំដាប់ពិភពលោក លំនៅឋានប្រណីតកម្រិតខ្ពស់ និងអគារការិយាល័យ Grade A នៅចំកណ្តាលរាជធានីភ្នំពេញ។ពិធីចុះហត្ថលេខានៅថ្ងៃនេះ មិនមែនគ្រាន់តែជាការចុះកិច្ចព្រមព្រៀងមួយប៉ុណ្ណោះទេ វាគឺជាការចាប់ផ្តើមនៃជំពូកថ្មីដ៏អស្ចារ្យមួយសម្រាប់រាជធានីភ្នំពេញ៕