(ជាតិ)៖ ដូចដែរលោកអ្នកបានដឹងស្រាប់ហើយថា ករណីក្មេងទំនើង កាលពីពេលកន្លងទៅថ្មីៗនេះ មានការកក្រើកជាខ្លាំង នៅតាមបណ្តា រាជធានី ខេត្តមួយចំនួន ហើយ ក្នុងនោះសង្កេតថា ក្រុមក្មេងទំនើង ដែលភាគច្រើន កើតឡើង និង មានច្រើនជាងគេគឺ នៅក្នុង រាជធានីភ្នំពេញផ្ទាល់តែម្តង។ ជាការពិតណាស់ ករណីក្មេងទំនើង ដែលតែងតែ បង្ករនូវ ភាពអសន្តិសុខ នៅក្នុងសង្គមនេះដែរ ត្រូវបានមហាជនចោទជាចម្ងល់ថា តើមកពីកត្តាអ្វីឱ្យពិតប្រាកដ? ក្នុងនោះផងដែរ ក៏មានមតិលើកឡើង ផ្សេងៗគ្នាថាមកពីកត្តាគ្រួសារអប់រំណែនាំមិនបាន និង មួយវិញទៀត មកពី កត្តា អាជ្ញាធរមូលដ្ឋាន សមត្ថកិច្ច ពាក់ព័ន្ធមិនធ្វើការ ទប់ស្កាត់មិនបានល្អ ដែលជាហេតុ ធ្វើឱ្យក្រុមបក្សពួក ក្មេងទំនើង ចេះតែ បន្តកើតឡើង ស្ទើររាងរាល់ថ្ងៃ បែបនេះ។យ៉ាងណាមិញជុំវិញករណីដ៏កក្រើកនៃក្រុមទំនើងតាមបណ្តារាជធានី ខេត្ត ដែលតែងតែកើតមានឡើង បង្ករនូវអសន្តិសុខ សណ្តាប់ធ្នាប់សង្គមនេះផងដែរ កាលពីថ្ងៃទី២៣ ខែឧសភា ឆ្នាំ ២០២៤ កន្លងទៅថ្មីៗនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានចេញបញ្ជាយ៉ាងម៉ឺនម៉ាត់ ឱ្យអាជ្ញាធរគ្រប់រាជធានី ខេត្ត បង្កើនការយកចិត្តទុកដាក់បង្ក្រាបក្រុមក្មេងទំនើងនៅគ្រប់មូលដ្ឋានឱ្យខានតែបាន។ដោយឡែកជាលទ្ធផល ក្នុងរយៈពេល៧ថ្ងៃ បន្ទាប់ការចេញបញ្ជាដ៏មុតស្រួចរបស់សម្ដេចមហាបវរធិបតី នាយករដ្ឋមន្រ្តី កម្លាំងនគបាលជាតិ ចាប់ពីកម្រិតអគ្គស្នងការដ្ឋាន រហូតដល់ប៉ុស្តិ៍នគរបាលឃុំ សង្កាត់ ទូទាំង បានបង្ក្រាបក្រុមក្មេងទំនើងចំនួន៦៥ករណី ឃាត់ខ្លួនយុវជនសរុបចំនួន២២៣នាក់ កើនខ្ពស់ជិត២ដងធៀបនឹងកិច្ចប្រតិបត្តិការកន្លងទៅ។នេះបើតាមការបញ្ជាក់ ពីសំណាក់ អ្នកនាំពាក្យរងក្រសួងមហាផ្ទៃ ។បើតាមអ្នកនាំពាក្យរងដដែល បានបញ្ជាក់ថា ស្របតាមគោលនយោបាយរាជរដ្ឋាភិបាល និងអនុសាសន៍ ដ៏ខ្ពង់ខ្ពស់របស់សម្ដេចមហាបវរធិបតី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានដៅយកបញ្ហាក្មេងទំនើង ជាកិច្ចការអាទិភាពមួយក្នុងចំណោមអាទិភាព៦ ដែលត្រូវយកចិត្តទុកដាក់ដោះស្រាយ ចាប់ពីដើមនីតិកាលទី៧ រួមទាំងការពង្រឹងការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព។តើក្រុមក្មេងទំនើងទាំងនោះនឹងប្រឈមមុខវិធានការអ្វីខ្លះ បន្ទាប់ពីសមត្ថកិច្ចចាប់ឃាត់ខ្លួន? លោក ទូច សុឃៈ អ្នកនាំពាក្យរង បានឱ្យដឹងថា ពួកគេនឹងប្រឈមុខវិធានការរដ្ឋបាល និងវិធានការច្បាប់។ វិធានការរដ្ឋបាល គឺការអប់រំ ណែនាំ និងធ្វើកិច្ចសន្យាមុនអនុញ្ញាតឱ្យត្រឡប់ទៅផ្ទះ សម្រាប់ករណីស្រាលៗ។ ប៉ុន្តែត្រូវបានរកឃើញពាក់ព័ន្ធបទល្មើសព្រហ្មទណ្ឌ នឹងត្រូវកសាងសំណុំរឿងបញ្ជូនទៅតុលាការ។គួរកត់សម្គាល់ថា ក្នុងចំណោមករណីក្មេងទំនើងទូទាំងប្រទេស រាជធានីភ្នំពេញ មានករណីនេះច្រើនជាងគេ។ សម្រាប់រាជធានីភ្នំពេញ ក្នុងកិច្ចប្រតិបត្តការរយៈពេល៧ថ្ងៃមកនេះ ឯកឧត្តមអភិសន្តិបណ្ឌិត ស សុខា បានណែនាំឱ្យស្នងការដ្ឋានរាជធានីភ្នំពេញ ធ្វើតេសទឹកមូត្រលើក្រុមក្មេងទំនើងដែលឃាត់ខ្លួនបានសរុប ដោយជាលទ្ធផលបានរកឃើញថាជាង៥០ភាគរយ មានសាធាតុញៀនក្នុងខ្លួន។សូមបញ្ជាក់ផងដែរថា ឯកឧត្តម ឧត្តមសេនីយ៍ ឯក ឆាយ គឹមខឿន ស្នងការរងនៃអគ្គស្នងការនគបាលជាតិ បានថ្លែងប្រាប់ក្រុមការងារ ប្រតិបត្តិផ្សព្វផ្សាយព័ត៌មានតាមអិនធឺណិតក្រសួងព័ត៌មាននារសៀលថ្ងៃទី២ ខែឧសភា ឆ្នាំ២០២៤ នេះថា ៦ ខែដើមឆ្នាំ២០២៤ អគ្គស្នងការនរគបាលជាតិ បង្ក្រាបបាននូវសកម្មភាពក្មេងទំនើង ចំនួន ៨០០ករណី ដែលកើន២០០ករណី បើធៀបទៅនឹង ៦ខែដូចគ្នា កាលដើមឆ្នាំ២០២៣៕

(អន្តរជាតិ)៖ ស្ដេចប្រដាល់ ម៉ានី ប៉ាគីអាវ ដែលមានឈ្មោះពេញ Emmanuel Dapidran Pacquiao CLH កើតថ្ងៃទី 17 ខែធ្នូ ឆ្នាំ 1978 ជាអ្នកនយោបាយហ្វីលីពីនមួយរូប និងជាអតីតអ្នកប្រដាល់អាជីពអស្ចារ្យបំផុតក្នុងប្រវត្តិសាស្រ្ត។ ស្ដេចប្រដាល់ ម៉ានី ប៉ាគីអាវ មានរហស្សនាមថា "PacMan" ក៏ធ្លាប់ជាសមាជិកព្រឹទ្ធសភាហ្វីលីពីនពីឆ្នាំ ២០១៦ ដល់ឆ្នាំ ២០២២។ ទម្រាំ ស្ដេចប្រដាល់ ម៉ានី ប៉ាគីអាវ បានក្លាយជា សមាជិកព្រឹទ្ធសភានាពេលនោះ លោកបានបរាជ័យក្នុងការប្រជែងយកតំណែងមួយនេះ អស់ជាច្រើនឆ្នាំហើយ។ លោកអ្នកមានដឹងទេ? នៅក្នុងឆ្នាំ 2003 Pacquiao ត្រូវបានបោះឆ្នោតជ្រើសរើសជាបុគ្គលឆ្នើមប្រចាំឆ្នាំនៅប្រទេសហ្វីលីពីនលើលោកស្រី Gloria Macapagal Arroyo ដែលនៅពេលនោះលោកស្រីបាន កាន់តំណែង២ឆ្នាំ ជាប្រធានាធិបតីរបស់ប្រទេសហ្វីលីពីនក្នុងអាណត្តិ។ បួនឆ្នាំក្រោយមក គឺនៅឆ្នាំ២០០៧ លោកបានឈរឈ្មោះដណ្ដើមយកអាសនៈក្នុងសភាជាតិ ប៉ុន្តែមិនជោគជ័យ ក្រោយមកគាត់បានត្រលប់ទៅប្រកបអាជីពជាអ្នកប្រដាល់ពេញម៉ោងវិញ។ មិនយូរប៉ុន្មាននៅក្នុងឆ្នាំ២០១០ លោកបានចូលប្រឡូកក្នុងឆាកនយោបាយជាថ្មីម្ដងទៀត ហើយលោកត្រូវបានគេបោះឆ្នោតជ្រើសរើសជាតំណាងរបស់ Sarangani ទទួលជ័យជម្នះយ៉ាងលើសលប់ និងបានកាន់មុខតំណែងនេះអស់រយៈពេលប្រាំមួយឆ្នាំ រហូតដល់គាត់ត្រូវបានបោះឆ្នោតជ្រើសរើស និងកាន់តំណែងជាសមាជិកព្រឹទ្ធសភានៅឆ្នាំ 2016 ។ គាត់បានក្លាយជាមេដឹកនាំគណបក្ស PDP-Laban ដែលកាន់អំណាចនៅពេលនោះនៅឆ្នាំ 2020 (ដែលត្រូវបានជំទាស់តាំងពីឆ្នាំ 2021)។ នៅថ្ងៃទី 19 ខែកញ្ញាឆ្នាំ 2021 Pacquiao បានប្រកាសជាផ្លូវការនូវបេក្ខភាពរបស់គាត់សម្រាប់ប្រធានាធិបតីហ្វីលីពីននៅក្នុងការបោះឆ្នោតប្រធានាធិបតីហ្វីលីពីនឆ្នាំ 2022 ។ Pacquiao បានទទួលស្គាល់បន្ទាប់ពីបានបញ្ចប់ក្នុងចំណាត់ថ្នាក់លេខបីពីក្រោយអ្នកឈ្នះភ្លូកទឹកភ្លូកដី Ferdinand ("Bongbong") Marcos, Jr. និងចំណាត់ថ្នាក់លេខពីរ Leni Robredo ហើយនៅឆ្នាំ 2022 អាណត្តិរបស់ Pacquiao នៅក្នុងព្រឹទ្ធសភាបានបញ្ចប់។ត្រឡប់ទៅអតីតកាលមុនពេល ម៉ានី ប៉ាគីអាវ មិនទាន់ទទួលបានភាពជោគជ័យ សល់លុយវាល់លាន ដុល្លារដូចសព្វថ្ងៃនេះ កាលពីអាយុ១៥ឆ្នាំ គាត់បានទៅទីក្រុងម៉ានីល ដើម្បីធ្វើការជាកម្មករសំណង់បានប្រាក់៤ដុល្លារក្នុងមួយថ្ងៃ។ នៅថ្ងៃចុងសប្តាហ៍លោកឆ្លៀតទៅលក់ផ្កាកុលាបនៅជុំវិញព្រះវិហារ Quiapo ។ គាត់បានប្រើប្រាក់ខែរបស់គាត់ដែលរកបានពីការធ្វើកម្មករសំណង់ ជាដើមទុនដើម្បីទិញផ្កាយកទៅលក់នៅជុំវិញព្រះវិហាររៀងរាល់ថ្ងៃអាទិត្យ ដើម្បីចិញ្ចឹមម្ដាយដែលជាស្ត្រីមេម៉ាយ ដែលបានបែកគ្នាជាមួយឪពុករបស់គាត់ឈ្មោះ Rosalio Pacquiao កាលពីគាត់រៀននៅថ្នាក់ទី៦។ សូមរំលឹកថា ស្ដេចប្រដាល់ Pacquiao គឺជាម្ចាស់ជើងឯកពិភពលោកផ្នែកចំនួនប្រាំបីតែមួយគត់ ក្នុងប្រវត្តិសាស្ត្រប្រដាល់ ហើយបានឈ្នះជើងឯកពិភពលោកធំៗចំនួន 12។ គាត់គឺជាអ្នកប្រដាល់ដំបូងគេដែលឈ្នះជើងឯកខ្សែបន្ទាត់ក្នុងប្រភេទទម្ងន់បួនផ្សេងគ្នាជាអ្នកប្រដាល់ដំបូងគេដែលឈ្នះជើងឯកពិភពលោកធំៗក្នុងបួនក្នុងចំណោមប្រាំបី "ប្រភេទទម្ងន់ស្រាល" និងជាអ្នកប្រដាល់តែមួយគត់ដែលកាន់ជើងឯកពិភពលោកក្នុងរយៈពេលបួនទសវត្សរ៍ (1990s, 2000s, 2010s, និង 2020s)។ គិតត្រឹមឆ្នាំ 2015 ការប្រយុទ្ធរបស់ Pacquiao ទទួលបានប្រាក់ចំណូលចំនួន 1.2 ពាន់លានដុល្លារពីការប្រកួតចំនួន 25 ដងរបស់គាត់។ យោងតាមទស្សនាវដ្ដី Forbes គាត់គឺជាអត្តពលិកដែលមានប្រាក់ខែខ្ពស់បំផុតទីពីរ នៅលើពិភពលោកក្នុងឆ្នាំ 2012 និង 2015 ហើយជាអត្តពលិកដែលមានប្រាក់ខែខ្ពស់បំផុតទី8 នៃឆ្នាំ 2010៕

(ភ្នំពេញ)៖ ក្រុមពលការិនី ដែលទើបត្រឡប់មកពីប្រទេសអារ៉ាប៊ីសាអូឌីត បានសម្តែងក្តីរីករាយក្រៃលែង នៅពេលក្រសួងការងារ និងបណ្តុះបណ្តាលវិជ្ជាជីវៈ បានបង្ហាញឱកាសការងារជាង៥ម៉ឺនកន្លែង និងឱកាសសិក្សារៀនសូត្រជំនាញបច្ចេកទេសវិជ្ជាជីវៈជូនពួកគាត់ដោយឥគិតថ្លៃ។ ក្រុមពលការិនីដែលទើបបានត្រឡប់មកដល់មាតុប្រទេសវិញ កាលពីថ្ងៃទី២ ខែមិថុនា ឆ្បាំ២០២៤ បានបង្ហាញអារម្មណ៍សប្បាយចិត្ត និងកក់ក្ដៅ ព្រោះមានការយកចិត្តទុកដាក់ពីរាជរដ្ឋាភិបាល តាមរយៈក្រសួងការងារនិងបណ្តុះបណ្តាលវិជ្ជាជីវៈ។ ជាពិសេស ពួកគាត់បានទទួលការណែនាំនូវឱកាសការងារល្អៗ ដោយមិនចាំបាច់ឲ្យពួកគាត់ពិបាកក្នុងការស្វែងរកការងារធ្វើនោះទេ ហើយថែមទាំងផ្សព្វផ្សាយពីឱកាសសិក្សាជំនាញបច្ចេកទេសជូនពួកគាត់ ដោយមិនគិតថ្លៃថែមទៀត។ ពលការិនី ខា សុខៃ បាននិយាយថា៖«ខ្ញុំមានតែអរគុណហើយរំភើបខ្លាំង។ ខ្ញុំចង់រកការងារធ្វើដោយសារចង់មានលុយមើលជំងឺម៉ាក់ ដោយសារឥលូវម៉ាក់កើតជំងឺទឹកនោមផ្អែមខ្វះខាតលុយ»។ សុខៃ បន្ថែមថា៖«ក្នុងចិត្តខ្ញុំចង់ធ្វើការសាឡន ព្រោះដោយខ្ញុំចូលចិត្តសាឡន ណាមួយក៏ចង់រៀនចង់ចេះដែរ។ កាលខ្ញុំនៅក្មេងអត់ដែលរៀនទេរហូតដល់ឥលូវ អ៊ីចឹងខ្ញុំនឹងជ្រើសរើសរៀនខាងសាឡន ព្រោះខ្ញុំចូលចិត្ត»។ចំណែក ពលការិនី ផង សុភី បានប្រាប់ថា៖«ខ្ញុំចាប់អារម្មណ៍ជំនាញខាងកសិកម្ម ប៉ុន្តែខ្ញុំចាស់ហើយចង់ធ្វើការជាង ព្រោះមានម្ដាយចាស់ និងកូនតូចត្រូវចិញ្ចឹម។ ដូច្នេះខ្ញុំត្រូវធ្វើការដើម្បីរកលុយ»។ ដោយឡែក ពលការិនី ញ៉េប សុភា បានគូសបញ្ជាក់ថា៖«ខ្ញុំគិតថាល្អខ្លាំងមែនទែន ព្រោះកន្លងមកមិនមែន ខ្ញុំមិនចង់រៀនទេ តែមកពីអត់មានលុយ ហើយធ្វើតែការងារឲ្យគេ។ ខ្ញុំចាប់អារម្មណ៍ការងារកាត់ដេរ ប្រហែលរើសជំនាញកាត់ដេរ»។ជាមួយគ្នានោះ ក្រុមពលការិនី បានអរគុណរាជរដ្ឋាភិបាល ដែលមិនត្រឹមតែសម្របសម្រួល យកចិត្តទុកដាក់ពួកគាត់ឲ្យបានត្រលប់មកស្រុកកំណើតវិញដោយសុវត្ថិភាពនោះទេ គឺថែមទាំងផ្សព្វផ្សាយពីឱកាសការងារ និងការសិក្សាជំនាញបច្ចេកទេសដល់ពួកគាត់ ដោយឥតថ្លៃហើយ និងទទួលបានប្រាក់ឧបត្ថម្ភថែមទៀត។ សូមជម្រាបថា អគ្គនាយកដ្ឋានអប់រំបណ្ដុះបណ្ដាលបច្ចេកទេស និងវិជ្ជាជីវៈ និងទីភ្នាក់ងារជាតិមុខរបរ និងការងារ នៃក្រសួងការងារ និងបណ្ដុះបណ្ដាលវិជ្ជាជីវៈ បានផ្សព្វផ្សាយពីឱកាសការងារក្នុងស្រុកជាង៥ម៉ឺន កន្លែង ព្រមទាំងការសិក្សាជំនាញបច្ចេកទេស ដល់ពលការិនីចំនួន ៦នាក់ ដែលទើបនឹងត្រឡប់មកពីប្រទេសអារ៉ាប៊ីសាអូឌីត កាលពីថ្ងៃទី២ ខែមិថុនា ឆ្នាំ២០២៤ ដើម្បីឲ្យក្រុមពលការិនី មានការងារធ្វើពិតប្រាកដ មានជំនាញមួយពិតប្រាដក រកចំណូលបានសមរម្យសម្រាប់ចិញ្ចឹមជីវិត និងផ្គត់ផ្គង់គ្រួសារ៕

(សង្គម)៖ អ្នកទោសនៅប្រទេសប្រេស៊ីល ត្រូវបានច្បាប់កំណត់ឱ្យមានការបន្ថយទោសរយៈពេល៤ថ្ងៃ បើសិនជាពួកគេអាចព្យាយាមក្នុងការអានសៀវភៅនិងស្វែងយល់ពីខ្លឹមសារក្នុងសៀវភៅមួយនោះចប់មួយក្បាល ដោយលទ្ធផលនៃការអាននោះទទួលបានកាន់តែច្រើន ទោសរបស់ពួកគេក៏កាន់តែថយច្រើនតាមនោះដែរ ដែលនេះត្រូវបានគេទទួលស្គាល់ថាជាគំនិតល្អក៏ដូចជាគំរូមួយផងដែរ ដើម្បីដាក់ពិន័យនិងជំរុញទឹកចិត្ត ក្នុងបំណងឱ្យពួកគេអាចកែប្រែខ្លួនក្លាយជាមនុស្សល្អ មុនពេលត្រឡប់ចូលទៅរស់នៅក្នុងសង្គមវិញ។ជាក់ស្ដែងយោងតាមគណនីហ្វេសប៊ុករបស់អ្នកនិពន្ធសៀវភៅដ៏ល្បីមួយរូប លោក ឈុំ សីហា បានធ្វើការបង្ហោះសំណេរដើម្បីលើកទឹកចិត្តឱ្យមានការអានសៀវភៅដោយមាន ខ្លឹមសារយ៉ាងដូច្នេះថា «អ្នកទោសនៅប្រទេសប្រេស៊ីល នឹងទទួលបានការបន្ថយទោសរយៈពេល៤ថ្ងៃ បើគេអានសៀវភៅចប់មួយក្បាល ហើយអានកាន់តែច្រើន នោះនឹងថយទោសបានកាន់តែច្រើន។ នេះគឺជាកម្មវិធីអប់រំនិងកែប្រែអ្នកទោសរបស់ប្រទេសនេះ។ លក្ខខណ្ឌនេះ មិនមែនចេះតែអានឱ្យបានច្រើនក្បាលនោះទេ ប៉ុន្តែត្រូវប្រាកដថា អ្នកទោសទាំងនោះអានដើម្បីទទួលបានចំណេះដឹងពិតប្រាកដ។ ក្រោយពេលអានចប់ អ្នកទោសត្រូវធ្វើសេចក្តីសង្ខេបអំពីសៀវភៅដែលបានអាន ហើយយកសេចក្តីសង្ខេបនោះជូនទៅមន្រ្តីផ្នែកអប់រំនិងកែប្រែរបស់ពន្ធនាគារសិនដើម្បីពិនិត្យនិងសម្រេច។ គេបានយកការអានសៀវភៅដើម្បីដាក់ពិន័យនិងជំរុញទឹកចិត្ត ក្នុងបំណងឱ្យពួកគេអាចកែប្រែខ្លួនក្លាយជាមនុស្សល្អ មុនពេលត្រឡប់ចូលទៅរស់នៅក្នុងសង្គមវិញ។ ចុះអ្នកវិញ តើបានយកសៀវភៅដើម្បីអភិវឌ្ឍខ្លួនឯងហើយឬនៅ?»។យ៉ាងណាមិញក្រោយពីបានអាននូវសំណេរខាងលើ ក៏ដូចជាជ្រាបអំពីកម្មវិធីអប់រំនិងកែប្រែអ្នកទោសរបស់ប្រទេសមួយនេះហើយ ឃើញមានអ្នកប្រើប្រាស់បណ្ដាញសង្គមពលរដ្ឋខ្មែរជាច្រើនបានចាប់អារម្មណ៍ ថែមទាំងយល់ថានេះគឺជាគំនិតនិងចំណាត់ការមួយដ៏ល្អ លើសពីនោះទៅទៀតខ្លះបានលើកឡើងជាមតិយោបល់ដោយមានបំណងចង់ឃើញការអនុវត្តបែបនេះចំពោះអ្នកទោសកម្ពុជាទៀតផង។ ដោយក្នុងនោះមានអ្នកយល់ថា ក្នុងករណីបើអ្នកទោសក្នុងប្រទេសកម្ពុជាមួយចំនួនពុំចេះអានអក្សរក៏ដោយ គួរណាត្រូវចំនួសការអប់រំផ្សេងទៀតដូចជាការចាក់នូវធម៌ អប់រំផ្លូវចិត្តនិងចំណេះដឹងជាចដើម លុះត្រាអនុវត្តបែបនេះទើបអាចជំរុញឱ្យអ្នកទោសទាំងនោះកែប្រែឡើងវិញប្រកបដោយប្រសិទ្ធភាពជាងមុន។ទោះជាយ៉ាងណាក្ដី ចំពោះការអានសៀវភៅគឺត្រូវបានលើកទឹកចិត្តគ្រប់មនុស្ស ស្រទាប់ វណ្ណៈ មិនថាជាអ្នកទោស ឬពលដ្ឋធម្មតា សិស្ស និស្សិតនោះទេ ពោលគឺការអានសៀវភៅមិនត្រូវបានប្រកាន់ចំពោះនរណាម្នាក់នោះឡើយ។ អានកាន់តែច្រើនផលដែលទទួលបានកាន់តែច្រើន មិនថាតែបណ្ដុះនូវគំនិតថ្មីៗ អភិវឌ្ឍន៍ខ្លួននោះទេ ពេលខ្លះសៀវភៅក៏អាចជាទីប្រឹក្សាក្នុងការដោះស្រាយបញ្ហារបស់លោកអ្នក និងអាចជួយកាត់បន្ថយនូវភាពតានតឹងផងដែរ។ ដូច្នេះហើយសូមលើកទឹកចិត្តចំពោះគ្រប់គ្នាគួរណាតែបង្កើននូវទម្លាប់អានសៀវភៅជាប្រចាំ បើទោះបីជាមានពេលតិចក្នុងការអានក៏ដោយយ៉ាងហោចណាស់ក៏វាប្រសើរជាងអត់នោះដែរ៕

(ភ្នំពេញ)៖ ក្រុមពលការិនីខ្មែរ៦នាក់ទៀត ដែលទើបធ្វើមាតុភូមិនិវត្តន៍មកពីប្រទេសអារ៉ាប៊ីសាអូឌីត កាលពីថ្ងៃទី២ ខែមិថុនា ឆ្នាំ២០២៤ បានសម្តែងការសប្បាយរីករាយ និងអរគុណរាជរដ្ឋាភិបាលដែលបានជួយយកចិត្តទុកដាក់ មើលថែទាំពួកគាត់រហូតបានត្រឡប់មកជួបជុំជាមួយសាច់ញាតិបងប្អូនវិញនៅក្នុងប្រទេសកំណើត។ពលការិនីខ្មែរទាំង ៦នាក់នេះ បានត្រឡប់មកដល់ប្រទេសកម្ពុជាវិញ ប្រកបដោយសុខសុវត្ថិភាព និងបានទទួលការទទួលស្វាគមន៍យ៉ាងកក់ក្ដៅ ពីសំណាក់រាជរដ្ឋាភិបាលកម្ពុជា តាមរយៈក្រសួងការងារ និងបណ្ដុះបណ្ដាលវិជ្ជាជីវៈ និងអាជ្ញាធរពាក់ព័ន្ធផ្សេងៗ ទៀត។ពលការិនី ញ៉េប សុភា បានបង្ហាញពីការសប្បាយចិត្ត ជាខ្លាំងដែលបានមកដល់ស្រុកកំណើតវិញ ជាពិសេសការយកចិត្តទុកដាក់ខ្លាំងពីរាជរដ្ឋាភិបាលកកម្ពុជាចំពោះពលការិនី។ អ្នកស្រីបញ្ជាក់ថា៖«ពេលខ្ញុំបានត្រឡប់មកវិញ ខ្ញុំឃើញពួកគាត់បានយកចិត្តទុកដាក់ជា មួយពួកខ្ញុំខ្លាំង មែនទែន។ ពីដំបូងឡើយខ្ញុំអត់ទាន់ជួប ខ្ញុំអត់នឹកស្មានដល់...ដល់ពេលបានជួបហើយបាន មានអារម្មណ៍រំភើប ចេញពីបេះដូងដែលឃើញពួកគាត់ស្វះស្វែងជួយប្រជាពលរដ្ឋខ្មែរយើងដែលនៅស្រុកគេត្រឡប់មកប្រទេសយើងវិញ»។ចំណែក ពលការិនី ខា សុខៃ ដែលជាពលការិនីខ្មែរម្នាក់ទៀត ក៏បានបង្ហាញពីការសប្បាយចិត្តជាខ្លាំងដែលបានមកដល់ស្រុកកំណើត និងបានជួបជុំគ្រួសារ បងប្អូនឡើងវិញ។ ពលការិនីរូបនេះបានថ្លែងអំណរគុណចំពោះរាជរដ្ឋាភិបាលកកម្ពុជាដែលបានជួយឲ្យពួកគាត់បានវិលត្រឡប់មកស្រុកខ្មែរវិញដោយសុវត្ថិភាព។ ពលការិនីបញ្ជាក់ថា៖«ខ្ញុំមានតែអរគុណសម្ដេចដែលបានជួយខ្ញុំឲ្យបានមកខ្មែរ ជួយទិញសំបុត្រយន្តហោះតាំងពីនៅអារ៉ាប់រហូតមកដល់ខ្មែរ។ ខ្ញុំសប្បាយចិត្តជាខ្លាំងដោយសារមកដល់ដីខ្មែរ បានជួបម៉ាក់ប៉ា បងប្អូនទាំងអស់»។ដោយឡែក ពលការិនី ផង សុភី ក៏បានបង្ហាញអារម្មណ៍សប្បាយចិត្តផងដែរ បន្ទាប់ពីខ្លួនអាចវិលត្រឡប់ មកកាន់ ស្រុក កំណើតវិញ។ ពលការិនី ផង សុភា និយាយថា៖«ឥលូវនេះខ្ញុំបានមកដល់ប្រទេសខ្មែរដោយសុវត្ថិភាពហើយ ខ្ញុំក៏សូមអរគុណដល់បងៗ ដែលខំស្វះស្វែងដើម្បីឲ្យពួកខ្ញុំបានមកដល់ប្រទេសខ្មែរ។ ខ្ញុំសង្ឃឹមថាបងប្អូនដែល នៅក្រោយ កុំបោះបង់ការទុកចិត្តនៅលើនាយករដ្ឋមន្រ្តី ព្រមទាំងបងៗក្រសួងការងារ ព្រោះពួកគាត់ព្យាយាម និងឲ្យពួក យើងបាន មកដល់ស្រុកខ្មែរវិញមិនខាន តែយើងត្រូវអត់ធ្មត់បន្តិច»។សូមបញ្ជាក់ថា គិតត្រឹមលើកនេះទៀត មានបងប្អូនពលការិនីចំនួន៦៣នាក់ហើយ ដែលបានវិលត្រឡប់មកមាតុប្រទេសវិញក្រោមការជួយសម្របសម្រួលពីក្រសួងការងារ និងបណ្តុះបណ្តាលវិជ្ជាជីវៈ និងស្ថានទូតខ្មែរប្រចាំ នៅប្រទេសអារ៉ាប៊ីសាអូឌីត និងភាគីពាក់ព័ន្ធ តាមការស្នើឱ្យជួយអន្តរាគមន៍ពីពលរដ្ឋខ្មែរនៅអារ៉ាប៊ីសាអូឌីត។ ក្រសួងការងារ និងបណ្តុះបណ្តាលវិជ្ជាជីវៈ រួមនឹងគ្រប់ភាគីពាក់ព័ន្ធ នឹងនៅតែបន្តធ្វើកិច្ចសម្របសម្រួលដើម្បីជួយពលការិនីខ្មែរដែលនៅសល់ឲ្យ បានត្រឡប់មកស្រុកកំណើតវិញក្នុងពេលឆាប់ៗនេះ៕

(ម៉ានីល)៖ ប្រធានាធិបតីអ៊ុយក្រែន លោក Volodymyr Zelenskyy បានជួបជាមួយប្រធានាធិបតីហ្វីលីពីន លោក Ferdinand Marcos Jr នៅទីក្រុងម៉ានីល នៅចន្ទ ទី០៣ ខែមិថុនា ហើយបានថ្លែងអំណរគុណចំពោះ លោក ចំពោះការគាំទ្រ និង “ជំហរច្បាស់លាស់” លើការឈ្លានពានរបស់រុស្ស៊ី លើទឹកដីរបស់ខ្លួន។មេដឹកនាំទាំងពីរបានជួបគ្នា នៅវិមានប្រធានាធិបតីហ្វីលីពីន បន្ទាប់ពីលោក Zelenskyy បានបង្ហាញខ្លួន ដោយមិនគ្រោងទុកនៅក្នុងសន្និសីទសន្តិសុខដ៏ធំបំផុតរបស់អាស៊ីក្នុងប្រទេសសិង្ហបុរី កាលពីចុងសប្តាហ៍ ដែលជាដំណើរទស្សនកិច្ចលើកទីពីររបស់លោកទៅកាន់អាស៊ីចាប់តាំងពីការឈ្លានពានរបស់រុស្ស៊ីលើអ៊ុយក្រែនក្នុងឆ្នាំ 2022។លោក Zelenskyy បាន​ធ្វើ​ដំណើរ​ទស្សនកិច្ច​លើក​ដំបូង​របស់​លោក​ទៅ​ប្រទេស​ហ្វីលីពីន ចាប់​តាំង​ពី​ការ​បោះឆ្នោត​របស់​លោក ​ក្នុង​ឆ្នាំ ២០១៩។លោក Zelenskyy បានប្រាប់លោក Marcos ថា សូមអរគុណចំពោះការអញ្ជើញនេះ ហើយយើងពិតជា អរគុណខ្លាំងណាស់ ដែលបាននៅក្នុងប្រទេសរបស់អ្នកដែលគាំទ្រអ៊ុយក្រែន បូរណភាពទឹកដី និងអធិបតេយ្យភាពរបស់យើង" ។លោកបានបន្ថែមថា "អរគុណច្រើនចំពោះពាក្យសម្តីគាំទ្ររបស់អ្នក និងជំហរច្បាស់លាស់អំពីពួកយើង អំពីការកាន់កាប់ទឹកដីរបស់រុស្ស៊ីនេះ។ លោកZelenskyy បាននិយាយថាអ៊ុយក្រែនក៏នឹងបើកស្ថានទូតមួយ នៅទីក្រុងម៉ានីលនៅឆ្នាំនេះផងដែរ៕

(ញូវដែលី)៖ ប្រព័ន្ធផ្សព្វផ្សាយក្នុងស្រុកបានរាយការណ៍ដោយដកស្រង់ទិន្នន័យ របស់រដ្ឋាភិបាល ថា មាន ជិត 25000 ករណីនៃករណីដែលគេសង្ស័យថាជាជំងឺគ្រុនក្តៅ ហើយមនុស្ស 56 នាក់បានបាត់បង់ជីវិត បន្ទាប់ពីរលកកំដៅជាច្រើនថ្ងៃនៅទូទាំងប្រទេសចាប់ពីខែមីនា ដល់ខែឧសភា។ នេះបើយោងតាមការចុះ ផ្សាយរបស់សារព័ត៌មានCNAនៅថ្ងៃទី​០២ ខែមិថុនា ឆ្នាំ២០២៤។ខែឧសភា គឺជាខែដ៏អាក្រក់បំផុត សម្រាប់តំបន់ជាច្រើន ដោយសីតុណ្ហភាពនៅក្នុងរដ្ឋធានី Delhi និងរដ្ឋ Rajasthan ដែលនៅជិតនោះឡើងដល់ 50 អង្សាសេ។ផ្ទុយ​ទៅ​វិញ ផ្នែក​ខ្លះ​នៃ​ភាគ​ខាង​កើត​ប្រទេស​ឥណ្ឌា​បាន​និង​កំពុង​រង​ឥទ្ធិពល​ពី​ព្យុះ​ស៊ីក្លូន Remal។ ភ្លៀងធ្លាក់ខ្លាំងនៅភាគឦសានរដ្ឋ Assam បានសម្លាប់មនុស្ស 14 នាក់ចាប់តាំងពីថ្ងៃអង្គារ (28 ឧសភា) ។មជ្ឈមណ្ឌលគ្រប់គ្រងគ្រោះមហន្តរាយរបស់ប្រទេស (DMC) បាននិយាយកាលពីថ្ងៃអាទិត្យថា នៅក្នុងប្រទេសកោះស្រីលង្កា យ៉ាងហោចណាស់មនុស្ស 15 នាក់បានស្លាប់ដោយសារទឹកជំនន់ និងការរអិលបាក់ដី បន្ទាប់ពីភ្លៀងមូសុងខ្លាំងបានវាយប្រហារតំបន់នេះ។ការប្រសព្វនៃកត្តាបាននាំឱ្យរដូវក្តៅក្តៅខ្លាំងនៅអាស៊ីខាងត្បូង ដែលជានិន្នាការអ្នកវិទ្យាសាស្ត្រនិយាយថា កាន់តែអាក្រក់ទៅៗដោយការប្រែប្រួលអាកាសធាតុដែលជំរុញដោយមនុស្ស។យ៉ាងហោចណាស់មនុស្ស 33 នាក់ រួមទាំងមន្ត្រីរៀបចំការបោះឆ្នោតដែលបំពេញកាតព្វកិច្ច នៅក្នុងការ បោះឆ្នោតសកលដែលទើបនឹងបញ្ចប់របស់ប្រទេសឥណ្ឌា បានស្លាប់ដោយសារ ការសង្ស័យថាមានកំដៅ នៅក្នុងរដ្ឋ Uttar Pradesh និង Bihar នៅភាគខាងជើង និង Odisha នៅភាគខាងកើត៕

(សិល្បះ)៖ ដូចដែរមហាជនបានដឹងស្រាប់ហើយថា រលកហើយនៃមតិរិះគន់ពីសំណាក់មហាជនទៅកាន់ លោក ឯម រៀម ដែលជាស្គាល់ថា ជាបណ្ឌិតច្នៃម៉ូត ជុំវិញការតុបតែងខ្លួន និង ស្លៀកពាក់ មិនទំនង ខុសគេ ខុសឯង ចូលរួមក្នុងកម្មវិធី សម្ពោធ MV បទ ទេវរាជ របស់អ្នកនាង ទេព បូព្រឹក្ស នូវមិនទាន់មានភាពស្ងប់ស្ងាត់នៅឡើយនោះទេ ពោលគឺ មានមហាជនជាច្រើន បង្ហាញអារម្មណ៍កើតទុក្ខ មិនសុខចិត្ត ដោយចង់ឱ្យខាង ស្ថាប័នពាក់ព័ន្ធ កោះហៅលោក ឯម រៀម ទៅអប់រំណែនាំចេញម្តង ។ ជាងនេះទៅទៀត ក៏មានអ្នកខ្លះទៀត លើកឡើងទាំងទប់ចិត្តមិនបានថា ឈប់ឱ្យលោក ឯម រៀម ចូលរូមក្នុងកម្មវិធីធំៗ ដែលទាក់ទងនឹងវប្បធ៌ម ថែមទៀតផង ព្រោះនាំឱ្យប៉ះពាល់ អាប់មុខ អាប់មាត់ និង ធ្វើឱ្យបាត់បង់នូវតម្លៃនៃសិល្បៈវប្បធ៌ម ខ្មែរ ដោយសារតែបុគ្គលរូបនេះ។សូមរំលឹកទៅកាន់ដំណើរដើមទងនៃសាច់រឿងបន្តិច កាលពីកន្លងទៅថ្មីៗនេះ លោក ឯម រៀម ត្រូវបានអ្នកលេងបណ្តាញសង្គម រិះគន់ មិនសំចៃមាត់ទៅលើ លោក ឯម រៀម ក្រោយលោកបានច្នៃគ្រឿងអេឡិចត្រូនិក មកស្លៀកនៅលើ ខ្លួនដែល ឈុតមានឈ្មោះថា (រាជិនី AI)។ ឈុត រាជិនី AI របស់លោក ឯម រៀម ត្រូវបានមហាជន លើកឡើងចំៗថា ការតុបតែងខ្លួន បែបនេះ គឺជាការជាន់ពន្លិចវប្បធម៌ខ្មែរច្បាស់ណាស់ ។ តើមានហេតុផល ឬ សំអាងអ្វីបានជាមហាជនជាច្រើន លើកឡើងបែបនេះ? ចម្លើយងាយៗ គឺ ដោយសារតែនៅក្នុង កម្មវិធីសម្ពោធ MV បទ«ទេវរាជ» គេតម្រូវឱ្យអ្នកចូលរួមទាំងអស់ស្លៀកសំលៀកបំពាក់ ដែលរំលច និង បង្ហាញជាពិសេស ក្នុងទម្រង់ ផ្សារភ្ជាប់ទៅនឹងសិល្បៈ វប្បធ៌មខ្មែរ ទោះសម្លៀកបំពាក់នោះស្ថិតក្នុងសម័យកាល ណាក៏ដោយ សំខាន់ ឱ្យតែបង្ហាញពី ប្រពៃណី សិល្បៈ វប្បធ៌ម អរិយធ៌ម របស់ខ្មែរ។ ពោលគឺ កម្មវិធីសម្ពោធ MV មួយនេះ គេរៀបចំឡើង ដើម្បីផ្សារភ្ជាប់ទៅនឹងវប្បធ៌មខ្មែរ លើកតម្កើងសិល្បៈវប្បធ៌មខ្មែរ ចំលែកអ្វីតែ លោក ឯម រៀម ដែលការតុបតែង ស្លៀកពាក់ របស់គាត់ មិនដឹងថាកន្លែងណា ដែលបង្ហាញពី ក្បួនខ្នាត អត្តសញ្ញាណ និង តម្លៃនៃ វប្បធ៌មរបស់ខ្មែរ សោះ ផ្ទុយទៅវិញ បែរជាធ្វើឱ្យប៉ះពាល់ មិនឱ្យតម្លៃ បំផ្លិចបំផ្លាញ និង ជាន់ពន្លិច វប្បធ៌មខ្មែរទៅវិញ ។យ៉ាងណាមិញ អ្វីដែលធ្វើឱ្យមហាជន កាន់តែទប់ចិត្តខឹង មិនបាននោះ គឺមិនត្រឹមតែមហាជនខ្មែរជាច្រើន បានបញ្ចេញមតិរិះគន់ប៉ុណ្ណោះនោះទេ ពោលគឺអ្នកជិតខាងរបស់យើង នោះគឺផ្ទះលេខ២ បាននាំគ្នារិះគន់ សើចចំអក មើលងាយ ជាន់បន្លិចវប្បធ៌មខ្មែរ ដោយសារតែលោក ឯម រៀមនេះទៀតផង ។ មហាជនពិតជាទទួលស្គាល់ថា គាត់ជាបណ្ឌិតច្នៃម៉ូដ ក៏ប៉ុន្តែ ត្រូវច្នៃ និងស្លៀកពាក់ចូលរួមកម្មវិធី ឱ្យត្រូវកាលៈទេសៈ ច្នៃឈុតឱ្យស៊ីនឹងកម្មវិធី ច្នៃយ៉ាងណាឱ្យមានភាពថ្លៃថ្នូរ សមរម្យក្នុងនាមជាកូនខ្មែរ ស្រលាញ់ និង ថែរក្សានូវប្បធ៌ម មិនមែនច្នៃចេញមក បែបលើសពេក ដែលនាំឱ្យប៉ះពាល់ កេរ្តិ៍ឈ្មោះខូចមុខមាត់ជាតិនោះទេ ។ក្រោយការរិះគន់ ឥតឈប់ឥតឈរ រហូតដល់មហាជនខ្លះរងចាំមើលចំណាត់ការពីស្ថាប័នពាក់ព័ន្ធហើយ ព្យុះនៃមតិរិះគន់មិនទាន់រលត់ផង ស្រាប់តែ លោក ឯម រៀម បានបញ្ចេញនូវខ្លឹមវីដេអូមួយឆ្លើយតបទៅអ្នករិះគន់វិញ ក្នុងន័យ មិនទទួលស្គាល់កំហុស របស់ខ្លួន ថែមទាំង លើកអំណះអំណាងថា អ្វីដែលខ្លួនធ្វើ គឺមិនបានប៉ះពាល់ដល់ វប្បធ៌ម នោះទេ ។ លោក ឯម រៀមថា ការតុបតែងខ្លួន ការស្លៀកពាក់ របស់ខ្លួន គឺបានច្នៃ និង យកតាមសិលាចារិកខ្មែរ ដែលមានអាយុកាលពីយូរយារណាស់មកហើយ ហើយការស្លៀកពាក់នេះ ក៏មានក្បួនខ្នាតត្រឹមត្រូវ មិនមែនចេះតែ តែៗ ស្ករៗ ដូចមហាជនមួយចំនួននោះទេ ។ទោះជាយ៉ាងណាក៏ដោយ ជុំវិញការស្លៀកពាក់ និង ការតុបតែងខ្លួន របស់លោក ឯម រៀម មហាជនជាច្រើន ក៏កំពុងរងចាំមើលថា តើស្ថាប័ន ក្រសួង និង ផ្នែកពាក់ព័ន្ធ នឹងមានវិធានការ ឬ ចំណាត់ការ ណាមួយចំពោះបុគ្គលរូបនេះ ដែរឬយ៉ាងណា ឬ មួយ ក៏បន្តឱ្យបុគ្គលរូបនេះ ប្រព្រឹត្តបែបនេះ បន្តទៀត៕

(អន្តរជាតិ)៖ លោក Lloyd James Austin បានស្បថចូលកាន់តំណែងជារដ្ឋមន្ត្រីក្រសួងការពារជាតិទី 28 នៅថ្ងៃទី 22 ខែមករា ឆ្នាំ 2021។ លោក Austin គឺជាជំនួយការចម្បងរបស់ប្រធានាធិបតី ក្នុងគ្រប់បញ្ហា ដែលទាក់ទងនឹងក្រសួងការពារជាតិ និងបម្រើការនៅក្រុមប្រឹក្សាសន្តិសុខជាតិ។លោក Lloyd Austin កើតថ្ងៃទី 8 ខែសីហា ឆ្នាំ 1953 នៅទីក្រុង Mobile រដ្ឋ Alabama និងធំធាត់នៅទីក្រុង Thomasville រដ្ឋ Georgia ។ លោកបានបញ្ចប់ការសិក្សាពីបណ្ឌិតសភាយោធាសហរដ្ឋអាមេរិក ជាមួយនឹងបរិញ្ញាបត្រវិទ្យាសាស្ត្រ និងគណៈកម្មាការនៅក្នុងកងពលថ្មើរជើង។ លោកបាន ទទួលសញ្ញាប័ត្រ អនុបណ្ឌិតសិល្បៈផ្នែកអប់រំទីប្រឹក្សា ពីសាកលវិទ្យាល័យ Auburn និងអនុបណ្ឌិតគ្រប់គ្រងពាណិជ្ជកម្ម ពីសាកលវិទ្យាល័យ Webster ។ លោកគឺជានិស្សិតបញ្ចប់ថ្នាក់បរិញ្ញាបត្រជាន់ខ្ពស់ ថ្នាក់មូលដ្ឋាន និងកម្រិតខ្ពស់ ថ្នាក់បញ្ជាការកងទ័ព និងមហាវិទ្យាល័យបុគ្គលិកទូទៅ និងមហាវិទ្យាល័យសង្គ្រាមយោធា។អាជីព៤១ ឆ្នាំរបស់លោក នៅក្នុងជួរកងទ័ពរួមមានបញ្ជានៅកងពលធំកងពលតូចកងវរសេនាតូច និងកម្រិតកងពលតូច។ លោក Austin បានទទួលរង្វាន់ Silver Star សម្រាប់ការដឹកនាំរបស់លោក នៃកងពលធំថ្មើរជើងទី 3 របស់កងទ័ពក្នុងអំឡុងពេលការលុកលុយប្រទេសអ៊ីរ៉ាក់ ក្នុងឆ្នាំ 2003 ។ ប្រាំពីរឆ្នាំក្រោយមកលោក នឹងទទួលភារកិច្ចជាអគ្គបញ្ជាការនៃកងកម្លាំងសហរដ្ឋអាមេរិក - អ៊ីរ៉ាក់ ដោយមើលការខុសត្រូវលើប្រតិបត្តិការប្រយុទ្ធទាំងអស់នៅក្នុង ប្រទេស។បន្ទាប់​ពី​ដំណើរ​ទស្សនកិច្ច​ក្នុង​នាម​ជា​អនុប្រធាន​សេនាធិការ​កងទ័ព លោក Austin បាន​បញ្ចប់​ការ​បម្រើ​ឯកសណ្ឋាន​របស់​លោក​ក្នុង​នាម​ជា​មេបញ្ជាការ​បញ្ជាការ​កណ្តាល​របស់​សហរដ្ឋ​អាមេរិក ដែល​ទទួល​ខុស​ត្រូវ​លើ​ប្រតិបត្តិការ​យោធា​ទាំងអស់​នៅ​មជ្ឈិមបូព៌ា និង​អាហ្វហ្គានីស្ថាន។ ក្នុង​កិច្ចការ​នេះ លោក​បាន​ដឹកនាំ​សហរដ្ឋ​អាមេរិក និង​កិច្ច​ខិត​ខំ​ប្រឹង​ប្រែង​ចម្រុះ​ដើម្បី​ប្រយុទ្ធ​ប្រឆាំង​ក្រុម ISIS នៅ​អ៊ីរ៉ាក់ និង​ស៊ីរី។ ក្រោយមក​លោក បានចូលនិវត្តន៍ពីកងទ័ពនៅខែមេសា ឆ្នាំ ២០១៦៕

(ភ្នំពេញ)៖ រដ្ឋមន្ត្រីក្រសួងការពារជាតិអាមេរិក លោក Lloyd Austin គ្រោងនឹងមកបំពេញ ទស្សនកិច្ចផ្លូវការ នៅកម្ពុជា បន្ទាប់ពីបានជួបពិភាក្សាជាមួយសមភាគីចិន ក្នុងសន្និសីទសន្តិសុខ ប្រចាំឆ្នាំនៅ ប្រទេសសិង្ហបុរី។សេចក្តីថ្លែងការណ៍របស់ក្រសួងការពារជាតិសហរដ្ឋអាមេរិកដែលបានចេញផ្សាយនៅទីក្រុងវ៉ាស៊ីនតោន បាននិយាយថាលោក Austin នឹងធ្វើដំណើរនៅសប្តាហ៍ក្រោយ ទៅកាន់ប្រទេសសិង្ហបុរី កម្ពុជា និងបារាំង។លោក​នឹង​មក​បំពេញ​ទស្សនកិច្ច​នៅ​កម្ពុជា​នៅ​ថ្ងៃ​ទី​៤ ខែ​មិថុនា បន្ទាប់​ពី​បាន​ចូលរួម​កិច្ច​សន្ទនា Shangri-La ក្នុង​ប្រទេស​សិង្ហបុរី។ សេចក្តីថ្លែងការណ៍របស់ក្រសួងការពារជាតិបាននិយាយថា លោក Austin នឹងជួបជាមួយមន្ត្រីជាន់ខ្ពស់នៅ កម្ពុជា ក្នុងដំណើរទស្សនកិច្ចនេះ។លោក Lloyd Austin រដ្ឋមន្ត្រីការពារជាតិអាមេរិក គ្រោងមកបំពេញទស្សនកិច្ចនៅកម្ពុជា នៅថ្ងៃទី០៤ ខែមិថុនា ឆ្នាំ២០២៤ខាងមុខនេះ ដែលនេះជាដំណើរមកកាន់ប្រទេសកម្ពុជា ជាលើកទី២ របស់លោក Lloyd Austin ក្នុងនាមជារដ្ឋមន្រ្តីការពារជាតិអាមេរិក ខណៈដែលលើកទី១ លោកបានមកចូលរួម កិច្ចប្រជុំរដ្ឋមន្ត្រីការពារជាតិអាស៊ាន នៅក្នុងខែវិច្ឆិកា ឆ្នាំ២០២២៕

(ភ្នំពេញ)៖ ក្រសួងពាណិជ្ជកម្ម នៃព្រះរាជាណាចក្រកម្ពុជា ចេញសេចក្តីជូនដំណឹងស្ដីពី ការរៀបចំព្រឹត្តិការណ៍ជំនួបអាជីវកម្ម “ The PLEXCONNECT 2024 ” ដែលនឹងប្រព្រឹត្តទៅចាប់ពីថ្ងៃទី៧-៩ ខែមិថុនា ឆ្នាំ២០២៤ នៅមជ្ឈមណ្ឌលតាំងពិព័រណ៍បុមបៃ ទីក្រុងបុមបៃ ប្រទេសឥណ្ឌា ដែលរៀបចំដោយ ក្រុមប្រឹក្សាជំរុញការនាំចេញប្លាស្ទិកឥណ្ឌា (PLEXCONCIL) ។ព្រឹត្តិការណ៍ខាងលើ គឺជាជំនួបអ្នកទិញ-អ្នកលក់ដែល នឹងផ្តល់ឱកាសដល់អ្នកទិញអន្តរជាតិ សម្រាប់ភ្ជាប់បណ្តាញអាជីវកម្មជាមួយក្រុមហ៊ុនអ្នកផលិត និងអ្នកនាំចេញឥណ្ឌា ដើម្បីស្វែងរកប្រភពដើមផលិតផលពីប្រទេសឥណ្ឌា។ នេះបើយោងតាមសេចក្ដីជូនដំណឹងរបស់ក្រសួងពាណិជ្ជកម្ម កាលពីថ្ងៃទី២៤ ខែឧសភា ឆ្នាំ២០២៤ បានបញ្ជាក់បន្ថែមថា គណៈកម្មការរៀបចំនឹងផ្តល់ជូនពិសេសសម្រាប់អ្នកទិញដែលមានលក្ខណៈសម្បត្តិគ្រប់គ្រាន់ដោយទទួលបានការផ្តល់ជូនសំបុត្រយន្តហោះទៅមក និងការស្នាក់នៅសណ្ឋាគារចំនួន២យប់ដោយឥតគិតថ្លៃនៅទីក្រុងបុមបៃ។ខាងក្រោមនេះជាខ្លឹមសារទាំងស្រុងរបស់សេចក្ដីជូនដំណឹង៖

(ភ្នំពេញ)៖ លោក ផុន ប៉ាវ បានផ្លាស់ប្តូរជីវិតពីកូនកសិករដែលមានជីវភាពខ្វះខាត ក្លាយជាម្ចាស់យានដ្ឋាន ក្រោយបញ្ចប់ជំនាញបច្ចេកទេសជួសជុលយានយន្ត នៅវិទ្យាស្ថានជាតិ ពហុបច្ចេកទេសកម្ពុជា «NPIC»។ លោក ផុន ប៉ាវ ដែលជាកូនកសិករមកពីខេត្តតាកែវ ធ្លាប់តែពឹងផ្អែកខ្លាំងលើការធ្វើកសិកម្ម បានគូសបញ្ជាក់ថា ការសិក្សាជំនាញបច្ចេកទេសបានផ្លាស់ប្ដូរជីវិតរបស់លោកជាខ្លាំង ពិសេសអាចឲ្យលោករកចំណូលបានជាប្រចាំ។ លោកបញ្ជាក់ថា៖«គ្រួសារខ្ញុំនៅតែធ្វើកសិកម្ម តែគាត់មិនសូវពឹងខ្លាំងលើកសិកម្មដូចពីមុនទេ។ តាំងពីខ្ញុំបើកយានដ្ឋាននេះមកជាទូទៅវាអត់ស្ងាត់ទេ គឺមានភ្ញៀវរហូត ចំណូលមានរាល់ថ្ងៃគ្រាន់តែតិច ឬច្រើន»។ទន្ទឹមនេះ លោក ផុន ប៉ាវ បានគូសបញ្ជាក់ទៀតថា សង្គមបច្ចុប្បន្នត្រូវការអ្នកមានជំនាញច្បាស់លាស់ ដូច្នេះការមានជំណាញណាមួយក៏ដោយសុទ្ធសំខាន់សម្រាប់ជីវិតមនុស្សម្នាក់ៗ និងសំខាន់សម្រាប់ការអភិវឌ្ឍន៍សង្គម។ បន្ថែមលើនេះ លោក ផុន ប៉ាវ ក៏បានបំផុសគំនិតយុវជនដែលមិនទាន់មានជំនាញច្បាស់លាស់គួរងាកមកចាប់យកជំនាញណាមួយដែលខ្លួនពេញចិត្ត ដើម្បីអាចមានលទ្ធភាពផ្គត់ផ្គង់ជីវភាពគ្រួសារ និងខ្លួនឯង ទៅថ្ងៃអនាគត៕

(ភ្នំពេញ)៖ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា នឹងផ្តល់កិត្តិយសដ៏ខ្ពង់ខ្ពស់បើកយុទ្ធនាការនេះ ជាផ្លូវការ នៅថ្ងៃទី១ ខែមិថុនា ឆ្នាំ២០២៤ ស្អែកនេះ នៅខេត្តសៀមរាបដើម្បីរួមគ្នារក្សានិរន្តរភាពរបស់មន្ទីរពេទ្យគន្ធបុប្ផាដែលមានបេសកកម្ម ពិនិត្យ និងព្យាបាលទារក និងកុមាររ៉ាប់ម៉ឺនករណីក្នុងមួយឆ្នាំៗដោយឥតគិតថ្លៃ៕

(អន្តរជាតិ)៖ មេធាវីម្នាក់ក្នុងចំណោមមេធាវីរបស់លោក Donald Trump បានប្រាប់ BBC ថា អតីតប្រធានាធិបតីគឺជា ជនរងគ្រោះនៃការកាត់ទោសនយោបាយ។កាលពីថ្ងៃព្រហស្បតិ៍ លោក Trump ត្រូវបានផ្តន្ទាទោសលើការចោទប្រកាន់ចំនួន 34 នៃការក្លែងបន្លំកំណត់ត្រាអាជីវកម្មទាក់ទងនឹងការទូទាត់ប្រាក់ដែលធ្វើឡើង ទៅកាន់តារាស្រី Stormy Daniels ។លោកបាននិយាយថា លោកគ្រោងនឹងប្តឹងឧទ្ធរណ៍ប្រឆាំងនឹងការផ្តន្ទាទោសជាប្រវត្តិសាស្ត្ររបស់លោកហើយនៅក្នុងបទសម្ភាសន៍ ជាមួយ Laura Kuenssberg ដោយមេធាវីលោកត្រាំ គឺលោកស្រី Alina Habba បានទទូចថាទោះបីជាលោកជាប់ពន្ធនាគារក៏ដោយ ក៏លោកនឹងឈរឈ្មោះសម្រាប់តំណែងនេះដែរ ដោយសារតែ ប្រជាជនត្រូវការលោក៕

(វ៉ាស៊ីនតោន)៖ មន្ត្រីអាមេរិកបាននិយាយប្រធានាធិបតីអាមេរិក លោក ចូ បៃដិន បានលុបចោលជា សម្ងាត់លើការរឹត បន្តឹងលើ អ៊ុយក្រែន ដោយប្រើអាវុធដែលផ្គត់ផ្គង់ដោយអាមេរិក ប្រឆាំងនឹងគោលដៅ នៅលើទឹកដីរុស្ស៊ី ប៉ុន្តែគ្រាន់ តែដើម្បីការពារតំបន់ Kharkov ដែលស្ថិតនៅក្រោមការបាញ់ប្រហារ ប៉ុណ្ណោះ។លោក Biden បានស្ថិតនៅក្រោមសម្ពាធកាន់តែខ្លាំងឡើងពីប្រទេសអ៊ុយក្រែន ក្នុងការបន្ធូរបន្ថយ ការហាមឃាត់របស់គាត់ ប៉ុន្តែរហូតមកដល់ពេលនេះបានទប់ទល់ចំពេលមានការព្រួយបារម្ភថា វាអា ចទាញណាតូចូលទៅក្នុងជម្លោះដោយផ្ទាល់ ឬសូម្បីតែការប្រឈមមុខដាក់គ្នានុយក្លេអ៊ែ ជាមួយទីក្រុងម៉ូស្គូ។មន្ត្រីអាមេរិកម្នាក់បាននិយាយថា ថ្មីៗនេះប្រធានាធិបតីបានណែនាំក្រុមរបស់លោក ឱ្យធានាថា អ៊ុយក្រែន អាចប្រើប្រាស់អាវុធដែលផ្គត់ផ្គង់ដោយសហរដ្ឋអាមេរិក សម្រាប់គោលបំណងប្រឆាំង ការបាញ់ប្រហារនៅក្នុងតំបន់ Kharkiv ដូច្នេះអ៊ុយក្រែនអាចវាយបកប្រឆាំងនឹងកងកម្លាំងរុស្ស៊ី ដែល កំពុងវាយប្រហារពួកគេ ឬត្រៀមវាយប្រហារ។ មន្ត្រីរូបនេះបាននិយាយក្នុងលក្ខខណ្ឌមិនបញ្ចេញឈ្មោះដោយសំដៅទៅលើមីស៊ីលចរយៈចម្ងាយឆ្ងាយដែលទើបបញ្ជូនដោយទីក្រុងវ៉ាស៊ីនតោនទៅកាន់ទីក្រុងគៀវ។មន្ត្រីអាមេរិកទីពីរបានបញ្ជាក់ពីការផ្លាស់ប្តូរគោលនយោបាយរបស់លោក Biden ដែលកើតឡើង នៅពេលដែលកងកម្លាំងរុស្ស៊ីជំរុញទៅមុខ ជាមួយនឹងការវាយលុកប្រឆាំងនឹងតំបន់ Kharkiv ភាគឦសាន៕