(សង្គម)៖ មិនដឹងថាម្ចាស់សក់ខ្លោចចិត្តប៉ុណ្ណានោះទេ បើសូម្បីតែអ្នកលេងបណ្ដាញសង្គមគ្រាន់តែអូសឃើញហើយក៏រន្ធត់ចិត្តមិនតិចដែរ នរណាដែរថាមិនស្រឡាញ់សក់ខ្លួនឯង មូលហេតុនេះហើយទើបព្យាយាមក្នុងការស្វែងរកផលិតផលល្អៗដើម្បីយកមកថែទាំបំប៉នឱ្យកាន់តែស្អាតនិងមានសុខភាពល្អ។ ប៉ុន្តែសំណាងអាក្រក់មិនត្រឹមតែមិនជួយឱ្យសក់មានសុខភាពនិងស្អាតជាងមុននោះទេ តែបែរជាត្រូវជុ្រះដាច់មកទាំងដុំៗក្រោយពីបានប្រើប្រាស់ផលិតផលសក់ដែលមានប្រភពមកពីប្រទេសចិនមួយនេះ។ជាក់ស្ដែងយោងតាមគណនីហ្វសប៊ុកឈ្មោះ Thida Rorn បានបង្ហោះរូបភាពចំនួនបីសន្លឹកដោយអមមកជាមួយខ្លឹមថា«ស្ប៉ាសក់ខ្លួនឯង មួយដប8$ អាលួយសក់ កំពុងពេញស្រឡាញ់សក់ផង សិតមកដោយតាមក្រាស់ រៀងម៉ាជីវិត»។ ដោយរូបភាពដែលភ្ជាប់មកជាមួយនោះផងដែរបានបង្ហាញឱ្យឃើញសក់ដាច់ជាកំណាត់ៗជាច្រើនៗ ស្ទើតែដូចយកកន្ត្រៃមកកាត់សក់ទៅហើយ។ក្រោយពីបានឃើញនូវការបង្ហោះមួយនេះហើយឃើញមានមិត្តនារីជាច្រើនបានខំមិនសួរជាហូហែរថា តើស្ប៉ានោះម៉ាកអ្វីដែរ? រូបរាងបែបណា? ម្ចាស់គណនីខាងលើក៏បានឆ្លើយតបដោយបង្ហាញផលិតផលមួយនោះ។យ៉ាងណាមិញក្រោយពីបានឃើញម៉ាកនោះហើយគឺកាន់តែធ្វើឱ្យគ្រប់គ្នាភ្ញាក់ផ្អើលមួយតង់ទៀតដោយហេតុថាផលិតចិនមួយនោះគឺថ្នាំអ៊ុតសម្រាប់សក់ត្រង់ ពុំមែនជាផលិតផលស្ប៉ាសក់នោះឡើយ។ ដោយឡែកម្ចាស់គណនីខាងលើក៏បានបន្តទៀតថាខ្លួនយកមកប្រើប្រាស់ខុសបែបនេះក៏ដោយសារតែជឿជាក់លើការណែនាំរបស់អ្នកលក់ ដោយអ្នកលក់បានប្រាប់ថានេះជាផលិតផលស្ប៉ាសក់។ ទោះជាយ៉ាងណានេះគឺជាបទពិសោធមួយផងដែរសម្រាប់គ្រាប់គ្នាដើម្បីបង្ការកុំឱ្យជួបរឿងនិងហេតុការណ៍ដូចនារីខាងលើ ពិសេសទៀតនោះគួរណាស្វែងយល់ឱ្យបានច្រើនដោយខ្លួនឯងជាមុនពីផលិតផលណាមួយ គួរណាកុំទុកចិត្តសម្ដីអ្នកលក់១០០% ព្រោះថាអ្នកលក់មួយចំនួនគឺពុំបានស្គាល់ពីផលិតផលខ្លួនទាំងស្រុងនោះទេ ហេតុតែចង់បានភ្ញៀវនិងប្រាក់ចំណេញច្រើនៗក៏ចេះតែលក់ៗឱ្យតែបានៗដោយគ្មានវិជ្ជាជីវៈជាអ្នកលក់ឡើយ៕

(ភ្នំពេញ)៖ អ្នកសារព័ត៌មានលើកឡើងថា ការសិក្សាជំនាញរបស់យុវជនក្នុងកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាលកម្ពុជាអាណត្តិទី៧នេះ គឺមានភាពទំនើប ដោយវិទ្យាស្ថានបណ្តុះបណ្តាលមានឧបករណ៍សម្រាប់សិក្សាសម្បូរបែប សិស្សមានការអនុវត្តន៍ផ្ទាល់បានយ៉ាងល្អ បន្ទាប់ពីសិក្សាទ្រឹស្តីជាមួយសាស្រ្តាចារ្យនៅក្នុងថ្នាក់រៀន។ តាមរយៈការសិក្សាដ៏ល្អប្រសើរនេះយុវជននឹងសម្រេចបាននូវអភិក្រមរបស់សម្តេចនាយករដ្ឋមន្រ្តី «រៀនឱ្យចប់ ឱ្យចេះ ឱ្យមានការងារធ្វើ»។ ការលើកឡើងបែបនេះបន្ទាប់ពីក្រសួងការងារ និងបណ្តុះបណ្តាលវិជ្ជាជីវៈនៅថ្ងៃទី១៧ ខែឧសភា ឆ្នាំ២០២៤ បានដឹកនាំអ្នកសារព័ត៌មានចំនួន២០នាក់ មកពី ១០ស្ថាប័ន ចុះស្វែងយល់អំពីកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសទៅដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥ លាននាក់ នៅវិទ្យាស្ថានជាតិពហុបច្ចេកទេសកម្ពុជា (NPIC)។ កញ្ញា ណុប ស្រីម៉ៅ អ្នកសារព័ត៌មានខ្មែរថាមស៍ថា៖«អ្វីដែលខ្ញុំមានការភ្ញាក់ផ្អើលបំផុតនៅពេលចុះមកយកព័ត៌មាននៅវិទ្យាស្ថានជាតិពហុបច្ចេកទេសកម្ពុជាផ្ទាល់នៅពេលនេះគឺការសិក្សារបស់សិស្សគឺទំនើប ឧបករណ៍សិក្សាមានច្រើនសម្បូរបែបនៅក្នុងសាលា ជាពិសេសនៅក្នុងវិទ្យាស្ថានមានកន្លែងអនុវត្តផ្ទាល់ ជាក់ស្តែងដូចកន្លែងការងារ មើលទៅការសិក្សាជំនាញរបស់រាជរដ្ឋាភិបាលមួយនេះគឺអស្ចារ្យខ្លាំងណាស់ គួរឱ្យសរសើរមែនទែន»។ កញ្ញាសង្កត់ធ្ងន់ថា ក្រៅតែពីមានកម្មវិធីសិក្សាគួរឱ្យកោតសរសើរ ក្នុងនោះការយកចិត្តទុកដាក់ពីសំណាក់គ្រូបង្រៀនបច្ចេកទេស បូករួមទាំងវិន័យដ៏ល្អរបស់វិទ្យាស្ថាន ធ្វើឱ្យសិស្សដែលកំពុងសិក្សាជំនាញបច្ចេកទេសរបស់រាជរដ្ឋាភិបាលនៅទីនេះមានភាពរហ័សរហួន វិន័យល្អ មានសុជីវធម៌ និងសីលធម៌ល្អ។ ដែលទាំងនេះគឺកត្តាមួយដ៏មានសារសំខាន់ណាស់ ពីព្រោះក្រៅតែពីសមត្ថភាព សិស្សត្រូវមានសីលធម៌ល្អ និងការប្រព្រឹត្តល្អនៅក្នុងសង្គម បន្ទាប់ពីពួកគេបានបញ្ជប់ការសិក្សាជំនាញរបស់ខ្លួន។ ដោយឡែកកញ្ញា ដេត សាវត្តី អ្នកសារព័ត៌មានវិទ្យុអេប៊ីស៊ី ថា៖«ក្នុងនាមជាអ្នកសារព័ត៌មានពិតជាស្ងោចសរសើរចំពោះការបណ្តុះបណ្តាលជំនាញបច្ចេកទេសនៅវិទ្យាស្ថានជាតិពហុបច្ចេកទេសកម្ពុជា ទីធ្លាសាលាធំទូលាយ មានកន្លែងសិក្សាល្អ មានបន្ទប់អនុវត្តផ្ទាល់ មានកន្លែងស្នាក់នៅរបស់សិស្ស មានកន្លែងហូបបាយល្អ មើលទៅសាលាមួយនេះប្រៀបបានដូចផ្ទះរបស់សិស្សចឹង។ សិស្សនៅទីនេះគឺមានសុជីវធម៌ សីលធម៌ល្អណាស់ ខ្ញុំសូមសរសើរអស់ពីចិត្តតែម្តង»។ កញ្ញាបន្ថែមថា កម្មវិធីបណ្តុះបណ្តាលជំនាញវិជ្ជាជីវៈនិងបច្ចេកទេសសម្រាប់យុវជននៅអាណត្តិនេះគឺមានភាពអស្ចារ្យខ្លាំងណាស់។ រាជរដ្ឋាភិបាលមានការយកចិត្តទុកដាក់ខ្ពស់លើកម្មវិធីបណ្តុះបណ្តាលមួយនេះ ដូច្នេះសូមឱ្យយុវជន ក៏ដូចជាពលរដ្ឋទាំងអស់សូមមកទទួលយកការបណ្តុះបណ្តាលជំនាញដោយឥតគិតថ្លៃ និងទទួលបានប្រាក់ឧបត្ថម្ភពីសំណាក់រាជរដ្ឋាភិបាលចំពោះយុវជនមកពីគ្រួសារក្រីក្រ និងគ្រួសារងាយរងហានិភ័យរហូតដល់រៀនចប់នេះកុំបីអាក់ខាន។ ទន្ទឹមនឹងនេះក្នុងនាមជាអ្នកសារព័ត៌មានដែលមានតួនាទីផ្សព្វផ្សាយដំណឹងជូនពលរដ្ឋកម្ពុជា ពួកគេនឹងចូលរួមជាមួយរាជរដ្ឋាភិបាល ក៏ដូចជាភាគីពាក់ព័ន្ធទាំងអស់ក្នុងការផលិតនូវមាតិកាល្អៗ និងទាក់ទាញ ដើម្បីធ្វើការផ្សព្វផ្សាយនៅតាមបណ្តាញសារព័ត៌មាន និងបណ្តាញអ៊ីនធើណេតឱ្យបានផុសផុល ធ្វើយ៉ាងណាឱ្យកម្មវិធីបណ្តុះបណ្តាលជំនាញបច្ចេកទេសដ៏មានសារសំខាន់នេះទៅដល់ដៃពលរដ្ឋនៅទូទាំងប្រទេស ដើម្បីឱ្យពួកគេមកចុះឈ្មោះចូលរៀនជំនាញដោយឥតគិតថ្លៃ និងទទួលបានប្រាក់ឧបត្ថម្ភរហូតដល់រៀនចប់ ប្រសិនបើពួកគេជាយុវជនមកពីគ្រួសារក្រីក្រ និងគ្រួសារងាយរងហានិភ័យ៕

(សៀមរាប)៖ ក្រុមអ្នកបច្ចេកទេសរបស់នាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា កំពុងចាប់ផ្ដើមជួសជុលរានហាល និងបង្កាន់ដៃនាគ នៅប៉ែកខាងកើតនៃជ្រុងខាងលិចឆៀងខាងជើងរបស់ប្រាសាទបន្ទាយសំរ៉ែ នេះបើយោងតាមការចុះផ្សាយរបស់អាជ្ញាធរជាតិអប្សរា។ គម្រោងជួសជុលនេះ ក្រោមកិច្ចសហការរវាងអាជ្ញាធរជាតិអប្សរាជាមួយនិងស្ថាប័នGIZ នៃប្រទេសអាល្លឺម៉ង់។អ្នកជំនាញអភិរក្សថ្ម នៃនាយកដ្ឋានអភិរក្សប្រាសាទនិងបុរាណវិទ្យា លោក ឡុង ណារី ឱ្យដឹងថា បច្ចុប្បន្នរានហាល នៅប៉ែកខាងកើត នៃជ្រុងខាងលិចឆៀងខាងជើងរបស់ប្រាសាទបន្ទាយសំរ៉ែ ចាំបាច់ត្រូវពង្រឹងគ្រឹះ និងរចនាសម្ពន្ធឱ្យរឹងមាំឡើងវិញ ពីព្រោះ គ្រឹះរបស់រានហាលនេះ កន្លែងខ្លះទ្រុឌទ្រោមខ្លាំង កន្លែងខ្លះប្រេះបែកថ្មធ្វើឱ្យរចនាសម្ពន្ធមិនរឹងមាំ។ចំណែកឯ បង្កាន់ដៃនាគនៅផ្នែកខាងលើរបស់រានហាលវិញ ក្រុមអ្នកបច្ចេកទេសកំពុងជួសជុលឡើងវិញទៅតាមអ្វីដែលអាចធ្វើទៅបាន។លោក ឡុង ណារី មានបញ្ជាក់ទៀតថា បច្ចុប្បន្នក្រុមការងារបានរើថ្ម បង្កាន់ដៃនាគខ្លះ ដែលបានរលំ និងផ្ទាំងថ្មខ្លះ បានក្រៀកញែកចេញពីគ្នា រួចហើយ ព្យាយាមរុញចូលគ្នាឡើងវិញ។ ក្នុងការជួសជុលបង្កាន់ដៃនាគនេះដែរ គឺបានប្រើកាវប្រភេទFiber Glass ដើម្បីបិទភ្ជាប់ថ្មដែលបែកឡើងវិញ ព្រមទាំងប្រើសរសៃដែកថែប ដើម្បីតភ្ជាប់តំណថ្ម និងជួយទ្រទម្ងន់ថ្មខ្លះផង។ ចំពោះបង្កាន់ដៃចាស់ខ្លះ ដែលបែករកបំណែកមិនឃើញ គឺក្រុមការងារបានប្រើថ្មថ្មីមកបិទបំពេញ ចំណែកកន្លែងខ្លះដែលបាត់ថ្ម គឺត្រូវយកថ្មថ្មីមកឆ្លាក់ហើយដាក់ជំនួស។បច្ចុប្បន្ននេះ រានហាល និងបង្កាន់ដៃនាគ នៅប៉ែកខាងកើតនៃជ្រុងខាងលិចឆៀងខាងជើងរបស់ប្រាសាទបន្ទាយសំរ៉ែ មានថ្មខូចខាតជាច្រើនប្រភេទ ដោយកន្លែងខ្លះថ្មបានបែកពីលើ កន្លែងខ្លះបែកពីក្រោម កន្លែងខ្លះបែកពីចំហៀង និងកន្លែងខ្លះទៀតថ្ម មានសភាពពុកផុយ ដែលទាមទារឱ្យអ្នកបច្ចេកទេសត្រូវធ្វើ់ការព្យាបាល និងដកជាតិអំបិលចេញពីថ្ម មុននឹងយកដាក់ទៅតាមកន្លែងដើមឡើងវិញ៕

(ភ្នំពេញ)៖ រដ្ឋបាលរាជធានីភ្នំពេញ សូមជម្រាបជូនដំណឹងដល់បងប្អូនប្រជាពលរដ្ឋទាំ វាំងដល់ បងប្អូន ប្រជាពលរដ្ឋ ទាំងអស់ ឱ្យបានជ្រាបថា គណៈសង្ឃនាយក នៃព្រះរាជាណាចក្រកម្ពុជា នឹងរៀប ចំព្រះរាជពិធី បដិបត្តិសមាធិ និងមហាបង្សុកូល ឧទ្ទិសព្រះរាជកុសលថ្វាយព្រះវិញ្ញាណក្ខន្ធ ព្រះបរមសព សម្តេចព្រះអគ្គមហាសង្ឃរាជាធិបតី កិត្តិឧទ្ទេស បណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជា ណាចក្រកម្ពុជា ដែលនឹងប្រព្រឹត្តទៅនៅថ្ងៃទី២៧ ខែឧសភា ឆ្នាំ២០២៤ នៅខាងមុខវត្តឧណ្ណា លោម សង្កាត់ជ័យជំនះ ខណ្ឌដូនពេញ រាជធានីភ្នំពេញ។ដើម្បីរក្សាបាននូវសន្តិសុខ សុវត្ថិភាព សណ្តាប់ធ្នាប់ របៀបរៀបរយសាធារណៈ និងបញ្ចៀសបាននូវ ការកកស្ទះចរាចរក្នុងព្រះរាជពិធីខាងលើ រដ្ឋបាលរាជធានីភ្នំពេញនឹងធ្វើការបញ្ចៀសចរាចរ ជាបណ្តោះ អាសន្ន នូវយានយន្តគ្រប់ប្រភេទដែលធ្វើដំណើរឆ្លងកាត់តាមទីតាំងប្រារព្ធព្រះរាជពិធី នៅថ្ងៃទី២៧ ខែឧសភា ឆ្នាំ២០២៤។ចាប់ពីម៉ោង ១២:០០នាទី រហូតដល់បញ្ចប់ព្រះរាជពិធី តាមតម្រាយផ្លូវដូចខាងក្រោម៖ -បង្វែរទិសចរាចរកំណាត់តីរវិថីព្រះស៊ីសុវត្ថិ ចាប់ពីវិថីខេមរៈភូមិន្ទ (ផ្លូវលេខ១៣០) កែងតីរវិថី ព្រះស៊ីសុវត្ថិ រហូតដល់វិថីឧកញ៉ាឈុន (ផ្លូវលេខ២៤០) កែងតីរវិថីព្រះស៊ីសុវត្ថិ-បង្វែរទិសចរាចរកំណាត់មហាវិថីសម្តេចសុធារស ចាប់ពីវិថីតេជោដំឌិន (ផ្លូវលេខ១៥៤) កែងមហាវិថី សម្តេចសុធារស រហូតដល់ផ្លូវលេខ១៧៨ កែងមហាវិថីសម្តេចសុធារស-បង្វែរទិសចរាចរកំណាត់វិថីតេជោដំឌិន (ផ្លូវលេខ១៥៤) ចាប់ពីតីរវិថីព្រះស៊ីសុវត្ថិ កែងវិថីតេជោ ដំឌិន រហូតដល់ផ្លូវលេខ១៣ កែងវិថីតេជោដំឌិន-បង្វែរទិសចរាចរកំណាត់ផ្លូវលេខ១៣ ចាប់ពីវិថីតេជោដំឌិន (ផ្លូវលេខ១៥៤) កែងផ្លូវលេខ១៣ រហូតដល់ផ្លូវលេខ១៧៨ កែងផ្លូវលេខ១៣។អាស្រ័យហេតុនេះ សូមបងប្អូនប្រជាពលរដ្ឋដែលត្រូវធ្វើដំណើរឆ្លងកាត់តាមតម្រាយផ្លូវខាងលើ មេត្តាជ្រាប យោគយល់អធ្យាស្រ័យ និងបញ្ចៀសការធ្វើដំណើរឆ្លងកាត់ទីតាំងប្រារព្ធព្រះរាជពិធីខាងលើ ដោយក្តីអនុគ្រោះ។ ក្រោយបញ្ចប់ព្រះរាជពិធីបុណ្យ រដ្ឋបាលរាជធានីភ្នំពេញនឹងបើកឱ្យចរាចរជាធម្មតាវិញ៕

(អន្តរជាតិ)៖ តុលាការមួយនៅខេត្ត Binh Duong ភាគខាងត្បូងប្រទេសកំពុងបើកសវនាការ លើករណីដែលស្ត្រី ៨ នាក់បានសារភាពថាបានលក់ទារកទើបនឹងកើតរបស់ពួកគេ។ ចុងចោទ ដែលកំពុងកាត់ទោសមានឈ្មោះ Chu Thi Cuc Phuong អាយុ ៤២ ឆ្នាំ ង្វៀន ធីង៉ុក ញ៉ូ អាយុ ៣១ ឆ្នាំ និង ១២ នាក់ផ្សេងទៀត។ ចុងចោទចំនួនប្រាំបីនាក់គឺជាម្តាយ ដែលនិយាយថា ខ្លួនបានលក់កូនរបស់ពួកគេ ដោយសារតែការមានផ្ទៃពោះដែលមិននឹកស្មានដល់ហើយភាពក្រីក្របានធ្វើឱ្យពួកគេអស់សង្ឃឹមក្នុងការរកលុយហើយនឹងរារាំងពួកគេមិនឱ្យចិញ្ចឹមកូនឱ្យបានត្រឹមត្រូវ។អ្នកទាំង៦នាក់ផ្សេងទៀតត្រូវបានចោទប្រកាន់ពីបទជួញដូរខុសច្បាប់និងក្លែងបន្លំឯកសារពាក់ព័ន្ធ។ទាំងអស់ ត្រូវបានចោទប្រកាន់ដោយតុលាការប្រជាជន Binh Duong ពីបទ "ជួញដូរមនុស្សក្រោមអាយុ 16 ឆ្នាំ"។តាមដីកាបង្គាប់ឱ្យដឹងថា នៅឆ្នាំ២០២១ ជនជាប់ចោទមួយរូប បានបង្កើតក្រុមតាមបណ្តាញសង្គមដើម្បីស្វែងរកស្ត្រីមានផ្ទៃពោះដែលមិនចង់រក្សាកូន ។ អ្នកស៊ើបអង្កេតបាននិយាយថា គោលបំណងនៃក្រុមនេះគឺ ដើម្បីទិញទារកទើបនឹងកើត ហើយបន្ទាប់មកលក់បន្តដោយខុសច្បាប់។ព្រះរាជអាជ្ញាបាននិយាយថា Phuong និង Nhu បានផ្តល់សេវាថែទាំមានផ្ទៃពោះ សម្រាប់ស្ត្រី ដែលយល់ព្រមលក់កូនរបស់ពួកគេ។ ជនជាប់ចោទបានទិញកូនម្នាក់ៗក្នុងតម្លៃ ១០-៣០ លានដុង (៤០០-១.១៨០ ដុល្លារអាមេរិក) ហើយលក់ពួកគេក្នុងតម្លៃជាង ៤០ លាន នេះបើយោងតាមអ្នកស៊ើបអង្កេត។ដើម្បីផលិតឯកសារ "ស្របច្បាប់" សម្រាប់ឪពុកម្តាយចិញ្ចឹម ក្រុមរបស់លោក Phuong បានផ្តល់សំបុត្រកំណើតក្លែងក្លាយ ឯកសារយល់ព្រមលើការសុំកូនចិញ្ចឹម និងលទ្ធផលតេស្ត DNA ដែលពួកគេបានទិញពីក្រុមឧក្រិដ្ឋជនផ្សេងទៀតក្នុងតម្លៃ 2-7 លានដុងក្នុងមួយឯកសារ។នៅថ្ងៃទី 16 ខែសីហា ឆ្នាំ 2022 ប៉ូលីសបានចាប់ខ្លួន Nhu ក្នុងសកម្មភាពដឹកជញ្ជូន ទារកទើបនឹងកើតទៅលក់ឱ្យប្តីប្រពន្ធមួយនៅស្រុក Dau Tieng ក្នុងខេត្ត Binh Duong ។ បុគ្គលចំនួន ១៤ នាក់ត្រូវបានចាប់ខ្លួនជាបន្តបន្ទាប់ពាក់ព័ន្ធនឹងករណីនេះ។ការស៊ើបអង្កេតបានកំណត់ថា ចាប់ពីខែវិច្ឆិកា ឆ្នាំ 2021 រហូតដល់ចុងខែសីហា ឆ្នាំ 2022 Phuong បានជួញដូរទារកទើបនឹងកើតយ៉ាងហោចណាស់ 5 នាក់ ដោយទទួលបានប្រាក់ចំណេញខុសច្បាប់ចំនួន 70 លានដុង ខណៈពេលដែល Nhu ក៏បានធ្វើឱ្យមានការជួញដូរចំនួន 40 លានដុងផងដែរ។ នៅក្នុងតុលាការ លោក Phuong និង Nhu បានសារភាពកំហុសរបស់ពួកគេ ប៉ុន្តែបានអះអាងថាមិនគោរពច្បាប់។ ពួកគេបាននិយាយថាពួកគេគិតថាអ្វីដែលពួកគេបានធ្វើគឺជាករណីធម្មតានៃ "កិច្ចព្រមព្រៀងទិញនិងលក់" ដូច្នេះពួកគេបានសម្របសម្រួលកិច្ចព្រមព្រៀងដើម្បីទទួលបានប្រាក់ចំណេញ។ ចុងចោទពីរនាក់ផ្សេងទៀតត្រូវបានចោទប្រកាន់ពីបទជួយ Phuong និង Nhu ក្នុងប្រតិបត្តិការខុសច្បាប់។ជនជាប់ចោទទាំងប្រាំបីនាក់ដែលលក់កូនរបស់ពួកគេបានប្រាប់តុលាការថាពួកគេធ្វើដូច្នេះដោយសារតែពួកគេមានកូនច្រើនពេកហើយមិនអាចមានលទ្ធភាពចិញ្ចឹមទៀតទេ។ ពួកគេក៏បាននិយាយដែរថា ពួកគេមានផ្ទៃពោះដោយមិននឹកស្មានដល់ពេលរៀបការ។ ក្រុមចុងចោទដែលទិញទារកទើបនឹងកើតនិយាយថា ពួកគេធ្វើដូច្នេះដោយសារភាពគ្មានកូន។ ការស៊ើបអង្កេតមិនទាន់អាចកំណត់ថាតើអ្នកទិញទាំងនេះ តាមពិតមានគម្រោងលក់ទារក ឬអត់នោះទេ។ អ្នកទិញដែលជាប់ចោទទាំងអស់សុទ្ធតែមានវ័យក្មេង ហើយបាននិយាយថា ពួកគេមិនបានដឹងនៅពេលនោះថាសកម្មភាពរបស់ពួកគេខុស និងបំពានច្បាប់នោះទេ។អយ្យការបានស្នើឲ្យតុលាការផ្ដន្ទាទោសលោក ភួង ឲ្យជាប់ពន្ធនាគារចំនួន ២០ ឆ្នាំពីបទជួញដូរមនុស្សអាយុក្រោម ១៦ ឆ្នាំបន្ថែម ២ ទៅ ៣ ឆ្នាំពីបទក្លែងបន្លំឯកសារ។ ពួកគេបានផ្តល់អនុសាសន៍ថា Nhu ទទួលបាន 18-20 ឆ្នាំ។ ទោសដែលត្រូវបានណែនាំសម្រាប់ជនជាប់ចោទ ដែលនៅសេសសល់មាន ចាប់ពីការផាកពិន័យពី 30 លានដុងទៅ 13 ឆ្នាំជាប់ពន្ធនាគារ។ សាលក្រមត្រូវបានគេរំពឹងថានឹងប្រកាសនៅថ្ងៃទី ២១ ខែឧសភា៕

(អន្តរជាតិ)៖ Albert Einstein និយាយត្រូវ មានតំបន់មួយនៅគែមនៃប្រហោងខ្មៅ ដែលរូបធាតុមិនអាច ស្ថិតនៅក្នុងគន្លងបានទៀតទេ ហើយផ្ទុយទៅវិញធ្លាក់ចូល ដូចដែលបានព្យាករណ៍ដោយទ្រឹស្តី ទំនាញរបស់គាត់។ដោយប្រើតេឡេស្កុបដែលមានសមត្ថភាពចាប់កាំរស្មី X ក្រុមតារាវិទូមួយក្រុមបានសង្កេត ឃើញតំបន់នេះជាលើកដំបូង ដែលហៅថា "តំបន់ធ្លាក់ចុះ" នៅក្នុងប្រហោងខ្មៅដែលមាន ចម្ងាយប្រហែល 10000 ឆ្នាំពន្លឺពីផែនដី។ អ្នកវិទ្យាសាស្ត្រស្រាវជ្រាវ Andrew Mummery អ្នកដឹកនាំ ការស្រាវជ្រាវដែលបានបោះពុម្ពផ្សាយនៅក្នុងទស្សនាវដ្តី Monthly Notices of the Royal Astronomical Society បាននិយាយថា យើងមិនបានព្រងើយកន្តើយចំពោះតំបន់នេះទេ ពីព្រោះយើងមិនមានទិន្នន័យ" ។ «​ប៉ុន្តែ​ឥឡូវ​នេះ​យើង​ធ្វើ​ហើយ យើង​មិន​អាច​ពន្យល់​វា​តាម​វិធី​ផ្សេង​បាន​ទេ»។ វាមិនមែនជាលើក ទីមួយទេដែលប្រហោងខ្មៅបានជួយបញ្ជាក់ពីទ្រឹស្ដីដ៏ធំរបស់ Einstein ដែលត្រូវបានគេស្គាល់ ថាជាទំនាក់ទំនងទូទៅ។ រូបថតដំបូងនៃប្រហោងខ្មៅដែលត្រូវបានថតនៅឆ្នាំ 2019 ពីមុនបាន ពង្រឹងការសន្មត់ស្នូលរបស់អ្នករូបវិទ្យាបដិវត្តន៍ដែលថា ទំនាញគឺគ្រាន់តែជាបញ្ហាដែលបត់ ក្រណាត់ពេលវេលាអវកាសប៉ុណ្ណោះ។ការទស្សន៍ទាយផ្សេងទៀតជាច្រើនរបស់ Einstein បានប្រែក្លាយទៅជាត្រឹមត្រូវក្នុងរយៈពេលជាច្រើនឆ្នាំ ក្នុងចំណោមនោះ រលកទំនាញ និងដែនកំណត់ល្បឿនសកល។ “ ប្រហោងខ្មៅដែលគេសង្កេតឃើញគឺស្ថិតនៅក្នុងប្រព័ន្ធមួយហៅថា MAXI J1820+070 ដែលត្រូវបាន បង្កើតឡើងដោយផ្កាយតូចជាងព្រះអាទិត្យ ហើយប្រហោងខ្មៅផ្ទាល់ត្រូវបានប៉ាន់ស្មានថា មានម៉ាស់ព្រះអាទិត្យពី 7 ទៅ 8 ។ ក្រុមតារាវិទូបានប្រើតេឡេស្កុប NuSTAR និង NICER ដែលមានមូលដ្ឋាន លើលំហរបស់ NASA ដើម្បីប្រមូលទិន្នន័យ និងស្វែងយល់ពីរបៀបដែលឧស្ម័នក្តៅ ហៅថាប្លាស្មា ពីផ្កាយត្រូវបានស្រូបចូលទៅក្នុងប្រហោងខ្មៅ៕

(តៃប៉ិ)៖ ប្រធានាធិបតីថ្មីកោះតៃវ៉ាន់ លោក ឡៃ ឈីងតេ បានស្នើឱ្យចិនបញ្ឈប់ការគំរាមកំហែង ផ្នែកយោធា និងនយោបាយរបស់ខ្លួន ដោយបាននិយាយនៅក្នុងសន្ទរកថារបស់លោកថា សន្តិភាពគឺ ជាជម្រើសតែមួយគត់ ហើយថា ទីក្រុងប៉េកាំងត្រូវតែគោរពជម្រើសរបស់ប្រជាជនតៃវ៉ាន់។លោក ឡៃ ថ្លែងទៅកាន់ហ្វូងមនុស្សនៅខាងក្រៅការិយាល័យប្រធានាធិបតីនៅកណ្តាលទីក្រុងតៃប៉ិ បានអំពាវនាវម្តងហើយម្តងទៀតសម្រាប់កិច្ចពិភាក្សាជាមួយប្រទេសចិន ដែលចាត់ទុកកោះប្រជា ធិបតេយ្យ ឲជាទឹកដីរបស់ខ្លួន ហើយមិនដែលបោះបង់ការប្រើប្រាស់កម្លាំងដើម្បីនាំយកតៃវ៉ាន់ មកនៅក្រោមការគ្រប់គ្រងរបស់ទីក្រុងប៉េកាំងនោះទេ។លោកបាននិយាយថា ខ្ញុំក៏ចង់ជំរុញឱ្យប្រទេសចិនបញ្ឈប់ការបំភិតបំភ័យតៃវ៉ាន់ទាំងផ្នែកនយោបាយ និងយោធា ហើយទទួលយកការទទួលខុសត្រូវជាសកលជាមួយតៃវ៉ាន់ ក្នុងការខិតខំរក្សាសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ និងក្នុងតំបន់ ដើម្បីធានាថាពិភពលោកគ្មានការភ័យខ្លាច។ តៃវ៉ាន់បានប្រឈមមុខនឹងសម្ពាធពីប្រទេសចិន រួមទាំងសកម្មភាពកងទ័ពអាកាស និងកងទ័ពជើងទឹកជា ប្រចាំនៅជិតកោះនេះ ចាប់តាំងពីជ័យជម្នះក្នុងការបោះឆ្នោតដោយលោក Lai ដែលត្រូវបានគេស្គាល់ជា ទូទៅដោយឈ្មោះជា ភាសាអង់គ្លេសរបស់គាត់គឺ William ។លោក Lai ដែលមានអាយុ 64 ឆ្នាំដែលបានចូលកាន់ដំណែងពីលោកស្រី Tsai Ing-wen ដែលបាន បម្រើការជាអនុប្រធានាធិបតីរបស់លោកស្រីអស់រយៈពេល 4 ឆ្នាំមកហើយបាននិយាយថា ប្រជាជនត្រូវតែមានភាពប្រាកដនិយមចំពោះការគំរាមកំហែងហើយតៃវ៉ាន់ត្រូវតែបង្ហាញពីការប្តេជ្ញាចិត្តដើម្បីការពារខ្លួន។លោកបានមានប្រសាសន៍ថា “បងប្អូនជនរួមជាតិ យើងមានឧត្តមគតិក្នុងការស្វែងរកសន្តិភាព ប៉ុន្តែយើងមិនត្រូវមានការបំភាន់ឡើយ”។ប្រធានាធិបតីថ្មីរូបនេះបានប្តេជ្ញាម្តងហើយម្តងទៀតថានឹងរក្សា "ស្ថានភាព" នៅលើច្រកសមុទ្រ តៃវ៉ាន់ ដែលមានន័យថារក្សាអធិបតេយ្យភាពរបស់តៃវ៉ាន់ខណៈពេលដែលមិនប្រកាសឯករាជ្យជាផ្លូវការ៕

(អន្តរជាតិ)៖ ប្រព័ន្ធផ្សព្វផ្សាយ ranian បានបញ្ជាក់ពីការស្លាប់របស់ប្រធានាធិបតីអ៊ីរ៉ង់ Ebrahim Raisi អាយុ 63 ឆ្នាំ និងរដ្ឋមន្ត្រីការបរទេស Hossein Amir Abdollahian បន្ទាប់ពីធ្លាក់ឧទ្ធម្ភាគចក្រនៅក្នុងខេត្តភ្នំភាគខាងកើតនៃប្រទេស Azerbaijan ។ប្រព័ន្ធផ្សព្វផ្សាយរដ្ឋអ៊ីរ៉ង់ Press TV និងភ្នាក់ងារសារព័ត៌មានពាក់កណ្តាលផ្លូវការ Tasnim និង Mehr បានរាយការណ៍ថា អ្នកនៅលើយន្តហោះទាំងអស់ត្រូវបានបញ្ជាក់ថាស្លាប់។រ៉យទ័រក៏បានរាយការណ៍ពីការស្លាប់របស់ប្រធានាធិបតីផងដែរដោយដកស្រង់សម្តីមន្ត្រីជាន់ខ្ពស់។មន្ត្រីរូបនេះបានប្រាប់រ៉យទ័រ ដោយសុំមិនបញ្ចេញឈ្មោះ ព្រោះតែភាពរសើបនៃបញ្ហានេះថា "ប្រធានាធិបតី Raisi រដ្ឋមន្ត្រីការបរទេស និងអ្នកដំណើរទាំងអស់នៅក្នុងឧទ្ធម្ភាគចក្របានស្លាប់នៅក្នុងហេតុការណ៍ធ្លាក់នេះ។សារព័ត៌មានរដ្ឋអ៊ីរ៉ង់ IRIB បានរាយការណ៍ថា ប្រធានអឌ្ឍចន្ទក្រហមអ៊ីរ៉ង់ លោក Pir-Hossein Kolivand បាននិយាយនៅព្រឹកថ្ងៃចន្ទនេះថា មិនមានសញ្ញានៃអាយុជីវិតរបស់អ្នកដែលធ្វើដំណើរលើឧទ្ធម្ភាគចក្រនោះទេ។មន្ត្រីអ៊ីរ៉ង់បាននិយាយកាលពីថ្ងៃអាទិត្យថា ឧទ្ធម្ភាគចក្រដែលដឹកមនុស្សប្រាំបួននាក់បានជួបបញ្ហាក្នុងអ័ព្ទខ្លាំង ខណៈពេលដែលត្រឡប់ពីការធ្វើដំណើរទៅកាន់ព្រំដែនអ៊ីរ៉ង់-អាស៊ែបៃហ្សង់។ឧប្បត្តិហេតុធ្លាក់យន្តហោះនេះបានជំរុញឱ្យប្រតិបត្តិការស្វែងរក និងជួយសង្គ្រោះរយៈពេលជាច្រើនម៉ោង ដោយមានជំនួយពីសហភាពអឺរ៉ុប និងទួរគី ក្នុងចំណោមប្រទេសផ្សេងទៀត ប៉ុន្តែក្រុមសង្គ្រោះបន្ទាន់ត្រូវបានរារាំងដោយអ័ព្ទ និងសីតុណ្ហភាពធ្លាក់ចុះ៕

(ភ្នំពេញ)៖ នៅព្រឹកនេះ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ក្នុងឱកាសនៃ ទិវាជាតិនៃការចងចាំ ២០ ឧសភា បានបង្ហោះសារដូច្នេះថា៖ «ថ្ងៃនេះ ជាទិវាជាតិនៃការចងចាំ ២០ ឧសភា ! ថ្ងៃនេះ ជាថ្ងៃទិវាជាតិនៃការចងចាំ ២០ ឧសភា ដែលជាថ្ងៃប្រជាជនកម្ពុជាគ្រប់ៗរូបចងចាំមិនអាចបំភ្លេចបាន ក្នុងរបបកម្ពុជាប្រជាធិបតេយ្យ ឬហៅថារបបប្រល័យពូជសាសន៍ ប៉ុល ពត (១៧ មេសា ១៩៧៥ - ៦ មករា ១៩៧៩) ដែលជារបបដ៏ឃោរឃៅ និងខ្មៅងងឹត ។ ទិវានេះ ជាការរំលឹកដល់វិញ្ញាណក្ខន្ធដល់ជនរងគ្រោះជាង ៣លាននាក់ ដែលបានស្លាប់បាត់បង់ជីវិត នៅក្នុងរបបប្រល័យពូជសាសន៍ ប៉ុល ពត ។ ប្រជាពលរដ្ឋកម្ពុជាភាគច្រើនលើសលប់បានដឹង និងបានយល់ច្បាស់ អំពីរឿងរ៉ាវសោកនាដកម្មដ៏ជូរចត់ ដែលប្រជាពលរដ្ឋខ្មែរបានឆ្លងកាត់ជិត៣ទសវត្សរ៍ ក្នុងភ្នក់ភ្លើងសង្គ្រាម និងទឹកភ្នែក ការកាប់សម្លាប់ ការបំផ្លិចបំផ្លាញ ការជម្លៀសចេញពីទីលំនៅរបស់ខ្លួនដោយបង្ខំ និងការបង្ខំឱ្យធ្វើការដូចសត្វធាតុជាដើម។ មិនតែប៉ុណ្ណោះ ប្រជាពលរដ្ឋកម្ពុជា ត្រូវស្លាប់ដោយគ្មានថ្នាំសង្កូវព្យាបាល គ្មានអាហារបរិភោគគ្រប់គ្រាន់ គ្មានសិទ្ធិសេរីភាព គ្មានលទ្ធិប្រជាធិបតេយ្យ ហើយសូម្បីតែសិទ្ធិរស់រានមានជីវិតដែលជាសិទ្ធិមូលដ្ឋានមានពីកំណើតរបស់មនុស្សក៏គ្មានដែរ។ ដើម្បីកុំអោយរបបនេះវិលត្រឡប់មកវិញ ចូលរួមថែរក្សាការពារសន្តិភាពឱ្យបានគង់វង្ស ពីព្រោះសន្តិភាពបានផ្តល់ឱកាសគ្រប់យ៉ាងក្នុងការកសាងសង្គមគ្រួសារ សហគមន៍ និងប្រទេសជាតិ ឱ្យកាន់តែរីកចម្រើនទៅមុខទៀត»៕

(ភ្នំពេញ)៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា អនុញ្ញាតឱ្យ លោកជំទាវបណ្ឌិត ដេវីយ៉ានី អ៊ុតាំ ខូប្រាហ្គេត (Devyani Uttam Khobragade )  ឯកអគ្គរដ្ឋទូតឥណ្ឌាប្រចាំព្រះរាជាណាចក្រកម្ពុជា ចូលជួបសម្ដែងការគួរសម និងពិភាក្សាការងារ នៅវិមានព្រឹទ្ធសភា រាជធានីភ្នំពេញ នាព្រឹកថ្ងៃចន្ទ ១៣ កើត ខែពិសាខ ឆ្នាំរោង ឆស័ក ពុទ្ធសករាជ ២៥៦៧ ត្រូវនឹងថ្ងៃទី២០ ខែឧសភា ឆ្នាំ២០២៤៕

(ភ្នំពេញ)៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា អនុញ្ញាតឱ្យ ឯកឧត្តម Martin Vavra ឯកអគ្គរដ្ឋទូតសាធារណរដ្ឋឆែក ប្រចាំកម្ពុជា ចូលជួបសម្ដែងការគួរសម និងពិភាក្សាការងារ នៅវិមានព្រឹទ្ធសភា នាព្រឹកថ្ងៃចន្ទ ១៣ កើត ខែពិសាខ ឆ្នាំរោង ឆស័ក ពុទ្ធសករាជ ២៥៦៧ ត្រូវនឹងថ្ងៃទី២០ ខែឧសភា ឆ្នាំ២០២៤៕

(កំពង់ស្ពឺ)៖ នាព្រឹកថ្ងៃអាទិត្យ ១២ កើត ខែពិសាខ ឆ្នាំរោង ឆស័ក ព.ស. ២៥៦៧ ត្រូវនឹងថ្ងៃទី១៩ ខែឧសភា ឆ្នាំ២០២៤ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងាររាជដ្ឋាភិបាលចុះជួយខេត្តកំពង់ស្ពឺ អមដំណើរដោយ ឯកឧត្តមកិត្តិសេដ្ឋាបណ្ឌិត ឆាយ ថន ប្រធានកិត្តិយសក្រុមការងារគណបក្សប្រជាជនកម្ពុជាចុះជួយមូលដ្ឋានខេត្តកំពង់ស្ពឺ បានអញ្ជើញជាអធិបតីក្នុងពិធីសម្ពោធសមិទ្ធនានាក្នុងវត្តសុខារាម ស្ថិតក្នុងភូមិបាត់ដឹង សង្កាត់ក្សេមក្សាន្ត ក្រុងឧដុង្គម៉ែជ័យ ខេត្តកំពង់ស្ពឺ។ ឯកឧត្តម វ៉ី សំណាង បានរាយការណ៍ជូនគណៈអធិបតីដឹងថា សមិទ្ធផលដែលត្រូវដាក់ឱ្យសម្ពោធនៅថ្ងៃនេះរួមមាន សាលាបុណ្យ ក្លោងទ្វារ បន្ទប់ទឹក ជួសជុលដំបូលព្រះវិហារ និងកសាងហេដ្ឋារចនាសម្ព័ន្ធនានាក្នុងបរិវេណវត្ត ដែលបានចំណាយថវិកាសរុបប្រមាណ ប្រាំសែនដុល្លារ។ សមិទ្ធផលទាំងអស់នេះ កើតចេញពីការខិតខំប្រឹងប្រែងរបស់ព្រះគ្រូចៅអធិការ ព្រះថេរានុថេរៈ ប្រជាពុទ្ធបរិស័ទចំណុះជើងវត្ត និងសប្បុរសជនក្នុង និងក្រៅប្រទេសដែលបានគៀរគរថវិកាដើម្បីកសាងសំណង់បូជនីយដ្ឋានទុកជាទីសក្ការៈ និងសម្រាប់ប្រើប្រាស់ជាឧត្តមប្រយោជន៍សម្រាប់វិស័យព្រះពុទ្ធសាសនាក្នុងខេត្ត។មានមតិសំណេះសំណាលក្នុងពិធីនោះ ឯកឧត្តមឧបនាយករដ្ឋមន្រ្តីសូមចូលរួមអបអរសាទរ ជាមួយព្រះតេជគុណព្រះសង្ឃគ្រប់ព្រះអង្គ លោកយាយលោកតា អ៊ុពូមីង បងប្អូន នូវសមិទ្ធផលថ្មីដែលជាការរួបរួមសាមគ្គីពីប្រជាពុទ្ធបរិស័ទក្នុង និងក្រៅប្រទេសបានកសាងទុកជាឧត្តមប្រយោជន៍សម្រាប់ការប្រណិបតន៍ព្រះពុទ្ធសាសនាក្នុងមូលដ្ឋាន។ ជាមួយគ្នានេះ ឯកឧត្តមក៏បានរំឭកនូវអនុស្សាវរីយ៍ល្អៗជាច្រើនដែលលោកធ្លាប់បានមកធ្វើការក្នុងនាមជាក្រុមការងារគណបក្សចុះជួយស្រុកឧដុង្គ និងខេត្តកំពង់ស្ពឺ ជាពិសេសការទទួលបានការស្វាគមន៍ ញញឹមរាក់ទាក់ និងស្រលាញ់រាប់អានយ៉ាងស្និទស្នាលបំផុតពីសំណាក់ក្រុមការងារមូលដ្ឋាន ក៏ដូចជាប្រជាពលរដ្ឋទូទាំងខេត្តដែលបានចាត់ទុកលោកជាកូនក្មួយ និងប្អូន។ ជាមួយគ្នានោះដែរ ឯកឧត្តម ហ៊ុន ម៉ានី ក៏បានលើកឡើងផងដែរថា កត្តាសុខសន្តិភាពបាននាំមកនូវការអភិវឌ្ឍ និងឱកាសជាច្រើនដល់បងប្អូនប្រជាពលរដ្ឋ។ និយាយដោយឡែក សម្រាប់ខេត្តកំពង់ស្ពឺរបស់យើង សន្តិភាពបានប្រែមុខមាត់ខេត្តពីតំបន់ជម្លោះប្រដាប់អាវុធ មកជាតំបន់ប្រកបដោយសក្តានុពលសម្រាប់ការអភិវឌ្ឍវិស័យឧស្សាហកម្ម និងមជ្ឈមណ្ឌលភស្តុភារកម្ម។ ជាចុងក្រោយ ឯកឧត្តមបានថ្លែងអំណរគុណសារជាថ្មីម្តងទៀត ជូនដល់បងប្អូនប្រជាពលរដ្ឋគ្រប់ទិសទីដែលបានរួបរួមគ្នាជាធ្លុងមួយ ក្នុងការគាំទ្រគម្រោងព្រែកជីកហ្វូណនតេជោ ដែលជាគម្រោងហេដ្ឋរចនាសម្ព័ន្ធដ៏មានសារៈសំខាន់សម្រាប់ជាតិក្នុងការអភិវឌ្ឍសេដ្ឋកិច្ចលើគ្រប់វិស័យ។ សូមបញ្ជាក់ថា វត្តសុខារាម ត្រូវបានកសាងឡើងលើកដំបូងក្នុងទសវត្សរ៍ទី៦០ និងត្រូវបានសម្តេចព្រះសង្ឃរាជ ជួន ណាត ប្រទាននាមថា វត្តសុខារាម។ ក្នុងរបបប្រល័យពូជសាសន៍ ខ្មែរក្រហម វត្តត្រូវបានបំផ្លិចបំផ្លាញស្ទើរតែទាំងស្រុង។ ដោយសារការរួបរួមសាមគ្គីពីព្រះគ្រូចៅអធិការ ប្រជាពុទ្ធបរិស័ទជិតឆ្ងាយ ចូលរួមកសាងវត្តជាបន្តបន្ទាប់ រហូតមានហេដ្ឋរចនាសម្ព័ន្ធ សំណង់បូជនីយដ្ឋាននានាបានកើតឡើងជាច្រើនប្រកបដោយសោភ័ណភាពល្អប្រពៃ។

(ញូវដែលី)៖ ការិយាល័យអាកាសធាតុរបស់ប្រទេសឥណ្ឌាបានព្រមានថា ប្រទេសនេះកំពុងប្រឈម មុខនឹងរលកកំដៅទីពីររបស់ខ្លួនក្នុងរយៈពេលបីសប្តាហ៍ រួមទាំងនៅតំបន់ដែលមនុស្សរាប់ លាននាក់ត្រូវបាន កំណត់ទៅបោះឆ្នោត ក្នុងការបោះឆ្នោតរយៈពេលប្រាំមួយសប្តាហ៍។រដ្ឋ Uttar Pradesh, West Bengal, Maharashtra និងរដ្ឋ Jharkhand ដែលរដ្ឋទាំងអស់នឹងរៀបចំការបោះឆ្នោត នៅថ្ងៃចន្ទអាចរំពឹងថា នឹងឃើញស្ថានភាពរលកកំដៅ "មធ្យម" រួមទាំងសីតុណ្ហភាពប្រហែល 40 អង្សាសេ។ នាយកដ្ឋានឧតុនិយមឥណ្ឌាបានព្រមានអំពី "ការព្រួយបារម្ភអំពីសុខភាពកម្រិតមធ្យម" សម្រាប់ទារក មនុស្សចាស់ និងអ្នកដែលមានជំងឺរ៉ាំរ៉ៃ ហើយបានណែនាំអ្នករស់នៅក្នុងរដ្ឋទាំងនោះឱ្យជៀសវាងកំដៅ៕

(អន្តរជាតិ)៖ រដ្ឋមន្ត្រីក្រសួងមហាផ្ទៃបាននិយាយថា ជនសង្ស័យម្នាក់ដែលត្រូវបានឃាត់ខ្លួន ពីបទបាញ់ នាយករដ្ឋមន្ត្រីស្លូវ៉ាគី លោក Robert Fico គឺជាអ្នកនិពន្ធអាយុ 71 ឆ្នាំមកពីអឺរ៉ុបកណ្តាល បន្ទាប់ពី ប្រព័ន្ធផ្សព្វផ្សាយបានកំណត់អត្តសញ្ញាណបុរសនោះ។រដ្ឋមន្ត្រីមហាផ្ទៃ លោក Matus Sutaj Estok បានប្រាប់អ្នកយកព័ត៌មានថា ជនសង្ស័យសក់ស្កូវម្នាក់ ត្រូវបានគេមើលឃើញថាត្រូវបានប៉ូលីសវាយខ្នោះដៃ បន្ទាប់ពី លោក Fico ត្រូវបានបាញ់ជាច្រើនដង បន្ទាប់ពីកិច្ចប្រជុំរដ្ឋាភិបាលនៅទីក្រុង Handlova ។ ក្រុមមន្ត្រីបាននិយាយថា លោក Fico ដែលជា នាយករដ្ឋមន្ត្រីប្រជានិយមកំពុងស្ថិតក្នុងស្ថានភាពធ្ងន់ធ្ងរដែលអាចគំរាមកំហែងដល់ជីវិត។ របាយការណ៍ប្រព័ន្ធផ្សព្វផ្សាយបាននិយាយថា ជនសង្ស័យគឺជាស្ថាបនិកនៃក្លឹបអក្សរសាស្ត្រ DUHA (Rainbow) និងមកពីទីក្រុង Levice និងជាសមាជិកនៃសមាគមអ្នកនិពន្ធស្លូវ៉ាគីផ្លូវការ។សមាគមបានបញ្ជាក់តាមបណ្ដាញសង្គមហ្វេសប៊ុកថា បុរសរូបនេះបានចូលជាសមាជិកតាំងពីឆ្នាំ ២០១៥ ដោយបន្ថែមថា ប្រសិនបើអត្តសញ្ញាណរបស់គាត់ជាជនសង្ស័យត្រូវបានគេបញ្ជាក់ថា «សមាជិកភាពរបស់ជន នេះនឹងត្រូវលុបចោលភ្លាមៗ»។កូនប្រុសរបស់ជនសង្ស័យបានប្រាប់គេហទំព័រព័ត៌មានស្លូវ៉ាគី aktuality.sk ថា គាត់ពិតជាមិនដឹងថា ឪពុកកំពុងគិតអ្វី គាត់បានគ្រោងទុកអ្វី ហេតុអ្វីវាកើតឡើងទេ។ គាត់បាននិយាយថា ឪពុករបស់គាត់គឺជាម្ចាស់កាំភ្លើងដែលបានចុះឈ្មោះស្របច្បាប់៕

នាយកវិទ្យាស្ថានពហុបច្ចេកទេសកម្ពុជា (NPIC) ឯកឧត្តមបណ្ឌិត ប៊ុន ភារិន បានគូសបញ្ជាក់ថា សិស្សក្នុងជំហានទី១នៃកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥លាននាក់ បាននិងកំពុងសម្រេចបានតាមអភិក្រមរបស់សម្តេចមហាបវរធិបតី ហ៊ុន ម៉ាណែត គឺ “រៀនឱ្យចប់ រៀនឱ្យចេះ ឲ្យមានការងារធ្វើ” ពោលគឺសិស្សដែលបានទទួលការបណ្តុះបណ្តាល ជំនាញនៅវិទ្យាស្ថានពហុបច្ចេកទេសកម្ពុជាក្នុងរយៈពេលបួនខែមកនេះ បាននិងកំពុងចេញហាត់ការ នៅតាមក្រុមហ៊ុន សហគ្រាសនានា និងបានធ្វើតេស្តសមត្ថភាពបញ្ចប់ការសិក្សាទៅតាមជំនាញរៀងៗខ្លួន ដើម្បីយកទៅប្រើប្រាស់ក្នុងទីផ្សារការងារ។ ការគូសបញ្ជាក់របស់នាយកវិទ្យាស្ថានពហុបច្ចេកទេសកម្ពុជា (NPIC)ដូចនេះ គឺក្នុងពេលដែលអ្នក សារព័ត៌មានចំនួន២០នាក់មកពី១០ស្ថាប័នបានចុះធ្វើទស្សនកិច្ចផ្ទាល់នៅវិទ្យាស្ថានពហុបច្ចេកទេសកម្ពុជា នាថ្ងៃទី១៧ ខែឧសភា ឆ្នាំ២០២៤ ដើម្បីស្វែងយល់និងយកព័ត៌មានផ្ទាល់ពីសិស្ស និងគ្រូបណ្តុះបណ្តាល ជំនាញក្នុងកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥លាននាក់។ ឯកឧត្តមបណ្ឌិត ប៊ុន ភារិន ជឿជាក់ថា ការមកមើលឃើញ ផ្ទាល់ភ្នែកដូចនេះ គឺអ្នកសារព័ត៌មាននឹងអាចផ្សព្វផ្សាយពីតថភាព និងគុណតម្លៃនៃជំនាញនីមួយៗ កាន់តែច្បាស់និងទូលំទូលាយទៅដល់ប្រជាពលរដ្ឋ ជាពិសេសនឹងអាចជម្រុញដល់យុវជនដែលពុំទាន់មានជំនាញច្បាស់លាស់មកចុះឈ្មោះចូលរៀនកាន់តែច្រើននៅវិទ្យាស្ថានជាតិពហុបច្ចេកទេសកម្ពុជា (NPIC) ដែលជាគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈដ៏ធំមួយ បង្កើតឡើងក្នុងឆ្នាំ២០០៥ ស្ថិតនៅក្រោមក្រសួងការងារ និងបណ្តុះបណ្តាល វិជ្ជាជីវៈ។  ទន្ទឹមនេះ រដ្ឋលេខាធិការ និងជាអ្នកនាំពាក្យនៃក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម កត្តា អ៊ន  ក៏ជឿជាក់ដែរថា តាមរយៈដំណើរទស្សនកិច្ចរបស់អ្នកសារព័ត៌មាននៅវិទ្យាស្ថានពហុបច្ចេកទេសកម្ពុជា នាពេលនេះ គឺជាឱកាសដ៏ល្អសម្រាប់អ្នកសារព័ត៌មានបានប្រមូលព័ត៌មាន និងមើលឃើញផ្ទាល់ភ្នែកនូវការ អនុវត្តកម្មវិធី បណ្តុះបណ្តាល អគារសិក្សា បន្ទប់ពិសោធន៍ រោងជាង និងស្នាដៃរបស់សិស្សផ្ទាល់តែម្តង។ ជាពិសេសអ្នកសារព័ត៌មាន ក៏បានកត់សម្គាល់នូវឥរិយាបទ សីលធម៌ សុជីវធម៌ល្អ របស់សិស្ស នៃវិទ្យាស្ថាន ពហុបច្ចេកទេស កម្ពុជានេះផងដែរ។  ឯកឧត្តម កត្តា អ៊ន រំពឹងថាអ្នកសារព័ត៌មាន និងប្រព័ន្ធផ្សព្វផ្សាយនឹងចូលរួមយ៉ាងសំខាន់ក្នុងការផ្តល់ដំណឹង និងព័ត៌មានទៅដល់ប្រជាពលរដ្ឋ ជាពិសេសយុវជន អំពីកម្មវិធី បណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារ ងាយរងហានិភ័យនៅទូទាំង ប្រទេសចំនួន ១,៥លាននាក់ ដែលមានក្រសួងការងារ និងបណ្តុះបណ្តាលវិជ្ជាជីវៈ ជាសេនាធិការអនុវត្តកម្មវិធីថ្នាក់ជាតិនេះ ឲ្យទទួល បាន ជោគជ័យ។ ឯកឧត្តម កត្តា អ៊ន លើកទឹកចិត្តដល់យុវជនដែលពុំទាន់មានជំនាញច្បាស់លាស់ គួរចាប់ យក ឱកាសចូលរៀនវគ្គជំនាញខ្លីដែលរាជរដ្ឋាភិបាល ផ្តល់ជូន ដោយមិនបង់ថ្លៃសិក្សានេះ និងថែមទាំងទទួលបាន នូវប្រាក់ ឧបត្ថម្ភប្រចាំខែចំនួន ២៨ម៉ឺនរៀលពេល កំពុង សិក្សា ទៀតផងសម្រាប់យុវជនមកពីគ្រួសារក្រីក្រ និងគ្រួសារ ងាយរងហានិភ័យ។ សូមបញ្ជាក់ថា ក្រសួងការងារ និងបណ្តុះបណ្តាលវិជ្ជាជីវៈ ក្នុងនាមជា សេនាធិការរបស់រាជរដ្ឋាភិបាល ក្នុងការអនុវត្ត កម្មវិធី បណ្តុះ បណ្តាលជំនាញវិជ្ជាជីវៈ និងបច្ចេកទេសដើម្បីសម្រេចបាន នូវ អភិក្រម “រៀនឱ្យចប់ រៀនឱ្យចេះ ឲ្យមានការងារធ្វើ” បានកំណត់វិស័យសំខាន់ៗចំនួន១០ និងមុខជំនាញចំនួន៣៨ ដែលសុទ្ធសឹងតែជាតម្រូវការទីផ្សារ និងមានឱកាសការងារខ្ពស់។ វិស័យ អាទិភាពទាំង១០ ដែលបានជ្រើសរើស រួមមាន សំណង់ , អគ្គិសនីនិងថាមពល, អេឡិចត្រូនិក, បរិក្ខារត្រជាក់និងកម្ដៅ, កម្មន្តសាល, មេកានិកទូទៅ/មេកានិករថយន្ត, ទេសចរណ៍, សេវាកម្ម, កសិកម្ម និង កសិ- ឧស្សាហកម្ម, និង ធុរកិច្ចនិងព័ត៌មានវិទ្យា។ក្នុងអំឡុងពេលសិក្សា ក្រុមយុវជនគោលដៅ ដែល ចូល រួម កម្មវិធី បណ្តុះ បណ្តា ល នេះ នឹង ទទួលបាននូវ អត្ថប្រយោជន៍ជាច្រើន រួមមាន៖ (១).សិក្សាដោយមិនបង់ថ្លៃ, (២).ប្រាក់ឧបត្ថម្ភប្រចាំខែចំនួន ២៨ម៉ឺនរៀលក្នុងមួយខែ សម្រាប់អ្នកសិក្សាពេញម៉ោង, (៣).ផ្តល់ប្រឹក្សាយោបល់ពីការជ្រើសរើសជំនាញ និងព័ត៌មានទីផ្សារការងារ, (៤).កន្លែងចុះកម្មសិក្សានៅតាមសហគ្រាស គ្រឹះស្ថាន ឧស្សាហកម្ម និងក្រុមហ៊ុនឯកជន, (៥).សញ្ញាបត្របច្ចេកទេស និងវិជ្ជាជីវៈ១ និងឱកាសបន្តការសិក្សា, (៦).ជំនាញមួយពិតប្រាកដដែលទីផ្សារការងារកំពុងត្រូវការ, (៧).ឱកាសការងារធ្វើសមរម្យ និងប្រាក់ចំណូលទៀងទាត់។ដើម្បីចូលរៀនក្នុងកម្មវិធីនេះ យុវជនគោលដៅត្រូវ បំពេញ លក្ខខណ្ឌ មួយ ចំនួន រួមមាន ៖ (១).ជាយុវជន មកពីគ្រួសារក្រីក្រ និងគ្រួសារងាយរងហានិភ័យ, (២).មានអាយុចាប់ពី១៥ឆ្នាំឡើង, (៣).មានអត្តសញ្ញាណបណ្ណ សញ្ជាតិ ខ្មែរ ឬ សំបុត្រ កំណើត, និង (៤). មានបណ្ណ សមធម៌ (កម្រិតភាពក្រីក្រ១ និងក្រីក្រ២) ឬ បណ្ណ សម្គាល់ គ្រួសារ ងាយ រង ហានិភ័យ ។សម្រាប់អ្នកមានបំណងចុះឈ្មោះចូលរៀន និងស្វែងរកព័ត៌មាននៃវគ្គ សិក្សាជំនាញបណ្តុះបណ្តាលវិជ្ជាជីវៈ និងបច្ចេកទេស អាចចូលតាមរយៈ ទី(១). ប្រព័ន្ធឌីជីថល ដែលមានលើកម្មវិធីទូរស័ព្ទដៃ (TVET 1.5M) រឺតាមរយៈគេហទំព័រ www.tvet.gov.kh (http://www.tvet.gov.kh/)។ និងទី(២). តាមបណ្តាគ្រឹះស្ថានអប់រំបណ្ដុះបណ្ដាល បច្ចេកទេស និងវិជ្ជាជីវៈទូទាំង ប្រទេស។ ដើម្បីចូលរៀនក្នុងកម្មវិធីនេះ យុវជនគោលដៅ ត្រូវ បំពេញ លក្ខខណ្ឌ មួយ ចំនួន រួមមាន ៖ (១).ជាយុវជន មកពីគ្រួសារក្រីក្រ និងគ្រួសារងាយរងហានិភ័យ, (២).មានអាយុចាប់ពី១៥ឆ្នាំឡើង, (៣).មានអត្តសញ្ញាណបណ្ណ សញ្ជាតិ ខ្មែរ ឬ សំបុត្រ កំណើត, និង (៤). មានបណ្ណ សមធម៌ (កម្រិតភាពក្រីក្រ១ និងក្រីក្រ២) ឬ បណ្ណ សម្គាល់ គ្រួសារ ងាយ រង ហានិភ័យ ៕