(ភ្នំពេញ)៖ កម្មករនិយោជិតបានលើកឡើងថារាជរដ្ឋាភិបាលកម្ពុជាអាណត្តិទី៧នេះ បានបន្តផ្តល់អត្ថប្រយោជន៍ជាច្រើនដល់កម្មករនិយោជិត ក្នុងការលើកកម្ពស់សិទ្ធិ និងជីវភាពរបស់ពួកគេ ខណៈលក្ខខណ្ឌការងារនៅក្នុងរោងចក្រសហគ្រាសមានភាពល្អប្រសើរ និងមានការយកចិត្តទុកដាក់ខ្ពស់ពីសំណាក់រាជរដ្ឋាភិបាលកម្ពុជាចំពោះសុខទុក្ខកម្មករ។លោកស្រី នុត ស្រីមុំ ដែលជាកម្មការិនីបម្រើការងារនៅរោងចក្រ Sabrina បានលើកឡើងថាក្រោយពីមានយន្តការគាំពារដល់កម្មករិនីរោងចក្រដែលមានផ្ទៃពោះមក កម្មការិនីរូបនេះអាចចេញមុនម៉ោងចំនួន២៥នាទី និងទទួលបានប្រាក់ឧបត្ថម្ភទៅពិនិត្យសុខភាពម្តងចំនួន៨ម៉ឺនរៀល, ប្រាក់ឧបត្ថម្ភក្រោយពេលសម្រាលចំនួន៥០%ពីរោងចក្រ និង៧០ភាគរយពីរាជរដ្ឋាភិបាល ក្នុងនោះក៏មានប្រាក់ឧបត្ថម្ភចំនួន៨០ម៉ឺនរៀលពីសម្តេចតេជោអតីតនាយករដ្ឋមន្រ្តីផងដែរ។លោកស្រីបន្ថែមថា ខ្លួនក៏ទទួលបានអត្ថប្រយោជន៍ជាច្រើនទៀតពីរោងចក្រផងដែរ ក្នុងនោះមានការផ្តល់អាហារថ្ងៃត្រង់ដោយឥតគិតថ្លៃចំនួនមួយពេល និងមានកន្លែងអាហារដ្ឋានសមរម្យទៀតផង។ ទាំងអស់នេះបង្ហាញយ៉ាងច្បាស់ពីការគិតគូររបស់រាជរដ្ឋាភិបាលមកលើកម្មករនិយោជិត ជាពិសេសកម្មការិនីដែលមានផ្ទៃពោះ។  ចំណែកលោកស្រី ឃុន ដាវី ដែលជាកម្មការិនីនៅរោងចក្រ WANLIN-ZONGHENG (CAMBODIA) បានលើកឡើងថា នៅក្នុងរោងចក្របច្ចុប្បន្ននេះមានលក្ខខណ្ឌការងារល្អ កន្លែងការងារមានសុវត្តិភាព មានបរិយាកាសការងារល្អ ស្រួលធ្វើការ ដែលអាចធ្វើឱ្យខ្លួនមានផលិតភាពការងារ ទទួលបានប្រាក់ចំណូលសមរម្យ។ លោកស្រីបន្ថែមថា កម្មករនិយោជិតទាំងអស់មានប័ណ្ណ ប.ស.ស. ប្រើប្រាស់គ្រប់គ្នា ដែលកម្មករអាចទៅប្រើប្រាស់សេវាពិនិត្យ និងព្យាបាលជំងឺបានដោយឥតគិតថ្លៃ ដែលទាំងនេះគឺជាការចូលរួមចំណែកយ៉ាងសំខាន់លើជីវភាពរបស់កម្មករ កាត់បន្ថយចំណាយផងលើថ្លៃថែទាំសុខភាពផងដែរ។ លោកឧកញ្ញា សុខ ពិសិដ្ឋ ប្រធានសហព័ន្ធនិយោជក និងសមាគមពាណិជ្ជកម្មកម្ពុជាបានលើកឡើងថា ក្នុងចំណោមអ្វីដែលរដ្ឋាភិបាលបានធ្វើដើម្បីបម្រើផលប្រយោជន៍កម្មករនិយោជិតលោកចាប់អារម្មណ៍ការដាក់ឱ្យអនុវត្តជាផ្លូវការការបណ្តុះបណ្តាលជំនាញវិជ្ជាជីវៈ និងបច្ចេកទេស ពីព្រោះកម្មវិធីបណ្តុះបណ្តាលនេះមានសារសំខាន់ណាស់សម្រាប់វិស័យឯកជន។ ការបណ្តុះបណ្តាលនេះវាជាឆ្នាំងបាយសម្រាប់វិស័យឯកជន ក្នុងការបង្កើនផលិតភាព ពីព្រោះកម្មករ និងបុគ្គលិកមានឱកាសក្នុងការបង្កើនជំនាញ។  ទន្ទឹមនឹងការគាំទ្រជានិច្ចនូវយន្តការថ្មីៗដែលបានដាក់ចូលសម្រាប់បម្រើផលប្រយោជន៍កម្មករនិយោជិតនៅកម្ពុជា កម្មករនិយោជិត និងវិស័យឯកជនទាំងអស់បានសម្តែងការអរគុណរាជរដ្ឋាភិបាល អរគុណសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ដែលបន្តផ្តល់អត្ថប្រយោជន៍ជាច្រើនទៅដល់កម្មករនិយោជិតនៅទូទាំងប្រទេស។ គូរកត់សម្គាល់ផងដែរថា រាជរដ្ឋាភិបាលកម្ពុជាអាណត្តិទី៧ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីជាប្រមុខបាននិងកំពុងបន្តយកចិត្តទុកដាក់ខ្ពស់លើការអនុវត្តសិទ្ធិការងារ និងការផ្តល់អត្ថប្រយោជន៍ដល់កម្មករ ហើយរាជរដ្ឋាភិបាលមានយន្តការក្នុងការលើកកម្ពស់ការការពារសិទ្ធិសេរីភាពអង្គការវិជ្ជាជីវៈ ថែរក្សាសុខដុមនីយកម្មទំនាក់ទំនងវិជ្ជាជីវៈ ផ្តល់អត្ថប្រយោជន៍នានាជូនបងប្អូនកម្មករនិយោជិត រួមទាំងការផ្តល់កិច្ចគាំពារសង្គមផងដែរ។រាជរដ្ឋាភិបាលបានផ្តល់អត្ថប្រយោជន៍ជាច្រើនជូនបងប្អូនកម្មករនិយោជិត ក្នុងនោះ កម្មករប្រើប.ស.ស.ដោយឥតគិតថ្លៃ, ការដំឡើងប្រាក់ឈ្នួលក្នុងឆ្នាំ២០២៤, គិតគូរពីតម្លៃទឹកភ្លើង ផ្ទះជួល, ការបង្កើតយន្តការផ្សេងៗដើម្បីលើកកម្ពស់សិទ្ធិកម្មករ, ការឧបត្ថម្ភដល់កម្មការិនីនិយោជិតមានផ្ទៃពោះ និងមានយន្តការការច្រើនទៀតណាស់ ដែលដាក់ចេញដោយរដ្ឋាភិបាល ក្នុងនោះកម្មករក៏អាចទទួលបានការបណ្តុះបណ្តាលជំនាញវិជ្ជាជីវៈដោយឥតគិតថ្លៃផងដែរគួរកត់សំគាល់ថា សម្តេចមហាបវរធិបតីក៏បានដាក់ចេញនូវអនុសាសន៍ចំនួន៤ចំណុចឱ្យក្រសួងការងារ និងបណ្តុះបណ្តាលវិជ្ជាជីវៈអនុវត្តសម្រាប់ឆ្នាំ២០២៤ ដល់ឆ្នាំ២០២៥ ផងដែរ ក្នុងនោះទី១ សហការជាមួយក្រសួងពាក់ព័ន្ធកសាងមត្តេយ្យសហគមន៍ ទី២ កែសម្រួលអាហារដ្ឋានហូបបាយក្នុងបរិវេណរោងចក្រសហគ្រាស ទី៣ កែសម្រួលមធ្យោបាយធ្វើដំណើរ និងទី៤ ការធ្វើតេស្តទទួលស្គាល់ជំនាញដល់កម្មករនិយោជិតផងដែរ៕

(អន្តរជាតិ)៖ អាជ្ញាធរជប៉ុនគ្រោងនឹងដាក់ចេញនូវច្បាប់ថ្មីស្តី ពីការផ្ទេរបច្ចេកវិទ្យាអន្តរជាតិពី ឧស្សាហកម្ម សំខាន់ៗរបស់ប្រទេសនេះ ដើម្បីការពារពួកគេត្រូវបានគេប្រើប្រាស់សម្រាប់គោលបំណងយោធា។ក្រសួងសេដ្ឋកិច្ច ពាណិជ្ជកម្ម និងឧស្សាហកម្ម ត្រូវបានគេរំពឹងថា នឹងតម្រូវឱ្យក្រុមហ៊ុនឯកជន រាយការណ៍ទៅក្រសួងជាមុន នៅពេលដែលពួកគេមានគម្រោងផ្ទេរបច្ចេកវិទ្យា ពីផលិតផលជប៉ុន ដែលមានការប្រកួតប្រជែង ដូចជា semiconductors យន្តហោះ និងផលិតផលពាក់ព័ន្ធទៅក្រៅប្រទេស។បច្ចុប្បន្ន ក្រសួងតម្រូវឱ្យក្រុមហ៊ុនឯកជនទទួលបានការអនុញ្ញាតពីរដ្ឋាភិបាលដើម្បីផ្ទេរបច្ចេកវិទ្យាទាក់ទងនឹងថាមពលនុយក្លេអ៊ែរ និងអាវុធគីមីទៅបរទេស។វាក៏តម្រូវឱ្យពួកគេទទួលបានការអនុញ្ញាតបែបនេះសម្រាប់ការផ្ទេរទៅក្រៅប្រទេសនូវបច្ចេកវិទ្យាផ្សេងទៀតដែលមានសក្តានុពលនៃកម្មវិធីយោធា។ ប៉ុន្តែការរាយការណ៍ជាមុនមិនមែនជាកាតព្វកិច្ចទេ។ក្រសួងនិយាយថា ខ្លួនប្រឈមនឹងតម្រូវការក្នុងការពង្រឹងវិធានការ ដើម្បីឆ្លើយតបទៅនឹងការកើនឡើង នៃបច្ចេកវិទ្យាប្រើប្រាស់ពីរដែលអាចប្រើប្រាស់បានទាំងក្នុងវិស័យយោធា និងផ្នែកស៊ីវិល។នៅក្រោមគ្រោងការណ៍ថ្មីនេះ ដែលផ្តោតលើឧស្សាហកម្មដែលប្រទេសជប៉ុនមានគែមនោះ ក្រុមហ៊ុន ឯកជនមានកាតព្វកិច្ចរាយការណ៍ទៅរដ្ឋាភិបាលជាមុន ប្រសិនបើពួកគេមានគម្រោងធ្វើការសិក្សារួមគ្នា ឬសាងសង់រោងចក្រនៅបរទេស។ប្រសិនបើរដ្ឋាភិបាលសម្រេចថាមានហានិភ័យនៃអ្វីដែលត្រូវបានបង្វែរទៅការប្រើប្រាស់យោធានោះ វានឹងសុំឱ្យក្រុមហ៊ុនទទួលបានការអនុញ្ញាតជាមុន។ ក្រុមហ៊ុននឹងត្រូវទទួលទោស ប្រសិនបើពួកគេធ្វើសេចក្តីថ្លែងការណ៍មិនពិត។ក្រសួងគ្រោង នឹងពិភាក្សាជាមួយឧស្សាហកម្មពាក់ព័ន្ធថា តើបច្ចេកវិទ្យាណាខ្លះដែលត្រូវគោរពតាមច្បាប់ថ្មី និងចាត់វិធានការចាំបាច់ក្នុងការកែសម្រួលបទប្បញ្ញត្តិពាក់ព័ន្ធនៅដើមរដូវក្តៅនេះ៕

(បាងកក)៖ ក្រសួងទេសចរណ៍បាននិយាយថា ប្រទេសថៃបានកត់ត្រាការមកដល់របស់ភ្ញៀវទេសចរ បរទេសចំនួន 11.95 លាននាក់ ចាប់ពីខែមករា ដល់ថ្ងៃទី 28 ខែមេសា។ក្រសួងបាននិយាយថា ទេសចរណ៍បរទេសបានបង្កើតប្រាក់ចំណូលចំនួន 575 ពាន់លានបាត (15.52 ពាន់លានដុល្លារ) ក្នុងរយៈពេលនោះ។ ប្រទេសថៃកំពុងកំណត់គោលដៅភ្ញៀវបរទេសប្រមាណ៤០លាននាក់នៅឆ្នាំនេះ ហើយវិស័យនេះជាកត្តាជំរុញសេដ្ឋកិច្ចរបស់ខ្លួន៕

(ព័ត៌មានជាតិ)៖ នារសៀល ថ្ងៃទី៣០ ខែមេសា ឆ្នាំ២០២៤ នេះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានអញ្ជើញជាអធិបតីក្នុងពិធីសំណេះសំណាលជាមួយសមាជិក សមាជិកា ស.ស.យ.ក. ប្រចាំសាកលវិទ្យាល័យសៅស៍អ៊ីសអេយសៀ ខេត្តសៀមរាប។ អញ្ជើញអមដំណើរឯកឧត្តមប្រធាន និងមានវត្តមានក្នុងពិធីនេះរួមមាន ឯកឧត្តម ទៀ សីហា ឯកឧត្តម សុះ មុះសិន អនុប្រធានស.ស.យ.ក. ឯកឧត្តម លោកជំទាវ សមាជិក សមាជិកាគណៈអចិន្រ្តៃយ៍ គណៈកម្មាធិការកណ្តាល គណៈដឹកនាំចលនាយុវជនគ្រឹះស្ថានឧត្តមសិក្សា ប្រចាំសាកលវិទ្យាល័យសៅស៍អ៊ីសអេយសៀ និងសមាជិក សមាជិកាចូលរួម ចំនួន ២ ៥០០ នាក់។ យោងរបាយការណ៍លោកបណ្ឌិត សៀន សុវណ្ណា សាកលវិទ្យាធិការ និងជាប្រធានក្រុមការងារ ស.ស.យ.ក. ប្រចាំសាកលវិទ្យាល័យ បានឱ្យដឹងថា ដោយមានការយល់ច្បាស់ពីបុព្វហេតុ និងបេសកកម្មរបស់ ស.ស.យ.ក ពីសំណាក់គណៈដឹកនាំចលនាយុវជន នាំឱ្យសាស្រ្តាចារ្យ បុគ្គលិក និងនិស្សិតក្នុងសាកលវិទ្យាល័យស្ម័គ្រចិត្តចូលរួមជាសមាជិក ដែលគិតត្រឹមបច្ចុប្បន្ន សមាជិក សមាជិកា បានកើនដល់ ៤ ០០០ នាក់។ ជាងនេះទៅទៀត សមាជិក សមាជិកាទាំងអស់បានប្តេជ្ញាចូលរួមជាមួយ ស.ស.យ.ក. ដើម្បីក្លាយខ្លួនជាសសរទ្រូងប្រទេសជាតិ និងចូលរួមចំណែកក្នុងការអភិវឌ្ឍប្រទេសជាតិ។ មានមតិទៅកាន់សមាជិក សមាជិកាទាំង ២ ៥០០ ឯកឧត្តម ហ៊ុន ម៉ានី បានសម្តែងនូវក្តីរំភើប និងសប្បាយរីករាយ ដែលបានឃើញកំណើនសមាជិកជាលំដាប់។ ជាមួយគ្នាដែរ ឯកឧត្តមក៏សូមកោតសរសើរដល់ ថ្នាក់ដឹកនាំក្រុមការងារ ស.ស.យ.ក. ដែលបានយកចិត្តទុកដាក់ បង្ករបរិយាកាស និងប្រមូលផ្តុំយុវជនដែលមានឆន្ទៈចង់ចូលរួមការងារសង្គមជាមួយ ស.ស.យ.ក.។ នាឱកាសនៃការជួបជុំដ៏មានអត្ថន័យនេះផងដែរ ឯកឧត្តមប្រធានបានធ្វើការចែករំលែកបទពិសោធន៍ និងទស្សនៈល្អៗពាក់ព័ន្ធនឹងភាពជាអ្នកដឹកនាំ ការហាត់ពត់លុតដំ បណ្តុះស្មារតី និងបំណិនជីវិតល្អៗជាច្រើនដែលសមឹជិក សមាជិកា ស.ស.យ.ក. អាចរៀនសូត្រ ក្រេបជញ្ជក់បានពីការងារស្ម័គ្រចិត្តជាមួយ ស.ស.យ.ក.។សូមបញ្ជាក់ផងដែរថា នាពិធីសំណេះសំណាលនេះ ឯកឧត្តម ហ៊ុន ម៉ានី ក៏បានបើកឱកាសឱ្យ សមាជិក សមាជិកា បានសាកសួរ និង សូមអនុសាសន៍ល្អៗ ប្រកបដោយភាពស្និទស្នាលជាទីបំផុត។

(ភ្នំពេញ)៖​ ជាការពិតណាស់ នារយៈពេលចុងក្រោយនេះ ស្ថានភាពអាកាសធាតុនៅកម្ពុជានាពេលបច្ចុប្បន្ន ហាក់មានសីតុណ្ហភាពខ្លាំងក្តៅដែលធ្វើឱ្យពលរដ្ឋស្ទើរតែមិនអាចទ្រាំទ្រនឹងសីតុណ្ហភាពក្តៅខ្លាំងនេះបាន។ ស្របពេលដែលអាកាសធាតុក្តៅខ្លាំង បែបនេះ ពិតណាស់ បងប្អូនភាគច្រើនប្រាកដជាពឹងលើ កង្ហារ ឬ ម៉ាស៊ីនត្រជាក់ជាដើម ដើម្បីឲ្យសីតុណ្ហភាពនៅក្នុងបន្ទប់ ឬក្នុងផ្ទះចុះត្រជាក់ស្រួលខ្លួន។ប៉ុន្តែទន្ទឹមនឹងនោះ ការប្រើប្រាស់កង្ហារ ឬ ម៉ាស៊ីនត្រជាក់ នេះដែរ ពលរដ្ឋភាគច្រើន បានរអ៊ូរទាំថា ខែក្តៅបែបនេះ គីឡូភ្លើងឡើងខ្លាំង ពោល ១គុណជា២ តែម្តងការចំណាយក៏កាន់តែច្រើនខ្លាំងដែរ ដោយសារកាប្រើប្រាស់ថាមពលភ្លើងច្រើនលើសពីធម្មតា ។ យ៉ាងណាមិញ ថ្ងៃនេះ Swift News និង Best TV នឹងប្រាប់ពីតិចនិច និង ក្បាច់មួយចំនួនអាចជួយសន្សំសំចៃថវិកាបានមួយកម្រិតពេលប្រើម៉ាស៊ីនត្រជាក់នារដូវក្ដៅបែបនេះ ។ ជាក់ស្តែង យោងតាមផេកហ្វេសប៊ុកដែលមានឈ្មោះថា Pdey Propun បានបង្ហោះនូវអត្ថបទមួយ ទាក់ទងនឹងការសន្សំសំចៃថវិកាបានមួយកម្រិតនៅពេលលោកអ្នកអ្នកប្រើម៉ាស៊ីនត្រជាក់នារដូវក្ដៅបែបនេះ។ យោងតាមផកហ្វេប៊ុកខាងលើបានបញ្ជាក់ថា ៖« ចាប់ផ្ដើមពីពេលនេះ បើកម៉ាស៊ីនត្រជាក់ 27 អង្សា សេព្រមជាមួយបើកកង្ហារត្រជាក់ស្រួលខ្លួនស្ទើរមិនគួរឲ្យជឿ តែស៊ីភ្លើងតិច។ ការបើកម៉ាស៊ីនត្រជាក់សីតុណ្ហភាព 27 អង្សាសេ ម៉ាស៊ីនត្រជាក់នឹងស៊ីភ្លើងតិចជាង បើក 23-24 អង្សា ព្រោះកម្លាំងអូសរបស់ម៉ាស៊ីនត្រជាក់ នឹងធ្វើការតិចជាង។ ពេលយើងបើកត្រឹមសីតុណ្ហភាព 27 អង្សា កម្លាំងអូសរបស់ម៉ាស៊ីនត្រជាក់វាធ្វើការមិនយូរ វានឹងកាត់ផ្ដាច់ការធ្វើការ ព្រោះវាឆាប់គ្រប់ចំនួន សីតុណ្ហភាព 27 អង្សា ដែលយើងបានកំណត់ទុកហើយ អាចសាកល្បងបាន៕

(រាជធានីភ្នំពេញ)៖ នៅថ្ងៃទី២៥ ខែមេសា ឆ្នាំ២០២៤ សាខា ក.ប.ប. រាជធានីភ្នំពេញ ដោយមានការស្នើសុំកិច្ចសហការពីមន្ត្រីជំនាញគយចល័តតំបន់១ ប្រចាំរាជធានីភ្នំពេញ បាននាំយករថយន្តពិសោធន៍ចល័តផ្នែកម្ហូបអាហារ របស់អគ្គនាយកដ្ឋាន ក.ប.ប. ចុះត្រួតពិនិត្យលើទំនិញប្រហិតចម្រុះមានដូចជា (ហតដក ប្រហិតត្រីបន្ទះ ប្រហិតសាច់មឹក ប្រហិតសាច់មាន់ ប្រហិតដង្កៀបក្តាម) ចំនួន៨០កេសនិង១៦២បាវ ស្មើនឹង ៨,៦២០គីឡូក្រាម ដែលមន្ត្រីនៃអគ្គនាយកដ្ឋានគយ និងរដ្ឋាករ (គយចល័តតំបន់១) ឃាត់ទុក ហើយយកមករក្សាទុកនៅមណ្ឌលឃ្លាំងគយ ភូមិសាស្ត្រខណ្ឌព្រែកព្នៅ រាជធានីភ្នំពេញ ដោយឈ្មួញលួចនាំចូលដឹកតាមរថយន្តស៊ាំយ៉ុងចំនួន២គ្រឿង។ មន្ត្រីជំនាញ ក.ប.ប. បានធ្វើការត្រួតពិនិត្យយ៉ាងយកចិត្តទុកដាក់ ដោយទទួលបានលទ្ធផលដូចខាងក្រោម៖- បានរកឃើញថា ទំនិញប្រហិតចម្រុះ ទាំងនោះ ត្រូវបានឈ្មួញទុច្ចរិត (បុគ្គលប្រព្រឹត្តិអំពើមិនសុចរិតក្នុងធុរកិច្ច) លួចបន្លំនាំចូលដោយពុំមានឯកសារដើម្បីបំពេញភាពអនុលោម និងគ្មានប្រភពច្បាស់លាស់ ដឹកតាមរថយន្តស៊ាំយ៉ុង ចំនួន ២គ្រឿង- ការវេចខ្ចប់ (ច្រកដាក់ក្នុងការ៉ុង) និងដឹកជញ្ជូនពុំត្រឹមត្រូវស្របតាមបទប្បញ្ញត្តិបច្ចេកទេស (កម្រិតសីតុណ្ហភាពពុំត្រឹមត្រូវ) ដែលនាំឱ្យទំនិញប្រហិតទាំងនោះប្រែប្រួលបាត់បង់គុណភាព។ យោងតាមលទ្ធផលនៃការត្រួតពិនិត្យនេះ មន្ត្រីជំនាញទាំង២ស្ថាប័នបានសម្រេច ធ្វើការដកហូតយកទៅបំផ្លាញចោលតាមនីតិវិធី នូវទំនិញប្រហិតចម្រុះទាំងនោះដើម្បីកុំឱ្យមានការចរាចរចូលទីផ្សារ ដែលអាចបណ្តាលឱ្យប៉ះពាល់ដល់សុខភាពរបស់អ្នកប្រើប្រាស់ជាយថាហេតុ៕

(ជាតិ)៖ ថ្មីៗនេះមានការជជែកវែកពេញបណ្តាញបណ្តាញសង្គមហ្វេសប៊ុក ក្រោយពីមានបុរសម្នាក់ដែលមានគណនីហ្វេសប៊ុកឈ្មោះថា វណ្ណណេង បានបង្ហោះនៅសារ យ៉ាងខ្លីមួយនៅលើបណ្តាញសង្គម ហើយក៏ត្រូវបាន មហាជននាំគ្នាចែករំលែក យ៉ាងព្រោងព្រាត រួមទាំងការបញ្ចេញមតិយោបល់ផ្សេងៗគ្នានៅលើការបង្ហោះមួយនេះផងដែរ ។ជាក់ស្តែង យោងតាមគណនីហ្វេសប៊ុកខាងលើបានបង្ហោះសារដែលមានខ្លឹមសារយ៉ាងដូច្នេះថា៖ «ដោយសារអាកាសធាតុក្តៅ ឡាន ម៉ូតូ មិនគួរចាក់សាំង ឬហ្កាស ពេញធុង ពេកទេ គួរទុកឲ្យមានខ្យល់ ចេញចូលខ្លះ បង្ការកុំអោយផ្ទុះ! ព្រោះវាអាចរីកមាឌ »។ ក្រោយឃើញការបង្ហោះពីសំណាក់ម្ចាស់គណនីហ្វេសប៊ុកខាងលើហើយនោះ ក៏សង្កេតឃើញមាន ការបញ្ចេញមតិយោបល់ផ្សេងៗគ្នាយ៉ាងច្រើន ក្នុងន័យ មិនគាំទ្រ និង មិនសមហេតុសមផលសោះឡើយ ជាពិសេសទៀត ក៏មិនបានប្រភពបញ្ជាក់ច្បាស់លាស់។Swift News និង Best TV សុំអាននូវខំមិនមួយចំនួន របស់មហាជនដែលបានបានបញ្ចេញមតិយោបល់ នៅខាងក្រោមផុសមួយនេះដូចតទៅ៖ -សរសេរតាមនឹកឃើញ គ្មានចេះអីទេមើលទៅ។ ធុងសាំងឡានក៏ដោយម៉ូតូក៏ដោយ កម្ដៅក្រោម ៧០អង្សារវាមិនចេះផ្ទុះទេ។ កំអោយតែឆាបអណ្ដាតភ្លើងបានវាឆេះ បើឆេះហើយសាំងអត់ពេ ញក៏ផ្ទុះបានដែរ។-ក្រុមហ៊ុនឡាននីមួយៗគេបានគិតរួចហើយមុនផលិត បើយើងមិនដឹងអីកុំចេះតែថា-ធុងសាំងប្រេងឡាន និមួយៗ នៅក្រោមបាតឡាន មិនងាយផ្ទុះទេ-ការនិយាយនេះគ្មានមូលដ្ឋានសោះ វិស្វករយានយន្តគេមិនល្ងង់ ដល់ថ្នាក់គិតមិនឃើញរឿងប៉ុណ្ណឹងទេ-ចេះមកពីណាពីណាពូ ឣ្នកណាប្រាប់? នេះបានចំជាឣ្នកជំនាញពិតៗ-ចុះម្ដេចឡាននៅអារ៉ាប់មិនឃើញមានផ្ទុះ បើស្រុកអារ៉ាប់ក្ដៅជាងយើងផង-ធុងសាំងគ្រប់យានយន្តសុទ្ធតែមានកន្លែងបន្ធូរសម្ពាទ គេធ្វើដល់ទ្បានម៉ូតូគេមិនល្ងង់ឲ្យឆេះទ្បានអតិថិជនគេដោយសារចាក់ពេញទេ-ចុម!ទុកឲ្យខ្យល់ចេញចូល ចឹងធុងសាំងគេផលិតមកមានប្រហោងខ្យល់ចេញចូលមែន ខ្ញុំអត់ដែលដឹងទេបងៗ បងណាដឹងប្រាប់ខ្ញុំផង ខ្ញុំចេះអត់ដល់ទេ ។ប៉ុន្តែទោះជាយ៉ាងណាក៏ដោយ ខាងលើនេះគ្រាន់តែជាការបញ្ចេញមតិយោបល់ពីសំណាក់ មហាជនមួយចំនួនតែប៉ុណ្ណោះ ។ ទន្ទឹមនឹងនោះ ក៏មានមហាជនខ្លះទៀត បានលើកលើកឡើងថា ទោះបីជាការបង្ហោះនេះ គ្មានប្រភពច្បាស់លាស់ក៏ពិតមែន ប៉ុន្តែរឿងខ្លះការពារប្រសើរជាងព្យាបាលដែរ ប្រសិនបើយើង មានការប្រុងប្រយ័ត្នឱ្យបានច្រើននោះ ហានិភ័យក៏មិនងាយកើតមានឡើងដែរ៕

(អន្តរជាតិ)៖ មនុស្ស​ភាគច្រើន​កំពុង​ព្យាយាម​រក​វិធី​ដោះស្រាយ​រលក​កម្ដៅ​ដែល​កាន់តែ​អាក្រក់​ទៅៗ​ពីមួយថ្ងៃ​ទៅមួយថ្ងៃ។ ខាង​ក្រោម​នេះ​គឺ​ជា​វត្ថុ​ទាំង ៧ ដែល​អ្នក​គួរ​មាន​ក្នុង​កាបូប​ ដើម្បីទប់ទល់នឹង​រដូវ​ ក្ដៅ​។របស់ដែលត្រូវមានជាមូលដ្ឋានគឺដបទឹកតូចមួយ និងឡេការពារកម្តៅថ្ងៃ គួរតែនៅក្នុងកាបូបរបស់អ្នកជានិច្ច ទោះបីជាអ្នកកំពុងដើរទិញឥវ៉ាន់ក៏ដោយ។ អាកាសធាតុក្តៅ ធ្វើឱ្យយើងមានអារម្មណ៍ថា ខ្សោះជាតិ ទឹកញឹកញាប់ជាងអ្វីដែលយើងរំពឹងទុក ហើយក៏អាចប៉ះពាល់ស្បែកខ្លាំងផងដែរ ដូច្នេះហើយយើង ត្រូវមានទឹកនៅជាមួយយើងគ្រប់ពេល ហើយត្រូវប្រាកដថាយើងលាបឡេការពារ កម្តៅថ្ងៃម្តង ទៀតរៀងរាល់បីម៉ោងម្តង។ថ្នាំគ្រាប់ទឹកពុះអេឡិចត្រូលីតដូចដែលបានរៀបរាប់ពីមុនមក ទឹកគឺជាវត្ថុចាំបាច់នៅក្នុងកាបូបរបស់យើងក្នុងរដូវក្តៅ ប៉ុន្តែកុំភ្លេច ថ្នាំគ្រាប់ទឹកពុះអេឡិចត្រូលីតមួយចំនួនផងដែរ។  ពួកវាសំបូរទៅដោយសារធាតុរ៉ែ និងអំបិល ។ វីតាមីន និងសារធាតុរ៉ែដែលគ្រាប់ទាំងនេះមានអាចជួយឱ្យយើងទទួលបានថាមពលកាន់តែច្រើន និងការពារ យើងការខ្សោះជាតិទឹកនៅថ្ងៃរដូវក្តៅ។កង្ហាខ្នាតតូចចល័តការមានកង្ហាខ្នាតតូចចល័តនៅក្នុងកាបូប នឹងជួយអោយអ្នកមិនមានអារម្មណ៍ស្អុះស្អាប់នោះទេ ឆ័ត្រយើងភាគច្រើនភ្ជាប់ឆ័ត្រជាមួយភ្លៀង ប៉ុន្តែការពិតគឺវាងាយស្រួលប្រើក្នុងរដូវក្តៅ ដូចនៅរដូវវស្សាដែរ។ កម្តៅព្រះអាទិត្យចំពីលើក្បាលរបស់យើង អាចធ្វើឱ្យយើងមានអារម្មណ៍មិនស្រួល ដូច្នេះមានឆ័ត្រ ពេលដើរកាត់កម្តៅថ្ងៃ គឺជារឿងល្អបំផុត។ វ៉ែនតាពន្លឺព្រះអាទិត្យភ្លឺអាចនាំឱ្យមនុស្សជាច្រើនឈឺក្បាល ហើយវ៉ែនតារបស់អ្នកនឹងការពារអ្នកពីរឿងនោះ។ កន្សែងសើមអាកាសធាតុ​ដ៏​គួរ​ឲ្យ​ខ្លាច​ក្នុង​រដូវ​ក្ដៅ​អាច​ធ្វើ​ឲ្យ​យើង​បែកញើស ហើយ​ហេតុ​នេះ​ហើយ​បាន​ជា​មាន​អារម្មណ៍​ស្អិត​ញឹកញាប់​ពេក។ ការ​មាន​កញ្ចប់​កន្សែង​សើម​អាច​ឱ្យ​អ្នក​ស្រស់​ស្រាយ​ពេល​ធ្វើ​ដំណើរ ទោះ​បី​ជា​អ្នក​មិន​អាច​ចូល​ទៅ​បន្ទប់​ទឹក​ក៏​ដោយ។ក្រដាសជូតមាត់អាកាសធាតុក្តៅ និងសើមនៅរដូវក្ដៅ ច្រើនតែធ្វើឱ្យស្បែករបស់យើងមានជាតិប្រេង ដែលអាចធ្វើឱ្យ មិនស្រួល ហើយថែមទាំងអាចស្ទះរន្ធញើសទៀតផង។  ក្រដាសជូតមាត់ អាចជូតខ្លាញ់លើមុខ ពេលបែកញើសផងដែរ៕ 

(ភ្នំពេញ)៖ អបអរសាទរចំពោះឧកញ៉ា លី សុភ័ក្ដ ប្រធានក្រុមប្រឹក្សាភិបាលក្រុមហ៊ុន លី ហួរ លីស៊ីង ភីអិលស៊ី ដែលត្រូវបានព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាបានប្រទាននូវគោរមងារជា «អ្នកឧកញ៉ា»។ព្រះរាជទានត្រាស់បង្គាប់ផ្តល់គោរមងារ អ្នកឧកញ៉ានេះជាសក្ខីភាពឆ្លុះបង្ហាញអំពីកិច្ចខិតខំប្រឹងប្រែងទាំងកម្លាំងកាយនិង ចិត្តដោយមិនខ្លាចនឿយហត់របស់អ្នកឧកញ៉ា ក្នុងបុព្វហេតុដើម្បី ជួយសង្គមជាតិ និង ចូលរួមចំណែក ដល់ការអភិវឌ្ឍន៍សេដ្ឋកិច្ច ប្រទេសជាតិជាទីស្នេហានៃយើង ឱ្យកាន់តែរីកចម្រើន។ ទន្ទឹមនឹងនេះការប្រទាននេះពិតជាស័ក្តិសមនិងផ្តល់កិត្តិយសដ៏ឧត្តុង្គឧត្តមសម្រាប់អ្នកឧកញ៉ានិងក្រុមគ្រួសារ។ឆ្លៀតនៅក្នុងឱកាសដ៏វិសេសវិសាលនេះ យើងខ្ញុំទាំងអស់គ្នា សូម បួងសួងដល់ វត្ថុស័ក្តិសិទ្ធិក្នុងលោក សូមជួយតាមថ រក្សា និង ប្រោះព្រំប្រសិទ្ធពរជ័យ ជូនចំពោះ អ្នកឧកញ៉ា និង លោកជំទាវ ព្រមទាំងក្រុមគ្រួសារជាទីស្រលាញ់ សូមជួប ប្រទះនូវពុទ្ធពរ ទាំងបួនប្រការគឺ អាយុ វណ្ណៈ សុខៈ ពលៈជានិច្ចនិរន្តរ៍៕

(សង្គម)៖ ដោយហេតុថាអាកាសធាតុកាន់តែកើនកម្ដៅខ្លាំងឡើងៗជាពិសេសធ្វើប្រជាជនមួយចំនួនប្រឈមទៅនឹងបញ្ហាសុខភាពផ្សេងៗមិនថាតែមនុស្សចាស់ឬកូនក្មេងនោះទេ ដូច្នេះហើយកាលពីពេលថ្មីៗនេះក្រោយពីបានឃើញរូបភាពក្មេងៗអង្គុយរៀនបណ្ដើរនិងស្អំក្បាលជាមួយកន្សែងពោះគោសើមបណ្ដើរ ឃើញថាមានអាណាព្យាបាលនិងមហាជនជាច្រើនបានធ្វើការសំណូមពរទៅកាន់ក្រសួងអប់រំឱ្យផ្អាកការសិក្សាចំពោះថ្នាក់បឋមសិក្សាមួយរយៈសិន ក៏ព្រោះតែបារម្ភពីសុវត្តិភាពក៏ដូចជាសុខភាពក្មេងៗ ណាមួយក្មេងៗក៏មិនទាន់យល់ច្បាស់ទាំងស្រុងពីការថែរក្សាសុខភាពកំឡុងពេលអាកាសធាតុក្ដៅបែបនេះ។ យ៉ាងណាមិញយោងតាមរូបភាពចំនួនពីរសន្លឹកដែលបង្ហោះដោយគណនីហ្វេសប៊ុកឈ្មោះថា វិចិត្រ តារា ព្រមទាំងអមមកជាមួយខ្លឹមសារយ៉ាងដូច្នេះថា «យោងតាមអាកាសធាតុក្តៅខ្លាំង នាយកសាលាបឋមសិក្សាគំរូស្រុកមង្គលបូរី សូមអំពាវនាវដល់មាតាបិតាសិស្សទាំងអស់ មេត្តាដាក់កន្សែងពោះគោតូចល្មមទុកឲ្យកូនជ្រលក់ទឹកស្អំ ពេលមករៀនដើម្បីកាត់បន្ថយកំដៅ និងណែនាំកូនៗញ៉ាំទឹកឲ្យបានច្រើន»។ ក្រោយពីបានឃើញការបង្ហោះនេះហើយមហាជនក៏បានសរសើរនិងអរគុណចំពោះការយកចិត្តទុកដាក់ពីសំណាក់នាយកសាលាខាងលើផងដែរ ក៏ប៉ុន្តែទន្ទឹមនឹងគ្នានោះ មានមហាជនក៏ដូចជាអាណាព្យាបាលជាច្រើនរូបបានចូលទៅបញ្ចេញមតិយោបល់ដោយសំណូមពរទៅកាន់ក្រសួងស្រដៀងៗគ្នាយ៉ាងដូច្នេះថា៖-តើក្រសួងអាចផ្គួបវ៉ាកងតូចនឹងវ៉ាកងធំចូលគ្នាឈប់សំរាកក្នុងរដូវក្ដៅបានទេសំរាប់ឆ្នាំសិក្សាក្រោយៗដោយសារតែកំដៅពីមួយឆ្នាំទៅមួយឆ្នាំមានការកើនឡើងរហូតខ្ញុំពិតជាបារម្ភពីក្មេងតូចៗណាស់-បើអាចបិទសាលាមួយរយៈក៏ល្អ ព្រោះក្ដៅណាស់ រាល់ថ្ងៃនៅក្នុងបន្ទប់បើកម៉ាស៊ីនត្រជាក់ជាប់រហូត 16c ហើយកង្ហារមួយទៀតនៅតែហូរញើស ទ្រំាតែក្មេងៗរៀនសាលារដ្ជមិនមានកង្ហារអីទៀត នៅក្មេងៗទៀតនោះមិនដឹងថាគ្នាយ៉ាងម៉េចនោះទេ ក្មេងៗសុខភាពគ្នានៅខ្ចីណាស់ងាយរងជំងឺ បើអាចសូមស្ទើរសុំឲ្យសាលទូទំាងប្រទេសយើងឈប់សំរាកមួយរយៈដូចនៅ ហ្វីលីពីនដែរដើម្បីសុវត្ថិភាពនិងសុខភាពក្មេងៗ-អាណិត ណាស់ បើអាច ស្នើសុំក្រសួង មន្ទីរ អប់រំ ឈប់សម្រាក បណ្តោះអាសន្ន ឬមានវិធានការណាមួយជួយដល់ សិស្សានុសិស្ស ដែល កំពុងពិបាក -គួរតែផ្អាក ឬបិទសាលាមួយរយៈជាការល្អ ព្រោះថាក្មេងៗ កម្លាំងខ្សោយ ស្បែកនៅខ្ចី ងាយនិងរងការឈឺស្កាត់ មិនដូចមនុស្សធំទេ ទោះដាក់កន្សែងត្រជាក់ក៏មិនអាចជួយបានដែរ បើកម្ដៅឡើងដល់ 41,42 ហើយនិង តំបន់ខ្លះ 43 ឯនោះលោកគ្រូ ទោះបីបង្ខំ ឬសម្រុករៀននៅពេលនេះក៏មិនអាចធ្វើឲ្យគាត់រៀនបានចូលល្អដែល ព្រោះអាកាសធាតុឥលូវមិនអំណោយផលសោះ ។ នេះគ្រាន់តែជាការយល់ឃើញរបស់ខ្ញុំទេ បើមានខុសឆ្គងអ្វី អធ្យាស្រ័យផង។ទោះជាយ៉ាងណាទាំងនេះគឺជាការសំណូមពរក៏ដូចជាការលើកឡើងពីសំណាក់អ្នកប្រើប្រាស់បណ្ដាញសង្គមដោយគ្រាន់តែមានបំណងបារម្ភពីសុវត្តិភាពនិងសុខភាពរបស់ក្មេងៗតែប៉ុណ្នោះ រីឯចំពោះការផ្អាកការសិក្សាបណ្ដោះអាសន្នវិញនោះក៏ពុំទាន់ដឹងថាក្រសួងមានចមណាត់ការយ៉ាងដូចម្ដេចនោះដែរ៕

(ភ្នំពេញ)៖ នៅថ្ងៃទី២៩ ខែមេសា ឆ្នាំ២០២៤ យោងតាមការចុះផ្សាយរបស់ ក្រសួងអប់រំ យុវជន និងកីឡាបានឱ្យដឹងថា ការប្រែប្រួលអាកាសធាតុ ដែលធ្វើឱ្យមានការឡើងកម្ដៅខ្លាំង អាចបង្កហានិភ័យដល់សុខភាពដូចជា ជំងឺបេះដូង ជំងឺសួត រលាកស្បែកឡើងក្រហម និងអាចបង្កជាជំងឺផ្សេងៗដូចជា ជំងឺរាក ជំងឺកង្វះអាហារូបត្ថម្ភ ឬក៏អាចមានបញ្ហាសុខភាពផ្លូវចិត្តជាដើម។ ដើម្បីថែរក្សាសុខភាពនិងបង្ការជំងឺនានាអំឡុងពេលអាកាសធាតុ ក្តៅខ្លាំងនេះ។1. ប្រការគួរអនុវត្តជាប្រចាំសម្រាប់បុគ្គលិកអប់រំ និងសិស្សានុសិស្ស៖-ត្រូវទទួលទាន ទឹកដាំពុះដោយទុកឱ្យត្រជាក់ (ចៀសវាងញ៉ាំទឹកក្តៅ) ទឹកបរិសុទ្ធ ទឹកចម្លោះ ទឹកស្អាត ឱ្យបានច្រើននិងញឹកញាប់ លើសពី២លីត្រក្នុងមួយថ្ងៃចំពោះមនុស្សពេញវ័យ ទោះបីជាអ្នកមិនមាន អារម្មណ៍ស្រេកទឹកក៏ដោយ ពិសេសត្រូវតាមដានទឹកនោមដោយមិនត្រូវបណ្តោយឱ្យទឹកនោមឡើង ពណ៌លឿងចាស់នោះទេ-ត្រូវទទួលទានបន្លែ ផ្លែឈើដែលសម្បូរជាតិសរសៃនិងជាតិទឹកឱ្យបានញឹកញាប់-ត្រូវស្លៀកសម្លៀកបំពាក់ការពារកម្ដៅនិងការពារការរលាកស្បែកដោយពន្លឺព្រះអាទិត្យ ដូចជាសម្លៀក បំពាក់រលុង ស្រាល មានពណ៌ស្រាល ពាក់វ៉ែនតាការពារពន្លឺថ្ងៃ ពាក់មួកដែលមានគែមធំទូលាយ ឬប្រើ ឆ័ត្រជារបាំងការពារកម្ដៅថ្ងៃពេលចេញក្រៅ ឬពេលធ្វើដំណើរ និងផ្លាស់ប្តូរសម្លៀកបំពាក់ប្រសិន បើវា សើមខ្លាំង-ត្រូវប្រកាន់ខ្ជាប់នូវក្បួនអនាម័យល្អ ហូបស្អាត ផឹកស្អាត រស់នៅស្អាតជាប់ជាប្រចាំ-ប្រើកន្សែងសើមជូតមុខ ដាក់ព័ទ្ធជុំវិញក ប្រសិនបើមានអារម្មណ៍ថាក្តៅខ្លាំងពេក ហើយអំឡុងពេល មានកម្ដៅខ្លាំងត្រូវប្រើមធ្យោបាយផ្សេងៗដើម្បីបន្ថយកម្ដៅដូចជាផ្លិតជាដើម-ត្រូវតាមដានព័ត៌មានអំពីអាកាសធាតុ ដើម្បីរៀបចំសកម្មភាពប្រចាំថ្ងៃឱ្យបានត្រឹមត្រូវសម្របទៅនឹង ការប្រែប្រួលអាកាសធាតុ-ត្រូវរក្សាទឹកទុកសម្រាប់ប្រើប្រាស់ប្រចាំថ្ងៃនិងគ្របឱ្យជិត ដើម្បីបង្ការមូសខ្លាពងដាក់ដែលអាចបង្កជំងឺ គ្រុនឈាម។២-ប្រការគួរចៀសវាងអំឡុងពេលអាកាសធាតុក្តៅខ្លាំង-ត្រូវចៀសវាងពិសាភេសជ្ជៈដែលបណ្តាលឱ្យជាតិទឹកនៅក្នុងរាងកាយថយចុះមានដូចជា ពិសាគ្រឿង ស្រវឹង ជាតិអាល់កុល កាហ្វេ តែ ភេសជ្ជៈដែលមានជាតិកាហ្វេអ៊ីន និងជាតិស្ករច្រើន ជាតិអំបិលច្រើន -ត្រូវចៀសវាងនៅក្រោមពន្លឺថ្ងៃដោយផ្ទាល់យូរពេក ត្រូវស្វែងរកម្លប់ជ្រក ឬប្រើរបាំងការពារកម្ដៅ ព្រះអាទិត្យ និងកាត់បន្ថយការឱ្យពន្លឺព្រះអាទិត្យចូលក្នុងថ្នាក់រៀនច្រើនពេក និងយូរពេក-ចៀសវាងការធ្វើសកម្មភាពហាត់ប្រាណ ឬការលេងកីឡានៅក្រោមកម្ដៅថ្ងៃខ្លាំង-ត្រូវកាត់បន្ថយការទទួលទានម្ហូបអាហារដែលប្រៃពេក ផ្អែមពេក និងខ្លាញ់ច្រើនពេក ផ្ទុយមកវិញត្រូវ ទទួលទានម្ហូបអាហារណាដែលមានអំបិលតិច ផ្អែមតិច និងខ្លាញ់តិច។៣-វិធានការអនុវត្តនៅតាមគ្រឹះស្ថានសិក្សា-ត្រូវបើកទ្វារ បង្អួចនៃបន្ទប់រៀន ឱ្យបានស្រឡះល្អ-ត្រូវណែនាំសិស្សឱ្យលេងក្នុងម្លប់ ឬនៅក្នុងបន្ទប់រៀន នៅពេលចេញលេង-ត្រូវណែនាំសិស្សឱ្យយកទឹកមកពីផ្ទះ ដូចជាទឹកដាំពុះ ទឹកសុទ្ធ ទឹកចម្លោះ និងទឹកស្អាតសម្រាប់ប្រើ ប្រាស់ផ្ទាល់ខ្លួននៅគ្រឹះស្ថានសិក្សា-ត្រូវបាញ់ទឹកដាក់ទីធ្លាគ្រឹះស្ថានសិក្សា ឬដំបូលអគារសិក្សា តាមលទ្ធភាពនិងស្ថានភាពជាក់ស្តែង ដើម្បីបន្ថយកម្ដៅ ឬអាចពិភាក្សាជាមួយអ្នកអាណាព្យាបាលសិស្សដើម្បីរកលទ្ធភាពបំពាក់កង្ហារនៅ តាមបន្ទប់រៀនជាដើម-ត្រូវសហការជាមួយអ្នកពាក់ព័ន្ធក្នុងការផ្គត់ផ្គង់ទឹកសម្រាប់ទទួលទាន និងទឹកសម្រាប់ប្រើប្រាស់នៅ តាមគ្រឹះស្ថានសិក្សាឱ្យបានសមស្របតាមតម្រូវការ-ត្រូវបន្តដាំ និងថែរក្សាដើមឈើដែលមានស្រាប់នៅក្នុងបរិវេណគ្រឹះស្ថានសិក្សា ដើម្បីយកម្លប់ និងកាត់ បន្ថយកម្ដៅ-ត្រូវពិនិត្យតាមដានឱ្យបានញឹកញាប់ និងជាប្រចាំលើសុខភាពរបស់សិស្សានុសិស្ស ដែលបង្កដោយ អាកាសធាតុក្តៅខ្លាំងជាពិសេសកុមារតូចៗ-ត្រូវអនុវត្តឱ្យបានខ្ជាប់ខ្ជួននូវសេចក្តីណែនាំ ស្តីពីការពង្រឹងវិធានការអនុវត្តការលើកកម្ពស់សុវត្ថិភាព និងសុខុមាលភាពចំណីអាហារ នៅតាមគ្រឹះស្ថានសិក្សាសាធារណៈ និងឯកជន តាមលិខិតលេខ ១៨ក៏ដូចជាសេចក្តីជូនព័ត៌មានរបស់ក្រសួងសុខាភិបាល ចុះថ្ងៃទី៧ ខែមេសា ឆ្នាំ២០២៤ ស្តីពីការប្រុងប្រយ័ត្នការពារសុខភាពក្នុងអំឡុងពេលអាកាសធាតុក្តៅ៕

(អន្តរជាតិ)៖ អ្នកស្រុកនៅទីក្រុងហូជីមិញកំពុងស៊ូទ្រាំនឹងរលកកំដៅដ៏វែងបំផុតក្នុងរយៈពេលជិត 30 ឆ្នាំ បើទោះបីជាសីតុណ្ហភាព មិនទាន់ឈានដល់កម្រិតខ្ពស់ជាប្រវត្តិសាស្ត្រក៏ដោយ។តាំងពីចុងខែមីនាមក ទីក្រុងហូជីមិញ និងតំបន់ភាគខាងត្បូងជាទូទៅបានស៊ូទ្រាំនឹងរលកកំដៅដ៏ធ្ងន់ធ្ងរ ​ស្ទើរតែមិនអាចទ្រាំទ្របាន។យោងតាមចំណាត់ថ្នាក់ឧតុនិយម សីតុណ្ហភាពបានឡើងលើសពី 35 អង្សាសេ ដែលជាកម្រិតសម្រាប់​រលកកំដៅ។តាមការពិត សីតុណ្ហភាពនៅខាងក្រៅអាចឡើងលើសពីកម្រិតនេះដល់ ៣-៥ ដឺក្រេ។ការវិភាគដោយ VnExpress ដោយប្រើទិន្នន័យសីតុណ្ហភាពប្រចាំថ្ងៃក្នុងរយៈពេល 30 ឆ្នាំកន្លងមកនេះ នៅក្នុងទីក្រុងហូជីមិញ និងខេត្តជិតខាងដូចជា Dong Nai, Binh Duong និងខេត្ត Binh Phuoc ដែលនៅជិតនោះ បង្ហាញថា បួនខែដំបូងនៃឆ្នាំនេះបានជួបប្រទះនឹងរលកកំដៅដែលមិនឈប់ឈរ ដែល បានបំបែកកំណត់ត្រាប្រវត្តិសាស្ត្រជាច្រើន។មកទល់ពេលនេះ រយៈពេល 28 ថ្ងៃដែលជាកំណត់ត្រាវែងបំផុតចាប់តាំងពីឆ្នាំ 1997 ។ ចាប់តាំងពីដើមឆ្នាំនេះមក  ទីក្រុងហូជីមិញ បានកត់ត្រារលកកំដៅចំនួន 74 ថ្ងៃ ដែលជាកំណត់ត្រា ប្រចាំឆ្នាំក្នុងរយៈពេលជិត 30 ឆ្នាំចុងក្រោយនេះ នេះបើយោងតាមទិន្នន័យពីមជ្ឈមណ្ឌលជលសាស្ត្រ តំបន់ភាគខាងត្បូង៕

(អន្តរជាតិ)៖ កាលពីថ្ងៃទី ២៨ ខែមេសា ព្រះរាជក្រឹត្យមួយបាននិយាយថា ព្រះមហាក្សត្រថៃ Maha Vajiralongkorn បានអនុម័តការរុះរើ សមាជិកគណៈរដ្ឋមន្ត្រីជាច្រើនរូប នៅក្នុងរដ្ឋាភិបាលរបស់ នាយករដ្ឋមន្រ្តី លោក Srettha Thavisin ។យោងតាមសារព័ត៍មានរបស់រដ្ឋាភិបាលថៃ អតីតប្រធានផ្សារហ៊ុនថៃ លោក Pichai Chunhavajira ត្រូវបានតែងតាំងជារដ្ឋមន្ត្រីហិរញ្ញវត្ថុ ដោយទទួលតួនាទី ពីលោក ស្រេតថា។នៅក្នុងការរុះរើគណៈរដ្ឋមន្ត្រីលើកដំបូង ចាប់តាំងពីរដ្ឋាភិបាលរបស់លោក ស្រេថា ចូលកាន់តំណែង សមាជិកថ្មីចំនួនប្រាំមួយរូបត្រូវបានតែងតាំង ហើយរដ្ឋមន្ត្រីចំនួនបួននាក់ត្រូវបានដកចេញ ពីគណៈរដ្ឋមន្ត្រី។នាយក​រដ្ឋមន្ត្រី​ថៃ ស្រី​ថា ថាវីស៊ីន បាន​ជ្រើសរើស​រដ្ឋមន្ត្រី​ការ​បរទេស​ថ្មី បន្ទាប់ពី លោក Parnpree Bahiddha-Nukara បានលាលែងពីតំណែង បន្ទាប់ពីបាត់បង់តំណែងឧបនាយករដ្ឋមន្ត្រី នៅក្នុងការរុះរើគណៈរដ្ឋមន្ត្រី។ លោក Thavisin ក៏​បាន​លាលែង​តំណែង​រដ្ឋមន្ត្រី​ហិរញ្ញវត្ថុ ដោយ​តែងតាំង​ទីប្រឹក្សា​របស់ លោក គឺលោក Pichai Chunhavajira។ អ្នកនាំពាក្យរដ្ឋាភិបាលលោក Chai Wacharonke បានប្រាប់រ៉យទ័រថា ការលាលែងពីតំណែងរបស់លោក Parnpree នឹងមិនប៉ះពាល់ដល់ការងាររបស់ រដ្ឋាភិបាលក្នុងកិច្ចការបរទេសទេ ព្រោះលេខាធិការអចិន្ត្រៃយ៍របស់ក្រសួងការបរទេស និងមន្ត្រីអាច ធ្វើការជំនួសបាន។ នៅក្នុងតំណែងថ្មី នៃការរុះរើរដ្ឋាភិបាលនេះ មានដូចជា លោក Pichai Chunhavajira  ជាឧបនាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុ។ លោក Pichit Chuenban  រដ្ឋមន្ត្រី​ក្រសួង​ការ​បរទេសលោកស្រី Jiraporn Sinduprai  ជារដ្ឋមន្ត្រី​ការិយាល័យ​នាយក​រដ្ឋមន្ត្រី  លោក Paopoom Rojanasakul  ជាអនុរដ្ឋមន្ត្រីក្រសួងហិរញ្ញវត្ថុ និង​លោកSuchart Chomklin អនុរដ្ឋមន្ត្រីក្រសួងពាណិជ្ជកម្ម និងលោក Atthakorn Sirilatthayakorn អនុរដ្ឋមន្ត្រីក្រសួងកសិកម្ម និងសហប្រតិបត្តិការ។ ចំណែក គណៈរដ្ឋមន្ត្រីបួននាក់ ដែលត្រូវបានដកចេញពីមុខតំណែងរបស់ពួកគេ មានដូចជា​រដ្ឋមន្ត្រី​ក្រសួង​សុខាភិបាល​សាធារណៈ លោក Cholnan Srikaew រដ្ឋមន្ត្រី​ការិយាល័យ​នាយក​រដ្ឋមន្ត្រី លោក Puangpetch Chunla-ead និង​អនុរដ្ឋមន្ត្រី​កសិកម្ម​ពីរ​រូប គឺ លោក Chaiya Promma និងលោក Anucha Nakasai៕

លោក ទន់ សោភ័ណ អ្នកសម្របសម្រួលថ្នាក់ជាតិអង្គការ ILO ប្រចាំកម្ពុជាបានលើកឡើងថា រាជរដ្ឋាភិបាលកម្ពុជាអាណត្តិទី៧បានសម្រេចកិច្ចការងារជាច្រើនក្នុងការផ្តល់អត្ថប្រយោជន៍ ការពារសិទ្ធិ ដល់កម្មករនិយោជិត និងបង្កើតឱ្យមានសុខដុមនីយកម្មនៅក្នុងរោងចក្រសហគ្រាសនៅទូទាំងប្រទេស។ លោកគូសបញ្ជាក់ថា អត្ថប្រយោជន៍ទាំងនោះមានដូចជា រាជរដ្ឋាភិបាលកម្ពុជាបានរក្សាការដំឡើងប្រាក់ឈ្នួលជាទៀងទាត់ជូនកម្មករប្រចាំឆ្នាំ២០២៤, អនុញ្ញាតឱ្យកម្មករនិយោជិតប្រើប័ណ្ណ ប.ស.ស. ទទួលបានការថែទាំសុខភាពដោយឥតគិតថ្លៃ និងបានពង្រីកវិសាលភាពនៃបេឡាជាតិសន្តិសុខសង្គម (ប.ស.ស.) នៅក្នុងអាណត្តិទី៧នេះ។ លើសពីនេះទៅទៀត រាជរដ្ឋាភិបាលក៏បានបន្តផ្តល់ប្រាក់ឧបត្ថម្ភទៅដល់កម្មការិនីដែលមានផ្ទៃពោះ អំឡុងពេលសម្រាល រហូតក្រោយពេលសម្រាលកូនផងដែរ។ លោកបន្ថែមថា រាជរដ្ឋាភិបាលក៏បានដាក់ឱ្យអនុវត្តជាផ្លូវការការបណ្តុះបណ្តាលជំនាញវិជ្ជាជីវៈ និងបច្ចេកទេសទៅដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥ លាននាក់ ដែលកម្មវិធីនេះក៏បានបើកឱកាសឱ្យកម្មករនិយោជិតទៅរៀនជំនាញបន្ថែម (Re-Skill, Up-Skill) ដោយកម្មវិធីបណ្តុះបណ្តាលនេះមានសារសំខាន់ណាស់ទៅដល់កម្មករ និងបុគ្គលិកទាំងឡាយណាដែលចង់បន្ថែមជំនាញ ពីព្រោះពួកគេមានលទ្ធភាពក្នុងអភិវឌ្ឍជំនាញ និងសមត្ថភាពប្រសើរជាងមុន។ លោកបានគូសបញ្ជាក់បន្តថា កម្មវិធីប្រកួតប្រជែង សហគ្រាសមួយ ជាសហគមន៍សុខសាន្តមួយ ដែលក្រសួងការងារទើបតែប្រកាសដាក់ឱ្យអនុវត្តក៏ជាកិច្ចការងារមួយដ៏មានសារសំខាន់ណាស់ក្នុងការបង្កើតឱ្យមានសុខដុមនីយកម្មទំនាក់ទំនងវិជ្ជាជីវៈនៅក្នុងរោងចក្រសហគ្រាសនៅកម្ពុជា។ ទន្ទឹមនឹងការគាំទ្រនេះ លោកស្នើឱ្យរាជរដ្ឋាភិបាលកម្ពុជាអាណត្តិទី៧នេះកែសម្រួលចំណុចខ្វះខាតមួយចំនួនបន្ថែមទៀត ដើម្បីធ្វើឱ្យប្រសើរឡើងនូវវិស័យការងារនៅកម្ពុជា ក៏ដូចដើម្បីលើកកម្ពស់សិទ្ធិ និងជីវភាពរបស់បងប្អូនកម្មករនិយោជិតឱ្យកាន់តែប្រសើរថែមទៀតផងដែរ។ គូរកត់សម្គាល់ថា រាជរដ្ឋាភិបាលកម្ពុជានីតិកាលទី៧ ដែលមានក្រសួងការងារ និងបណ្តុះបណ្តាលវិជ្ជាជីវៈ បានសម្រេចកិច្ចការសំខាន់ៗជាច្រើននៅដើមអាណត្តិនេះ ដែលជាអនុសាសន៍ដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ក្នុងនោះរួមមាន៖ទី១ ការកំណត់ប្រាក់ឈ្នួលអប្បរមាសម្រាប់កម្មករនិយោជិតឆ្នាំ២០២៤ទី២ ការដាក់ឱ្យដំណើរការរបបសន្តិសុខសង្គមផ្នែកថែទាំសុខភាព តាមរបបភាគទានស្ម័គ្រចិត្តសម្រាប់បុគ្គលស្វ័យនិយោជន៍ និងអ្នកក្នុងបន្ទុកសមាជិកប.ស.ស. ទី៣ ការដាក់ឱ្យដំណើរការកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យទី៤ ក្រសួងបានចុះអនុស្សរណៈនៃការយោគយល់គ្នាជាមួយវិស័យឯកជនលើកិច្ចសហប្រតិបត្តិការលើការហាត់ការ និងកម្មសិក្សាដើម្បីគាំទ្រដល់ការបណ្តុះបណ្តាលជំនាញវិជ្ជាជីវៈ និងបច្ចេកទេសទី៥ ការបន្តផ្តល់ប្រាក់ឧបត្ថម្ភទៅដល់ស្រ្តីមានផ្ទៃពោះ និងទី៦ ការដាក់ឱ្យអនុវត្តកម្មវិធីប្រកួតប្រជែង សហគ្រាសមួយ ជាសហគមន៍សុខសាន្តមួយ។ទន្ទឹមនឹងនេះ ក្រៅពីសម្រេចការអនុវត្តកិច្ចការតាមអនុសាសន៍ទាំង ៦នោះ នៅមានអនុសាសន៍ចំនួន ៤ចំណុចផ្សេងទៀត ដែលក្រសួងការងារ និងបណ្តុះបណ្តាលវិជ្ជាជីវៈ បាននិងកំពុងបង្ហាញពីវឌ្ឍនភាពជាបន្តបន្ទាប់ផងដែរ៕

(ភ្នំពេញ)៖ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈកាលពីថ្ងៃទី២៨ ខែមេសា ឆ្នាំ២០២៤ បានលើកឡើងថា ក្រសួងការងារនឹងប្រកាសពីជ័យលាភីនៃពានរង្វាន់សហគ្រាសមួយជាសហគមន៍សុខសាន្តមួយរៀងរាល់ឆ្នាំចាប់ពីថ្ងៃទី១ ខែឧសភា ឆ្នាំ២០២៥ តទៅ។ ឯកឧត្តមរដ្ឋមន្រ្តីបានគូសបញ្ជាក់ថា ពានរង្វាន់ “សហគ្រាសមួយជាសហគមន៍សុខសាន្តមួយ” មាន ៣កម្រិត គឺពានរង្វាន់លេខ១, លេខ២, និងលេខ៣ ក្នុងនោះសហគ្រាសដែលទទួលបានជ័យលាភី គឺទទួលបានការលើកទឹកចិត្ត ទី១ ពាន និងវិញ្ញាបនបត្រ “សហគ្រាសមួយជាសហគមន៍សុខសាន្តមួយ” សម្រាប់ប្រើប្រាស់តាមការចាំបាច់ និងជាឯកសារយោង ដើម្បីបង្ហាញដល់ដៃគូពាណិជ្ជកម្ម និងម្ចាស់ម៉ាកពីការគោរពច្បាប់ និងលក្ខខណ្ឌការងារនៅរោងចក្ររបស់ខ្លួន និងទី២លើកលែងការចុះអធិការកិច្ចសាមញ្ញក្នុងរយៈពេលចាប់ពី ១ឆ្នាំ ដល់ ៣ឆ្នាំ ស្របតាមកម្រិតនៃពានរង្វាន់ដែលទទួលបាន។គូរកត់សម្គាល់ដែរថា ក្រសួងការងារ និងបណ្ដុះបណ្ដាលវិជ្ជាជីវៈ បានចេញនូវប្រកាសចំនួន ៣ និងសេចក្តីសម្រេចចំនួន ១ កំណត់លក្ខណវិនិច្ឆ័យពាន “សហគ្រាសមួយជាសហគមន៍សុខសាន្តមួយ” ដោយក្នុងនោះតម្រូវឱ្យសហគ្រាសនីមួយៗ ត្រូវទទួលបានវិញ្ញាបនបត្រអនុលោមភាពចំនួន ៨ ក្នុងនោះ ៖ទី១ អនុលោមភាពនៃលក្ខខណ្ឌការងារទី២.អនុលោមភាពនៃការប្រើប្រាស់កម្មករនិយោជិតវ័យក្មេងទី៣.អនុលោមភាពនៃទំនាក់ទំនងវិជ្ជាជីវៈ។និងទី៤.អនុលោមភាព នៃលក្ខខណ្ឌស្ដីពីសុវត្ថិភាព និងសុខភាពការងារទី៥.អនុលោមភាពនៃរបបសន្ដិសុខសង្គមទី៦.អនុលោមភាពនៃការប្រើប្រាស់កម្មករនិយោជិតជាជនពិការ ទី៧.អនុលោមភាពនៃការអនុវត្តកម្មវិធីលើកកម្ពស់ផលិតភាពការងារ និងទី៨.អនុលោមភាពនៃការអនុវត្តកម្មវិធីទទួលខុសត្រូវសង្គម៕