(ភ្នំពេញ)៖ អ្នកសារព័ត៌មានចាប់អារម្មណ៍ និងកោតសរសើរចំពោះកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសរបស់វិទ្យាស្ថានពហុបច្ចេកទេសខេត្តកំពង់ស្ពឺ ដោយបានសម្តែងមោទនភាពក្នុងការប្រើវិជ្ជាជីវៈសារព័ត៌មានរបស់ខ្លួនបន្តចូលរួមផ្សព្វផ្សាយឱ្យបានទូលំទូលាយអំពីកម្មវិធីបណ្តុះបណ្តាលថ្នាក់ជាតិរបស់រាជរដ្ឋាភិបាលអាណត្តិទី៧មួយនេះទៅដល់ប្រជាពលរដ្ឋ ជាពិសេសយុវជនគោលដៅមកពីគ្រួសារក្រីក្រ និងគ្រួសារងាយរងហានិភ័យ។ ការលើកឡើងបែបនេះបន្ទាប់ពីក្រសួងការងារ និងបណ្តុះបណ្តាលវិជ្ជាជីវៈនៅថ្ងៃទី៩ ខែឧសភា ឆ្នាំ២០២៤នេះ បានដឹកនាំអ្នកសារព័ត៌មានចំនួន២០នាក់ មកពី ១០ស្ថាប័ន ចុះស្វែងយល់អំពីកម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈទៅដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥ លាននាក់ នៅវិទ្យាស្ថានពហុបច្ចេកទេសខេត្តកំពង់ស្ពឺ (PIKS)។ លោក ង៉ាន់ ទិត្យ អ្នកយកព័ត៌មានទូរទស្សន៍អប្សារាលើកឡើងថា ក្នុងនាមជាអ្នកសារព័ត៌មានមួយរូបដែលបានចុះមកកាន់វិទ្យាស្ថានបណ្តុះបណ្តាលបច្ចេកទេសខេត្តកំពង់ស្ពឺផ្ទាល់មានការចាប់អារម្មណ៍ខ្ពស់លើការបណ្តុះបណ្តាលជំនាញវិជ្ជាជីវៈ និងបច្ចេកទេសរបស់វិទ្យាស្ថានខេត្តកំពង់ស្ពឺ និងនិយាយដោយឡែករបស់រាជរដ្ឋាភិបាលអាណត្តិទី៧នេះ ពីព្រោះការសិក្សាជំនាញបច្ចេកទេសមានការអនុវត្តផ្ទាល់ដូចនៅកន្លែងធ្វើការ មានបន្ទប់ពិសោធន៍ រោងជាង និងការសិក្សាទ្រឹស្តីបានយ៉ាងល្អប្រសើរជាមួយគ្រូដែលមានបទពិសោធន៍នៅក្នុងថ្នាក់។  លោកបន្ថែមថា ការផ្សព្វផ្សាយព័ត៌មានអំពីកម្មវិធីបណ្តុះបណ្តាលវិជ្ជាជីវៈ គឺមានសារសំខាន់ណាស់សម្រាប់បញ្ជូនព័ត៌មានទៅគ្រប់ច្រកល្ហក ជាពិសេសទៅដល់យុវជនគោលដៅដែលមកពីគ្រួសារក្រីក្រ និងគ្រួសារងាយរងហានិភ័យ ហើយលោក នឹងចូលរួមផ្សព្វផ្សាយឱ្យបានទូលំទូលាយអំពីកម្មវិធីបណ្តុះបណ្តាលនេះ។ លោកស្នើឱ្យក្រសួងការងារបន្តរៀបចំដំណើរទស្សនកិច្ចអ្នកសារព័ត៌មានទៅតាមបណ្តាសាលាបណ្តុះបណ្តាលបច្ចេកទេស និងវិជ្ជាជីវៈនៅទូទាំងប្រទេសថែមទៀត ជាពិសេសដើម្បីឱ្យអ្នកសារព័ត៌មានចូលរួមស្វែងយល់ពីវឌ្ឍនភាពនៃការសិក្សា កម្មវិធីសិក្សា ជំនាញ សមត្ថភាពសិស្ស។ កញ្ញា អ៊ីសា ហាសាណៈ អ្នកយកព័ត៌មានទូរទស្សន៍ PNN លើកឡើងថា អ្នកសារព័ត៌មានដើរតួរនាទីយ៉ាងសំខាន់លើការផ្សព្វផ្សាយអំពីកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាលអាណត្តិទី៧នេះ ពីព្រោះការផ្សព្វផ្សាយព័ត៌មានជាកិច្ចការងារមួយយ៉ាងសំខាន់លើការផ្តល់ព័ត៌មានគ្រប់ជ្រុងជ្រោយទៅដល់យុវជនគោលដៅនៃកម្មវិធីបណ្តុះបណ្តាលរបស់រាជរដ្ឋាភិបាលនេះ។ កញ្ញាបន្ថែមថា កញ្ញាមានការចាប់អារម្មណ៍ខ្ពស់លើការបណ្តុះបណ្តាលជំនាញបច្ចេកទេស និងវិជ្ជាជីវៈរបស់វិទ្យាស្ថានពហុបច្ចេកទេសខេត្តកំពង់ស្ពឺនេះ ពីព្រោះសិក្ខាកាមមានការយល់ដឹងជ្រៅជ្រះលើការសិក្សាជំនាញរបស់ខ្លួន។ កញ្ញានឹងចូលរួមផ្សព្វផ្សាយឱ្យបានទូលំទូលាយនៃកម្មវិធីបណ្តុះបណ្តាលជំនាញនេះឱ្យដល់ប្រជាពលរដ្ឋ ជាពិសេសយុវជនមកពីគ្រួសារក្រីក្រ និងគ្រួសារងាយរងហានិភ័យដែលពួកគាត់ចូលរៀនដោយឥតគិតថ្លៃ និងទទួលបានប្រាក់ឧបត្ថម្ភចំនួន ២៨ម៉ឺនរៀលក្នុងមួយខែផងដែរ។ គួរបញ្ជាក់ផងដែរថា វិទ្យាស្ថានពហុបច្ចេកទេសខេត្តកំពង់ស្ពឺស្ថិតនៅភូមិទំពូង ឃុំកាហែង ស្រុកសំរោងទង ខេត្តកំពង់ស្ពឺ ក្នុងនោះវិទ្យាស្ថានបាននឹងកំពុងបណ្តុះបណ្តាលជំនាញបច្ចេកទេស និងវិជ្ជាជីវៈដល់សិស្សចំនួន ៧៩៣នាក់ លើមុខជំនាញចំនួន១៩ដូចជា ការងារកំបោរ ការដំឡើងបណ្តាញបំពង់ទឹក ការដំឡើងបណ្តាញអគ្គិសនីក្នុងអាគារ ការដំឡើងពុម្ភ ការដំឡើងកាមេរ៉ាសុវត្ថិភាព ការផ្សារអគ្គិសនី ការថែទាំ និងជួសជុលម៉ាស៊ីនត្រជាក់រថយន្ត ការថែទាំ និងជួសជុលអគ្គិសនីរថយន្ត សេវាកម្មធនធានមនុស្ស សេវាកម្មកុំព្យូទ័រ សេវាកម្មអតិថិជន ការរចនាក្រាហ្វិកដោយកុំព្យូទ័រ សេវាកម្មបរិក្ខារត្រជាក់ក្នុងគេហដ្ឋាន ធុរកិច្ចភេសជ្ជៈ ការធ្វើម្ហូបខ្មែរ ការដាំ ថែទាំ និងប្រមូលផលដំណាំស្វាយកែរមៀត ការចញ្ចឹម និងថែទាំត្រីប្រា និងការកែច្នៃបន្លែ និងផ្លែឈើ៕

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហាញនូវស្មារតីជាតិនិមយរបស់ប្រជាជនកម្ពុជា គាំទ្រគម្រោង ព្រែកជីកហ្វូណនតេជោ។នៅព្រឹកថ្ងៃសុក្រ ទី១០ ខែឧសភា ឆ្នាំ២០២៤នេះ សម្តេចធិបតី បានបង្ហោះរូបភាព ភ្ជាប់ជាមួយខ្លឹមសារនៅលើបណ្ដាញសង្គមយ៉ាងដូច្នេះថា៖ ជនរួមជាតិខ្មែរក្មេងចាស់ប្រុសស្រីគ្រប់មជ្ឈដ្ឋាន ចូលរួមសកម្មផុលផុសគាំទ្រគម្រោង “ព្រែកជីកហ្វូណនតេជោ” ដែលជាគម្រោងប្រវត្តិសាស្ត្រលើកទី១ ក្នុងវិស័យដឹកជញ្ជូនតាមផ្លូវទឹករបស់កម្ពុជា ដើម្បីកាត់បន្ថយថ្លៃដើមដឹកជញ្ជូនទំនិញ និងទេសចរណ៍ ដោយនឹងផ្តល់ផលប្រយោជន៍យ៉ាងច្រើនសម្រាប់សេដ្ឋកិច្ចជាតិ៕

(ភ្នំពេញ)៖ នៅព្រឹកថ្ងៃសុក្រ ទី១០ ខែឧសភា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ លោកស្រី Chihoko Asada Miyakawa ឧបការីអគ្គនាយក និងជានាយិកាប្រចាំតំបន់អាស៊ី-ប៉ាស៊ីហ្វិក នៃអង្គការអន្តរជាតិខាងការងារ (ILO) ចូលជួបក្នុងជំនួបសម្ដែងការគួរសម និងពិភាក្សាការងារ នៅវិមានសន្តិភាព រាជធានីភ្នំពេញ៕

(ភ្នំពេញ)៖ នាទីស្តីការគណៈរដ្ឋមន្ត្រី កាលពីព្រឹកថ្ងៃទី ៩ ខែឧសភា ឆ្នាំ២០២៤នេះ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានអនុញ្ញាតឱ្យគណៈប្រតិភូមេធាវីអន្តរជាតិ មកពីប្រទេសចំនួន ១២ប្រទេស ចូលជួបសំដែងការគួរសមក្នុងអំឡុងពេលគណៈប្រតិភូមេធាវីអន្តរជាតិទាំងអស់នេះ បានអញ្ជើញមកប្រទេសកម្ពុជា ដើម្បីចូលរួមសន្និសីទអន្តរជាតិ ក្រោមប្រធានបទ «ការចែករំលែកឧត្តមានុវត្តន៍ដើម្បីផ្តល់ជំនួយផ្នែកច្បាប់កាន់តែមានប្រសិទ្ធភាពនៅអាស៊ី»។ គណៈប្រតិភូមេធាវីអន្តរជាតិ មកពី ១២ប្រទេសនេះ រួមមាន ប្រទេសម៉ាឡេស៊ី ហ្វីលីពីន ប្រ៊ុយណេ គុយវ៉ែត កូរ៉េខាងត្បូង ជប៉ុន ឥណ្ឌា កាហ្សាក់ស្ថាន រុស្សី អាល្លឺម៉ង់ សហរដ្ឋអាមេរិក និង LAWASIA។ជាកិច្ចចាប់ផ្តើមនៃជំនួបសវនាការ ឯកឧត្តមឧបនាយករដ្ឋមន្ត្រីប្រចាំការ បានសម្ដែងនូវការគាំទ្រ ចំពោះគណៈមេធាវីនៃព្រះរាជាណាចក្រកម្ពុជា ដែលបានរៀបចំសន្និសីទអន្តរជាតិក្រោមប្រធានបទ“ការចែករំលែកឧត្តមានុវត្តន៍ដើម្បីផ្តល់ជំនួយផ្នែកច្បាប់កាន់តែមានប្រសិទ្ធភាពនៅអាស៊ី” ក្នុងគោលបំណងលើកកម្ពស់ការយល់ដឹងអំពីសារសំខាន់នៃការផ្តល់ជំនួយផ្នែកច្បាប់ប្រកបដោយសន្តិភាព យុត្តិធម៌ សុខដុមរមនា និងចីរភាព បង្កើតជាថ្នាលសម្រាប់ការពិភាក្សាក្នុងចំណោមតួអង្គពាក់ព័ន្ធក្នុងការផ្តល់ជំនួយផ្នែកច្បាប់ចែករំលែកឧត្តមានុវត្តន៍ពីតាមបណ្តាយុត្តាធិការនិងវិស័យពាក់ព័ន្ធ ដើម្បីផ្តល់ជំនួយផ្នែកច្បាប់កាន់តែមានប្រសិទ្ធភាពខ្ពស់ និងរួមចំណែកដើម្បីអនុវត្តយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលអាណត្តិទី៧។ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានមានប្រសាសន៍ថា បន្ទាប់ពីកិច្ចព្រមព្រៀងទីក្រុងប៉ារីសនៅឆ្នាំ១៩៩១ ប្រទេសកម្ពុជាបានបង្កើតរាជាណាចក្រទី២ ដែលជារបបរាជានិយមអាស្រ័យរដ្ឋធម្មនុញ្ញ និង ប្រកាន់យកនូវទស្សនៈគ្រប់គ្រងរដ្ឋដោយយកច្បាប់ជាធំ (Rule of Law) របបប្រជាធិបតេយ្យ និងរបបទីផ្សារសេរី ជាមូលដ្ឋាននៃការកសាងរដ្ឋ និងសង្គមមួយដែលមានសន្តិភាពពេញលេញ យុត្តិធម៌ សមធម៌ វិបុលភាព ព្រមទាំងផ្តល់នូវការការពារសិទ្ធិ និងឱកាសស្មើគ្នាសម្រាប់ប្រជាជនគ្រប់រូប។ លើសពីនេះ ឯកឧត្តម វង្សី វិស្សុត ក៏បានគូសរំលេចផងដែរថា រាជរដ្ឋាភិបាលកម្ពុជា ក្រោមការដឹកនាំដ៏ប៉ិនប្រសប់របស់ សម្តេចមហាបវរធិបតី នាយករដ្ឋមន្ត្រី បានចាត់ទុកការពង្រឹងនីតិរដ្ឋជារបៀបវារៈសំខាន់មួយ និងបានខិតខំប្រឹងប្រែងពង្រឹងការអនុវត្តច្បាប់ និងពង្រឹងប្រព័ន្ធយុត្តិធម៌នៅព្រះរាជាណាចក្រកម្ពុជា ដោយក្នុងនោះរួមមានដូចជាការបង្កើតអាជ្ញាធរជាតិដោះស្រាយវិវាទក្រៅប្រព័ន្ធតុលាការ, គណៈកម្មាធិការដឹកនាំការកែទម្រង់ប្រព័ន្ធយុត្តិធម៌ និងគណៈកម្មាធិការជាតិដឹកនាំការកែទម្រង់ច្បាប់ ជាដើម។ជាការបង្ហាញនូវចក្ខុវិស័យទៅមុខ សម្រាប់ការពង្រឹងការអនុវត្តច្បាប់ក្នុងប្រទេសកម្ពុជា ក៏ដូចជាក្នុងតំបន់ ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានគូសបញ្ជាក់ថា អ្នកច្បាប់ទាំងអស់នៃប្រទេសកំពុងអភិវឌ្ឍ មានកាតព្វកិច្ចសហការសិក្សា ចែករំលែកបទពិសោធ និងធ្វើសុខដុមនីយកម្មការយល់ដឹងអំពីទស្សនាទាន និងចក្ខុវិស័យច្បាប់សំខាន់ៗ ដើម្បីយកមកអនុវត្តនៅក្នុងតំបន់ និងក្នុងប្រទេសរៀងៗខ្លួនឱ្យសមស្របទៅនឹងបរិបទជាក់ស្តែង និងមានអំណោយផលក្នុងការបន្តពង្រឹង Rule of Law និង របបប្រជាធិបតេយ្យ ដោយមិនគ្រាន់តែចម្លងប្រព័ន្ធច្បាប់ពីប្រទេសអភិវឌ្ឍន៍នោះទេ។ ក្នុងស្មារតីនេះ ឯកឧត្តម វង្សី វិស្សុត ក៏បានចែករំលែកនូវធាតុផ្សំមួយចំនួន ដើម្បីពង្រឹង Rule of Law ដោយក្នុងនោះរួមមាន ច្បាប់ល្អសមរម្យ និងមានតម្លៃនៅក្នុងបរិបទជាក់ស្តែងក្នុងប្រទេស ប្រព័ន្ធយុត្តិធម៌ដែលល្អនិងគួរឱ្យជឿជាក់បានមានអ្នកអនុវត្តច្បាប់ល្អពីគ្រប់មជ្ឈដ្ឋាន និងមានការផ្តល់ជំនួយផ្នែកច្បាប់នានាដល់ប្រជាជនក្រីក្រ និង ងាយរងគ្រោះ ឬ ជួបការលំបាក ធ្វើយ៉ាងណាឱ្យប្រជាជនទាំងអស់គ្នាមានភាពស្មើគ្នាចំពោះមុខច្បាប់។ មិនត្រឹមតែប៉ុណ្ណោះ ឯកឧត្តមឧបនាយករដ្ឋមន្ត្រីប្រចាំការ ក៏បានសង្កត់ធ្ងន់លើភាពចាំបាច់ក្នុងការផ្សារភ្ជាប់ច្បាប់ជាមួយនឹងការអភិវឌ្ឍជាក់ស្តែង ដើម្បីធ្វើយ៉ាងណាឱ្យច្បាប់មានតម្លៃក្នុងការការពារផលប្រយោជន៍ និងគាំទ្រដល់ប្រជាជន និងការអភិវឌ្ឍ ដោយក្នុងនោះច្បាប់មានមុខងារសំខាន់ក្នុងការកំណត់ប្រសិទ្ធភាពនៃស្ថាប័នសំខាន់ៗ ជាពិសេសស្ថាប័ន ទីផ្សារសេរី និងរបបប្រជាធិបតេយ្យ ដែលជាមូលដ្ឋានសំខាន់សម្រាប់ការអភិវឌ្ឍ។ជាមួយគ្នានេះដែរ ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានថ្លែងអំណរគុណដល់គណៈមេធាវីនៃព្រះរាជាណាចក្រកម្ពុជា ដែលបានផ្តល់នូវការការពារ និងប្រឹក្សាយោបល់ដោយឥតគិតថ្លៃជូនដល់ប្រជាជនក្រីក្រ និង ងាយរងគ្រោះកន្លងមក ព្រមទាំងថ្លែងអំណរគុណដល់គណៈប្រតិភូមេធាវីអន្តរជាតិទាំងអស់ ដែលបានអញ្ជើញមកចូលរួមសន្និសីទនៅប្រទេសកម្ពុជាដើម្បីចែករំលែកចំណេះដឹង និងបទពិសោធន៍នានាពាក់ព័ន្ធនឹងការផ្តល់ជំនួយផ្នែកច្បាប់។ ក្នុងនោះដែរ ឯកឧត្តម វង្សី វិស្សុត សង្ឃឹមថាសន្និសីទអន្តរជាតិ ក្រោមប្រធានបទ «ការចែករំលែកឧត្តមានុវត្តន៍ដើម្បីផ្តល់ជំនួយផ្នែកច្បាប់កាន់តែមានប្រសិទ្ធភាពនៅអាស៊ី» នឹងដំណើរការប្រកបដោយរលូន និងបានលើកទឹកចិត្តឱ្យគណៈប្រតិភូទាំងអស់បន្តផ្លាស់ប្តូរមតិយោបល់ និងចក្ខុវិស័យនានា ពាក់ព័ន្ធនឹងការកសាងប្រព័ន្ធច្បាប់ ការកសាង Rule of Law និងការកសាងបណ្តាញសហគមន៍អ្នកច្បាប់ ដើម្បីចូលរួមសហការលើកកម្ពស់តម្លៃនៃច្បាប់ទាំងអស់គ្នា៕

(អន្តរជាតិ)៖ ប្រទេស សិង្ហបុរីបានឃើញការកើនឡើងនៃបុគ្គលចំនួន 3,400 នាក់ដែលមានទ្រព្យសម្បត្តិជាង 1 លានដុល្លារកាលពីឆ្នាំមុន ដែលធ្វើឱ្យវាក្លាយជាទីក្រុង ដែលមានទ្រព្យសម្បត្តិច្រើនជាងគេទី 4 នៅលើពិភពលោក នេះបើយោងតាមរបាយការណ៍ថ្មីមួយ។ The Straits Times បានរាយការណ៍ថា ឥឡូវនេះរដ្ឋមានមហាសេដ្ឋីចំនួន 244,800 នាក់ មហាសេដ្ឋីចំនួន 336 នាក់ និងមហាសេដ្ឋីចំនួន 30 នាក់ នេះបើយោងតាមការរាយការណ៍របស់ The Straits Times ដោយដកស្រង់សម្តីអ្នកប្រឹក្សាផ្នែកចំណាកស្រុក វិនិយោគ Henley & Partners ' 2024 Wealthiest Cities Report ។របាយការណ៍បានកត់សម្គាល់ថា ប្រទេសសិង្ហបុរីបានមើលឃើញចំនួនមហាសេដ្ឋីរបស់ខ្លួនកើនឡើង 64% ពីឆ្នាំ 2013 ដល់ឆ្នាំ 2023។ ទីក្រុងតូក្យូរបស់ប្រទេសជប៉ុនជាប់ចំណាត់ថ្នាក់លេខ 3 ជាមួយនឹងមហាសេដ្ឋីចំនួន 298,300 ធ្លាក់ចុះ 5% ក្នុងរយៈពេលមួយទសវត្សរ៍កន្លងមកនេះ។ទោះជាយ៉ាងណាក៏ដោយ មហាសេដ្ឋី និងមហាសេដ្ឋីចំនួន 267 នាក់ និង 14 នាក់រៀងៗខ្លួន តាមពីក្រោយប្រទេសសិង្ហបុរី។ នៅឆ្នាំនេះ ចំណងជើងនៃទីក្រុងដែលមានជាងគេបំផុតលើពិភពលោក ជាកម្មសិទ្ធិរបស់ទីក្រុងញូវយ៉ករបស់សហរដ្ឋអាមេរិក ដែលចំនួនប្រជាជនដែលមានទ្រព្យសម្បត្តិសុទ្ធ បានកើនឡើង 48% ក្នុងទសវត្សរ៍ចុងក្រោយដល់ 349,500 នាក់ក្នុងឆ្នាំ 2023 នេះបើយោងតាម CNBC ។តំបន់ឈូងសមុទ្ររបស់សហរដ្ឋអាមេរិកដែលគ្របដណ្តប់ទីក្រុង San Francisco និង Silicon Valley កាន់កាប់កន្លែងទីពីរជាមួយនឹង 305,700 HNWIs កើនឡើង 82% ក្នុងអំឡុងពេល 2013-23៕

(សង្គម)៖ រដូវកាលផ្លែសំរងក៏មកដល់ឃើញមានពលរដ្ឋខ្មែរជាច្រើនបានម្នីម្នា ឯខ្លះទៀតសុខចិត្តសំរាកការងារដើម្បីទៅប្រមូលផលផ្លែសំរងយកមកលក់ ដោយហេតុថាផ្លែសំរងកាន់តែមានតម្លៃថ្លៃបានធ្វើឱ្យអ្នករកផ្លែសំរងមួយចំនួនកើតចិត្តលោភលន់ចង់បានច្រើនរហូតឈានដល់ការហ៊ានធ្វើទង្វើដែលប្រឈមមុខចំពោះច្បាប់ដោយពួកគេបានសម្រេចចិត្តកាប់រំលំដើមទាំងមូលតែម្ដង ដែលទង្វើនេះផងដែរបានធ្វើឱ្យពលរដ្ឋឯទៀតហួសចិត្តនិងសោកស្ដាយជាខ្លាំងក្នុងការបាត់បង់ធនធានធម្មជាតិពីមួយថ្ងៃទៅមួយ រហូតដល់ថ្នាក់ខ្លះសម្រេចចិត្តបង្ហោះជាសារសំណូមពរលើបណ្ដាញសង្គមសូមឱ្យបញ្ឍប់សកម្មភាពមួយនេះជាដាច់ខាត។ជាក់ស្ដែងកាលពីពេលថ្មីៗនេះ នៅថ្ងៃទី៧ ខែ ឧសភា ឆ្នាំ ២០២៤ ឃើញមានគណនីហ្វេសប៊ុកឈ្មោះ ភ្មំក្រវាញ ដួងចិត្ត បានបង្ហោះដោយអមមកជាមួយខ្លឹមសារយ៉ាងដូច្នេះថា «កាប់ដើមសំរងដើម្បីយកផ្លែ បងប្អូនបានផលតែមួយពេល។ បើរក្សាដើមវាទុក បានទាំងផលផ្លែល្អៗទុកគ្រាន់រើស បានទាំងការរក្សាបានធនធានធម្មជាតិ និងបងប្អូនមិនប្រឈមចំពោះមុខច្បាប់»។ ម្ចាស់គណនីដដែលក៏បានភ្ជាប់មកជាមួយរូបភាពជាច្រើនសន្លឹកផងដែរក្នុងនោះមានទាំងរូបភាពបងប្អូនដែលជាអ្នករកផ្លែសំរង រូបភាពដែលបង្ហាញពីផ្លែសំរងដែលមើលទៅមានគុណភាពល្អៗ និងរូបភាពដែលធ្វើឱ្យអ្នកលេងបណ្ដាញសង្គមរំជួលចិត្តនោះគឺជារូបភាពដែលបង្ហាញពីទិដ្ឋភាពនៃដើមសំរងនៅក្នុងព្រៃត្រូវបានគេកាប់បំផ្លាញផ្លួលរំលំចោលដោយឥតមានស្ដាយស្រណោះសោះក៏ដើម្បីតែផលប្រយោជន៍ផ្ទាល់ខ្លួនមួយពេល។ទោះជាយ៉ាងណាការចែករំលែកនេះផងដែរមិនមែនចង់មានន័យថាបងប្អូនខ្មែរដែលទៅរកសំរងសុទ្ធតែមានកំហុសនោះទេ គឺបងប្អូនអាចរកបានទៅតាមសមត្តភាពដើម្បីផ្គត់ផ្គងជីវភាពតែអ្វីដែលខុសនោះគគឺការកាប់បំផ្លាញ ទទួលស្គាល់ថាវានឹងអាចឱ្យអ្នករកបានផលច្រើនជាសន្ធឹកតែទាស់ត្រង់ថាផលនោះគឺបានត្រឹមមួយពេល ពេលក្រោយៗទៀតក៏ចាប់ផ្ដើមអស់បន្តិចម្ដងៗ លើសពីនោះការប្រព្រឹត្តនូវទង្វើបែបនេះគឺអាចប្រឈមមុខចំពោះច្បាប់ថែមទៀតផង៕

(ខេត្តកំពង់ស្ពឺ)៖ នៅថ្ងៃទី០៨ ខែឧសភា ឆ្នាំ២០២៤ យោងតាមការចុះផ្សាយរបស់ រដ្ឋបាលស្រុកឱរ៉ាល់ខេត្តកំពង់ស្ពឺ សូមជម្រាបជូនដំណឹងដល់សាធារណជន ពិសេសភ្ញៀវ ទេសចរណ៍ជាតិ និងអន្តរជាតិ មេត្តាជ្រាបថា កន្លងមកមានភ្ញៀវទេសចរដែលចូលចិត្តធ្វើដំណើរកំសាន្ត បែបលក្ខណៈផ្សងព្រេង ក្នុងតំបន់ឧទ្យានជាតិជួរភ្នំក្រវ៉ាញ ដែលមានតំបន់ទេសចរណ៍ដូចជា ភ្នំខ្នងផ្សារ ខ្នងស្រូវ ខ្នងវាល ជាដើម។រដ្ឋបាលស្រុកឱរ៉ាល់ បានឱ្យដឹងថា ដើម្បីធានាបាននូវសុខសុវត្ថិភាព សណ្តាប់ធ្នាប់ និងការពារបាននូវបរិស្ថាន ធនធានធម្មជាតិ ព្រមទាំងបង្ការគ្រោះថ្នាក់ផ្សេងៗជាយថាហេតុ រដ្ឋបាលស្រុកឱរ៉ាល់ មិនអនុញ្ញាតឲ្យភ្ញៀវទេសចរបើកបរយានយន្តគ្រប់ប្រភេទឡើងលើភ្នំខ្នងផ្សារឡើយ ព្រោះផ្លូវដែលមាននាពេលបច្ចុប្បន្ននេះ មិនមែនជាផ្លូវដែលអាចចរាចរណ៍បាន និងមិនមានស្លាកសញ្ញាចរាចរណ៍ត្រឹមត្រូវ អាចបង្កគ្រោះថ្នាក់ជាយថាហេតុ ពោលគឺជាផ្លូវសម្រាប់តែដំណើរការ ការដ្ឋានសាងសង់បង្គោលភ្លើងអគ្គិសនីតែប៉ុណ្ណោះ។រដ្ឋបាលស្រុកឱរ៉ាល់ បានបន្ថែមថា ភ្ញៀវទេសចរទាំងអស់ដែលមានបំណងចង់ឡើងទៅកំសាន្តនៅតំបន់ភ្នំខ្នងផ្សារ សូមធ្វើការចុះឈ្មោះ នៅការិយាល័យឧទ្យានជាតិជួរភ្នំក្រវ៉ាញ ស្ថិតនៅក្នុងភូមិកោះ ឃុំតាសាល ស្រុកឱរ៉ាល់ ហើយអាចទំនាក់ទំនងរក ប្រជាសហគមន៍ ស្ថិតនៅភូមិតាំងបំពង់ ឃុំតាសាលដែលមានបម្រើសេវាដូចជា អ្នកនាំផ្លូវ ដឹកជញ្ជូនសម្ភារ រៀបចំ ម្ហូបអាហារ និងកន្លែងស្នាក់នៅ។ រាល់មធ្យោបាយធ្វើដំណើរត្រូវរក្សាទុកនៅការិយាល័យឧទ្យានជាតិជួរភ្នំក្រវ៉ាញ ឬនៅតាមផ្ទះប្រជាសហគមន៍។រដ្ឋបាលស្រុកឱរ៉ាល់ សង្ឃឹមយ៉ាងមុតមាំថាបងប្អូនភ្ញៀវទេសចរទាំងអស់នឹងចូលរួមអនុវត្តសេចក្តីជូន ដំណឹងខាងលើឱ្យមានប្រសិទ្ធភាពខ្ពស់៕

(អន្តរជាតិ)៖ ប្រទេសស៊ែប៊ី បានបើកកម្រាលព្រំក្រហមសម្រាប់ប្រធានាធិបតីចិន លោក ស៊ី ជីនពីង ក្នុងដំណាក់កាលទីពីរនៃដំណើរទស្សនកិច្ចនៅអឺរ៉ុប សំដៅពង្រឹងទំនាក់ទំនងនយោបាយ និងសេដ្ឋកិច្ច ឱ្យកាន់តែស៊ីជម្រៅ បើទោះបីជាមានភាពតានតឹងជុំវិញសង្រ្គាមនៅអ៊ុយក្រែនក៏ដោយ។លោក Xi បានទៅដល់រដ្ឋធានីស៊ែប៊ីកាលពីល្ងាចថ្ងៃអង្គារ បន្ទាប់ពីដំណើរទស្សនកិច្ចផ្លូវរដ្ឋទៅ កាន់ប្រទេសបារាំង ដែលពេលខ្លះបានឃើញការផ្លាស់ប្តូរដ៏រឹងមាំជាមួយប្រធានាធិបតី Emmanuel Macron ស្តីពីពាណិជ្ជកម្ម និងទំនាក់ទំនងជិតស្និទ្ធរបស់ចិនជាមួយរុស្ស៊ី ទោះបីជាមានសង្រ្គាមអ៊ុយក្រែនក៏ដោយ។ប៉ុន្តែប្រទេសពីរផ្សេងទៀតដែលបានជ្រើសរើសសម្រាប់ការធ្វើដំណើរលើកដំបូងរបស់លោក Xi ទៅកាន់អឺរ៉ុបចាប់តាំងពីឆ្នាំ 2019 ដោយមានប្រទេសហុងគ្រីជាកន្លែងឈប់ចុងក្រោយ បន្ទាប់ពីប្រទេស ស៊ែប៊ី។ប្រទេសចិនបានចំណាយប្រាក់រាប់ពាន់លានចូលទៅក្នុងប្រទេសស៊ែប៊ី និងប្រទេសជិតខាងនៅ តំបន់ បាល់កង់ ជាពិសេសចូលទៅក្នុងការជីកយករ៉ែ និងការផលិត ហើយកាលពីឆ្នាំមុនទីក្រុងប៉េកាំង និង ទីក្រុងបែលក្រាដបានចុះហត្ថលេខាលើកិច្ចព្រមព្រៀងពាណិជ្ជកម្មសេរីមួយ។ប្រធានាធិបតីនៃប្រទេសស៊ែប៊ី លោក Aleksandar Vucic បានស្វាគមន៍លោក Xi និងភរិយារបស់លោក គឺលោកស្រី Peng Liyuan នៅលើកម្រាលព្រំក្រហមនៅខាងក្រៅការិយាល័យរដ្ឋាភិបាល សំខាន់ៗក្នុងទីក្រុង Belgrade ៕

(ភ្នំពេញ)៖ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម នាព្រឹកថ្ងៃព្រហស្បតិ៍ ទី៩ ខែឧសភា ឆ្នាំ២០២៤ បានអញ្ជើញដឹកនាំកិច្ចប្រជុំប្រចាំសប្ដាហ៍ នៅទីស្ដីការក្រសួងពាណិជ្ជកម្ម ដែលមានវត្តមានចូលរួមពី ឯកឧត្តម លោកជំទាវរដ្ឋលេខាធិការ ឯកឧត្តម លោកជំទាវអនុរដ្ឋលេខាធិការ ឯកឧត្តមអគ្គរាជទូត និងជាតំណាងអចិន្ត្រៃយ៍នៃព្រះរាជាណាចក្រកម្ពុជា ប្រចាំអង្គការពាណិជ្ជកម្មពិភពលោក និងអង្គការអន្តរជាតិពាក់ព័ន្ធនឹងវិស័យសេដ្ឋកិច្ច ពាណិជ្ជកម្ម ឯកឧត្តមអគ្គនាយក លោកជំទាវអគ្គាធិការ លោក-លោកស្រីអគ្គនាយករង លោក-លោកស្រីអគ្គាធិការរង លោកស្រីប្រធាន និងអនុប្រធាននាយកដ្ឋាន-វិទ្យាស្ថាន លោក-លោកស្រី ប្រធាន និងអនុប្រធានមន្ទីរ សាខាក.ប.ប. រាជធានី-ខេត្តទាំងអស់ចំណុះឱ្យក្រសួងពាណិជ្ជកម្មផងដែរ។ កិច្ចប្រជុំប្រចាំសប្ដាហ៍នេះ បានប្រព្រឹត្តទៅក្រោមរបៀបវារៈរួមមាន៖ ១. បទបង្ហាញស្តីពីការត្រៀមចូលរួមកិច្ចប្រជុំការពិនិត្យឡើងវិញជាសកលលើកទី៧ ស្តីពីជំនួយសម្រាប់ពាណិជ្ជកម្ម និងការត្រៀមរៀបចំព្រឹត្តិការណ៍ «អបអរសាទរខួប ២០ឆ្នាំ នៃកម្ពុជាចូលជាសមាជិកអង្គការពាណិជ្ជកម្មពិភពលោក»២. របាយការណ៍វឌ្ឍនភាពការងាររបស់អនុគណៈកម្មាធិការពាណិជ្ជកម្មនិងវិនិយោគ និងកិច្ចប្រជុំគណៈកម្មាធិការចម្រុះកម្ពុជា-សហភាពអឺរ៉ុប៣. របាយការណ៍វឌ្ឍនភាពការងារនៃការអនុវត្តអនុស្សរណៈយោគយល់គ្នារវាងក្រសួងពាណិជ្ជកម្ម និងក្រុមហ៊ុន Alibaba៤. ពិនិត្យវាយតម្លៃ និងផ្តល់មតិណែនាំលើការអនុវត្តការងារអន្តរក្រសួង ដើម្បីសិក្សាអំពីលទ្ធភាពបង្កើតច្រកទ្វារអ៊ីនធើណែតតែ១ (National Internet Gateway) និងការងារបច្ចេកទេសជំរុញនិងការគាំទ្រសេដ្ឋកិច្ចឌីជីថល និងរៀបចំកិច្ចព្រមព្រៀងសេដ្ឋកិច្ចឌីជីថល ៥. បញ្ហាផ្សេងៗ៕

(វ៉ាស៊ីនតោន)៖ សហរដ្ឋអាមេរិកបាននិយាយថា ខ្លួនកំពុងពិចារណាលើការបញ្ឈប់ផ្តល់អាវុធ បន្ថែមទៀត ទៅកាន់ប្រទេសអ៊ីស្រាអែល បន្ទាប់ពីខ្លួនបានបញ្ឈប់ការដឹកជញ្ជូនគ្រាប់បែកដ៏មានឥទ្ធិពល ដោយសារ មានការព្រួយបារម្ភអំពីផែនការសម្រាប់ការលុកលុយ Rafah ។ថ្លែងទៅកាន់គណៈកម្មាធិការសភា រដ្ឋមន្ត្រីការពារជាតិ លោក Lloyd Austin បានបញ្ជាក់ពីការបញ្ឈប់នេះ កាលពីសប្តាហ៍មុន លើគ្រាប់បែក ៩០៧ គីឡូក្រាម និងគ្រាប់បែក ២២៦ គីឡូក្រាម។លោក Austin បាននិយាយថា "យើងបានផ្អាកការដឹកជញ្ជូនគ្រាប់បែកដែលមានបន្ទុកខ្ពស់មួយ" សម្រាប់អ៊ីស្រាអែល ប៉ុន្តែមិនបានធ្វើការសម្រេចចុងក្រោយអំពីរបៀបបន្តការដឹកជញ្ជូននោះ។អ្នកនាំពាក្យក្រសួងការបរទេសលោក Matthew Miller បាននិយាយថា សហរដ្ឋអាមេរិកមានការព្រួយ បារម្ភយ៉ាងខ្លាំងអំពីផែនការដែលបានចែងរបស់អ៊ីស្រាអែលក្នុងការចូលទៅកាន់ទីក្រុង Rafah ជាកន្លែង ដែលប្រជាជនប៉ាឡេស្ទីនជាងមួយលាននាក់បានជ្រកកោនក្នុងអំឡុងពេលសង្រ្គាម។ប៉ុន្តែលោកបាននិយាយថា សហរដ្ឋអាមេរិកនៅតែមាន "ការប្តេជ្ញាចិត្តរយៈពេលវែង" ចំពោះសន្តិសុខរបស់អ៊ីស្រាអែល និងបានចង្អុលបង្ហាញជំនួយរបស់សហរដ្ឋអាមេរិក កាលពីខែមុនក្នុង ការបាញ់ទម្លាក់យន្តហោះគ្មានមនុស្សបើកដែលបាញ់ចេញពីប្រទេសអ៊ីរ៉ង់៕

(អន្តរជាតិ)៖ ក្រុមហ៊ុនផលិតនំជប៉ុនបាននិយាយកាលពីថ្ងៃពុធថា កញ្ចប់នំបុ័ងជាង 100,000 ត្រូវបានប្រមូលមកវិញនៅក្នុងប្រទេសជប៉ុន បន្ទាប់ពីផ្នែកខ្លះនៃសាកសពកណ្តុរខ្មៅមួយ ត្រូវបានគេរកឃើញនៅខាងក្នុងនំបុ័ង។ ការប្រមូលអាហារឡើងវិញគឺកម្រមាននៅក្នុងប្រទេសជប៉ុន ដែលជាប្រទេសដែលមានស្តង់ដារអនាម័យខ្ពស់ដ៏ល្បីល្បាញ ហើយសាជីវកម្ម Pasco Shikishima បាននិយាយថា ខ្លួនកំពុងស៊ើបអង្កេតពីរបៀបដែលសត្វកកេរនៅជាប់នឹងផលិតផលរបស់វា។ក្រុមហ៊ុនបាននិយាយថា រហូតមកដល់ពេលនេះ វាមិនបានដឹងអំពីនរណាម្នាក់ធ្លាក់ខ្លួនឈឺនោះទេ បន្ទាប់ពីបានបរិភោគនំបុ័ងពណ៌ស "chojuku" របស់វា ដែលជាតុអាហារអាហារពេលព្រឹករបស់ជប៉ុនដ៏វែង។នំបុ័ងប្រហែល 104,000 កញ្ចប់ត្រូវបានប្រមូលមកវិញនៅក្នុងប្រទេសជប៉ុនដីគោក ចាប់ពីទីក្រុងតូក្យូរហូតដល់តំបន់ Aomori ភាគខាងជើង។ ក្រុមហ៊ុនបាននិយាយនៅក្នុងសេចក្តីថ្លែង ការណ៍មួយកាលពីថ្ងៃអង្គារថា "យើងសូមអភ័យទោសយ៉ាងជ្រាលជ្រៅចំពោះការបង្កបញ្ហាដល់អតិថិជន និងអតិថិជនរបស់យើង"។ ក្រុមហ៊ុនបានបន្ថែមថា "យើងនឹងពង្រឹងប្រព័ន្ធគ្រប់គ្រងគុណភាពរបស់យើង ដើម្បីធានាថានឹងមិនមានការកើតឡើងវិញទេ"។ ភាពស្អាត និងអនាម័យត្រូវបានយកចិត្តទុកដាក់ យ៉ាងខ្លាំងនៅក្នុងប្រទេសជប៉ុន ប៉ុន្តែនៅតែមានការភ្លាត់ម្ដងម្កាលទាល់តែបាន។ នៅឆ្នាំ 2023 ហាង 7-Eleven បានសុំទោស និងប្រកាសប្រមូលមកវិញ បន្ទាប់ពីសត្វកន្លាតមួយក្បាលត្រូវបានរកឃើញនៅក្នុងគ្រាប់ស្រូវ។ រឿងអាស្រូវបំភ័យសុខភាពចុងក្រោយបង្អស់នៅប្រទេសជប៉ុនគឺជុំវិញការប្រមូលមកវិញដោយក្រុមហ៊ុនឱសថ Kobayashi Pharmaceutical នៃប្រភេទអាហារបំប៉នដែលរកឃើញថាមានសារធាតុ ធ្វើប៉ះពាល់ដល់សុខភាព។ ក្រុមហ៊ុនបាននិយាយកាលពីខែមេសាថា ខ្លួនកំពុងស៊ើបអង្កេតការស្លាប់ចំនួន 5 នាក់ដែលមានសក្តានុពលទាក់ទងនឹងផលិតផលដែលមានអង្ករដំបែក្រហម ឬ "beni koji"។ ទោះជាយ៉ាងណា ផលិតផលជប៉ុន មិនថាតែរបស់របរប្រើប្រាស់ គ្រឿងសំអាង អាហារបំប៉ន សឹងតែគ្រប់ប្រទេសនៅតំបន់អាស៊ីទទួលស្គាល់ថា ភាគច្រើនសុទ្ធតែជារបស់មានគុណភាពខ្ពស់ ព្រោះគេជឿជាក់ថា ជប៉ុន បានគិតគូរអំពីសុខភាពប្រជាជនមុនគេបង្អស់។ ប៉ុន្តែថ្មីៗ នៅប្រទេសជប៉ុន បានលេចរឿងអាស្រូវមួយចំនួន ពាក់ព័ន្ធនឹងបញ្ហាគុណភាពផលិតផលរបស់ខ្លួនជបន្តបន្ទាប់ ដែលបង្កឱ្យមានការបាត់បង់ទំនុកចិត្តអស់មួយចំនួនធំផងដែរ៕

(ភ្នំពេញ)៖ អគ្គិសនីកម្ពុជា ថ្ងៃទី ០៨ ខែឧសភា ឆ្នាំ ២០២៤ បានជូនដំណឹងដល់ប្រជាពលរដ្ឋនៅ តាមបណ្តាខណ្ឌមួយចំនួន នៅរាជធានីភ្នំពេញ ក្រុងតាខ្មៅ ខេត្តកណ្តាល និង ខេត្តកំពង់ស្ពឺ ស្តីពីការរអាក់រអួលអគ្គិសនីជាបណ្តោះអាសន្ន ដោយសារក្រុមការងារ ធ្វើការជួសជុល ផ្លាស់ប្តូរដំឡើងបរិក្ខារនានា និងរុះរើគន្លងខ្សែបណ្តាញអគ្គិសនី។ ក្នុងនោះផងដែរ ដើម្បីបង្កលក្ខណៈងាយស្រួលដល់ការដ្ឋានពង្រីកផ្លូវ នៅថ្ងៃទី០៩ ខែឧសភា ឆ្នាំ២០២៤ ដល់ថ្ងៃទី១២ ខែឧសភា ឆ្នាំ២០២៤ នៅតំបន់មួយចំនួនទៅតាមពេលវេលា និងទីកន្លែងដូចសេចក្តីជូនដំណឹងលម្អិតខាងក្រោម។ អគ្គិសនីកម្ពុជាបានបញ្ជាក់ឱ្យដឹងទៀតថា ទោះជាមានការខិតខំថែរក្សាមិនឱ្យមានការប៉ះពាល់ដល់ការផ្គត់ផ្គង់អគ្គិសនីធំដុំ ប៉ុន្តែការផ្គត់ផ្គង់ចរន្តអគ្គិសនីនៅតំបន់ខាងលើអាចនឹងមានការរអាក់រអួលខ្លះៗជៀសមិនផុតដែលយើងខ្ញុំស្នើសុំអភ័យទោសទុកជាមុន៕

(អន្តរជាតិ)៖ នាវាផ្ទុកយន្តហោះថ្មីបំផុត ធំបំផុត និងទំនើបបំផុតរបស់ប្រទេសចិន Fujian បានបោះជំហាន ដ៏ធំមួយ ដើម្បីចូលរួមជាមួយកងនាវាចរដ៏ធំបំផុតរបស់ពិភពលោក ខណៈដែលវាចេញដំណើរពីទីក្រុង សៀងហៃសម្រាប់ការសាកល្បងសមុទ្រលើកដំបូងរបស់ខ្លួន។យោងតាមរដ្ឋបាលសុវត្ថិភាពដែនសមុទ្ររបស់ទីក្រុងសៀងហៃ បានឱ្យដឹងថា ការវាយតម្លៃរបស់កងទ័ព ជើងទឹក ត្រូវបានគេរំពឹងថានឹងធ្វើឡើងនៅសមុទ្រចិនខាងកើត ដែលមានចម្ងាយប្រហែល130គីឡូម៉ែត្រ ពីកន្លែងផលិតកប៉ាល់ Jiangnan ជាកន្លែងដែលនាវាផ្ទុកយន្តហោះ កំពុងសាងសង់អស់រយៈពេលជាង6 ឆ្នាំមកហើយ។សេចក្តីប្រកាសមួយពីទីភ្នាក់ងារសារព័ត៌មានស៊ីនហួរដែលគ្រប់គ្រងដោយរដ្ឋថា ការសាកល្បងសមុទ្រ នឹងសាកល្បងជាចម្បងនូវភាពជឿជាក់ និងស្ថេរភាពនៃប្រព័ន្ធជំរុញ និងអគ្គិសនីរបស់នាវាផ្ទុកយន្តហោះ ។ ស៊ីនហួរបាននិយាយថា នាវាចម្បាំងនេះត្រូវបានដាក់ឱ្យដំណើរការនៅឆ្នាំ 2022 ហើយបាន "បញ្ចប់ការ សាកល្បងចតរបស់ខ្លួន ការងាររៀបចំ និងកែសម្រួលឧបករណ៍" ដែលធ្វើការរហូតដល់ការសាកល្បង សមុទ្រចុងក្រោយបង្អស់។មុខងារសំខាន់របស់ Fujian គឺប្រព័ន្ធcatapult អេឡិចត្រូម៉ាញេទិក ដែលនឹងអាចឱ្យវាដំណើរការយន្តហោះ ធំ និងធ្ងន់ជាងនាវា Shandong និង Liaoning ។ក្រុមអ្នកវិភាគនិយាយថា សមត្ថភាពរបស់ហ្វូជៀនក្នុងការបាញ់បង្ហោះយន្តហោះចម្បាំងធំ ដែលផ្ទុកអាវុធ កាន់តែខ្ពស់ទៅចម្ងាយឆ្ងាយនឹងផ្តល់ឱ្យក្រុមហ៊ុនដឹកជញ្ជូននូវជួរប្រយុទ្ធធំជាងយន្តហោះជំនាន់មុនរបស់ខ្លួននៅក្នុងកងនាវាចិន៕

(អន្តរជាតិ)៖ ម៉ាស៊ីនបូមធូលីយក្ស ធំជាងគេបំផុតលើពិភពលោក ដែលរចនាឡើងដើម្បីបូមយក ការបំពុលកំដៅភពផែនដីចេញពីបរិយាកាស បានចាប់ផ្តើមដំណើរការនៅប្រទេសអ៊ីស្លង់។រោងចក្រម៉ាស៊ីនបូមធូលី ដែលមានឈ្មោះថា “Mammoth” ជាពាណិជ្ជកម្មទីពីរដែលបើកដោយ ក្រុមហ៊ុនស្វីស Climeworks នៅក្នុងប្រទេស ហើយមានទំហំធំជាងក្រុមហ៊ុន Orca ជំនាន់មុន 10 ដង ដែលបានចាប់ផ្តើមដំណើរការនៅឆ្នាំ 2021។ការចាប់យកខ្យល់ដោយផ្ទាល់ គឺជាបច្ចេកវិទ្យាដែលត្រូវបានរចនាឡើង ដើម្បីបឺតខ្យល់ និងដកកាបូន ចេញ ដោយប្រើសារធាតុគីមី។ បន្ទាប់មក កាបូនអាចត្រូវបានចាក់ចូលជ្រៅក្រោមដី ប្រើឡើងវិញ ឬបំប្លែងទៅជាផលិតផលរឹង។Climeworks គ្រោងនឹងដឹកជញ្ជូនកាបូននៅក្រោមដី ដែលវានឹងត្រូវបានបំប្លែងទៅជាថ្មដោយធម្មជាតិ ដោយបិទកាបូនជាអចិន្ត្រៃយ៍។ ហើយក្រុមហ៊ុននេះ ត្រូវបានចាប់ដៃគូជាមួយក្រុមហ៊ុន Icelandic Carbfix សម្រាប់ដំណើរការនេះ។ប្រតិបត្តិការទាំងមូលនឹងត្រូវបានដំណើរការដោយថាមពលកំដៅក្នុងផែនដីដ៏ស្អាត និងសម្បូរបែបរបស់ ប្រទេស អ៊ីស្លង់។ដំណោះស្រាយអាកាសធាតុជំនាន់បន្ទាប់ កំពុងទទួលបានការចាប់អារម្មណ៍កាន់តែច្រើនពីរដ្ឋាភិបាល និងឧស្សាហកម្មឯកជន នៅពេលដែលមនុស្សបន្តដុតឥន្ធនៈហ្វូស៊ីល។ ការប្រមូលផ្តុំកាបូនឌីអុក ស៊ីតកំដៅភពផែនដីក្នុងបរិយាកាសបានឈានដល់កម្រិតខ្ពស់បំផុតនៅឆ្នាំ 2023 ។ នៅពេលដែល ភពផែនដីបន្តកំដៅឡើង  ជាមួយនឹងផលវិបាកដ៏អាក្រក់សម្រាប់មនុស្ស និងធម្មជាតិ អ្នកវិទ្យាសាស្ត្រជា ច្រើនបាននិយាយថា ពិភពលោកត្រូវស្វែងរកវិធីដើម្បីដកកាបូនចេញពីបរិយាកាស បន្ថែមពីលើការកាត់ បន្ថយឥន្ធនៈហ្វូស៊ីលយ៉ាងឆាប់រហ័ស។អ្នកតស៊ូមតិផ្នែកអាកាសធាតុមួយចំនួនក៏មានការព្រួយបារម្ភថា ម៉ាស៊ីននេះអាចបង្វែរទិសដៅពីគោល នយោបាយកាត់ បន្ថយឥន្ធនៈហ្វូស៊ីលផងដែរ។លោក Lili Fuhr នាយកកម្មវិធីសេដ្ឋកិច្ចហ្វូស៊ីលនៅមជ្ឈមណ្ឌលច្បាប់បរិស្ថានអន្តរជាតិ ដែលនិយាយ អំពីការចាប់យកកាបូនជាទូទៅបាននិយាយថា បច្ចេកវិទ្យានេះ "ពោរពេញដោយភាពមិនប្រាកដប្រជា និងហានិភ័យ អេកូឡូស៊ី"៕

(អន្តរជាតិ)៖ សមាគមអ្នកនាំចេញអង្ករថៃ (TREA) បានឱ្យដឹងថា ប្រទេសថៃ និងវៀតណាមកំពុងប្រជែង គ្នាដណ្តើមចំណាត់ថ្នាក់លេខ២ ក្នុងនាមជាប្រទេសនាំចេញអង្ករកំពូលរបស់ពិភពលោកនៅឆ្នាំនេះ ខណៈដែលប្រទេសឥណ្ឌា កំពុងតែឈរនៅលំដាប់លេខមួយ ប៉ុន្តែអាចឃើញ ការធ្លាក់ចុះយ៉ាងខ្លាំងនៃ ការនាំចេញអង្ករពីមួយឆ្នាំទៅមួយឆ្នាំ ដោយសារគោលនយោបាយផ្ទៃក្នុង។ សមាគមអ្នកនាំចេញអង្ករថៃបាននិយាយថា ស្ថិតិសម្រាប់ត្រីមាសទីមួយនៃឆ្នាំ2024 បានបង្ហាញថា ឥណ្ឌាបាននាំចេញអង្ករច្រើនជាងគេចំនួន 4.3 លានតោន ដែលធ្លាក់ចុះ 28.1% ពីមួយឆ្នាំទៅមួយឆ្នាំ។ចំណាត់ថ្នាក់ទីពីរ គឺប្រទេសថៃដែលមាន 2.46 លានតោនដែលកើនឡើងពីមួយឆ្នាំទៅមួយឆ្នាំ 19.4%  បន្ទាប់មកវៀតណាមមាន 2.18 លានតោន កើនឡើងពីមួយឆ្នាំទៅមួយឆ្នាំ17.7%  ប្រទេសប៉ាគីស្ថានមាន 1.98 លានតោន កើនឡើងពីមួយឆ្នាំទៅមួយឆ្នាំ68.5% និងសហរដ្ឋអាមេរិកដែលមាន៨តោន ស្មើនឹង 90.5% ពីមួយឆ្នាំទៅមួយឆ្នាំ។សមាគមបាននិយាយថា ការនាំចេញអង្កររបស់ប្រទេសឥណ្ឌាសម្រាប់រយៈពេលដែលនៅសល់នៃឆ្នាំ នេះ អាចនឹងធ្លាក់ចុះបន្ថែមទៀត ខណៈដែលរដ្ឋាភិបាលត្រូវបានគេរាយការណ៍ថា គ្រោងនឹងដាក់កំហិត បន្ថែមទៀតលើការនាំចេញ ដើម្បីទប់ស្កាត់ការកើនឡើងតម្លៃក្នុងស្រុក។យោងតាមសារព័ត៌មាន Mint តម្លៃអង្ករលក់រាយជាមធ្យមនៅលើទីផ្សារក្នុងស្រុកបានហក់ឡើង 13.1% ពីមួយឆ្នាំទៅមួយឆ្នាំ ដែលជំរុញឱ្យរដ្ឋាភិបាលបង្កើនវិធានការ ដើម្បីជួយអ្នកប្រើប្រាស់ក្នុងស្រុក ចំពេល ការបោះឆ្នោតសកលដែលលទ្ធផលនឹងត្រូវប្រកាសនៅក្នុងខែមិថុនា។អ្នកវិភាគជឿថា ការរឹតបន្តឹងការនាំចេញរបស់ឥណ្ឌាលើអង្ករស និងអង្ករចំហុយ ដែលបច្ចុប្បន្នបាន កំណត់ត្រឹម 25% និង 15% នៃទិន្នផលក្នុងស្រុករៀងៗខ្លួន អាចត្រូវបានកាត់បន្ថយមកត្រឹម 5% ដើម្បី ធានាបាននូវស្តុកគ្រប់គ្រាន់សម្រាប់ការប្រើប្រាស់ក្នុងស្រុក។សមាគមបានប៉ាន់ប្រមាណថាការនាំចេញអង្ករក្នុងខែមេសាមានចំនួនប្រហែល ៨សែនតោន ដែលភាគ ច្រើនបានមកពីការទិញអង្ករស ពីប្រទេសឥណ្ឌូនេស៊ី ហ្វីលីពីន ម៉ាឡេស៊ី និងជប៉ុន។ទន្ទឹមនឹងនេះដែរ អង្ករផ្កាម្លិះ កំពុងមើលឃើញតម្រូវការកាន់តែច្រើនពីសហរដ្ឋអាមេរិក កាណាដា ហុងកុង សិង្ហបុរី និងប្រទេសមួយចំនួននៅអឺរ៉ុប អង្ករថៃកាន់តែមានភាពទាក់ទាញ នៅក្នុងទីផ្សារពិភព លោក ដោយសារការធ្លាក់ថ្លៃប្រាក់បាត ទោះបីជាតម្លៃនៅតែខ្ពស់ជាងគូប្រជែង បន្តិច។គិតត្រឹមថ្ងៃទី 30 ខែមេសា តម្លៃអង្ករស 5% ពីប្រទេសថៃមានតម្លៃ 599 ដុល្លារក្នុងមួយតោនធៀប នឹងវៀតណាម (583 ដុល្លារ) និងប៉ាគីស្ថាន (582 ដុល្លារ)៕