(ជាតិ)៖ ប្រាក់រៀលខ្មែរ ត្រូវបានដាក់បញ្ជូលទៅក្នុងតារាងជួញដូររូបិយប័ណ្ណនៅបញ្ជរប្តូរប្រាក់របស់ក្រុមហ៊ុន Travelex នៅអាកាសយានដ្ឋានអន្តរជាតិ Haneda ទីក្រុងតូក្យូ ប្រទេសជប៉ុន។ នេះបើយោងតាមការចុះផ្សាយពីសំណាក់ក្រសួងព័ត៌មាន។ធនាគារជាតិនៃកម្ពុជា បានចូលរួមពិធីកាត់ខ្សែបូសម្ភោធដាក់បញ្ចូលប្រាក់រៀលក្នុង តារាងជួញដូររូបិយប័ណ្ណនៅបញ្ជរប្តូរ ប្រាក់របស់ក្រុមហ៊ុន Travelex នៅអាកាសយានដ្ឋានអន្តរជាតិ Haneda ទីក្រុងតូក្យូ ប្រទេសជប៉ុន នៅ ថ្ងៃទី១៦ ខែមេសា ឆ្នាំ២០២៤នេះ ក្រោមវត្តមាន អគ្គនាយកប្រតិបត្តិការនៃធនាគារជាតិនៃកម្ពុជា និង នាយកផ្នែកលក់ដុំសកល និងជាអគ្គនាយកប្រចាំតំបន់ អាស៊ីប៉ាស៊ីហ្វិករបស់ក្រុមហ៊ុន Travelex និងវត្តមានភ្ញៀវកិត្តិយស ព្រមទាំងតំណាងស្ថាប័នពាក់ព័ន្ធជាច្រើនរូប។វត្តមាននៃប្រាក់រៀលជាលើកដំបូងនៅប្រទេសជប៉ុននេះ នឹងជួយសម្រួលទេសចរជប៉ុនដែលមកទស្សនា ប្រទេសកម្ពុជាឱ្យមានកន្លែងប្ដូរយកប្រាក់រៀលបានដោយងាយស្រួល ព្រមទាំងជួយជំរុញភ្ញៀវទេសចរអន្តរជាតិមកទស្សនាប្រទេសកម្ពុជាកាន់តែច្រើនជាងមុន។ សំខាន់ជាងនេះទៀត វត្តមានប្រាក់រៀលនៅលើតារាងជួញដូរនៅមជ្ឈមណ្ឌលហិរញ្ញវត្ថុអន្តរជាតិ ដូចជា នៅទីក្រុងតូក្យូនៃប្រទេសជប៉ុន ជាសក្ខីភាពបញ្ជាក់ថា ប្រាក់រៀល អាចជួញដូរជាលក្ខណៈអន្តរជាតិ ព្រមទាំងឆ្លុះបញ្ចាំងអំពីកំណើននៃជំនឿទុកចិត្ត និងការទទួលស្គាល់ប្រាក់រៀល កាន់តែទូលំទូលាយកម្រិតពិភពលោក។ នេះជាលទ្ធផលនៃកិច្ចប្រឹងប្រែងរបស់ធនាគារជាតិនៃកម្ពុជាក្នុងការរក្សា ស្ថិរភាពប្រាក់រៀលក្នុងរយៈពេលពីរទសវត្សរ៍កន្លងមកនេះ។គួរបញ្ជាក់ថា នេះជាលើកទីពីរហើយដែលធនាគារជាតិនៃកម្ពុជា បានសហការជាមួយក្រុមហ៊ុន Travelex ក្នុងការដាក់បញ្ចូលប្រាក់រៀលនៅលើតារាងជួញដូរនៅមជ្ឈមណ្ឌលហិរញ្ញវត្ថុអន្តរជាតិ បន្ទាប់ពីបានដាក់បញ្ចូលនៅបញ្ជរក្នុងអាកាសយានដ្ឋានអន្តរជាតិ Changi ប្រទេសសិង្ហបុរី កាលពីឆ្នាំ២០២៣។ នៅពេលខាងមុខ ធនាគារជាតិនៃកម្ពុជា នឹងបន្តសហការជាមួយក្រុមហ៊ុន Travelex ដើម្បីដាក់ប្រាក់រៀលនៅលើតារាងជួញដូរនៅមជ្ឈមណ្ឌល ហិរញ្ញវត្ថុអន្តរជាតិជាច្រើនទៀតនៅលើពិភពលោក៕

(ព័ត៌មានជាតិ)៖ ពេលវេលាដ៏មានតម្លៃ និងសប្បាយរីករាយឥតឧបមា ក្នុងឱកាសពិធីបុណ្យចូលឆ្នាំ ប្រពៃណីជាតិ ខ្មែររយៈពេល៤ថ្ងៃ គឺនៅថ្ងៃទី១៣-១៦ មេសា ឆ្នាំ២០២៤ បានបិទបញ្ចប់ដោយរលូន បានបន្សល់ទុកនូវស្នាមញញឹម និងអនុស្សាវរីយ៍រាប់មិនអស់ ជាពិសេសនៅតាមបណ្ដាខេត្ត និងរមណីដ្ឋាននានា មានភ្ញៀវទេសចរសរុបជាង ២១,៧០លាននាក់ គឺរដ្ឋបាលរាជធានីខេត្ត រាប់បញ្ជូលចំនួនភ្ញៀវទេសចរ ដែលបានធ្វើដំណើរកម្សាន្តនៅតាមរមណីយដ្ឋាន និងគោលដៅទេសចរណ៍ទូទាំងប្រទេស។ប៉ុន្តែអ្វីដែលគួរកត់សម្គាល់នោះ ខេត្តចំនួន៥ ដែលទទួលបានចំណាត់ថ្នាក់ជើងឯក មានភ្ញៀវទេសចរទៅកម្សាន្តច្រើនជាងគេបំផុតមានដូចជា៖ ១/ ខេត្តកំពង់ចាម ទទួលបានភ្ញៀវទេសចរចំនួន 5349 811នាក់២/ ខេត្តព្រៃវែង ទទួលបានភ្ញៀវទេសចរចំនួន 2 298 402នាក់៣/ ខេត្តកំពង់ស្ពឺ ទទួលបានភ្ញៀវទេសចរចំនួន 2 103 915នាក់៤/ ខេត្តបាត់ដំបង ទទួលបានភ្ញៀវទេសចរចំនួន 1 734 629នាក់៥/ ខេត្តកំពត ទទួលបានភ្ញៀវទេសចរចំនួន 1 403 497នាក់។ នេះបើយោងតាមរបាយការណ៍របស់ក្រសួងទេសចរណ៍៕

(សង្គម)៖ ក្មេងស្រីដ៏ស្រស់ស្អាត២នាក់ កាលពីថ្ងៃទី១៥ ខែមេសា ឆ្នាំ២០២៤ កន្លងទៅ ចំថ្ងៃពិធីបុណ្យចូលឆ្នាំខ្មែរថ្ងៃទី៣ វេលាម៉ោងប្រមាណជា៦ល្ងាច ត្រូវបានស្ត្រីម្នាក់ដែលគេស្គាល់ថា ជាម្ដាយ បានយកមកបោះបង់ចោលក្នុងសួនកម្សាន្ត Sunshine Family ក្បែរបឹងកក់ រហូតមកដល់ពេលនេះហើយ នៅតែមិនទាន់ឃើញមានអាណាព្យាបាល ឬសាច់ញាតិណាម្នាក់មកទទួលក្មេងស្រីរង គ្រោះត្រឡប់ទៅផ្ទះវិញនោះទេ។ ជាក់ស្ដែង បើយោងតាមផេកហ្វេសបុករបស់សួនកម្សាន្ត Sunshine Family Park បានធ្វើការបង្ហោះរូបភាពអមដោយខ្លឹមសារថា « សេចក្ដីជូនដំណឹង កុមារតូចពីរនាក់ត្រូវបានស្រ្តីម្នាក់ បានយកមកទុកចោលនៅ សួនកម្សាន្ត Sunshine Family កាលពីថ្ងៃ 15 ខែ មេសា នៅវេលាម៉ោង ប្រហែល 6 ល្ងាច មកដល់ពេលហើយមិនមានមាតាបិតា ឬ អាណាព្យាបាលណាម្នាក់បានទាក់ទងមកទេ។ អំឡុងពេលនេះ អ្នកគ្រប់គ្រងសួនកម្សា្តនបានយកពួកគេទៅផ្ទះផ្ទាល់ខ្លួន ដើម្បីមើលថែយ៉ាងឌិតដល់។សង្ឃឹមថាបងប្អូនទាំងអស់ជួយផ្សាព្វផ្សាយដើម្បីរកមាតាបិតារបស់ពួកគេសូមទាក់ទង មកកាន់ ក្រុមការងារ Sunshine Family Park តាមលេខ ០៩៦ ២៦ ៧៤ ០០១។ជុំវិញករណីនេះ ធ្វើឱ្យមហាជនរំជួលចិត្តជាខ្លាំង និងបង្ហាញក្ដីអាណិតអាសូរដល់ក្មេងស្រីរងគ្រោះទាំង២ ខណៈ វ័យកំពុងត្រូវការការថ្នាក់ថ្នម បីបាច់មើលថែរក្សា បែរជាមកត្រូវម្ដាយបោះបង់ចោល ទាំងគ្នាមិនដឹងអ្វីសោះ។ ស្ត្រីជាម្ដាយគ្រប់រូបបាននាំគ្នាលើកឡើងថា មីម្តាយចិត្តវាមិនដឹងសាងពីអី? បើមានរឿងបញ្ហាក្នុងគ្រួសារប្តីប្រពន្ធ ក៏មិនត្រូវយកកូនមកទុកចោលបែបនេះដែល .ចេះម្ចាស់សួនគេល្អ ចុះបើប៉ះមនុស្សមិនល្អគេយកកូនយើងទៅធ្វើបាបវិញ តើចិត្តវាជាម្តាយឈឺពិនណា? បើជាកូនខ្ញុំវិញហា មិនចោលទេកូន ទោះពិបាកអត់សីុអត់ឃ្លានក៏មិនយកកូនបោះចោលដែល ខំពពោះ9ខែ10ថ្ងៃ ពិបាកហើយកើតមកបានពិននេះហើយខ្ញុំមិនភ្លើទេ វើយ ចង់ប្តីមិនត្រូវការ ក៏មានកូនជាកំម្លាំងចិត្ត។ មហាជនបានកោតសរសើរដល់ម្ចាស់ អ្នកគ្រប់គ្រងសួនកម្សាន្ត Sunshine Family Park និងសម្ដែងការអរគុណដល់ម្ចាស់សួនកម្សាន្តខាងលើដែលបានជួយមើលថែក្មេងទាំងពីរបានយ៉ាងល្អ៕

(សង្គម)៖ សង្គេតឃើញថាមួយរយៈចុងក្រោយមកនេះមហាជនហាក់ត្រលប់មកគាំទ្របន្លែដែលដាំដោយកសិករខ្មែរច្រើនជាងគាំទ្របន្លែដែលនាំចូលពីប្រទេសជិតខាង ជាក់ស្ដែងក្រោយពីឃើញរាល់ការបង្ហោះចែកចាយនូវទិន្ធផលនៃដំណាំដែលដាំដោយករសិករក្នុងស្រុក ស្របពេលជាមួយគ្នាតែងឃើញពលរដ្ឋខ្មែរស្រុះដៃស្រុះជើងក្នុងការគាំទ្រមិនថាតែការចែករំលែកនៅលើបណ្ដាញសង្គមនោះទេ បន្ថែមពីនោះពួកគេក៏បានជារាល់បន្លែទាំងនោះផងដែរ។យ៉ាងណាមិញកាលពីពេលថ្មីៗនេះមានគណនីហ្វេសប៊ុកឈ្មោះ Vicheth Chan បានបង្ហោះនូវវីដេអូនិងរូបភាពមួយចំនួនដោយអមមកជាមួយខ្លឹមសារថា«ខាត់ណាខ្មែរ ល្អណាស  ជួយគាំទ្រផលិតផលខ្មែរ ដើម្បីខ្មែរ។ ១គក : ៤០០០៛  077948533 លេខម្ចាស់ផ្ទាល់។ នៅភូមិតាត្រាវ ឃុំកន្រ្ទាំង ស្រុកប្រាសាទបាគង ខេត្តសៀមរាប។» ដោយរូបភាពដែលភ្ជាប់មកជាមួយនោះផងដែរគឺបានបង្ហាញឱ្យឃើញពីទិដ្ឋភាពនៃចម្ការផ្កាខាត់ណា បូករួមជាមួយកសិករខ្មែរកំពុងប្រមូលផល។ តាមរយៈការបង្ហោះខាងលើនេះផងដែរឃើញថាមានអ្នកប្រើប្រាស់បណ្ដាញសង្គមហ្វេសប៊ុកដែលជាពលរដ្ឋខ្មែរជាច្រើនបានចាប់អារម្មណ៍និងនាំគ្នាចែករំលែក ឯខ្លះទៀតក៏បានទំនាក់ទំនងទិញទៀតផង។ ដោយឡែកការជួយគាំទ្រនិងជាវយកទៅបរិភោគនេះផងដែរមិនមែនគ្រាន់តែដើម្បីជួយទៅកាន់កសិករនោះទេ ក៏ប៉ុន្តែដោយហេតុថាបន្លែទាំងនោះគឺមានគុណភាពល្អៗមិនចាញ់បន្លែស្រុកគេឡើយ រីឯតម្លែទៀតសោទគឺសមរម្យដែលល្មមទទួលយកបាន៕

(អន្តរជាតិ)៖ ការិយាល័យប្រព័ន្ធផ្សព្វផ្សាយរបស់រដ្ឋបាននិយាយនៅក្នុងសេចក្តីថ្លែងការណ៍មួយ កាលពីថ្ងៃពុធថា ភាពវឹកវរបានកើតឡើងនៅក្នុងប្រទេសអារ៉ាប់រួម បន្ទាប់ពីប្រទេសនេះ មានភ្លៀងធ្លាក់ខ្លាំងបំផុតក្នុងរយៈពេល 75 ឆ្នាំ ដោយតំបន់ខ្លះបានកត់ត្រាទឹកភ្លៀងលើសពី 250 មីលីម៉ែត្រ (ប្រហែល 10 អ៊ីញ) ក្នុងរយៈពេលតិចជាង 24 ម៉ោង។ ទឹកភ្លៀងដែលបានជន់លិចផ្លូវថ្នល់ ដើមត្នោត ដែលរុះរើ និងអគារដែលបាក់បែក គឺមិនធ្លាប់មាននៅក្នុងប្រទេសមជ្ឈិមបូព៌ា ចាប់តាំងពី នៅឆ្នាំ 1949។ នៅទីក្រុងឌូបៃ គោលដៅទេសចរណ៍ដ៏ពេញនិយម ជើងហោះហើរត្រូវបានលុបចោល ចរាចរណ៍បានបញ្ឈប់ ហើយសាលារៀនត្រូវបានបិទ។យោងតាមទិន្នន័យរបស់អង្គការសហប្រជាជាតិ បានឱ្យដឹងថា ភ្លៀងមួយរយមិល្លីម៉ែត្រ (ជិត 4 អ៊ីង) បានធ្លាក់ក្នុងរយៈពេលត្រឹមតែ 12 ម៉ោងកាលពីថ្ងៃអង្គារ បើយោងតាមការសង្កេតអាកាសធាតុ នៅអាកាសយានដ្ឋាន - ជុំវិញអ្វីដែលទីក្រុងឌូបៃជាធម្មតាកត់ត្រាក្នុងមួយឆ្នាំទាំងមូល។ភ្លៀងបានធ្លាក់យ៉ាងគំហុក និងយ៉ាងលឿន ដែលធ្វើឱ្យអ្នកបើកបរយានយន្តមួយចំនួន ត្រូវបង្ខំចិត្តបោះបង់យានយន្តចោល ខណៈដែលទឹកបានជន់ឡើង ហើយផ្លូវថ្នល់ក្លាយជាទន្លេ។ ភ្លៀងធ្លាក់ខ្លាំងបែបនេះ កាន់តែកើតមានជាញឹកញាប់ នៅពេលដែលបរិយាកាសកាន់តែក្តៅ ដោយសារតែការប្រែប្រួលអាកាសធាតុដែលជំរុញដោយមនុស្ស។បរិយាកាសកាន់តែក្តៅអាចស្រូបយកសំណើមបានកាន់តែច្រើនដូចជាកន្សែង ហើយបន្ទាប់មកបន្លឺវាចេញក្នុងទម្រង់នៃទឹកភ្លៀងជន់លិច។លក្ខខណ្ឌអាកាសធាតុត្រូវបានផ្សារភ្ជាប់ជាមួយនឹងប្រព័ន្ធព្យុះដ៏ធំមួយដែលឆ្លងកាត់ឧបទ្វីបអារ៉ាប់ និងរំកិលឆ្លងកាត់ឈូងសមុទ្រអូម៉ង់។ប្រព័ន្ធដូចគ្នានេះក៏កំពុងនាំមកនូវអាកាសធាតុសើមខុសពីធម្មតាទៅកាន់ប្រទេសអូម៉ង់ និងភាគអាគ្នេយ៍នៃប្រទេសអ៊ីរ៉ង់ផងដែរ។ គណៈកម្មាធិការជាតិគ្រប់គ្រងគ្រោះអាសន្ន របស់ប្រទេសបាននិយាយថា នៅក្នុងប្រទេសអូម៉ង់ យ៉ាងហោចណាស់មនុស្ស 18 នាក់បានស្លាប់ នៅក្នុងទឹកជំនន់ភ្លាមៗដែលបង្កឡើងដោយភ្លៀងធ្លាក់ខ្លាំង។ យោងតាមទីភ្នាក់ងារសារព័ត៌មានរដ្ឋ Oman បានឱ្យដឹងថា មានអ្នកស្លាប់បាត់បង់ជីវិតរួមមានសិស្សសាលាផងដែរ៕

(អន្តរជាតិ)៖ នាយកដ្ឋានឧតុនិយមម៉ាឡេស៊ី (MetMalaysia) បានចេញការព្រមានអំពីអាកាសធាតុ ក្តៅសម្រាប់តំបន់ចំនួន 14 នៅទូទាំងប្រទេស ជាពិសេសនៅក្នុងរដ្ឋ Perlis, Kedah, Kelantan, Sarawak និង Sabah ។តំបន់ដែលរងផលប៉ះពាល់គឺ Langkawi, Pendang, Kuala Muda, Kubang Pasu, Pokok Sena, Sik, Baling និង Bandar Baharu នៅ Kedah; Gua Musang នៅ Kelantan និងរដ្ឋ Perlis ទាំងមូល។ សីតុណ្ហភាពខ្ពស់ក៏ត្រូវបានរំពឹងទុកផងដែរនៅក្នុង Mukah និង Telang Usan ក្នុង Sarawak ក៏ដូចជា Tuaran និង Tenom នៅ Sabah ។MetMalaysia បាននិយាយថា រលកកំដៅ នឹងបន្តកើតមានយ៉ាងហោចណាស់បីថ្ងៃជាប់ៗគ្នា ជាមួយនឹង សីតុណ្ហភាពចន្លោះពី 35-37 អង្សាសេ។កាលពីថ្ងៃទី៧ ខែមេសា នាយកដ្ឋានបានចេញសេចក្តីជូនដំណឹងអំពីកំដៅទូទាំងប្រទេស ដោយតំបន់ ចំនួន៧ បានព្យាករណ៍ថា នឹងរក្សាសីតុណ្ហភាពពី៣៧-៤០អង្សាសេ រយៈពេល៣ថ្ងៃជាប់ៗគ្នា ហើយតំបន់ ដែលនៅសេសសល់មានសីតុណ្ហភាពពី៣៥-៣៧អង្សាសេ។នាយកដ្ឋាននេះបាននិយាយថា អាកាសធាតុក្តៅ និងស្ងួត ត្រូវបានគេរំពឹងថានឹងបន្ថយបន្តិចម្តងៗនៅ ពាក់កណ្តាលខែមេសា ខណៈដែលប្រទេសនេះកំពុងឈានចូលដំណាក់កាលអន្តរកាលទៅកាន់ខ្យល់មូសុង។ នាយកដ្ឋាននេះបន្ថែមថា វានឹងអមដោយភ្លៀងធ្លាក់ខ្លាំង និងខ្យល់បក់ខ្លាំងដែលអាចបណ្តាល ឱ្យមានទឹកជំនន់ភ្លាមៗ៕ 

(អន្តរជាតិ)៖ តម្លៃមាសសកលអាចឡើងដល់ ៣០០០ដុល្លារក្នុងមួយតម្លឹង ខណៈដែលមូលនិធិបន្ថែម បានចាក់ចូលទៅក្នុងមូលនិធិជួញដូរដែលគាំទ្រដោយលោហៈដ៏មានតម្លៃមួយប្រភេទនេះ នេះបើយោងតាមអ្នកវិភាគនៅ Citi ។ នៅប្រទេសសិង្ហបុរី តម្លៃបច្ចុប្បន្នស្ថិតនៅក្រោម 2400ដុល្លារ ក្នុងមួយតម្លឹង ដែលជាតម្លៃខ្ពស់ដែល មិនធ្លាប់មានពីមុនមកនៅក្នុងតម្លៃមាសអន្តរជាតិ។ ការកើនឡើង​នេះ​ត្រូវ​បាន​គេ​សន្មត​ថា ​បណ្តាលមក ពីការកើនឡើង ​ក្តីបារម្ភ​អំពី​ជម្លោះ​ដ៏​មាន​សក្តានុពល​រវាង​អ៊ីរ៉ង់ និង​អ៊ីស្រាអែល។ទោះបីជាអវត្តមាននៃលំហូរចូលទៅក្នុង ETFs តម្លៃមាសបានកើនឡើងជាង 20% ចាប់តាំងពីពាក់កណ្តាលខែកុម្ភៈ។ក្នុងពេលជាមួយគ្នានេះ ក្រុមហ៊ុនឈ្មួញជើងសា UBS បានកំណត់តម្លៃគោលដៅ 2700 ដុល្លារ ខណៈ ដែល ក្រុមហ៊ុន Goldman Sachs បានផ្តល់គោលដៅចំនួន 2500 ដុល្លារ។Citigroup រំពឹងថា តម្លៃមាសជាមធ្យមនឹងឡើងនៅជុំវិញ 2350 ក្នុងមួយតម្លឹងនៅឆ្នាំ 2024 បន្ទាប់មក កើនឡើង 40% ដល់ 2875ដុល្លារ ក្នុងឆ្នាំ 2025។តម្លៃនៃមាសជាធម្មតាកើនឡើងចំពេលមានភាពមិនច្បាស់លាស់ដូចជាជម្លោះ ឬជំងឺរាតត្បាត ដោយសារ បុគ្គលចាត់ទុកមាសជាការការពារប្រឆាំងនឹងអតិផរណា និងអស្ថិរភាពទីផ្សារ។នៅថ្ងៃអង្គារ ទី 16 ខែមេសា ឆ្នាំ 2024 តម្លៃមាសបានឃើញការកើនឡើងនៅលើផ្សារហ៊ុនពហុទំនិញ៕

(អន្តរជាតិ)៖ នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា អ៊ីស្រាអែលនឹងធ្វើ ការសម្រេចចិត្តដោយខ្លួនឯង អំពីវិធីការពារខ្លួន ខណៈដែលបណ្តាប្រទេសលោកខាងលិច បានអង្វរ ឱ្យមានការអត់ធ្មត់ក្នុងការឆ្លើយតបទៅនឹងការវាយប្រហារដ៏ខ្លាំងក្លាពីប្រទេសអ៊ីរ៉ង់។ សហរដ្ឋអាមេរិក សហភាពអឺរ៉ុប និងក្រុមប្រទេសឧស្សាហកម្ម G7 ទាំងអស់បានប្រកាសពីផែនការ ពិចារណាលើការដាក់ទណ្ឌកម្មកាន់តែតឹងរ៉ឹងលើអ៊ីរ៉ង់ ដែលត្រូវបានគេមើលឃើញថាមាន គោលបំណង ធ្វើសង្គ្រាមជាមួយអ៊ីស្រាអែល និងបញ្ចុះបញ្ចូលឱ្យអ៊ីស្រាអែល ទប់កំហឹងសងសឹករបស់ខ្លួន ចំពោះការវាយប្រហារដោយផ្ទាល់ពីអ៊ីរ៉ង់ជាលើកដំបូង បន្ទាប់ពីការប្រឈមមុខដាក់គ្នាជាច្រើន ទសវត្សរ៍។អ៊ីរ៉ង់បានវាយប្រហារជាការសងសឹកចំពោះការវាយប្រហារតាមអាកាសដែលសង្ស័យថា ជាស្នាដៃ អ៊ីស្រាអែល ទៅលើបរិវេណស្ថានទូតរបស់ខ្លួនក្នុងទីក្រុងដាម៉ាសកាលពីថ្ងៃទី 1 ខែមេសា។ អ៊ីស្រាអែល និងសម្ព័ន្ធមិត្តភាគច្រើនបានបាញ់ទម្លាក់រាល់មីស៊ីល និងយន្តហោះគ្មានមនុស្សបើក ហើយមិនមាន អ្នកស្លាប់ទេ ប៉ុន្តែអ៊ីស្រាអែលនិយាយថា ខ្លួនត្រូវតែសងសឹកដើម្បីការពារភាពជឿជាក់ នៃការរារាំង របស់ខ្លួន។ អ៊ីរ៉ង់និយាយថា ខ្លួនចាត់ទុកបញ្ហានេះថាជាបញ្ចប់រឿង ប៉ុន្តែនឹងសងសឹកម្តងទៀត ប្រសិនបើ អ៊ីស្រាអែលធ្វើបែបនេះម្តងទៀត។កងទ័ពអាកាសរបស់អ៊ីស្រាអែលបាននិយាយថា យន្តហោះចម្បាំងរបស់ខ្លួនបានវាយប្រហារ "ហេដ្ឋា រចនាសម្ព័ន្ធភេរវករ" នៃក្រុមហេសបូឡាដែលគាំទ្រដោយអ៊ីរ៉ង់នៅភាគខាងកើតប្រទេសលីបង់ ដោយបង្ក ឱ្យមានការព្រួយបារម្ភអំពីការកើនឡើងបន្ថែមទៀតនៅក្នុងការប៉ះទង្គិចគ្នានៅទូទាំងព្រំដែនភាគខាងជើងរបស់អ៊ីស្រាអែល។លោក Netanyahu បានជួបជាមួយរដ្ឋមន្ត្រីការបរទេសអាល្លឺម៉ង់ និងអង់គ្លេស ដែលទាំងពីរបានធ្វើ ដំណើរទៅកាន់ប្រទេសអ៊ីស្រាអែល ដែលជាផ្នែកមួយនៃការជំរុញការសម្របសម្រួលមួយ ដើម្បីរក្សា ការប្រឈមមុខដាក់គ្នារវាងអ៊ីស្រាអែល និងអ៊ីរ៉ង់ ពីការកើនឡើងទៅជាជម្លោះក្នុងតំបន់ ដែលបង្កឡើង ដោយសង្រ្គាមហ្គាហ្សា។ជាងប្រាំមួយខែ នៅក្នុងសង្រ្គាម Gaza រវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីន ដែលគាំទ្រ ដោយអ៊ីរ៉ង់ ហាម៉ាស ដែលបានឃើញការគំរាមកំហែង នៅទូទាំងមជ្ឈិមបូព៌ា អ្នកការទូតកំពុងស្វែង រកមធ្យោបាយដើម្បីបញ្ចៀសការប្រយុទ្ធដោយផ្ទាល់រវាងអ៊ីស្រាអែល និងអ៊ីរ៉ង់៕

(សង្គម)៖ ជាការពិតណាស់ដើមឈើពិតជាមានសារៈប្រយោជន៍ជាច្រើនសម្រាប់មនុស្ស សត្វនិងរុក្ខជាតិ ជាពិសេសក្នុងរដូវកាលក្ដៅបែបនេះទៀតនោះចាំបាច់ណាស់ដែលយើងត្រូវការនូវវត្តមានដើមឈើតូចធំដើម្បីកាត់បន្ថយនូវកម្ដៅ។ ជាក់ស្ដែងខាងក្រោមនេះគឺជាការធ្វើតេស្តស្ទង់កម្ដៅនៅលើដងផ្លូវរវាងកន្លែងដែលមានដើមឈើនិងពុំមាន ឃើញថាលទ្ធិផលដែលចេញមក៣ទីតាំងនៃការតេស្តគឺខុសគ្នាទាំងបីកន្លែង។យ៉ាងណាមិញយោងតាមគណនីហ្វេសប៊ុកឈ្មោះ Sok Puthea បានបង្ហោះរូបភាពមួយចំនួនដោយអមមកជាមួយខ្លឹមសារថា «តើដើមឈើមានប្រយោជន៍ជួយកាត់បន្ថោយកំដៅផែនដីបានដែររឺទេ? សៀមរាបថ្ងៃទី 11.04.2024 ម៉ោង 1-2 ថ្ងៃត្រង់កំដៅនៅតាមបណ្តោយផ្លូវនៅខេត្តសៀមរាប»។ ទន្ទឹមនឹងនោះរូបភាពដែលភ្ជាប់មកជាមួយនោះផងដែរគឺជាការធ្វើតេស្តកម្ដៅនៅលើដងផ្លូវចំនួនបីកន្លែងខុសៗគ្នា ដោយកន្លែងទីមួយគឺនៅលើដងផ្លូវមុខផ្សារលើសៀមរាបដែលជាកន្លែងវាលនឹងពុំសូវមានដើមឈើលទ្ធផលនៃការតេស្តគឺ៥០អង្សាសេ រីឯកន្លែងទីពីរវិញនោះគឺនៅលើដងផ្លូវមាត់ស្ទឹងសៀមរាបដែលមានដើមឈើធំៗអមសងខាងហើយលទ្ធផលវិញនោះគឺ៣៩អង្សាសេ និងទីតាំងកន្លែងចុងក្រោយគឺនៅលើដងផ្លូវទៅអង្គរវត្តដែលសម្បូរទៅដោយដើមឈើធំៗច្រើនអមសងខាងវិញនោះ លទ្ធផលនៃកម្ដៅឃើញថាត្រឹមតែ៣៤អង្សាសេតែប៉ុណ្ណោះ។ដោយឡែកការតេស្តជាក់ស្ដែងបែបនេះផងដែរក៏អាចសរបញ្ជាក់បានថាដើម្បីឈើពិតជាមានសារៈប្រយោជន៍ក្នុងការកាត់បន្ថយកម្ដៅបានយ៉ាងប្រាកដមែន។ តាមរយៈការបង្ហោះខាងលើនេះផងដែរក៏មានមតិរបស់មហាជនអ្នកប្រើប្រាស់បណ្ដាញសង្គមម្នាក់បានលើកឡើងដែលថា«យើងមានដឹងខ្លួនទេ រាល់ពេលមេឃក្ដៅខ្លាំងយើងដកដង្ហើមម្ដងៗសឹងមិនដល់គ្នា ថប់ៗពិបាកក្នុងខ្លួន នេះហើយគឺដោយសារកំដៅ ក្ដៅខ្លាំងពេកបានដុតកំឡោច អុកស៊ីស៊ែន ធ្វើអោយយើងខ្វះអុកស៊ីសែន តែបើកន្លែងមានដើមឈើច្រើនមិនមានបញ្ហាបែបនេះឡើយ ព្រោះដើមឈើគឺជាប្រភពផលិតអុកស៊ីសែនសម្រាប់ការរស់នៅគ្រប់មនុស្សសត្វ។» បន្ថែមពីនោះទៅទៀតក៏មានបណ្ដាមតិយោបល់សំណូមពរពីមហាជនដទៃទៀតថា«កុំដើម្បីតែប្រយោជន៍ខ្លួន ហ៊ានក្បត់នឹង មានៈសិកាខ្លួនឯង។ រស់នៅជាមនុស្សក្នុងសង្គមមួយ ត្រូវគិតពីប្រយោជន៍ជាតិជាធំ, ត្រូវគិតប្រយោជន៍រួមជាធំ, នោះប្រទេសយើងនឹងកាន់តែរីកចម្រើន»៕

រាជធានិភ្នំពេញ៖ អង្គការសត្វព្រៃ និងរុក្ខជាតិកម្ពុជា និងសហគ្រាសហ្វីស៊ីង ខេត អេកូឡូជីខល អេនធើប្រាយ ខូ អ៊ិល ធី ឌី សហការជាមួយក្រសួងបរិស្ថាន បានចងក្រងនូវរបាយការណ៍សិក្សាស្រាវជ្រាវជាលើកដំបូង ស្តីពីជីវៈចម្រុះនៅតំបន់ព្រៃកោងកាង នៃប្រទេសកម្ពុជា ដែលការស្រាវជ្រាវថ្មីបានរកឃើញវត្តមានសត្វជាង ៧០០ប្រភេទខុសគ្នា រស់នៅក្នុងតំបន់ព្រៃកោងកាង នៃប្រទេសកម្ពុជា ។ នេះបើតាមការឱ្យដឹងពីអង្គការ Fauna & Flora – Cambodia Programme ថ្ងៃទី១៧ ខែមេសា ឆ្នាំ២០២៤ ។ការសិក្សាស្រាវជ្រាវរបស់អង្គការសត្វព្រៃ និង រុក្ខជាតិកម្ពុជា និង សហគ្រាស ហ្វីស៊ីងខេត អេកូឡូជីខល អេនធើប្រាយ ខូ អ៊ិល ធី ឌី សហការជាមួយក្រសួងបរិស្ថាននេះ បានធ្វើឡើងនៅក្នុងដែនជម្រកសត្វព្រៃពាមក្រសោប ២៣ ៧៥០ហិកតា និងតំបន់រ៉ាមសារកោះកាពិ ១២ ០០០ហិកតា ។ ការរកឃើញនេះ ផ្តល់ជាចំណេះដឹងមូលដ្ឋាន អំពីជីវៈចម្រុះក្នុងតំបន់នោះ ហើយយើងរំពឹងថានឹងអាចរកឃើញប្រភេទសត្វថ្មីៗបន្ថែមទៀត ក្នុងការសិក្សាស្រាវជ្រាវនាពេលអនាគត ។ក្នុងស្រាវជ្រាវនេះ ក៏បានរកឃើញនូវប្រភេទសត្វជាច្រើនប្រភេទ ដូចជា សត្វស្វាកន្ទុយវែង ជាប្រភេទជិតផុតពូជ, សំពោចធំ, សត្វភេរោមច្រមុះ, ភេខ្មៅ, និង ខ្លាត្រី ជាប្រភេទងាយរងគ្រោះផងដែរ៕

(រតនគិរី)៖ លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរីបានឱ្យដឹងនៅល្ងាចថ្ងៃទី១៦ ខែមេសា ឆ្នាំ២០២៤នេះថា ក្នុងរយៈពេល៤ថ្ងៃ គឺចាប់ពីថ្ងៃ១៣ ដល់ថ្ងៃទី១៦ ខែមេសា ឆ្នាំ២០២៤ ក្នុងឱកាសពិធីបុណ្យ ចូលឆ្នាំថ្មីប្រពៃណីជាតិខ្មែរ ឆ្នាំរោងស័ក ព.ស ២៥៦៨ គ.ស ២០២៤នេះ ខេត្តរតនគិរី ទទួលបានភ្ញៀវទេសចរមកទស្សនាកម្សាន្ដតាមតំបន់រមណីយដ្ឋាននានាក្នុងខេត្ដមានចំនួន១៣៤,២៩១នាក់ កើនឡើង ១៧.៥៥%។លោកប្រធានមន្ទីរទេសចរណ៍បានបញ្ជាក់ថា ក្នុងចំណោមភ្ញៀវទេសចរទាំងនោះ គឺភ្ញៀវជាតិមានចំនួន៤៨,៩៧៤នាក់ កើនឡើង១.៩% ភ្ញៀវទេសចរអន្តរជាតិ ចំនួន ៦៣២នាក់ កើនឡើង ៥៨.៣១% និងប្រជាពលរដ្ឋក្នុងខេត្តចូលរួមក្នុងកម្មវិធីសង្ក្រាន្តរតនគិរី និងសង្រ្កាន្តនៅតាមបណ្តាក្រុងស្រុកទាំង៩មានចំនួន ៨៤,៧៨៥នាក់ កើនឡើង ២៨.៦១%។ដូច្នេះសរុបភ្ញៀវទាំងបីប្រភេទនេះមានចំនួន១៣៤,២៩១នាក់កើនឡើង១៧.៥៥% បើប្រៀបធៀបទៅនឹងពិធីបុណ្យចូលថ្មីឆ្នាំ២០២៣មាចំនួន១១៤,២៤៥នាក់ ប៉ុណ្ណោះ។លោក ង៉ែត ពិទូ បន្តថា ពិធីបុណ្យចូលឆ្នាំប្រពៃណីខ្មែរឆ្នាំ២០២៤នេះខេត្តរតនគិរី ដែលមានឯកឧត្តម ញ៉ែម សំអឿនជាអភិបាលខេត្ត បានរៀបចំកម្សាន្តតាមកម្មវិធីសង្ក្រាន្តរតនគិរី ក្នុងបរិវេណមន្ទីរវប្បធម៌និងវិចិត្រសិល្បៈខេត្ត និងនៅតាមបណ្តាស្រុក ក្រុង ទាំង៩នៅទូទាំងខេត្តដោយបង្កើតឱ្យមានលេងល្បែងប្រជាប្រិយនៅតាមទីវត្ត អារាមនានា និង បង្កើតឱ្យមានព្រឹត្តិការណ៍ជាច្រើនទៀត សម្រាប់ឱ្យភ្ញៀវទេសចរលេង សប្បាយ នាឱកាសបុណ្យចូលឆ្នាំថ្មី ប្រពៃណីជាតិខ្មែរយើងដើម្បីបង្កើតភាព សប្បាយជូនប្រជាពលរដ្ឋនៅតាមមូលដ្ឋានក្នុងឱកាសសង្ក្រាន្តឆ្នាំថ្មីនេះក៏ដូចរួមចំណែកបង្កើតភាពទាក់ទាញភ្ញៀវមកម្សាន្តតាមរមណីយដ្ឋានទេសចរណ៍ផងដែរ។លោកថា អ្វីដែលគួរអោយគត់សម្គាល់នោះគឺ ព្រឹតិ្តការណ៍សង្ក្រាន្តរតនគិរីនិងសង្រ្កាន្តតាមបណ្តាស្រុក ក្រុងរយៈពេល៤ថ្ងៃនេះ មានប្រជាពលរដ្ឋចំនួន ជាង៨មុឺននាក់បានចូលរួមសប្បាយរីករាយ ប្រកប ដោយ សុខសុវត្ថិភាព ធានាបាននូវសុខសន្តិសុខ សណ្តាប់ធ្នាប់ល្អ ក្រោមការយកចិត្តទុកដាក់បំផុតពីសំណាក់ កង កម្លាំងគ្រប់ប្រភេទនិងអាជ្ញាធរគ្រប់ លំដាប់ថ្នាក់របស់ខេត្តប្រជាពលរដ្ឋយើងអាចធ្វើដំណើរកម្សាន្តទៅកាន់គ្រប់ទីកន្លែងដោយពុំ មានបញ្ហាឡើយពិសេស ប្រទេសជាតិមានសុខសន្តិភាពប្រជាពលរដ្ឋធ្វើ ដំណើរកម្សាន្តដោយសប្បាយរីករាយ៕

(កណ្តាល)៖ ក្នុងរយៈពេល៤ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ចាប់ថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤កន្លងទៅថ្មីៗនេះ ខេត្តកណ្តាល មានប្រជាពលរដ្ឋបានសម្រុកដើរលេងកម្សាន្តយ៉ាងសប្បាយរីករាយគ្រប់ទីតាំងទាំងអស់នៃខេត្ត ដោយសរុបទាំងភ្ញៀវទេសចរជាតិ និងអន្តរជាតិ ដើរលេងកម្សាន្តប្រមាណ ១ ១៨២ ៦៩២ នាក់ ដោយក្នុងនោះភ្ញៀវអន្តរជាតិ ប្រមាណ ២ ០០០នាក់៕

(កំពង់ចាម)៖ ក្នុងព្រឹត្តិការណ៍សង្ក្រាន្តកំពង់ចាម រយៈពេល ៤ថ្ងៃ ក្នុងឱកាសចូលឆ្នាំថ្មីប្រពៃណីជាតិខ្មែរគិតចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ ខេត្តកំពង់ចាម ទទួលភ្ញៀវមកលេងកំសាន្ត សរុបជាង ៥លាន៣សែននាក់។យោងតាមរបាយការណ៍របស់លោក ស៊ាន សុគុន ប្រធានមន្ទីរទេសចរណ៍ ខេត្តកំពង់ចាម ឲ្យដឹងនៅថ្ងៃទី១៧ ខែមេសា នេះថា ក្នុងព្រឹត្តិការណ៍សង្ក្រាន្ត រយៈពេល ៤ថ្ងៃ ខេត្តកំពង់ចាម បានទទួលភ្ញៀវទេសចរ មកចូលរួមលេងកម្សាន្ត នៅតាមកន្លែងកម្សាន្ត រមណីយដ្ឋាននានា និងស្នាក់នៅ ក្នុងខេត្តកំពង់ចាម សរុបប្រមាណ ៥ ៣៥៥ ៦៥៥ នាក់ ក្នុងនោះភ្ញៀវទេសចរបរទេស មានចំនួន ៥១៤ នាក់៕

(បន្ទាយមានជ័យ)៖ យោងតាមរបាយការណ៍របស់មន្ទីរទេសចរណ៍ខេត្តបន្ទាយមានជ័យ បានឱ្យដឹងថា ខេត្តទទួលភ្ញៀវទេសចរកម្សាន្តនាឱកាសចូលឆ្នាំថ្មីប្រពៃណីជាតិ រយៈពេល ៤ថ្ងៃ សរុបប្រមាណ ៨៦២ ១៦២ នាក់ ក្នុងនោះភ្ញៀវទេសចរបរទេស មានចំនួនប្រមាណ ៣ ៣៧៤ នាក់៕

(កំពង់ស្ពឺ)៖ យោងតាមរបាយការណ៍ពីមន្ទីរទេសចរណ៍ខេត្តកំពង់ស្ពឺ បានឱ្យដឹងថា ភ្ញៀវទេសចរជាតិ-អន្តរជាតិ មកលេងកំសាន្ត ក្នុងព្រឹត្តិការណ៍កំពង់ស្ពឺសង្រ្កាន្ត និងនៅតាមរមណីយដ្ឋាន សហគមន៍នានានៅក្នុងខេត្ត ក្នុងឱកាសនៃពិធីបុណ្យចូលឆ្នាំថ្មី រយៈពេល ០៤ថ្ងៃកន្លងមក មានចំនួនសរុបប្រមាណ ២ ១០៣ ៩១៥ នាក់ ដោយក្នុងនោះ ភ្ញៀវទេសចរជាតិ មានប្រមាណ ២ ១០២ ២៤៧ នាក់ និងភ្ញៀវទេសចរអន្តជាតិ មានប្រមាណ ១ ៦៦៨ នាក់៕