នារសៀល ថ្ងៃទី០៣ ខែមេសា ឆ្នាំ ២០២៦ ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍ គណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកំពង់ស្ពឺ បានអញ្ជើញចូលរួម ពិធីជួបសំណេះសំណាលសួរសុខទុក្ខ និងថ្លែងអំណរគុណដល់កងកម្លាំងខេត្តកំពង់ស្ពឺ ក្នុងឱកាសនៃការខិតជិតចូលមកដល់នៃពិធីបុណ្យចូលឆ្នាំថ្មី ប្រពៃណីជាតិខ្មែរ នៅសាលាខេត្តកំពង់ស្ពឺ។ ពិធីនេះមានការអញ្ជើញចូលរួមពីសំណាក់ គណៈអភិបាលខេត្ត ឯកឧត្តម លោកជំទាវ សមាជិករដ្ឋសភា ថ្នាក់ដឹកនាំខេត្ត មេបញ្ជាការ មេបញ្ជាការរង ស្នងការនគរបាលខេត្ត មន្រ្ដីរាជការសាលាខេត្ត អភិបាលក្រុង ស្រុក និងកងកម្លាំង ប្រមាណជាង ២៨០នាក់។ជាកិច្ចចាប់ផ្ដើម ឯកឧត្តមបណ្ឌិត ជាម ច័ន្ទសោភ័ណ ប្រធានគណៈកម្មាធិការគណបក្សខេត្តកំពង់ស្ពឺ បានឡើងសម្ដែងមតិស្វាគមន៍ ចំពោះវត្តមានដ៏ខ្ពង់ខ្ពស់របស់ ឯកឧត្តម ហ៊ុន ម៉ានី ព្រមទាំងបានថ្លែងអំណរគុណយ៉ាងជ្រាលជ្រៅ ចំពោះការយកចិត្តទុកដាក់ និងការគិតគូរយ៉ាងម៉ត់ចត់ដល់សុខទុក្ខប្រជាពលរដ្ឋ និងក្រុមគ្រួសារវីរកងទ័ព នៅគ្រប់កាលៈទេស។នាឱកាសនៃពិធីសំណេះសំណាលនាឯកឧត្តម ហ៊ុន ម៉ានី ក៏បានសាកសុខទុក្ខដល់កងកម្លាំងទាំងអស់ដែលមានវត្តមាននៅទីនោះ និងកោតសរសើរ ចំពោះការប្តេជ្ញាចិត្ត និងវីរភាពដ៏មោះមុតរបស់ កងកម្លាំង ទាំងអស់ ដែលបាននិងកំពុងបំពេញបេសកកម្មដ៏ឧត្តុង្គឧត្តមក្នុងការធានា សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក្នុងក្របខណ្ឌខេត្តកំពង់ស្ពឺ។សូមជម្រាបជូនថា អំណោយដែលត្រូវប្រគល់ជូនកងកម្លាំង នាឱកាសនោះ ១ អង្គភាពទទួលបាន អង្ករ ៥ តោន មី ១០០កេស ទឹកសុទ្ធ ១០០ កេស ភេសជ្ជៈ ១០០កេស និងថវិកា ១០លានរៀល ដែលជាអំណោយដ៏ថ្លៃថ្លារបស់ ឯកឧត្តមឧបនាយករដ្ឋមន្រ្តី ហ៊ុន ម៉ានី និងមានការចូលរួមចំណែកសម្ភារៈ ថវិកាបន្ថែមមួយចំនួនពីឯកឧត្តម សេង ញ៉ក់ តំណាងរាស្រ្ដមណ្ឌលខេត្តកំពង់ស្ពឺ និងអ្នកឧកញ៉ា សំអាង វឌ្ឍនៈផងដែរ។

(ភ្នំពេញ)៖ នាឱកាសអញ្ជើញជាអធិបតីក្នុងវេទិកាធនធានមនុស្សឆ្នាំ២០២៦ របស់សភាពាណិជ្ជកម្មអឺរ៉ុបប្រចាំកម្ពុជា (EuroCham) ក្រោមប្រធានបទ «ការគិតគូរឡើងវិញពីការអនុវត្តធនធានមនុស្ស ក្នុងយុគសម័យ AI (Reimagining HR Practices in the Age of AI)» នាព្រឹកថ្ងៃទី៣ ខែមេសា ឆ្នាំ២០២៦ នៅសណ្ឋាគារ Novotel ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ថា ធនធានមនុស្ស និងទំនាក់ទំនងវិជ្ជាជីវៈ គឺជាកត្តាស្នូលនៃភាពជោគជ័យរបស់សហគ្រាស ក្រុមហ៊ុន រោងចក្រ ក្នុងសម័យដែល AI កំពុងបំប្លែងយ៉ាងឆាប់រហ័សលើទីផ្សារកម្លាំងការងារ និងប្រតិបត្តិការអាជីវកម្ម, ការអភិវឌ្ឍធនធានមនុស្សបានក្លាយជាកត្តាយុទ្ធសាស្ត្រស្នូលសម្រាប់ការប្រកួតប្រជែង និងការរីកចម្រើននាពេលអនាគត។ សម្រាប់កម្ពុជា រាជរដ្ឋាភិបាលបានវិនិយោគ ១០០លានដុល្លារក្នុងមួយឆ្នាំ ដល់មូលនិធិបណ្តុះបណ្តាលជំនាញ (SDF) សម្រាប់ផ្តល់ហិរញ្ញប្បទានដល់សហគ្រាស ក្រុមហ៊ុន រោងចក្រ ដោយផ្ទាល់សម្រាប់ចូលរួមបណ្តុះបណ្តាលធនធានមនុស្ស។ ទន្ទឹមនឹងនេះ ដើម្បីធានាឱ្យបាននូវកម្លាំងពលកម្មដែលមានសមត្ថភាព និងភាពបត់បែនខ្ពស់ក្នុងការឆ្លើយតបទៅនឹងតម្រូវការថ្មីៗនៃឧស្សាហកម្មដែលកំពុងវិវត្តឥតឈប់ឈរ ក្រសួងបាននិងកំពុងធ្វើទំនើបកម្មប្រព័ន្ធ TVET ក្នុងគោលដៅផ្គត់ផ្គង់ដល់វិនិយោគិននូវកម្លាំងពលកម្មវ័យក្មេងដែលមានថាមពល និងសក្ដានុពលស្របតាមចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានផ្តល់អាទិភាពខ្ពស់បំផុតលើការកសាងមូលធនមនុស្ស។  ឯកឧត្តមរដ្ឋមន្ត្រី បានសង្កត់ធ្ងន់ពីការប្តេជ្ញាចិត្តរបស់ក្រសួង ក្នុងការកសាងភាពជាដៃគូយុទ្ធសាស្ត្ររវាងគ្រឹះស្ថានបណ្តុះបណ្តាលបច្ចេកទេស និងវិស័យឧស្សាហកម្ម ដើម្បីរួមគ្នាបង្កើតកម្មវិធីសិក្សាផ្អែកលើការអនុវត្តការងារជាក់ស្តែង (Work-Based Learning) កម្មវិធីហ្វឹកហ្វឺនកូនជាង (Apprenticeship Program) និងការបណ្តុះបណ្តាលនៅកន្លែងធ្វើការ (On-the-Job Training-OJT)។ ការផ្សារភ្ជាប់ទ្រឹស្តីទៅនឹងការអនុវត្តជាក់ស្តែងនេះ មិនត្រឹមតែជួយពង្រឹងសមត្ថភាពសិស្សនិស្សិតឱ្យឆ្លើយតបនឹងតម្រូវការទីផ្សារប៉ុណ្ណោះទេ ប៉ុន្តែថែមទាំងផ្តល់ឱកាសឱ្យពួកគាត់អាចរកប្រាក់ចំណូលបានក្នុងអំឡុងពេលហ្វឹកហាត់ការងារផងដែរ។ ជាមួយនឹងការថ្លែងអំណរគុណយ៉ាងជ្រាលជ្រៅដល់ EuroCham ចំពោះការរៀបចំវេទិកាដ៏សំខាន់ និងការចូលរួមក្នុងការពង្រឹងកម្លាំងការងារនៅកម្ពុជាសម្រាប់អនាគត ឯកឧត្តមរដ្ឋមន្រ្តី សង្ឃឹមថាតាមរយៈវេទិកាថ្ងៃនេះ នឹងទទួលបានធាតុចូលល្អៗសម្រាប់ជួយពង្រឹងការអភិវឌ្ឍធនធានមនុស្សនៅកម្ពុជា ហើយឯកឧត្តមជំរុញឱ្យមានការវិនិយោគបន្ថែមលើធនធានមនុស្ស ដែលមិនត្រូវគិតថា ជាការចំណាយ តែជាការវិនិយោគយុទ្ធសាស្ត្រនៅក្នុងសមត្ថភាពប្រកួតប្រជែង, ការទទួលយកនវានុវត្តន៍ដោយមានការទទួលខុសត្រូវ ដូចជា AI ជាដើម ព្រមទាំងពង្រឹងកិច្ចសហការដែលរាជរដ្ឋាភិបាល និយោជក និងស្ថាប័នបណ្តុះបណ្តាល ត្រូវធ្វើការជាមួយគ្នា ដើម្បីធានាថាកម្លាំងការងារកម្ពុជា បានត្រៀមខ្លួនមិនត្រឹមតែសម្រាប់ការងារនាពេលបច្ចុប្បន្នទេ តែសម្រាប់ពេលអនាគតផងដែរ។ក្នុងវេទិកានេះដែរ លោក Tassilo Brinzer ប្រធានសភាពាណិជ្ជកម្មអឺរ៉ុបប្រចាំកម្ពុជា (EuroCham) បានថែ្លងអំណរគុណយ៉ាងជ្រាលជ្រៅចំពោះ ឯកឧត្តម ហេង សួរ ដែលបន្តគាំទ្រ និងចូលរួមវេទិកានេះជារៀងរាល់ឆ្នាំ។ លោកបានលើកឡើងថា កម្លាំងការងារនៅតែជាឆ្អឹងខ្នងដ៏សំខាន់នៃការអភិវឌ្ឍសេដ្ឋកិច្ចកម្ពុជា ខណៈដែលកិច្ចសហការរវាងរាជរដ្ឋាភិបាល និងវិស័យឯកជនក៏កាន់តែមានសារៈសំខាន់ លើការសិក្សាផ្អែកលើការអនុវត្តការងារ កម្មវិធីហ្វឹកហាត់ការងារ និងការបណ្តុះបណ្តាលនៅកន្លែងធ្វើការ។ បន្ថែមពីនេះ ការទទួលយកឧបករណ៍ឌីជីថលក្នុងការជ្រើសរើស បណ្តុះបណ្តាល ការគ្រប់គ្រងទីផ្សារ និងប្រតិបត្តិការអាជីវកម្ម នឹងជួយលើកកម្ពស់ផលិតភាព និងបន្ថយសម្ពាធលើប្រាក់ឈ្នួល។ លោកបញ្ជាក់ថា EuroCham នឹងបន្តការគាំទ្រដល់រាជរដ្ឋាភិបាល ជាពិសេសភាពជាដៃគូជាមួយក្រសួងការងារ និងសមាជិករបស់ខ្លួន ដើម្បីអភិវឌ្ឍវិស័យនេះ សម្រាប់ជាអត្ថប្រយោជន៍រួមទាំងវិស័យនេះ និងសមាជិកទាំងអស់នៅកម្ពុជា៕

(អន្តរជាតិ)៖ នាយករដ្ឋមន្ត្រីវៀតណាមបានអនុម័តកម្មវិធីជាតិមួយដើម្បីទាក់ទាញអ្នកជំនាញបរទេស និងអ្នកប្រាជ្ញវៀតណាមនៅបរទេស (OV) ឲ្យមកបង្រៀន ធ្វើការស្រាវជ្រាវ និងធ្វើការនៅស្ថាប័នឧត្តមសិក្សា និងបណ្តុះបណ្តាលវិជ្ជាជីវៈរបស់ប្រទេស។កម្មវិធីនេះមានគោលបំណងអភិវឌ្ឍ និងអនុវត្តយន្តការ និងគោលនយោបាយដ៏ជោគជ័យប្រកបដោយប្រសិទ្ធភាព ដើម្បីជ្រើសរើស ប្រើប្រាស់ និងរក្សាទេពកោសល្យអន្តរជាតិ និង OV ដែលមានសមត្ថភាពខ្ពស់។ វាត្រូវបានគេរំពឹងថានឹងពង្រឹងសមត្ថភាពវិទ្យាសាស្ត្រ និងបច្ចេកវិទ្យារបស់ប្រទេស លើកកម្ពស់កម្លាំងពលកម្មដែលមានគុណភាពខ្ពស់ បង្កើនសមត្ថភាពច្នៃប្រឌិត និងលើកកម្ពស់ការធ្វើសមាហរណកម្មអន្តរជាតិក្នុងវិស័យអប់រំ និងការស្រាវជ្រាវ។ គំនិតផ្តួចផ្តើមនេះក៏រួមចំណែកដល់គោលដៅរបស់វៀតណាមក្នុងការនាំយកប្រព័ន្ធអប់រំរបស់ខ្លួនទៅកាន់កម្រិតតំបន់ និងសកលកម្រិតខ្ពស់នៅឆ្នាំ ២០៣៥។នៅឆ្នាំ ២០៣៥ វៀតណាមកំណត់គោលដៅជ្រើសរើសអ្នកជំនាញ និងអ្នកវិទ្យាសាស្ត្រឆ្នើមយ៉ាងហោចណាស់ ៣០ នាក់ដែលមានសមត្ថភាពដឹកនាំ និងដឹកនាំភារកិច្ចសំខាន់ៗដែលបង្កើតភាពលេចធ្លោក្នុងវិស័យអប់រំ ការបណ្តុះបណ្តាល ការស្រាវជ្រាវវិទ្យាសាស្ត្រ និងការផ្ទេរបច្ចេកវិទ្យា ជាពិសេសនៅក្នុងបច្ចេកវិទ្យាយុទ្ធសាស្ត្រ និងស្នូល។លើសពីនេះ ប្រទេសនេះមានគោលបំណងទាក់ទាញអ្នកជំនាញចំនួន ៥០០ នាក់បន្ថែមទៀតសម្រាប់មុខតំណែងពេញម៉ោងនៅសាកលវិទ្យាល័យ និងស្ថាប័នវិជ្ជាជីវៈ។ បុគ្គលទាំងនេះត្រូវបានគេរំពឹងថានឹងទទួលយកតួនាទីដូចជាអ្នកដឹកនាំក្រុមស្រាវជ្រាវ ប្រធានមន្ទីរពិសោធន៍ និងនាយកកម្មវិធីនៅក្នុងវិស័យបច្ចេកវិទ្យាអាទិភាព និងទំនើបៗ។អ្នកជំនាញ និងអ្នកវិទ្យាសាស្ត្រចំនួន 1500 នាក់បន្ថែមទៀតត្រូវបានគេរំពឹងថានឹងចូលរួមក្នុងការបង្រៀន ការស្រាវជ្រាវ និងកិច្ចសហការ -ទាំងផ្ទាល់ ឬពីចម្ងាយ ជាប្រចាំជាមួយស្ថាប័នវៀតណាម។ដើម្បីសម្រេចបាននូវគោលដៅទាំងនេះ ការសម្រេចចិត្តនេះគូសបញ្ជាក់ពីភារកិច្ច និងដំណោះស្រាយសំខាន់ៗជាច្រើន រួមទាំងការកែលម្អក្របខ័ណ្ឌស្ថាប័ន និងយន្តការគោលនយោបាយ ការកសាងប្រព័ន្ធអេកូឡូស៊ី និងមូលដ្ឋានទិន្នន័យដ៏រឹងមាំដើម្បីភ្ជាប់អ្នកជំនាញសកល និងបង្កើនការទំនាក់ទំនងដើម្បីលើកកម្ពស់ប្រទេសវៀតណាមជាគោលដៅសិក្សា និងស្រាវជ្រាវដ៏ល្បីល្បាញ។ វាក៏សង្កត់ធ្ងន់លើការកៀរគរធនធានចម្រុះ ការអភិវឌ្ឍបរិយាកាសស្រាវជ្រាវទំនើប និងវិជ្ជាជីវៈ ការពន្លឿនការផ្លាស់ប្តូរឌីជីថល និងការអនុវត្តវិទ្យាសាស្ត្រ បច្ចេកវិទ្យា និងបញ្ញាសិប្បនិម្មិត ក៏ដូចជាការពង្រឹងការត្រួតពិនិត្យ និងវាយតម្លៃ។ជាពិសេស ការសម្រេចចិត្តនេះអំពាវនាវឱ្យមានការអភិវឌ្ឍស្តង់ដារ និងលក្ខខណ្ឌច្បាស់លាស់សម្រាប់អ្នកជំនាញវៀតណាមបរទេស និងក្រៅប្រទេសដែលចូលរួមក្នុងសកម្មភាពសិក្សា និងស្រាវជ្រាវនៅក្នុងប្រទេសវៀតណាម ដោយផ្តល់អាទិភាពដល់វិស័យវិទ្យាសាស្ត្រ និងបច្ចេកវិទ្យាជាយុទ្ធសាស្ត្រ និងឧស្សាហកម្មសេដ្ឋកិច្ចសំខាន់ៗ។ វាក៏ស្នើឱ្យមានយន្តការជ្រើសរើស និងតែងតាំងដែលសមស្របទៅនឹងការអនុវត្តអន្តរជាតិ ដោយធានាបាននូវភាពស៊ីសង្វាក់គ្នា តម្លាភាព និងប្រសិទ្ធភាព៕

(ភ្នំពេញ)៖ ​ក្រសួង​ការ​ងារ និង​បណ្ដុះ​បណ្ដា​លវិជ្ជា​ជីវៈ បានបង្កើត​យុទ្ធនាការ ​«ខ្មែរ​ជួយ​រក​ការ​ងារ និង​ផ្តល់​ការ​ងារ​ឱ្យ​ខ្មែរ» តាមរយៈ​ការ​ផលិត​ផ្ទាំង​ផ្សព្វ​ផ្សាយ​ចំនួនជិត ២០០​ផ្ទាំង ត្រូវបាន​ផលិត​សម្រាប់​បំពាក់​នៅ​តាម​បណ្តា​ខេត្ត​ជាប់​ព្រំដែន​ចំនួន ៦​ខេត្ត ដែលមានចំនួន ៨២ទីតាំង បូករួមទាំង ៣៣​បង្គោ​ល (បំពាក់ ៦៦ផ្ទាំង) គិតត្រឹមថ្ងៃទី៣១ ខែមីនា ឆ្នាំ​២០២៦​នេះ។លោក ស៊ុន មេសា អ្នក​នាំពាក្យ​ក្រសួង​ការ​ងារ និង​បណ្ដុះ​បណ្ដា​លវិជ្ជា​ជីវៈ​បាន​ថ្លែង​នៅថ្ងៃ​ទី០៣ ខែ​មេសា​នេះ​ថា មន្រ្តី​ជំនាញ​របស់​ក្រសួង បាន​សហ​​ការជា​មួយ​ភាគី​ពាក់​ព័ន្ធ និង​អាជ្ញា​ធរ​មូល​ដ្ឋាន បានព្រីន និង​បំពាក់​ផ្ទាំង​ផ្សព្វ​ផ្សាយ​យុទ្ធ​នា​ការ «ខ្មែរ​ជួយ​រក​ការ​ងារ និង​ផ្តល់​ការ​ងារ​ឱ្យ​ខ្មែរ»​ចំនួ​នជិត ២០០​ផ្ទាំង បូក​រួម​ទាំង ៣៣​បង្គោ​ល (បំពាក់ ៦៦​ផ្ទាំង)។លោកបន្តថា មន្រ្តីជំនាញ​បាន​បំពាក់​ផ្ទាំង Banner ខ្នា​ត ៣m x ៨m ចំនួ​ន ៥៥​ទីតាំង​ដែល​មា​នចំនួន ៥៥​ផ្ទាំង ក្នុង​នោះ​បាន​បំពាក់​នៅ​ខេត្ត​សៀម​រាប, ខេត្ត​ព្រះ​វិហារ, ខេត្ត​ឧត្តរ​មាន​ជ័យ, ខេត្ត​បន្ទាយ​មាន​ជ័យ, ខេត្តប៉ៃលិន និង​ខេត្ត​បាត់​ដំបង។សម្រាប់​ផ្ទាំង​ប៉ាណូ​(Billboard Unipolar) ត្រូវ​បាន​បំ​ពាក់​ចំនួន ២២​ទី​តាំង ដែល​មាន​ចំនួន ៤៣​ផ្ទាំង​នៅ​ខេត្ត​កំពង់​ធំ, ខេត្តសៀមរាប, ខេត្ត​ព្រះ​វិហារ, ខេត្ត​បន្ទាយ​មាន​ជ័យ, ខេត្ត​ប៉ៃ​លិន, ខេត្ត​បាត់​ដំបង បូក​រួម​ទាំងបង្គោល​ភ្លើង​កណ្តាល​ទ្រូង​ផ្លូវ​ជាតិ​លេខ៥ ចំនួន ៣៣​បង្គោល​ដែល​មាន ៦៦​ផ្ទាំង។ នេះ​បើ​តាម​ការ​បញ្ជាក់​ពី​លោក ស៊ុន មេសា។បន្ថែមលើនេះ លោកថា នៅមាន​បំពាក់​ផ្ទាំង​ប៉ាណូ​កាត់​ទទឹង​ថ្នល់ (Overhead Pass)​មាន​ចំនួន ៥ទីតាំ​ងដែល​មាន​ចំនួន ១០​ផ្ទាំង​នៅ​ក្នុង​ខេត្ត​កំពង់​ធំ, ខេត្ត​ប៉ៃលិន, ខេត្ត​ពោធិ​សាត់។ ទន្ទឹម​នេះ ក្រុមហ៊ុន​ផ្សព្វផ្សា​យកំ​ពុ​ង​ព្រីនបន្ថែម​ទៀត និងទំនាក់ទំនង​ជាមួយ​អាជ្ញាធរ​តាម​បណ្តា​ខេត្ត​ដូ​ចជា ខេត្ត​កោះ​កុង, ខេត្ត​ប៉ៃលិន, ខេត្ត​ឧត្តរ​មាន​ជ័យ, ខេត្ត​បន្ទាយ​មា​នជ័យ និង​ខេត្ត​ព្រះ​វិហារ។អ្នកនាំពាក្យ​បញ្ជាក់​ថា៖«មន្រ្តី​ជំនាញ​របស់​យើង នឹង​បន្ត​រៀប​ចំ ផលិត និ​ងផ្សព្វផ្សាយឯ​ក​សារ​សិក្សា​ស្រាវ​ជ្រាវពាក់​ព័ន្ធ​នឹងតម្រូវការទីផ្សារកា​រងារ ជាពិសេស​ទស្សន​វិស័យ​មុខ​​របរ និងការងារឱ្យ​បានទៀ​ង​ទាត់ ដើម្បី​ផ្តល់​ព័ត៌​មាន​ទី​ផ្សារ​ការងារ​ឱ្យបានគ្រប់​ជ្រុង​ជ្រោយ​ដល់អ្នក​ស្វែង​រក​ការ​ងារ កម្មករ​និយោ​ជិត និយោ​ជក អ្នកផ្តល់​ការ​បណ្តុះ​បណ្តា​ល និង​សាធារណ​ជនគ្រប់​និន្នាកា​រទាំងអស់»។បើតាមរបាយការណ៍​របស់​ក្រសួង​ការ​ងារ និងបណ្ដុះ​បណ្ដាល​វិជ្ជាជីវៈ​បាន​ឱ្យដឹង​ថា នៅឆ្នាំ២០២៥​កន្លង​ទៅ​នេះ ក្រសួង បានសហកា​រជាមួយ​សមាគម​និយោ​ជក​នា​នា ធនាគារ ក្រុមហ៊ុន រោងចក្រ សិប្បកម្ម និង​សហភា​ព​ស​ហព័ន្ធយុវជន​កម្ពុជា បង្កើត​យុទ្ធ​នា​ការ “ខ្មែរ​ជួយ​រក ការងារ​​ឱ្យ​ខ្មែរ” ដោយ​ដាក់ឱ្យ​ដំណើរ​ការប្រព័ន្ធ​ស្វែង​រក​ការ​ងារ​បន្ទាន់​តាម​ទូរសព្ទ ១២៩៧ ដែលមានអ្នកប្រចាំការ ២៤ម៉ោង/ថ្ងៃ និង៧ថ្ងៃ/សប្តាហ៍ និងដាក់​ដំណើរ​ការ​ប្រព័ន្ធ​ស្វែង​រក​ការ​ងារ​តាម​ប្រព័ន្ធ​តេឡេ​ក្រាម។ ក្នុង​នោះ បាន​បំពាក់​ផ្ទាំង​ប៉ា​ណូ​ផ្សព្វ​ផ្សាយ​ព័ត៌មា​នឱកាស​ការ​ងារ​នៅ​តាម​ដង​ផ្លូវ​ជាតិ និង​ទីប្រជុំជននានា​បានចំនួន ៨៦ទីតាំង ហើយ​គ្រោង​នឹង​រៀប​ចំឱ្យបាន ១៦៥ទី​តាំង​នៅ​ឆ្នាំ​២០២៦នេះ៕

(ភ្នំពេញ)៖ ក្រសួងសុខាភិបាល ចេញសេចក្តីណែនាំក្រើនរំលឹកស្តីពីការរក្សាសុខភាព និងសុវត្ថិភាព ក្នុងអំឡុងពេលអាកាសធាតុក្តៅខ្លាំង។ ក្នុងអំឡុង ពេលមានការឡើងកម្ដៅក្នុងចន្លោះពី ៣៧°C ទៅ៤១°C បណ្តាលមកពីការប្រែប្រួលអាកាសធាតុ ដែលបង្កឱ្យ មានការកើតមានរលកកម្ដៅមិនទៀងទាត់។ អាកាសធាតុក្តៅខ្លាំងអាចបង្កឱ្យបុគ្គលគ្រប់រូប ជាពិសេសមនុស្សចាស់ ទារក កុមារ ស្ត្រីមានផ្ទៃពោះ អ្នកធ្វើការក្រៅផ្ទះ អត្តពលិក និងអ្នកមានជំងឺរ៉ាំរ៉ៃងាយធ្លាក់ខ្លួនឈឺជាយថាហេតុ រួមមាន បញ្ហានៅខួរក្បាល (Heat Stroke) ការខ្សោះជាតិទឹក ជំងឺសរសៃឈាមបេះដូង ជំងឺតម្រងនោម ជំងឺថប់អារម្មណ៍ រមួលក្រពើ រលាកផ្លូវដង្ហើម និងនាំឱ្យមានជំងឺឆ្លងផ្សេងៗដូចជា ជំងឺរាករូស ជំងឺរាកមូល និងជំងឺគ្រុនពោះវៀន។ល។ បណ្តាលមកពីការប្រើប្រាស់ទឹកមិនស្អាត និងចំណីអាហារពុំមានសុវត្ថិភាព។ ដើម្បីថែទាំសុខភាព និងបង្ការជំងឺ សូមបងប្អូនប្រជាពលរដ្ឋទាំងអស់គ្នា យកចិត្តទុកដាក់ចូលរួមអនុវត្តតាមការណែនាំក្នុងអំឡុងពេលអាកាសធាតុក្តៅ ខ្លាំងដូចខាងក្រោម៖ត្រូវពិសាទឹកស្អាត ឬទឹកដោយប្រើធុងចមោះ ឬទឹកដាំឱ្យពុះ ឬទឹកដែលបន្សុទ្ធដោយថ្នាំក្លរីន ឬក្លរ៉ាមីន (ថ្នាំក្លរីន ឬក្លរ៉ាមីន២គ្រាប់ អាចលាយទឹក២០លីត្រ)។ពិសាទឹកឱ្យបានញឹកញាប់ លើសពី២លីត្រ ក្នុងមួយថ្ងៃចំពោះមនុស្សពេញវ័យ។ចៀសវាងស្ថិតក្រោមកម្ដៅថ្ងៃដោយផ្ទាល់យូរពេក ដោយត្រូវរកកន្លែងជ្រក ឬរបាំងការពារកម្ដៅព្រះអាទិត្យ។ស្លៀកសម្លៀកបំពាក់ដែលអាចជួយការពារកម្ដៅព្រះអាទិត្យដូចជា ពាក់មួក ដែលមានគែមធំ ឬប្រើឆ័ត្រធ្វើជារបាំងការពារកម្ដៅថ្ងៃ។ សម្លៀកបំពាក់ពណ៌ស្រាល រលុង និងកុំងូតទឹកត្រជាក់ភ្លាមៗ បន្ទាប់ពីត្រឡប់ពីកន្លែងដែលមានកម្ដៅខ្លាំង។រក្សាអនាម័យខ្លួនប្រាណ និងលាងដៃឱ្យបានញឹកញាប់ ជាពិសេសមុនញ៉ាំអាហារ និងក្រោយចេញពីបង្គន់។ទុកដាក់ម្ហូបអាហារដោយមានគម្របត្រឹមត្រូវ។ចៀសវាងការទទួលទានគ្រឿងស្រវឹង និងភេសជ្ជៈដែលមានជាតិស្ករ អំបិលច្រើន។សមាជិកគ្រួសារត្រូវតែតាមដានមើលឱ្យបានញឹកញាប់ ចំពោះមនុស្សចាស់ ក៏ដូចជាអ្នកកំពុងមានជំងឺ កុមារ ក្រោមអាយុ២ឆ្នាំ អ្នកជំងឺផ្លូវចិត្ត និងអ្នកមានជំងឺរ៉ាំរ៉ៃ។ប្រសិនបើមានរោគសញ្ញា ដូចជា វិលមុខ ចង្អោរ ក្អួត ឈឺក្បាល រមូលសាច់ដុំ (រមូលក្រពើ) ត្រូវគិតថាជា សញ្ញាដំបូងនៃផលប៉ះពាល់ដោយសារកម្ដៅ ក្នុងករណីនេះត្រូវផ្លាស់ប្តូរទៅរកទីកន្លែងត្រជាក់ និង ត្រូវសម្រាក ២ ទៅ ៣នាទី រួចពិសាទឹកត្រជាក់យឺតៗ ហើយកុំបន្តសកម្មភាព ព្រោះអាចមានហានិភ័យដល់សុខភាព។ចៀសវាងការចោមរោមអ្នកជំងឺដែលមានបញ្ហាសុខភាព និងត្រូវស្វែងរកការព្យាបាលភ្លាមៗនៅមណ្ឌល សុខភាព ឬមន្ទីរពេទ្យដែលនៅជិតលោកអ្នកបំផុត ប្រសិនបើមិនធូរស្រាល៕

(អន្តរជាតិ)៖ Meta នឹងបិទគេហទំព័រ Messenger.com នៅថ្ងៃទី 16 ខែមេសា ហើយបញ្ជូនអ្នកប្រើប្រាស់ទៅកាន់ទំព័រផ្ញើសាររបស់ Facebook ដែលជាផ្នែកមួយនៃការផ្លាស់ប្តូររបស់ខ្លួនចេញពីវេទិកាដែលដាច់ដោយឡែកពីហ្វេសប៊ុកមួយនេះ។អ្នកប្រើប្រាស់នៅប្រទេសវៀតណាមដែលចូលមើលគេហទំព័រនេះបានចាប់ផ្តើមឃើញសារមួយដែលនិយាយថា "Messenger.com នឹងផ្លាស់ទៅ fb.com/messages នៅថ្ងៃទី 16 ខែមេសា ឆ្នាំ 2026"។ បន្ទាប់ពីកាលបរិច្ឆេទ អ្នកទស្សនាគេហទំព័រនឹងត្រូវបានបញ្ជូនបន្តដោយស្វ័យប្រវត្តិទៅ Facebook។ទោះបីជាវេទិកាទាំងពីរចែករំលែកចំណុចប្រទាក់ស្រដៀងគ្នា និងត្រូវបានដំណើរការដោយ Meta Platforms ក៏ដោយ ការផ្លាស់ប្តូរនេះនឹងប៉ះពាល់ដល់អ្នកប្រើប្រាស់ដែលពឹងផ្អែកទាំងស្រុងលើ Messenger សម្រាប់ការទំនាក់ទំនង។ អ្នកខ្លះរក្សាគណនី Facebook របស់ពួកគេឱ្យអសកម្ម ខណៈពេលកំពុងប្រើប្រាស់ Messenger តាមរយៈគេហទំព័រ ឬកម្មវិធីទូរស័ព្ទ។ក្រោមការរៀបចំថ្មី ពួកគេនឹងត្រូវធ្វើឱ្យ Facebook សកម្មឡើងវិញ ឬប្តូរទៅកម្មវិធីទូរស័ព្ទទាំងស្រុង។ ប្រសិនបើពួកគេមិនមានគណនី Facebook ទេ អ្នកប្រើប្រាស់អាចបន្តជជែកនៅលើកម្មវិធីទូរស័ព្ទ Messenger ហើយអាចទទួលបានប្រវត្តិជជែកត្រឡប់មកវិញដោយប្រើលេខកូដសម្ងាត់ ។ការផ្លាស់ប្តូរនេះធ្វើឡើងបន្ទាប់ពីកិច្ចខិតខំប្រឹងប្រែងកាន់តែទូលំទូលាយរបស់ខ្លួនក្នុងការបញ្ឈប់សេវាកម្មដែលមានមូលដ្ឋានdesktop។ នៅចុងឆ្នាំមុន ក្រុមហ៊ុនបានបញ្ឈប់កម្មវិធី Messenger របស់ខ្លួនសម្រាប់ទាំង Mac និង Windows។យោងតាមគេហទំព័របច្ចេកវិទ្យា TechCrunch ការសម្រេចចិត្តនេះមានគោលបំណងកាត់បន្ថយថ្លៃដើមប្រតិបត្តិការដោយការបង្រួបបង្រួមវេទិកានានា ប៉ុន្តែបានទាក់ទាញប្រតិកម្មចម្រុះ។នៅលើវេទិកាប្រព័ន្ធផ្សព្វផ្សាយសង្គមដូចជា X និង Reddit អ្នកប្រើប្រាស់មួយចំនួនបានសម្តែងការខកចិត្ត ដោយនិយាយថាពួកគេចូលចិត្តប្រើប្រាស់ Messenger តាមរយៈកម្មវិធីរុករកសម្រាប់ការងារ ឬការផ្ញើសារធម្មតា ហើយមិនចង់ពឹងផ្អែកលើ Facebook ឬត្រួតពិនិត្យសារជានិច្ចនៅលើទូរស័ព្ទរបស់ពួកគេទេ។ទោះជាយ៉ាណា​ Meta មិនបានផ្តល់ការពន្យល់បន្ថែមសម្រាប់ការផ្លាស់ប្តូរនេះទេ។Messenger ត្រូវបានណែនាំជាលើកដំបូងជា Facebook Chat ក្នុងឆ្នាំ 2008 ហើយបានក្លាយជាកម្មវិធីឯករាជ្យក្នុងឆ្នាំ 2011។នៅឆ្នាំ 2014 Facebook បានដកការផ្ញើសារចេញពីកម្មវិធីទូរស័ព្ទសំខាន់របស់ខ្លួន ដោយនាំអ្នកប្រើប្រាស់ទៅកាន់វេទិកា Messenger ឯករាជ្យ៕

(អន្តរជាតិ)៖ ក្រសួងធនធានទឹកនិងឧតុនិយម ជូនដំណឹងដល់សាធារណជន អំពីស្ថានភាពអាកាសធាតុនៅក្នុង រដូវប្រាំងឆ្នាំ២០២៦ បន្ទាប់ពីធ្វើការតាមដាន វិភាគ និងព្យាករស្ថានភាពអាកាសធាតុ ដោយផ្អែកលើបាតុភូតសកល និង ការព្យាករពីស្ថានភាពវិវត្តន៍នៃសីតុណ្ហភាពលើផ្ទៃមហាសមុទ្រប៉ាស៊ីហ្វិកខាងលិច មហាសមុទ្រឥណ្ឌា និងតំបន់អេក្វាទ័របង្ហាញថា បាតុភូតអែនសូអព្យាក្រឹត (ENSO-Neutral) នៅបន្តកើតឡើងក្នុងកម្រិត៩០% រហូតដល់ខែឧសភា និងថយចុះមក ៧០% នៅក្នុងខែមិថុនា ឆ្នាំ២០២៦។ ដោយឡែកចាប់ពីខែកក្កដា បាតុភូតអែលនីញ៉ូ (El Niño) នឹងកើនដល់កម្រិត៥០%។ ចំណែក បាតុភូតអោយអូឌី (IOD) ស្ថិតនៅអព្យាក្រឹត(IOD-Neutral)។ ស្ថានភាពបែបនេះនឹងធ្វើឱ្យធាតុអាកាសចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៦៖១. តំបន់វាលទំនាប៖ សីតុណ្ហភាពមធ្យមអប្បបរមា២៥°C និងសីតុណ្ហភាពមធ្យមអតិបរមា៤០°C។ ខ្យល់បក់មកពី ទិសទិសនិរតី និងទិសទក្សិណមានល្បឿនមធ្យម ៣ម៉ែត្រ/វិនាទី។ ខេត្តបន្ទាយមានជ័យ បាត់ដំបង ពោធិ៍សាត់ សៀមរាប កំពង់ធំ កំពង់ឆ្នាំង កំពង់ចាម ត្បូងឃ្មុំ ស្វាយរៀង តាកែវ ព្រៃវែង កណ្តាល និងរាជធានីភ្នំពេញ ពុំមានភ្លៀងធ្លាក់ទេ។២. តំបន់ខ្ពង់រាប ៖ សីតុណ្ហភាពមធ្យមអប្បបរមា២៦°C និងសីតុណ្ហភាពមធ្យមអតិបរមា៤០°C។ ខ្យល់បក់មកពីទិស និរតី និងទិសទក្សិណមានល្បឿនមធ្យម ២ម៉ែត្រ/វិនាទី។ ខេត្តកំពង់ស្ពឺ ឧត្តរមានជ័យ ប៉ៃលិន រតនគិរី ព្រះវិហារ ក្រចេះ ស្ទឹងត្រែង មណ្ឌលគិរី ជួរភ្នំដងរែក និងតំបន់ជួរភ្នំក្រវាញ ពុំមានភ្លៀងធ្លាក់ទេ។៣. តំបន់មាត់សមុទ្រ៖ សីតុណ្ហភាពមធ្យមអប្បបរមា២៥°C និងសីតុណ្ហភាពមធ្យមអតិបរមា៣៦°C។ ខ្យល់បក់មកពី ទិសនិរតី និងទិសទក្សិណមានល្បឿនមធ្យម ៣ម៉ែត្រ/វិនាទី។ ខេត្តកោះកុង ព្រះសីហនុ កំពត កែប និងជួរភ្នំបូកគោ ពុំមាន ភ្លៀងធ្លាក់ទេ។ រលកសមុទ្រមានកម្ពស់មធ្យមអប្បបរមា ០,៥០ម៉ែត្រ និងកម្ពស់មធ្យមអតិបរមា ១,៥០ម៉ែត្រ។យោងលើការព្យាករអាកាសធាតុដូចបានជម្រាបជូនខាងលើ សូមស្ថាប័នពាក់ព័ន្ធ អាជ្ញាធរដែនដី និងសាធារណជន មេត្តាយកចិត្តទុកដាក់ខ្ពស់ក្នុងការថែទាំសុខភាពពីការកើនឡើងនៃសីតុណ្ហភាពនេះ និងប្រុងប្រយ័ត្នខ្ពស់ចំពោះហានិភ័យ នៃភ្លើងឆេះព្រៃ ផ្ទះសម្បែង និងទ្រព្យសម្បត្តិផ្សេងៗ ដែលអាចកើតឡើងជាយថាហេតុនៅក្នុងរដូវចូលឆ្នាំថ្មីប្រពៃណីជាតិខ្មែរ នាពេលខាងមុខនេះ។ ក្រសួងធនធានទឹក និងឧតុនិយម នឹងបន្តតាមដាននិងវិភាគអំពីស្ថានភាពធាតុអាកាស ដើម្បីជម្រាប ជូនជាបន្តបន្ទាប់ ក្នុងករណីមានការប្រែប្រួល៕(អន្តរជាតិ)៖ ក្រសួងធនធានទឹកនិងឧតុនិយម ជូនដំណឹងដល់សាធារណជន អំពីស្ថានភាពអាកាសធាតុនៅក្នុង រដូវប្រាំងឆ្នាំ២០២៦ បន្ទាប់ពីធ្វើការតាមដាន វិភាគ និងព្យាករស្ថានភាពអាកាសធាតុ ដោយផ្អែកលើបាតុភូតសកល និង ការព្យាករពីស្ថានភាពវិវត្តន៍នៃសីតុណ្ហភាពលើផ្ទៃមហាសមុទ្រប៉ាស៊ីហ្វិកខាងលិច មហាសមុទ្រឥណ្ឌា និងតំបន់អេក្វាទ័របង្ហាញថា បាតុភូតអែនសូអព្យាក្រឹត (ENSO-Neutral) នៅបន្តកើតឡើងក្នុងកម្រិត៩០% រហូតដល់ខែឧសភា និងថយចុះមក ៧០% នៅក្នុងខែមិថុនា ឆ្នាំ២០២៦។ ដោយឡែកចាប់ពីខែកក្កដា បាតុភូតអែលនីញ៉ូ (El Niño) នឹងកើនដល់កម្រិត៥០%។ ចំណែក បាតុភូតអោយអូឌី (IOD) ស្ថិតនៅអព្យាក្រឹត(IOD-Neutral)។ ស្ថានភាពបែបនេះនឹងធ្វើឱ្យធាតុអាកាសចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៦៖១. តំបន់វាលទំនាប៖ សីតុណ្ហភាពមធ្យមអប្បបរមា២៥°C និងសីតុណ្ហភាពមធ្យមអតិបរមា៤០°C។ ខ្យល់បក់មកពី ទិសទិសនិរតី និងទិសទក្សិណមានល្បឿនមធ្យម ៣ម៉ែត្រ/វិនាទី។ ខេត្តបន្ទាយមានជ័យ បាត់ដំបង ពោធិ៍សាត់ សៀមរាប កំពង់ធំ កំពង់ឆ្នាំង កំពង់ចាម ត្បូងឃ្មុំ ស្វាយរៀង តាកែវ ព្រៃវែង កណ្តាល និងរាជធានីភ្នំពេញ ពុំមានភ្លៀងធ្លាក់ទេ។២. តំបន់ខ្ពង់រាប ៖ សីតុណ្ហភាពមធ្យមអប្បបរមា២៦°C និងសីតុណ្ហភាពមធ្យមអតិបរមា៤០°C។ ខ្យល់បក់មកពីទិស និរតី និងទិសទក្សិណមានល្បឿនមធ្យម ២ម៉ែត្រ/វិនាទី។ ខេត្តកំពង់ស្ពឺ ឧត្តរមានជ័យ ប៉ៃលិន រតនគិរី ព្រះវិហារ ក្រចេះ ស្ទឹងត្រែង មណ្ឌលគិរី ជួរភ្នំដងរែក និងតំបន់ជួរភ្នំក្រវាញ ពុំមានភ្លៀងធ្លាក់ទេ។៣. តំបន់មាត់សមុទ្រ៖ សីតុណ្ហភាពមធ្យមអប្បបរមា២៥°C និងសីតុណ្ហភាពមធ្យមអតិបរមា៣៦°C។ ខ្យល់បក់មកពី ទិសនិរតី និងទិសទក្សិណមានល្បឿនមធ្យម ៣ម៉ែត្រ/វិនាទី។ ខេត្តកោះកុង ព្រះសីហនុ កំពត កែប និងជួរភ្នំបូកគោ ពុំមាន ភ្លៀងធ្លាក់ទេ។ រលកសមុទ្រមានកម្ពស់មធ្យមអប្បបរមា ០,៥០ម៉ែត្រ និងកម្ពស់មធ្យមអតិបរមា ១,៥០ម៉ែត្រ។យោងលើការព្យាករអាកាសធាតុដូចបានជម្រាបជូនខាងលើ សូមស្ថាប័នពាក់ព័ន្ធ អាជ្ញាធរដែនដី និងសាធារណជន មេត្តាយកចិត្តទុកដាក់ខ្ពស់ក្នុងការថែទាំសុខភាពពីការកើនឡើងនៃសីតុណ្ហភាពនេះ និងប្រុងប្រយ័ត្នខ្ពស់ចំពោះហានិភ័យ នៃភ្លើងឆេះព្រៃ ផ្ទះសម្បែង និងទ្រព្យសម្បត្តិផ្សេងៗ ដែលអាចកើតឡើងជាយថាហេតុនៅក្នុងរដូវចូលឆ្នាំថ្មីប្រពៃណីជាតិខ្មែរ នាពេលខាងមុខនេះ។ ក្រសួងធនធានទឹក និងឧតុនិយម នឹងបន្តតាមដាននិងវិភាគអំពីស្ថានភាពធាតុអាកាស ដើម្បីជម្រាប ជូនជាបន្តបន្ទាប់ ក្នុងករណីមានការប្រែប្រួល៕

(ភ្នំពេញ)៖ ឯកឧត្តម ហួត ហាក់ សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជាក្រសួងទេសចរណ៍ អញ្ជើញជាអធិបតីក្នុងពិធីសំណេះសំណាលជាមួយថ្នាក់ដឹកនាំ សមាជិក សមាជិកាគណៈកម្មាធិការគណបក្សប្រជាជនកម្ពុជាក្រសួងទេសចរណ៍ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ ក្នុងគោលបំណងដើម្បីសំណេះសំណាល និងជួបជុំគ្នាដើម្បីអបអរសាទរការប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរ ក៏ដូចជាការថ្លែងអំណរគុណ ដល់ឯកឧត្ដម លោកជំទាវ លោក លោកស្រី ដែលបានបំពេញកិច្ចការងារជាច្រើននាពេលកន្លងមក ក្នុងស្មារតី បុរេសកម្ម, សកម្ម, និង អន្តរសកម្ម។ពិធីដ៏មានអត្ថន័យពោរពេញដោយសាមគ្គីភាពនេះ មានការអញ្ជើញចូលរួមពីឯកឧត្ដម លោកជំទាវ លោក លោកស្រី ជាអនុប្រធានគណៈកម្មាធិការគណបក្សក្រសួង សមាជិក សមាជិកា គណៈអចិន្ត្រៃយ៍នៃគណៈកម្មាធិការគណបក្សក្រសួង និងសមាជិក សមាជិកាគណៈកម្មាធិការគណបក្សក្រសួង ព្រមទាំងសមាជិក សមាជិកាគណបក្សក្រសួងទេសចរណ៍ទាំងអស់សរុបចំនួនប្រមាណ ៧០០នាក់ថ្លែងក្នុងឱកាសនេះ ឯកឧត្តម ហួត ហាក់ បានផ្តល់អនុសាសន៍ណែនាំមួយចំនួន ឱ្យប្រកាន់ខ្ជាប់នូវគោលការណ៍គោរពវិន័យរបស់គណបក្ស ប្រឹងប្រែងសម្រេចកិច្ចការឱ្យអស់ពីសមត្ថភាព ដោយឈរលើភាពស្មោះត្រង់ និងស្មារតីបុរេសកម្ម សកម្ម និងអន្តរសកម្មគ្រប់ជាន់ថ្នាក់។ក្នុងឱកាសដ៏វិសេសវិសាលនេះ ឯកឧត្តម ហួត ហាក់ បានគូសរំលេចអំពីទិសដៅសម្រាប់ឆ្នាំ២០២៦ ដោយទទួលបានគោលការណ៍ឯកភាពពីរាជរដ្ឋាភិបាល៖ ក្រសួងដាក់ចេញនូវ យុទ្ធសាស្ត្រគន្លឹះចំនួន ៦រួមមាន៖ ១). ការពង្រឹងយុទ្ធសាស្ត្រសិក្សាទីផ្សារ និងផ្សព្វផ្សាយទេសចរណ៍ក្រៅប្រទេស ឱ្យចំគោលដៅ ព្រមទាំងការលើកកម្ពស់កិត្តិនាមកម្ពុជានៅលើឆាកអន្តរជាតិ, ២). ការពង្រឹងនិងពង្រីកកិច្ចសហប្រតិបត្តិការជាតិ និងអន្តរជាតិ ឱ្យកាន់តែទូលំទូលាយ, ៣). ការសម្រួលការធ្វើដំណើរចូល-ចេញប្រទេសកម្ពុជានិង ជំរុញការតភា្ជប់ការធ្វើដំណើរ, ៤). ការពង្រឹងគុណភាពឧស្សាហកម្មទេសចរណ៍, ៥). ការអភិវឌ្ឍផលិតផលទេសចរណ៍កម្ពុជាឱ្យសម្បូរបែបនិងកាន់តែមានភាពទាក់ទាញ, និង៦). ការផ្សព្វផ្សាយទេសចរណ៍ក្នុងស្រុក, ការជំរុញចលនាទេសចរណ៍ក្នុងស្រុក និងការរៀបចំព្រឹត្តិការណ៍ទេសចរណ៍ នៅតាមបណ្តាខេត្ត (១ ខេត្ត ១ ព្រឹត្តិការណ៍), ព្រឹត្តិការណ៍នៅថ្នាក់ជាតិ (បុណ្យទន្លេ, បុណ្យសមុទ្រ, បុណ្យអេកូទេសចរណ៍, បុណ្យភ្នំ) និង អន្តរជាតិ (កិច្ចប្រជុំកំពូលហ្រ្វង់កូហ្វូនី, កិច្ចប្រជុំកំពូលទេសចរណ៍ Gx Summit, ព្រឹត្តិការណ៍កីឡាទេសចរណ៍អន្តរជាតិ, តន្ត្រី K-pop,...)។ឯកឧត្តម ហួត ហាក់ ក៏បានគូសរំលេចបន្ថែមថា ជាមួយនឹងយុទ្ធសាស្ត្រគន្លឹះសម្រាប់ឆ្នាំ២០២៦ ចំនួន ៦ ខាងលើ និងសសរស្តម្ភយុទ្ធសាស្ត្រនៃកិច្ចសហប្រតិបត្តិការទាំង៦, ក្រសួងទេសចរណ៍ ក៏បានដាក់ចេញនូវយុទ្ធនាការសំខាន់ៗមួយចំនួនទៀត សម្រាប់ឆ្នាំ ២០២៦ផងដែររួមមាន៖ ១). យុទ្ធនាការទស្សនាកម្ពុជានៅរដូវកាលបៃតង (Green Season) ពីខែឧសភា ដល់ ខែតុលា, ២). គម្រោងសាកល្បងលើកលែងទិដ្ឋាការសម្រាប់ពលរដ្ឋចិនរយៈពេល ៤ ខែ ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ (ពោលគឺក្នុងអំឡុងពេលនៃរដូវកាលបៃតង), ៣). យុទ្ធនាការរដូវកាលសាមគ្គីភាព (Solidarity Season) និង៤). យុទ្ធនាការផ្សព្វផ្សាយកម្ពុជា ជាគោលដៅទេសចរណ៍សុវត្ថិភាព៕

(អន្តរជាតិ)៖ សហរដ្ឋអាមេរិកកំពុងប្រមូលខ្ទះចៀនជាង ៧០០,០០០ មកវិញ ដោយសារតែហានិភ័យ នៃការរលាកដល់អ្នកប្រើប្រាស់។ គណៈកម្មការសុវត្ថិភាពផលិតផលអ្នកប្រើប្រាស់សហរដ្ឋអាមេរិក (CPSC) បានបញ្ជាឱ្យក្រុមហ៊ុន E Mishan & Sons ប្រមូលយកខ្ទះចៀនចំនួន 740,000 មកវិញ ដោយសារតែកំហុសក្នុងការរចនាដែលបង្កហានិភ័យដល់អ្នកប្រើប្រាស់។នៅក្នុងសេចក្តីជូនដំណឹងមួយដែលចេញផ្សាយនៅថ្ងៃទី 2 ខែមេសា គណៈកម្មការសុវត្ថិភាពផលិតផល អ្នកប្រើប្រាស់សហរដ្ឋអាមេរិក បានចង្អុលបង្ហាញពីកំហុសបច្ចេកទេស នៅក្នុងវីសដែលភ្ជាប់ចំណុចទាញ នៃខ្ទះចៀនដែកអ៊ីណុក Granitestone Diamond Pro Blue។ នៅពេលដែលឧបករណ៍នេះ ត្រូវបានប៉ះពាល់នឹងសីតុណ្ហភាពខ្ពស់ គម្របដែកនៅលើវីសនឹងរលុងយ៉ាងងាយ ហើយត្រូវបានច្រានចេញ ឬរបូតចេញយ៉ាងខ្លាំងដែលបង្កគ្រោះថ្នាក់អ្នកប្រើប្រាស់។ ក្រុមហ៊ុនផលិតបានទទួលពាក្យបណ្តឹងចំនួន 98 អំពីបញ្ហានេះ រួមទាំងអតិថិជនម្នាក់ដែលបានរងរបួស និងរលាកដោយសារផ្នែកដែលរបូតចេញ អំឡុងពេលកំពុងចម្អិនលើភ្លើង។ក្រុមហ៊ុន E Mishan & Sons ចែកចាយសម្ភារៈផ្ទះបាយទាំងនេះជាឈុតពីរ ដែលមានទំហំ 25.4 សង់ទីម៉ែត្រ និង 29.2 សង់ទីម៉ែត្រ មានលេខកូដ 0-80313-08131-6 ដែលមានតម្លៃ 40 ដុល្លារ (ប្រហែលមួយលានដុងវៀតណាម)។ អ្នកលក់រាយធំៗរបស់សហរដ្ឋអាមេរិកដូចជា Costco រួមជាមួយវេទិកាពាណិជ្ជកម្មអេឡិចត្រូនិក Walmart និង Amazon បានចេញលក់របស់របរទាំងនេះនៅលើទីផ្សារចាប់ពីខែសីហា ឆ្នាំ 2021 ដល់ខែកុម្ភៈ ឆ្នាំ 2026។ អាជ្ញាធរសហរដ្ឋអាមេរិកកំពុងណែនាំប្រជាជនឱ្យឈប់ប្រើប្រាស់ផលិតផលដែលមានបញ្ហាជាបន្ទាន់។ អ្នកទិញគួរតែទាក់ទង E Mishan & Sons ដោយផ្ទាល់ដើម្បីទទួលបានការណែនាំអំពីដំណើរការសងប្រាក់វិញ។

(អន្តរជាតិ)៖ នេះគឺជាស្មារតីស្នេហាជាតិមួយដ៏អស្ចារ្យសម្រាប់ប្រជាពលរដ្ឋកូរ៉េចំពោះជាតិរបស់ខ្លួន ដែលទទួលបានការស្ងើចសរសើរបំផុតក្នុងប្រវត្តិសាស្ត្រសេដ្ឋកិច្ចពិភពលោក។ នៅក្នុងអំឡុងវិបត្តិហិរញ្ញវត្ថុអាស៊ីឆ្នាំ ១៩៩៧ (1997 Asian Financial Crisis) ប្រទេសកូរ៉េខាងត្បូងបានធ្លាក់ចូលក្នុងស្ថានភាពដុនដាបយ៉ាងខ្លាំង រហូតដល់ជំពាក់បំណុលមូលនិធិរូបិយវត្ថុអន្តរជាតិ (IMF) ចំនួន ៥៨ ពាន់លានដុល្លារអាមេរិក។ នៅពេលនោះ ប្រាក់បាតថៃបានធ្លាក់ថ្លៃយ៉ាងគំហុក ដែលបង្កជាឥទ្ធិពលដូមីណូ (Domino Effect) ដល់ប្រទេសក្នុងតំបន់។ កូរ៉េខាងត្បូងបានជួបបញ្ហាខ្វះខាតប្រាក់ដុល្លារបម្រុងសម្រាប់សងបំណុលបរទេស និងសម្រាប់ធ្វើពាណិជ្ជកម្មអន្តរជាតិ ដែលធ្វើឱ្យតម្លៃលុយ វ៉ុន (Won) ធ្លាក់ចុះយ៉ាងខ្លាំង។ ក្រុមហ៊ុនធំៗជាច្រើនដែលជាសសរស្តម្ភសេដ្ឋកិច្ចកូរ៉េ បានជំពាក់បំណុលធនាគារវ័ណ្ឌក ដើម្បីពង្រីកខ្លួនហួសហេតុពេក នៅពេលវិបត្តិមកដល់ ក្រុមហ៊ុនទាំងនោះមិនអាចសងបំណុលបាន ក៏ឈានទៅរកការក្ស័យធនជាបន្តបន្ទាប់ ដែលធ្វើឱ្យធនាគារជាច្រើនជួបបញ្ហាដូចគ្នាដែរ។ ដោយសារក្រុមហ៊ុន និងរោងចក្រជាច្រើនត្រូវបិទទ្វារ ប្រជាជនកូរ៉េរាប់សែននាក់បានបាត់បង់ការងារធ្វើភ្លាមៗ គ្រួសារជាច្រើនបានធ្លាក់ក្នុងភាពក្រីក្រ ដែលបង្កជាក្ដី បារម្ភថាប្រទេសជាតិអាចនឹងរលាយបាត់បង់អធិបតេយ្យភាពសេដ្ឋកិច្ច។នេះបើតាមប្រភពពីកាសែត BBC News បានចុះផ្សាយអត្ថបទដែលមានចំណងជើងថា "How South Koreans sold their gold to save their country" ដែលរៀបរាប់យ៉ាងលម្អិតអំពីយុទ្ធនាការប្រមូលមាសក្នុងឆ្នាំ ១៩៩៨។ មូលហេតុដ៏ធំនេះរុញច្រានឱ្យកូរ៉េខាងត្បូងធ្លាក់ក្នុងស្ថានភាពអាក្រក់ហើយធ្វើឱ្យប្រជាជនសុខចិត្តលះបង់មាសផ្ទាល់ខ្លួន គឺដោយសារ "វិបត្តិហិរញ្ញវត្ថុអាស៊ីឆ្នាំ ១៩៩៧" ដែលកាលនោះគេនិយមហៅថា "វិបត្តិ IMF" ដើម្បីជួយសង្គ្រោះជាតិពីការក្ស័យធនចលនារបស់ប្រជាជនមួយត្រូវបានបង្កើតឡើងដែលហៅថា "យុទ្ធនាការប្រមូលមាស" នៅដើមឆ្នាំ ១៩៩៨។ នេះជាពេលវេលាប្រវត្តិសាស្ត្រដ៏អស្ចារ្យបំផុតដែលគេបានកត់ត្រាទុក ប្រជាជនកូរ៉េខាងត្បូងរាប់លាននាក់ ចាប់ពីសេដ្ឋីរហូតដល់អ្នកធុនមធ្យម និងកម្មករ បាននាំគ្នាយកមាសដែលខ្លួនមានដូចជា ចិញ្ចៀនអាពាហ៍ពិពាហ៍ មេដាយ មាសបណ្ណាការ ឬវត្ថុអនុស្សាវរីយ៍ផ្សេងៗមកបរិច្ចាគ ឬលក់ឱ្យរដ្ឋក្នុងតម្លៃថោកៗ។ ត្រឹមតែរយៈពេលប៉ុន្មានខែ បរិមាណមាសប្រហែល ២២៦ តោន ត្រូវបានប្រមូល ដែលមានតម្លៃស្មើនឹងជាង ២ ពាន់លានដុល្លារអាមេរិកនាពេលនោះ។ទោះបីជាចំនួនមាសនេះមិនទាន់គ្រប់គ្រាន់ដើម្បីសងបំណុល IMF ទាំងស្រុងក៏ដោយ ប៉ុន្តែវាបានបង្ហាញទៅកាន់ពិភពលោក និងវិនិយោគិនបរទេសអំពី "សាមគ្គីភាព និងការលះបង់" ដ៏មហិមារបស់ប្រជាជនកូរ៉េ។ មាសដែលប្រមូលពីការប្រជាជនបានជួយឱ្យកូរ៉េខាងត្បូងមានលទ្ធភាពសងបំណុល IMF វិញបានទាំងស្រុងនៅឆ្នាំ ២០០១ ពោលគឺលឿនជាងកិច្ចសន្យាដែលបានកំណត់រហូតដល់ ៣ ឆ្នាំ ហើយវាបានក្លាយជាមូលដ្ឋានគ្រឹះដ៏រឹងមាំក្នុងការស្ដារសេដ្ឋកិច្ចជាតិឡើងវិញរហូតមកដល់សព្វថ្ងៃ។ការពិតដ៏អស្ចារ្យដែលប្រជាជនកូរ៉េមានមនសិការស្នេហាជាតិខ្លាំងដោយពួកគេយល់ថា បើគ្មានប្រទេសជាតិ ក៏គ្មានគ្រួសារ ឬអាជីវកម្មរបស់ពួកគេដែរ ការជួយជាតិនៅពេលនោះ គឺស្មើនឹងការជួយអនាគតកូនចៅខ្លួនឯង។ វប្បធម៌កូរ៉េកាលនោះ ចាត់ទុកការជំពាក់បំណុលបរទេស (IMF) គឺជាភាពអាម៉ាស់របស់ជាតិ ពួកគេចង់ឱ្យប្រទេសរបស់ខ្លួនមានឯករាជ្យភាព សេដ្ឋកិច្ចឡើងវិញឱ្យបានឆាប់បំផុត។ ដោយសារកូរ៉េធ្លាប់ឆ្លងកាត់ការលំបាកខ្លាំងពីសង្គ្រាមកូរ៉េ ពួកគេយល់ច្បាស់ពីតម្លៃនៃភាពរឹងមាំ និងការសាមគ្គីគ្នាដើម្បីរស់។ប្រសិនជាអ្នកទាំងអស់គ្នាវិញ តើអ្នកហ៊ានយកមាសដែលខំសន្សំស្ទើរពេញមួយជីវិតដើម្បីសងបំណុលជំនួសរដ្ឋដែរឬទេ?

(អន្តរជាតិ)៖ ជារឿងមួយដ៏គួរឱ្យអណោចអធមបំផុតចំពោះស្ត្រីជាប្រពន្ធ ដែលត្រូវស្វាមីចិត្តអប្រិយបង្ខំ ឱ្យនាងលក់ខ្លួនយកប្រាក់អស់រយៈពេលជាច្រើនឆ្នាំ។ ហេតុការណ៍នេះបានកើតឡើងនៅប្រទេសស៊ុយអ៊ែត ខណៈបុរសជាប្ដីពេលនេះកំពុងត្រូវតុលាការចោទប្រកាន់ពីបទបង្ខំប្រពន្ធរបស់គាត់ឱ្យផ្តល់សេវាកម្មផ្លូវភេទ ដល់បុរសជាង ១២០ នាក់ក្នុងរយៈពេលជាច្រើនឆ្នាំ។ បុរសអាយុ ៦២ ឆ្នាំរូបនេះត្រូវបានចាប់ខ្លួននៅចុងខែតុលា ឆ្នាំ ២០២៥ បន្ទាប់ពីប្រពន្ធរបស់គាត់បានរាយការណ៍ទៅប៉ូលីសនៅភាគខាងជើងប្រទេសស៊ុយអែតពីបទបង្ខំនាងឱ្យរកស៊ីផ្លូវភេទ និងសកម្មភាពខុសច្បាប់ផ្សេងទៀត។ គាត់ត្រូវបានឃុំខ្លួនចាប់តាំងពីពេលនោះមក មុនពេលព្រះរាជអាជ្ញាសម្រេចចិត្ត ចោទប្រកាន់គាត់នៅថ្ងៃនេះ ខណៈអត្តសញ្ញាណរបស់គាត់មិនត្រូវបានបង្ហាញឱ្យដឹងនោះទេ។ បើតាមកាសែត AFP បានរាយការណ៍ថា យោងតាមការចោទប្រកាន់ ជនសង្ស័យបានរកប្រាក់ចំណេញដោយខុសច្បាប់ដោយបង្ខំប្រពន្ធរបស់គាត់ឱ្យ «ប្រព្រឹត្ត និងចុះចូលនឹងសកម្មភាពផ្លូវភេទ» សម្រាប់បុរសដទៃទៀតចន្លោះថ្ងៃទី 11 ខែសីហា ឆ្នាំ 2022 និងថ្ងៃទី 21 ខែតុលា ឆ្នាំ 2025។ជនសង្ស័យ ដែលជាអតីតសមាជិកជាន់ខ្ពស់នៃក្រុមចោរប្លន់ម៉ូតូ Hells Angels ដ៏ល្បីល្បាញ ក៏ត្រូវបានចោទប្រកាន់ពីបទរំលោភបំពាន និងគំរាមកំហែងប្រពន្ធរបស់គាត់ ដោយកេងប្រវ័ញ្ចការភ័យខ្លាចរបស់នាងចំពោះគាត់ និងការញៀនថ្នាំរបស់នាង។ ព្រះរាជអាជ្ញាបានពិពណ៌នាអំពីសកម្មភាពទាំងនេះថាជា "ការកេងប្រវ័ញ្ចដោយគ្មានមេត្តា"។ករណី «លក់ប្រពន្ធ» នេះគឺជាព្រឹត្តិការណ៍មិនធម្មតា និងគួរឱ្យភ្ញាក់ផ្អើលមួយនៅក្នុងប្រទេសស៊ុយអែត ដែលជាប្រទេសមួយដែលមានគោលនយោបាយតឹងរ៉ឹងប្រឆាំងនឹងឧក្រិដ្ឋកម្មទាក់ទងនឹងពេស្យាចារ និងការកេងប្រវ័ញ្ចផ្លូវភេទ ដែលត្រូវបានគេស្គាល់ផងដែរថាជា «គំរូស៊ុយអែត»។ ច្បាប់ស៊ុយអែតចាត់ទុកពេស្យាចារជាទម្រង់នៃអំពើហិង្សាប្រឆាំងនឹងស្ត្រី។ ដូច្នេះ វាមិនធ្វើឱ្យអ្នករកស៊ីផ្លូវភេទក្លាយជាបទឧក្រិដ្ឋទេ ប៉ុន្តែត្រូវដាក់ទណ្ឌកម្មយ៉ាងធ្ងន់ធ្ងរដល់អ្នកដែលទិញផ្លូវភេទ និងអ្នកដែលរៀបចំ សម្របសម្រួល ឬបង្ខិតបង្ខំពួកគេ។លោកស្រី Ida Annerstedt ព្រះរាជអាជ្ញា បានលើកឡើងកាលពីខែកុម្ភៈថា អាជ្ញាធរបានកំណត់អត្តសញ្ញាណមនុស្សប្រហែល ១២០ នាក់ដែលសង្ស័យថាបានទិញសេវាផ្លូវភេទ តាមរយៈការសម្របសម្រួលរបស់បុរសជាប្ដីខាងលើនោះ។ ក្រៅពីការលួងលោម ស្វាមីក៏ត្រូវបានចោទប្រកាន់ពីបទរំលោភសេពសន្ថវៈចំនួន ៨ ករណីផងដែរ។ លោកស្រី Silvia Ingolfsdottir មេធាវីតំណាងឲ្យភរិយារបស់លោកស្រី បានប្រាប់ AFP ថា ការចោទប្រកាន់ទាំងនេះគឺជាលទ្ធផលនៃ «ឧក្រិដ្ឋកម្មធ្ងន់ធ្ងរ និងកាន់តែធ្ងន់ធ្ងរ» ដែលកូនក្តីរបស់លោកស្រីជាជនរងគ្រោះ។ លោកស្រី Ingolfsdottir បានមានប្រសាសន៍ថា «នាងសង្ឃឹមថានឹងទទួលបានយុត្តិធម៌»។ ជនសង្ស័យបដិសេធរាល់បទចោទប្រកាន់។ សវនាការដំបូងត្រូវបានគ្រោងនឹងចាប់ផ្តើមនៅថ្ងៃទី 13 ខែមេសា ឆ្នាំ២០២៦ខាងមុខ។

(អន្តរជាតិ)៖ តុលាការនៅរដ្ឋ Colorado នៅភាគខាងលិចសហរដ្ឋអាមេរិក បានកាត់ទោសជនល្មើសរំលោភសេពសន្ថវៈ ជាបន្តបន្ទាប់ឈ្មោះ Tre Carrasco ឲ្យជាប់ពន្ធនាគារ ១៣៦ ឆ្នាំ ដោយសង្កត់ធ្ងន់ថា គ្មានស្ត្រីណាម្នាក់នឹងមាន សុវត្ថិភាពទេ ប្រសិនបើបុគ្គលរូបនេះមានសេរីភាព។ នេះជាសម្ដីរបស់ចៅក្រមតុលាការរដ្ឋ Colorado លោក Ben Leutwyler បានប្រាប់អ្នកទោស Tre Carrasco ក្នុងអំឡុងពេលសវនាការកាលពីសប្តាហ៍មុនថា “ខ្ញុំប្រាកដណាស់ថាគ្មានស្ត្រីណាម្នាក់នៅអាមេរិកនឹងមានសុវត្ថិភាពទេ ប្រសិនបើអ្នកចេញពីពន្ធនាគារ។ អ្នកនឹងបន្តរំលោភមនុស្ស ពីព្រោះនោះជាអ្វីដែលអ្នកចង់បាន ហើយគ្មានអ្វីអាចបញ្ឈប់អ្នកបានក្រៅពីអាជ្ញាធរនោះទេ”។ បើតាមកាសែត Fox News បានរាយការណ៍ថា Tre Carrasco អាយុ ២៦ ឆ្នាំ ត្រូវបានកាត់ទោស ឱ្យជាប់ពន្ធនាគារ ១៣៦ ឆ្នាំ បន្ទាប់ពីប្រឈមមុខនឹងបទចោទប្រកាន់រាប់សិបករណីកាលពីខែឧសភា រួមទាំងការចាប់ជំរិត ការរំលោភផ្លូវភេទ និងការប្រើប្រាស់អាវុធគ្រោះថ្នាក់សម្រាប់លួច។ ឧក្រិដ្ឋជនរូបនេះធ្លាប់ត្រូវបានជាប់ពន្ធនាគារនៅរដ្ឋ Kansas ពីបទរំលោភផ្លូវភេទ ហើយត្រូវបាន ចោទប្រកាន់ ពីបទរំលោភផ្លូវភេទបន្ថែមទៀតត្រឹមតែប៉ុន្មានថ្ងៃ បន្ទាប់ពីការដោះលែងរបស់គាត់។ បន្ទាប់មក Carrasco បានរត់គេចខ្លួនទៅរដ្ឋ Colorado ជាកន្លែងដែលគាត់បានព្យាយាមចាប់ពង្រត់ស្ត្រីម្នាក់ ប៉ុន្តែមិនបានជោគជ័យ។ បន្ទាប់មកគាត់បានប្រើយានយន្តដែលត្រូវបានគេលួចដើម្បីទៅផ្ទះរបស់ស្ត្រីម្នាក់ទៀត ហើយបានភ្ជង់កាំបិតរំលោភនាង។លោក Casey Brown មន្ត្រីរដ្ឋ Colorado បាននិយាយថា «ជនជាប់ចោទរូបនេះគឺជាសត្វមំសាសី។ គាត់មិនអាចមានជីវិតក្នុងសង្គមដោយមិនគិតពីការធ្វើបាបស្ត្រីបានទេ។ គាត់មានអារម្មណ៍ថាគាត់មានសិទ្ធិធ្វើដូច្នេះចំពោះជនរងគ្រោះរបស់គាត់ ហើយបានបង្កសោកនាដកម្មរាប់មិនអស់»។ មេធាវីការពារក្តីរបស់លោក Carrasco បានជជែកវែកញែក នៅក្នុងតុលាការថា កូនក្តីរបស់គាត់គ្មានឱកាសក្នុងការកែទម្រង់ខ្លួនឯង ឬស្តារសេចក្តីថ្លៃថ្នូររបស់គាត់ឡើងវិញទេ ពីព្រោះគាត់បាននៅក្នុងមណ្ឌលកែប្រែសាសនាតាំងពីអាយុ 11 ឆ្នាំ ហើយបានចំណាយពេលជាច្រើនឆ្នាំក្នុងវ័យកុមារ ភាពរបស់គាត់នៅក្នុងពន្ធនាគារ។

(ភ្នំពេញ)៖ ថ្លែងក្នុងពិធីបិទវគ្គបណ្តុះបណ្តាលស្តីពី "ការបង្កភាពងាយស្រួលដល់បម្លាស់ទីសេវាវិជ្ជាជីវៈវិស្វកម្ម" នារសៀលថ្ងៃទី២ ខែមេសា ឆ្នាំ២០២៦ នៅសណ្ឋាគារកាំបូឌីយ៉ាណា ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាគណៈវិស្វករកម្ពុជា បានលើកឡើងពីសារៈសំខាន់នៃការពង្រឹងសមត្ថភាពវិស្វករ និងកិច្ចសហប្រតិបត្តិការតំបន់ ដែលមិនត្រឹមតែជាការផ្លាស់ប្តូរបច្ចេកទេសប៉ុណ្ណោះទេ ប៉ុន្តែថែមទាំងជាឱកាសដ៏មានតម្លៃក្នុងការសិក្សាវិធីសាស្ត្រថ្មីៗក្នុងទិសដៅអភិវឌ្ឍន៍វិស័យសំណង់នៅអាស៊ាន។ជាមួយនឹងការអបអរសាទរសិក្ខាកាមទាំង៦២នាក់(ស្រ្តី៤នាក់)ក្នុងអនុតំបន់មេគង្គដែលរួមមានវិស្វករកម្ពុជា វៀតណាម ឡាវ និងមីយ៉ាន់ម៉ា បានបញ្ចប់វគ្គបណ្តុះបណ្តាលដោយជោគជ័យនាពេលនេះ ឯកឧត្តមរដ្ឋមន្រ្តី បានថ្លែងអំណរគុណយ៉ាងជ្រាលជ្រៅចំពោះក្រុមប្រឹក្សាគណៈវិស្វករកម្ពុជា (BEC) និងមូលនិធិពិសេសសម្រាប់គម្រោងកិច្ចសហប្រតិបត្តិការមេគង្គ-ឡានឆាងសម្រាប់កិច្ចសហការរៀបចំវគ្គបណ្តុះបណ្តាលនេះឡើង ដែលក្រៅពីការផ្លាស់ប្តូរបច្ចេកទេស វាក៏បានឆ្លុះបញ្ចាំងពីការប្តេជ្ញាចិត្តរួមក្នុងការលើកកម្ពស់ស្តង់ដាវិស្វកម្មដល់កម្រិតសកលផងដែរ។ ឯកឧត្តមបានចាត់ទុកប្រធានបទនេះ ជាស្នូលសម្រាប់បេសកកម្មរួមក្នុងសហគមន៍សេដ្ឋកិច្ចអាស៊ាន ហើយជោគជ័យនៃកិច្ចសហប្រតិបត្តិការមេគង្គ-ឡានឆាងបង្ហាញយ៉ាងច្បាស់ពីការខិតខំរួមក្នុងការផ្លាស់ប្តូរចំណេះដឹង ជំនាញ និងបទពិសោធក្នុងវិស័យវិស្វកម្ម ដោយផ្អែកលើស្មារតី «ទន្លេរួម អនាគតរួម» ជាពិសេស កិច្ចព្រមព្រៀងទទួលស្គាល់គ្នាទៅវិញទៅមករបស់អាស៊ាន (MRA) ស្តីពីសេវាវិស្វកម្ម នៅតែជាគ្រឹះសំខាន់សម្រាប់ការខិតខំរួមក្នុងការបង្កភាពងាយស្រួលដល់បម្លាស់ទីវិស្វករ និងលើកកម្ពស់ការផ្លាស់ប្តូរព័ត៌មាន។ឯកឧត្តម ហេង សួរ បានបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាប្រធានកិត្តយសនៃក្រុមប្រឹក្សាគណៈវិស្វករកម្ពុជាកំពុងអនុវត្តយ៉ាងខ្ជាប់ខ្ជួននូវយុទ្ធសាស្ត្របញ្ចកោណដំណាក់កាលទី ១ ដែលចាត់ទុកការអភិវឌ្ឍធនធានមនុស្ស គឺជាស្នូល ដោយធានាថា «ពលរដ្ឋម្នាក់មានជំនាញមួយយ៉ាងតិចប្រចាំជីវិត» ហើយគ្មាននរណាម្នាក់ត្រូវបានទុកចោល រួមទាំងការពង្រឹងសមត្ថភាពជំនាញ និងស្តង់ដាវិជ្ជាជីវៈវិស្វកម្ម។ ទន្ទឹមនឹងនេះ រាជរដ្ឋាភិបាលកម្ពុជានឹងបន្តផ្តល់ការគាំទ្រយ៉ាងពេញលេញដល់ BEC ដែលជាស្ថាប័នសំខាន់ក្នុងបេសកកម្មបណ្តុះបណ្តាល ស្រាវជ្រាវ និងអភិវឌ្ឍសមត្ថភាព ដោយគោរពតាមសីលធម៌វិជ្ជាជីវៈ និងជំរុញវិស័យវិស្វកម្មឲ្យទំនើប និងមានសមត្ថភាពប្រកួតប្រជែងលើឆាកអន្តរជាតិ។នាឱកាសនោះ ឯកឧត្តមរដ្ឋមន្រ្តីក៏បានលើកទឹកចិត្តឱ្យវិស្វករទាំងអស់បំប្លែងចំណេះទាំងនេះទៅជាសកម្មភាពជាក់ស្តែងដ៏មានន័យ ដោយកុំទុកវានៅត្រឹមជាទ្រឹស្តី។ ទន្ទឹមនឹងនេះ ដោយសង្កេតឃើញវត្តមានស្រ្តីជាវិស្វករមានចំនួនតិច ឯកឧត្តមក៏បានលើកទឹកចិត្តឱ្យស្រ្តីចូលរួមកាន់តែច្រើនក្នុងវិស័យនេះ ព្រោះថា វិស្វករស្ត្រីពិតជាមានតម្លៃជាខ្លាំង ខណៈដែលវិស័យនេះក៏ពាក់ព័ន្ធនឹងភាពឆ្លាតវៃ ចំណេះដឹង និងសេវាកម្មផងដែរ ដោយមិនមែនត្រឹមតែការងារសំណង់ ឬការងារធ្ងន់ប៉ុណ្ណោះទេ។  លោក ឆិន ឆុង (Chen Cong) អគ្គទីប្រឹក្សានៃស្ថានទូតចិនប្រចាំកម្ពុជា បានចាត់ទុកសេវាវិស្វកម្ម ពិតជាមានតួនាទីសំខាន់ក្នុងការជំរុញការអភិវឌ្ឍហេដ្ឋារចនាសម្ព័ន្ធ កំណើនសេដ្ឋកិច្ច និងការតភ្ជាប់តំបន់ ជាពិសេសនៅតំបន់មេគង្គ ហើយការពង្រឹងគុណវុឌ្ឍិនៃវិស្វករ គឺជាចំណុចសំខាន់សម្រាប់ការបម្លាស់ទីវិជ្ជាជីវៈ ការលើកកម្ពស់មត្ថភាព និងការផ្គត់ផ្គង់សេវាវិស្វកម្មឱ្យមានប្រសិទ្ធភាព។ គម្រោងសហប្រតិបត្តិការមេគង្គ-ឡានឆាង បានឆ្លើយតបតាមតម្រូវការទាំងនេះ ដោយផ្តល់ការបណ្តុះបណ្តាលស្របតាមនិន្នាការថ្មីៗនៃឧស្សាហកម្មវិស្វកម្មសំណង់ស៊ីវិលពិភពលោក ដែលរួមចំណែកដល់ការអភិវឌ្ឍសេដ្ឋកិច្ចសង្គមប្រកបដោយចីរភាពនៅកម្ពុជា និងតំបន់៕

ខេត្តក្រចេះ៖ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានលើកឡើងពីតួនាទីវត្តអារាមដែលមិនត្រឹមតែជាទី កន្លែងសម្រាប់ការបំពេញបុណ្យកុសលប៉ុណ្ណោះទេ ប៉ុន្តែថែមទាំងជាគ្រឹះស្ថានអប់រំ ដែលរួមចំណែកបណ្តុះបណ្តាលមនុស្សឱ្យក្លាយជាពលរដ្ឋល្អ មានសុជីវធម៌ មានវិន័យ និងមានទំនួលខុសត្រូវចំពោះសង្គម។ ឯកឧត្តមឧបនាយករដ្ឋមន្ត្រី ហ៊ុន ម៉ានី បានលើកឡើងបែបនេះ នៅក្នុងក្នុងពិធីប្រកាសតែងតាំង និងស្រោចស្រពព្រះសុគន្ធវារី ប្រគេនព្រះរាមានុបាល ឌន ស៊ីដន ឱ្យឡើងទៅជាព្រះគ្រូវិសុទ្ធិមេធា ព្រះរាជាគណៈថ្នាក់កិត្តិយស គណមហានិកាយនៃព្រះរាជាណាចក្រកម្ពុជា និងឱ្យឡើងទៅជាព្រះគ្រូអនុគណស្រុកស្នួល នៅបរិវេណវត្តសទ្ធារង្សីខន្តិយារាម ស្ថិតក្នុងភូមិផ្សារស្នួល ឃុំស្នួល ស្រុកស្នួល ខេត្តក្រចេះ។មានប្រសាសន៍សំណេះសំណាលនាឱកាសនេះ ឯកឧត្តមឧបនាយករដ្ឋមន្ត្រី បានបន្តថា "តាំងពីដើមរៀងមក ព្រះពុទ្ធសាសនា បានដើរតួនាទីយ៉ាងសំខាន់ក្នុងសង្គមខ្មែរ ជាពិសេសក្នុងការលើកកម្ពស់ ការអប់រំផ្នែកចរិយាធម៌ សីលធម៌ និងគុណធម៌ ដល់ប្រជា ពលរដ្ឋកម្ពុជា។ តាមរយៈការអប់រំ ការទូន្មាន និងការអនុវត្តព្រះធម៌ ព្រះពុទ្ធសាសនា បាន ចូលរួមយ៉ាងសកម្មក្នុងការបណ្តុះបណ្តាលមនុស្សឱ្យមានសុជីវធម៌ មានការអត់ធ្មត់ មាន មេត្តាធម៌ និងអាចរស់នៅក្នុងសង្គមដោយសុខដុមរមនា។ លើសពីនេះ ក្នុងនាមជាសាសនារបស់រដ្ឋ និងជាសាសនាដែលប្រជាជនខ្មែរភាគច្រើនគោរពប្រតិបត្តិ ព្រះពុទ្ធសាសនា ក៏បានរួមចំណែកយ៉ាងសំខាន់ក្នុងការពង្រឹងសាមគ្គីភាព ការពារ និងអភិរក្ស វប្បធម៌ អក្សរសាស្ត្រ ប្រពៃណី អត្តសញ្ញាណជាតិ និងបុព្វហេតុរួមរបស់កម្ពុជាផងដែរ។""វត្តអារាមមិនត្រឹមតែជាទីកន្លែងសម្រាប់ការបំពេញបុណ្យកុសលប៉ុណ្ណោះទេ ប៉ុន្តែថែមទាំងជាគ្រឹះស្ថានអប់រំ ដែលរួមចំណែកបណ្តុះបណ្តាលមនុស្សឱ្យក្លាយជាពលរដ្ឋល្អ មានសុជីវធម៌ មានវិន័យ និងមានទំនួលខុសត្រូវចំពោះសង្គម។ ជាពិសេស ចាប់តាំងពីបុរាណកាលមក វត្តអារាមតែងតែជាប់ពាក់ព័ន្ធយ៉ាងជិតស្និទ្ធនឹងជីវភាពរស់នៅរបស់ប្រជាជនខ្មែរ ក្នុងនាមជាគ្រឹះស្ថាន ដែលផ្តល់ទាំងចំណេះដឹងទូទៅ និងចំណេះដឹងផ្នែកព្រះធម៌ ដែលជាគ្រឹះសម្រាប់ការ កសាងធនធានមនុស្ស។ ទន្ទឹមនឹងនេះ វត្តអារាមនីមួយៗ ក៏ជាមូលដ្ឋាននៃប្រវត្តិសាស្ត្រ និងវប្បធម៌ ដែលឆ្លុះបញ្ចាំងពីអត្តសញ្ញាណ កេរដំណែល និងការអភិវឌ្ឍរបស់សហគមន៍ នៅតាមមូលដ្ឋាននីមួយៗផងដែរ។"

(ភ្នំពេញ)៖ នៅទីស្នាក់ការកណ្តាល ប.ស.ស. នាព្រឹកថ្ងៃទី២ ខែមេសា ឆ្នាំ២០២៦ នេះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាភិបាលនៃបេឡាជាតិសន្តិសុខសង្គម (ប.ស.ស.) បានអញ្ជើញដឹកនាំកិច្ចប្រជុំក្រុមប្រឹក្សាភិបាលនៃ ប.ស.ស. លើកទី៤ អាណត្តិទី២ ដើម្បីពង្រឹងប្រសិទ្ធភាពក្នុងការបង្កើនចំណូល កាត់បន្ថយចំណាយ និងការធ្វើឱ្យកិច្ចការទាំងឡាយប្រកបដោយតម្លាភាព ជាពិសេសនៅក្នុងកាលៈទេសៈជួបបញ្ហាប្រឈមនៃវិបត្តិសកល។ ជាមួយនឹងការវាយតម្លៃខ្ពស់ចំពោះថ្នាក់ដឹកនាំ មន្ត្រី និងបុគ្គលិកទាំងអស់នៃ ប.ស.ស. ចំពោះកិច្ចខិតខំប្រឹងប្រែងបំពេញតួនាទី ប្រកបដោយស្មារតីទទួលខុសត្រូវខ្ពស់ ឯកឧត្តមរដ្ឋមន្រ្តីបានគូសបញ្ជាក់ថា ការប្រឹងប្រែងទាំងនេះ ជួយធានាបានយ៉ាងរឹងមាំនូវនិរន្តរភាព និងគុណភាពលើការផ្តល់សេវាជូនបងប្អូនសមាជិក ប.ស.ស. ឱ្យទទួលបានអត្ថប្រយោជន៍ប្រកបដោយប្រសិទ្ធភាព និងតម្លាភាព។ ឯកឧត្តមបានសង្កត់ធ្ងន់ថា នៅពេលដែលប្រជាពលរដ្ឋទទួលបានសេវាកាន់តែប្រសើរ និងមានសុខភាពល្អ នោះគឺជាជោគជ័យរបស់ ប.ស.ស.។ឯកឧត្តម ហេង សួរ បញ្ជាក់ថា ការបង្កើនចំណូលសម្រាប់រក្សាប្រតិបត្តិការ ប.ស.ស. ឱ្យមានប្រសិទ្ធភាព និងនិរន្តរភាព គឺជាអ្វីដែលជាការចង់បានបំផុត ខណៈដែលមិនចង់ឱ្យរដ្ឋបង្កើនចំណាយ ប៉ុន្តែការបង្កើនចំណូលនោះក៏មិនត្រូវជាបន្ទុកបន្ថែមលើភាគីណាមួយនៅក្នុងកាលៈទេសៈនៃវិបត្តិសកលនាពេលនេះដែរ។ ក្នុងស្មារតីនេះ ឯកឧត្តមបានជំរុញអង្គប្រជុំមកពីគ្រប់ភាគីពាក់ព័ន្ធទាំងអស់ រួមគ្នាសិក្សារកផ្នែកដែលចំណាយច្រើន ហើយត្រូវពង្រឹងប្រសិទ្ធភាពនៃការចំណាយតាមយន្តការដែលមានស្រាប់ប្រកបដោយការយោគយល់គ្នាខ្ពស់។  លើសពីនេះ ដើម្បីទាក់ទាញសមាជិក ប.ស.ស. ឱ្យទៅទទួលសេវានៅមន្ទីរពេទ្យថ្នាក់ស្រុក និងខេត្ត ក៏ដូចជាជួយសម្រាលបន្ទុកដល់មន្ទីរពេទ្យថ្នាក់ជាតិនោះ ឯកឧត្តមក៏បានផ្តល់អនុសាសន៍ឱ្យមានការបង្កើនប្រសិទ្ធភាពសេវាកម្មនៅមន្ទីរពេទ្យមូលដ្ឋាន ជាមួយនឹងការបំពាក់ឧបករណ៍បន្ថែម ព្រមទាំងបង្កើនការផ្សព្វផ្សាយឱ្យកាន់តែទូលំទូលាយ ជាពិសេសនោះ គឺការលើកទឹកចិត្តឱ្យសាធារណជនទាក់ទងតាមប្រព័ន្ធលេខHotline ១២៨៦ ភ្លាមៗនៅពេលជួបប្រទះបញ្ហា។ ក្នុងឱកាសនោះដែរ តំណាងនិយោជក និងនិយោជិត ក៏បានថ្លែងអំណរគុណចំពោះរាជរដ្ឋាភិបាល និងក្រសួងការងារ ចំពោះការគ្រប់គ្រងបានយ៉ាងល្អក្នុងដំណើរការផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប បើទោះបីជាប្រទេសជួបប្រទះជម្លោះព្រំដែន និងវិបត្តិសង្រ្គាមនៅមជ្ឈិមបូព៌ាយ៉ាងណាក៏ដោយ។កិច្ចពិភាក្សាបានដំណើរការយ៉ាងផុសផុលលើរបៀបវារៈសំខាន់ៗរួមមាន៖ របាយការណ៍ស្ថានភាពហិរញ្ញវត្ថុប្រចាំឆ្នាំ២០២៥ របស់ ប.ស.ស. បញ្ហាប្រឈម និងវិធានការដោះស្រាយ, ផែនការសកម្មភាពប្រចាំឆ្នាំ ២០២៦ និង របាយការណ៍លទ្ធផលការងារសម្រេចបានឆ្នាំ ២០២៥ និងទិសដៅអនុវត្តបន្តជាដើម៕