ថ្លែងក្នុងឱកាសអញ្ជើញជាអធិបតីដ៏ខ្ពង់ខ្ពស់ ក្នុងពិធីបុណ្យឆ្លងឧបដ្ឋានសាលា សមិទ្ធផលនានា និងស្រោចស្រពសុគន្ធវារី ប្រគេនព្រះគ្រូចៅអធិការវត្តថ្នល់ជ័យ ស្ថិតក្នុងភូមិថ្នល់ជ័យ ឃុំពពឺស ស្រុកស្វាយអន្ទរ ខេត្តព្រៃវែង នាព្រឹកថ្ងៃទី២៦ ខែកក្កដា ឆ្នាំ២០២៦ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍គូសបញ្ជាក់ថា វិស័យសាសនា ជាផ្នែកមួយដ៏សំខាន់ក្នុងការចូលរួមកសាង និងអភិវឌ្ឍន៍ប្រទេសជាតិ ឱ្យមានការរីកចម្រើនប្រកបដោយចីរភាព។ឯកឧត្តមអភិសន្តិបណ្ឌិតបន្ថែមថា សាសនាមិនត្រឹមតែជាទីសក្ការបូជា និងជាបង្អែកស្មារតីរបស់ប្រជាពលរដ្ឋប៉ុណ្ណោះទេ ប៉ុន្តែថែមទាំងជាជង្រុកអប់រំសីលធម៌ ចរិយាធម៌ និងគុណធម៌សង្គម យ៉ាងសកម្មផងដែរ។ ឯកឧត្តមបន្តថា ការរីកចម្រើននៃវិស័យអាណាចក្រ និងពុទ្ធចក្រ ត្រូវដើរទន្ទឹមគ្នាជានិច្ច ពីព្រោះថា សុខសន្តិភាព គឺជាគ្រឹះដ៏រឹងមាំ ដែលជួយឱ្យរាជរដ្ឋាភិបាល និងសប្បុរសជននានា មានឱកាសកសាងសមិទ្ធផលនានា ទាំងផ្លូវលោក និងផ្លូវធម៌។ជាក់ស្តែង សមិទ្ធផលដែលបានសម្ពោធដាក់ឱ្យប្រើប្រាស់ នៅថ្ងៃនេះ គឺជានិមិត្តរូបនៃមហាកម្លាំងសាមគ្គី និងទឹកចិត្តជ្រះថ្លារបស់សប្បុរសជននានា ថ្នាក់ដឹកនាំនិងក្រុមការងារចុះមូលដ្ឋានស្រុកពុទ្ធបរិស័ទ ទាំងក្នុង និងក្រៅប្រទេស។ សមិទ្ធផលទាំងនេះ ពិតជាបានរួមចំណែកដល់ការអភិវឌ្ឍវិស័យព្រះពុទ្ធសាសនានៅកម្ពុជានិយាយជារួម និងដោយឡែកនៅក្នុងស្រុកស្វាយអន្ទរ ខេត្តព្រៃវែងនេះ។ប្រមុខក្រសួងមហាផ្ទៃ បានថ្លែងអំណរគុណយ៉ាងជ្រាលជ្រៅជូនចំពោះ ក្រុមការងាររាជរដ្ឋាភិបាលចុះមូលដ្ឋានស្រុកស្វាយអន្ទរ ព្រះសង្ឃ អាជ្ញាធរដែនដីគ្រប់លំដាប់ថ្នាក់ គណៈកម្មការវត្ត និងប្រជាពលរដ្ឋទាំងអស់ ដែលបានរួមសាមគ្គីគ្នាយ៉ាងសកម្ម ទាំងការដឹកនាំ និងការបរិច្ចាគថវិកា ដើម្បីកសាងសមិទ្ធផលនានា បម្រើដល់វិស័យព្រះពុទ្ធសាសនាក្នុងទីអារាមនេះ។មុននឹងបញ្ចប់ ឯកឧត្តមអភិសន្តិបណ្ឌិត ឧបនាយករដ្ឋមន្ត្រី បានផ្តល់អនុសាសន៍ផ្តាំផ្ញើ ដល់អាជ្ញាធរដែនដី និងកងកម្លាំងសមត្ថកិច្ច ឱ្យបន្តយកចិត្តទុកដាក់ដោះស្រាយសំណូមពរប្រជាពលរដ្ឋ ជួយសង្គ្រោះគ្រោះមហន្តរាយ មើលថែសុខទុក្ខគ្រួសារកងទ័ពនៅព្រំដែន ពង្រឹងសន្តិសុខមូលដ្ឋានបង្ក្រាបបទល្មើសផ្សេងៗ និងជំរុញការប្រើប្រាស់សេវាសាធារណៈឌីជីថល។ ជាមួយគ្នានេះ ឯកឧត្តមអភិសន្តិបណ្ឌិត បានបន្តជំរុញឱ្យរួមគ្នាថែរក្សាសមិទ្ធផលនានាក្នុងវត្ត រក្សាសាមគ្គីភាព និងអនាម័យបរិស្ថាន ព្រមទាំងស្នើឱ្យមាតាបិតា និងលោកគ្រូអ្នកគ្រូ យកចិត្តទុកដាក់អប់រំបណ្តុះបណ្តាលកូនចៅ និងសិស្សានុសិស្សឱ្យខិតខំរៀនសូត្រ ជៀសឆ្ងាយពីគ្រឿងញៀន និងអបាយមុខ។សូមបញ្ជាក់ថា សមិទ្ធផលដែលបានប្រារព្ធពិធីបុណ្យឆ្លងនាឱកាសនោះ រួមមាន ឧបដ្ឋានសាលាចំនួន១ខ្នង កុដិ២ខ្នង ផ្លូវបេតុងអាមេ ៣ខ្សែ ប្រវែង២៧៩ម៉ែត្រ ស្រះទឹក ១កន្លែង ព្រះពុទ្ធរូបប្រោសសត្វ ៣អង្គ បន្ទប់ទឹក៤ខ្នង មានចំនួន៧បន្ទប់ ចាក់ដីបំពេញទីធ្លាវត្ត និងទីសេនាសនៈ កសាងរបងជុំវិញសាលារៀន សមិទ្ធផលទាំងនេះប្រើប្រាស់រយៈពេលកសាងចំនួន៥ឆ្នាំ និងចំណាយថវិកាសរុបចំនួន ៥៩៦,៧២៤ដុល្លារអាម៉េរិក៕

ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ និងជាប្រធានសមាគមក្រុមគ្រូពេទ្យស្ម័គ្រចិត្ត ស សុខា ព្រមទាំងលោកជំទាវ កែ សួនសុភី ស សុខា បានបានសម្តែងកាកោតសរសើរយ៉ាងជ្រាលជ្រៅចំពោះកិច្ចខិតខំប្រឹងប្រែងរបស់ក្រុមគ្រូពេទ្យស្ម័គ្រចិត្ត ជិត ៤០០នាក់ ដែលបាននិងកំពុងបន្តបេសកកម្មចុះពិនិត្យនិងព្យាបាលជំងឺជូនប្រជាពលរដ្ឋ ដោយឥតគិតថ្លៃ។ ការថ្លែងនេះ បានធ្វើឡើងក្នុងឱកាសដែលឯកឧត្តមអភិសន្តិបណ្ឌិត និងលោកជំទាវ បានអញ្ជើញជាអធិបតីពិធីពិនិត្យនិងព្យាបាលជំងឺ ដោយឥតគិតថ្លៃ ជូនប្រជាពលរដ្ឋ នៅស្រុកស្វាយអន្ទរ ខេត្តព្រៃវែង នាព្រឹកថ្ងៃទី២៦ ខែកក្កដា ឆ្នាំ២០២៦។ឯកឧត្តមអភិសន្តិបណ្ឌិត បានមានប្រសាសន៍ថា តាំងពីមានការកកើតនៃក្រុមគ្រូពេទ្យស្ម័គ្រ ស សុខា មកក្រុមគ្រូពេទ្យបានព្យាបាលជំងឺជូនប្រជាពលរដ្ឋ ដោយឥតគិតថ្លៃជាង៥៣ម៉ឺននាក់។ ឯកឧត្តម បានគូសបញ្ជាក់ថា សមិទ្ធផលទាំងនេះ មិនអាចសម្រេចទៅបានឡើយ ប្រសិនបើគ្មានការចូលរួមពីអភិបាលនៃគណៈអភិបាលខេត្តព្រៃវែង គណៈបញ្ជាការឯកភាព ប្រធានមន្ទីរពេទ្យ ជាពិសេស "កងទ័ពអាវស" ដែលបានលះបង់កម្លាំងកាយចិត្តចូលរួមដោយស្ម័គ្រចិត្ត មិនគិតកម្រៃ។ សកម្មភាពទាំងនេះ គឺជាការលះបង់ដ៏មានសារសំខាន់ដើម្បីផលប្រយោជន៍ជាតិ និងសង្គម ជាពិសេសគឺការលើកស្ទួយសុខភាព និងសុខុមាលភាពរបស់ប្រជាពលរដ្ឋ។លោកវេជ្ជបណ្ឌិត សេង បញ្ញាឫទ្ធិ ប្រធានមន្ទីរសុខាភិបាលនៃរដ្ឋបាលខេត្តព្រៃវែង បានឱ្យដឹងថា ក្រុមការងារ និងក្រុមគ្រូពេទ្យស្ម័គ្រចិត្ត ស សុខា ដែលបានចុះពិនិត្យ និងព្យាបាលជំងឺ ដោយឥតគិតថ្លៃ ជូនពលរដ្ឋ នៅស្រុកស្វាយអន្ទរ ព្រឹកនេះមានចំនួន៣៨០នាក់។ ក្រុមគ្រូពេទ្យ នឹងពិនិត្យនិងព្យាបាលជំងឺទូទៅ រួមមាន៖ អប់រំសុខភាព ជំងឺផ្លូវចិត្ត ជំងឺកុមារ ជំងឺរោគស្ត្រី ជំងឺឫសដូងបាត ជំងឺសួត ជំងឺក្រពះ ពោះវៀន ជំងឺផ្លូវដង្ហើម ជំងឺប្រដាប់រំលាយអាហារ ជំងឺសើស្បែក ជំងឺដង្កូវព្រូន ជំងឺស្លេកស្លាំង ជំងឺសន្លាក់ឆ្អឹងជំងឺ រលាកថ្លើម ជំងឺកាមរោគ ជំងឺគ្រុនចាញ់ ជំងឺគ្រុនឈាម ជំងឺភ្នែក និងវាស់ភ្នែក។ ក្រៅពីនេះ ក៏មានការពិនិត្យភ្នែក និងចែកវ៉ែនតា ការពិនិត្យ និងព្យាបាលសុខភាពមាត់ធ្មេញ ជំងឺទឹកនោមផ្អែម ជំងឺបេះដូង ជំងឺលើសឈាម ជំងឺត្រចៀក ច្រមុះ បំពង់ក ជំងឺតម្រងនោម ពិនិត្យអេកូសាស្ត្រ វាស់ចង្វាក់បេះដូង មន្ទីរពិសោធន៍ (វិភាគឈាម) វះកាត់តូច និងព្យាបាលរបួសជាដើម។លោកប្រធានមន្ទីរសុខាភិបាល បានបន្ថែមថា ក្នុងឆមាសទី១ ឆ្នាំ២០២៦ ក្រុមគ្រូពេទ្យស្ម័គ្រចិត្តបានពិនិត្យ និងពិគ្រោះជំងឺសរុប៥៣៧.០១៦ករណី។ លើសពីនេះ កាលពីឆ្នាំ២០២៥ មន្ទីរសុខាភិបាលខេត្តក៏បានបញ្ជូនមណ្ឌលសុខភាពចំនួន២ ចូលរួមប្រឡងប្រណាំងអង្គភាពផ្តល់សេវាសាធារណៈគំរូថ្នាក់ជាតិទូទាំងប្រទេស ជាលទ្ធផលនៅថ្ងៃទី២៩ ខែមិថុនា ឆ្នាំ២០២៦ កន្លងទៅ មណ្ឌលសុខភាពព្រៃព្នៅ ស្ថិតក្នុងស្រុកប្រតិបត្តិពារាំង ទទួលបានជ័យលាភីចំណាត់ថ្នាក់លេខ៣ ជាមណ្ឌលសុខភាពផ្តល់សេវាគំរូថ្នាក់ជាតិទូទាំងប្រទេស។សូមរំលឹកផងដែរថា កន្លងមក ក្រុមគ្រូពេទ្យស្ម័គ្រចិត្ត ស សុខា បានចុះពិនិត្យ និងព្យាបាលជំងឺជូនប្រជាពលរដ្ឋ ដោយឥតគិតថ្លៃ ចំនួន១៩លើក មាន១២ក្រុង ស្រុក គឺក្រុងព្រៃវែង ស្រុកពាមជរ ស្រុកស៊ីធរកណ្ដាល ស្រកពារាំង ស្រុកកំចាយមារ ស្រុកពាមរក៍ ស្រុកមេសាង ស្រុកព្រះស្ដាច ស្រុកកំពង់ត្របែក ស្រុកពោធិ៍រៀង និងស្រុកបាភ្នំ ដែលធ្វើការបានពិនិត្យ និងព្យាបាលជំងឺជូនពលរដ្ឋចំនួន៦៨.០៨៧នាក់ ស្ត្រី៤៣.៤១៥នាក់៕

ខេត្តកំពង់ធំ ៖ ឯកឧត្តម ហួត ហាក់ សមាជិកគណៈកម្មាធិការកណ្តាល អនុប្រធានគណៈកម្មាធិការគណបក្សចុះមូលដ្ឋានខេត្តកំពង់ធំ និងជាប្រធានក្រុមការងារគណបក្សចុះមូលដ្ឋានស្រុកបារាយណ៍ បានអញ្ជើញដឹកនាំកិច្ចប្រជុំបូកសរុបលទ្ធផលការងារឆមាសទី១ និងលើកទិសដៅការងារឆមាសទី២, ការដាក់ចេញផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧ ព្រមទាំងប្រកាសសមាសភាពគណៈបញ្ជាការយុទ្ធនាការបោះឆ្នោត សម្រាប់ស្រុកបារាយណ៍ ខេត្តកំពង់ធំ។កិច្ចប្រជុំនេះផ្តោតលើគោលបំណងសំខាន់ចំនួន ៣ គឺ៖ ១). បូកសរុបលទ្ធផលការងារឆមាសទី១ ដោយវាយតម្លៃចំណុចខ្លាំង ចំណុចខ្វះខាត បញ្ហាប្រឈម សំណូមពរ និងកំណត់ទិសដៅការងារឆមាសទី២ ឆ្នាំ២០២៦, ២). ដាក់ចេញផែនការរួមនៅថ្នាក់ស្រុក សម្រាប់ត្រៀមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧, និង៣). សេចក្តីសម្រេចស្តីពីការបង្កើត និងតែងតាំងសមាសភាពគណៈបញ្ជាការយុទ្ធនាការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧។ កិច្ចប្រជុំមានការអញ្ជើញចូលរួមពីឯកឧត្តម លោកជំទាវ ថ្នាក់ដឹកនាំ និងសមាជិកក្រុមការងារគណបក្សចុះមូលដ្ឋានស្រុកបារាយណ៍ ក្រុមប្រឹក្សាស្រុក ប្រធានគណៈកម្មាធិការគណបក្សស្រុក ឃុំ, ប្រធានក្រុមការងារគណបក្សចុះមូលដ្ឋានឃុំទាំង១០ ព្រមទាំងសមាជិក សមាជិកា សរុបប្រមាណ ៣០០នាក់។ថ្លែងក្នុងកិច្ចប្រជុំ ឯកឧត្តម ហួត ហាក់ បានលើកឡើងថា ផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៦ ឆ្នាំ២០២៧ ត្រូវបានគណៈកម្មាធិការកណ្តាលគណបក្សដាក់ចេញកាលពីថ្ងៃទី២៧ ខែមេសា ឆ្នាំ២០២៦ ហើយត្រូវបានគណបក្សខេត្តកំពង់ធំផ្សព្វផ្សាយសម្រាប់អនុវត្តក្នុងក្របខ័ណ្ឌខេត្ត ក្រោមអធិបតីភាពដ៏ខ្ពង់ខ្ពស់របស់ឯកឧត្តម វង្សី វិស្សុត សមាជិកគណៈអចិន្ត្រៃយ៍នៃគណៈកម្មាធិការកណ្តាលគណបក្ស និងជាប្រធានក្រុមការងារគណបក្សចុះមូលដ្ឋានខេត្តកំពង់ធំ។ឯកឧត្តម ហួត ហាក់ បានគូសបញ្ជាក់ថា សមិទ្ធផលដែលសម្រេចបាននាពេលកន្លងមក គឺជាផ្លែផ្កានៃការរួបរួមសាមគ្គីភាព ឯកភាពផ្ទៃក្នុង កិច្ចសហប្រតិបត្តិការល្អ និងការលះបង់សព្វគ្រប់បែបយ៉ាង របស់ថ្នាក់ដឹកនាំ គ្រប់ផ្នែក គ្រប់ថ្នាក់ និង សមាជិកគ្រប់ៗរូប ដោយប្រកាន់ខ្ជាប់នូវស្មារតី «ហ៊ានគិត ហ៊ានធ្វើ និងហ៊ានទទួលខុសត្រូវ» ដើម្បីបុព្វហេតុគណបក្ស និងផលប្រយោជន៍របស់ប្រជាពលរដ្ឋ។ជាមួយគ្នានេះ ឯកឧត្តម ហួត ហាក់ ក៏បានគូសបញ្ជាក់បន្ថែមថា ផែនការរួមរបស់ស្រុកបារាយណ៍ ត្រូវបានរៀបចំទៅតាមការណែនាំរបស់ថ្នាក់កណ្តាល និង ថ្នាក់ខេត្ត ព្រមទាំងស្របតាមស្ថានភាពជាក់ស្តែង និងចាត់ទុកជាត្រីវិស័យនៅថ្នាក់ស្រុក សម្រាប់ក្រុមការងារគ្រប់ថ្នាក់ ក្នុងការពង្រឹងការអនុវត្តការងារ ដើម្បីឆ្ពោះទៅរកជ័យជម្នះក្នុងការបោះឆ្នោតនាពេលខាងមុខ។ទន្ទឹមនឹងនេះ ឯកឧត្តម ហួត ហាក់ ក៏បានណែនាំឱ្យថ្នាក់ឃុំ និង ក្រុមការងារចុះជួយគ្រប់លំដាប់ថ្នាក់ ត្រូវមានផែនការសកម្មភាពអនុវត្តជាក់ស្តែង រៀបចំប្រតិទិនការងារ និង ចុះមូលដ្ឋានឱ្យបានជាប់ជាប្រចាំ ស្របតាមគោលការណ៍ ច ៣ (ចុះជួប ចុះជួយ ចុះចាយ) ព្រមទាំងអនុវត្តតាមតួនាទីភារកិច្ច ប្រកបដោយការទទួលខុសត្រូវខ្ពស់។ ស្រុកបារាយណ៍ ខេត្តកំពង់ធំ,ព្រឹកថ្ងៃទី២៦ ខែកក្កដា ឆ្នាំ២០២៦

(កំពង់ចាម)៖ អតីតពលករមកពីប្រទេសថៃ និងប្រជាពលរដ្ឋប្រមាណជិត ១ពាន់នាក់ បានចូលរួម ទទួលបានឱកាសការងារ និងចុះឈ្មោះចូលរៀនជំនាញបច្ចេកទេសនៅក្នុងវេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ ដែលបានធ្វើឡើងនៅខេត្តកំពង់ចាម កាលពីថ្ងៃទី២៤-២៥ ខែកក្កដា ឆ្នាំ២០២៦។លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា វេទិកាការងារនេះ មានអតីតពលករខ្មែរមកពីប្រទេសថៃ និងប្រជាពលរដ្ឋសរុបចំនួន ៩៨០នាក់បានអញ្ជើញចូលរួមស្វែងរកការងារធ្វើ ក៏ដូចជាស្វែងយល់បន្ថែមអំពីអត្ថប្រយោជន៍នៃរបបសន្តិសុខសង្គម និងឱកាសចូលរៀនវគ្គបណ្តុះបណ្តាលបច្ចេកទេស និងវិជ្ជាជីវៈ ដោយឥតគិតថ្លៃផងដែរ។លោកបន្តថា ក្នុងឱកាសនោះ អតីតពលករមកពីប្រទេសថៃ និងប្រជាពលរដ្ឋបានចុះឈ្មោះចូលរៀនជំនាញសរុបចំនួន ២២នាក់ ចំណែកអ្នកជាប់ការងារសរុប ១១២នាក់ (តួលេខបឋម) ទទួលបានការងារពីក្រុមហ៊ុន រោងចក្រ សហគ្រាសធំៗ ដែលបានចុះទៅផ្សព្វផ្សាយឱកាសការងារ និងជ្រើសរើសកម្លាំងពលកម្មដល់មូលដ្ឋាន។អ្នកនាំពាក្យរូបនេះ បានអំពាវនាវដល់បងប្អូនអតីតពលករខ្មែរ ដែលត្រឡប់មកពីប្រទេសថៃ និងពលរដ្ឋខ្មែរ ដែលមិនបានចូលរួមវេទិកាការងារលើកនេះ សូមទាក់ទងទៅកាន់លេខ ១២៩៧ ដែលមានមន្ត្រីក្រសួងការងារនៅរង់ចាំទទួលទូរសព្ទរបស់បងប្អូន ៧ថ្ងៃក្នុងមួយសប្តាហ៍ ដើម្បីទទួលបានឱកាសការងារ និងការបណ្តុះបណ្តាលជំនាញបច្ចេកទេស និងវិជ្ជាជីវៈ ដោយឥតគិតថ្លៃ៕

(ស្វាយរៀង)៖ អ្នកសារព័ត៌មានមកពីបណ្តាស្ថាប័នព័ត៌មានជាតិ និងតំណាងសហជីព បានអញ្ជើញចុះទស្សនកិច្ចនៅ វិទ្យាស្ថានពហុបច្ចេកទេសភូមិភាគតេជោសែនស្វាយរៀង ដើម្បីស្វែងយល់ដោយផ្ទាល់អំពីការអនុវត្តកម្មវិធីរបស់ក្រសួងការងារ និងបណ្តុះបណ្តាលវិជ្ជាជីវៈ ក្នុងការជួយគាំទ្របងប្អូនអតីតពលករខ្មែរដែលបានវិលត្រឡប់មកពីប្រទេសថៃ តាមរយៈការអភិវឌ្ឍជំនាញ ការទទួលស្គាល់បទពិសោធន៍ការងារ និងការភ្ជាប់ទៅកាន់ឱកាសការងារក្នុងស្រុក។ដំណើរទស្សនកិច្ចនេះ គឺជាផ្នែកមួយនៃកិច្ចខិតខំប្រឹងប្រែងរបស់រាជរដ្ឋាភិបាល ក្នុងការបង្ហាញឱ្យសាធារណជន និងដៃគូពាក់ព័ន្ធបានឃើញពីវិធានការជាក់ស្តែង ដែលបានអនុវត្ត ដើម្បីជួយឱ្យបងប្អូនអតីតពលករដែលបានវិលត្រឡប់មកពីប្រទេសថៃ អាចបន្តអាជីព មានការងារសមរម្យ បង្កើនប្រាក់ចំណូល និងរស់នៅប្រកបដោយស្ថិរភាពនៅក្នុងប្រទេស។ក្នុងឱកាសនោះ អ្នកចូលរួមបានទស្សនាពីដំណើរការវាយតម្លៃសមត្ថភាព ការធ្វើតេស្តទទួលស្គាល់ជំនាញពីមុន(Recognition of Prior Learning – RPL) ការបណ្តុះបណ្តាលជំនាញ ការណែនាំអំពីកម្មវិធី TVET ១.៥M និងឱកាសការងារពីទីភ្នាក់ងារជាតិមុខរបរ និងការងារ (NEA) ដែលកំពុងជួយភ្ជាប់អតីតពលករទៅកាន់ឱកាសការងារនៅក្នុងរោងចក្រ សហគ្រាស និងតំបន់សេដ្ឋកិច្ចពិសេសក្នុងខេត្តស្វាយរៀង និងបណ្តាខេត្តជិតខាង។គណៈប្រតិភូក៏បានជួបសំណេះសំណាលជាមួយបងប្អូនអតីតពលករខ្មែរដែលបានវិលត្រឡប់មកពីប្រទេសថៃ ដោយបានចែករំលែកបទពិសោធន៍អំពីការទទួលបានការគាំទ្រពីរាជរដ្ឋាភិបាល ការធ្វើតេស្តទទួលស្គាល់ជំនាញ ការបណ្តុះបណ្តាលបន្ថែម និងការទទួលបានការងារថ្មីដែលសមស្របនឹងសមត្ថភាពរបស់ខ្លួន។ឯកឧត្តម ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា៖ «ការគាំទ្ររបស់រាជរដ្ឋាភិបាលចំពោះបងប្អូនអតីតពលករដែលបានវិលត្រឡប់មកពីប្រទេសថៃ មិនត្រឹមតែជាការទទួលស្វាគមន៍ពួកគាត់ត្រឡប់មកមាតុភូមិប៉ុណ្ណោះទេ ប៉ុន្តែជាការបន្តបង្កើតឱកាសឱ្យពួកគាត់មានជំនាញដែលស្របទៅតាមតម្រូវការទីផ្សារការងារ ទទួលបានការងារសមរម្យ និងអាចកសាងអនាគតរបស់ខ្លួននៅកម្ពុជា។»ឯកឧត្តមបានបន្ថែមថា វិទ្យាស្ថានពហុបច្ចេកទេសភូមិភាគតេជោសែនស្វាយរៀង ដើរតួនាទីយ៉ាងសំខាន់ក្នុងការផលិតធនធានមនុស្សប្រកបដោយជំនាញ ដើម្បីឆ្លើយតបទៅនឹងតម្រូវការរបស់វិស័យឧស្សាហកម្ម ជាពិសេសតំបន់សេដ្ឋកិច្ចពិសេស និងរោងចក្រនានាក្នុងខេត្តស្វាយរៀង ដែលកំពុងមានតម្រូវការកម្លាំងពលកម្មជំនាញកាន់តែច្រើន។ដំណើរទស្សនកិច្ចនេះបានបង្ហាញពីការប្តេជ្ញាចិត្តរបស់រាជរដ្ឋាភិបាល ក្នុងការយកចិត្តទុកដាក់ចំពោះបងប្អូនអតីតពលករដែលបានវិលត្រឡប់មកពីប្រទេសថៃ តាមរយៈការអភិវឌ្ឍជំនាញ ការបង្កើតឱកាសការងារ និងការលើកកម្ពស់ជីវភាពរស់នៅរបស់ប្រជាពលរដ្ឋ ស្របតាមគោលនយោបាយអភិវឌ្ឍន៍ធនធានមនុស្ស និងការរីកចម្រើនប្រកបដោយចីរភាពរបស់កម្ពុជា។គួរបញ្ជាក់ផងដែរថា វិទ្យាស្ថានពហុបច្ចេកទេសភូមិភាគតេជោសែនស្វាយរៀង បានទទួលធ្វើតេស្តវាយតម្លៃសមត្ថភាពលើជំនាញផ្សារអគ្គិសនី ដល់បងប្អូនអតីតពលករខ្មែរដែលបានត្រឡប់មកពីប្រទេសថៃបានចំនួន ១៦០នាក់​ ក្នុងនោះអ្នកទទួលបានវិញ្ញាបនបត្រគុណវុឌ្ឍិជំនាញចំនួន ១២២នាក់ និងអ្នកទទួលបានលិខិតបញ្ជាក់ក្រេឌីតចំនួន ៣៨នាក់៕

(ភ្នំពេញ) ៖ «ដោយសារការជឿជាក់យ៉ាងមុតមាំបំផុត ទៅលើ រាជរដ្ឋាភិបាល ដែលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ប្រកបដោយចក្ខុវិស័យវែងឆ្ងាយ ទើប KNN GROUP សម្រេចចិត្តវិនិយោគបង្កើតរោងចក្រតម្លើងរថយន្តចំនួនទឹកប្រាក់២៨ លានដុល្លាសហរដ្ឋអាមេរិក។ ក្រុមហ៊ុន KNN GROUP គឺជាក្រុមហ៊ុនដែលបង្កើតឡើង និងគ្រប់គ្រង ភាគហ៊ុន ១០០% ដោយ ជនជាតិខ្មែរ ហើយការវិនិយោគរោងចក្រដំឡើងរថយន្តនេះ នឹងផ្តល់នូវអត្ថប្រយោជន៍ដល់ប្រទេសយើង រួមមានជួយកាត់បន្ថយការពឹងផ្អែកលើការនាំចូល ព្រមទាំងផ្តល់នូវការផ្ទេរបច្ចេកវិទ្យាទំនើប និងជំនាញបច្ចេកទេសដល់យុវជនខ្មែរជំនាន់ក្រោយ។ លើសពីនេះគឺចូលរួមអភិវឌ្ឍធនធានមនុស្ស បង្កើតបុគ្គលិកជំនាញ និងឱកាសការងាររាប់រយកន្លែងសម្រាប់    សហគមន៌យើងផងដែរ » នេះជាការថ្លែងរបស់អ្នកឧកញ៉ា ជាម ឃុនណាត ប្រធានក្រុមប្រឹក្សាភិបាល ក្រុមហ៊ុន KNN GROUP ក្នុងពិធីបញ្ចុះបឋមសិលាបើកការដ្ឋានសាងសង់រោងចក្រដំឡើងរថយន្ត ដែលប្រារព្ធឡើងនាថ្ងៃទី២៦ ខែកក្កដា ឆ្នាំ២០២៦ ស្ថិតក្នុងស្រុកខ្សាច់កណ្តាល ខេត្តកណ្តាល។ពិធីដ៏ឱឡារឹកនេះ ទទួលបានការផ្តល់កិត្តិយសចូលរួមជាអធិបតីភាពដោយ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ដែលបានសម្តែងនូវការអបអរសាទរចំពោះការសម្រេចចិត្តវិនិយោគដ៏ធំសម្បើមនេះ នៅក្នុងតំបន់ដែលនឹងចូលរួមចំណែកយ៉ាងសកម្មដល់កំណើនសេដ្ឋកិច្ចជាតិ។ ក្នុងកម្មវិធីនេះ ក៏មានការចូលរួមពីអ្នកឧកញ៉ា ជាម ឃុនណាត ប្រធានក្រុមប្រឹក្សាភិបាល KNN Group និងលោកជំទាវ, គណៈគ្រប់គ្រងជាន់ខ្ពស់, បុគ្គលិក, ដៃគូអាជីវកម្ម, អ្នកសារព័ត៌មាន និងភ្ញៀវកិត្តិយសជាច្រើនកុះករ។ឆ្លៀតក្នុងឪកាសនេះដែរ ឯកឧត្តម ជា វុទ្ធី បានមានប្រសាសន៍សង្កត់ធ្ងន់ថា« ខ្ញុំសូមអរគុណចំពោះក្រុមហ៊ុន KNN GROUP ដែលបានជឿជាក់លើរដ្ឋាភិបាលកម្ពុជា និងសូមអះអាងថា ក្រុមប្រឹក្សាអភិវឌ្ឍន៍កម្ពុជា នឹងបន្តធ្វើការយ៉ាងជិតស្និទ្ធជាមួយក្រុមហ៊ុន ដើម្បីធានាឲ្យគម្រោងនេះអនុវត្តបានដោយរលូន និងទទួលបានជោគជ័យស្របតាមប្រសាសន៍ដ៏ខ្ពង់ខ្ពស់របស់ សម្តេចធិបតី នាយករដ្ឋមន្ត្រី ដែលសម្តេចបានគូសបញ្ជាថា កម្ពុជាមិនមែនចង់បានតែការវិនិយោគនោះទេ តែក៏ចង់បានភាពរីកចម្រើននៃការវិនិយោគរបស់ក្រុមហ៊ុននៅកម្ពុជាផងដែរ។ »គម្រោងរោងចក្រដំឡើងរថយន្ត JETOUR មានទុនវិនិយោគសរុប ២៨ លានដុល្លារអាមេរិក លើផ្ទៃដីសរុប ១០ ហិកតា ដែលរំពឹងថានឹងចាប់ផ្តើមខ្សែសង្វាក់ផលិតកម្មនៅដើមឆ្នាំ ២០២៧។ រោងចក្រនេះត្រូវបានរចនាឡើងជាមួយនឹងបច្ចេកវិទ្យាជំនាន់ចុងក្រោយ ដែលមានសមត្ថភាពផលិត និងដំឡើងរថយន្តបានជាង ២០,០០០ គ្រឿងក្នុងមួយឆ្នាំ។ រោងចក្រនេះមានសមត្ថភាពអាចផ្គុំដំឡើងរថយន្តច្រើនប្រភេទ រួមមាន រថយន្តប្រភេទចំហេះក្នុង (សាំង) ប្រភេទអគ្គីសនីលាយសាំង (PHEV) និងប្រភេទអគ្គីសនីសុទ្ធ (EV) គ្រប់ប្រភេទ ដើម្បីបំពេញតម្រូវការទីផ្សារក្នុងស្រុក ក៏ដូចជាការត្រៀមខ្លួនសម្រាប់នាំចេញទៅកាន់ទីផ្សារតំបន់អាស៊ាននាពេលអនាគត។ចំណុចពិសេសរបស់រោងចក្រនេះ គឺការបំពាក់ប្រព័ន្ធស្វ័យប្រវត្តិកម្មកម្រិតខ្ពស់ (AGV) នៅគ្រប់ដំណាក់កាលផលិត ដើម្បីធានាបាននូវប្រសិទ្ធភាព និងភាពជាក់លាក់ខ្ពស់។ ក្រៅពីខ្សែសង្វាក់ផលិតកម្មដ៏ទំនើប KNN Group ក៏បានវិនិយោគលើផ្លូវសាកល្បងរថយន្ត (Test Track) ប្រវែង ១,៣៣៥ ម៉ែត្រ ដែលជាផ្លូវសាកល្បងវែងតាមស្តង់ដារអន្តរជាតិ ដើម្បីធ្វើតេស្តគុណភាពរថយន្តគ្រប់គ្រឿងមុនពេលបញ្ជូនទៅដល់ដៃអតិថិជន។ លើសពីនេះ រោងចក្រផ្តោតសំខាន់លើនិរន្តរភាពបរិស្ថាន តាមរយៈការប្រើប្រាស់ថាមពលស្អាត (Green Energy) និងបច្ចេកវិទ្យាទំនើបក្នុងការគ្រប់គ្រងសំណល់ ដើម្បីរួមចំណែកដល់ការអភិវឌ្ឍឧស្សាហកម្មបៃតងនៅកម្ពុជា។គម្រោងនេះត្រូវបានរំពឹងថានឹងក្លាយជាកម្លាំងចលករថ្មីដ៏សំខាន់មួយទៀត ក្នុងការរុញច្រានកំណើនសេដ្ឋកិច្ចរបស់ខេត្តកណ្តាលឱ្យមានសន្ទុះកាន់តែរឹងមាំ និងប្រកបដោយចីរភាព។ គម្រោងនេះនឹងចូលរួមចំណែកយ៉ាងសកម្មក្នុងការបង្កើនគុណភាពធនធានមនុស្ស លើកកម្ពស់ជំនាញវិជ្ជាជីវៈ និងបង្កើនប្រាក់ចំណូលគ្រួសារ ទាំងនេះសុទ្ធតែស្របតាមផែនការយុទ្ធសាស្ត្ររបស់រាជរដ្ឋាភិបាល ក្នុងការអភិវឌ្ឍន៍ធនធានមនុស្ស និងជំរុញឧស្សាហកម្មក្នុងស្រុក ៕សម្រាប់ព័ត៌មានបន្ថែម​ សូមទំនាក់ទំនង៖ 017 713 713

(ភ្នំពេញ)៖ ក្រុមហ៊ុន រ៉ូយ៉ាល់ គ្រុប ដែលជាក្រុមហ៊ុនវិនិយោគឈានមុខគេមួយនៅកម្ពុជា ដែលបង្កើតឡើងតាំងឆ្នាំ១៩៩១ បានប្រកាសតែងតាំងជាផ្លូវការ លោក គិត ស៊ូឡា ជាអគ្គនាយករង ចាប់ពីថ្ងៃទី ២៦ ខែកក្កដា ឆ្នាំ ២០២៦ តទៅ។ ការតែងតាំងដ៏សំខាន់នេះ ត្រូវបានប្រកាសដោយផ្ទាល់ពីសំណាក់អ្នកឧកញ៉ា គិត ម៉េង ប្រធាន និងអគ្គនាយកក្រុមហ៊ុន រ៉ូយ៉ាល់ គ្រុប ដែលបានបង្ហាញពីទំនុកចិត្តយ៉ាងមុតមាំចំពោះសមត្ថភាពភាពជាអ្នកដឹកនាំ ការប្តេជ្ញាចិត្ត និងសមត្ថភាពរបស់លោក គិត ស៊ូឡា ក្នុងការរួមចំណែកជំរុញការរីកចម្រើន និងភាពជោគជ័យរយៈពេលវែងរបស់ក្រុមហ៊ុន។ក្នុងតួនាទីថ្មីនេះ លោក គិត ស៊ូឡា នឹងរាយការណ៍ដោយផ្ទាល់មកកាន់អ្នកឧកញ៉ា គិត ម៉េង និងធ្វើការយ៉ាងជិតស្និទ្ធជាមួយលោក ក្នុងការត្រួតពិនិត្យ និងដឹកនាំអាជីវកម្មទាំងមូលរបស់ក្រុមហ៊ុន រ៉ូយ៉ាល់ គ្រុប។ ភារកិច្ចសំខាន់ៗរបស់លោក រួមមានការគាំទ្រដល់ការរៀបចំ និងការអនុវត្តយុទ្ធសាស្ត្រសំខាន់ៗរបស់ក្រុមហ៊ុន តាមដានលទ្ធផលអាជីវកម្មរបស់ក្រុមហ៊ុនបុត្រសម្ព័ន្ធទាំងអស់ ដឹកនាំគម្រោង និងគំនិតផ្តួចផ្តើមសំខាន់ៗ ជំរុញកិច្ចសហការរវាងក្រុមហ៊ុនបុត្រសម្ព័ន្ធ និងតំណាងឱ្យអ្នកឧកញ៉ា គិត ម៉េង ក្នុងកិច្ចការយុទ្ធសាស្ត្រ ព្រមទាំងភារកិច្ចពិសេសនានា តាមការប្រគល់សិទ្ធិ។តួនាទីរបស់លោក គិត ស៊ូឡា នឹងមានសារៈសំខាន់ក្នុងការចូលរួមពង្រឹងអភិបាលកិច្ចល្អ ជំរុញការផ្លាស់ប្តូរអាជីវកម្ម និងជំរុញការរីកចម្រើនប្រកបដោយចីរភាពរបស់ក្រុមហ៊ុន រ៉ូយ៉ាល់ គ្រុប ដែលមានអាយុកាលជាង៣៥ឆ្នាំ។ អ្នកឧកញ៉ា គិត ម៉េង មានទំនុកចិត្តយ៉ាងមុតមាំថា លោក គិត ស៊ូឡា នឹងបំពេញតួនាទី និងការទទួលខុសត្រូវដ៏សំខាន់នេះ ដោយប្រកាន់ខ្ជាប់នូវស្ដង់ដារខ្ពស់បំផុតនៃភាពជាអ្នកដឹកនាំ សុចរិតភាព និងវិជ្ជាជីវៈ ដើម្បីរួមគ្នាកសាងក្រុមហ៊ុន រ៉ូយ៉ាល់ គ្រុប ឱ្យក្លាយជាក្រុមហ៊ុនឈានមុខ និងទទួលជោគជ័យបំផុតមួយនៅក្នុងតំបន់។ក្រៅពីសមត្ថភាពដឹកនាំក្រុមហ៊ុនលោក គិត ស៊ូឡា ក៏ជាឧកញ៉ាសប្បុរសធម៌មួយរូបនៅកម្ពុជាក្នុងការបរិច្ចាគថវិកា និងសម្ភារៈជាច្រើនដល់កាកបាទក្រហម ក៏ដូចជាចូលរួមបរិច្ចាកដល់រាជរដ្ឋាភិបាលផងដែរ។ក្រុមហ៊ុន រ៉ូយ៉ាល់ គ្រុប ក៏បានអំពាវនាវដល់បុគ្គលិកទាំងអស់ផ្ដល់នូវការគាំទ្រយ៉ាងពេញទំហឹងដល់លោក គិត ស៊ូឡា ដើម្បីឱ្យលោកអាចបំពេញតួនាទីដ៏សំខាន់នេះប្រកបដោយជោគជ័យ៕

(ភ្នំពេញ) នៅថ្ងៃទី២៦ ខែកក្កដា ឆ្នាំ២០២៦ ឯកឧត្តម ចាយ បូរិន សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាសមាជិកអចិន្ត្រៃយ៍យុវជនគណបក្សថ្នាក់កណ្ដាល ​​ដឹកនាំប្រតិភូយុវជនផ្នែកឃោសនាអប់រំ​ អញ្ជើញសួរសុខទុក្ខ និងនាំយកអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា ប្រធានយុវជនគណបក្សប្រជាជនកម្ពុជាថ្នាក់កណ្ដាល និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការកាយឫទ្ធិនារីកម្ពុជា ជូនឯកឧត្តមបណ្ឌិតសភាចារ្យ ច័ន្ទ សារុន សមាជិករដ្ឋសភា និងជាអតីតរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅគេហដ្ឋាន ស្ថិតនៅសង្កាត់បឹងកេងកង១ ខណ្ឌចំការមន រាជធានីភ្នំពេញ។ក្នុងឱកាសនោះ ឯកឧត្តមប្រធានគណៈប្រតិភូ បានពាំនាំការផ្តាំផ្ញើការសួរសុខទុក្ខ ពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា ជាប្រធានយុវជនគណបក្សប្រជាជនកម្ពុជាថ្នាក់កណ្ដាល និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការកាយឫទ្ធិនារីកម្ពុជា ព្រមទាំងសម្ដេច ឯកឧត្តម ថ្នាក់ដឹកនាំគណបក្សគ្រប់លំដាប់ថ្នាក់ ជូនឯកឧត្តមបណ្ឌិតសភាចារ្យ ច័ន្ទ សារុន និងលោកជំទាវ ព្រមទាំងក្រុមគ្រួសារ។ ​ជានិច្ចកាល សម្ដេចអគ្គមហាសេនាបតីតេជោ សម្ដេចកិត្តិព្រឹទ្ធបណ្ឌិត សម្ដេចមហាបវរធិបតី និងលោកជំទាវបណ្ឌិត តែងតែ​យកចិត្តទុកដាក់អំពីសុខទុក្ខប្រជាជន និងថ្នាក់ដឹកនាំគ្រប់លំដាប់ថ្នាក់ ដែលធ្លាប់មានស្នាដៃ និងគុណបំណាច់ចំពោះគណបក្ស និងប្រទេសជាតិ។ឯកឧត្តមបណ្ឌិតសភាចារ្យ ច័ន្ទ សារុន មានប្រសាសន៍ថា៖ «ខ្ញុំបាទព្រមទាំងក្រុមគ្រួសារ ពិតជាមានសេចក្ដីសោមនស្សយ៉ាងក្រៃលែង និងសូមសម្ដែងកតញ្ញុតាធម៌គោរពជូនចំពោះ ​សម្តេចមហាបវរធិបតី និងលោកជំទាវបណ្ឌិត ដែលបានចាត់ ឯកឧត្តម ចាយ បូរិន ជាតំណាងដ៏ខ្ពង់ខ្ពស់ អញ្ជើញមកសួរសុខទុក្ខ និងនាំយកអំណោយដ៏ថ្លៃថ្លាមកផ្ដល់ឱ្យខ្ញុំបាទ និងក្រុមគ្រួសារដល់គេហដ្ឋានផ្ទាល់។ ខ្ញុំបាទនិងក្រុមគ្រួសារ ពិតជាមានកិត្តិយស និងក្ដីរំភើបរីករាយឥតឧបមា ចំពោះសកម្មភាពចុះសួរសុខទុក្ខរបស់ក្រុមការងារយុវជនគណបក្សថ្នាក់កណ្ដាល ក្រោមការដឹកនាំប្រកបដោយភាពប្រាកដនិយមរបស់សម្តេចមហាបវរធិបតី ហ៊ុន ម៉ាណែត ដែលបន្តប្រតិបត្តិតាមប្រពៃណីដ៏ល្អផូរផង់ពីសម្តេចតេជោ ហ៊ុន សែន ដែលតែងតែគិតគូរពីសុខទុក្ខ ជីវភាព ផ្តល់ភាពកក់ក្តៅ និងក្តីសង្ឃឹមដល់ព្រឹទ្ធាចារ្យ ដែលមានគុណបំណាច់ចំពោះគណបក្ស និងប្រទេសជាតិ ស្របតាមគោលការណ៍និងបវេណីដ៏ផូរផង់របស់គណបក្សប្រជាជនកម្ពុជា»​ និងបានបញ្ជាក់ពីការគាំទ្រ ព្រមទាំងមានជំនឿចិត្តយ៉ាងមុតមាំចំពោះរាជរដ្ឋាភិបាល អាណត្តិទី៧ នៃរដ្ឋសភា ក្រោមការដឹកនាំប្រកបដោយភាពប្រាកដនិយម និងការប្តេជ្ញាចិត្តយ៉ាងមោះមុតរបស់សម្តេចមហាបវរធិបតី ហ៊ុន ម៉ាណែត ក្នុងការបន្តការពារថែរក្សានូវសុខសន្តិភាព ស្ថិរភាពសង្គម ​និងការអភិវឌ្ឍសមិទ្ធផលថ្មីៗជូនជាតិមាតុភូមិ ព្រមទាំងបានគោរពជូនពរ សម្តេចអគ្គមហាសេនាបតីតេជោ សម្តេចកិត្តិព្រឹទ្ធបណ្ឌិត សម្តេចមហាបវរធិបតី និងលោកជំទាវបណ្ឌិត ​សម្ដេច ឯកឧត្តម ថ្នាក់ដឹកនាំគណបក្សគ្រប់លំដាប់ថ្នាក់ សូមទទួលបាននូវឧត្តមពរជ័យ សិរីមង្គល វិបុលសុខគ្រប់ប្រការ និងសូមមានសុខភាពល្អបរិបូរណ៍ ជន្មាយុយឺនយូរ ដើម្បីដឹកនាំនាវាកម្ពុជា ឈានឆ្ពោះទៅរកវឌ្ឍនភាពជានិរន្តរ៍។ទន្ទឹមនេះ ឯកឧត្តមបណ្ឌិតសភាចារ្យ បានរម្លឹកអំពីប្រវត្តិការសិក្សា ការងារ និងអនុស្សាវរីយ៍ជាច្រើន ដែលឯកឧត្តម​ធ្លាប់បានចូលរួមបម្រើឱ្យផលប្រយោជន៍ជាតិ និងគណបក្សប្រជាជនកម្ពុជា ដើម្បីជាបទពិសោធចែករំលែកជូនដល់យុវជន មានដូចជា៖ក. តំណែងតំណាងរាស្ត្រ និងការងារនយោបាយ៖ ចាប់ពីនីតិកាលទី១ នៃរដ្ឋសភា ដល់នីតិកាលទី៥ នៃរដ្ឋសភាឆ្នាំ១៩៩៣-២០១៨ ​ជាអ្នកតំណាងរាស្ត្រ ​។ ឆ្នាំ១៩៩២-១៩៩៧ ​ជាអនុប្រធានក្រុមការងារថ្នាក់កណ្តាលចុះជួយស្រុកបាទី ខេត្តតាកែវ។ ឆ្នាំ២០០១​ ជាប្រធានគណៈកម្មាធិការគណបក្សក្រសួងកសិកម្ម រុក្ខាប្រមាញ់ និងនេសាទ។ ឆ្នាំ២០០៥ ជាសមាជិកគណៈកម្មាធិការកណ្តាលគណបក្សប្រជាជនកម្ពុជា។ ឆ្នាំ១៩៩៧-២០២១ ​ជាអនុប្រធានក្រុមការងារថ្នាក់កណ្តាលចុះជួយខេត្តតាកែវ និងជាប្រធានក្រុមការងារថ្នាក់​កណ្តាលចុះជួយស្រុកត្រាំកក់។ ឆ្នាំ២០២១ ដល់បច្ចុប្បន្ន ​ជាអនុប្រធានក្រុមការងារគណបក្សចុះមូលដ្ឋានខេត្តតាកែវ និងជាប្រធានក្រុមការងារគណបក្សចុះមូលដ្ឋានស្រុកត្រាំកក់។ ​ខ. ប្រវត្តិការសិក្សា៖ ​ឆ្នាំ១៩៥៨ ​សិក្សាថ្នាក់បឋមសិក្សា នៅសាលាបឋមសិក្សាសម្ពោធិញាណ។ ​ឆ្នាំ១៩៦៣-១៩៦៦ សិក្សានៅវិទ្យាល័យព្រះឧទ័យ (តាកែវក្រុង) ​ឆ្នាំ១៩៦៧-១៩៦៨ មកសិក្សានៅវិទ្យាល័យចៅពញ្ញាយ៉ាត ​និង​ឆ្នាំ១៩៦៨-១៩៦៩ នៅវិទ្យាល័យស៊ីសុវត្ថិ​ ដោយទទួលបានសញ្ញាបត្រមធ្យមសិក្សាបឋមភូមិ និង​ធម្យមសិក្សាប័ត្រភាគទី១។ ​បញ្ចប់ការសិក្សាថ្នាក់ឧត្តមសិក្សាផ្នែកវិទ្យាសាស្ត្រព្រៃឈើ នៃសាកលវិទ្យាល័យភូមិន្ទក្សេត្រវិទ្យា និងជាវិស្វករក្សេត្រវិទ្យា (គង្គា-រុក្ខា)។ ​​ឆ្នាំ១៩៨៥-១៩៩១ បញ្ចប់ការសិក្សាថ្នាក់អនុបណ្ឌិត នៅសភាសេដ្ឋកិច្ចនៃសហភាពសាធារណរដ្ឋសង្គមនិយមសូវៀត។ ឆ្នាំ២០០៦ ទទួលបានសញ្ញាបត្របណ្ឌិតទស្សនវិជ្ជាឯកទេសវិទ្យាសាស្ត្រកសិកម្ម និងអភិវឌ្ឍន៍ជនបទ ពីសាកលវិទ្យាល័យចំរើនពហុបច្ចេកវិទ្យា។ ឆ្នាំ២០០៧ ទទួលសញ្ញាបត្របណ្ឌិតកិត្តិយសផ្នែកកសិកម្ម ពី Chonnam National University នៃសាធារណរដ្ឋកូរ៉េ និងសញ្ញាបត្របណ្ឌិតកិត្តិយសនៃការគ្រប់គ្រងពាណិជ្ជកម្ម (Honoris Causa) ពី Southern California University។គ. គោរមងារជាន់ខ្ពស់៖  ឆ្នាំ២០១២ ទទួលបានបណ្ឌិតសាស្ត្រាចារ្យផ្នែកវិទ្យាសាស្ត្រកសិកម្ម តាមព្រះរាជក្រឹត្យលេខ នស/រកត/០៥១២/៤៣០ ។ ឆ្នាំ២០២០ ទទួលបានព្រះរាជក្រឹត្យស្តីពីការតែងតាំងជាសមាជិកពេញសិទ្ធិនៃរាជបណ្ឌិតសភាកម្ពុជា គោរមងារជា «បណ្ឌិតសភាចារ្យ»។ឃ. ប្រវត្តិការងារ និងស្នាដៃ៖ ​ឆ្នាំ១៩៧៩ ចូលបម្រើការងារជាបុគ្គលិក KAMPEXIM នៅក្រសួងពាណិជ្ជកម្ម។ ​ឆ្នាំ១៩៧៩-១៩៨៧ ជាអនុប្រធានទី១ នៃនាយកដ្ឋានរុក្ខាប្រមាញ់។ ​ឆ្នាំ១៩៨៧-១៩៩៧ ជាប្រធាននាយកដ្ឋានរុក្ខាប្រមាញ់។ ​ ឆ្នាំ១៩៩៧-១៩៩៨ ជាសាកលវិទ្យាធិការ នៃសាកលវិទ្យាល័យភូមិន្ទកសិកម្ម។​ ឆ្នាំ១៩៩៨-២០០០ ជាសមាជិកសភា។ ​ ឆ្នាំ២០០០-២០០១ ជាអនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។ ​ឆ្នាំ២០០១-២០១៣ ជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។ ​ឆ្នាំ២០១៣-២០១៨ ជាទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ នៅទីស្តីការគណៈរដ្ឋមន្ត្រី។ ​ឆ្នាំ២០១៨ រហូតមកដល់បច្ចុប្បន្ន ជាសមាជិករដ្ឋសភា។ បានកសាងបណ្ណាល័យនិងសារមន្ទីរបណ្ឌិតសភាចារ្យ ច័ន្ទសារុន មួយកន្លែងស្ថិតនៅភូមិអង្គតាសោម ឃុំអង្គតាសោម ស្រុកត្រាំកក់ ខេត្តតាកែវ ជាងនេះទៅទៀត ឯកឧត្តមបណ្ឌិតសភាចារ្យ បានចែករំលែកបទពិសោធ ​ដល់យុវជនគណបក្ស ដូចខាងក្រោម៖​សម្ដេចអគ្គមហាសេនាបតីតេជោ តែងមានប្រសាសន៍ថា កម្លាំងសាមគ្គីជាកម្លាំងស្នូលរបស់គណបក្សប្រជាជនកម្ពុជា ហើយសង្ឃឹមយ៉ាងកក់ក្ដៅទៅលើកម្លាំងយុវជនបន្តវេន ដែលជាកម្លាំងចលករក្នុងការដឹកនាំនាវាកម្ពុជា ដើម្បីឈានឆ្ពោះទៅរកត្រើយវឌ្ឍនភាព និងភាពរុងរឿងជានិរន្តរ៍។វិស័យកសិកម្ម គឺជាឆ្អឹងខ្នងដ៏សំខាន់មួយនៃសេដ្ឋកិច្ចជាតិ និងជាមូលដ្ឋាននៃជីវភាពប្រជាកសិករភាគច្រើននៅជនបទ។ ដូច្នេះ មន្ត្រីជាយុវជនត្រូវចុះទៅដល់មូលដ្ឋាន ស្តាប់សំឡេងប្រជាកសិករ និងរៀនសូត្រពីការអនុវត្តជាក់ស្តែង។ ដើម្បីអភិវឌ្ឍកសិកម្មនិងវប្បកម្ម ឱ្យស្របតាមសម័យទំនើប ការផ្លាស់ប្ដូពីការធ្វើកសិកម្មតាមបែបប្រពៃណីទៅជាកសិកម្មវ័យឆ្លាត គឺជារឿងចាំបាច់បំផុត។មន្ត្រីគណបក្សត្រូវស្មោះត្រង់នឹងគណបក្ស ធ្វើការងារបម្រើគណបក្ស និងត្រូវខិតខំធ្វើខ្លួនឱ្យល្អ ដើម្បីចូលរួមបម្រើគណបក្សនិងប្រទេសជាតិឱ្យមានការរីកចម្រើន។ការសិក្សារៀនសូត្រមាននៅគ្រប់ទីកន្លែង​ គ្រប់ពេលវេលា ដូច្នេះខ្ញុំសូម​អញ្ជើញ​យុវជន សិស្ស និស្សិត ប្រជាពលរដ្ឋទូទៅ អញ្ជើញចូលសិក្សាស្រាវជ្រាវនៅបណ្ណាល័យនិងសារមន្ទីរ ដែលខ្ញុំបាទ និងក្រុមគ្រួសារបានកសាង ស្ថិតនៅភូមិអង្គតាសោម ឃុំអង្គតាសោម ស្រុកត្រាំកក់ ខេត្តតាកែវ។សូមគាំទ្រលើសកម្មភាពចុះសួរសុខទុក្ខ ក្រោមគំនិតផ្ដួចផ្ដើមដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត ប្រធានយុវជនគណបក្សប្រជាជនកម្ពុជាថ្នាក់កណ្ដាល ដែលបន្តប្រពៃណីដ៏ល្អរបស់សម្ដេចតេជោ។ សកម្មភាពនេះជាការផ្សារភ្ជាប់ដ៏មានតម្លៃមិនអាចកាត់ថ្លៃបានរវាងសមាជិកគណបក្សគ្រប់រូប និងគ្រប់ជាន់ថ្នាក់ ហើយសូមឱ្យបន្តសកម្មភាពដ៏ប្រពៃនេះ ឱ្យកាន់តែទូលំទូលាយ។ឯកឧត្តមប្រធានប្រតិភូ បានកោតសរសើរ និងវាយតម្លៃខ្ពស់ចំពោះស្នាដៃ និងការខិតខំប្រឹងប្រែងរបស់ឯកឧត្តមបណ្ឌិតសភាចារ្យ ច័ន្ទ សារុន ដែលបានចូលរួមចំណែកបម្រើគណបក្ស និងប្រជាជននាពេលកន្លងមក ជាពិសេសក្នុងវិស័យកសិកម្ម រុក្ខាប្រមាញ់ និងនេសាទ ព្រមទាំងបានប្រគល់នូវអំណោយដ៏ថ្លៃថ្លារបស់សម្តេចមហាបវរធិបតី និងលោកជំទាវបណ្ឌិត ជូនចំពោះឯកឧត្តមបណ្ឌិតសភាចារ្យ និងសូមបួងសួងដល់គុណព្រះរតនត្រ័យ និងវត្ថុស័ក្ដិសិទ្ធិក្នុងលោក តាមជួយបីបាច់ថែរក្សា ឯកឧត្តមបណ្ឌិតសភាចារ្យ និងលោកជំទាវ ព្រមទាំងក្រុមគ្រួសារ មានសុខភាពល្អ កម្លាំងមាំមួន និងមានជន្មាយុយឺនយូរ ទទួលបាននូវពុទ្ធពរ៤ប្រការ គឺអាយុ វណ្ណៈ សុខៈ ពលៈ កុំបីប្រែក្លាយជាបការៈដទៃឡើយ៕

(ភ្នំពេញ)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនលោក ទីវ តារារិទ្ធ អ្នកធ្វើដំណើរដោយជិះកង់ជុំវិញពិភពលោក និងសហការី ចូលជួបសម្តែងការគួរសម និងពិភាក្សាការងារ ព្រមទាំងចែករំលែកបទពិសោធពីការជិះកង់ពីទ្វីបអាស៊ី អឺរ៉ុប និងបញ្ចប់នៅតំបន់អាហ្រ្វិចខាងត្បូង ក្នុងចម្ងាយផ្លូវ 58,000 km ដោយឆ្លងកាត់ប្រទេសសរុប ៤០ និងប្រើរយៈពេល ២ ឆ្នាំពេញ ឬស្មើនឹង ៧៣០ថ្ងៃ។ ឯកឧត្តមរដ្ឋមន្ត្រី បានថ្លែងនូវការកោតសរសើរ និងវាយតម្លៃខ្ពស់ចំពោះទេពកោសល្យ ឆន្ទៈខ្ពស់ បទពិសោធ ការតស៊ូ និងស្មារតីស្រឡាញ់ជាតិពីសំណាក់លោក ទីវ តារារិទ្ធ ក្នុងការធ្វើដំណើរទៅកាន់ប្រទេសនានា ដើម្បីផ្សព្វផ្សាយរូបភាពវិជ្ជមានរបស់កម្ពុជា ក៏ដូចជាការចូលរួមសកម្មភាពមនុស្សធម៌ និងសង្គម។ជាមួយគ្នានេះ ឯកឧត្តមរដ្ឋមន្ត្រី បានគូសបញ្ជាក់ថា ក្រសួងទេសចរណ៍ ស្វាគមន៍ និងគាំទ្រចំពោះគំនិតផ្តួចផ្តើមដែលចូលរួមផ្សព្វផ្សាយសក្តានុពលទេសចរណ៍កម្ពុជា ជាពិសេសការនាំយកអច្ឆរិយភាពកម្ពុជាទៅកាន់ពិភពលោក។សូមបញ្ជាក់ជូនផងដែរថា កាលពីថ្ងៃទី៩ ខែកក្កដា ឆ្នាំ២០២៦ កន្លងទៅ ឯកឧត្តមរដ្ឋមន្ត្រី ក៏បានគាំទ្រដល់បេសកកម្មនៃការបើកបរទោចក្រយានយន្ត ពីព្រះរាជាណាចក្រកម្ពុជាឆ្ពោះទៅកាន់ពិព័រណ៍ម៉ូតូអន្តរជាតិ Esposizione Internazionale delle Due Ruote (EICMA) ដែលនឹងប្រារព្ធឡើងពីថ្ងៃទី៥ ដល់ថ្ងៃទី៨ ខែវិច្ឆិកា ឆ្នាំ២០២៦ នៅទីក្រុង Milan ប្រទេសអ៊ីតាលី ក្រោមកិច្ចសហការរវាងក្រុមហ៊ុន Calypso Motors និងក្រុមហ៊ុន ជីប ម៉ុង ។ ជាក់ស្តែង គំនិតផ្តួចផ្តើម និងសកម្មភាពទាំងនេះ គឺពិតជាបានចូលរួមចំណែកជំរុញការផ្សព្វផ្សាយកិត្តិនាមកម្ពុជាទៅកាន់ពិភពលោក និងលើកកម្ពស់វិស័យទេសចរណ៍កម្ពុជា ក៏ដូចជាជំរុញការវិនិយោគនៅកម្ពុជា។ ក្នុងន័យនេះ ក្រសួងទេសចរណ៍ នឹងបន្តខិតខំជំរុញគំនិតផ្តួចផ្តើម និង គាំទ្រនូវរាល់បេសកកម្មនានាដែលនាំ អច្ឆរិយភាពកម្ពុជាទៅកាន់ពិភពលោក ដើម្បី នាំពិភពលោកមកកម្ពុជាវិញ៕

(ភ្នំពេញ)៖ កម្ពុជាមានឱកាសការងារប្រមាណជាង ៩ម៉ឺន​ក​ន្លែង​នៅ​តាម​បណ្តា​រាជ​ធានី-ខេត្តទូទាំងប្រទេស កំពុងរង់ចាំបងប្អូនអតីត​ពលករ​ត្រឡប់​មក​ពីប្រទេសថៃ និងអ្នកកំពុង​ស្វែងរកការងារធ្វើ។ នេះ​បើតាមការផ្សព្វផ្សាយរបស់ ក្រសួងការងារ​ និងបណ្ដុះបណ្ដាលវិជ្ជាជីវៈ ក្នុងពេលថ្មីៗនេះ។ តាមរយៈកា​រផ្សព្វផ្សាយ ក្រសួងការ​ងារបានឱ្យដឹ​ងថា គិតត្រឹមថ្ងៃទី២៥ ខែកក្កដា ឆ្នាំ២០២៦ មានឱកាសការងារចំនួន ៩៣,២៧៦កន្លែង​​នៅ​តាម​ណ្ដា​រាជ​ធានី-ខេត្តនៅទូ​ទាំងប្រទេស កំពុងរង់​ចាំបងប្អូនអតីតពល​ករត្រឡប់ម​កពីប្រទេសថៃ និងអ្នកកំពុ​ងស្វែងរកការងារធ្វើ។ ឱកាសការងា​រទាំង​នោះ ស្ថិតនៅក្នុងវិស័យសំខាន់ៗ ដូចជា៖ វិស័យកសិកម្ម ឧស្សាហកម្ម និងវិស័យសេវាកម្ម។ ដើម្បីទទួលបានឱកាសការងារទាំងនោះ បងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែងរកការងារធ្វើ អាចស្វែងរកលេខ​ទំនាក់ទំ​នង ឈ្មោះ​រោងចក្រ និងវិស័​យដែល​ខ្លួនពេញចិត្តបា​ន​តាមរយៈខិត្តប័​ណ្ណការងាររប​ស់ក្រសួងដែល​បានផ្សព្វ​ផ្សាយ​យ៉ាងលម្អិត។ ជាមួយគ្នានេះ ក្រៅពីទំនាក់ទំនងផ្ទាល់ជាមួយក្រុមហ៊ុន រោងចក្រ សហគ្រាស អ្នកស្វែងរកការងារទាំងអស់ ជាពិសេសបងប្អូនអតីតពលករ ក៏អាច​ទាក់​ទងមកប្រព័ន្ធទំនាក់ទំនងបន្ទាន់ ១២៩៧ ដើម្បីឱ្យក្រសួងការងារជួយសម្របសម្រួលស្វែងរកការងារជូនផងដែរ។ នេះបើតាមក្រសួ​ងការងា​រ​ដដែ​ល​៕

(ភ្នំពេញ)៖ យុវតី ឈឿម កែវកាវ ជាអតីតសិស្សនិទ្ទេស A ក្នុងឆ្នាំ ២០២៥ ដែលមកពីតំបន់ដាច់ស្រយាល ក្នុងខេត្ដបន្ទាយមានជ័យ បាន​សម្រេច​ចិត្ដ​ជ្រើស​រើស​សិក្សាជំនាញ Software Engineering នៅវិទ្យាស្ថានជាតិពុហបច្ចេកទេសកម្ពុជា (NPIC) តាមរយៈវិស័យអប់រំ​បណ្តុះប​ណ្តាល​បច្ចេក​ទេស និងវិជ្ជាជីវៈ(TVET) ដោយសារសម្ដឹងឃើញគុណភាពអប់រំ មានសមត្ថភាពប្រកួតប្រជែង និងឱកាសការងារខ្ពស់ក្នុងវិស័យបច្ចេកវិទ្យា។ទោះបីជា​មានជម្រើស​សិក្សា និងឱកាស​អាហារូបករណ៍ជា​ច្រើន ក្រោ​យពីប្រឡងបា​ក់ឌុបក៏​ដោយ យុវតីរូប​នេះ នៅតែ​សម្រេច​ចិត្ដ​ជ្រើស​រើស​សិក្សា​នៅ​វិទ្យា​ស្ថាន NPIC លើ​ជំនា​ញ Software Engineering បន្ទាប់ពី​បានស្វែង​យល់អំពីគុណ​ភា​ពនៃការ​បណ្តុះបណ្តាល បរិក្ខារ​សិក្សាទំ​នើប និង​សា​ស្ត្រា​ចារ្យ ដែលមានបទពិសោ​ធន៍ ព្រម​ទាំងទទួល​បានការណែនាំពី​អតីតសិស្ស​ដែលធ្លាប់សិក្សានៅទីនោះ។យុវតី កែវកាវ បាន​លើកឡើ​ងថា៖«កត្ដាដែលជំរុញឱ្យខ្ញុំមក​រៀ​នជំនាញ Software Engineering​​ នេះ​​ដោយ​សារតែ ខ្ញុំស្រ​ឡាញ់​ផ្នែកប​ច្ចេក​វិទ្យា និង​ចង់សិ​ក្សាពីកា​របង្កើ​តពីក​ម្មវិធី ឬប្រព័ន្ធ​ដែលអា​ចដោះ​ស្រាយប​ញ្ហាក្នុង​ជីវិត​ប្រចាំថ្ងៃ។ ម្យ៉ាង​ទៀត ជំនាញ​នេះក៏មា​នត​ម្រូវ​ការខ្ព​ស់នៅ​ក្នុងទី​ផ្សារ​ការងា​រខ្ពស់ទាំងក្នុង និងក្រៅ​ប្រទេស ព្រោះវិស័យបច្ចេកវិទ្យាដើរទៅមុខយ៉ាងលឿននា​ពេល​បច្ចុប្ប​ន្ន​នេះ​»។យុវ​តីរូប​នេះ បាននិ​យាយ​ដោយ​ភាព​សប្បាយ​រីករាយថា ខ្លួនទ​ទួលបា​នអាហារូបករ​ណ៍ ១០០% រយៈ​ពេល ៤ឆ្នាំនៅ​វិទ្យា​ស្ថាន NPIC បានជួយ​សម្រា​ល​បន្ទុកគ្រួ​សារច្រើ​នណាស់​។ បន្ថែ​មពី​​លើនេះ យុវ​តីនេះ ក៏បា​នរំឭក​ផងដែ​រថា នៅ​ពេលសម្រេច​ចិត្តជ្រើសរើ​សជំនាញ Software Engineering គ្រួ​សារ​មានការព្រួយ​បារម្ភខ្លះ​ ដោយ​សា​រជំនាញ​នេះលំបាក​ចំពោះ​ខ្លួនជា​និស្សិត​ស្រី និងចាកឆ្ងា​យពី​គ្រួសា​រតែម្នាក់​ឯង។យុវតី កែវកាវ​​ បាន​និយាយថា៖«ពេលប្រាប់ឱពុកម្ដាយខ្ញុំថា ខ្ញុំ​រៀនជំនាញ​នេះ ពួ​កគាត់មា​នការព្រួយ​បារម្ភ​ខ្លះ ដោយ​សារតែជំនាញនេះ​លំ​បាក និងមិន​សូវ​មា​នមនុស្ស​ស្រីចុះឈ្មោះ​រៀនច្រើនទេ តែពួក​គាត់​នូវតែ​លើក​ទឹកចិត្ដ និង​គាំ​ទ្រខ្ញុំ ​ឱ្យ​តែកូ​នស្រឡាញ់»។បន្ទាប់ពីបាន​សិក្សា​បានមួយ​ឆ្នាំ យុវតីរូ​បនេះ​បាន​ចែក​រំលែក​ពីបទ​ពិសោធន៍​ដែល​បាន​សិក្សាផ្ទាល់នៅវិទ្យាស្ថានថា កម្មវិធីសិក្ស​នៅវិទ្យា​ស្ថាន NPIC មាន​ទាំង​ភាសា​ខ្មែរ និង​ភាសាអង់គ្លេស ព្រម​ទាំងបណ្ដុះបណ្ដា​លទាំងទ្រឹ​ស្ដី និងការ​អនុវត្ដ​ជាក់ស្ដែង ដែលអាចឱ្យ​សិស្សា​នុសិស្ស​អភិវ​ឌ្ឃខ្លួ​នបា​ន​កាន់​ប្រ​សើរ​។ទោះជាយ៉ាងណា អតីតសិស្សនិទ្ទេស A រូបនេះ ក៏បានលើកទឹកចិត្ត​ដល់​យុវជន​ឱ្យហ៊ាន​ជ្រើស​រើស​ជំនាញ​ដែល​ខ្លួន​ស្រ​ឡា​ញ់ និង​ស្រប​តាម​តម្រូវ​ការ​ទីផ្សា​រការងារខ្ពស់ ជាពិសេ​សអាចងាក​មកចាប់អា​រម្មណ៍ វិស័យ​បច្ចេក​វិទ្យា ដែល​កំពុង​ដើរតួនា​ទីយ៉ាងសំខា​ន់ក្នុងកា​រអភិវឌ្ឍន៍ប្រ​ទេសជាតិ៕

(អន្តរជាតិ)៖ ប្រទេសឥណ្ឌូនេស៊ីបានចាប់ផ្តើមអនុវត្តបទប្បញ្ញត្តិថ្មីមួយដែលមានគោលបំណងប្រយុទ្ធប្រឆាំងនឹងការក្លែងបន្លំតាមអ៊ីនធឺណិត។ ច្បាប់នេះ តម្រូវឱ្យប្រជាជនចុះឈ្មោះទិន្នន័យជីវមាត្រនៅពេលពួកគេធ្វើឱ្យលេខទូរស័ព្ទចល័តថ្មីសកម្ម។ពីមុន អតិថិជនត្រូវផ្តល់លេខចុះឈ្មោះអ្នកស្នាក់នៅរបស់ពួកគេនៅពេលធ្វើឱ្យស៊ីមកាតថ្មីសកម្ម។ ក្រោមប្រព័ន្ធថ្មី ការសម្គាល់មុខក៏ត្រូវបានទាមទារផងដែរ។ មនុស្សនឹងមិនអាចធ្វើឱ្យលេខថ្មីសកម្មបានទេ លុះត្រាតែមុខរបស់ពួកគេត្រូវគ្នានឹងទិន្នន័យនៅក្នុងមូលដ្ឋានទិន្នន័យអ្នកស្នាក់នៅរបស់រដ្ឋាភិបាល។ក្រុមហ៊ុនទូរគមនាគមន៍ដែលមិនអនុវត្តតាមតម្រូវការនឹងត្រូវទទួលរងនូវទណ្ឌកម្មរដ្ឋបាល។ ទាំងនេះអាចរួមបញ្ចូលការផ្អាកប្រតិបត្តិការអាជីវកម្មជាបណ្តោះអាសន្ន។មជ្ឈមណ្ឌលប្រឆាំងការបោកប្រាស់ឥណ្ឌូនេស៊ីនិយាយថា ខ្លួនបានទទួលរបាយការណ៍ក្លែងបន្លំជិត 580000 ពីសាធារណជនក្នុងរយៈពេលមួយឆ្នាំកន្លះកន្លងមកនេះ។មន្ត្រីនិយាយថា ករណីជាច្រើនពាក់ព័ន្ធនឹងស៊ីមកាតដែលបានចុះឈ្មោះក្រោមអត្តសញ្ញាណមិនពិត ឬជាមួយទិន្នន័យផ្ទាល់ខ្លួនរបស់អ្នកដទៃ៕

(ភ្នំពេញ)៖ ស្ថាប័នអ្នកនាំពាក្យនៃសមាគមសិល្បករខ្មែរ សូមប្រកាសជម្រាបជូនបងប្អូនសិល្បករ-សិល្បការិនី និងសាធារណជនទាំងអស់ឱ្យបានជ្រាបថា គណនេយ្យហ្វេសប៊ុកឈ្មោះ «Chumteav Neak Chamnan» មិនមែនជាគណនេយ្យហ្វេសប៊ុក ឬផេកផ្ទាល់ខ្លួនរបស់លោកជំទាវអ្នកឧកញ៉ា ម៉ៅ ចំណាន គិតម៉េង ឡើយ។សមាគមសិល្បករខ្មែរ សូមបញ្ជាក់ថា ថ្មីៗនេះ សមាគមបានទទួលព័ត៌មានថា មានជនអនាមិកបានបង្កើតគណនេយ្យហ្វេកឈ្មោះ Chumteav Neak Chamnan ហើយថែមទាំងបានប្រើគណនេយ្យនេះ ក្នុងគោលបំណងបន្លំ បោកបញ្ឆោតប្រាក់ពីអ្នកដទៃ និងសកម្មភាពអវិជ្ជមានផ្សេងៗទៀតផង។ ជាថ្មីម្តងទៀត ក្នុងនាមស្ថាប័នអ្នកនាំពាក្យសមាគមសិល្បករខ្មែរ យើងខ្ញុំសូមបដិសេដដាច់អហង្ការថា គណនេយ្យហ្វេក Chumteav Neak Chamnan មិនមែនជាគណនេយ្យហ្វេសប៊ុក ឬផេកផ្ទាល់ខ្លួនរបស់លោកជំទាវអ្នកឧកញ៉ា ម៉ៅ ចំណាន គិតម៉េង ឡើយ។ សូមបងប្អូនជ្រាបជាព័ត៌មាន និងមានការប្រុងប្រយ័ត្ន។សមាគមសិល្បករខ្មែរ សូមស្នើឱ្យជនអនាមិកដែលបង្កើតគណនេយ្យហ្វេក Chumteav Neak Chamnan បញ្ឈប់ជាបន្ទាន់នូវរាល់ទង្វើបន្លំបោកបញ្ឆោតទាំងនោះ។ សមាគមសិល្បករខ្មែរ នឹងអនុវត្តន៍វិធានការផ្លូវច្បាប់ជាបន្ទាន់ ប្រសិនបើជនឆ្លៀតឱកាសទាំងនោះនៅបន្តសកម្មភាព និងទង្វើបែបនេះបន្តទៀត៕

(កំពង់ស្ពឺ)៖ នាព្រឹកថ្ងៃទី២៥ ខែកក្កដា ឆ្នាំ២០២៦ នេះ ឯកឧត្តមកិត្តិសេដ្ឋាបណ្ឌិត ឆាយ ថន សមាជិកគណៈអចិន្រ្តៃយ៍ គណៈកម្មាធិការកណ្តាល និងជាប្រធានកិត្តិយសក្រុមការងារគណបក្សចុះមូលដ្ឋានខេត្តកំពង់ស្ពឺ និង ឯកឧត្តម ហ៊ុន ម៉ានី សមាជិកគណៈអចិន្ត្រៃយ៍គណៈកម្មាធិការកណ្តាល និងជាប្រធានក្រុមការងារគណបក្សចុះជួយខេត្តកំពង់ស្ពឺ បានអញ្ជើញជាសហធិបតីដឹកនាំកិច្ចប្រជុំបូកសរុបលទ្ធផលការងារគណបក្សខែកក្កដា និងលើកទិសដៅភារកិច្ចខែបន្ទាប់។ កិច្ចប្រជុំនេះ មានការចូលរួមពី ឯកឧត្តម លោកជំទាវ អនុប្រធាន សមាជិក សមាជិកា ក្រុមការងារចុះជួយខេត្ត-ក្រុង-ស្រុក-ឃុំ-សង្កាត់ និងថ្នាក់ដឹកនាំគណបក្សចុះមូលដ្ឋានគ្រប់ជាន់ថ្នាក់ សរុបប្រមាណ ៤៥០នាក់។ជាកិច្ចចាប់ផ្ដើម ឯកឧត្តមបណ្ឌិត ជាម ច័ន្ទសោភ័ណ ប្រធានគណៈកម្មាធិការគណបក្សខេត្តកំពង់ស្ពឺ បានឡើងថ្លែងរបាយការណ៍សង្ខេប ស្ដីពីលទ្ធផលការងារខែកក្កដា លើកទិសដៅភារកិច្ចខែសីហា ឆ្នាំ២០២៦ និងសភាពការណ៍ទូទៅរបស់ខេត្ត ព្រមទាំងបានពិនិត្យ និងវាយតម្លៃលើវឌ្ឍនភាពនៃការអនុវត្តកម្មវិធីនយោបាយ លិខិតបទដ្ឋាន និងសេចក្តីណែនាំនានារបស់ថ្នាក់កណ្តាលនាពេលកន្លងមក។បន្ទាប់ពីបានស្តាប់របាយការណ៍ និងមតិចូលរួមពិភាក្សាពីអង្គប្រជុំ ឯកឧត្តម ហ៊ុន ម៉ានី បានវាយតម្លៃខ្ពស់ និងកោតសរសើរចំពោះគណៈអភិបាលខេត្ត ក្រុង-ស្រុក មន្ទីរ-អង្គភាព និងក្រុមការងារគណបក្សគ្រប់ថ្នាក់ ដែលបានខិតខំបំពេញភារកិច្ចយ៉ាងសកម្មប្រកបដោយស្មារតីទទួលខុសត្រូវខ្ពស់ ដោយបានចុះមូលដ្ឋានចិញ្ចឹមចលនាជាប់ជាប្រចាំជាមួយប្រជាពលរដ្ឋ ព្រមទាំងជំរុញការចែកប័ណ្ណសម្គាល់សមាជិកគណបក្សនៅតាមមូលដ្ឋាន។ ទន្ទឹមនឹងនេះ ឯកឧត្តមបានគូសរំលឹកពីមេរៀន និងបទពិសោធន៍ប្រវត្តិសាស្ត្រនៃការឈឺចាប់ដែលប្រជាជាតិបានឆ្លងកាត់ ដើម្បីដាស់តឿន និងបំផុសស្មារតីរួម ព្រមទាំងបានផ្តល់អនុសាសន៍ណែនាំសំខាន់ៗមួយចំនួនដូចជា៖ - ការទប់ស្កាត់គ្រោះធម្មជាតិ៖ អំពាវនាវដល់ក្រុមការងារ អាជ្ញាធរដែនដី និងភាគីពាក់ព័ន្ធទាំងអស់ ត្រូវត្រៀមលក្ខណៈសម្បត្តិទប់ស្កាត់ និងកាត់បន្ថយផលប៉ះពាល់ពីការកើនឡើងកម្ដៅ និងគ្រោះរាំងស្ងួត ដែលបង្កឡើងដោយបាតុភូតធម្មជាតិ El Niño នាពេលខាងមុខ។- ការងារឆ្ពោះទៅកាន់ការបោះឆ្នោត៖ បន្តរៀបចំ និងផ្សព្វផ្សាយផែនការសកម្មភាព ព្រមទាំងប្រតិទិនការងារឱ្យបានច្បាស់លាស់ ដើម្បីដើរស្របតាមដំណើរការចុះឈ្មោះបោះឆ្នោត។- ការបង្កើនសកម្មភាពចុះមូលដ្ឋាន៖ ជំរុញសកម្មភាពចុះជួយ និងនៅជិតស្និទ្ធជាមួយប្រជាជននៅតាមមូលដ្ឋានឱ្យកាន់តែសកម្ម និងស៊ីជម្រៅបន្ថែម។ឯកឧត្តម បានបន្ថែមថា ត្រូវបន្តយកចិត្តទុកដាក់តាមដានវាយតម្លៃ និងឆ្លើយតបឱ្យបានម៉ត់ចត់ចំពោះរាល់បញ្ហា និងសកម្មភាពមិនប្រក្រតីរបស់អង្គការ សមាគម ឬគណបក្សផ្សេងៗដែលកំពុងធ្វើសកម្មភាពនៅក្នុងមូលដ្ឋាន។

(ទីក្រុងប៉ារីស)៖ ក្រុមចោរប្លន់មួយក្រុមបានវាយបំបែកកញ្ចក់នៅចំពោះមុខឆ្មាំសន្តិសុខនៅសារមន្ទីរបារាំងមួយ ដោយលួចយកខ្សែដៃមាសដែលមានអាយុកាលតាំងពីឆ្នាំ ៥០០ មុនគ.ស។ លោក Jeremie Brigand អភិបាលក្រុង បាននិយាយថា ហេតុការណ៍នេះបានកើតឡើងនៅព្រឹកថ្ងៃទី ២៤ ខែកក្កដា នៅពេលដែលជនសង្ស័យ ដែលក្លែងខ្លួនជាអ្នកទេសចរ បានចូលទៅក្នុងសារមន្ទីរ Chatillonnais ក្នុងទីក្រុង Bourgogne។ ក្រុមចោរប្លន់ទាំងនោះ ដោយមិនបិទបាំងមុខ បានវាយកម្ទេចប្រអប់តាំងបង្ហាញមួយ ហើយលួចខ្សែកនៅចំពោះមុខអ្នកទេសចរ និងបុគ្គលិកសារមន្ទីរជាច្រើននាក់ បន្ទាប់មកបានចាកចេញយ៉ាងលឿនតាមច្រកចូលសំខាន់នៃអគារ។ នេះបើយោងតាមកាសែត AFP។ លោកអភិបាលក្រុង Brigand បានលើកឡើងថា «ជនសង្ស័យទាំងនេះបានធ្វើសកម្មភាពតាមរបៀបដែល មានការរៀបចំខ្ពស់ រហ័សរហួន និងមានការតាំងចិត្តខ្ពស់។ ពួកគេមិនបានបង្ហាញការស្ទាក់ស្ទើរ ឬខ្មាស់អៀននោះទេ» ដោយបន្ថែមថា ការប្លន់ទាំងមូលចំណាយពេលត្រឹមតែប៉ុន្មាននាទីប៉ុណ្ណោះ។ វត្ថុបុរាណដែលត្រូវបានគេលួចនោះ គឺជាខ្សែកមួយដែលមានទម្ងន់ប្រហែល ៥០០ ក្រាម ដែលផលិតពីដុំមាសតែមួយដុំ។ វាគឺជាកំណប់ទ្រព្យដ៏សំខាន់បំផុត មួយនៅក្នុងការប្រមូលផ្ដុំ Vix Treasure ដែលត្រូវបានរកឃើញនៅឆ្នាំ ១៩៥៣ នៅក្នុងផ្នូររបស់ព្រះនាងមួយអង្គ ដែលត្រូវបានបញ្ចុះនៅតំបន់ Burgundy ដែលមានអាយុកាលប្រហែល ៥០០ មុនគ.ស។ខ្សែដៃនេះមិនមែនគ្រាន់តែជាគ្រឿងអលង្ការប៉ុណ្ណោះទេ ប៉ុន្តែវាក៏ជានិមិត្តរូបនៃអំណាចសម្រាប់ជនជាតិ Celts និង Gauls បុរាណផងដែរ។ នេះជាលើកទីបីហើយដែលសារមន្ទីរ Chatillonnais ត្រូវបានចោរលួចចូលលួចក្នុងរយៈពេល ប៉ុន្មានខែថ្មីៗនេះ។ ការប៉ុនប៉ងលួចចូលលួចចូលពីរលើកមុន ដែលបានកើតឡើងនៅក្នុងខែវិច្ឆិកា ឆ្នាំ២០២៥ និងនៅយប់ថ្ងៃទី១៧-១៨ ខែកក្កដា មិនបានជោគជ័យទេ បន្ទាប់ពីប្រព័ន្ធរោទិ៍ និងវិធានការសន្តិសុខត្រូវបានធ្វើឱ្យសកម្មទាន់ពេលវេលា។អាជ្ញាធរមូលដ្ឋានបានវិនិយោគប្រមាណ ១៥០,០០០ អឺរ៉ូ (ជាង ១៧០,០០០ ដុល្លារ) ក្នុងរយៈពេលពីរឆ្នាំកន្លងមកនេះ ដើម្បីបង្កើនសន្តិសុខសារមន្ទីរ រួមទាំងការដំឡើងកាមេរ៉ា ឧបករណ៍ចាប់សញ្ញាចលនា និងការពង្រឹងច្រកចូល។ការប្លន់នេះបានកើតឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីសារមន្ទីរ Louvre ក្នុងទីក្រុងប៉ារីសបានបើកវិចិត្រសាល Apollo ឡើងវិញ ដែលត្រូវបានវាយកម្ទេចនៅក្នុងខែតុលា ឆ្នាំ២០២៥ ដោយប្រើជណ្តើរយន្ត ដែលបណ្តាលឱ្យបាត់បង់វត្ថុបុរាណចំនួនប្រាំបីដែលមានតម្លៃប្រហែល ១០០លានដុល្លារ។