(កំពង់ធំ)៖ យុទ្ធនាការបរិច្ចាគឈាមជាសាធារណៈដ៏សំខាន់មួយក្រោមប្រធានបទ “ផ្តល់ឈាម ផ្តល់ជីវិត” ត្រូវបានរៀបចំឡើងនៅសហគមន៍ចំការកៅស៊ូ ទេពី អាក្រូ វិនិយោគ ស្ថិតនៅស្រុកសណ្តាន់ ខេត្តកំពង់ធំ នៅថ្ងៃទី១៦ ខែឧសភា ឆ្នាំ២០២៥ ។ព្រឹត្តិការណ៍នេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា ក្រោមការផ្តួចផ្តើមពី អ្នកឧកញ៉ា លី សុភ័ក្ត ប្រធានក្រុមប្រឹក្សាភិបាលនៃក្រុមហ៊ុន ទេពី អាក្រូ វិនិយោគ។ដោយសហការជាមួយមជ្ឈមណ្ឌលជាតិផ្តល់ឈាមកម្ពុជា ក្នុងគោលបំណងលើកកម្ពស់ការយល់ដឹងអំពីសារៈសំខាន់នៃការបរិច្ចាគឈាម និងជំរុញសុខភាពសហគមន៍ យុទ្ធនាការនេះបានទាក់ទាញអ្នកចូលរួមជាង ៥០០ នាក់ រួមមានបុគ្គលិកក្រុមហ៊ុន សិស្សានុសិស្ស ប្រជាពលរដ្ឋ និងមន្ត្រីរាជការ ហើយមានអ្នកបរិច្ចាគឈាមជិត ៤០០ នាក់ ដែលក្នុងនោះជាង ១០០ នាក់ជាចំនួនអ្នកស្ម័គ្រចិត្តបរិច្ចាគមកពីក្រុមហ៊ុនកសិកម្ម អិកស៍ អិល អិកស៍ ស្រុកត្រពាំងប្រាសាទ ខេត្តឧត្តរមានជ័យ គ្រោងនឹងរៀបចំទទួលការបរិច្ចាគនាពេលខាងមុខ។ឯកឧត្តម ហ៊ុន ម៉ានី បានមានប្រសាសន៍ថា៖ “ការផ្តល់ឈាមមិនត្រឹមតែជួយសង្គ្រោះជីវិតប៉ុណ្ណោះទេ ប៉ុន្តែក៏ជាការចែករំលែកស្នាមញញឹមផងដែរ” ដោយលើកទឹកចិត្តឱ្យប្រជាពលរដ្ឋចូលរួមក្នុងសកម្មភាពដ៏មានអត្ថន័យនេះឱ្យបានច្រើន។ ឯកឧត្តមបានកោតសរសើរក្រុមហ៊ុន ទេពី អាក្រូ វិនិយោគ និងមជ្ឈ មណ្ឌលជាតិផ្តល់ឈាម ចំពោះគំនិតផ្តួចផ្តើមគំរូនេះ ដោយសង្ឃឹមថានឹងជំរុញសកម្មភាពមនុស្សធម៌បន្ថែមទៀតពីក្រសួង ស្ថាប័ន និងសហគមន៍។ ឯកឧត្តមបានបន្ថែមថា ព្រឹត្តិការណ៍នេះជានិមិត្តរូបនៃសាមគ្គីភាព និងកិច្ចសហការរវាងវិស័យសាធារណៈ និងឯកជន ដែលជំរុញស្មារតីជួយគ្នាទៅវិញទៅមក។ក្នុងអំឡុងព្រឹត្តិការណ៍នេះ ឯកឧត្តម ហ៊ុន ម៉ានី ក៏បានសម្ពោធសមិទ្ធិផលអគារបឋមសិក្សារបស់​​ក្រុមហ៊ុន​ ទេពី​ អាក្រូ​​ វិនិយោគ ចំនួនពីរខ្នង​ ដែលមួយខ្នងមានឈ្មោះ សាលាបឋមសិក្សា លី​ ហួរ អូរមាន ស្ថិតនៅស្រុកសណ្តាន់ ខេត្តកំពង់ធំ និងមួយខ្នងទៀតដែលមានឈ្មោះ សាលាបឋមសិក្សា  ស៊ីង​ ស៊ីង ត្រពាំងប្រាសាទ ដែលស្ថិតនៅសាខាមួយទៀត​ក្នុងស្រុកត្រពាំងប្រាសាទ ខេត្តឧត្តរមានជ័យ។ សាលាបឋមសិក្សាទាំងពីរខ្នង មានចំនួន ​១១ បន្ទប់​ និងមានសិស្សដែលជាកូនចៅបងប្អូនបុគ្គលិក-កម្មករចំនួន ១២៣នាក់ កំពុងទទួលបានការសិក្សារៀនសូត្រពីលោកគ្រូ-អ្នកគ្រូ ចាត់តាំងពីស្ថាប័នអប់រំរបស់រដ្ឋ និងបានអញ្ជើញចូលរួមទទួលទានអាហារជាមួយសិស្សានុសិស្ស និងសមាជិកសហគមន៍ផងដែរ។ អ្នកឧកញ៉ា លី សុភ័ក្ត បានសម្តែងអំណរគុណយ៉ាងជ្រាលជ្រៅជូន ចំពោះវត្តមាននិងការដឹកនាំរបស់ ឯកឧត្តមឧបនាយរដ្ឋមន្រ្តី ដែលបានពង្រឹងគោលបំណងនៃយុទ្ធនាការក្នុងការធានាការផ្គត់ផ្គង់ឈាមគ្រប់គ្រាន់សម្រាប់អ្នកជំងឺនៅតាមមន្ទីរពេទ្យ ដោយមិនរើសអើងជាតិសាសន៍ សាសនា ឬនិន្នាការនយោបាយ។គួបញ្ជាក់ផងដែរថា៖ ក្រុមហ៊ុន ទេពី អាក្រូ វិនិយោគ ជាក្រុមហ៊ុនកសិ-ឧស្សាហកម្ម ប្រតិបត្តិការលើផ្ទៃដី ៧,៨៩៩ ហិកតា នៅស្រុកសណ្តាន់ និងត្រពាំងប្រាសាទ ដោយដាំដុះកៅស៊ូ (២,៦៣៦ ហិកតា) ស្វាយចន្ទី និងស្វាយកែវរមៀត (២,៨៧៧ ហិកតា) និងថែទាំកូនកៅស៊ូ (២,៣៨៦ ហិកតា)។ ក្រុមហ៊ុនផលិតកៅស៊ូ ៧,៩០០ តោន និងស្វាយចន្ទី ១,០០០ តោនក្នុងមួយឆ្នាំ ដោយផ្តល់ការងារដល់សមាជិកសហគមន៍ចំនួន ៦១៦ នាក់។ ក្រុមហ៊ុនក៏បានរួមចំណែកដល់វិស័យអប់រំដោយសាងសង់សាលារៀនពីរខ្នង មាន ១១ បន្ទប់សម្រាប់សិស្ស ១២៣ នាក់ សាងសង់ប៉ុស្តិ៍សុខភាពពីរខ្នង មាន ៤ បន្ទប់ និងផ្តល់ផ្ទះស្នាក់នៅ ១៣៦ ខ្នង មាន ២៧៥ បន្ទប់សម្រាប់កម្មករ នៅស្រុកសណ្តាន់ ខេត្តកំពង់ធំ និងស្រុកត្រពាំងប្រាសាទ ខេត្តឧត្តរមានជ័យ។នៅក្នុងសុន្ទរកថា អ្នកឧកញ៉ា លី សុភ័ក្ត បានបញ្ជាក់ឡើងវិញនូវការប្តេជ្ញាចិត្តរបស់ក្រុមហ៊ុនក្នុងការរៀបចំយុទ្ធនាការបរិច្ចាគឈាមប្រចាំឆ្នាំ និងគាំទ្រប្រព័ន្ធថែទាំសុខភាពជាតិ។ ជាមួយគ្នានេះដែរ លោកក៏បានគូសបញ្ជាក់អំពីចក្ខុវិស័យសម្រាប់ការរីកចម្រើនកសិកម្មប្រកបដោយនិរន្តរភាព ការលើកកម្ពស់សុខុមាលភាពបុគ្គលិក ការពង្រឹងការអប់រំ និងការអភិរក្សបរិស្ថានសម្រាប់ជំនាន់ក្រោយ។ ក្រុមហ៊ុនមានផែនការពង្រីកផ្ទៃដីដាំដុះ បង្កើនទិន្នផល និងវិនិយោគលើហេដ្ឋារចនាសម្ព័ន្ធដើម្បីកសាងសហគមន៍ប្រកបដោយភាពរស់រវើក និងនិរន្តរភាព។អ្នកឧកញ៉ា លី សុភ័ក្ត បានកោតសរសើរ និងថ្លែងអំណរគុណ ដល់គ្រប់ភាគីពាក់ព័ន្ធទាំងអស់នៅក្នុងព្រឹត្តិការណ៍នេះ មានដូចជា អាជ្ញាធរមូលដ្ឋានគ្រប់លំដាប់ សហភាពសហព័ន្ធយុវជនកម្ពុជា ដៃគូធុរកិច្ច និងអ្នកស្ម័គ្រចិត្ត។ អ្នកឧកញ៉ា បានវាយតម្លៃថា គំនិតផ្តួចផ្តើមនេះបានកំណត់ជាគំរូសម្រាប់កិច្ចខិតខំប្រឹងប្រែងផ្នែកមនុស្សធម៌ ដែលជាកត្តាលិករនៃការបន្តុះឆន្ទះ សាមគ្គីភាព និងឯកភាពជាតិ៕

(ភ្នំពេញ)៖ ក្រសួងកាងារ និងបណ្ដុះបណ្ដាលវិជ្ជាជីវៈបានប្រកាសថា គិតត្រឹមថ្ងៃទី ១៦ ខែឧសភាឆ្នាំ២០២៥នេះ ប្រទេសកម្ពុជាកំពុងមានតម្រូវការកម្លាំងពលកម្មចំនួន ៦៤ ០៧៤កន្លែងទៅលើវិស័យឧស្សាហកម្មចំនួន ៥០ ៥៧១កន្លែង, សេវាកម្មចំនួន ៣ ៦៥២កន្លែង និងវិស័យកសិកម្មចំនួន ៩ ៨៥១កន្លែង។ឯកឧត្តម ស៊ុន មេសា អ្នកនាំពាក្យក្រសួងកាងារ និងបណ្ដុះបណ្ដាលវិជ្ជាជីវៈបានថ្លែងថា៖«កម្ពុជាបច្ចុប្បន្ននេះ គឺយើងកំពុងមានតម្រូវការកម្លាំងពលកម្មចំនួន ៦៤ ០៧៤កន្លែងទៅលើវិស័យឧស្សាហកម្មចំនួន ៥០ ៥៧១កន្លែង, សេវាកម្មចំនួន ៣ ៦៥២កន្លែង និងវិស័យកសិកម្មចំនួន ៩ ៨៥១កន្លែង»។ឯកឧត្តមបានបន្ដថា៖«តម្រូវការដែលខ្ពស់ជាងគេនោះ គឺអ្នកបញ្ជាម៉ាស៊ីនដេរ កម្មករចម្ការដំណាំ កម្មករក្នុងផលិតកម្ម កម្មករវេចខ្ចប់ដោយដៃ មន្រ្តីឥណទាន និងប្រាក់កម្ចី យន្តការី និងអ្នកតម្លើងអគ្គិសនី អ្នកបញ្ជាម៉ាស៊ីនធ្វើស្បែកជើង អ្នកបច្ចេកទេសត្រួតពិនិត្យដំណើរការផលិត និងជំនាញផ្សេងៗជាច្រើនប្រភេទទៀត»។អ្នកនាំពាក្យរូបនេះបានអំពាវនាវដល់សាធារណៈជន យុវជន និងប្រជាពលរដ្ឋខ្មែរដែលមិនទាន់មានការងារ ឬកំពុងស្វែងរកការងារធ្វើ សូមទាក់ទងទៅទីភ្នាក់ងារជាតិមុខរបរ និងការងារ (NEA)នៃក្រសួងការងារ និងបណ្ដុះបណ្ដាលវិជ្ជាជីវៈ ដើម្បីទទួលបានការប្រឹក្សាយោបល់ និងទទួលបានឱកាសការងារដែលខ្លួនពេញចិត្ត។ឯកឧត្តម ស៊ុន មេសា បានបន្ថែមថា ក្រសួងការងារ គឺជាសេនាធិការរបស់រាជរដ្ឋាភិបាលកម្ពុជាបានពង្រីកការផ្សព្វផ្សាយព័ត៌មានអំពីឱកាសការងារកាន់តែផុសផុលសម្រាប់បងប្អូនស្វែងរកការងារតាមរយៈបណ្តាញសង្គមជាច្រើនដូចជា ហ្វេសប៊ុក, TikTok និងមជ្ឈមណ្ឌលការងារចល័ត ដើម្បីឆ្លើយតបទៅនឹងតម្រូវការទីផ្សារការងារ ក៏ដូចជា ការផ្គត់ផ្គង់ និងផ្គូរផ្គងកម្លាំងពលកម្មរវាងកម្មករនិយោជិត និងនិយោជក។គួរបញ្ជាក់ថា ទីភ្នាក់ងារ NEA បានបង្កើនការចុះឈ្មោះដោយផ្ទាល់តាមមូលដ្ឋាន តាមប្រព័ន្ធឌីជីថល ដែលមានបញ្ជរសេវាការងារសាធារណៈចល័តរបស់ក្រសួងការងារ និងតាមរយៈកម្មវិធីទូរស័ព្ទដៃ។ លើសពីនេះមានការបង្កើនការរៀបចំពិព័រណ៌ការងារដូចជា វេទិកាការងារ កិច្ចសម្ភាសន៍ការងារ ពិព័រណ៌ថ្នាក់ខេត្ត ថ្នាក់ជាតិ ដើម្បីបន្តផ្សព្វផ្សាយឱកាសការងារដោយផ្ទាល់នៅកន្លែងជារៀងរាល់ថ្ងៃជូនពលរដ្ឋខ្មែរគ្រប់រូប៕

(ភ្នំពេញ)៖ ឯកឧត្តម ហ៊ុន ម៉ានី និងឯកឧត្តមបណ្ឌិត អ៉ិត សំហេង អញ្ជើញជាអធិបតីប្រកាសបើកវគ្គបណ្ដុះបណ្ដាល «គ្រូបង្គោលលើការងារមហាជនរាជធានី-ខេត្ត» ជុំទី ៣ នៅវិមាន៧មករា នាព្រឹកថ្ងៃទី ១៧ ខែមេសា ឆ្នាំ២០២៥។ ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍គណៈកម្មាធិការកណ្តាល និងជាអគ្គលេខាធិការគណៈចលនាមហាជន លើកឡើងថា ការរៀបចំវគ្គបណ្ដុះបណ្ដាលជនបង្គោលថ្ងៃនេះគឺជាជំហានមួយដើម្បីលើកកម្ពស់ គាំទ្រការងារមហាជននៅថ្នាក់ក្រោមជាតិ ឲ្យកាន់តែមានប្រសិទ្ធិភាព តាមរយៈការពង្រឹងបន្ថែមសមត្ថភាពមន្រ្តីគណបក្ស ដែលឆ្លើយតបទៅកាន់សំណូមពររបស់គណៈចលនាមហាជនរាជធានី-ខេត្ត ជាពិសេសគឺអនុវត្តតាមអនុសាសន៍សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា នៅក្នុងសន្និបាតគណៈមហាជនកាលពី ថ្ងៃទី១៧-១៨ ខែធ្នូ ឆ្នាំ២០២៤កន្លងទៅ៕

(កណ្ដាល)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅក្នុងឱកាសអញ្ជើញជាអធិបតី ចូលរួមពិធីរំលឹកខួបអនុស្សាវរីយ៍លើកទី៨០ ថ្ងៃកំណើតនគរបាលជាតិកម្ពុជា បានមានប្រសាសន៍ថា៖ “ប៉ុន្មានថ្ងៃនេះខ្ញុំឃើញមានការជជែកដេញដោលអំពីការលក់ព្រលានយន្តហោះអន្តរជាតិភ្នំពេញ (ពោធិ៍ចិនតុង) ទៅឱ្យក្រុមហ៊ុនឯកជន។” សម្ដេចធិបតី​ បានសង្កត់ធ្ងន់បន្ថែម “ខ្ញុំសូមបញ្ជាក់ជូនបងប្អូនប្រជាពលរដ្ឋដោយខ្លីថា៖ រាជរដ្ឋាភិបាលតាំងពីអាណត្តិមុនៗដែលដឹកនាំដោយសម្ដេចតេជោ ក៏ដូចជារាជរដ្ឋាភិបាលអាណត្តិថ្មីដែលដឹកនាំដោយរូបខ្ញុំ គឺមិនដែលមានគោលការណ៍លក់ព្រលានយន្តហោះអន្តរជាតិ (ពោធិ៍ចិនតុង) ទៅអោយក្រុមហ៊ុនឯកជនណានោះទេ។ គោលការណ៍ចំនួនបី ក្នុងការគ្រប់គ្រង ចាត់ចែងព្រលានយន្តហោះនេះទៅថ្ងៃអនាគតគឺ÷ ១. រក្សាតម្លៃប្រវត្តិសាស្ត្រនៃទីតាំងនេះ២. ផ្ដល់ផលប្រយោជន៍សាធារណៈជាអតិបរមាជូនប្រជាពលរដ្ឋជាពិសេសអ្នករាជធានីភ្នំពេញ និង៣. រៀបចំការគ្រប់គ្រង ថែរក្សា និងប្រើប្រាស់ដោយចីរភាព នូវទីតាំងនិងហេដ្ឋារចនាសម្ព័ន្ធដែលមានស្រាប់ ទៅតាមរូបមន្តឬទម្រង់ណាមួយ ដោយធានារក្សានូវកម្មសិទ្ធិស្របច្បាប់របស់រដ្ឋលើទីតាំងនេះ៕”

(បាងកក)៖ ប៉ូលិសថៃបានចាប់ខ្លួនព្រះសង្ឃមួយអង្គ ជុំវិញការចោទប្រកាន់ថា បានកិបកេងប្រាក់ជាង ៩លានដុល្លារអាមេរិក ពីវត្តដ៏ល្បី ដែលត្រូវបានផ្តល់មូលនិធិដោយការបរិច្ចាគពីពុទ្ធសាសនិក។​ក្រុមអ្នកស៊ើបអង្កេតមកពីការិយាល័យស៊ើបអង្កេតកណ្តាល (CIB) កំពុងចោទប្រកាន់ព្រះចៅអធិការ Phra Thammachiranuwat មកពីវត្ត Rai Khing ពីបទលួចលុយជាង 300 លានបាត (9.05 លានដុល្លារអាមេរិក) ពីគណនីធនាគាររបស់វត្តទៅក្នុងផ្ទាល់ខ្លួន។ប្រព័ន្ធផ្សព្វផ្សាយក្នុងស្រុកបាននិយាយថា ក្រុមអ្នកស៊ើបអង្កេតបានតាមដានមូលនិធិពីវត្តនៅ ជាយក្រុងបាងកកភាគខាងលិច ទៅកាន់បណ្តាញល្បែងអនឡាញខុសច្បាប់ ដែលកំពុង ដំណើរការល្បែង។វត្តនានាក្នុងប្រទេសថៃភាគច្រើនពឹងផ្អែកខ្លាំងលើប្រាក់ចំណូល ពីពិធីបុណ្យ  ដែលពុទ្ធសាសនិកបរិច្ចាគ ដោយសង្ឃឹមថាទទួលបានលាភសំណាង និងធ្វើបុណ្យសាងកុសល៕

(សង្គម)៖ កាលពីពេលថ្មីៗកន្លងទៅនេះតារាចម្រៀង ខេម បានបង្ហោះសារមួយឱ្យដឹងថារូបលោកកំពុងឆ្លងវីរុសកូវីដ-១៩ និង ផ្ដាំប្រាប់ឱ្យមហាជនមានប្រុងប្រយ័ត្នផងដែរ។យ៉ាងណាមិញ ក្រោយប្រកាសពីការឆ្លងវីរុសកូវីដ-១៩ មិនទាន់បានប៉ុន្មានថ្ងៃស្រួលបួលផងនោះ លោក ខេម ក៏បានរៀបរាប់អំពីស្ថានភាពសុខភាពដោយបានជួបនូវអាការៈមួយចំនួនក្រោយឆ្លងកូវីដ-១៩សុខភាព។ ដោយសំណេរក្នុងការបង្ហោះនោះមានខ្លឹមសារចែករំលែកយ៉ាងដូច្នេះថា «សួស្តីពុកម៉ែបងប្អូនជាទីស្រលាញ់គ្រប់គ្នា អរគុណសំរាប់ការព្រួយបារម្ភណ៍ចំពោះសុខភាពខ្ញុំបាទ ពេលនេះខ្ញុំគឺមិនធ្ងន់ដូចកាលខ្ញុំកើតលើកទី១នោះទេ គ្រាន់មានអាការៈខ្លះដូចជា : ក្តៅខ្លួន ហៀរសំបោរ ឈឺក មានក្អកបន្តិចបន្តួច និងឈឺតាមសាច់ដុំប៉ុណ្ណឹង។ ខ្ញុំបានទៅពិនិត្យសុខភាពកាលពីព្រឹកមិញនៅមន្ទើរពេទ្យ -Khema- ពេទ្យពិនិត្យឃើញថាខ្ញុំមានឆ្លងមេរោគកូវីដយ៉ាងពិតប្រាកដមែនប៉ុន្តែខ្ញុំក៏មិនបានសួរបញ្ជាក់ថាខ្ញុំកើតប្រភេទអីដែរ»។លោកបានបន្តដោយបញ្ជាក់ថា «ខ្ញុំបង្ហោះមិនមានគំនិតបំភ័យបងប្អូនរឺកុហកណាមួយទេ បងប្អូនអាចធ្វើការធម្មតា ប៉ុន្តែត្រូវការពារខ្លួនកុំអោយឆ្លងដូចខ្ញុំ ហើយសូមបងប្អូនកុំយល់ច្រលំ កូវីដគឺកូវីដ ផ្តាស់សាយគឺផ្តាស់សាយ មនុស្សមិនតិចជាងរាប់លាននាក់ទេដែលរងគ្រោះដោយសារជំងឺមួយនេះ»។ទោះជាយ៉ាងណា នេះគឺជាការចែករំលែក ក៏ដូចជាសារមួយសម្រាប់សាធារណជនគ្រប់រូបឱ្យបន្តការប្រុងប្រយ័ត្ន និងមិនត្រូវភ្លេចនូវជំងឺមួយនេះឡើយ ព្រោះជំងឺមួយនេះបានផ្ដល់នូវពលប៉ះពាល់ស្ទើគ្រប់វិស័យ។ដូច្នេះហើយទើបបានជាកាលពីពេលថ្មីៗកន្លងទៅនេះ ក្រសួងសុខាភិបាលកម្ពុជា បានចេញសេចក្តីប្រកាសព័ត៌មានស្តីពីការបង្កើនការការពារខ្លួនពីការឆ្លងវីរុសកូវីដ-១៩ ជូនដល់សាធារណៈជន ដោយបានបញ្ជាក់យ៉ាងច្បាស់ៗហើយថាស្ថានភាពនៃការចម្លងវីរុសកូវីដ-១៩ នៅតែបន្តមាននៅឡើយ មិនទាន់បាត់អស់ទាំងស្រុងនោះទេ៕

(អន្តរជាតិ)៖ លោក Nguyen Quang Huy អនុប្រធាននាយកដ្ឋានគ្រប់គ្រងទីផ្សារ មន្ទីរឧស្សាហកម្ម និងពាណិជ្ជកម្មទីក្រុងហូជីមិញ បានជូនដំណឹងអំពីស្ថានភាពម្ហូបអាហារកខ្វក់ និងគុណភាពអន់ចរាចរក្នុងទីផ្សារទីក្រុងហូជីមិញ។បើតាមលោក ហ៊ុយ ស្ថានភាពមិនមានសុវត្ថិភាព អាហារគ្មានគុណភាព និងអាហារមិនស្គាល់ប្រភពនៅមានភាពស្មុគស្មាញ។ ថ្មីៗនេះ នាយកដ្ឋានគ្រប់គ្រងទីផ្សារទីក្រុងហូជីមិញ បានរកឃើញ និងដោះស្រាយការបំពានជាច្រើន ក្នុងការជួញដូរទំនិញដែលមិនស្គាល់ប្រភពដើម។តាមនោះការផាកពិន័យចំនួន ២៥លានដុង ត្រូវបានដាក់លើករណីជួញដូរស្ករគ្រាប់ ២០០កញ្ចប់ ដែលមិនស្គាល់ប្រភពដើម។ នេះបើយោងតាមសារព័ត៌មាន Vietnam News & Tuoi Tre Newspaper។ រឹបអូសជាបណ្តោះអាសន្ននូវសរីរាង្គសត្វក្លាសេចំនួន ៥០តោន ដែលមិនស្គាល់ប្រភពដើមនៅទីក្រុង Thu Duc ជាមួយនឹងទឹកប្រាក់ចំនួន 4.5 ពាន់លានដុង ពិន័យជាប្រាក់ចំនួន 315 លានដុង និងបង្ខំឱ្យបំផ្លាញចោលទាំងអស់។ ស្ករដែលរត់ពន្ធជិត៧តោនត្រូវបានរកឃើញនៅស្រុក Cu Chi ។ ស្រាបៀររត់ពន្ធចំនួន ១៨.២០០ ដបត្រូវបានរកឃើញនៅក្នុងខណ្ឌទី ១២។លើសពីនេះ តាមរយៈការតាមដានបណ្តាញសង្គម អង្គភាពនេះបានរកឃើញសាច់ក្រកជាង១តោនដែលមិនស្គាល់ប្រភពដើមកំពុងជួញដូរខុសច្បាប់ ។ គណៈកម្មាធិការប្រជាជនទីក្រុងបានចេញសេចក្តី សម្រេចដាក់ពិន័យជាប្រាក់ចំនួន 100 លានដុង និងបង្ខំឱ្យបំផ្លាញរាល់ទំនិញល្មើសច្បាប់។ក្នុងអំឡុងពេលនៃការត្រួតពិនិត្យ និងការដោះស្រាយខ្ពស់បំផុត ក្រុមគ្រប់គ្រងទីផ្សារបានបើកដំណើរ ការត្រួតពិនិត្យក្នុងពេលដំណាលគ្នា ទាំងនៅក្នុងទីផ្សារប្រពៃណី និងពាណិជ្ជកម្មអេឡិចត្រូនិក។ជាធម្មតា នារសៀលថ្ងៃទី ១៤ ឧសភា នាយកដ្ឋានគ្រប់គ្រងផ្សារទីក្រុងហូជីមិញ បានចុះត្រួតពិនិត្យ និងរកឃើញទីតាំងអាជីវកម្មមួយនៅផ្សារ Binh Tay ដែលមានលក់សំបុកបក្សីកែច្នៃរាប់សិបប្រអប់ ទម្ងន់ ១០០ក្រាម/ប្រអប់ តម្លៃជិត ៦០លានដុង មិនស្គាល់ប្រភពដើម។ លើសពីនេះ ទីតាំងអាជីវកម្មមួយនៅ សង្កាត់លេខ៨ ត្រូវបានគេរកឃើញថាមានលក់ម្សៅអាហារប្រភេទផ្សេងៗជាង 100 កញ្ចប់ ដែលមិនស្គាល់ប្រភពដើម ណែនាំ និងលក់នៅលើគេហទំព័រ e-commerce ។ដើម្បីបង្កើនការទប់ស្កាត់ នាយកដ្ឋានឧស្សាហកម្ម និងពាណិជ្ជកម្មបានរកឃើញថា ចាំបាច់ត្រូវផ្សព្វផ្សាយជាសាធារណៈនូវការបំពានដោយបុគ្គល គ្រឹះស្ថាន និងទម្រង់នៃការដោះស្រាយលើទំព័រព័ត៌មាន។ ទន្ទឹមនឹងនេះ បង្កើនការដាក់ទណ្ឌកម្ម ឬពិចារណាលើការកាត់ទោសព្រហ្មទណ្ឌចំពោះការរំលោភធ្ងន់ធ្ងរជាពិសេស។ចំពោះគ្រឹះស្ថានដែលបំពានដោយចេតនា មិនមានវិធានការដោះស្រាយប្រកបដោយប្រសិទ្ធភាព ឬបំពានម្តងហើយម្តងទៀត ចាំបាច់ត្រូវផ្អាកប្រតិបត្តិការក្នុងរយៈពេលយូរ ឬពិចារណាដកហូតអាជ្ញាប័ណ្ណអាជីវកម្មរបស់ខ្លួន៕

(វៀតណាម)៖ ប៉ូលីសបានចាប់ផ្តើមការស៊ើបអង្កេតកាលពីថ្ងៃព្រហស្បតិ៍ប្រសិនបើមន្ត្រីគយ នៅសាខាគយកំពង់ផែ Saigon 1 ក្នុងទីក្រុងហូជីមិញបានបំពានច្បាប់លួចរត់ពន្ធទឹកដោះគោពីសហរដ្ឋអាមេរិក ឬយ៉ាងណា។តាមរយៈការស៊ើបអង្កេត មុខសញ្ញាបានសារភាពថា ទំនិញនាំចូលខាងលើត្រូវបានរៀបចំ ដោយលោក Tran Quoc Khanh (នាយកសាខាក្រុមហ៊ុន Busan) ដើម្បីនាំចូលពីសហរដ្ឋអាមេរិក ទៅកាន់ប្រទេសវៀតណាម ដើម្បីប្រើប្រាស់ តាមរយៈនីតិបុគ្គលក្រុមហ៊ុន Busan ហើយមិនអាចបង្ហាញវិក្កយបត្រ ឬឯកសារពាក់ព័ន្ធបានទេ។មុននឹងនាំចូលទំនិញខាងលើទៅកាន់ប្រទេសវៀតណាមដើម្បីប្រើប្រាស់ លោក Khanh បានដឹងថា ផលិតផលទឹកដោះគោម៉ាក Ensure មានព័ត៌មានជាភាសាអង់គ្លេសស្តីពីការវេចខ្ចប់៖ «មិនត្រូវលក់នៅប្រទេសវៀតណាម ឬម៉ិកស៊ិក» ហើយដើម្បីនាំចូលត្រូវមានវិញ្ញាបនបត្របញ្ជាក់ការចុះបញ្ជី ផលិតផលចេញដោយនាយកដ្ឋានសុវត្ថិភាព និងអនាម័យចំណីអាហារ។យោងតាមកាចុះផ្សាយរបស់សារព័ត៌មាន VN Express បានឱ្យដឹងថា ប៉ូលិសឆែកឆេរប្រអប់ទឹកដោះគោដែលគេចោទប្រកាន់ថារត់ពន្ធចូលវៀតណាមពីអាមេរិកនៅកំពង់ផែក្នុងទីក្រុងហូជីមិញ។ ពួកគេបានត្រួតពិនិត្យហើយបានរកឃើញទឹកដោះគោម៉ាក Ensure, Glucerna និង Horizon ចំនួន 4,171 កេស ដែលមានចំនួន៥០០ជាងដែលអ្នកនាំចូលបានប្រកាសពន្ធគយ ។ ពួកគេត្រូវបានលោក Khanh ចោទថានាំមកក្រោមឈ្មោះក្រុមហ៊ុន Busan ដើម្បីប្រើប្រាស់ក្នុងប្រទេសវៀតណាម។ នៅពេលសមត្ថកិច្ចសាកសួរបន្ថែម អ្នកពាក់ព័ន្ធមិនអាចបង្ហាញវិក្កយបត្រ ឬឯកសារនាំចូលផលិតផលទាំងអស់ក្នុងកុងតឺន័របានទេ។បន្ទាប់មក លោក Khanh បានស្នើរសុំឱ្យនរណាម្នាក់ កែទម្រង់បែបបទប្រកាសផលិតផល រួមទាំងបង្កាន់ដៃចុះបញ្ជីផលិតផលចំនួន 3 សម្រាប់ផលិតផលទឹកដោះគោចំនួន 3 ក្រោមម៉ាក Ensure, Glucerna និង Horizon ក្នុងតម្លៃ 10 លានដុង។Khanh បានបញ្ជាទិញទឹកដោះគោរាវប្រភេទផ្សេងៗចំនួន 4,172 កេសពីស្ត្រីម្នាក់ឈ្មោះ T ដែលរស់នៅរដ្ឋកាលីហ្វ័រញ៉ា (សហរដ្ឋអាមេរិក) ក្នុងតម្លៃ 50,000 ដុល្លារអាមេរិក ខណៈដែលតម្លៃលក់នៅប្រទេសវៀតណាមគឺជាង 4,6 ពាន់លានដុង។ ដោយទទួលបានកិច្ចសន្យាពាណិជ្ជកម្មក្រៅប្រទេសដែលផ្ញើដោយលោកស្រី T. តាមរយៈអ៊ីមែល លោក Khanh បានប្រើប្រាស់បង្កាន់ដៃចុះបញ្ជីការប្រកាសផលិតផលចំនួន 3 ខាងលើ ដើម្បីនាំចូលដោយខុសច្បាប់នូវកេសចំនួន 3,411 របស់ Abbott Ensure Original Nutrition Shake Vanilla milk ពីសហរដ្ឋអាមេរិកទៅកាន់ ប្រទេសវៀតណាម ដែលមានតម្លៃជាង 3.6 ពាន់លានដុង ស្មើនឹង(135,000 ដុល្លារអាមេរិក) ។លោក Khanh ក៏បានណែនាំលោក Tran Ngoc Dang ឱ្យប្រើប្រាស់កម្មវិធីដើម្បីកាត់ និងបិទភ្ជាប់ហត្ថលេខា កែសម្រួលទិន្នន័យ និងបន្ទាបបរិមាណ និងតម្លៃជាក់ស្តែងនៃទំនិញនាំចូល ដូច្នេះនៅពេលប្រកាសដល់គយ បរិមាណពន្ធនាំចូលអាចនឹងត្រូវកាត់បន្ថយករណីនេះសមត្ថកិច្ចកំពុងស្រាវជ្រាវ និងចាត់ការតាមនីតិវិធី ៕

(ព័ត៌មានជាតិ)៖ មន្ត្រីនគរបាលដែលបានបើករថយន្ត បុករះយានយន្តពេញផ្លូវ ពេលនេះត្រូវបានសមត្ថកិច្ចជំនាញចរាចរណ៍កំពុងកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់ហើយ នេះបើយោងតាមការបញ្ជាក់របស់ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ។ប្រភពដដែលបាន ឱ្យដឹងទៀតផងដែរថា មូលហេតុគ្រោះថ្នាក់គឺ អ្នកបើកបររថយន្ត LEXUS RX400H បើកបរលឿនខ្វះការប្រុងប្រយ័ត្ន និងបើកបរមានជាតិស្រវឹងមានអត្រាជាតិអាល់កុល0.35mg/L។ ដោយ ជនបង្កមាន ឈ្មោះ ហ៊ុន ហេង ត្រូវបានគេស្គាល់ថាជា នាយកការិយាល័យគណនេយ្យ ចំណុះផែនការងារភស្តុភារ និង ហិរញ្ញវត្ថុ នៃស្នងការដ្ឋាននគរបាលរាជធានីភ្នំពេញ។យ៉ាងណាមិញ ហេតុការណ៍នេះផងដែរបានបង្កឲ្យមានមនុស្សស្លាប់០១នាក់ រងរបួសធ្ងន់០២នាក់ និងរងរបួសស្រាល០៣នាក់។ ការបាត់បង់ជីវិតរបស់មនុស្សម្នាក់ដែលពុំបានដឹង និងពុំមានកំហុសអ្វីសោះ បានធ្វើឱ្យគ្រួសារជនរងគ្រោះស្រែកទ្រហោយំយ៉ាងសោកសៅ នឹងសង្ឍឹមថាយុត្តិធម៌គឺត្រូវតែមាន។ ហើយជុំវិញករណីបុករះនេះផងដែរ សាធារណជនកំពុងប្រតិកម្មយ៉ាងខ្លាំងជាពិសេសគឺថ្កោលទោសជនបង្ក និងរំពឹង កដូចជារង់ចាំតាមដានជាប់ជានិច្ចចំពោះចំណាត់ការច្បាប់យ៉ាងម៉ឺងម៉ាត់ ពីសំណាក់អាជ្ញាធរ និងតុលាការ។សូមបញ្ជាក់ថា ករណីគ្រោះថ្នាក់ចរាចរណ៍បុករះពីក្រោយមួយនេះបានកើរតឡើងកាលពីថ្ងៃទី១៥ ខែឧសភា ឆ្នាំ២០២៥ វេលាម៉ោង១៣:៥៧នាទី មាន ត្រង់ចំណុច មុខក្រសួងវប្បធម៌ និងវិចិត្រសិល្បៈ សង្កាត់ ទន្លេបាសាក់ ខណ្ឌចំការមន រាជធានីភ្នំពេញ បង្កឡើងដោយរថយន្តម៉ាក LEXUS RX400H បុករះ ម៉ូតូកង់បីចំនួន ០៣គ្រឿង ម៉ូតូ០១គ្រឿង និងរថយន្ត០១គ្រឿង៕

(អន្តរជាតិ)៖ ករណី COVID-19 បានកើនឡើងនៅក្នុងប្រទេសថៃ ដោយមានអ្នកឆ្លងសរុបចំនួន ៧១០៦៧ នាក់ និងមានអ្នកស្លាប់ចំនួន ១៩ នាក់ ត្រូវបានរាយការណ៍នៅចន្លោះថ្ងៃទី ១ ខែមករា ដល់ថ្ងៃទី ១៤ ខែឧសភា ឆ្នាំ ២០២៥ នេះបើយោងតាមមជ្ឈមណ្ឌលព័ត៌មាន COVID-19 របស់រដ្ឋាភិបាល។ចំនួនករណីនៅតែបន្តកើនឡើង ចំនួននៃការឆ្លងនៅតែបន្តកើនឡើង ជាមួយនឹងការផ្ទុះជាចង្កោម សំខាន់ៗចំនួនពីរត្រូវបានកំណត់អត្តសញ្ញាណ។ ការកើនឡើងនេះកើតឡើងបន្ទាប់ពីរយៈពេលឈប់សម្រាកបុណ្យសង្ក្រាន្ត ក្នុងអំឡុង ពេលនោះ ចំនួនករណីឆ្លងបានកើនឡើងជាលំដាប់៕

(បន្ទាយមានជ័យ)៖ ឯកឧត្តម សេង សក្ដា រដ្ឋលេខាធិការ តំណាងដ៏ខ្ពង់ខ្ពស់របស់ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី១៥ ខែឧសភា ឆ្នាំ២០២៥នេះ បានដឹកនាំគណៈប្រតិភូជាន់ខ្ពស់នៃក្រសួងនាំយកសារលិខិតរំលែកមរណទុក្ខរបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត រួមទាំងថវិកាពីរម៉ឺនដុល្លារ ប្រគល់ជូនក្រុមគ្រួសារនៃសពលោក សាន់ សឿន និងអ្នកស្រី សុខ គិមសី ដែលបានទទួលមរណភាពដោយសារគ្រោះរញ្ជួយដីនៅប្រទេសថៃ កាលពីថ្ងៃទី២៨ ខែមីនា ឆ្នាំ២០២៥ កន្លងទៅនេះ។ក្នុងពិធីបុណ្យសពដែលធ្វើឡើងនៅក្រុងសិរីសោភ័ណ ឯកឧត្តម សេង សក្ដា បានសម្តែងនូវសមានទុក្ខក្តុកក្តួលរន្ធត់ចិត្ត សោកស្តាយអាឡោះអាល័យជាទីបំផុត និងបានរំលែកមរណទុក្ខដ៏ក្រៀមក្រំជូនចំពោះលោក សុក សាន់ និងលោកស្រី ហង់ ថេត ដែលបានបាត់បង់លោក សាន់ សឿន ត្រូវជាកូន អាយុ៣៨ឆ្នាំ ក៏ដូចជាជូនចំពោះលោក ភី សុខ និងលោកស្រី ហ៊ុត សុភួន ដែលបានបាត់បង់អ្នកស្រី សុខ គិមសី ត្រូវជាកូន អាយុ៣១ឆ្នាំក្នុងគ្រោះរញ្ជួយដីនៅប្រទេសថៃ។ ជាមួយគ្នានេះ តំណាងក្រុមគ្រួសារនៃសព និងញាតិមិត្តជិតឆ្ងាយដែលចូលរួមបុណ្យសពនោះ ក៏បានលើកដៃប្រណមថ្លែងអំណរគុណចំពោះសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត និងថ្នាក់ដឹកនាំក្រសួងការងារ និងបណ្តុះបណ្តាលវិជ្ជាជីវៈ រួមទាំងអាជ្ញាធរពាក់ព័ន្ធទាំងអស់ដែលបានយកចិត្តទុកដាក់តាមរយៈការផ្តល់សាររំលែកមរណទុក្ខ ថវិកា ការជួយសម្របសម្រួលឯកសារដឹកសព និងដង្ហែសពមកស្រុកកំណើតធ្វើបុណ្យយ៉ាងឱឡារិក។ សូមជម្រាបថា សពលោក សាន់ សឿន និងសពលោកស្រី សុខ គិមសី (ត្រូវជាប្ដីប្រពន្ធនឹងគ្នា) ត្រូវបានបញ្ជូនមកដល់ស្រុកកំណើតនៅក្រុងសិរីសោភ័ណ ខេត្តបន្ទាយមានជ័យ នាយប់ថ្ងៃទី១៤ ខែឧសភា ឆ្នាំ២០២៥ ក្រោមការជួយខ្នះខ្នែងសម្របសម្រួលពីសំណាក់ក្រសួងការងារ និងបណ្តុះបណ្តាលវិជ្ជាជីវៈ ស្ថានឯកអគ្គរាជទូតកម្ពុជាប្រចាំប្រទេសថៃ អនុព័ន្ធការងារអមស្ថានឯកអគ្គរាជទូតកម្ពុជាប្រចាំប្រទេសថៃ និងអាជ្ញាធរពាក់ព័ន្ធផងដែរ៕

(អន្តរជាតិ)៖ ក្រុមមួយមកពីសាកលវិទ្យាល័យតូក្យូបានចាប់ផ្តើមការត្រួតពិនិត្យ លើសត្វប្រចៀវ ក្នុងប្រទេសវៀតណាម ដើម្បីរកមើលមេរោគដែលមានសក្តានុពលបង្កជំងឺរាតត្បាតមួយទៀត។ជំងឺរាតត្បាត COVID-19 ត្រូវបានគេគិតថា បណ្តាលមកពីវីរុសដែលលោតពីសត្វព្រៃមកមនុស្ស។ អ្នកជំនាញសុខភាពបានព្រមានថា មេរោគមិនស្គាល់មុខមួយទៀតអាចឆ្លងពីសត្វព្រៃមកមនុស្ស។ក្រុមស្រាវជ្រាវមួយនៅវិទ្យាស្ថានវិទ្យាសាស្ត្រវេជ្ជសាស្ត្រនៃសាកលវិទ្យាល័យតូក្យូគ្រោងនឹងយកគំរូនៅក្នុងតំបន់អាស៊ីអាគ្នេយ៍ រួមទាំងប្រទេសថៃ និងម៉ាឡេស៊ីផងដែរ។ក្រុមនេះបានចាប់ផ្តើមធ្វើការនៅក្នុងរូងភ្នំមួយក្នុងខេត្ត Lao Cai ភាគខាងជើងប្រទេសវៀតណាម ដោយផ្តោតលើប្រភេទសត្វប្រចៀវព្រៃដែលគេស្គាល់ថាកន្លែងផ្ទុកមេរោគ Corona និងមេរោគដទៃទៀត។ការស្ទង់មតិនេះកំពុងធ្វើឡើងជាមួយសាកលវិទ្យាល័យ Nagasaki របស់ប្រទេសជប៉ុន និងបណ្ឌិត្យ សភាវិទ្យាសាស្ត្រ និងបច្ចេកវិទ្យាវៀតណាម។សំណាកដែលយកចេញពីសត្វប្រចៀវកំពុងត្រូវបានវិភាគនៅឯមន្ទីរពិសោធន៍ក្នុងប្រទេសវៀតណាម ដើម្បីមើលថាតើវាមានផ្ទុកមេរោគប្រភេទណា និងថាតើពួកវាអាចឆ្លងដល់មនុស្សដែរឬទេ។ ក្រុមនេះសង្ឃឹមថា ទិន្នន័យនេះអាចត្រូវបានប្រើប្រាស់ដើម្បីបង្កើតវ៉ាក់សាំង ឬការព្យាបាល។សាស្ត្រាចារ្យ Sato Kei ដែលជាប្រធានក្រុមគម្រោងនិយាយថា ការកំណត់អត្តសញ្ញាណ និងការវិភាគ មេរោគដែលមិនស្គាល់ពីមុនមកដែលមានហានិភ័យខ្ពស់ពីសត្វព្រៃនឹងដំណើរការដ៏វែងឆ្ងាយឆ្ពោះទៅរកការរៀបចំសម្រាប់ជំងឺរាតត្បាតនាពេលអនាគត៕

(អន្តរជាតិ)៖ ការសិក្សាថ្មីមួយបានរកឃើញថា សារធាតុគីមីសំយោគហៅថា phthalates ដែលមាន នៅក្នុងផលិតផលប្រើប្រាស់ដូចជា ប្រអប់អាហារ សាប៊ូកក់សក់ គ្រឿងសម្អាង ទឹកអប់ និងប្រដាប់ក្មេង លេងរបស់កុមារ ប្រហែលជាបានរួមចំណែកដល់ការស្លាប់ទូទាំងពិភពលោកច្រើនជាង 10% ដោយសារ ជំងឺបេះដូងក្នុងឆ្នាំ 2018 ក្នុងចំណោមបុរស និងស្ត្រីដែលមានអាយុពី 55 ទៅ 64 ឆ្នាំ។វេជ្ជបណ្ឌិត Leonardo Trasande សាស្ត្រាចារ្យផ្នែកជំងឺកុមារ និងសុខភាពប្រជាជននៅសាលាវេជ្ជសាស្ត្រ Grossman នៃសាកលវិទ្យាល័យញូវយ៉កបាននិយាយថា សារធាតុគីមី Phthalates រួមចំណែកដល់ ការរលាក និងការរលាកជាប្រព័ន្ធនៅក្នុងសរសៃឈាមបេះដូង ដែលអាចពន្លឿនជំងឺដែលមានស្រាប់ និងនាំឱ្យមានព្រឹត្តិការណ៍ធ្ងន់ធ្ងររួមទាំងការស្លាប់។ លោក Trasande បាននិយាយថា សារធាតុPhthalates ត្រូវបានគេដឹងថាធ្វើឱ្យរំខានដល់អ័រម៉ូន Testosterone" ។ ចំពោះបុរស "អ័រម៉ូន Testosterone ទាបគឺជាការព្យាករណ៍នៃជំងឺសរសៃឈាមបេះដូង សម្រាប់មនុស្សពេញវ័យ" ។ ការសិក្សាក៏បានផ្សារភ្ជាប់សារធាតុ phthalates ទៅនឹងជំងឺហឺត ភាពធាត់ក្នុង វ័យកុមារ និងមហារីក។លោក David Andrews ប្រធានផ្នែកវិទ្យាសាស្ត្រស្តីទីនៃក្រុមការងារបរិស្ថាន ដែលជាអង្គការអ្នកប្រើប្រាស់ ដែល តាមដានការប៉ះពាល់នឹង phthalates និងសារធាតុគីមីផ្សេងទៀតនៅក្នុងផ្លាស្ទិចបាននិយាយថា "ការសិក្សាថ្មីបានគូសបញ្ជាក់អំពីសក្តានុពលសុខភាព និងបន្ទុកសេដ្ឋកិច្ចដ៏ធំសម្បើមនៃការប៉ះពាល់នឹង phthalates និងសារធាតុគីមីផ្សេងទៀតនៅក្នុងប្លាស្ទិក។ ក្នុងឆ្នាំ 2018 ប្រហែល 13.5 ភាគរយនៃការស្លាប់ជាង 2.6 លាននាក់ដោយសារជំងឺសរសៃឈាមបេះដូង នៅទូទាំងពិភពលោកដោយសារធាតុគីមីមួយប្រភេទនេះ៕

(អន្តរជាតិ)៖ ក្រុមឧស្សាហកម្មទេសចរណ៍មួយបាននិយាយថា សហរដ្ឋអាមេរិក ដែលជាមហាអំណាច សេដ្ឋកិច្ចធំជាងគេលើពិភពលោក នឹងបាត់បង់ប្រាក់ចំណូលប្រហែល 12.5 ពាន់លានដុល្លារពី ភ្ញៀវទេសចរបរទេសនៅឆ្នាំនេះ ខណៈដែលរដ្ឋបាល Trump បានដឹកនាំការបង្ក្រាបជនអន្តោប្រវេសន៍។ការសិក្សាដោយក្រុមប្រឹក្សាទេសចរណ៍ និងទេសចរណ៍ពិភពលោក (WTTC) និង Oxford Economics បានរកឃើញថា សហរដ្ឋអាមេរិក គឺជាប្រទេសតែមួយគត់ដែលបានកំណត់ឃើញការធ្លាក់ចុះ នៃការ ចំណាយរបស់ភ្ញៀវទេសចរបរទេសនៅឆ្នាំនេះ។ការធ្លាក់ចុះដល់ 181 ពាន់លានដុល្លារក្នុងការចំណាយរបស់ភ្ញៀវទេសចរបរទេស ជាការធ្លាក់ចុះ 22.5% ពីកម្រិតកំពូលដែលបានកំណត់កាលពីមួយទសវត្សរ៍មុន។WTTC ដែលបង្កើតឡើងដោយក្រុមហ៊ុនទេសចរណ៍ឈានមុខគេបាននិយាយថានេះ ការខាតបង់នេះ "តំណាងឱ្យការប៉ះទង្គិចដោយផ្ទាល់ដល់សេដ្ឋកិច្ចសហរដ្ឋអាមេរិកទាំងមូល ដែលប៉ះពាល់ដល់ សហគមន៍ ការងារ និងអាជីវកម្មពីឆ្នេរសមុទ្រទៅឆ្នេរសមុទ្រ" ។ប្រធាន WTTC លោកស្រី Julia Simpson បាននិយាយថា ការគាំទ្រពីរដ្ឋាភិបាលគឺចាំបាច់ដើម្បីធានា បាននូវកំណើនទេសចរណ៍។ លោកបាននិយាយនៅក្នុងសេចក្តីថ្លែងការណ៍មួយថា "ខណៈពេលដែល ប្រទេសផ្សេងទៀតកំពុងដាក់កម្រាលព្រំស្វាគមន៍ភ្ញៀវទេសចរណ៍ រដ្ឋាភិបាលសហរដ្ឋអាមេរិក កំពុងរារាំងភ្ញៀវ ។ប្រធានាធិបតី Donald Trump ដឹកនាំការបង្ក្រាបលើជនអន្តោប្រវេសន៍ខុសច្បាប់ និងការដាក់ពន្ធ លើទំនិញបរទេស ដោយអ្នកប្រើប្រាស់នៅក្នុងប្រទេសផ្សេងទៀត ធ្វើពហិការផលិតផលសហរដ្ឋអាមេរិក និងការអំពាវនាវឱ្យរំលងការធ្វើដំណើរទៅកាន់សហរដ្ឋអាមេរិក។Simpson បានប្រាប់កាសែត New York Times ថា អ្នកធ្វើដំណើរបរទេសមួយចំនួនមានការភ័យខ្លាច ក្នុងការធ្វើដំណើរទៅកាន់សហរដ្ឋអាមេរិក។ ពួកគេ​ក៏​មាន​ការ​ព្រួយ​បារម្ភ​អំពី​ទិដ្ឋាការ​ដែរ ថា​តើ​ពួកគេ​មាន​ទិដ្ឋាការ​ត្រឹមត្រូវ ឬ​អាច​នឹង​ត្រូវ​បាន​ចាប់​ខ្លួន​ដោយ​ចៃដន្យ ដែល​ធ្វើ​ឲ្យ​មនុស្ស​មាន​ការ​ភ័យ​ខ្លាច​យ៉ាង​ខ្លាំង»។របាយការណ៍នេះបានគូសបញ្ជាក់ពីទិន្នន័យរបស់ក្រសួងពាណិជ្ជកម្មសហរដ្ឋអាមេរិកដែលបង្ហាញពីការធ្លាក់ចុះយ៉ាងខ្លាំងនៅក្នុងខែមីនាឆ្នាំ 2020 ការមកដល់ពីប្រទេសសំខាន់ៗ រួមទាំងការធ្លាក់ចុះជិត 15% ពីចក្រភពអង់គ្លេស និងកូរ៉េខាងត្បូង៕

(អន្តរជាតិ)៖ សារព័ត៌មាន NHK បានដឹងថា ក្រុមហ៊ុនផលិតរថយន្តជប៉ុន Nissan Motor ដែលកំពុងជួប ការលំបាក គ្រោងនឹងកាត់បន្ថយការងារប្រហែល 11000នាក់បន្ថែមទៀត ដែលនាំមកនូវការកាត់បន្ថយ ការរំពឹងទុករបស់ក្រុមហ៊ុនមកនៅប្រហែល 20000 ឬ 15 ភាគរយនៃកម្លាំងការងារជាក្រុមទូទាំង ពិភពលោក។ផែនការចុងក្រោយនេះធ្វើឡើង បន្ទាប់ពីមានការប្រកាសកាលពីខែវិច្ឆិកាថា ក្រុមហ៊ុននឹងកាត់បន្ថយ សមត្ថភាពផលិតកម្មសកលរបស់ខ្លួនចំនួន 20 ភាគរយ និងកាត់បន្ថយបុគ្គលិកចំនួន 9000 នាក់ ដើម្បីបង្វែរអាជីវកម្មរបស់ខ្លួន។ប្រភពបាននិយាយថាក្រុមហ៊ុនកំពុងរៀបចំផែនការកាត់បន្ថយការងារបន្ថែម ខណៈដែលការលក់ឯកតា បានធ្លាក់ចុះច្រើនជាងការរំពឹងទុក។ក្រុមហ៊ុនផលិតរថយន្តបាននិយាយថា ខ្លួននឹងបោះបង់គម្រោងសាងសង់រោងចក្រសម្រាប់អាគុយ EV នៅទីក្រុង Kitakyushu ភាគខាងលិចប្រទេសជប៉ុន។ វាក៏បាននិយាយថា ខ្លួននឹងបិទរោងចក្រចំនួនបី នៅក្នុងប្រទេសថៃ និងកន្លែងផ្សេងទៀត។ក្រុមហ៊ុននេះត្រូវបានគេរំពឹងថានឹងប្រកាសផែនការថ្មីនៅក្នុងសន្និសីទសារព័ត៌មានសម្រាប់ការចេញ ផ្សាយលទ្ធផលអាជីវកម្ម។Nissan រំពឹងថានឹងខាតបង់រហូតដល់ 750 ពាន់លានយ៉េន ឬប្រហែល 5 ពាន់លានដុល្លារសម្រាប់ សារពើពន្ធឆ្នាំ 2024 ដែលបានបញ្ចប់ក្នុងខែមីនា៕