(ភ្នំពេញ)៖ ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានទទួលជួបសម្តែងការគួរសម និងពិភាក្សាការងារជាមួយលោក Jochen M. Schmittmann តំណាងប្រចាំតំបន់របស់មូលនិធិរូបិយវត្ថុអន្តរជាតិ (IMF) សម្រាប់កម្ពុជា ឡាវ និងវៀតណាម និងសហការី នាថ្ងៃចន្ទ ទី៩ ខែមីនា ឆ្នាំ២០២៦ នៅទីស្តីការក្រសួង ដើម្បីធ្វើបច្ចុប្បន្នភាពការងារ ផ្លាស់ប្តូរយោបល់លើការស្រូបទាញកម្លាំងពលកម្ម ការអភិវឌ្ឍជំនាញ ជាពិសេស ការធ្វើសមាហរណកម្មពលករទេសន្តរប្រវេសន៍មកពីប្រទេសថៃ។នាឱកាសនោះ ឯកឧត្ដមរដ្ឋមន្ត្រីបានថ្លែងអំណរគុណចំពោះកិច្ចសន្ទនាជាបន្តបន្ទាប់ប្រកបដោយភាពស្ថាបនារបស់ IMF ជាមួយកម្ពុជា និងបានវាយតម្លៃខ្ពស់ចំពោះជំនួបដែលពិភាក្សាផ្លាស់ប្តូរទស្សនៈពីបច្ចុប្បន្នភាពស្ថានភាពទីផ្សារការងារ តម្រូវការជំនាញ និងកម្លាំងពលកម្ម ព្រមទាំងទស្សនវិស័យនៃការងារនាពេលខាងមុខ ចំពោះអតីតពលករដែលវិលត្រឡប់មកវិញ ដោយឯកឧត្តមបានគូសបញ្ជាក់ថា ការពិភាក្សានៅថ្ងៃនេះមានសារៈសំខាន់ និងទាន់ពេលវេលា ខណៈដែលប្រទេសកម្ពុជាកំពុងបន្តពង្រឹងភាពធន់នៃទីផ្សារការងារ និងលើកកម្ពស់ប្រសិទ្ធភាពនៃប្រព័ន្ធអភិវឌ្ឍជំនាញ និងប្រព័ន្ធផ្គូផ្គងការងារ។ទន្ទឹមនឹងនេះ ឯកឧត្ដម ហេង សួរ បានលើកឡើងពីកិច្ចអន្តរាគមន៍យ៉ាងទាន់ពេលវេលារបស់ក្រសួងការងារ និងបណ្តុះបណ្តាលវិជ្ជាជីវៈ ដែលជាសេនាធិការរាជរដ្ឋាភិបាលកម្ពុជា ដោយបានផ្តោតលើការផ្តល់សេវាកម្មទីផ្សារការងារជាក់ស្តែងសំខាន់ៗ ដូចជា ការពង្រឹងតួនាទីទីភ្នាក់ងារជាតិមុខរបរ និងការងារ (NEA) ក្នុងការប្រមូលព័ត៌មាននៃឱកាសការងារពីនិយោជក ហើយផ្សព្វផ្សាយឱកាសការងារ តាមរយៈការបើកដំណើរការលេខទូរស័ព្ទ ១២៩៧ និងបណ្តាញសង្គម ព្រមទាំងការរៀបចំវេទិកាការងារ និងពិព័រណ៍ការងារនៅតាមមូលដ្ឋាន ជាពិសេសនៅតាមខេត្តជាប់ព្រំដែនកម្ពុជា-ថៃ សម្រាប់អតីតពលករ ជាមួយការផ្តល់ព័ត៌មានពីរបបសន្តិសុខសង្គម និងជម្រើសបណ្តុះបណ្តាលជំនាញផងដែរ។ជាមួយគ្នានេះ ក្រសួងក៏បានផ្តល់កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស TVET ដល់ពួកគាត់ ក៏ដូចជាយុវជនពីគ្រួសារក្រីក្រ និងងាយរងគ្រោះឱ្យទទួលបានជំនាញពិតប្រាកដក្នុងរយៈពេលខ្លី និងឆាប់ទទួលបានចំណូលផ្គត់ផ្គង់ជីវភាពគ្រួសារ។ បន្ថែមពីនេះ ដើម្បីចូលរួមអភិវឌ្ឍជំនាញ និងលើកទឹកចិត្តដល់អតីតពលករ ក្រសួងក៏បានផ្តល់ឱកាសធ្វើតេស្តទទួលស្គាល់សមត្ថភាពដែលមានពីមុន (RPL) ដោយឥតគិតថ្លៃ លើមុខជំនាញក្នុងវិស័យសំណង់ជាដើម។ជាការឆ្លើយតប លោក Jochen M. Schmittmann បានថ្លែងអំណរគុណ និងកោតសរសើរដល់ ឯកឧត្ដមរដ្ឋមន្រ្តី ចំពោះការចែករំលែកពីយន្តការអន្តរាគមន៍ ការធ្វើសមាហរណកម្ម ក៏ដូចជាការធ្វើបច្ចុប្បន្នភាពពីស្ថានភាពអតីតពលករពីប្រទេសថៃ ហើយទិន្នន័យច្បាស់លាស់ទាំងនេះពិតជាមានសារៈសំខាន់សម្រាប់ IMF។ឯកឧត្តមរដ្ឋមន្រ្តីសង្ឃឹមយ៉ាងមុតមាំថា IMF នឹងបន្តភាពជាដៃគូជួយពង្រឹងកិច្ចសហប្រតិបត្តិការរវាងកម្ពុជា និង IMF បន្ថែមទៀត ដើម្បីចូលរួមចំណែកគាំទ្រដល់ការអភិវឌ្ឍសង្គម-សេដ្ឋកិច្ចកម្ពុជា៕

(ភ្នំពេញ)៖ នាព្រឹកថ្ងៃចន្ទ ទី៩ ខែមីនា ឆ្នាំ២០២៦ នៅទីស្តីការក្រសួង ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានទទួលជួបសម្តែងការគួរសម និងពិភាក្សាការងារជាមួយឯកឧត្តម ដូមីនិក វីល្លៀម (Dominic Williams) ឯកអគ្គរាជទូតចក្រភពអង់គ្លេសប្រចាំកម្ពុជា និងបានចុះអនុស្សរណៈនៃការយោគយល់គ្នា (MoU) ជាមួយលោក Jonathan Ledger អ្នកជំនាញអន្តរជាតិក្នុងវិស័យ TVET និងគោលនយោបាយកម្លាំងពលកម្ម តំណាងឱ្យភាពជាដៃគូជំនាញរបស់ចក្រភពអង់គ្លេស (UK Skills Partnership-UKSP)។នាឱកាសនោះ ឯកឧត្តម ហេង សួរ បានសម្តែងនូវការស្វាគមន៍យ៉ាងកក់ក្តៅចំពោះឯកឧត្តម ដូមីនិក វីល្លៀម និងលោក Jonathan Ledger និងបានថ្លែងអំណរគុណយ៉ាងជ្រាលជ្រៅដែលបានផ្តល់ការគាំទ្រយូរអង្វែងដល់កម្ពុជា ក្នុងវិស័យអភិបាលកិច្ចការងារ អភិវឌ្ឍធនធានមនុស្ស តាមរយៈអាហារូបករណ៍ ការការពារពលករចំណាកស្រុក ការគាំទ្រផ្នែកគោលនយោបាយ និងការបណ្តុះបណ្តាលវិជ្ជាជីវៈ ជាពិសេសការគាំទ្រនៅក្នុងវិស័យអប់រំ ការបណ្តុះបណ្តាលវិជ្ជាជីវៈ ពាណិជ្ជកម្ម និងវិនិយោគ ព្រមទាំងកិច្ចខិតខំប្រឹងប្រែងរបស់ចក្រភពអង់គ្លេសក្នុងការគាំទ្រកម្ពុជាក្នុងដំណើរការចាកចេញពីឋានៈប្រទេសមានការអភិវឌ្ឍតិចតួច (LDC)។ ទន្ទឹមនឹងនោះ ឯកឧត្តម ដូមីនិក វីល្លៀម បានសម្តែងនូវសេចក្ដីរីករាយចំពោះការចុះ MoU នេះ ដោយលោកបានលើកឡើងថា ការអប់រំមានសារៈសំខាន់ណាស់សម្រាប់ដំណើរការអភិវឌ្ឍន៍របស់ប្រទេសកម្ពុជា។ នៅពេលដែលការចាកចេញពី LDC នៅពេលខាងមុខ វាមានសារៈសំខាន់ណាស់ក្នុងការលើកកម្ពស់កម្រិតជំនាញ ជាពិសេសដើម្បីបង្កើនផលិតភាពរបស់កម្លាំងពលកម្ម ដែលថែមទាំងដើម្បីមានជំនាញដែលអាចជួយអភិវឌ្ឍវិស័យសេដ្ឋកិច្ចថ្មីៗ និងមានសក្ដានុពល ដែលនឹងជួយឱ្យកម្ពុជាបន្តរីកចម្រើនទៅមុខក្នុងអនាគត។ ឯកឧត្តមរដ្ឋមន្រ្តី និង ឯកឧត្តម ដូមីនិក វីល្លៀម បានផ្លាស់ប្តូរយោបល់ពីការពង្រឹងទំនាក់ទំនងទ្វេភាគីផ្សេងៗ ដោយបានគូសបញ្ជាក់ឡើងវិញនូវការប្ដេជ្ញាចិត្តរួមគ្នា ក្នុងការបន្តការកសាងភាពជាដៃគូយូរអង្វែង ជាពិសេសកម្មវិធីបណ្តុះបណ្តាលនេះ។ ជាមួយគ្នានេះ ឯកឧត្ដម ហេង សួរ បានថ្លែងអំណរគុណដ៏ក្រៃលែងចំពោះឯកឧត្ដម ឯកអគ្គរាជទូត ដែលបានជួយភ្ជាប់ UKSP មកកាន់កម្ពុជា ក៏ដូចជាការនាំយកកម្មវិធីអប់រំ ប្រកបដោយគុណភាពលំដាប់ពិភពលោក មកកាន់ប្រទេសកម្ពុជា។ តាមរយៈ MoU នេះ កម្ពុជានឹងអាចស្វាគមន៍អ្នកជំនាញ កម្មវិធីអភិវឌ្ឍជំនាញ ក៏ដូចជាការភ្ជាប់ជាមួយអ្នកជំនាញ និងស្ថាប័នលំដាប់ពិភពលោកបន្ថែមពីចក្រភពអង់គ្លេសមកកម្ពុជា។ ឯកឧត្ដមរដ្ឋមន្រ្តីជឿជាក់យ៉ាងមុតមាំថា កិច្ចសហការនេះនឹងជួយលើកកម្ពស់គុណភាពនៃការបណ្តុះបណ្តាល TVET និងគុណភាពជំនាញកម្ពុជា ដែលអាចឆ្លើយតបទៅនឹងតម្រូវការរបស់វិស័យឯកជន និងគាំទ្រដល់កម្រិតនៃការអភិវឌ្ឍសេដ្ឋកិច្ច។គួរបញ្ជាក់ថា MoU ស្តីពី “ការផ្លាស់ប្តូរ និងកិច្ចសហប្រតិបត្តិការនៅក្នុងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ (TVET)” មានគោលបំណងពង្រឹង និងលើកកម្ពស់កិច្ចសហប្រតិបត្តិការរវាងភាគីទាំងពីរ ក្នុងវិស័យ TVET និងជំនាញ ដោយផ្អែកលើគោលការណ៍នៃទំនាក់ទំនងទៅវិញទៅមក និរន្តរភាព និងផលប្រយោជន៍រួម។ តាមរយៈ MoU ដែលមានរយៈពេលបីឆ្នាំនេះ ភាគីទាំងពីរមានបំណងពង្រឹងកិច្ចសហប្រតិបត្តិការទ្វេភាគី និងគាំទ្រគ្នាទៅវិញទៅមក ក្នុងការផ្តល់អប់រំ និងបណ្តុះបណ្តាលបច្ចេកទេស និងវិជ្ជាជីវៈ (TVET) និងការអភិវឌ្ឍជំនាញ នៅក្នុងប្រទេសនីមួយៗ ព្រមទាំងជំរុញកិច្ចសហប្រតិបត្តិការដែលមានប្រសិទ្ធភាពក្នុងវិស័យ TVET និងជំនាញ ដែលនឹងជួយអភិវឌ្ឍធនធានមនុស្ស ជំរុញកំណើនសេដ្ឋកិច្ចជាតិ និងលើកកម្ពស់សុខុមាលភាពរបស់ប្រជាពលរដ្ឋ។ MoU នេះគ្របដណ្តប់លើកិច្ចសហប្រតិបត្តិការដែលផ្តល់ផលប្រយោជន៍រួម និងមាននិរន្តរភាពផ្នែកហិរញ្ញវត្ថុ ដូចជាការជំរុញការផ្លាស់ប្តូរគំនិត និងបទពិសោធ តាមរយៈកិច្ចពិភាក្សា ដើម្បីឱ្យភាគីទាំងពីរចែករំលែកជំនាញ និងបទពិសោធ ក្នុងការបង្ហាញពីតម្លៃបន្ថែមនៃការវិនិយោគលើជំនាញ និងអត្ថប្រយោជន៍នៃការអភិវឌ្ឍកម្លាំងពលកម្ម ព្រមទាំងសហការលើការច្នៃប្រឌិត ដើម្បីបង្កើនគុណភាព TVET និងជំនាញជាដើម៕

(ទីក្រុងហ្សឺណែវ)៖ ប្រធានគណៈកម្មាធិការសិទ្ធិមនុស្សកម្ពុជា បានលើកឡើងអំពីសកម្មភាពនានារបស់ភាគីថៃ ដែលជាការរំលោភយ៉ាងធ្ងន់ធ្ងរលើច្បាប់អន្តរជាតិ ជាពិសេស ច្បាប់សិទ្ធិមនុស្ស និងច្បាប់មនុស្សធម៌អន្តរជាតិ។ ដោយក្នុងនោះរួមមាន៖-ការបិទព្រំដែនជាឯកតោភាគីដោយគ្មានការជូនដំណឹងជាមុនពីសំណាក់យោធាថៃ-ការរើសអើង និងការប្រើប្រាស់អំពើហិង្សាលើពលករទេសន្តប្រវេសន៍កម្ពុជា-ការប្រព្រឹត្តអំពើហិង្សាផ្លូវភេទលើស្ត្រីពលករកម្ពុជាពីសំណាក់កងទ័ពថៃ-ការប្រើប្រាស់សំឡេងមានដេស៊ីបែលខ្ពស់ សំឡេងខ្មោច សំឡេងយន្តហោះ ដើម្បីរំខានដល់ផ្លូវចិត្ត ប្រជាជននៅតាមព្រំដែន-ការវាយប្រហារដោយមិនរើសគោលដៅដោយប្រើប្រាស់អាវុធធុនធ្ងន់ គ្រាប់បែកចង្កោម ផ្សែងពុល និងយន្តហោះចម្បាំងប្រភេទ F-16, Gripen និង T-50 បណ្តាលឱ្យខូចខាតទ្រព្យសម្បត្តិឯកជន និងសាធារណៈ រួមទាំងប្រាសាទព្រះវិហារដែលជាបេតិកភណ្ឌពិភពលោក-ការព្យាយាមបង្កើតតថភាពថ្មីនៅនឹងកន្លែង (Fait Accompli) តាមរយៈការដាក់ពង្រាយលួសបន្លា ដាក់ទូកុងតឺន័រ ឈូសបំផ្លាញផ្ទះប្រជាពលរដ្ឋ ហើយដាក់ឈ្មោះផ្លូវថ្មីក្នុងតំបន់ឈ្លានពាននិងបន្ត កាន់កាប់ដោយខុសច្បាប់ ព្រមទាំងកសាងហេដ្ឋារចនាសម្ព័ន្ធថ្មី ដែលធ្វើឱ្យជនភៀសសឹកប្រមាណ ៨០ ០០០ នាក់ មិនអាចត្រឡប់ទៅលំនៅឋានវិញបានដោយសុវត្ថិភាពជាដើម។ នេះបើយោងតាមសេចក្តីប្រកាសព័ត៌មានស្តីពី លទ្ធផលនៃបេសកកម្មសិទ្ធិមនុស្ស នៅទីក្រុងហ្សឺណែវ ប្រទេសស្វីស របស់កម្មាធិការសិទ្ធិមនុស្សកម្ពុជា នៅព្រឹកនេះ៕

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ រួមជាមួយឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ អញ្ជើញជាអធិបតីក្នុងព្រឹត្តិការណ៍ជិះកង់ «ភ្នំពេញ–តាកែវ» ចម្ងាយ ៧៨ គីឡូម៉ែត្រ ក្រោមប្រធានបទ «ទេសចរណ៍រីកលូតលាស់ក្នុងសន្តិភាព» ដែលរៀបចំឡើងក្នុងគោលបំណងដើម្បីអបអរសាទរខួបលើកទី១១៥ ទិវាអន្តរជាតិនារី ៨មីនា ក្រោមប្រធានបទ «សន្តិភាព និងសន្តិសុខសម្រាប់ស្តី និងគ្រួសារ», ជំរុញចលនាទេសចរណ៍ក្នុងស្រុក ជាពិសេសការទាក់ទាញភ្ញៀវទេសចរទៅកាន់តំបន់សក្តានុពលទេសចរណ៍នៅខេត្តតាកែវ, បង្ហាញពីការឯកភាពជាតិ សាមគ្គីភាពផ្ទៃក្នុងរឹងមាំ និងចូលរួមសកម្មភាពមនុស្សធម៌ តាមរយៈការជួយឧបត្ថម្ភសម្ភារៈសិក្សាដល់សិស្សានុសិស្សខ្វះខាតផងដែរ។ព្រឹត្តិការណ៍ជិះកង់នេះមានការអញ្ជើញចូលរួមពីឯកឧត្ដម លោកជំទាវថ្នាក់ដឹកនាំក្រសួងទេសចរណ៍, ឧកញ៉ា លោក លោកស្រីតំណាងសមាគមក្នុងឧស្សាហកម្មទេសចរណ៍ និងផ្នែកឯកជន, ប្អូន និងក្មួយៗជាអ្នកផលិតមាតិកាព័ត៌មាន Influencers, KOLs, បងប្អូនកីឡាករ កីឡាការិនី បងប្អូនសាធារណជន ព្រមទាំងភ្ញៀវទេសចរជាតិ និងអន្តរជាតិទាំងអស់ប្រមាណ ១,០០០នាក់។ឆ្លៀតក្នុងឱកាសដ៏ស្រស់ស្រាយ​រំសាយ​អស់ទុក្ខកង្វល់នេះ ឯកឧត្តមរដ្ឋមន្ត្រី បានលើកឡើងថា សន្តិភាព គឺជាគ្រឹះសំខាន់សម្រាប់ការអភិវឌ្ឍវិស័យទេសចរណ៍ និងសេដ្ឋកិច្ចជាតិ ពិសេសព្រឹត្តិការណ៍ជិះកង់នេះក៏ជាផ្នែកមួយក្នុងការផ្សព្វផ្សាយសក្តានុពលទេសចរណ៍រវាងរាជធានីភ្នំពេញ និងខេត្តតាកែវ ព្រមទាំងលើកកម្ពស់ការធ្វើដំណើរទេសចរណ៍ប្រកបដោយភាពសុខដុមរមនា និងបរិស្ថានបៃតង។ជាមួយគ្នានេះ ឯកឧត្តមរដ្ឋមន្ត្រី បានថ្លែងបន្តថា ព្រឹត្តិការណ៍កីឡាទេសចរណ៍ដ៏ល្អមួយនេះ បានចូលរួមចំណែកក្នុងការលើកកម្ពស់សុខភាពប្រជាពលរដ្ឋ, បង្កើនការយល់ដឹងអំពីសារៈសំខាន់នៃការហាត់ប្រាណ, បង្ហាញពីការរួបរួម និងភាពសាមគ្គីរបស់ប្រជាពលរដ្ឋក្នុងការគាំទ្រវិស័យទេសចរណ៍ និងការអភិវឌ្ឍប្រទេសជាតិ និងជំរុញការចូលរួមរបស់សហគមន៍ក្នុងសកម្មភាពសង្គម ព្រមទាំងផ្តល់ការលើកទឹកចិត្តដល់ការចូលរួមរបស់ស្ត្រីក្នុងសកម្មភាពសង្គម កីឡា និងវិស័យទេសចរណ៍ផងដែរ។ខេត្តតាកែវ ព្រឹកថ្ងៃទី៨ ខែមីនា ឆ្នាំ២០២៦

(បាត់ដំបង-កំពង់ធំ)៖ ដោយមើលឃើញពីសារៈសំខាន់ក្នុងការបង្កើតឱកាសការងារនៅតាមសហគ្រាសធុនតូចនិងមធ្យម (SMEs) លោកជំទាវ ហ៊ឹម សុធារ័ត្ន អនុរដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ បានជំរុញឱ្យភាគីពាក់ព័ន្ធនៃកម្មវិធីមុខរបរនិងការងារសមរម្យសម្រាប់យុវជននៅកម្ពុជា ដំណាក់កាលទី៣ (DEY III) បន្តជួយជ្រោមជ្រែងដល់ SMEs បន្ថែមទៀត ដើម្បីគាំទ្រដល់ការបង្កើតការងារក្នុងស្រុកដល់យុវជន និងអតីតពលករត្រឡប់មកពីប្រទេសថៃ។ការជំរុញលើកទឹកចិត្តយ៉ាងមុតមាំនេះ ធ្វើឡើងក្នុងឱកាសដែលលោកជំទាវអនុរដ្ឋលេខាធិការ ហ៊ឹម សុធារ័ត្ន រួមជាមួយលោក ឈា ឡាយហ៊ី អគ្គនាយករងនៃអគ្គនាយកដ្ឋានសហគ្រាសធុនតូចនិងមធ្យម តំណាងក្រសួងឧស្សហកម្ម វិទ្យាសាស្ត្រ បច្ចេកទេស និងនវានុវត្តន៍ និងលោក សុខ ណារិន តំណាងប្រចាំប្រទេសកម្ពុជានៃអង្គការ UNIDO បានធ្វើទស្សនកិច្ចពិនិត្យមើលសហគ្រាសធុនតូចនិងមធ្យម (SMEs) ដែលទទួលផលពីកម្មវិធី DEY III ដែលជាសកម្មភាពមួយរបស់កម្មវិធី DEY III ក្នុងគោលបំណងជួយគាំទ្រនិងអភិវឌ្ឍសហគ្រាសធុនតូចនិងមធ្យម ក៏ដូចជាគាំទ្រដល់យុវជននៅកម្ពុជាឱ្យទទួលបានការងារ និងលក្ខខណ្ឌការងារល្អប្រសើរដែលផ្តល់ដោយសហគ្រាសធុនតូចនិងមធ្យម។ទស្សនកិច្ចនេះមានរយៈពេល២ថ្ងៃ ចាប់ពីថ្ងៃទី៤-៦ ខែមីនា ឆ្នាំ២០២៦ ដោយក្នុងនោះលោកជំទាវអនុរដ្ឋលេខាធិការ ប្រតិភូតំណាងក្រសួង និងដៃគូអភិវឌ្ឍន៍បានទៅពិនិត្យមើលសហគ្រាសធុនតូចនិងមធ្យមនៅខេត្តបាត់ដំបងចំនួន៣សហគ្រាស (សិប្បកម្មប្រេងខេអេច សិប្បកម្មតាកាឌា សិប្បកម្មធូបូ) និងនៅខេត្តកំពង់ធំចំនួន២សហគ្រាស (សិប្បកម្មកែច្នៃត្រី សោភ័ណសុខម៉េង និងសិប្បកម្មសណ្តែកសៀងលឹមស្រេង)។តាមរយៈទស្សនកិច្ចនេះដែរ ប្រតិភូតំណាងក្រសួង ដៃគូអភិវឌ្ឍន៍ និងម្ចាស់សហគ្រាសបានពិភាក្សាអំពីសកម្មភាពដែលកម្មវិធី DEY III បានផ្តល់ឱកាសដល់ម្ចាស់សហគ្រាសឱ្យទទួលបានការបណ្តុះបណ្តាលពង្រឹងសហគ្រិនភាព ដូចជា ការប្រើប្រាស់ធនធានប្រកបដោយប្រសិទ្ធភាព ការពង្រឹងស្តង់ដាសុវត្ថិភាពចំណីអាហារនិងផលិតផល ការអនុវត្តប្រកបដោយអនាម័យខ្ពស់ ដែលបានជួយពង្រឹងសមត្ថភាពផលិតកម្ម គុណភាពផលិតផល និងការទទួលស្គាល់ខ្ពស់លើទីផ្សារ។ គួរកត់សម្គាល់ថា សហគ្រាសធន់តូចនិងមធ្យមទាំងនោះក៏បានបង្កើតឱកាសការងារដល់ប្រជាជនមូលដ្ឋាន ជាពិសេសដល់ស្ត្រី យុវជន និងអតីតពលករត្រឡប់មកពីប្រទេសថៃផងដែរ។ជាមួយគ្នានេះ ម្ចាស់សហគ្រាសធុនតូចនិងមធ្យមដែលជាអ្នកទទួលផលពីកម្មវិធី DEY III បានសម្តែងការពេញចិត្ត និងអរគុណដល់បណ្តាក្រសួង ដៃគូអភិវឌ្ឍន៍ និងស្ថាប័នពាក់ព័ន្ធទាំងអស់ដែលបានខិតខំប្រឹងប្រែងអនុវត្តកម្មវិធី DEY III ជួយគាំទ្រដល់សហគ្រាសរបស់ពួកគាត់ឱ្យមានឱកាសរីកលូតលាស់ រួមចំណែកដល់ការបង្កើតការងារក្នុងស្រុក និងជាផ្នែកមួយនៃកម្លាំងសេដ្ឋកិច្ចនៅកម្ពុជា។ដោយមើលឃើញពីសារៈសំខាន់ក្នុងការបង្កើតឱកាសការងារនេះហើយ ទើបលោកជំទាវ បានជំរុញលើកទឹកចិត្តដល់តំណាងក្រសួង និងដៃគូអភិវឌ្ឍន៍នៃកម្មវិធី DEY III តំណាងមន្ទីរពាក់ព័ន្ធក្នុងតំបន់ សូមបន្តខិតខំជួយគាំទ្រជ្រោមជ្រែងដល់សហគ្រាសធុនតូចនិងមធ្យមបន្ថែមទៀត ដែលជាគោលដៅមួយនៃកម្មវិធី DEY III ដើម្បីគាំទ្រដល់ការបង្កើតការងារក្នុងស្រុក និងលើកកម្ពស់លក្ខខណ្ឌការងារល្អប្រសើរនៅកម្ពុជា៕

(តេអេរ៉ង់)៖ គណៈកម្មការអ្នកជំនាញបានជ្រើសរើសលោក Mojtaba Khamenei ដែលជាកូនប្រុសរបស់អតីតមេដឹកនាំកំពូល Ali Khamenei ជាមេដឹកនាំកំពូលបន្ទាប់របស់ប្រទេសអ៊ីរ៉ង់។ លោក ម៉ូជតាបា ខាមេណៃ ត្រូវបានតែងតាំង និងក្លាយជាមេដឹកនាំទីបី នៅក្នុងប្រព័ន្ធពិសិដ្ឋនៃសាធារណរដ្ឋអ៊ីស្លាមអ៊ីរ៉ង់ ដោយផ្អែកលើការបោះឆ្នោតសម្រេចរបស់តំណាងដ៏ខ្ពង់ខ្ពស់នៃសភាអ្នកជំនាញ។ សភាអ្នកជំនាញអ៊ីរ៉ង់បានប្រកាសនៅល្ងាចថ្ងៃទី ៨ ខែមីនាថា ខ្លួនមិនស្ទាក់ស្ទើរសូម្បីតែមួយនាទី ក្នុងដំណើរការជ្រើសរើសមេដឹកនាំថ្មីនោះទេ ទោះបីជាមានការឈ្លានពានយ៉ាងឃោរឃៅពីសហរដ្ឋអាមេរិក និងអ៊ីស្រាអែលក៏ដោយ។ ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ថា មេបញ្ជាការកងកម្លាំងប្រដាប់អាវុធបានស្បថ ភក្ដីភាពចំពោះលោក Mojtaba Khamenei។ កងកម្លាំងនេះបាននិយាយថា "កងឆ្មាំបដិវត្តន៍អ៊ីស្លាម (IRGC) បានត្រៀមខ្លួនរួចជាស្រេចដើម្បីគោរពប្រតិបត្តិ និងលះបង់យ៉ាងពេញលេញដើម្បីអនុវត្តបទបញ្ជាដ៏ពិសិដ្ឋ របស់អ្នកការពារច្បាប់អ៊ីស្លាមបច្ចុប្បន្ន គឺព្រះអង្គ Mojtaba Khamenei"។គួររំលឹកផងដែរថា មេដឹកនាំកំពូលគឺជាអាជ្ញាធរនយោបាយ និងសាសនាខ្ពស់បំផុតនៅក្នុងប្រទេសអ៊ីរ៉ង់ ដោយកាន់អំណាចចុង ក្រោយលើកិច្ចការជាតិ។ លោក Ali Khamenei បានកាន់តំណែងនេះចាប់ពីឆ្នាំ 1989 រហូតដល់លោកទទួលមរណភាពនៅក្នុងការវាយប្រហារតាមអាកាសលើកដំបូងរវាងសហរដ្ឋអាមេរិក និងអ៊ីស្រាអែលនៅថ្ងៃទី 28 ខែកុម្ភៈ។ ចំណែក លោក Mojtaba Khamenei មានឥទ្ធិពលយ៉ាងខ្លាំងនៅក្នុងប្រទេសអ៊ីរ៉ង់ ក៏ដូចជាមានទំនាក់ទំនងជិតស្និទ្ធ ជាមួយកងឆ្មាំបដិវត្តន៍អ៊ីស្លាម (IRGC) និងកងជីវពលស្ម័គ្រចិត្ត Basij។ លោកត្រូវបានគេចាត់ទុកថាជាអ្នកអភិរក្សនិយម ហើយការតែងតាំងរបស់លោកបង្ហាញថា ក្រុមជ្រុលនិយមនៅតែបន្តកាន់អំណាចកំពូលនៅក្នុងប្រទេសអ៊ីរ៉ង់។

(ភ្នំពេញ)៖ បន្ទាប់ពីបានអញ្ជើញចូលរួមក្នុងទិវាអបអរសាទរខួបលើកទី១១៥ នៃទិវាអន្តរជាតិនារី ៨មីនា កាលពីព្រឹកមិញ ដែលរៀបចំដោយក្រុមប្រឹក្សាសហជីពជាតិកម្ពុជា (CCNU) រួចមក នារសៀលថ្ងៃអាទិត្យ ទី៨ ខែមីនា ឆ្នាំ២០២៦នេះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានបន្តអញ្ជើញចូលរួមក្នុងពិធីអបអរសាទរខួបលើកទី១១៥ នៃទិវាអន្តរជាតិនារី ៨មីនា ដែលរៀបចំឡើងដោយសភាសម្ព័ន្ធសហជីពជាតិកម្ពុជា (NACC) ក្រោមប្រធានបទ «យើងរួមគ្នាជំរុញសមភាពយេនឌ័រ ក្នុងវិស័យការងារ» នៅទីស្នាក់ការកណ្ដាល។ ពិធីនេះមានការអញ្ជើញចូលរួមពីថ្នាក់ដឹកនាំ និងសមាជិកមកពីសហភាពសហជីព សហព័ន្ធសហជីព សហជីពមូលដ្ឋាន និងសមាគមចំណុះឱ្យ NACC ប្រមាណជាង ៣០០នាក់ រួមទាំងមានវត្តមានថ្នាក់ដឹកនាំក្រសួងការងារ និងបណ្តុះបណ្តាលវិជ្ជាជីវៈ តំណាងសមាគម វាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរកម្ពុជា (TAFTAC) និងតំណាងមជ្ឈមណ្ឌលសាមគ្គីភាព (ACILS) ផងដែរ។ថ្លែងក្នុងពិធីដ៏រីករាយប្រកបដោយស្មារតីសាមគ្គីភាពនេះ ឯកឧត្តមរដ្ឋមន្រ្តីបានលើកឡើងថា កម្មការិនីនៅតាមសហគ្រាស​ ក្រុមហ៊ុន​ រោងចក្រ​ កំពុងដើរតួនាទីយ៉ាងសំខាន់ក្នុងការលើកស្ទួយសេដ្ឋកិច្ចគ្រួសារ និងជំរុញកំណើនសេដ្ឋកិច្ចជាតិ តាមរយៈការចូលរួមផលិតផលិតផលសម្រាប់នាំចេញទៅទីផ្សារអន្តរជាតិ ទន្ទឹមនឹងការបំពេញតួនាទីដ៏មមាញឹក នៅក្នុងគ្រួសារ។ ស្របពេលជាមួយគ្នានេះ លក្ខខណ្ឌការងារ សុវត្ថិភាពនិងសុខភាពការងារ និងជាពិសេសសមភាពយេនឌ័រនៅកន្លែងការងារ ត្រូវបានយកចិត្តទុកដាក់ និងលើកកម្ពស់ជាបន្តបន្ទាប់។កម្មការិនីក្នុងវិស័យកាត់ដេរ សម្លៀកបំពាក់ ផលិតស្បែកជើង កាបូប និងផលិតផលិតផលធ្វើដំណើរ បានរួមចំណែកយ៉ាងសំខាន់ក្នុងការបង្កើតចំណូលសម្រាប់គ្រួសារ និងជួយលើកកម្ពស់ជីវភាពរស់នៅ រួមចំណែកក្នុងការបង្កើនទំហំនាំចេញរបស់ប្រទេសកម្ពុជាផងដែរ ដែលជាចន្ទល់ដ៏សំខាន់សម្រាប់សេដ្ឋកិច្ចជាតិ ដោយបានបង្កើតការងារជាច្រើន និងចូលរួមចំណែកប្រមាណជា ៥៥% នៃការនាំចេញសរុប។ ជាមួយគ្នានេះ វិស័យនេះក៏បានផ្តល់ឱកាសការងារយ៉ាងច្រើនដល់អតីតពលករខ្មែរមកពីថៃផងដែរ។ឯកឧត្តមរដ្ឋមន្រ្តី ក៏បានគូសបញ្ជាក់ផងដែរថា ប្រធានបទដ៏មានសារៈសំខាន់នេះស្របជាមួយអង្គការអន្តរជាតិខាងការងារ (ILO) ដែលតែងតែផ្តល់គុណតម្លៃដល់ស្ត្រីកម្ពុជា ចំពោះការចូលរួមសកម្មភាពក្នុងការសម្រេចចិត្ត និងជំរុញឱ្យមានសន្តិភាព ភាពធន់ និងសុវត្ថិភាពក្នុងសង្គម។ ពិធីដ៏មានអត្ថន័យនេះ មិនមែនគ្រាន់តែជានិមិត្តរូបនោះទេ តែជាការជួបជុំដើម្បីសម្ដែងនូវការដឹងគុណយ៉ាងជ្រាលជ្រៅចំពោះការចូលរួម និងតួនាទីដ៏សំខាន់មិនអាចខ្វះបានរបស់ស្ត្រី ក្នុងការរួមចំណែកកសាងសេដ្ឋកិច្ច និងអភិវឌ្ឍជាតិមាតុភូមិឱ្យមានភាពរីកចម្រើនដូចបច្ចុប្បន្ន។ទន្ទឹមនឹងនេះ ឯកឧត្តម ហេង សួរ បានមានប្រសាសន៍សង្កត់ធ្ងន់ថា ក្រសួងបាននិងកំពុងបន្តយកចិត្តទុកដាក់លើកកម្ពស់លក្ខខណ្ឌការងារ សុវត្ថិភាពនិងសុខភាពការងារ និងផ្តោតសំខាន់លើការលើកកម្ពស់សមភាពយេនឌ័រ តាមរយៈការអនុវត្តយ៉ាងហ្មត់ចត់នូវច្បាប់ និងលិខិតបទដ្ឋានគតិយុត្តជាតិ-អន្តរជាតិពាក់ព័ន្ធនានា ដែលកម្មករនិយោជិតជាស្ត្រី តែងទទួលបានការយកចិត្តទុកដាក់ខ្ពស់។ឯកឧត្តមរដ្ឋមន្ត្រីបានជំរុញឱ្យសហជីព និងនិយោជក ត្រូវបង្កើនកិច្ចសហការគ្នាក្នុងការដោះស្រាយវិវាទការងារដោយចៀសវាងដាច់ខាតនូវការជ្រើសរើសយក «ការបិទផ្លូវថ្នល់ជាចំណាប់ខ្មាំង» ដែលទង្វើនេះបង្កផលប៉ះពាល់យ៉ាងធ្ងន់ធ្ងរដល់ប្រជាពលរដ្ឋផ្សេងទៀត។យោងតាមរបាយការណ៍របស់ លោក គឹម ចាន់សំណាង ប្រធាន NACC ក្នុងឆ្នាំ២០២៥ កន្លងទៅ NACC បានចូលរួមយ៉ាងសកម្មក្នុងការសម្របសម្រួលដោះស្រាយវិវាទការងារ, ចុះចងក្រងបង្កើតសហជីព, ផ្សព្វផ្សាយច្បាប់ និងបទបញ្ញត្តិនានា, ចូលរួមក្នុងយន្តការត្រីភាគី ពិសេសជួយអន្តរាគមន៍ដោះស្រាយបញ្ហាជូនពលករខ្មែរ។ជាទីបញ្ចប់ ឯកឧត្តមរដ្ឋមន្ត្រីបានសម្តែងនូវការកោតសរសើរ និងវាយតម្លៃខ្ពស់ចំពោះលទ្ធផលការងាររបស់ NACC ដែលបានរួមចំណែកយ៉ាងធំធេងដល់ការអភិវឌ្ឍវិស័យការងារ សន្តិសុខសង្គម និងការបណ្តុះបណ្តាលវិជ្ជាជីវៈ។ ឯកឧត្តមបានផ្តល់អនុសាសន៍ឱ្យ NACC បន្តយកចិត្តទុកដាក់បន្ថែមទៀត លើការកសាងជំនឿទុកចិត្តដើម្បីទាក់ទាញសមាជិកឱ្យចូលរួមកាន់តែច្រើន តាមរយៈការបង្ហាញពីលទ្ធផលការងារប្រកបដោយតម្លាភាព និងគណនេយ្យភាពដែលជាដៃគូមិនអាចខ្វះបានក្នុងយន្តការកិច្ចសន្ទនាសង្គមជាមួយនិយោជក និងក្រសួង ដើម្បីដោះស្រាយបញ្ហានានា ព្រមទាំងជួយបង្កើនការជឿជាក់ពីសំណាក់អ្នកវិនិយោគ ក្នុងការបន្តពង្រីកការវិនិយោគ និងបង្កើតឱកាសការងារសមរម្យជូនដល់បងប្អូនកម្មករនិយោជិតបន្ថែមទៀត។ ឯកឧត្តម ក៏បានជំរុញលើកទឹកចិត្តឱ្យ NACC បន្តរៀបចំកម្មវិធីជួបជុំអបអរសាទរបែបនេះឱ្យបានញឹកញាប់ ដើម្បីពង្រឹងចំណងសាមគ្គីភាព និងទំនាក់ទំនងល្អរវាងគ្នានឹងគ្នា។

(ភ្នំពេញ)៖ ថ្លែងក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងសន្និបាតផ្សព្វផ្សាយរបាយការណ៍បូកសរុបលទ្ធផលការងារឆ្នាំ២០២៥ និងលើកទិសដៅអនុវត្តឆ្នាំ២០២៦ របស់ក្រុមប្រឹក្សាសហជីពជាតិកម្ពុជា (CCNU) និងពិធីអបអរសាទរខួបលើកទី១១៥ នៃទិវាអន្តរជាតិនារី ៨មីនា ឆ្នាំ២០២៦ ក្រោមប្រធានបទ “សន្តិភាព និងសន្តិសុខសម្រាប់ស្រ្តី និងគ្រួសារ” ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា កម្មការិនីគួរតែត្រូវបានចាត់ទុកជា “វីរនារី” ពីព្រោះពួកគាត់ពិតជាបានលះបង់ជាច្រើន រាប់ទាំងការជួយការងារផ្ទះ មើលថែរក្សាកូន ឪពុកម្តាយ រកចំណូលសម្រាប់ផ្គត់ផ្គង់គ្រួសារដើម្បីលើកកម្ពស់ជីវភាព ជួយដល់សេដ្ឋកិច្ចគ្រួសារ និងសេដ្ឋកិច្ចជាតិ។ ហេតុនេះ ការលើកកម្ពស់សិទ្ធិសេរីភាព លក្ខខណ្ឌការងារ និងសុវត្ថិភាពការងារ សម្រាប់កម្មករនិយោជិត ជាពិសេសស្រ្តីគឺជាការងារចាំបាច់ និងអាទិភាពមួយ។ឯកឧត្តមរដ្ឋមន្រ្តីបានគូសបញ្ជាក់បែបនេះ ដើម្បីសម្តែងនូវការកោតសរសើរ និងវាយតម្លៃខ្ពស់ចំពោះបងប្អូនកម្មការិនីទាំងអស់ ជាពិសេសកម្មការិនីនៅក្នុងវិស័យកាត់ដេរ សម្លៀកបំពាក់ ផលិតស្បែកជើង និងផលិតផលធ្វើដំណើរនិងកាបូប ដែលមានអត្រាកម្មករនិយោជិតជាស្រ្តីប្រមាណជាង ៨០% ក្នុងពិធីសំណេះសំណាលទៅកាន់អ្នកចូលរួមជិត៤០០នាក់ ដែលមានការចូលរួមពីថ្នាក់ដឹកនាំក្រសួងការងារ និងបណ្ដុះបណ្ដាលវិជ្ជាជីវៈ តំណាងអង្គការ អាជ្ញាធរមូលដ្ឋាន ថ្នាក់សហភាពសហជីព សហព័ន្ធសហជីព និងសហជីពមូលដ្ឋានចំណុះឱ្យ CCNU នៅទីស្នាក់ការ CCNU នាថ្ងៃទី៨ ខែមីនា ឆ្នាំ២០២៦។ ពិធីនេះគឺមិនមែនគ្រាន់តែដើម្បីជានិមិត្តរូបនោះទេ តែជាការអបអរសារទរនឹងសមិទ្ធផលឆ្នាំចាស់ និងការតម្រង់ទិសសម្រាប់បេសកកម្មឆ្នាំថ្មី២០២៦ របស់ CCNU ជាពិសេសគឺជាការជួបជុំ ដើម្បីរឹតចំណងសាមគ្គីភាព បង្កើនភាពស្និទ្ធស្នាល សម្ដែងនូវការដឹងគុណយ៉ាងជ្រាលជ្រៅចំពោះការចូលរួម និងផ្សារភ្ជាប់គុណតម្លៃរបស់ស្ត្រីកម្ពុជាក្នុងសហជីព ការថែរក្សាសុខសន្តិភាព និងការកសាងមាតុភូមិឱ្យរីកចម្រើនដូចបច្ចុប្បន្ន។នាឱកាសនោះ ឯកឧត្តមរដ្ឋមន្រ្តីក៏បានកោតសរសើរ និងវាយតម្លៃខ្ពស់ចំពោះលទ្ធផលសកម្មភាពការងារដែល CCNU ខិតខំសម្រេចបានក្នុងឆ្នាំ២០២៥ និងទិសដៅឆ្នាំ២០២៦ ដែលបានរួមចំណែកធ្វើឱ្យប្រសើរឡើងនូវលក្ខខណ្ឌការងារ សិទ្ធិសេរីភាពអង្គការវិជ្ជាជីវ: និងសុខដុមនីយកម្មទំនាក់ទំនងវិជ្ជាជីវៈ ដែលជាស្នូលនៃការធានាដល់ការរក្សាបាននូវការងារ និងការបន្តថែរក្សាបាននិងបង្កើនការទាក់ទាញវិនិយោគ ប្រសិនបើមិនមានទំនាក់ទំនងល្អរវាងកម្មករនិយោជិត និងនិយោជកទេ សន្តិភាពនៅកន្លែងធ្វើការក៏មិនអាចកើតមានដែរ។ ក្រសួងតែងតែខិតខំលើកកម្ពស់យន្តការត្រីភាគី ដើម្បីជំរុញកិច្ចសន្ទនាសង្គម ដែលជាមធ្យោបាយដ៏ចាំបាច់មិនអាចខ្វះបានសម្រាប់ដោះស្រាយបញ្ហាជូនកម្មករនិយោជិត និងនិយោជក។ជាមួយនឹងការអបអរសាទរ និងវាយតម្លៃខ្ពស់ចំពោះវឌ្ឍនភាពការងាររបស់ CCNU ឯកឧត្តមរដ្ឋមន្រ្តីបានលើកទឹកចិត្តដល់ថ្នាក់ដឹកនាំ CCNU អង្គការវិជ្ជាជីវៈផ្សេងទៀត និងកម្មករនិយោជិតទាំងអស់ឱ្យបង្កើនកិច្ចសហការគ្នាក្នុងការរាយការណ៍ពីការរំលោភបំពានសិទ្ធិសេរីភាព លក្ខខណ្ឌការងារ ផលប្រយោជន៍ ឬភាពមិនប្រក្រតីនានា ទៅដល់ក្រុមអធិការកិច្ច ឬមន្រ្តីផ្សះផ្សារដោះស្រាយវិវាទការងារ របស់ក្រសួងការងារដើម្បីអន្តរាគមន៍ជាបន្ទាន់ ព្រោះថាមានតែបងប្អូននៅមូលដ្ឋានទេដែលជាភ្នែក ច្រមុះ ត្រចៀករបស់ក្រសួង។បន្ថែមពីនេះ ក៏ត្រូវបង្កើនការជ្រើសរើសយកយន្តការដោះស្រាយបញ្ហានៅកន្លែងការងារ រវាងនិយោជក និងកម្មករនិយោជិត តាមរយៈការចាប់ដៃគូជាមួយរាជរដ្ឋាភិបាល ក្រសួងការងារ ក៏ដូចជាយន្តការកិច្ចសន្ទនាសង្គម និងត្រីភាគីរបស់ ILO ដែលវាប្រសើរជាងការជ្រើសរើសយកការ “បិទផ្លូវ” ដែលមិនអាចដោះស្រាយបញ្ហាបាន តែបង្កការប៉ះពាល់ដល់សិទ្ធិអ្នកដទៃថែមទៀតផង៕

(ស្ទឹងត្រែង)៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ រួមជាមួយឯកឧត្តម សរ សុពុត្រា អភិបាលនៃគណៈអភិបាលខេត្តស្ទឹងត្រែង អញ្ជើញជាអធិបតីក្នុងព្រឹត្តិការណ៍ជិះស៊ីក្លូនៅក្រុងស្ទឹងត្រែង ខេត្តស្ទឹងត្រែង ក្រោមពាក្យស្លោក៖ ផ្តល់ក្តីសង្ឃឹមដល់ស៊ីក្លូកម្ពុជា ដើម្បីចូលរួមអបអរសាទរទិវាជាតិទីក្រុងស្អាតឆ្នាំ២០២៦ និងដើម្បីចូលរួមព្រឹត្តិការណ៍ទេសចរណ៍ដែលរៀបចំឡើងដោយរដ្ឋបាលខេត្តស្ទឹងត្រែង និងមន្ទីរទេសចរណ៍ខេត្តស្ទឹងត្រែងរួមគ្នា ក្រោមប្រធានបទ៖ «ស្ទឹងត្រែងលើសពីទន្លេ, លើសពីធម្មតា» នេះសបញ្ជាក់ឱ្យឃើញពីខេត្តស្ទឹងត្រែងមានសក្តានុពលទេសចរណ៍ដ៏ទាក់ទាញ ប្លែក និងសម្បូរបែប ព្រមទាំងដើម្បីជួយគាំទ្រដល់សមាគមស៊ីក្លូកម្ពុជាទៀតផង។ជាមួយគ្នានេះ ឯកឧត្តមរដ្ឋមន្ត្រី បានសង្កត់ធ្ងន់ថា តាមរយៈក្រសួងទេសចរណ៍, មន្ទីរទេសចរណ៍ខេត្តស្ទឹងត្រែង, មន្ទីរទេសចរណ៍រាជធានីភ្នំពេញ និងខេត្តទាំង៤ ដោយមានកិច្ចសហការជាមួយរដ្ឋបាលរាជធានីភ្នំពេញ រដ្ឋបាលខេត្តស្ទឹងត្រែង និង រដ្ឋបាលខេត្តទាំង៤ផ្សេងទៀត (ខេត្តកណ្តាល, ខេត្តកំពង់ចាម, ខេត្តត្បូងឃ្មុំ,ខេត្តក្រចេះ) រួមជាមួយសមាគមស៊ីក្លូកម្ពុជា បានដឹកនាំដំណើរព្យុហយាត្រាជិះស៊ីក្លូពីភ្នំពេញ មកកាន់ខេត្តស្ទឹងត្រែង ក្នុងចម្ងាយជាង ៣៧០គីឡូម៉ែត្រ ដែលប្រើប្រាស់រយៈពេលចំនួន ៦ថ្ងៃ (ពីថ្ងៃទី១ ដល់ថ្ងៃទី៦ ខែមីនា)។ឯកឧត្តមរដ្ឋមន្ត្រី បានសង្កត់ធ្ងន់បន្ថែមថា សកម្មភាពដែលមានភាពប្រទាក់ក្រឡាគ្នាខាងលើនេះ គឺជាយុទ្ធសាស្ត្រច្នៃប្រឌិតមួយ ដែលបង្ហាញពីការអភិរក្សមរតកវប្បធម៌ស៊ីក្លូកម្ពុជា និងការផ្សារភ្ជាប់ជាមួយបងប្អូនសមាជិកស៊ីក្លូកម្ពុជា គឺជាអ្នកផ្តល់សេវាកម្មទេសចរណ៍ជួរមុខដ៏គួរឱ្យគោរព។ នេះជាការរំលឹកថាស៊ីក្លូ មានលក្ខណៈពិសេសលើសពីមធ្យោបាយដឹកជញ្ជូនធម្មតា, ស៊ីក្លូ គឺជាអត្តសញ្ញាណមួយរបស់ខ្មែរ, គឺជានិមិត្តសញ្ញានៃភាពអត់ធ្មត់ កម្លាំង និងក្តីសង្ឃឹម។ ជាការពិតណាស់ ឯកឧត្តមរដ្ឋមន្ត្រី ក៏បានបន្តថា ការធ្វើដំណើរដ៏វែងឆ្ងាយនេះ បានក្លាយជាសារមួយដ៏មានអត្ថន័យដល់បងប្អូនប្រជាពលរដ្ឋគ្រប់ទិសទី ថា វិស័យទេសចរណ៍ គឺជាការរួមចំណែករបស់មនុស្សគ្រប់រូប ហើយសាមគ្គីភាពរបស់យើងគឺជាកម្លាំងចលករ ដែលធ្វើឱ្យវិស័យទេសចរណ៍អាចឈានទៅមុខបានយ៉ាងស្វាហាប់។ខេត្តស្ទឹងត្រែង ព្រឹកថ្ងៃទី៧ ខែមីនា ឆ្នាំ២០២៦

(សិង្ហបុរី)៖ សភាសិង្ហបុរី បានអនុម័តច្បាប់គ្រប់គ្រងថ្នាំជក់ និងឧបករណ៍បំពងផ្សែងថ្មី ដោយបង្កើនការពិន័យយ៉ាងខ្លាំងចំពោះបទល្មើសទាក់ទងនឹងបារីអេឡិចត្រូនិច។ច្បាប់នេះ ដែលត្រូវបានធ្វើវិសោធនកម្មពីច្បាប់ថ្នាំជក់ (ការគ្រប់គ្រងការផ្សាយពាណិជ្ជកម្ម និងការលក់) ពីមុន និងច្បាប់ពាក់ព័ន្ធផ្សេងទៀត បានណែនាំវិធានការអនុវត្តដ៏តឹងរ៉ឹងប្រឆាំង នឹងការជក់បារីអេឡិចត្រូនិច និងផលិតផលពាក់ព័ន្ធនាថ្ងៃទី៦ ខែមីនាកន្លងទៅ។ ក្រោមបទប្បញ្ញត្តិថ្មី មនុស្សពេញវ័យដែលពាក់ព័ន្ធនឹងយុវជន ឬបុគ្គលងាយរងគ្រោះក្នុងការរត់ពន្ធ ឬផ្គត់ផ្គង់ឧបករណ៍ជក់បារីអេឡិចត្រូនិចដែលជារឿយៗលាយជាមួយថ្នាំស្ពឹកផ្ទុក etomidate អាចប្រឈមមុខនឹងការជាប់ពន្ធនាគាររហូតដល់ 20 ឆ្នាំ។ កន្លែងកម្សាន្តដូចជាក្លឹប និងបារត្រូវបានតម្រូវឱ្យរារាំងអតិថិជនពីការប្រើប្រាស់បារីអេឡិចត្រូនិច និងសុំឱ្យពួកគេបោះចោលឧបករណ៍របស់ពួកគេ។ គ្រឹះស្ថានទាំងនេះក៏មានសិទ្ធិអំណាច ក្នុងការបដិសេធការចូល ឬដកអតិថិជនដែលមិនគោរពតាមផងដែរ។ការពិន័យសម្រាប់បទល្មើសទាក់ទងនឹងការជក់បារីអេឡិចត្រូនិចត្រូវបានកើនឡើងយ៉ាងខ្លាំង។ ការពិន័យសម្រាប់អ្នកប្រើប្រាស់បានកើនឡើងប្រាំដង សម្រាប់អ្នកលក់កើនឡើង ២០ ដង និងសម្រាប់អ្នករត់ពន្ធកើនឡើង ៣០ ដង។ ជាលទ្ធផល អ្នកប្រើប្រាស់អាចប្រឈមមុខ នឹងការពិន័យរហូតដល់ ១០,០០០ ដុល្លារសិង្ហបុរី (ជាង ៧,៨០០ ដុល្លារអាមេរិក) ខណៈដែលអ្នកលក់អាចត្រូវពិន័យរហូតដល់ ២០០,០០០ ដុល្លារសិង្ហបុរី និងប្រឈមមុខនឹងការជាប់ពន្ធនាគាររហូតដល់ប្រាំមួយឆ្នាំ។ អ្នករត់ពន្ធអាចត្រូវពិន័យរហូតដល់ ៣០០,០០០ ដុល្លារសិង្ហបុរី និងជាប់ពន្ធនាគាររហូតដល់ប្រាំបួនឆ្នាំ។

(ប៉េកាំង)៖ ប្រទេសចិនត្រូវបានគេរំពឹងថានឹងចំណាយជិត ២៨៧ ពាន់លានដុល្លារ លើវិស័យការពារជាតិនៅឆ្នាំនេះ ដែលជាការកើនឡើង ៧% បើប្រៀបធៀបទៅនឹងឆ្នាំ ២០២៥ និងប្រហែលមួយភាគបីនៃថវិកាការពារជាតិ របស់សហរដ្ឋអាមេរិក។ យោងតាមរបាយការណ៍មួយដែលចេញផ្សាយនៅក្នុងពិធីបើកសម័យប្រជុំទាំងពីរនៅថ្ងៃនេះ ប្រទេសចិនមានគម្រោងចំណាយថវិកាការពារជាតិជាង ១,៩ ពាន់ពាន់លានយ័ន (២៧៦,៨ ពាន់លានដុល្លារអាមេរិក) នៅឆ្នាំនេះ ដែលជាការកើនឡើង ៧% ពី ១,៨ ពាន់ពាន់លានយ័ន (២៤៦ ពាន់លានដុល្លារអាមេរិក) កាលពីឆ្នាំមុន ។ នេះបើយោងតាមសារព័ត៌មានចិន Xinhua។ យោងតាមអ្នកជំនាញ ថវិកានេះនឹងត្រូវប្រើប្រាស់ដើម្បីបង្កើនប្រាក់ខែទាហាន រៀបចំការបណ្តុះបណ្តាល និងលំហាត់នៅជុំវិញតៃវ៉ាន់ បង្កើនសមត្ថភាពសង្គ្រាមតាមអ៊ីនធឺណិត ទិញអាវុធ និងឧបករណ៍ទំនើបៗ និងច្រើនទៀត។ ការកើនឡើងនេះបង្ហាញពីកិច្ចខិតខំប្រឹងប្រែងរបស់ប្រទេសចិនក្នុងការបិទគម្លាតជាមួយសហរដ្ឋអាមេរិក ដែលនឹងចំណាយជិត ៩៦២ ពាន់លានដុល្លារលើវិស័យការពារជាតិនៅក្នុងឆ្នាំសារពើពន្ធ ២០២៦។ ការសម្រេចចិត្តនេះក៏ឆ្លុះបញ្ចាំងពីគោលនយោបាយនៃការរក្សាស្ថិរភាព ខណៈពេលដែលទីក្រុងប៉េកាំងកំពុងបន្តយុទ្ធនាការប្រឆាំងអំពើពុករលួយយ៉ាងទូលំទូលាយនៅក្នុងជួរយោធា។ «ប្រទេសចិនបន្តគោលនយោបាយការបរទេសឯករាជ្យ និងស្វយ័ត។ ទោះជាយ៉ាងណាក៏ដោយ បើគ្មានសមត្ថភាពយោធា និងបច្ចេកវិទ្យាខ្ពស់ទេ ជំហរការទូតរបស់ប្រទេសចិននឹងត្រូវបានដាក់សម្ពាធ ឬសូម្បីតែគ្របដណ្ដប់ដោយប្រទេសមួយចំនួន រួមទាំងសហរដ្ឋអាមេរិកផងដែរ» នេះបើតាមសម្ដីរបស់ Song Zhongping អ្នកជំនាញយោធាដែលតែងតែធ្វើអត្ថាធិប្បាយលើបញ្ហាការពារជាតិនៅក្នុងប្រព័ន្ធផ្សព្វផ្សាយរដ្ឋចិន៕    

(ភ្នំពេញ)៖ លោកអ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា បានលើកឡើងអំពីសមិទ្ធផលធំៗ៥ ដែលសមាគមសម្រេចបាន នេះឆ្លុះបញ្ចាំងពីការបន្តកើនឡើងនៃទំនុកចិត្ត និងបេសកកម្មរបស់សមាគម និងបានដាក់ចេញយុទ្ធសាស្ត្រស្នូលចំនួន៩ចំនុចសម្រាប់ឆ្នាំ២០២៦។ ការថ្លែងបែបនេះបានធ្វើឡើងក្នុងពិធីស្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់សមាគមអ្នកអភិវឌ្ឍន៍លំនៅឋានកម្ពុជា ក្រោមអធិបតី លោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី៦ ខែមីនា ឆ្នាំ២០២៦ ។នាឱកាសនោះ លោកអ្នកឧកញ៉ា បានមានប្រសាសន៍ថា ក្នុងបរិយាកាសនេះ សមាគមអ្នកអភិវឌ្ឍន៍លំនៅឋានកម្ពុជា បានខិតខំប្រឹងប្រែងដោយភាពហ្មត់ចត់ និងការប្តេជ្ញាចិត្តខ្ពស់ ដើម្បីពង្រឹងការសម្របសម្រួលក្នុងចំណោមសមាជិក-សមាជិកា លើកកម្ពស់ការអនុវត្តតាមបទប្បញ្ញត្តិនានា គាំទ្រដល់កិច្ចសន្ទនាគោលនយោបាយប្រកបដោយការស្ថាបនា ជាមួយក្រសួងពាក់ព័ន្ធ និងធនាគារជាតិនៃកម្ពុជា ព្រមទាំងតស៊ូមតិដើម្បីទទួលបានវិធានការគាំទ្រជាក់ ស្តែងសម្រាប់អ្នកអភិវឌ្ឍន៍ និងអ្នកទិញលំនៅឋាន។លោកអ្នកឧកញ៉ា បន្តថា សមាជិកភាពរបស់យើងបច្ចុប្បន្នរក្សាបាននូវចំនួនរហូតដល់ ៥៥ក្រុមហ៊ុន ដែលឆ្លុះបញ្ចាំងពីការបន្តកើនឡើងនៃទំនុកចិត្តលើតួនាទី និងបេសកកម្មរបស់សមាគម។ លោកអ្នកឧកញ៉ា លី ហួរ បានថ្លែងថា ក្នុងឆ្នាំ២០២៥ សមាគមអ្នកអភិវឌ្ឍន៍លំនៅឋានកម្ពុជា សម្រេចបាននូវសមិទ្ធផលសំខាន់ៗ ដូចខាងក្រោម៖ទី១៖ រក្សាបាននូវសមាជិកភាពរហូតដល់ ៥៥ក្រុមហ៊ុន ដែលឆ្លុះបញ្ចាំងពីការកើនឡើងនៃទំនុកចិត្តលើសមាគមក្នុងការជួយពង្រឹងកេរ្តិ៍ឈ្មោះ និងឥទ្ធិពលរបស់សមាគមក្នុងវិស័យអចលនទ្រព្យនៅកម្ពុជាទី២៖ បានចូលរួមយ៉ាងសកម្មជាមួយធនាគារជាតិនៃកម្ពុជា និងក្រសួងពាក់ព័ន្ធ ដើម្បីតស៊ូមតិ និងគាំទ្រដល់កញ្ចប់វិធានការគាំទ្រ ៨ចំណុចរបស់រាជរដ្ឋាភិបាល ការអនុគ្រោះពន្ធសម្រាប់អចលនទ្រព្យ ដែលមានតម្លៃក្រោម ៧ម៉ឺនដុល្លារអាមេរិក និងការលើកទឹកចិត្តសម្រាប់អ្នកទិញលំនៅឋានដំបូង ដែលមានតម្លៃរហូតដល់ ២១ម៉ឺនដុល្លារអាមេរិកទី៣៖ បានផ្តល់មតិយោបល់ស៊ីជម្រៅលើច្បាប់ និងបទប្បញ្ញត្តិពាក់ព័ន្ធនឹងវិស័យនេះ ដើម្បីធានាឱ្យបាននូវការអនុវត្តលើការអភិវឌ្ឍប្រកបដោយចីរភាព មានសណ្តាប់ធ្នាប់ និងត្រឹមត្រូវតាមច្បាប់ ក្នុងចំណោមសមាជិករបស់យើងទី៤៖ បានរៀបចំកិច្ចប្រជុំចំគោលដៅ ដើម្បីដោះស្រាយបញ្ហាប្រឈមក្នុងវិស័យសំណង់ បញ្ហាពន្ធដារ និងឧបសគ្គនៃការអភិវឌ្ឍនានា ដែលប៉ះពាល់ដល់ក្រុមហ៊ុនសមាជិកទី៥៖ បានបំពេញកាតព្វកិច្ចសង្គម តាមរយៈការបរិច្ចាគសប្បុរសធម៌ជូនមូលនិធិគន្ធបុប្ផា និងការគាំទ្រ ស្មារតីសាមគ្គីជាតិដល់វីរកងទ័ពជួរមុខ និងសហគមន៍ដែលរងផលប៉ះពាល់ជាដើម។ ដើម្បីបន្តពង្រឹងវឌ្ឍនភាព និងដោះស្រាយបញ្ហាប្រឈមក្នុងវិស័យសំណង់ និងអចលនទ្រព្យ សមាគមអ្នកអភិវឌ្ឍន៍លំនៅឋានកម្ពុជា បានដាក់ចេញនូវយុទ្ធសាស្ត្រស្នូលចំនួន ៩ ចំណុច សម្រាប់ អនុវត្តក្នុងឆ្នាំ២០២៦ រួមមាន ៖១. ពង្រឹងកិត្យានុភាព និងតួនាទីរបស់សមាគម៖ បន្តពង្រឹងកិត្យានុភាព និងតួនាទីដ៏សំខាន់របស់ សមាគម ឱ្យកាន់តែមានភាពលេចធ្លោជូនដល់អ្នកវិនិយោគសំណង់ ទាំងក្នុងស្រុក និងអន្តរជាតិ។២. ការអនុវត្តបេសកកម្មជាអាទិភាព៖ បន្តអនុវត្តបេសកកម្មរបស់ខ្លួនជាអាទិភាពចម្បង ប្រកបដោយ ប្រសិទ្ធភាព ដើម្បីសម្រេចបាននូវសមិទ្ធផលថ្មីៗបន្ថែមទៀត ជូនដល់សមាជិក-សមាជិកាទាំងអស់។៣. លើកកម្ពស់ទំនុកចិត្ត និងកិច្ចសហប្រតិបត្តិការ៖ បន្តលើកកម្ពស់ភាពជឿទុកចិត្ត ទំនាក់ទំនង និងកិច្ចសហប្រតិបត្តិការយូរអង្វែង តាមរយៈការរៀបចំកិច្ចប្រជុំពង្រឹងផ្ទៃក្នុង សន្និបាតប្រចាំឆ្នាំ និងការចុះអនុស្សរណៈនៃការយោគយល់គ្នា (MOU) ជាមួយភាគីពាក់ព័ន្ធនានា។៤. ពង្រឹងយន្តការភាពជាដៃគូរវាងរដ្ឋនិងឯកជន៖ បន្តលើកកម្ពស់យន្តការភាពជាដៃគូរវាងរាជរដ្ឋា ភិបាល និងផ្នែកឯកជន ក្នុងគោលបំណងគាំទ្រ និងជំរុញល្បឿននៃការអភិវឌ្ឍវិស័យសំណង់ និងលំនៅឋាននៅកម្ពុជា ឪ្យកាន់តែប្រសើរឡើង ។៥. គាំទ្រគោលនយោបាយលំនៅឋានតម្លៃសមរម្យ៖ ចូលរួមកិច្ចសហប្រតិបត្តិការជាមួយរាជរដ្ឋាភិ បាល ស្របតាមគោលនយោបាយលើកកម្ពស់កម្រិតជីវភាពប្រជាជនដែលមានចំណូលទាប និងមធ្យម តាមរយៈការផ្គត់ផ្គង់លំនៅឋានតម្លៃសមរម្យ នៃគម្រោងអភិវឌ្ឍន៍របស់សមាជិក សមាគម ។៦. ការផ្លាស់ប្តូរបទពិសោធន៍ និងការវិនិយោគ៖ បន្តរៀបចំវេទិកាធុរកិច្ច សិក្ខាសាលា និងដំណើរ ទស្សនកិច្ចទៅក្រៅប្រទេស ជូនដល់សមាជិក-សមាជិកា ដើម្បីស្វែងយល់ពីកាលានុវត្តភាព និន្នាការវិនិយោគ និងនវានុវត្តន៍ថ្មីៗក្នុងដំណើរការអាជីវកម្មនៃវិស័យសំណងនិងលំនៅឋាន។៧. ការអភិវឌ្ឍប្រព័ន្ធបច្ចេកវិជ្ជា និងទិន្នន័យ៖ រៀបចំប្រព័ន្ធបច្ចេកវិជ្ជាព័ត៌មានស្នូលរបស់សមាគម ដោយសហការជាមួយក្រសួងពាក់ព័ន្ធនានា ដើម្បីសិក្សាស្រាវជ្រាវ តាមដាន ចងក្រង និងវិភាគ ស្ថានភាពជាក់ស្តែងនៃវិស័យអចលនទ្រព្យនៅកម្ពុជា ។៨. ការគៀងគរអ្នកវិនិយោគសម្រាប់ចីរភាព៖ ប្រើប្រាស់ឧត្តមភាពនៃសមិទ្ធផលរបស់សមាគម ដើម្បី បន្តគៀងគរអ្នកវិនិយោគ ទាំងក្នុងស្រុក និងអន្តរជាតិ ឱ្យចូលរួមកម្លាំងជាមួយសមាគម ក្នុងគោល ដៅអភិវឌ្ឍវិស័យសំណង់នៅកម្ពុជា ប្រកបដោយចីរភាព។៩. សកម្មភាពសប្បុរសធម៌៖ បន្តចូលរួមសកម្មភាពសប្បុរសធម៌ជួយសង្គមជាតិ ទាំងក្នុងក្របខ័ណ្ឌ សមាគមផ្ទាល់ និងជាមួយរាជរដ្ឋាភិបាល ដើម្បីរួមចំណែកដល់ការអភិវឌ្ឍសង្គមនិងសេដ្ឋកិច្ច កម្ពុជា។

(វ៉ាស៊ីនតោន)៖ ប្រធានាធិបតី Trump បានទាមទារឱ្យអ៊ីរ៉ង់ «ចុះចាញ់ដោយគ្មានលក្ខខណ្ឌ» ខណៈពេលដែលសន្យាថា នឹងជួយកសាងសេដ្ឋកិច្ចរបស់ខ្លួនឡើងវិញ ប្រសិនបើទីក្រុងតេអេរ៉ង់គោរពតាម និងបង្កើតថ្នាក់ដឹកនាំថ្មី។ប្រធានាធិបតីអាមេរិក ដូណាល់ ត្រាំ បានសរសេរនៅលើវេទិកាប្រព័ន្ធផ្សព្វផ្សាយសង្គម Truth Social នៅថ្ងៃទី 6 ខែមីនាថា «នឹងមិនមានកិច្ចព្រមព្រៀងណាមួយជាមួយអ៊ីរ៉ង់ទេ លើកលែងតែការចុះចាញ់ដោយគ្មានលក្ខខណ្ឌរបស់ពួកគេ»។លោក Trump បាននិយាយថា បន្ទាប់ពីអ៊ីរ៉ង់ចុះចាញ់ សហរដ្ឋអាមេរិក និងសម្ព័ន្ធមិត្តរបស់ខ្លួននឹងធ្វើការ ដើម្បីនាំប្រទេសនេះ «ត្រឡប់មកពីគែមនៃការបំផ្លិចបំផ្លាញវិញ ដោយជួយសេដ្ឋកិច្ចអ៊ីរ៉ង់ឱ្យរីកចម្រើន ក្លាយជាល្អប្រសើរ និងរឹងមាំជាងពេលណាៗទាំងអស់»។នេះនឹងអាស្រ័យលើការបង្កើតអ្វីដែលលោកហៅថា «ភាពជាអ្នកដឹកនាំដ៏អស្ចារ្យ និងអាចទទួលយកបាន» នៅក្នុងប្រទេសអ៊ីរ៉ង់។ប្រធានាធិបតី​បាន​បញ្ចប់​សុន្ទរកថា​របស់​លោក​ដោយ​ពាក្យស្លោក​ថ្មី​មួយ​ថា «ធ្វើ​ឲ្យ​អ៊ីរ៉ង់​អស្ចារ្យ​ម្ដង​ទៀត (MIGA)!» ដែល​ជា​បំរែបំរួល​នៃ​ពាក្យស្លោក​ដែល​ធ្លាប់​ឮ «ធ្វើ​ឲ្យ​អាមេរិក​អស្ចារ្យ​ម្ដង​ទៀត» (MAGA)។លោក Trump បានបង្ហោះសារនេះ ខណៈដែលអ៊ីស្រាអែលបន្តទម្លាក់គ្រាប់បែកលើគោលដៅរដ្ឋាភិបាលអ៊ីរ៉ង់នៅក្នុងទីក្រុងតេអេរ៉ង់ និងទីតាំងរបស់ក្រុម Hezbollah ក្នុងទីក្រុងបេរូត។ នៅក្នុងបទសម្ភាសន៍ជាមួយ ទស្សនាវដ្តី Time នៅថ្ងៃទី 5 ខែមីនា លោកបាននិយាយថា សហរដ្ឋអាមេរិកអាចសម្រេចគោលដៅរបស់ខ្លួន ក្នុងយុទ្ធនាការប្រឆាំងនឹងអ៊ីរ៉ង់ក្នុងរយៈពេល 4-5 សប្តាហ៍ ប៉ុន្តែលោកមិនបានកំណត់ថ្ងៃផុតកំណត់ទេ ពីព្រោះលោកចង់ «ធ្វើការងារនេះឲ្យបានសម្រេច»។ 

(ឥណ្ឌូនេស៊ី)៖ ប្រទេសឥណ្ឌូនេស៊ីបានប្រកាសហាមឃាត់ការចូលប្រើប្រព័ន្ធផ្សព្វផ្សាយសង្គមសម្រាប់កុមារអាយុក្រោម 16 ឆ្នាំ ដោយសារតែមានការព្រួយបារម្ភអំពីហានិភ័យដូចជារូបភាពអាសអាភាស ការឆបោកតាមអ៊ីនធឺណិត និងការញៀនអ៊ីនធឺណិត។ រដ្ឋមន្ត្រីក្រសួងទំនាក់ទំនងឥណ្ឌូនេស៊ី លោកស្រី Meutya Hafid បានប្រកាសនៅថ្ងៃនេះថា គណនីរបស់កុមារអាយុក្រោម 16 ឆ្នាំនៅលើវេទិកាដែលមានហានិភ័យខ្ពស់នឹងចាប់ផ្តើមបិទ ដោយចាប់ផ្តើមជាមួយ YouTube, TikTok, Facebook, Instagram, Threads, X, Bigo Live និង Roblox។ ការ​អនុវត្ត​បទប្បញ្ញត្តិ​ថ្មី​នឹង​ចាប់ផ្តើម​នៅ​ថ្ងៃទី 28 ខែមីនា ខាងមុខនេះ។ ការហាមឃាត់​នេះ​នឹង​ត្រូវ​បាន​អនុវត្ត​ជា​ដំណាក់កាល «រហូត​ដល់​វេទិកា​ទាំងអស់​បំពេញ​កាតព្វកិច្ច​អនុលោម​តាម​ច្បាប់​របស់​ខ្លួន»។ នេះបើយោងតាមកាសែត The  Straits Times។​មូលហេតុចម្បងនៃការចេញបទប្បញ្ញត្តិថ្មីនេះ ដោយសង្កេតឃើញថាកុមារជាច្រើន កំពុងប្រឈមមុខនឹង ការគំរាមកំហែងធ្ងន់ធ្ងរកាន់តែខ្លាំងឡើង ខណៈហានិភ័យទាំងនេះមានចាប់ពីការប៉ះពាល់ នឹងរូបភាពអាសអាភាស ការធ្វើបាបតាមអ៊ីនធឺណិត ការឆបោកតាមអ៊ីនធឺណិត និងសំខាន់បំផុតគឺការញៀនអ៊ីនធឺណិ។ នេះជាសម្ដីលោកស្រី Meutya Hafid រដ្ឋមន្ត្រីក្រសួងទំនាក់ទំនងឥណ្ឌូនេស៊ី ។​បទប្បញ្ញត្តិ «គឺជា​វិធានការ​ដ៏​ល្អ​បំផុត» ដើម្បី​ដោះស្រាយ «ភាព​អាសន្ន​ផ្នែក​ឌីជីថល» លោករដ្ឋមន្ត្រី Hafid បានសង្កត់ធ្ងន់ថា «យើងកំពុងចាត់វិធានការដើម្បីការពារអនាគតរបស់កុមារ។ យើងចង់ឱ្យបច្ចេកវិទ្យាជួយ មនុស្សឱ្យកាន់តែមានចិត្តមនុស្សធម៌ មិនមែនដើម្បីលះបង់កុមារភាពរបស់កុមារនោះទេ»។ នៅក្នុងសេចក្តីថ្លែងការណ៍ មួយមុនពេលមានការហាមឃាត់នេះ លោកស្រីបាននិយាយថា ការប្រើប្រាស់វេទិកាឌីជីថលខុសអាច ប៉ះពាល់ដល់សុខភាពផ្លូវចិត្ត និងការអភិវឌ្ឍរបស់កុមារ។ រដ្ឋមន្ត្រី​បាន​ព្រមាន​ថា វេទិកា​ដែល​មិន​បាន​បំពេញ​កាតព្វកិច្ច​របស់​ខ្លួន​ក្នុង​ការ​ការពារ​កុមារ​នឹង​ប្រឈម​នឹង​ទណ្ឌកម្ម។ជាមួយនឹងវិធានការចុងក្រោយនេះ ប្រទេសឥណ្ឌូនេស៊ីបានក្លាយជាប្រទេសដំបូងគេនៅអាស៊ីអាគ្នេយ៍ ដែលហាមឃាត់កុមារអាយុក្រោម 16 ឆ្នាំពីការប្រើប្រាស់ប្រព័ន្ធផ្សព្វផ្សាយសង្គម។ 

(អន្តរជាតិ)៖   ប្រេងឆៅ WTI របស់​អាមេរិក​បាន​ឡើង​ថ្លៃ​ជាង ១២% នៅ​ក្នុង​វគ្គ​ជួញដូរ​ចុងក្រោយ​នៃ​សប្តាហ៍​នេះ។ នៅក្នុងទីផ្សារថាមពល តម្លៃប្រេងឆៅគោលពីរសំខាន់ៗរបស់ពិភពលោក សុទ្ធតែបានលើសពី 90 ដុល្លារក្នុងមួយបារ៉ែលនៅចុងសប្តាហ៍នេះ គិតត្រឹមថ្ងៃទី៧ ខែមីនា។ ប្រេងឆៅប្រភេទ Brent បានកើនឡើង 8.5% ដល់ 92.7 ដុល្លារក្នុងមួយបារ៉ែល ខណៈដែលប្រេងឆៅប្រភេទ WTI របស់សហរដ្ឋអាមេរិកបានកើនឡើង 12.2% ដល់ 90.9 ដុល្លារ។ នេះបើយោងតាម CNBC ។តម្លៃប្រេងបានកើនឡើងយ៉ាងខ្លាំងពេញមួយសប្តាហ៍កន្លងមកនេះ ដោយសារតែជម្លោះនៅមជ្ឈិមបូព៌ា ដែលរំខានដល់ខ្សែសង្វាក់ផ្គត់ផ្គង់សកល។  លោក Giovanni Staunovo អ្នកវិភាគនៅ UBS បានពន្យល់ថា "រោងចក្រចម្រាញ់ប្រេង និងពាណិជ្ជករកំពុងស្វែងរកប្រភពផ្គត់ផ្គង់ជំនួស ហើយសហរដ្ឋអាមេរិកឥឡូវនេះគឺជាអ្នកផលិតប្រេងធំជាងគេ"។ ប្រេងឆៅប្រភេទ Brent ទទួលបានការកើនឡើងខ្លាំងបំផុតប្រចាំសប្តាហ៍ចាប់តាំងពីដើមឆ្នាំ ២០២០ នៅពេលដែលជំងឺរាតត្បាតបានផ្ទុះឡើង។ នៅក្នុងបទសម្ភាសន៍ជាមួយ កាសែត Financial Times នៅថ្ងៃទី ៦ ខែមីនា រដ្ឋមន្ត្រីក្រសួងថាមពលកាតា លោក Saad Sherida al-Kaabi បានព្រមានថា ជម្លោះអាចបង្ខំឱ្យប្រទេសផលិតប្រេងនៅឈូងសមុទ្រទាំងអស់បញ្ឈប់ការនាំ ចេញនៅក្នុងសប្តាហ៍ខាងមុខនេះ ដែលជំរុញឱ្យតម្លៃប្រេងឡើងដល់ ១៥០ ដុល្លារក្នុងមួយបារ៉ែល។